ಬಪ್ಪನಾಡ್ ಡ್ ಎಲ್ಲೆ ಪಗೆಲ್ ತೇರ್, ಎಲ್ಲೆಂಜಿ ಜಾತ್ರೆ

ಮುಲ್ಕಿ: ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನಡ್ ವರ್ಷಾವಧಿ ಜಾತ್ರೆ ಮಾ.30 ಬೊಕ್ಕ 31ಕ್ಕ್ ನಡಪರೆ ಉಂಡು.

ಮಾ.30 ಸನಿವಾರ ಪಗೆಲ್ ತೇರ್ ಉಚ್ಚಯ, ಸಾರ್ವಜನಿಕ ಅನ್ನಸಂತರ್ಪಣೆ ಉಚ್ಚಯ ಬಲಿ, ದೇವಿನ ಶಯನದ ಉಚ್ಚಯ ನಡಪರೆ ಉಂಡು. ಮಾ.31ಐತಾರ ಬೊಲ್ಪು ಮೂಡುನಗ ಗರ್ಭಗುಡಿತ್ತ ಬಾಕಿಲ್ ದೆಪ್ಪರೆ (ಕವಾಟೋದ್ಘಾಟನೆ), ಆದ್ ಶಯನದ ಮಲ್ಲಿಗೆ ಪ್ರಸಾದ ಪಟ್ಟುವೆರ್.

ರಾತ್ರೆ ದೇವೆರ್ನ ಬಲಿ ಆಯಿ ಬೊಕ್ಕ ಸಸಿಹಿತ್ಲು ಶ್ರೀ ಭಗವತಿ ದೇವಿ ಬೊಕ್ಕ ಸಪರಿವಾರ ದೈವೊಲೆನ ಉಪಸ್ಥಿತಿಟ್ಟ್ ಮಲ್ಲ ತೇರ್ ಉಚ್ಚಯ ನಡಪರೆ ಉಂಡು. ಅಯಿರ್ದ್ ಬೊಕ್ಕ ಪೆಜಮಾಡಿದ ಚಂದ್ರಸಾನುಭೋಗರ ಕುದ್ರುದ ಕೆರೆಟ್ಟ್ ಜಳಕದ ಬಲಿ ಆದ್ ದೇವಿನ ಎದುರು ತೂಟೆದಾರ ನಡತ್ ದ್ ಚಂದ್ರಮಂಡಲ ತೇರ್ ದ ಬಲಿ ನಡಪರೆ ಉಂಡು. ಬೊಕ್ಕ ಕೊಡಿ ಜಾವರೆ ಉಂಡು.

ಎ.1 ಸೋಮಾರ ದೇವಿಗ್ ಹಣ್ಣುಕಾಯಿ ಸಮರ್ಪಣೆ, ಸಂಪ್ರೋಕ್ಷಣೆ ನಡಪರೆ ಉಂಡು. ಎ.4 ಕ್ಕ್ ಶ್ರೀ ಜಾರಂದಾಯ ದೈವೊದ ನೇಮ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ತೀರ್ಥ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಮುಲ್ಕಿ ಅರಮನೆತ್ತ ಅನುವಂಶಿಕ ಮೊಕ್ತೇಸರೆರ್ ದುಗ್ಗಣ್ಣ ಸಾವಂತೆರ್, ಅನುವಂಶಿಕ ಬೊಕ್ಕ ಆಡಳಿತ ಮೊಕ್ತೇಸರೆರ್ ಎನ್ ಎಸ್ ಮನೋಹರ ಶೆಟ್ಟಿ, ಕಾರ್ಯನಿರ್ವಾಹಣಾಧಿಕಾರಿ ಜಯಮ್ಮ ಪಿ ಲೆಪ್ಪೋಲೆಡ್ ತೆರಿಪಾದೆರ್.