May 2023

Let holy places be the seat of religious awareness -Vishwaprassanna Thirtha Swamiji ಧಾರ್ಮಿಕ ಕ್ಷೇತ್ರಡ್ ಧರ್ಮದ ಜಾಗೃತಿ ನಡಪಡ್: ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ

ತೋಕೂರು : ಧಾರ್ಮಿಕ ಕ್ಷೇತ್ರಲೆನ ಮುಕೇನ ಧರ್ಮದ ಜಾಗೃತಿ ಆವೊಡು. ಭಕ್ತಿದ ಆಲಯಡ್ ಭಕ್ತೆರ್ನ ನಿಸ್ವಾರ್ಥ ಸೇವಾ ಸಂಪನ್ನತೆ ಹೆಚ್ಚಾನಗ ಕ್ಷೇತ್ರ ಬೆಳಗರೆ ಎಚ್ಚ ಪೊರ್ತು ಬೋಡಾಪುಜಿ. ಜೋಕುಲೆಗ್ ಪುದರ್ ದೀಪಿನೆರ್ದೇ ಸಂಸ್ಕಾರ ಸುರು ಆವೊಡು. ನಮ್ಮ ಹಿಂದೂ ಸಂಸ್ಕೃತಿ ಇಲ್ಲ್ ಇಲ್ಲರ್ದೇ ಬೆಳಗ್ಂಡ್ ಅವು ಜಗತ್ತ್ ಗೇ ಬೊಲ್ಪಾಪುಂಡು ಪಂದ್ ಒಡಿಪು ಅಧೋಕ್ಷಜ ಪೇಜಾವರ ಮಠದ ವಿಶ್ವಪ್ರಸನ್ನತೀರ್ಥ ಸ್ವಾಮೀಜಿ ತೆರಿಪಾಯೆರ್.

ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ನಡಪುನ ಪುನಃಪ್ರತಿಷ್ಠೆ ಬ್ರಹ್ಮಕುಂಭಾಷೇಕ ಬೊಕ್ಕ ನಾಗಮಂಡಲೋತ್ಸವದ ಧರ್ಮಸಭೆಟ್ಟ್ ಆರ್ ಅನುಗ್ರಹ ಸಂದೇಶ ಕೊರಿಯೆರ್.

ಶಾಸಕೆರೆನ್ ಉಮಾನಾಥ ಎ. ಕೋಟ್ಯಾನ್ ಅಧ್ಯಕ್ಷತೆ ವಹಿಸ್ ದ್ ದೇವಸ್ಥಾನ ಕಡಿಮೆ ಅವಧಿಡ್ ಪೂರ್ಣ ಆವೊಡ್ಡ ಭಕ್ತರೆನ ಅಂಚೆನೆ ಗ್ರಾಮಸ್ಥೆರ್ನ ಕೊಡುಗೆ ಮಲ್ಲ. ಕೆಲವು ವರ್ಷದ ಕನ, ದೇವಲ್ಯ ಇತ್ತೆ ಸುಂದರವಾದ್ ಮೂಡುದು ಬರಿಯರೆ ಪರೋಕ್ಷ ಕಾರಣ ಆತ್ಂಡ್. ನನದ ದಿನೊಟ್ಟು ಕ್ಷೇತ್ರದ ಮಾತ್ರ ಅಭಿವೃದ್ಧಿ ಬೇಲೆ ಮಾತ ಸಂಪನ್ನ ಆವಡ್ ಪಂಡೆರ್.

ಬ್ರಹ್ಮಕಲಶೋತ್ಸವ ಸಮಿತಿದ ಸಂಚಾಲಕೆರ್ ಡಾ. ಸೋಂದಾ ಭಾಸ್ಕರ ಭಟ್ ಬ್ರಹ್ಮಕಲಶ ಬೊಕ್ಕ ಕುಮಾರ ಕಲಶವಿಧಿ ಪನ್ಪಿನ ವಿಚಾರೊಡು ಧಾರ್ಮಿಕ ಉಪನ್ಯಾಸ ಕೊರಿಯೆರ್.

ದೇವಲ್ಯದ ತಂತ್ರಿಲಾಯಿನ ಬ್ರಹ್ಮಶ್ರೀ ಶಿಬರೂರು ಗೋಪಾಲೃಷ್ಣ ತಂತ್ರಿ ಅಂಚೆನೆ ಕಟೀಲು ದೇವಲ್ಯದ ಕೆ.ಲಕ್ಷ್ಮೀನಾರಾಯಣ ಆಸ್ರಣ್ಣ ಆಶೀರ್ವಚನ ಕೊರಿಯೆರ್.
ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ಮುಂಬೈ ಹೇರಂಬ ಇಂಡಸ್ಟ್ರೀಸ್‌ನ ಅಡಳಿತ ನಿರ್ದೇಶಕೆರ್ ಕನ್ಯಾನ ಸದಾಶಿವ ಶೆಟ್ಟಿ, ಶಶಿಧರ ಅಡಪ ಬೆಂಗಳೂರು ಶುಭ ಹಾರೈಕೆ ಮಲ್ತೆರ್.

ಈ ಪೊರ್ತುಡು ದೇವಲ್ಯದ ನಿರ್ಮಾಣಡ್ ವಿಶೇಷವಾದ್ ಸಹಕಾರ ಕೊರ್ತಿನ ಶಾಸಕೆರ್ ಉಮಾನಾಥ ಎ. ಕೋಟ್ಯಾನ್, ತೋಕೂರು ಗುತ್ತು ಭಾಸ್ಕರ ಶೆಟ್ಟಿ, ಉದ್ಯಮಿ ಗಣೇಶ್ ರಾವ್, ಸದಾಶಿವ ಕುಡ್ವ, ಪಂಜ ಬೈಲಗುತ್ತು ಮಲ್ಲಿಕಾ ಅಶೋಕ್ ಶೆಟ್ಟಿ ದಂಪತಿ, ಹೊಸಮನೆ ಲಿಂಗಪ್ಪ ಶೆಟ್ಟಿ ಬೊಕ್ಕ ಗುಣಪಾಲ ಶೆಟ್ಟಿ ಮನೆತನ, ವಿ. ವಿವೇಕ್ ಶೆಟ್ಟಿ ಮುಂಬೈ, ಸುರಪಾಲ ಶೆಟ್ಟಿ ಬೊಕ್ಕ ಸಹೋದರೆರ್, ಸಂಪತ್ ಶೆಟ್ಟಿ ತೋಕೂರು ಗುತ್ತು, ಎಂ.ಕೆ.ಮೋಹನ್‌ರಾವ್ ಪಡುಬಿದ್ರಿ ಸಹೋದರೆರ್, ಯಶೋಧಾ ಟಿ. ಪುರುಷೋತ್ತಮ ರಾವ್ ದಂಪತಿನ್ ಮಾನಾದಿಗೆ ಮಲ್ತೆರ್.

ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು , ಬ್ರಹ್ಮಕಲಶೋತ್ಸವ ಸಮಿತಿ ಮುಂಬೈದ ಅಧ್ಯಕ್ಷೆರ್ ನಾಗೇಶ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ರಾಮಣ್ಣ ದೇವಾಡಿಗ, ಸದಾಶಿವ ಶೆಟ್ಟಿ ಮಾಗಂದಡಿ ಇತ್ತೆರ್.

ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್‌ಕುಮಾರ್ ಹೆಗ್ಡೆ ಸ್ವಾಗತ ಮಲ್ತೆರ್. ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಪರಿಚಯ ಪಂಡೆರ್. ರಾಜೇಶ್ ಸೊಲ್ಮೆ ಸಂದಾಯೆರ್. ನವೀನ್ ಶೆಟ್ಟಿ ಎಡ್ಮೆಮಾರ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಸ್ಕಂದ ಮಂಟಪಡ್ ಸಾಂಸ್ಕೃತಿಕ ಕಾರ್ಯಕ್ರಮ ನಡತ್ಂಡ್.

Puttur – District RSS Sangha founder Kanthappa Shetty is no more ಪುತ್ತೂರ್ ಜಿಲ್ಲಾ ಆರ್ ಎಸ್ ಎಸ್ ಸಂಘ ಚಾಲಕ್ ಕಾಂತಪ್ಪ ಶೆಟ್ಟಿ ಕೊಡ್ಮಣ್ ದೇವೆರೆ ಪಾದ ಸೇರಿಯೆರ್

ಪುತ್ತೂರ್: ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಪುತ್ತೂರ್ ಜಿಲ್ಲಾ ಸಂಘ ಚಾಲಕ್ ಆದ್ ಜಬದಾರಿ ಒಯಿಸ್ ದಿತ್ತಿನ ಬಂಟ್ವಾಳ ತಾಲೂಕ್ ದ ಕೊಡ್ಮಣ್ ನಿವಾಸಿ ಕಾಂತಪ್ಪ ಶೆಟ್ರ್ ಇನಿ ಮಧ್ಯಾಹ್ನ ದೇವೆರೆ ಪಾದ ಸೇರಿಯೆರ್.

DK Shivkumar visits Adichuchanagiri mutt ಆದಿಚುಂಚನಗಿರಿ ಮಠಕ್ಕ್ ಡಿಕೆಶಿ ಭೇಟಿ

ಉಪಮುಖ್ಯಮಂತ್ರಿ ಆಯಿ ಬೊಕ್ಕ ಡಿಕೆ ಶಿವಕುಮಾರ್ ಸುರುತ್ತ ಸರ್ತಿ ಇನಿ ಆದಿಚುಂಚನಗಿರಿ ಮಠಕ್ಕ್ ಭೇಟಿ ಕೊರ್ದು ಇಸೇಸ ಪೂಜೆ ಸಂದಾದೆರ್.

ಪೂರ್ಣಕುಂಭದೊಟ್ಟಿಗೆ ಮೆರೆಗ್ ಗೌಜಿದ ಮೆರವಣಿಗೆದ ಮುಖೇನ ಮಠತ್ತ ಆಡಳಿತ ಮಂಡಳಿ ಎದ್ಕೊಂದುಂಡು. ಬೊಕ್ಕ ಶ್ರೀ ನಿರ್ಮಲಾನಂದನಾಥ ಸ್ವಾಮೀಜಿನೊಟ್ಟಿಗೆ ಒಂಜಿ ಗಂಟೆರ್ದ್ ಎಚ್ಚ ಪೊರ್ತು ಚರ್ಚೆ ನಡಪಾದ್ಂಡ್. ರಾಜಕೀಯ ವಿದ್ಯಮಾನ ಬೊಕ್ಕ ಆಡಳಿತದ ಬಗೆಟ್ ಸ್ವಾಮೀಜಿ ಕೆಲವೊಂಜಿ ಸಲಹೆನ್ ಕೊರಿಯೆರ್. ‌ಸಿಎಂ ಪಟ್ಟ ಕೈ ತತ್ತಿನ ಬಗೆಟ್ ಚರ್ಚೆ ನಡಪರೆ ಉಂಡು ಪಂದ್ ಮೂಲ ತೆರಿಪಾದ್ಂಡ್.

Koragajja divinity displayed through a Yakshagana play at Oman Muscat !! ಮಸ್ಕತ್ ಡ್ ಕಾರ್ಣಿಕ ಮೆರೆಯಿನ ಕೊರಗಜ್ಜೆ

ಸುರುತ್ತ ಸರ್ತಿ ಒಮನ್ ಮಸ್ಕತ್ ಡ್ ತುಳುನಾಡ್ ದ ಕಾರ್ಣಿಕದ ದೈವ ಕೊರಗಜ್ಜನ ಚರಿತ್ರೆ ಯಕ್ಷಗಾನ ತಾಳಮದ್ದಳೆ ರೂಪಡ್ ಪ್ರದರ್ಶನ ಆಂಡ್.

ಶ್ರೀ ಶನೀಶ್ವರ ಭಕ್ತ ವೃಂದ, ಪಕ್ಷಿಕೆರೆ ಕೂಟದಕುಲು ಹರೀಶ್ ಶೆಟ್ಟಿ ಸೂಡ ವಿರಚಿತ “ಸ್ವಾಮಿ ಕೊರಗಜ್ಜ” ಪ್ರಸಂಗನ್ ಕಾಲಮಿತಿಡ್ ಪ್ರಸ್ತುತಿ ಮಲ್ತೆರ್. ಬಿರುವ ಜವನೆರ್ ಮಸ್ಕತ್ ವಾಟ್ಸಾಪ್ ಕೂಟದ ಸೇವಾ ಸಂಘಟನೆ ಸಂಯೋಜನೆ ಮಲ್ತಿನ ಈ ಲೇಸ್ ಸಾರ ಸಾರ ತುಳುವ ಯಕ್ಷಗಾನ ಅಭಿಮಾನಿಲೆನ ಬೊಕ್ಕ ಕೊರಗಜ್ಜ ಭಕ್ತೆರೆನ ಮನಸ್ ಗೆಂದ್ ದ್ಂಡ್.

ಹನುಮಗಿರಿ ಮೇಳಡ್ ಕಲಾ ವ್ಯವಸಾಯ ಮಲ್ತೊಂದು ಇಪ್ಪುನ ಪುಗರ್ತೆದ ಭಾಗವತೆರ್ ರವಿಚಂದ್ರ ಕನ್ನಡಿಕಟ್ಟೆ ಮೇರ್ ಭಾಗವತಿಕೆ, ಪಕ್ಷಿಕೆರೆ ಪದ್ಮನಾಭ ಶೆಟ್ಟಿಗಾರ್, ಭಾಸ್ಕರ ಭಟ್ ಕಟೀಲ್ ಮೇರ್ ಚೆಂಡೆ ಮದ್ದಳೆ ಹಿಮ್ಮೆಳಡ್ ಸಹಕಾರ ಮಲ್ತೆರ್.

ಅಂಚೆನೆ ಶಿವಯೋಗಿಯಾದ್ ಕದ್ರಿ ನವನೀತ ಶೆಟ್ಟಿ, ಕೊರಗಜ್ಜೆಯಾದ್ ಸದಾಶಿವ ಆಳ್ವ ತಲಪಾಡಿ, ಮೈರಕ್ಕೆ ಪಾತ್ರಡ್ ರಾಮಚಂದ್ರ ಮುಕ್ಕ, ಮೈಸಂದಾಯೆಯಾದ್ ಕಾವಲಕಟ್ಟೆ ದಿನೇಶ್ ಶೆಟ್ಟಿ, ಪಂಜಂದಾಯ ದೈವವಾದ್ ದಯಾನಂದ ಜಿ. ಕತ್ತಲ್ ಸಾರ್, ಬೊಕ್ಕ ಪುಷ್ಪರಾಜ್ ಕುಕ್ಕಾಜೆ ಮೇರ್ ಅರಸು ದೈವ ಪಾತ್ರಡ್ ಅರ್ಥಗಾರಿಕೆ ಮಲ್ತೆರ್.

ತುಳು ಸಂದಿ, ಪಾರ್ದನ, ಗಾದೆ, ನುಡಿಕಟ್ಟು ಗಲಸೊನೆತ್ತೊಟ್ಟಿಗೆ ಗ್ರಾಮ್ಯ ತುಳು ಭಾಷೆದ ಚೀಪೆನ್ ತೆರಿಪಾಯೆರ್. ಲೇಸ್ ದ ಪೋಷಕೆರ್ ಮಸ್ಕತ್ ಫಾರ್ಮಸಿದ ಆಡಳಿತ ನಿರ್ದೇಶಕೆರ್ ಬಕುಲ್ ಭಾಯ್ ಮೆಹತಾ ಮೆರೆಗ್ ತಮ್ಮನ ಮಲ್ತೆರ್.

ಬಿರುವ ಜವನೆರ್ ಮಸ್ಕತ್ ದ ಸ್ಥಾಪಕ ಸಂಚಾಲಕೆರ್ ಗುರುಪ್ರಸಾದ್ ರಾಮ ಅಮೀನ್ ನಾನಿಲ್ ಎದ್ಕೊನಿಯೆರ್. ಶ್ವೇತಾ ಸುವರ್ಣ ಲೇಸ್ ದ ಸುಧಾರಿಕೆ ಮಲ್ತೆರ್. ಮಸ್ಕತ್ ಧಾರ್ ಸೈಟ್ ಶ್ರೀ ಕೃಷ್ಣ ದೇವಲ್ಯಡ್ ಸಾಮೂಹಿಕ ಪ್ರಾರ್ತನೆ ಮಲ್ತ್ ದ್, ಚೆಂಡೆ ಬಳಗದೊಟ್ಟಿಗೆ ಕಲಾವಿದೆರೆನ್ ವೇದಿಕೆಗ್ ಲೆತ್ತೆರ್. ಶಂಕರ್ ಉಪ್ಪೂರ್ ದಂಪತಿಲು ತುಡರ್ ಅರ್ಲಾಯೆರ್. ಜೋಕುಲು, ಪೊಂಜೋವ್ ನಕುಲು ಸೇರ್ದ್ ಎಚ್ಚದ ಪ್ರೇಕ್ಷಕೆರ್ ಪಜೆಟ್ ಕುಲ್ಲುದು ಕೊರಗಜ್ಜನ ಕತೆನ್ ಉತ್ಸಾಹರ್ದ್ ಕೇಂಡೆರ್.

ಈ ಲೇಸ್ ದ ಅಕೇರಿಡ್ ನಡತಿನ “ತುಳುವರ ಕೂಟ” ಡ್ ಕದ್ರಿ ನವನೀತ ಶೆಟ್ಟಿ ಕಲಾವಿದೆರೆನ ಪರಿಚಯ ಮಲ್ತೆರ್. ಈ ಪೊರ್ತುಡು ಬೇತೆ ಬೇತೆ ಸಮುದಾಯದ ಪ್ರಮುಖೆರ್ ಶಶಿಧರ ಶೆಟ್ಟಿ ಮಲ್ಲಾರ್, ನ್ಯಾಷನಲ್ ಬ್ಯಾಂಕ್ ಒಫ್ ಒಮಾನ್ ದ ರಾಮ್ಕಿ ಜಿ.ವಿ, ಲಕ್ಷ್ಮೀ ನಾರಾಯಣ ಆಚಾರ್, ಮಂಜುನಾಥ್ ನಾಯಕ್, ಪದ್ಮಾಕರ ಮೆಂಡನ್, ಡಾ. ಸಿ. ಕೆ. ಅಂಚನ್, ರತ್ನಾಕರ ಆಚಾರ್ಯ, ರಮಾನಂದ ಶೆಟ್ಟಿ ಇತ್ತೆರ್.

ದಯಾನಂದ ಜಿ. ಕತ್ತಲ್ ಸಾರ್ ಮೇರ್ “ಕೂಟದ ಬಿನ್ನೆ ” ನಿಲೆಟ್ ತುಳು ಯಕ್ಷಗಾನದ ಮುಖೇನ ಕೊರಗಜ್ಜನ ಕಥೆನ್ ತುಳುವೆರೆಗ್ ಪರಿಚಯ ಮಲ್ತಿನ ಸಂಘಟಕೆರೆಗ್ ಅಭಿನಂದನೆ ಮಲ್ತೆರ್.

Biruver Kapu Seva Samiti renders aid for house renovation for a couple at Mallar ಕಾಪು ಮಲ್ಲಾರ್ ದ ದಂಪತಿಗ್ ಇಲ್ಲ್ ರಿಪೇರಿ ಮಲ್ತ್ ಕೊರಿನ “ಬಿರುವೆರ್” ಕಾಪು ಸೇವಾ ಸಮಿತಿ

ಕಾಪು: ಬಿರುವೆರ್ ಕಾಪು ಸೇವಾ ಸಮಿತಿದ ಸದಸ್ಯೆರ್ ಅಂಚೆನೆ ಊರುದ ಮಲ್ಲ ಉಡಲ್ದ ದಾನಿಲೆನ ಸಹಕಾರೊಡು ಬ್ರಹ್ಮಶ್ರೀ ನಾರಾಯಣ ಗುರು ಆಸರೆ ಪನ್ಪಿನ ಪುದರ್ ದ 21 ನೇ ಸೇವಾ ಯೋಜನೆಯಾದ್ “ಬ್ರಹ್ಮಶ್ರೀ” ಪನ್ಪಿನ ಇಲ್ಲ್ ನ್ ಕೃಷ್ಣಪ್ಪ ಪೂಜಾರಿ ಬೊಕ್ಕ ಇಂದಿರಾ ಪೂಜಾರ್ತಿ ದಂಪತಿಲೆನ ಇಲ್ಲ್ ನ್ ದುರಸ್ಥಿ ಮಲ್ತ್ ದ್ ಅಕ್ಲೆಗ್ ಕೈ ಏರ್ದ್ ಕೊರಿಯೆರ್.

ಕಟಪಾಡಿ ಅರವಿಪುರಂ ಮಠದ ಚರಣ್ ಶಾಂತಿಲೆನ ನೇತೃತ್ವೊಡು ಪೂಜೆ ವಿಧಿ ವಿಧಾನ ನೆರವೇರಿಸಾಯೆರ್. ಪೊಸ ಇಲ್ಲದ ಬೊಲ್ಪು ಅರ್ಲಾಯಿನ ಒಡಿಪುದ ವಕೀಲೆರ್ ಸಂಕಪ್ಪ ಅಮೀನ್ ಮೇರ್ ಸಮಿತಿದ ಮಾತಾ ಸದಸ್ಯೆರ್ ಸೇರ್ದ್ ಒಗ್ಗಟ್ಟ್ ಡ್ ಮಲ್ತಿನ ಎಡ್ಡೆ ಕೆಲಸೊಗು ಪ್ರಶಂಸೆದ ಪಾತೆರ ಪಂಡೆರ್.

ಬಿರುವೆರ್ ಕಾಪು ಸೇವಾ ಸಮಿತಿದ ಕಾರ್ಯಕಾರಿ ಸಮಿತಿದ ಸದಸ್ಯೆರಾಯಿನ ರಾಕೇಶ್ ಕುಂಜೂರು ಮೇರ್ ದಾನಿಲೆನ ಪುದರ್ ಲೆತ್ತ್ ಪಂಡ್ ದ್ ಅಭಿನಂದನೆ ಪಂಡೆರ್.

ಈ ಲೇಸ್ ಡ್ ಶಿರ್ವ ಬಿಲ್ಲವ ಸಂಘದ ಅಧ್ಯಕ್ಷೆರಾಯಿನ ಗೋಪಾಲ ಪೂಜಾರಿ, ಮಲ್ಲಾರು ಬಿಲ್ಲವ ಸಂಘದ ಅಧ್ಯಕ್ಷೆರ್ ಉಮೇಶ್ ಪೂಜಾರಿ, ಕಾಪು ಪುರಸಭೆ ಸದಸ್ಯೆರಾಯಿನ ಶೈಲೇಶ್ ಅಮೀನ್, ಉಮೇಶ್ ಕರ್ಕೇರ,ಉದ್ಯಮಿಲಾಯಿನ ದೀಪಕ್ ಕುಮಾರ್ ಎರ್ಮಾಳ್, ರವಿರಾಜ್ ಶಂಕರಪುರ, ಹರಿಪ್ರಸಾದ್ “ಕುಬೇರ” ಶಿರ್ವ, ದೇವಿ ಪ್ರಸಾದ್ ಶಿರ್ವ ಬಿರುವೆರ್ ಕಾಪು ಸೇವಾ ಸಮಿತಿದ ಉಪಾಧ್ಯಕ್ಷೆರ್ ಗಣೇಶ್ ಕೋಟ್ಯಾನ್, ಸುಧಾಕರ ಸಾಲ್ಯಾನ್ ಪ್ರಧಾನ ಕಾರ್ಯದರ್ಶಿ ವಿಕ್ಕಿ ಪೂಜಾರಿ ಮಡುಂಬು, ಕೋಶಾಧಿಕಾರಿ ಕಾರ್ತಿಕ್ ಅಮೀನ್, ಸಂಘಟನಾ ಕಾರ್ಯದರ್ಶಿ ಸುಜನ್ ಎಲ್ ಸುವರ್ಣ ಕುತ್ಯಾರ್, ಪುರುಷೋತ್ತಮ ಸಾಲ್ಯಾನ್ , ಅತಿಥ್ ಸುವರ್ಣ ಪಾಲಮೆ, ಮನೋಹರ ಕಲ್ಲುಗುಡ್ಡೆ , ಸಂಧ್ಯಾ ಬಾಲಕೃಷ್ಣ ಕೋಟ್ಯಾನ್, ಅಶ್ವಿನಿ ನವೀನ್, ಅನಿಲ್ ಅಮೀನ್, ಪ್ರಶಾಂತ್ ಪೂಜಾರಿ ಕಾಪು, ವರುಣ್ ಬಾಲಕೃಷ್ಣ ಕೋಟ್ಯಾನ್ ಪ್ರಮುಖೆರಾಯಿನ ಶರತ್ ಪೂಜಾರಿ ಕಾಪು, ಗೀತಾ ಗೋಪಾಲ್, ಹರೀಶ್ ಪೂಜಾರಿ ಮಲ್ಲಾರ್, ಬಾಬು ಪೂಜಾರಿ, ಸುಮಿತ್ರ ಬಾಬು ಪೂಜಾರಿ ಬೊಕ್ಕ ಸ್ಥಳೀಯೆರ್ ಇತ್ತೆರ್.

California experiences an earthquake of 5.5 intensity ಕ್ಯಾಲಿಫೋರ್ನಿಯಾಡ್ 5.5 ಬಿರ್ಸ್ ದ ಭೂಕಂಪ

ಅಮೆರಿಕದ ಕ್ಯಾಲಿಫೋರ್ನಿಯಾಡ್ ರಾತ್ರೆ 5.5 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ಅಧಿಕಾರಿಲು ತೆರಿಪಾದೆರ್.

ಸದ್ಯಗ್ ಒವ್ವೇ ಪ್ರಾಣಗ್ ಬೊಕ್ಕ ಆಸ್ತಿಪಾಸ್ತಿಗ್ ತೊಂದರೆ ಆಯಿನ ಬಗ್ಗೆ ಪೊಲಬು ತಿಕ್ಕಿಜಿ. ಭೂಕಂಪದ ಕೇಂದ್ರಬಿಂದು ನೆಲತ್ತೊಲಯಿ 10ಕಿಲೋಮೀಟರ್ ಅಡಿಟ್ಟ್ ಉಂಡು. ಸುಕ್ರಾರ ಕ್ಯಾಲಿಫೋರ್ನಿಯಾದ ಪೂರ್ವ ಕರಾವಳಿದ ನೈಋತ್ಯಗ್ 4 ಕಿಮೀ ದೂರಡ್ ಭೂಕಂಪ ಆತ್ಂಡ್ ಪಂದ್ ವರದಿ ಆದಿತ್ತ್ಂಡ್.

Volunteers at Tokur Subramanya temple render services at the temple which is said to be worth 1.5 crore rupees!! ತೋಕೂರು ದೇವಲ್ಯದ ಸ್ವಯಂ ಸೇವಕೆರ್ನ ಬೇಲೆರ್ದ್ 1.5 ಕೋ.ರೂ. ದುಡ್ಡು ಒರಿದ್ಂಡ್!

ತೋಕೂರು: ಮುಲ್ತ ಶ್ರೀ ಸುಬ್ರಹ್ಮಣ್ಯ ದೇವಲ್ಯನ್ ಜೀರ್ಣೋದ್ಧಾರ ಮಲ್ಪರೆ ಅಂಚೆನೆ ಸಂಪೂರ್ಣ ಶಿಲಾಮಯ ದೇವಲ್ಯವಾದ್ ಪರಿವರ್ತನೆ ಮಲ್ಪರೆ ಭಕ್ತೆರೆನ ಗುಂಪೇ ಸಂಕಲ್ಪ ಮಲ್ತಿನೆರ್ದಾವೆರ ಪಿರಾಕ್ ದ ದೇವಲ್ಯನ್ ಸಂಪೂರ್ಣವಾದ್ ದೆತ್ತ್ ದ್ ಪೊಸತಾದ್ ನಿರ್ಮಾಣ ಆಯಿನ ಶಿಲಾಮಯ ದೇವಲ್ಯದ ನಿರ್ಮಾಣಗ್ ಸುಮಾರ್ 8 ವರ್ಷದ ಎಲ್ಯ ಜೋಕುಲೆರ್ದ್ 90 ವರ್ಷ ಮುಟ್ಟದ ಪರಬೆರ್ ಮುಟ್ಟ, ಯುವ ಸಮುದಾಯ, ಪೊಂಜೋವ್ ನಕ್ಲೆನೊಟ್ಟಿಗೆ ಊರುದ ಪರವೂರುದ ಗ್ರಾಮಸ್ಥೆರ್ ಜಾತಿ ಮತ ಬೇದ ಇಜ್ಜಂದೇ ಪ್ರಾಮಾಣಿಕವಾದ್ ಶ್ರಮದಾನದ ಮುಕೇನ ಬೇಲೆ ಮಲ್ದಿನೆರ್ದಾವರ ಲಕ್ಷರ್ದ್ ಎಚ್ಚ ಜನತ್ತ ಪರಿಶ್ರಮರ್ದ್ ಪಗೆಲ್ ರಾತ್ರೆ ಪನಂದೆ ಬೆನೊಂದಿಪ್ಪುನೇರ್ದ್ ಸುಮಾರ್ 1.5 ಕೋ.ರೂ. ಬಿಲೆತ್ತ ಉಳಿತಾಯ ಮಲ್ದೆರ್ ಪಂದ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಪಂಡೆರ್.

ಪರತ್ತ್ ಸೊತ್ತುಲೆನ್ ದೆತ್ತ್ ದ್, ಕಲ್ಲ್-ಮಣ್ಣ್ ತುಂಬುನ, ಕಟ್ವಾನದ ಪರ ಸೊತ್ತುಲೆನ್ ಸಾಗಾವುನ ಇಂಚ ಬೇತೆ ಬೇತೆ ಬೇಲೆ ಪ್ರತಿದಿನಲ ನಡತ್ಂಡ್.

2022ನೇ ಎಪ್ರಿಲ್ 22 ಕ್ಕ್ ಸುರು ಆಯಿನ ಈ ಶ್ರಮದಾನ ಆದ್ ಬ್ರಹ್ಮಕಲಶ ಉಚ್ಚಯ, ನಾಗಮಂಡಲ ಉಚ್ಚಯ ದುಂಬುವರಿದ್ಂಡ್. ದೇವಲ್ಯದ ಈ ಮಲ್ಲ ಬೇಲೆಡ್ ಸುಮಾರ್ 145ಕ್ಕ್ ಎಚ್ಚ ಸ್ವಯಂ ಸೇವಕ ಸಂಘದ 6000 ಜನತ್ತ ಪುದರ್ ನ್ ನೋಂದಣಿ ಮಲ್ದೆರ್. ಸ್ವಯಂಪ್ರೇರಿತೆರಾದ್ ಬೆನ್ಪುನ ಕೈಕುಲು ಸುಮಾರ್ ಸಂಖ್ಯೆಡ್ ಉಂಡು.

ಅನ್ನದಾನ, ಉಪಾಹಾರ, ಭಕ್ತೆರೆಗ್ ಪ್ರಸಾದ ಕೊರಿಯೆರೆ, ಸಾಲ್ ಡ್ ಪೋವೆರೆ ಸಕಾಯ, ಪರ್ಪಿನ ನೀರ್, ಪುದೆಕಾಣಿಕೆ, ತರಕಾರಿ ತಯಾರ್, ಸ್ವಚ್ಚತೆ, ಸಾಂಸ್ಕೃತಿಕ ಕಲಾವಿದೆರೆಗ್ ಆಸರೆ ಇಂಚ ಬೇತೆ ಬೇತೆ ಮಾತ ಬೇಲೆಡ್ಲಾ ಸ್ವಯಂ ಸೇವಕೆರ್ ಇತ್ತೆರ್ ಪಂದ್ ಸ್ವಯಂ ಸೇವಕೆರೆನ ಉಪ ಸಮಿತಿದ ಮೇಲ್ವಿಚಾರಕೆರ್ ಸಂತೋಷ್ ದೇವಾಡಿಗ ಪಂತೆರ್.

ಭಜನೆ :
ಬ್ರಹ್ಮಕಲಶ ಉಚ್ಚಯದ ಲೆಕ್ಕೊಡು ಮೇ10 ರ್ದ್ 23 ಮುಟ್ಟ ಸೂರ್ಯೋದಯರ್ದ್ ಸೂಯಾಸ್ತ ಮುಟ್ಟ (ಕೆಲವು ದಿನ ರಾತ್ರೆ 12 ಗಂಟೆ ಮುಟ್ಟ) ಒಟ್ಟು 135 ಭಜನಾ ಕೂಟದಕುಲು ಪಾಲ್ ಪಡೆತೆರ್. ಕ್ಷೇತ್ರಡ್ ಭಜನೆ ಸಂಕೀರ್ತನೆಗ್ ಇಸೇಸ ಮಹತ್ವ ಕೊರ್ತುಂಡು ಪನ್ಪುನವು ಮುಲ್ಪದ ವೈಶಿಷ್ಠ ಆತ್ಂಡ್. ಭಜನೆ ಇತ್ತ್ ನಲ್ಪ ಒಲ್ಪಲ ವಿಭಜನೆ ಇಜ್ಜಿ ಪನ್ಪುನ ಪಾತೆರದಂಚೆನೆ ಪ್ರತೀ ಕೂಟಡ್ 10ರ್ದ್ 20 ಜನ ಸಂಕೀರ್ತನೆಡ್ ಪಾಲ್ ಪಡೆನವು ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಸಾರರ್ದ್ ಎಚ್ಚ ಜನ ಪಾಲ್ ಪಡೆದ್ ತನ್ನ ಸೇವೆನ್ ಕೊರಿನವು ಗಮನಾರ್ಹ ಆತ್ಂಡ್ ಪಂದ್ ಭಜನಾ ಸಂಕೀರ್ತನೆದ ಜಬದಾರಿ ದೆತೊಂದಿನ ಅನುಪಮಾ ರಾವ್ ಪಂತೆರ್.

Brahmakalash Abhishek at Tokur-A sea of people witness abisheka at Subramanya temple ತೋಕೂರ್ದ ಸುಬ್ರಾಯ ದೇವೆರೆಗ್ ಸಾರ ಸಾರ ಭಕ್ತೆರೆನ ಎದುರುಡು ಬ್ರಹ್ಮಕಲಶದ ಅಭಿಷೇಕ

ತೋಕೂರು: ತುಳುನಾಡ ಮಣ್ಣ್ ಡ್ ಮಾಯೊಕೊದ ಮಾಣಿಯಾದ್ ಬತ್ತ್ ದ್ ನಿಲೆ ಉಂತಿನ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನ ಸಂಪೂರ್ಣ ಜೀರ್ಣೋದ್ಧಾರ ಆದ್ ದೇವೆರೆಗ್ ಮೇ 21 ಐತಾರ ಸಾರ ಸಾರ ಭಕ್ತೆರೆನ ನಡುಟ್ಟು ಭಾರಿ ಶ್ರದ್ಧಾ ಭಕ್ತಿಡ್ ಬ್ರಹ್ಮಕಲಶ ಅಭಿಷೇಕ ನಡತ್ಂಡ್.

ಶ್ರೀ ಕ್ಷೇತ್ರದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿಲೆನ ಮಾರ್ಗದರ್ಶನೊಡು ಬೊಲ್ಪುಗು 5-45ಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವರೆಗ್ ಬ್ರಹ್ಮಕುಂಭಾಭಿಷೇಕ ನಡತ್ಂಡ್.

ಸುರುಟ್ಟು ಕಲಾಶಾಭಿಷೇಕ, ಪ್ರಸನ್ನಪೂಜೆ, ನ್ಯಾಸಪೂಜೆ, ಮಹಾಪೂಜೆ, ಪ್ರಸಾದ ವಿತರಣೆ ನಡತ್ ದ್, ಭಾರಿ ಗೌಜಿಡ್ ಪಗೆಲ್ ತೇರ್ ದ ಉಚ್ಚಯ ನಡತ್ಂಡ್. ಅವೆರ್ದ್ ಬೊಕ್ಕ ಪಲ್ಲಪೂಜೆ, ಪ್ರಸನ್ನಪೂಜೆ ಆದ್ ಮಹಾ ಅನ್ನಸಂತರ್ಪಣೆ ನಡತ್ಂಡ್. ಬಯ್ಯಡ್ ಉತ್ಸವ ಬಲಿ, ಶ್ರೀ ಭೂತಬಲಿ, ದೇವೆರೆಗ್ ಶಯನ ಉಚ್ಚಯ ಆದ್ ಕವಾಟ ಬಂಧನ ವಿಧಿ ನಡತ್ಂಡ್.

ಮೂಲ್ಕಿ ಸೀಮೆದ ಅರಸೆರ್ ಎಂ. ದುಗ್ಗಣ್ಣ ಸಾವಂತೆರ್, ಶಾಸಕೆರ್ ಅಂಚೆನೆ ಬ್ರಹ್ಮಕಲಶೋತ್ಸವ ಸಮಿತಿದ ಗೌರವಾಧ್ಯಕ್ಷೆರ್ ಉಮಾನಾಥ ಎ. ಕೋಟ್ಯಾನ್ ಭೇಟಿ ಕೊರ್ದಿತ್ತೆರ್.
ದೇವಲ್ಯಗ್ ಬರ್ಪಿನ ಹಿರಿಯೆರೆಗ್ ಉಚಿತ ರಿಕ್ಷಾ ಸೇವೆ ಇತ್ತ್ಂಡ್. ಸುಮಾರ್ 50 ಸಾರ ಜನಕ್ಕ್ ಮಲ್ಲ ಅನ್ನಛತ್ರಡ್ ಅನ್ನಸಂರ್ಪಣೆ ನಡತ್ಂಡ್. ಬೇತೆ ಬೇತೆ ಸಂಘಸಂಸ್ಥೆಲೆನ ಸ್ವಯಂಸೇವಕೆರ್ ಭಾರಿ ಅಚ್ಚುಕಟ್ಟಾದ್ ಭಕ್ತರೆಗ್ ಅನ್ನಪ್ರಸಾದ ಪಟ್ಟಿಯೆರ್.

ಕುಡ್ಲದ ಹಾಲು ಉತ್ಪಾದಕರ ಸಹಕಾರ ಸಂಘದ ಮುಕೇನ ಅಲೆ ನೀರ್ ಅಂಚೆನೆ ಹಳೆಯಂಗಡಿ ಶ್ರೀ ದುರ್ಗಾ ವಿನಾಯಕ ಮಠ, ಶ್ರೀ ನಾಲ್ಕೂರ ಪಂಜುರ್ಲಿ ದೈವಸ್ಥಾನ ಪಡುಪಣಂಬೂರು, ಶ್ರೀ ವಿಶ್ವಕರ್ಮ ಸಮಾಜ ಸೇವಾ ಸಂಘ ಕಿನ್ನಿಗೋಳಿ ಬೊಕ್ಕ ಗುರುಗಳ ಗುರು ಸೇವಾ ಪರಿಷತ್ ಆನೆಗುಂದಿ ಸರಸ್ವತಿ ಪೀಠ, ಪಡುಕುತ್ಯಾರು ಮೊಕ್ಲೆನ ವತಿರ್ದ್ ಉಚಿತ ಬಚ್ಚಂಗಾಯಿ ವಿತರಣೆ ಅಂಚೆನೆ ಪೊಂಜೋವುಲೆಗ್ ಪನ್ನೀರ್ ಸೇವೆ, ಅರಸಿನ ಕುಂಕುಮ, ಪೂ ಬೊಕ್ಕ ಕಾಜಿ ಪಟ್ಟಿಯೆರ್.

ದೇವಳದ ಪ್ರಧಾನ ಅರ್ಚಕೆರ್ ಮಧುಸೂದನ ಆಚಾರ್ಯ ಮೇರ್ ಧಾರ್ಮಿಕ ವಿಧಿ ವಿಧಾನ ನಡಪಾದ್ ಕೊರಿಯೆರ್. ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್‌ಕುಮಾರ್ ಹೆಗ್ಡೆ, ಪ್ರಧಾನ ಕಾರ್ಯದರ್ಶಿ ರಾಮಣ್ಣ ದೇವಾಡಿಗ, ಬೇತೆ ಬೇತೆ ಸಮಿತಿದ ಪ್ರಮುಖೆರಾಯಿನ ಸೋಂದಾ ಭಾಸ್ಕರ ಭಟ್, ಮೋಹನ್‌ದಾಸ್, ವಿಜಯಕುಮಾರ್ ರೈ, ಟಿ.ಪುರುಷೋತ್ತಮ ರಾವ್, ಲೋಕಯ್ಯ ಕೆ. ಸಾಲ್ಯಾನ್, ಯೋಗೀಶ್ ಆರ್. ಕೋಟ್ಯಾನ್, ಅನಂತರಾಮ ಶಿಮಂತ್ರಾಯ, ಆರ್.ಎನ್. ಶೆಟ್ಟಿಗಾರ್, ಗಂಗಾಧರ ಶೆಟ್ಟಿ, ಗುರುರಾಜ್ ಎಸ್. ಪೂಜಾರಿ, ಶಂಕರ ಶೆಟ್ಟಿಗಾರ್ ಬೆಳ್ಳಾಯರು, ಸಂಪತ್ ದೇವಾಡಿಗ, ದೀಪಕ್ ಸುವರ್ಣ, ವನಿತಾ ಸನಿಲ್, ವಿನೋದ್‌ಕುಮಾರ್, ಸಂತೋಷ್ ದೇವಾಡಿಗ, ವರುಣ್ ಅಂಚನ್, ನಾರಾಯಣ ಜಿ.ಕೆ, ದೀಪು ಸುವರ್ಣ ಮೊಕುಲು ಬೇತೆ ಬೇತೆ ಜವಬ್ದಾರಿನ್ ಒಯಿಸ್ ದಿತ್ತೆರ್.

Footprint of Goddess Sita Devi discovered under Netravathi river ನೇತ್ರಾವತಿ ಸುದೆಟ್ ತೋಜಿದ್ ಬತ್ತ್ಂಡ್ ಸೀತಾದೇವಿನ ಪಾದ

ಬಂಟ್ವಾಳ : ನೇತ್ರಾವತಿ ಸುದೆಟ್ ಈ ಸರ್ತಿ ನೀರ್ ದ ಮಟ್ಟ ಕಮ್ಮಿ ಆಯಿರ್ನೆದಾವೆರ ಬಂಟ್ವಾಳ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಕೈತಲ್ ಸುದೆತ್ತ ನಡುತ್ತ ಕಲ್ಲ್ ದ ಮಿತ್ತ್ ಇಪ್ಪುನ ಸೀತಾದೇವಿನ ಪಾದ ತೋಜಿದ್ ಬೈದ್ಂಡ್.

ತುದೆಟ್ ಇಂಚಿನ ಸುಮಾರ್ ಕಲ್ಲ್ ದ ರಚನೆಲು ಇತ್ತ್ಂಡಲ ಇಂಚಿಪ್ಪದ ವರ್ಷಡ್ ಆಣೆಕಟ್ಟೆದ ನಿರ್ಮಾಣರ್ದ್ ಅವು ನೀರ್ ದ ಉಲಯಿ ಇಪ್ಪುಂಡು. ಈ ಸರ್ತಿ ಸುದೆ ನೀರ್ ಪೂರ್ ಖಾಲಿ ಆಯಿನೆರ್ದಾವರ ತುದೆಟ್ ಇಪ್ಪುನ ಇಸೇಸಲು ತೂಯೆರೆ ತಿಕ್ಕೊಂದು ಉಂಡು. ಶಿವಲಿಂಗ, ಪೂ, ಜಡೆ, ಬಟ್ಟಲ್, ನಂದಿ, ಪಾದಲು ಇಂಚ ಸುಮಾರ್ ರಚನೆಲು ಮುಲ್ಪದ ಕಲ್ಲ್ ಡ್ ಕೆತ್ತ್ ದೆರ್. ಕೈತಲ್ ದಕುಲು ಪಾದದ ರಚನೆ ಸೀತಾ ದೇವಿನವೇ ಪಾದ ಪಂದ್ ಪೂಜೆದ ಭಾವನೆ ದೀತೆರ್. ಕೆಲವೊಂಜಿ ಧಾರ್ಮಿಕ ನಂಬಿಕೆದ ಗುಂಡಿಲು, ಕಯಲು ಈ ಸರ್ತಿ ತೂವೆರೆ ತಿಕ್ಕುಂಡು. ಕಲ್ಲ್ ಬಂಡೆ ಬೇತೆ ಬೇತೆ ವಿನ್ಯಾಸಲು ಆಕರ್ಷಣೀಯವಾದ್ ಉಂಡು. ನೆನ್ ತೂವೆರೆ ಜನ ಬರೊಂದು ಉಲ್ಲೆರ್. ಉಂದುವೇ ಒಂಜಿ ಆಕರ್ಷಣೆದ ಕೇಂದ್ರ ಆತ್ಂಡ್.

A place were every religion can bloom in harmony -Dr Niketana ಮಾತಾ ಧರ್ಮದ ತಿರ್ಲ್ ನ್ ತೆರಿಯೊಂಡ ಸರ್ವ ಜನಾಂಗದ ತೋಟ: ಡಾ.ನಿಕೇತನ

ತೋಕೂರು ಬ್ರಹ್ಮಕಲಶದ ನಿಲೆಟ್ಟ್ ಮಾತೃ ಸಮಾವೇಶ

ತೋಕೂರು: ನಮ್ಮ ನಾಡ್ ಸರ್ವ ಜನಾಂಗದ ಶಾಂತಿಯ ಸೌಹಾರ್ದದ ತೋಟ ಆವೊಡ್ಡ ನಮ ಮಾತೆರ್ಲ ಮಾತಾ ಧರ್ಮದ ತಿರ್ಲ್ ನ್ ತೆರಿಯೊನುಡು ಪಂದ್ ಒಡಿಪುದ ಡಾ.ಜಿ.ಶಂಕರ್ ಮಹಿಳಾ ಪ್ರಥಮ ದರ್ಜೆ ಕಾಲೇಜ್ ದ ಪ್ರಾಧ್ಯಾಪಕೆರ್ ಅಂಚೆನೆ ವಿಭಾಗ ಮುಖ್ಯಸ್ಥೆರ್
ಡಾ.ನಿಕೇತನ ಪಂಡೆರ್.

ಆರ್ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶದ ನಿಲೆಟ್ಟ್ ಶನಿವಾರ ನಡತಿನ 5ನೇ ದಿನತ್ತ ಧರ್ಮಸಭೆತ್ತ ಮಾತೃ ಸಮಾವೇಶಡ್
“ಸಮಾಜೋನ್ನಯನ ಬೊಕ್ಕ ಮಹಿಳೆ” ಪನ್ಪಿನ ವಿಚಾರೊಡು ಉಪನ್ಯಾಸ ಕೊರಿಯೆರ್.

ಎಂಆರ್ ಪಿಎಲ್ ಶಿಕ್ಷಣ ವಿಭಾಗದ ಜನರಲ್ ಮ್ಯಾನೇಜರ್ ವೀಣಾ ಶೆಟ್ಟಿ ಗುರ್ಕಾರ್ಮೆ ಒಯಿಸ್ ದಿತ್ತೆರ್.

ಈ ಪೊರ್ತುಡು ನಿವೃತ್ತ ಶಿಕ್ಷಕೆರಾಯಿನ ಪುಷ್ಪಾ ಟೀಚರ್ ಅಂಚೆನೆ ಪುಷ್ಪಲತಾ ಆರ್ ಹೆಬ್ಬಾರ್ ಮೆರೆಗ್ ಮಾನಾದಿಗೆ ಮಲ್ತೆರ್. ವಿನೋದಾ ಭಟ್ ಮೇರ್ ಸನ್ಮಾನಿತೆರ್ನ ಪೊಲಬು ಮಲ್ತ್ ಕೊರಿಯೆರ್.

ಮಲ್ಲ ಬಿನ್ನೆರಾದ್ ಕುಡ್ಲ ಸಾಯಿ ಆಶ್ರಯದ ಮುಖ್ಯಸ್ಥೆರ್ ಲತಾ ರಾವ್, ನ್ಯೂ ಮುಂಬಯಿ ಬಂಟರ ಸಂಘದ ಮಹಿಳಾ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಲತಾ‌ ಜಿ ಶೆಟ್ಟಿ, ನಿಡ್ಡೋಡಿ ಬಂಟರ ಸಂಘದ ಮಾಜಿ ಅಧ್ಯಕ್ಷೆರ್ ಶಾಂಭವಿ ಶೆಟ್ಟಿ, ಕೆಮ್ರಾಲ್ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಲೀಲಾ ಕೃಷ್ಣಪ್ಪ, ಪಡುಪಣಂಬೂರು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಮಂಜುಳಾ, ಹಳೆಯಂಗಡಿ ಪಂಚಾಯತ್ ಅಧ್ಯಕ್ಷೆರ್ ಪೂರ್ಣಿಮಾ , ವಿಪುಲ ಡಿ.ಶೆಟ್ಟಿಗಾರ್, ಶೋಭಾ ಅಂಚನ್ ಮತ್ತರ್ಮೆಡ್ ಇತ್ತೆರ್.

ರಚನಾ ಪ್ರಾಸ್ತಾವಿಕ ವಾದ್ ಪಾತೆರಿಯೆರ್. ಶ್ರಾವ್ಯ ಎನ್ ಕೋಟ್ಯಾನ್ ಸೊಲ್ಮೆ ಸಂದಾಯ ಮಲ್ತೆರ್. ಅರ್ಪಿತಾ ಶೆಟ್ಟಿ ಧರ್ಮ ಸಭೆ ಸುಧಾರಿಕೆ ಮಲ್ತೆರ್.

A place were every religion can bloom in harmony – Dr Niketana

Tokur: Let Tulunadu be a place were every religion can bloom in harmony and let us understand the core of all religions said Dr Niketana principal of Dr Shankar women’s college while addressing the social gathering on the occasion of Brahmakalash at Tokkur Subramanya temple