May 2023

U T Khadar files nomination for the post of Speaker ಸ್ಪೀಕರ್ ತಾನಗ್ ನಾಮಪತ್ರ ಸಂದಾಯಿನ ಯುಟಿ ಖಾದರ್

ಕಾಂಗ್ರೆಸ್ ಶಾಸಕೆ ಯುಟಿ ಖಾದರ್ ವಿಧಾನಸಭೆತ್ತ ಸ್ಪೀಕರ್ ಆಪಿನ ಗ್ಯಾರಂಟಿ ಆತ್ಂಡ್. ಅಂಚಾದ್ ಮೇರ್ ವಿಧಾನಸಭೆ ಕಾರ್ಯದರ್ಶಿ ವಿಶಾಲಾಕ್ಷಿ ಮೆರೆಡ ಸ್ವೀಕರ್ ತಾನನ್ ನಾಮಪತ್ರ ಸಂದಾಯೆರ್.

ಈ ಪೊರ್ತುಡು ಸಿಎಂ ಸಿದ್ದರಾಮಯ್ಯ, ಡಿಸಿಎಂ‌ ಡಿಕೆ ಶಿವಕುಮಾರ್, ಶಾಸಕೆರ್ ಅಜಯ್ ಸಿಂಗ್ ಸೇರಿನಂಚನೆ ಸುಮಾರ್ ಇತ್ತೆರ್.‌ ಬೊಕ್ಕ ಖಾದರ್ ಮೇರ್ ಸಿದ್ದರಾಮಯ್ಯ ಮೆರೆನ್ ಭೇಟಿ ಆದ್ ಸೊಲ್ಮೆ ಸಂದಾಯೆರ್.

MLA Rajesh Naik from Bantwal constituency takes oath ಪ್ರಮಾಣವಚನ ಸ್ವೀಕಾರ ಮಲ್ತಿನ ಬಂಟ್ವಾಳ ಶಾಸಕೆರ್ ರಾಜೇಶ್‌ ನಾೖಕ್

ಕುಡ್ಲ: ರಾಜ್ಯದ 16ನೇ ವಿಧಾನಸಭೆತ್ತ ಸುರುತ್ತ ಇಸೇಸ ಅಧಿವೇಶನ ಕೋಡೆರ್ದ್ ಮೇ24 ಮುಟ್ಟ ನಡಪರೆ ಉಂಡು.

ಬೆಂಗ್ಲೂರ್ ಡ್ ಕೋಡೆ ನಡತಿನ ಸುರುತ್ತ ಅಧಿವೇಶನಡ್ ಬಂಟ್ವಾಳ ಕ್ಷೇತ್ರದ ಶಾಸಕೆರ್ ರಾಜೇಶ್‌ ನಾೖಕ್‌ ದೇವೆರೆ ಪುದರ್ ಡ್ ಅಧಿಕಾರ ಪದ ಬೊಕ್ಕ ಗೌಪ್ಯತಾ ಪ್ರಮಾಣವಚನ ಸ್ವೀಕಾರ ಮಲ್ತೆರ್.

Vacancies in DRDO DRDO ಡ್ ಬೇಲೆ

DRDO ಡ್ ಗ್ರಾಜುಯೇಟ್, ಡಿಪ್ಲೊಮಾ, ಐಟಿಐ ಅಪ್ರೆಂಟಿಸ್ ಬೇಲೆಗ್ ಆನ್ ಲೈನ್ ಮುಖೇನ ಅರ್ಜಿ ಪಾಡೊಲಿ.

ಪದವೀಧರ, ಡಿಪ್ಲೊಮಾ, ಐಟಿಐ ಪಾಸ್ ಆಯಿನ ಅಭ್ಯರ್ಥಿಲು drdo.gov.in ವೆಬ್‌ಸೈಟ್ ಗ್ ಭೇಟಿ ಕೊರ್ಪಿನ ಮುಖೇನ ಅರ್ಜಿ ಸಂದಾವೊಲಿ. ಆನ್ ಲೈನ್ ಅಪ್ಲಿಕೇಶನ್ ಮೇ20 ರ್ದ್ ಸುರು ಆಪುಂಡು. ಮೇ30 ಅಕೇರಿದ ತಾರೀಕ್ ಆತ್ಂಡ್. ಆಯ್ಕೆಯಾಯಿನ ಬೊಕ್ಕ, ಗ್ರಾಜುಯೇಟ್ ಇಂಜಿನಿಯರ್ ಅಪ್ರೆಂಟಿಸ್ ಗ್ 12 ಸಾರ, ಡಿಪ್ಲೊಮಾ‌ ಅಪ್ರೆಂಟಿಸ್ ಗ್ 11 ಸಾರ, ಐಟಿಐ ಅಪ್ರೆಂಟಿಸ್ ಗ್ ತಿಂಗೊಲ್ ಗ್ 10 ಸಾರ ತಿಕ್ಕುಂಡು.

Vacancies in DRDO

Applications invited online from graduates, Diploma and ITI apprentice in DRDO.

For more information visit their website
drdo.gov.in

U T Kadhar has been selected as Speaker at the Vidhanasabha ವಿಧಾನಸಭೆತ್ತ ಪೊಸ ಸ್ಪೀಕರ್ ಆದ್ ಯು.ಟಿ ಖಾದರ್ ಆಯ್ಕೆ

ವಿಧಾನಸಭೆತ್ತ ಪೊಸ ಸ್ಪೀಕರ್ ಆದ್ ರಡ್ಡ್ ವರ್ಷ ಮುಟ್ಟ ಕುಡ್ಲ ಕ್ಷೇತ್ರದ ಶಾಸಕೆರ್ ಯು.ಟಿ ಖಾದರ್ ಆಯ್ಕೆ ಆತೆರ್.

ಮೇರ್ 5 ಸರ್ತಿ ಕುಡ್ಲ ವಿಧಾನಸಭೆ ಕ್ಷೇತ್ರರ್ದ್ ಶಾಸಕೆರಾದ್ ಆಯ್ಕೆ ಆತೆರ್. ಮೆರೆನ ಹಿರಿತನ, ಭ್ರಷ್ಟಾಚಾರ ಇಜ್ಜಂದಿನ ಆಡಳಿತ, ಮಾತೆರೆನೊಟ್ಟಿಗೆ ಸೇರೊಂದು ಆಡಳಿತ ನಡಪಾವುನ ಶೈಲಿನ್ ತೂದು ಕಾಂಗ್ರೆಸ್ ಸ್ಪೀಕರ್ ತಾನನ್ ಆರೆಗ್ ಬೂರ್ದು ಕೊರ್ತುಂಡು.

U T Kadhar has been selected as Speaker at the Vidhanasabhaa

U T Kadhar who has been a MLA of Mangalore constituency for five times in a row has been appointed as the speaker at the Vidhanasabha for a time of two years .His seniority, a corruption free record and a management style that is all inclusive has taken him to this prestigious post .

MLA Vedavyas Kamath takes oath wearing a shawl representing Tulunadu ತುಳು ಕೊಡಿತ್ತ ಶಾಲ್ ಪಾಡ್ದ್ ಪ್ರಮಾಣ ವಚನ ಸ್ವೀಕಾರ ಮಲ್ತಿನ ಶಾಸಕೆರ್ ವೇದವ್ಯಾಸ ಕಾಮತ್

ಬೆಂಗ್ಲೂರ್: ಕುಡ್ಲ ದಕ್ಷಿಣದ ಶಾಸಕೆರ್ ವೇದವ್ಯಾಸ ಕಾಮತ್ ಮೇರ್ ಅಂಗಾರೆ ವಿಧಾನಸಭೆತ್ತ ಸುರುತ್ತ ಅಧಿವೇಶನದಾನಿ ತುಳುನಾಡ್ ಬೊಕ್ಕ ದೇವೆರ್ನ ಮಿತ್ತ್ ಪ್ರಮಾಣ ವಚನ ಸ್ವೀಕಾರ ಮಲ್ತ್ ದ್ ತುಳುವೆರ್ನ ಮೆಚ್ಚಿಗೆ ಪಡೆತೆರ್.

ಮೇರ್ ತುಳುನಾಡ್ ದ ಪುದರ್ ಡ್ ಬೊಕ್ಕ ದೇವೆರೆನ ಪುದರ್ ಡ್ ಪ್ರಮಾಣವಚನ ಮಲ್ತಿನಿ ಅತ್ತಾಂದೆ ತುಳು ಕೊಡಿತ್ತ ಶಾಲ್ ಪಾಡ್ದ್ ಮಾತೆರೆನಲ ಆಕರ್ಷಣೆಗ್ ಕಾರಣ ಆಯೆರ್.

ತನ್ನನೇ ಬಿಜೆಪಿ ಪಕ್ಷದ ಆಡಳಿತ ಉಪ್ಪುನಗ ಮೆರೆಗ್ ತುಳುವೆರ್ನ ಬೇಡಿಕೆ ನಡಪಾದ್ ಕೊರಿಯರೆ ಆಯಿಜಿಡಲ ತುಳು ಬಾಸೆ ಒರಿಪುನ ಬಗೆಟ್ಟ್ ಕೆಲವು ಪ್ರಯತ್ನ ಮಲ್ದೆರ್.

ತುಳು ಬಾಸೆನ್ ರಾಜ್ಯದ ರಡ್ಡನೇ ಅಧಿಕೃತ ಬಾಷೆ ಮಲ್ಪಾವುನ ನಿಲೆಟ್ಟ್ ವೇದವ್ಯಾಸ ಕಾಮತ್, ಉಮಾನಾಥ ಕೋಟ್ಯಾನ್, ಯು.ಟಿ.ಖಾದರ್ ಅಂಚೆನೆ ತುಳುನಾಡ್ ದ ಮಾತ ಶಾಸಕೆರ್ ನಕುಲು ಈ ಸರ್ತಿ ಆಂಡಲ ತುಳುವೆರ್ನ ಬೇಡಿಕೆ ನಡಪಾದ್ ಕೊರ್ಪೆರಾ ಪನ್ಪಿನ ಅಂಗಲಾಪು ತುಳುವೆರ್ನ.

” Tuluverankulu” Bangalore celebrate ” Bisu Parbha” ಬೆಂಗಳೂರುದ “ತುಳುವೆರೆಂಕುಲು ಮುತಾಲಿಕೆಡ್ ತುಳುನಾಡ ಬಿಸು ಪರ್ಬ ಆಚರಣೆ

ರಾಜಬೂಡು ಬೆಂಗಳೂರುದ ಪುಗಾರ್ತೆದ ತುಳು ಸಂಘಟನೆ “ತುಳುವೆರೆಂಕುಲು ಬೆಂಗಳೂರು (ರಿ)” ದ ವಾರ್ಷಿಕ ಉಚ್ಚಯ ” ಬಿಸು ಪರ್ಬ” ಆಚರಣೆ ರವೀಂದ್ರ ಕಲಾಕ್ಷೇತ್ರದ ನಯನ ಸಭಾಂಗಣಡ್ ವೈ. ಜಯಂತ್ ರಾವ್ ಮೆರೆನ ಗುರ್ಕಾರ್ಮೆಡ್, ಮೇ 21 ಐತಾರದಾನಿ ನಡತ್ಂಡ್.

ಕೂಟದ ಪ್ರಧಾನ ಕಾರ್ಯಂತೆರ್ ಪಳ್ಳಿ ವಿಶ್ವನಾಥ್ ಶೆಟ್ಟಿ ಮಾತೆರೆನ್ಲಾ ಮೋಕೆಡ್ ಎದುಕೊಂಡೆರ್. ಅಖಿಲ ಭಾರತ ತುಳು ಒಕ್ಕೂಟದ ಸಂಘಟನಾ ಕಾರ್ಯಂತೆರ್ ಡಾ. ರಾಜೇಶ್ ಆಳ್ವ ಬದಿಯಡ್ಕ ಮಲ್ಲ ಬಿನ್ನೆರಾದ್ ಲೇಸ್ ಉದಿಪನ ಮಲ್ತೆದ್, ಬಿಸು ಆಚರಣೆದ ಹಿನ್ನೆಲೆ, ಮಹತ್ವದ ವಿಚಾರೊಡು ಪೊಲಬು ಕೊರಿಯೆರ್. ನಮ “ತುಳುವೆರ್” ತುಳು ಕ್ಯಾಲೆಂಡರ್ದ ಬದಲ್ಗ್ ಇಂಗ್ಲಿಷ್ ಕ್ಯಾಲೆಂಡರ್ನೇ ಎಚ್ಚ ಬಳಕೆ ಮಲ್ತೊಂದಿಪ್ಪುನವು ತುಳು ಸಂಸ್ಕೃತಿ ಮದೆ ಆವರೆ ಕಾರಣ ಆಪುಂಡುಂದು ಕಳಕಳಿಡ್ ಪಂಡೆರ್. ತುಳುವೆರೆಂಕುಲು ನಿಕಟಪೂರ್ವ ಗುರ್ಕಾರ್ಲು ಕೆ.ಎಲ್. ರಾಮಾನಾಥ್ ಭಟ್ ಮೇರ್ ಪಾತೆರ್ದ್, ಆಧುನಿಕತೆದ ಭರಾಟೆಡ್ ಮದೆ ಆವೊಂದುಪ್ಪುನ ತುಳು ಭಾಷೆ ಸಂಸ್ಕೃತಿನ್ ಪೊಸ ಪೀಳಿಗೆಗ್ ತೆರಿಪಾದ್ ಕೊರ್ಪಿನ ಕಜ್ಜ ನಿರಂತರವಾದ್ ನಡಪಾವೊಡುಂದು ಲೆಪ್ಪು ಕೊರಿಯೆರ್. ತುಳುವೆರೆಂಕುಲು ಹಿರಿಯ ನಿಕಟ ಪೂರ್ವ ಗುರ್ಕಾರ್ಲು, ಚಿಂತಕೆರ್, ವಾಗ್ಮಿಲು ಪ್ರೊ. ಕೆ. ಪಿ. ಪುತ್ತೂರಾಯೆರ್ ಪಾತೆರ್ದ್, ತುಳುವೆರ್ ಪಂಚ ಸೂತ್ರೊಲಾಯಿನ ಸಂಸ್ಕಾರ, ಸ್ವಾಭಿಮಾನ, ಸ್ವಾವಲಂಬನೆ, ಸಹಕಾರ, ಸಂಘಟನೆಲೆನ್ ಜೀವನದುದ್ದೊಗುಲ ಪರಿಪಾಲನೆ ಮಲ್ತೊಂದು, ತುಳು ಭಾಷೆ ಸಂಸ್ಕೃತಿನ್ ಮೆರೆಪಾವೊಡುಂದು ಲೆಪ್ಪು ಕೊರಿಯೆರ್. ತುಳುವೆರೆಂಕುಲು ಗುರ್ಕಾರ್ಲು ವೈ. ಜಯಂತ್ ರಾವ್ ಗುರ್ಕಾರ್ಮೆದ ಮದಿಪು ಕೊರಿಯೆರ್. ತುಳುವೆರೆಂಕುಲು ಸಂಸ್ಥೆದ ಮುಕೇನ ತುಳು ಭಾಷೆ ಸಂಸ್ಕೃತಿದ ಬುಳೆಚಿಲ್ಗ್ ಪೊರ್ಂಬಾಟ ಮಾಲ್ದಿನ ಮಾತಾ ತುಳು ಗನ್ಯೆರೆನ್ ನೆನೆತೊಂದು ಕೊಂಡಾಡಿಯೆರ್.

ಟಿ.ಎಸ್. ನಾಗರಾಜ ಉಪಾಧ್ಯಾಯ ಸಾಂಪ್ರದಾಯಿಕವಾದ್, ತುಳು ನಾಡ್ಡ ಕಟ್ಟ್ ಕಟ್ಲೆ ಪ್ರಕಾರ ‘ಬಿಸು ಪರ್ಬ ಆಚರಣೆ’ ಸುಧಾರ್ಮೆ ಮಲ್ತೆರ್. ಬಹು ಭಾಷಾ ತಾರಾ ಗಾಯಕೆ ಡಾ. ರಮೇಶ್ಚಂದ್ರ, ಬೆದ್ರದ ಬಿಜೆಪಿ ಮುಖಂಡೆರ್ ಜಗದೀಶ ಅಧಿಕಾರಿ, ಭಾರತ ರಕ್ಷಣಾ ವೇದಿಕೆದ ಅಧ್ಯಕ್ಷೆ, ಯುವ ನಾಯಕೆ, ತುಳು ಹೋರಾಟಗಾರೆ ಭರತ್ ಶೆಟ್ಟಿ ಕುಂಪಲ, ಬೆಂಗಳೂರು ತುಳುಕೂಟದ ಪ್ರಧಾನ ಕಾರ್ಯಂತೆರ್ ಸುಂದರ್ ರಾಜ್ ರೈ, ರಾಜ್ಯ ಕಿಸಾನ್ ಮೋರ್ಚಾದ ಅಧ್ಯಕ್ಷೆರ್ ರೇಣುಕಾ ಪ್ರಸಾದ್ ವಿಶೇಷ ಬಿನ್ನೆರಾದ್ ಲೇಸ್ ಗ್ ಪೊರ್ಲು ದಿಂಜಾಯೆರ್. ಡಾ. ಕೆ.ಎನ್ ಅಡಿಗ ಲೇಸ್ ದ ನಿರೂಪನೆ ಮಲ್ತೆರ್. ಮುಕುಂದ ಪೈ ತಂಡದ ತುಳು ಪದರಂಗಿತ ಜನ ಮೆಚ್ಚಿಗೆ ಪಡೇಂಡ್. ಪದಂತೆರ್ನಕುಲಾಯಿನ ಪಿ.ಎನ್. ವಿಷ್ಣುಮೂರ್ತಿ, ಜಲಜಾ ಶೇಖರ್, ಚಾರ್ಲ್ಸ್ ಗೋಮ್ಸ್, ಗೋಪಾಲ್ ಪೂಜಾರಿ ಪಟ್ಟೆ, ನಿಧಿಶ್ ಶೆಟ್ಟಿ, ಸದಾನಂದ ಪೂಜಾರಿ ಕಾರ್ಲ, ಶೇಖರ್. ಎಸ್, ವೀಣಾ ರಾವ್ ಮೊಕುಲು ಲೇಸ್ ಸುಧಾರಿಗ್ ಸರ್ವ ಸಕಾಯ ಕೊರಿಯೆರ್. ತುಳುವೆರೆಂಕುಲು ಒತ್ತು ಗುರ್ಕಾರ್ಲು ಚಂದ್ರಹಾಸ್.ಎಸ್ ಸರ್ವೆರೆಗ್ಲಾ ಬುಡುಉಡಲ್ದ ಸೊಲ್ಮೆ ಸಂದಾಯೆರ್.

– ವರದಿ : ಸದಾನಂದ ಕಾರ್ಲ
ಪ್ರಧಾನ ಕಾರ್ಯಂತೆರ್
ತುಳುವೆರೆಂಕುಲು ಬೆಂಗಳೂರು(ರಿ)

” Tuluverankulu” Bangalore celebrate
” Bisu Parbha”

Tuluverankulu Bangalore (R) celebrated ” Bisu Parbha” on 21-5-2023 under the leadership of Sri Y Jayant Rao in a grand manner.

Chief Secretary Palli Vishwanath Shetty welcomed. Dr Rajesh Alva secretary of Akila Bharatha Tulu Okkuta was the guest of honour and explained to the gathering the significance and the cultural backdrop for celebrating Bisu in Tulunadu.

A volcano even bigger than Mount Everest discovered on planet Mars!! ಮಂಗಳ ಗ್ರಹಟ್ಟ್ ಮೌಂಟ್ ಎವರೆಸ್ಟ್ ರ್ದ್ ಮಲ್ಲ ಜ್ವಾಲಾಮುಖಿ!

ಬಾಹ್ಯಾಕಾಶ ಸಂಸ್ಥೆ ನಾಸಾ ಮಂಗಳ ಗ್ರಹಟ್ ಮಲ್ಲ ಜ್ವಾಲಾಮುಖಿನ್ ಪತ್ತೆ ಮಲ್ದ್ಂಡ್.

ಆಯಿಕ್ಕ್ ‘ಎಸ್ಕೇರಿಯಸ್ ಮಾನ್ಸ್’ ಪಂದ್ ಪುದರ್ ದೀತೆರ್. ವಿಜ್ಞಾನಿಲೆನ ಪ್ರಕಾರ, ಎಸ್ಕೇರಿಯಸ್ ಮಾನ್ಸ್ ಮಂಗಳ ಗ್ರಹದ ರಡ್ಡನೇ ಮಲ್ಲ ಎತ್ತರದ ಮೌಂಟ್ ಎವರೆಸ್ಟ್ ದ ಎತ್ತರರ್ದ್ 8,848 ಮೀಟರ್ ಎತ್ತರಡ್ ಉಂಡು ಪಂದ್ ಪಂತ್ಂಡ್. ಎಸ್ಕೇರಿಯಸ್ ಮಾನ್ಸ್ ಮಂಗಳದ ಥಾರ್ಸಿಸ್ ಪ್ರದೇಶಡ್ ಉಂಡು. ನೆತ್ತ ಅಡಿ 480 ಕಿಮೀ ಆತ್ಂಡ್.

” Yoga Suyoga” series program on Radio Manipal ರೇಡಿಯೊ ಮಣಿಪಾಲ್ ಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 8ನೇ ಸಂಚಿಕೆ ಮೇ22 ಸೋಮಾರ ಬಯ್ಯಗ್ 4.15ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರಾಯಿನ ಆರ್ ಶಿವಕುಮಾರ್ ಪಾಲ್ ಪಡೆಯೆರ್. ನನ ಮೇ23 ಕ್ಕ್ ಮಧ್ಯಾಹ್ನ 12.15ಕ್ಕ್ ಕುಡೊರ ಪ್ರಸಾರ ಆಪುಂಡು.

Senior actor Sharath Babu of Amruthavarshini fame no more ಅಮೃತ ವರ್ಷಿಣಿ ಪುಗರ್ತೆ ದ ಪೆರಿಯ ನಟೆ ಶರತ್ ಬಾಬು ನನ ನೆಂಪು ಮಾತ್ರ

ಕನ್ನಡದ ಹಿಟ್ ಸಿನೆಮಾ ಅಮೃತವರ್ಷಿಣಿಡ್ ನಟನೆ ಮಲ್ಪುನ ಮುಖೇನ ಕನ್ನಡದಕ್ಲೆಗ್ ಗುರ್ತ ಆಯಿನ ಪುಗರ್ತೆದ ಪೆರಿಯ ನಟೆ ಶರತ್ ಬಾಬು ದೇವೆರೆ ಪಾದೊ ಸೇರಿಯೆರ್.

1951 ಟ್ ಆಂಧ್ರಪ್ರದೇಶಡ್ ಪುಟ್ಟಿನ ಮೇರ್, ಸುಮಾರ್ 4 ಜನ ದಶರ್ಕದಿಂಚ ಕನ್ನಡ, ತೆಲುಗು ಸೇರಿನಂಚನೆ ಸುಮಾರ್ ಭಾಷೆಡ್ ಅಭಿನಯ ಮಲ್ದೆರ್. ಕನ್ನಡದ 20 ರ್ದ್ ಎಚ್ಚ ಪಿಕ್ಚರ್ ಸೇರಿನಂಚನೆ ಇಡೇ ಮುಟ್ಟ 200 ರ್ದ್ ಎಚ್ಚ ಪಿಕ್ಚರ್ ಡ್ ಮೇರ್ ನಟನೆ ಮಲ್ದೆರ್. ‌

Nagamandala at Tokur Subramanya temple – Lakhs of devotees expected ತೋಕೂರು ಸುಬ್ರಹ್ಮಣ್ಯ ದೇವಲ್ಯಡ್ ನಾಗಮಂಡಲ; ಲಕ್ಷಾಂತರ ಭಕ್ತೆರ್ನ ನಿರೀಕ್ಷೆ

ತೋಕೂರು: ಪುನರ್ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಆದ್ ಕಳೆ ದಿಂಜಿನ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಮೇ 23 ಅಂಗಾರೆದಾನಿ ಸರಿ ಸುಮಾರ್ 36 ವರ್ಷೊರ್ದು ಬೊಕ್ಕ ನಾಗಮಂಡಲೋತ್ಸವ ನಡಪರೆ ಉಂಡು.

ನಾಗಮಂಡಲ ಉಚ್ಚಯೊಡು ಲಕ್ಷಾಂತರ ಭಕ್ತೆರ್ ಪಾಲ್ ಪಡೆವುನ ನಿರೀಕ್ಷೆ ಇತ್ತ್ ದ್ ಸರ್ವ ರೀತಿಡ್ ಲ ಸಿದ್ಧತೆ ಆದ್ ನಾಗದೇವೆರ್ ಬೊಕ್ಕ ಭಕ್ತೆರೆನ ಭೇಟಿಗ್ ಕ್ಷಣಗಣನೆ ಸುರುವಾತ್ಂಡ್.

ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ 36 ವರ್ಷದ ಪಿರವು ಬ್ರಹ್ಮಕಲಶದ ಪೊರ್ತುಡು 1987ನೇ ಮೇ 6 ಕ್ಕ್ ನಾಗಮಂಡಲ ನಡತ್ ದಿತ್ತ್ಂಡ್.

ದೇವಸ್ಥಾನದ ವಠಾರಡ್ ಯುವಕ ಸಂಘದ ಎದುರುದ ವಿಶಾಲವಾಯಿನ ಕಂಡೊಡು ದೊಂಪ ಪಾಡ್ದ್ ವೇದಿಕೆ ಮಲ್ತ್ ದ್ ಮಂಡಲೊಗು ತಯಾರ್ ಮಲ್ದ್ಂಡ್. ಬರ್ಸದ ಅಂದಾಜಿ ಇತ್ತಿನೆರ್ದಾವರ ರಕ್ಷಣೆಗಾದ್ ತಗಡ್ ಶೀಟ್‌ ದ ವ್ಯವಸ್ಥೆ ಲ ಮಲ್ದೆರ್. ಭಕ್ತೆರೆಗ್ ಅನುಕೂಲ ಆಪಿನಂಚ ಸುತ್ತಮುತ್ತ ವಿಶೇಷ ವ್ಯವಸ್ಥೆ ಮಲ್ತ್ ದ್ ನಾಲ್ ಕಡೆರ್ದ್ ಲ ತೂವರೆ ಅವಕಾಶ ಮಲ್ದೆರ್.

ಬೊಲ್ಪುಗು ದೇವಲ್ಯಡ್ ವಿವಿಧ ಧಾರ್ಮಿಕ ವಿಧಿ ವಿಧಾನರ್ದ ಬೊಕ್ಕ ಬಯ್ಯಡ್ 6 ಗಂಟೆಗ್ ನಾಗದೇವೆರೆಗ್ ಹಾಲ್ಹಿಟ್ಟು ಸೇವೆ, ರಾತ್ರಿ 9 ಗಂಟೆರ್ದ್ ಸಗ್ರಿ ಶ್ರೀ ಗೋಪಾಲಕೃಷ್ಣ ಸಾಮಗೆರ್ನ ಮುತಾಲಿಕೆಡ್ ಮುದ್ದೂರು ಶ್ರೀ ಕೃಷ್ಣಪ್ರಸಾದ ವೈದ್ಯ ಬಳಗರ್ದ್ ನಾಗಮಂಡಲೋತ್ಸವ ನಡಪರೆ ಉಂಡು.

ನಾಗಮಂಡಲ ಉಚ್ಚಯ ಶ್ರೀ ಸುಬ್ರಹ್ಮಣ್ಯ ದೇವರೆಗ್ ಅತಿ ಪ್ರಿಯವಾಯಿನ ಸೇವೆಯಾಯಿನೆರ್ದಾವರ ಉಂದೆನ್ ತೂವರೆ ಲಕ್ಷಾಂತರ ಜನ ಬರ್ಪಿನ ಸಾಧ್ಯತೆ ಉಂಡು. ಈ ಪೊರ್ತುಡು ಭಕ್ತರೆಗ್ ಅನ್ನಪ್ರಸಾದದ ವ್ಯವಸ್ಥೆನ್ ಪಾಕತಜ್ಞ ವೆಂಕಟೇಶ್ ಭಟ್ ಮೆರೆನ ಕೂಟದಕುಲು ಮಲ್ತೊಂದುಲ್ಲೆರ್.

ಭಕ್ತೆರ್ ಐನ್ ಕಡೆರ್ದ್ ಕ್ಷೇತ್ರೊಗು ಗಾಡಿಡ್ ಬರ್ಪಿನೆರ್ದಾವರ ಅಲ್ಪಲ್ಪ ಪಾರ್ಕಿಂಗ್ ವ್ಯವಸ್ಥೆ ಮಲ್ತ್ ದ ಪಂದ್ ಪಾರ್ಕಿಂಗ್ ಸಮಿತಿದ ನಾರಾಯಣ ಸುವರ್ಣ ಬೊಕ್ಕ ಧರ್ಮಾನಂದ ಶೆಟ್ಟಿಗಾರ್ ತೆರಿಪಾಯೆರ್. ನಾಗಮಂಡಲೋತ್ಸವನ್ ತೂವರೆ ಬೃಹತ್ ಎಲ್‌ಇಡಿ ಪರದೆ ವ್ಯವಸ್ಥೆ ಮಲ್ತ್ ದ ಪಂದ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ತೆರಿಪಾದೆರ್.