ಬೊಲ್ತೇರ್: ಧರ್ಮಸ್ಥಳ ಶ್ರೀ ಮಂಜುನಾಥ ಸ್ವಾಮಿನ ಸನ್ನಿಧಿಡ್ ಕಾರ್ತಿಕ ತಿಂಗೊಲುಡ್ ನಡಪುನ ಲಕ್ಷದೀಪೋತ್ಸವ ಡಿ.8-12 ಮುಟ್ಟ ಬೇತೆ ಬೇತೆ ಲೇಸ್ ದೊಟ್ಟಿಗೆ ನಡಪರೆ ಉಂಡು.
ಡಿ.8 ಕ್ಕ್ ಬೊಲ್ಪುಗು ಹೈಸ್ಕೂಲ್ ವಠಾರಡ್ ರಾಜ್ಯಮಟ್ಟದ ವಸ್ತು ಪ್ರದರ್ಶನನ್ ಪುತ್ತೂರ್ ಸಹಾಯಕ ಕಮೀಷನರ್ ಗಿರೀಶ್ ನಂದನ್ ಉದಿಪನ ಮಲ್ಪುವೆರ್. ವಸ್ತು ಪ್ರದರ್ಶನದ ಮಂಟಪಡ್ ಪ್ರತಿದಿನೊಲ ಬಯ್ಯಗ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ಡಿ.10 ಕ್ಕ್ ರಾತ್ರೆ ಅಮೃತವರ್ಷಿಣಿ ಸಭಾಭವನಡ್ ಸಂಗೀತ ನಿರ್ದೇಶಕೆರ್ ಗುರುಕಿರಣ್ ಬೊಕ್ಕ ಕೂಟದಕ್ಲೆರ್ದ್ ಗಾನ, ನೃತ್ಯ ವೈವಿಧ್ಯ ಲೇಸ್ ನಡಪರೆ ಉಂಡು.
ಡಿ.11 ಕ್ಕ್ ಬಯ್ಯಗ್ ಸರ್ವಧರ್ಮ ಸಮ್ಮೇಳನದ 91ನೇ ಅಧಿವೇಶನನ್ ವಿದ್ವಾಂಸೆರ್ ಬೆಂಗಳೂರುದ ಡಾ|ಗುರುರಾಜ ಕರ್ಜಗಿ ಉದಿಪನ ಮಲ್ಪೆರೆ ಉಲ್ಲೆರ್. ತುಮಕೂರು ಸಿದ್ದಗಂಗಾ ಮಠತ್ತ ಸಿದ್ಧಲಿಂಗ ಸ್ವಾಮೀಜಿ ಗುರ್ಕಾರ್ಮೆ ಒಯಿಸೊನ್ವೆರ್. ಸುಪ್ರೀಂಕೋರ್ಟ್ ನ್ಯಾಯವಾದಿ ಡಾ| ಎಂ.ಆರ್ ವೆಂಕಟೇಶ್, ಬೆಂಗ್ಲೂರ್ ದ ವಿಭು ಅಕಾಡೆಮಿ ಮುಖ್ಯಸ್ಥೆರ್ ವಿಜಯ ಪುರದ ಮಹಮ್ಮದ್ ಗೌಸ್ ಹವಾಲ್ದಾರ ಧಾರ್ಮಿಕ ಉಪನ್ಯಾಸ ಕೊರಿಯೆರೆ ಉಲ್ಲೆರ್.
ಡಿ.12 ಕ್ಕ್ ಬಯ್ಯಗ್ 5 ಕ್ಕ್ ಸಾಹಿತ್ಯ ಸಮ್ಮೇಳನದ 91 ನೇ ಅಧಿವೇಶನನ್ ಇಸ್ರೋದ ಗುರ್ಕಾರೆ ಡಾ| ಎಸ್ ಸೋಮನಾಥ್ ಉದಿಪನ ಮಲ್ಪುವೆರ್. ಬೆಂಗ್ಲೂರ್ ದ ಗಮಕಿ ಡಾ|ಎ.ವಿ ಪ್ರಸನ್ನ ಗುರ್ಕಾರ್ಮೆನ್ ಒಯಿಸೊನ್ವೆರ್. ಹೊನ್ನಾವರದ ನಿವೃತ್ತ ಉಪನ್ಯಾಸಕೆರ್ ಡಾ|ಶ್ರೀಪಾದ ಶೆಟ್ಟಿ, ಬೆಂಗ್ಲೂರ್ ದ ರಂಗಕರ್ಮಿ ಪ್ರಕಾಶ್ ಬೆಳವಡಿ ಬೊಕ್ಕ ಬಂಟ್ವಾಳದ ಡಾ| ಅಜಕ್ಕಳ ಗಿರೀಶ್ ಭಟ್ ಉಪನ್ಯಾಸ ಕೊರಿಯೆರೆ ಉಲ್ಲೆರ್. ರಾತ್ರೆ ಲಕ್ಷದೀಪೋತ್ಸವ ನಡಪರೆ ಉಂಡು. ಈ ಪೊರ್ತುಡು ನಾಡ್ ದ ಬೇತೆ ಬೇತೆ ಭಾಗಲೆರ್ದ್ ಲಕ್ಷರ್ದ್ ಎಚ್ಚ ಭಕ್ತೆರ್ ಬರಿಯೆರೆ ಉಲ್ಲೆರ್. ವೈವಿಧ್ಯಮಯ ಸೇವೆ ಕೊರಿಯೆರೆ ಉಲ್ಲೆರ್. ಭಕ್ತೆರೆನ ಅನುಕೂಲಕ್ಕಾದ್ ಕೆಎಸ್ ಆರ್ ಟಿಸಿ ರಾಜ್ಯದ ಬೇತೆ ಬೇತೆ ಭಾಗಲೆರ್ದ್ ಧರ್ಮಸ್ಥಳಗ್ ಇಸೇಸ ಬಸ್ ಸೌಲಭ್ಯ ಉಂಡು.
Editorial