ಹಳೆಯಂಗಡಿ: ಪುಗರ್ತೆದ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಉದಿಪನ ಆದ್ ರಡ್ಡೇ ವರ್ಷದ ಅವಧಿಡ್ ರೂ. 118 ಕೋಟಿ ವೈವಾಟ್ ಮಲ್ತ್ ದ್ ಠೇವಣಿದಾರೆರ್, ಗ್ರಾಹಕೆರ್ ಅಂಚೆನೆ ಜನಕ್ಲೆನ ಮೆಚ್ಚಿಗೆಗ್ ಕಾರಣ ಆತ್ಂಡ್ ಪಂದ್ ಸೊಸೈಟಿದ ಅಧ್ಯಕ್ಷೆರಾಯಿನ ಎಚ್. ವಸಂತ್ ಬೆರ್ನಾರ್ಡ್ ತೆರಿಪಾಯೆರ್.
ಹಳೆಯಂಗಡಿ ದ ಪ್ರಿಯದರ್ಶಿನಿ ಸಹಕಾರಿ ಸಂಘದ ರಡ್ಡನೇ ವರ್ಷದ ಸ್ಥಾಪನೇ ದಿನ ಲೇಸ್ ದ ಗುರ್ಕಾರ್ಮೆ ಒಯಿಸ್ ದ್ ಪಾತೆರಿಯೆರ್.
ಕೊರೊನಾ ಕಾಲರ್ದ್ ಬೊಕ್ಕದ ದಿನೊಕ್ಲೆಡ್ ಉದಿಪನ ಆಯಿನ ಪ್ರಿಯದರ್ಶಿನಿ ಸೊಸೈಟಿ, ಕಡಿಮೆ ಅವಧಿಡ್ ಠೇವಣಿದಾರೆರ್ ಗ್ರಾಹಕೆರ್ ಬೊಕ್ಕ ಸಿಬ್ಬಂದಿಲೆನ ಸಹಕಾರಡ್ ಈತ್ ಮಲ್ಲ ಸಾಧನೆ ಮಲ್ಪರೆ ಆಂಡ್ ಪಂಡೆರ್.
ದುಂಬುದ ದಿನೊಕ್ಲೆಡ್ ಸೊಸೈಟಿನ್ ನನಲ ಎಡ್ಡೆ ರೀತಿಡ್ ಅಭಿವೃದ್ಧಿ ಮಲ್ಪುನೆತ್ತೊಟ್ಟಿಗೆ ಕಾಲಿ ಲಾಭದ ಉದ್ದೇಶ ದೀವಂದೆ ಶಾಖೆಲೆನ್ ಕಟ್ಟ್ ದ್ ಒಂಜಾತ್ ಜನಕ್ಲೆಗ್ ಉದ್ಯೋಗ ದೆಪ್ಪಾದ್ ಕೊರ್ಪಿನ ಉದ್ದೇಶಲ ಉಂಡು ಪಂಡೆರ್.
*ಮಲ್ಲ ಬಿನ್ನೆರಾದ್ ಬತ್ತಿನ ಸ್ವರ್ಣಕುಂಭ ವಿವಿಧೋದ್ದೇಶ ಸಹಕಾರ ಸಂಘ (ನಿ.) ಸುರತ್ಕಲ್ ನೆತ್ತ ಅಧ್ಯಕ್ಷೆರ್ ನಾಗೇಶ್ ಕುಲಾಲ್ ಪಾತೆರ್ದ್,ಸಹಕಾರಿ ಸಂಘ ಬುಲೆವೊಡ್ಡ ನಂಬಿಕೆ ಮುಖ್ಯ. ಆ ನಂಬಿಕೆ ಒರಿಪುನವು ಮುಖ್ಯವಾದುಂಡು. ಅಂಚೆನೆ ಪ್ರಿಯದರ್ಶಿನಿ ಸೊಸೈಟಿದ ಉದಿಪನದ ಪೊರ್ತುಡು ಎಂಕುಲು ಕೊರ್ತಿನ ಸಕಾಯೊನು ನನ ದುಂಬಗ್ ಲ ಕೊರೊಂದುಲ್ಲ ಪಂದ್ ಪಂಡೆರ್.
ಕುಡೊರಿ ಬಿನ್ನೆ, ನಾದಶ್ರೀ ಕ್ರೆಡಿಟ್ ಕೋ-ಆಪರೇಟಿವ್ ಸೊಸೈಟಿ, ಒಡಿಪು ನೆತ್ತ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಕಾರ್ತಿಕ್ ಕುಮಾರ್ ಪಾತೆರ್ದ್, ಇತ್ತೆದ ಸ್ಪರ್ಧಾತ್ಮಕ ಯುಗೊಟ್ಟು ಸಹಕಾರಿ ಸಂಘೊನು ನಡಪಾವೊಂದು ಪೋಪಿನ ಮಲ್ಲ ಸವಾಲ್ ಆತ್ಂಡ್.ಇಂಚಿನ ಪೊರ್ತುಡು ಸಹಕಾರ ಸಂಘೊಲು ಒಂಜೆಕ್ಕೊಂಜಿ ಸಕಾಯ ಮಲ್ತ್ಂಡನೇ “ಸಹಕಾರ” ಪನ್ಪಿನ ಶಬ್ದಗ್ ಮಲ್ಲ ಅರ್ಥ ಬರ್ಪುಂಡು ಪಂಡೆರ್.
ನಿರ್ದೇಶಕೆರ್ ಡಾ.ಗಣೇಶ್ ಅಮೀನ್ ಸಂಕಮಾರ್ ಪ್ರಾಸ್ತಾವಿಕ ವಾದ್ ಪಾತೆರ್ದ್, ಪ್ರಿಯದರ್ಶಿನಿ ಸೊಸೈಟಿ ಪನ್ಪಿನ ರಡ್ಡ್ ವರ್ಷದ ಬಾಲೆ ಆಂಡಲ 20 ವರ್ಷದ ಜವನಾದಿಗೆದಾತ್ ಬುಲೆಚಿಲ್ ಆವರೆ ಮಾತಾ ಠೇವಣಿದಾರೆರ್ ಅಂಚೆನೆ ಜನಕ್ಲೆನ ಸಹಕಾರ ಕಾರಣ ಆತ್ಂಡ್. ನನ ದುಂಬುದ 5 ವರ್ಷಡ್ 100 ಕೋಟಿ ವೈವಾಟ್ ಆವಡ್, ಒಂಜಾತ್ ಜನಕ್ಕ್ ಉದ್ಯೋಗ ತಿಕ್ ದ್ ಅಕ್ಲೆನ ಕುಟುಂಬೊನು ಸಾಂಕುನ ಬೇಲೆ ಆವಡ್ ಪಂಡೆರ್.
ಸಿಇಒ ಸುದರ್ಶನ್ ಸಭೆ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.
ಈ ಲೇಸ್ ಡ್ ಗನ್ಯೆರಾಯಿನ ಶಶೀಂದ್ರ ಎಮ್ ಸಾಲ್ಯಾನ್, ರೆ. ಸ್ಟೀವನ್, ಸರ್ವೋತ್ತಮ ಮುಲ್ಕಿ, ಅಬ್ದುಲ್ ಖಾದರ್, ಅನಿಲ್ ಸಸಿಹಿತ್ಲು, ಚಂದ್ರ ಸಸಿಹಿತ್ಲು, ಉಪಾಧ್ಯಕ್ಷೆರಾಯಿನ ಪ್ರತಿಭಾ ಕುಳಾಯಿ, ನಿರ್ದೇಶಕೆರಾಯಿನ ಧನಂಜಯ ಮಟ್ಟು, ಗೌತಮ್ ಜೈನ್, ಶರತ್ ಶೆಟ್ಟಿ ಪಂಚವಟಿ, ಉಮಾನಾಥ್ ಜೆ. ಶೆಟ್ಟಿಗಾರ್, ಜೈಕೃಷ್ಣ ಕೋಟ್ಯಾನ್, ಗಣೇಶ್ ಪ್ರಸಾದ್ ದೇವಾಡಿಗ, ಧನ್ರಾಜ್ ಕೋಟ್ಯಾನ್, ಮಿರ್ಜಾ ಅಹಮ್ಮದ್, ಶೆರಿಲ್ ಅಯೋನ ಐಮನ್, ಹರೀಶ್ ಪುತ್ರನ್, ನವೀನ್ ಸಾಲ್ಯಾನ್ ಪಂಜ, ಸಂದೀಪ್ ಇತ್ತೆರ್.
