ಕಲ್ಚಾರ್ ಟೀಮ್ ಬಿವಂಡಿ 4ನೇ ವರ್ಷದ ಲೇಸ್

ನ.5 ಮುಂಬಯಿ ಠಾಣೆ ಜಿಲ್ಲೆದ ಕಲ್ಚಾರ್ ಟೀಮ್ ಬಿವಂಡಿದ 4 ವರ್ಷದ ಲೇಸ್ ಬಿವಂಡಿ ಅಯ್ಯಪ್ಪ ದೇವಸ್ಥಾನದ ವಠಾರೋಡು ಯುವ ಕಲಾವಿದೆ ಸಚಿನ್ ಪೂಜಾರಿ ಮೆರೆನ ಮುತಾಲಿಕೇಡ್ ನಡತ್ಂಡ್.

ಕಾಂಡೆ 9 ಗಂಟೆರ್ದ್ ಬಯ್ಯ 7 ಗಂಟೆ ಮುಟ್ಟ ಭಕ್ತಿದ ಉರಲ್ ಕಾರ್ಯಕ್ರಮಟ್ 12 ಭಜನಾ ಕೂಟೋಲು ಪಾಲ್ ಪಡೆಯೆರ್. ಕಾಂಡೆ 10 ಗಂಟೆಗ್ ಶ್ರೀ ಸತ್ಯನಾರಾಯಣ ಪೂಜೆ ನಡತ್ಂಡ್. ಬಯ್ಯ 7 ಗಂಟೆಗ್ ಲೇಸ್ ದ ಸಭಾ ಕಾರ್ಯಕ್ರಮ ನಡತ್ಂಡ್.

ಲೇಸ್ ನ್ ಪರಿಸದ ಜನಪ್ರಿಯ ನಗರ ಸೇವಕೆ ಬಿಜೆಪಿ ಮುಖಂಡೆ ಉದಿಪನ ಮಲ್ತೆರ್. ಲೇಸ್ ದ ಗುರ್ಕಾರ್ಮೆನ್ ಬಿಲ್ಲವ ಅಸೋಸಿಯೇಶನ್ ಭಿವಂಡಿ ಪ್ರಾದೇಸಿಕ ಸಮಿತಿದ ಮಾಜಿ ಗುರ್ಕಾರೆ ಮೋಹನದಾಸ್ ಪೂಜಾರಿ ವಹಿಸ್ ದ್ ಇತ್ತೆರ್. ಅಂಚನೆ ಈ ಲೇಸ್ ಡ್ 3 ಜನ ಸಾಧಕೆರೆಗ್ ಮಾನಾದಿಗೆ ನಡತ್ಂಡ್.

ನಗರ ಸೇವಕೆ ಸಂತೋಷ ಶೆಟ್ರ್ ಮಾನಾದಿಗೆ ಪಡೆದ್ ಯುವ ಕಲಾವಿದೆ ಸಚಿನ್ ಎಲ್ಯ ಪ್ರಯೋಡು ಬಾರಿ ಮಲ್ಲ ಕಜ್ಜ ಮಲ್ತೊಂದು ಬಾರಿ ಎಡ್ಡೆ ಕೆಲಸ ಮಲ್ತೊಂದು ಉಲ್ಲೆರ್. ಒರಿ ಎಡ್ಡೆ ಕೆಲಸ ಮಲ್ಪುನಗ ಅಡ್ಡ ಬರ್ಪಿನಕುಲು ಮಸ್ತ್ ಜನ ಉಲ್ಲೆರ್ ನಮ ಅವೆನ್ ಗೇನೋಗೂ ದೆತೊನಂದೆ ಪತ್ತಿ ಬೆಲೆನ್ ಪಿರ ಬುಡಂದೇ ದುಂಬು ಪೋವೊಡು ನಿನ್ನ ಪಿರವು ಎಂಕುಲು ಮಾತ ಉಲ್ಲಾ ಪಂಡೆರ್.

ಲೇಸ್ ಡ್ ಕಲ್ಪುನ ಜೋಕುಲೆಗ್ ಬೆರಿಸಯ ಮಲ್ತೆರ್, ಅಂಚೆನೆ ಬಿನ್ನೆರೆ ಚಾವಡಿಡ್ ಅಯ್ಯಪ್ಪ ದೇವಸ್ಥಾನದ ಧರ್ಮದರ್ಶಿ ವಿಶ್ವನಾಥ್ ಶೆಟ್ಟಿ, ಭಾಸ್ಕರ್ ಟಿ ಶೆಟ್ಟಿ, ದಯಾನಂದ್ ಆರ್ ಪೂಜಾರಿ, ರಾಜೇಶ್ ಪೂಜಾರಿ, ವಾಸು ಕೆ ಶೆಟ್ಟಿ, ರಾಜೇಶ್ ಎಂ ಶೆಟ್ಟಿ, ಸದಾಶಿವ ಕರ್ಕೇರ , ಹರೀಶ್ ಡಿ ಸಾಲಿಯಾನ್ , ಹರೀಶ್ ಕೆ ಶೆಟ್ಟಿ, ರಮಾನಾಥ್ ಟಿ ಕೋಟಿಯನ್, ಪ್ರಮಿತ ಶೆಟ್ಟಿ ಯಶವಂತಿ ಬಿಲ್ಲವ, ಸುಮಿತ್ ಶೆಟ್ಟಿ , ಅಶೋಕ್ ಪೂಜಾರಿ , ಇತ್ತೆರ್.

ಯುವ ಕಲಾವಿದೆ ಸಚಿನ್ ಪೂಜಾರಿ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್. ಲೇಸ್ ದ ಸುಧಾರಿಕೆನ್ ಸಮಾಜ ಸೇವಕೆ ಯಕ್ಷಗಾನ ತಾಳ ಮದ್ದಳೆ ಅರ್ಥದಾರಿ ಕಲಾವಿದೆ ಶ್ರೀ ರವಿ ಹೆಗ್ಡೆ ಹೇರ್ಮುಂಡೆ ಮಲ್ತೆರ್.

ಕಡೆಕ್ ನವೋದಯ ಕಲಾ ರಂಗ ಮೊಕ್ಲೆರ್ದ್, ಚಂದ್ರಕಾಂತ್ ಸಾಲಿಯಾನ್ ಮೆರೆನ ನಿರ್ದೇಶನೊಡು “ಸತ್ಯ ಒರಿಪಾವ” ತುಳುನಾಟಕ ನಡತ್ಂಡ್.