ಧಾರ್ಮಿಕ ದತ್ತಿ ಇಲಾಖೆದ ವ್ಯಾಪ್ತಿಡ್ ಇಪ್ಪುನ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಜ.31 ದಾನಿ ಸರಳ ಸಾಮೂಹಿಕ ವಿವಾಹ “ಮಾಂಗಲ್ಯ ಭಾಗ್ಯ” ನಡಪರೆ ಉಂಡು.
ಡಿ.31 ಪೊಣ್ಣು- ಆಣ್ ನಿಗದಿ ಮಲ್ತ್ ದ್ ದಾಖಲೆದೊಟ್ಟಿಗೆ ದೇವಲ್ಯಗ್ ಅರ್ಜಿ ಪಾಡರೆ ಕಡೆತ ದಿನ. ಅಂಚಾದ್ ಪುಣ್ಯ ಕ್ಷೇತ್ರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯನ ಸನ್ನಿಧಿಡ್ ಸರಳ ಸಾಮೂಹಿಕ ಮದಿಮೆಗ್ ಅಪೇಕ್ಷೆ ಮಲ್ಪುನಕುಲು ಆಯಿನಾತ್ ಬೇಗ ದೇವಸ್ಥಾನದ ಕಚೇರಿರ್ದ್ ಅರ್ಜಿ ಪಡೆದ್ ತನ್ನ ಅರ್ಜಿನ್ ಸಲ್ಲಿಸಾವೊಡು ಪಂದ್ ಶ್ರೀ ದೇವಳದ ಪ್ರಕಟಣೆ ತೆರಿಪಾದ್ಂಡ್.
08257-281224, 236200, 281700, 281423,281265 ಕಾಲ್ ಮಲ್ತ್ ದ್ ಎಚ್ಚಿನ ಮಾಹಿತಿ ಪಡೆಯೊನೊಲಿ. ಶ್ರೀ ದೇವಳದ ಕಚೇರಿಡ್ ಭೇಟಿ ಕೊರ್ದುಲ ಮಾಹಿತಿ ಪಡೆಯೊನೊಲಿ.
ಜ.5 ದಾನಿ ನೋಂದಾಯಿತ ವಧು-ವರರ ವಿವರನ್ ದೇವಸ್ಥಾನಡ್ ಪ್ರಕಟ ಮಲ್ಪುವೆರ್. ಜ.15 ದಾನಿ ಮದಿಮಲ್- ಮದಿಮಾಯನಕಲ್ನ ಅಂತಿಮ ಪಟ್ಟಿ ಪ್ರಕಟ ಮಲ್ಪುವೆರ್.
ದಾದ ದಾಖಲೆ ಬೋಡು ?:
ವಧು-ವರೆರ್ ತನ್ನ ಪೂರ್ಣ ವಿಳಾಸದೊಟ್ಟಿಗೆ ಜನನ ದಿನಾಂಕ ದೃಢ ಮಲ್ಪುನ ಶಾಲೆದ ದೃಢಪತ್ರ ಪ್ರತಿ, ಪಾಸ್ಪೋರ್ಟ್ ಸೈಜ್ ದ 2 ಫೋಟೋ, ಆಧಾರ್ ಕಾರ್ಡ್, ರೇಷನ್ ಕಾರ್ಡ್, ವಧು-ವರೆರ್ನ ಬ್ಯಾಂಕ್ ಖಾತೆ ಸಂಖ್ಯೆದ ದಾಖಲೆ ಪ್ರತಿ, ಅವಿವಾಹಿತೆರ್ ಪನ್ಪುನೆಕ್ಕ್ ಪಂಚಾಯತ್ರ್ದ್ ಇಜ್ಜಿಂಡ ಸಂಬಂಧಪಟ್ಟ ಸರಕಾರಿ ಇಲಾಖಾಧಿಕಾರಿಲೆರ್ದ್ ದೃಢಪತ್ರದ ಅರ್ಜಿದೊಟ್ಟಿಗೆ ಇಪ್ಪೊಡು.
ಪನವುದ ಸಕಾಯ:
ಸರಳ ಸಾಮೂಹಿಕ ಮದಿಮೆ ಆಯೆರೆ ದೇವಸ್ಥಾನರ್ದ್ ಮದಿಮಾಯಗ್ ಪೂತ್ತ ಮಾಲೆ, ಪಂಚೆ, ಶಲ್ಯ, ಶರ್ಟ್, ಪೇಟ, ಬಾಸಿಂಗ ಬೊಕ್ಕ ಪ್ರೋತ್ಸಾಹದ ಪನವು ರೂ.5 ಸಾವಿರ ಬೊಕ್ಕ ಮದಿಮಾಲೆಗ್ ಪೂತ್ತ ಮಾಲೆ, ಧಾರೆ ಸೀರೆ, ರವಿಕೆ ಕಣ, ಕಾರುಂಗಿಲ, ರೂ.10 ಸಾವಿರ ಪ್ರೋತ್ಸಾಹ ಧನ ತಿಕ್ಕುಂಡು. ಸುಮಾರ್ 40 ಸಾವಿರ ರೂ. ಬಿಲೆತ್ತ ಮದಿಮಾಲೆಗ್ ಬಂಗಾರ್ದ ತಾಳಿ, ರಡ್ಡ್ ಬಂಗಾರ್ ದ ಗುಂಡು ದೇವಸ್ಥಾನರ್ದ್ ಕೊರ್ಪೆರ್. ಸಾರ್ವಜನಿಕೆರೆಗ್ ವನಸ್ ದ ಬೊಕ್ಕ ಅಗತ್ಯದ ವ್ಯವಸ್ಥೆನ್ ದೇವಸ್ಥಾನರ್ದ್ ಮಲ್ತ್ ಕೊರ್ಪೆರ್. ಸರಳ ಸಾಮೂಹಿಕ ಮದಿಮೆ ಆಪಿನ ಪೊಣ್ಣಗ್ ಕಂದಾಯ ಇಲಾಖೆದ ವತಿರ್ದ್ ಆದರ್ಶ ವಿವಾಹ ಯೋಜನೆಡ್ ರೂ.10 ಸಾವಿರ ನಿಶ್ಚಿತ ಠೇವಣಿ ಸೌಲಭ್ಯಲ ಉಂಡು.
ಮದಿಮೆ ಆಪಿನ ಪರಿಶಿಷ್ಟ ಜಾತಿದ ಜೋಡಿಗ್ ಸಮಾಜ ಕಲ್ಯಾಣ ಇಲಾಖೆದ ವತಿರ್ದ್ ಸರಳ ಮದಿಮೆದ ಯೋಜನೆದಡಿ 50 ಸಾವಿರ ರೂ. ಪ್ರೋತ್ಸಾಹದ ಪನವು ಆದ್ ತಿಕ್ಕುಂಡು.
pallavi shetty