ಮುಲ್ಕಿ : ಅಂಗವಿಕಲತೆ ಸಾಧನೆಗ್ ಅಡ್ಡಿ ಮಲ್ಪುಜಿ, ಮನಸ್ಸ್ ಇತ್ತ್ಂಡ ದಾದ ಬೋಡಾಂಡಲ ಸಾಧನೆ ಮಲ್ಪೊಲಿ. ಛಲ ಇತ್ತ್ಂಡ ಅಂಗವಿಕಲತೆನ್ ದೊಂಕುದ್ ಉಂತುದ್ ಪೊರ್ಲುದ ಬದ್ಕ್ ಕಟ್ಟೊಲಿ, ಎಲ್ಯ ಪ್ರಾಯಡೆ ಮಾತೆರ್ಲಕ ಸಮಾಜಡ್ ತರೆ ದೆರ್ತ್ದ್ ಉಂತೊಲಿ ಪನ್ಪಿನೆಕ್ಕ್ ಸಾಧಕೆರ್ ಜಗದೀಶ್ ಪೂಜಾರಿ ಒಂಜಿ ಮಲ್ಲ ಉದಾರ್ಮೆ ಪಂದ್ ರಾಜ್ಯ ಕನ್ನಡ ಸಾಹಿತ್ಯ ಪರಿಷತ್ದ ಮಾಜಿ ಅಧ್ಯಕ್ಷೆರ್ ಧರ್ಮದರ್ಶಿ ಡಾ| ಹರಿಕೃಷ್ಣ ಪುನರೂರು ಪಂಡೆರ್.
ಮೇರ್ ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ಪೈರ್ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ಶಿಮಂತೂರು ನೆತ್ತ ಒಟ್ಟು ಸೇರಿಗೆಡ್ ನಡತ್ತಿನ ಕರ್ನಾಟಕ ರಾಜ್ಯೋತ್ಸವದ ಕಾರ್ಯಕ್ರಮಡ್ ಗುರ್ಕಾರ್ಮೆ ವಹಿಸ್ದ್ ಪಾತೆರಿಯೆರ್.
ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ಪೈರ್ ನೆತ್ತ ಅಧ್ಯಕ್ಷೆರ್ ಲ.ಸುಧೀರ್ ಬಾಳಿಗ ಬಿನ್ನೆರಾದ್ ಪಾಲ್ ಪಡೆದ್, ವಿಕಲಚೇತನೆರೆಡಲ ಎಡ್ಡೆ ಪ್ರತಿಭೆ ಉಂಡು. ಸಾಮಾನ್ಯ ಜನಕ್ಲೆರ್ದ್ ಅಕ್ಲೆಡ ಸಾಧನೆ ಮಲ್ಪೊಡು ಪನ್ಪುನ ಛಲ ಇಪ್ಪುಂಡು. ಅಂಚಿನಕ್ಲೆಗ್ ಎಚ್ಚಿನ ರೀತಿದ ಸಹಾಯ, ಪ್ರೋತ್ಸಾಹದ ಅವಶ್ಯಕತೆ ಉಂಡು ಪಂದ್ ಪಂಡೆರ್.
ಈ ಪೊರ್ತುಡು ಮಿಸ್ಟರ್ ಇಂಡಿಯಾ ಸ್ಪರ್ಧೆಡ್ ಪಾಲ್ ಪಡೆದ್ ಸುರುತ ಇನಾಮು ಪಡೆನ ಕುಡ್ಲದ ಅಡ್ಯಾರ್ ಪದವು ನಿವಾಸಿ ಜಗದೀಶ್ ಪೂಜಾರಿ ಮೇರೆನ್ ಗುರುತಿಸಾದ್ ಮಾನಾದಿಗೆ ಮಲ್ತೆರ್. ಬೊಕ್ಕ ಶಾಲಾ ಕಲ್ಪಾರ್ಥಿಲು ರಾಜ್ಯೋತ್ಸವದ ಅಂಗವಾದ್ ಹುಯಿಲಗೋಳ ನಾರಾಯಣ ರಾಯೆರ್ನ ಉದಯವಾಗಲಿ ನಮ್ಮ ಚೆಲುವ ಕನ್ನಡ ನಾಡು, ಕುವೆಂಪು ಬರೆತಿನ ಎಲ್ಲಾದರೂ ಇರು ಎಂತಾದರು ಇರು, ದ. ರಾ. ಬೇಂದ್ರೆ ಬರೆತಿನ ಒಂದೇ ಒಂದೇ ಕರ್ನಾಟಕ ಒಂದೇ, ಸಿದ್ದಯ್ಯ ಪುರಾಣಿಕ ಅರೆನ ಹೊತ್ತಿತೋ ಹೊತ್ತಿತು ಕನ್ನಡದ ದೀಪ, ಚನ್ನವೀರ ಕಣವಿ ಅವರ ಹೆಸರಾಯಿತು ಕರ್ನಾಟಕ ಪನ್ಪಿನ ಪದ್ಯಲೆನ್ ಪಂಡೆರ್.
ಯುಗಪುರುಷದ ಸಂಪಾದಕೆರ್ ಭುವನಾಭಿರಾಮ ಉಡುಪ, ಶಾಲಾ ಸಂಚಾಲಕೆರ್ ದೇವಪ್ರಸಾದ್ ಪುನರೂರು ಈ ಪೊರ್ತುಡು ಇತ್ತೆರ್.
ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್ ಬಿನ್ನೆರೆನ್ ಎದ್ಕೊಂದು, ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ಪೈರ್ ನೆತ್ತ ಸ್ಥಾಪಕ ಅಧ್ಯಕ್ಷೆರ್ ಲ. ವೆಂಕಟೇಶ ಹೆಬ್ಬಾರ್ ಸೊಲ್ಮೆ ಸಂದಾಯ ಮಲ್ತೆರ್, ಸಹ ಶಿಕ್ಷಕಿ ದೀಪಿಕಾ ಲೇಸ್ದ ಸುದಾರಿಕೆ ಮಲ್ತೆರ್.
pallavi shetty