ದುಬೈ: ಯುಎಇ ಯಕ್ಷಗಾನ ಅಭ್ಯಾಸ ಕೇಂದ್ರ ದ ಪ್ರಾಯೋಜಕತ್ವಡ್ ಯಕ್ಷಗಾನ ರಂಗದ ಒರಿ ಸಾಧಕೆರೆನ್ ಗುರ್ತಿಸಾದ್, ಇಸೇಸವಾದ್ ವಾರ್ಷಿಕ ಯಕ್ಷಶ್ರೀ ರಕ್ಷಾ ಗೌರವ ಪ್ರಶಸ್ತಿ ಕೊರಿಯೆರೆ ಉದ್ದೇಶ ಮಲ್ತಿನಂಚೆನೆ, 2022-2023 ತ್ತ ಸಾಲ್ ದ ಪ್ರಶಸ್ತಿಗ್ ಯಕ್ಷಗಾನ ಕಲಾವಿದೆರ್, ಸಂಘಟಕೆರಾದ್ ಗುರುತಿಸಾಯಿನ, ಪಟ್ಲ ಗುತ್ತು ಮಹಾಬಲ ಶೆಟ್ಟಿ ಮೆರೆನ್ ಆಯ್ಕೆ ಮಲ್ತೆರ್.
ಮಹಾಬಲ ಶೆಟ್ರೆನವು ಬಹುಮುಖ-ಬಹುಶ್ರುತ ಬದ್ ಕ್. ಕಲಾವಿದೆರಾದ್, ಸಂಘಟಕೆರಾದ್, ಸಾಂಸ್ಕೃತಿಕ ನೇತಾರೆರಾದ್ ಬೊಕ್ಕ ವಗೆನಾಡು ದೇವಲ್ಯದ ಅಭಿವೃದ್ಧಿ ಮಲ್ತ್ ದ್ ಸಾರ್ಥಕ ಬದ್ ಕ್ ಬದ್ ಕಿನಾರ್.
ಮಾಂಬಾಡಿ ನಾರಾಯಣ ಭಾಗವತೆರೆನ ಶಿಷ್ಯೆರಾದ್, ಭಾಗವತಿಗೆ, ಚೆಂಡೆ-ಮದ್ದಳೆ ಅಭ್ಯಾಸ ಮಲ್ತ್ ದ್ ಕುಂಡಾವು, ಸುಂಕದಕಟ್ಟೆ ಮೇಳಡ್ ಕಲಾ ವ್ಯವಸಾಯ ಮಲ್ತಿನ ಅನುಭವಿ ಕಲಾವಿದೆ. ಮಲ್ಲ ಶ್ರೀ ದುರ್ಗಾಪರಮೇಶ್ವರೀ ಮೇಳನ್ 4 ವರ್ಷ ಕಾಲ ಸಂಚಾಲಕೆರಾದ್ ದುಂಬು ಕೊನೊಯಿನ ಸಮರ್ಥ ಸಂಘಟಕೆರ್.
ಬಂಟ್ವಾಳ ತಾಲೂಕ್ ದ ಕರೋಪಾಡಿ ಗ್ರಾಮದ ಪಟ್ಲಗುತ್ತು ಮಹಾಬಲ ಶೆಟ್ರೆನ ಜನ್ಮಭೂಮಿ. ವಗೆನಾಡ್ ದ ಶ್ರೀ ಸುಬ್ರಹ್ಮಣ್ಯೇಶ್ವರ ಯಕ್ಷಗಾನ ಕಲಾ ಸಂಘದ ಸ್ಥಾಪಕೆರಾದ್ ಸುಮಾರ್ ವರ್ಷೊರ್ದಿಂಚಿ ಶ್ರಾವಣ ಮಾಸ ಪೂರ್ತಿದ ನಿರಂತರ ತಾಳಮದ್ದಳೆ, ಭಜನೆ, ಸತ್ಸಂಗ ಲೇಸ್ ದ ಸಂಯೋಜನೆ ಮುಖೇನ ಪುಗರ್ತೆ ಪಡೆತೆರ್ ಮೇರ್.
ವಗೆನಾಡ್ ನೇ ಕೇಂದ್ರ ಮಲ್ತ್ ದ್, ನಾಡ್ ದ ಉದ್ದ ಅಗಲಗ್ ಕೀರ್ತಿ ಎಚ್ಚ ಮಲ್ತಿನ ಮೆರೆನ ಸಾಂಸ್ಕೃತಿಕ ಸಂಘಟನಾ ಕೌಶಲ್ಯ ಅನ್ಯೆರೆಗ್ ಮಾದರಿ. 80 ವರ್ಷದ ಬದ್ ಕ್ ನ್ ಸಾರ್ಥಕ ಮಲ್ತೊಂದು ದುಂಬರಿಯೊಂದು ಉಪ್ಪುನ ಮೆರೆನವು ಜವನೆರೆಗ್ಲಾ ಇಷ್ಟ ಆಪಿನ ಕ್ರಿಯಾಶೀಲ ಬದ್ ಕ್. ಯಕ್ಷಧ್ರುವ ಪಟ್ಲ ಫೌಂಡೇಶನ್ ನೆತ್ತ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ರೆನಂಚಿನ ಧ್ರುವತಾರೆನ್ ಯಕ್ಷ ದೇವಿನ ಜಕ್ಕೆಲ್ ಗ್ ಒಪ್ಯಾದ್, ಸಾರ್ಥಕ್ಯ ಪಡೆಯಿನಾರ್. ಮೇರ್ ಬೊಡೆದಿ ಲಲಿತಾ ಶೆಟ್ರೆನ ಜತೆಟ್ಟ್ ವಿಶ್ರಾಂತ ಜೀವನಡ್ ಉಲ್ಲೆರ್.
ಪ್ರಶಸ್ತಿ ಪುರಸ್ಕ್ರತ ಪಟ್ಲಗುತ್ತು ಮಹಾಬಲ ಶೆಟ್ರೆಗ್ ಅಭಿನಂದನೆನ್ ಸಂದಾವೊನೊಟ್ಟಿಗೆ, ಮೆರೆನ ನನದ ಜೀವನ ಸುಖ, ಸಂತೋಷ,ನೆಮ್ಮದಿ, ಸಮೃದ್ಧಿಡ್ ನಡಪುಲೆಕ್ಕ, ಮೆರೆನ ಕೈಟ್ ನನಾತ್ ಕಲಾ-ಸಾಮಾಜಿಕ-ಧಾರ್ಮಿಕ ಸೇವೆ ನಡಪುಲೆಕ್ಕ ಕಲಾಮಾತೆ ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ,ಶ್ರೀ ಮಹಾಗಣಪತಿ ಬೊಕ್ಕ ಈ ವರ್ಷ ಯಕ್ಷರಾಧನೆರ್ದ್ ಪುಗರ್ತೆ ಪಡೆಯಿನ ಶ್ರೀ ಮಹಾವಿಷ್ಣು ದೇವೆರ್ ಸದಾ ಅನುಗ್ರಹ ಪೂರ್ವಕ ಆಶೀರ್ವಾದ ಮಲ್ಪಡ್ ಪಂದ್ ದುಬೈದ ಮಾತಾ ಯಕ್ಷಕಲಾರಾಧಕೆರೆನ ಪರವಾದ್ ಹಾರೈಕೆ.
ಜೂನ್ 11 ಐತಾರ ಮಧ್ಯಾಹ್ನ 2 ಗಂಟೆಗ್ ದುಬೈದ ಶೇಖ್ ರಶೀದ್ ಅಡಿಟೋರಿಯಂಡ್ “ವಿಶ್ವ ಪಟ್ಲ ಸಂಭ್ರಮ” ಬೊಕ್ಕ “ದುಬೈ ಯಕ್ಷ ಉಚ್ಚಯ 2023” ನೆತ್ತ ಅಂಗವಾದ್ ನಡಪರೆ ಇಪ್ಪುನ “ದಶಾವತಾರ” ಆಟದ ಪ್ರದರ್ಶನದ ವೇದಿಕೆಡ್, ಗಣ್ಯೆರೆನ ಉಪಸ್ಥಿತಿಡ್, ಈ ಇಸೇಸ ಪ್ರಶಸ್ತಿನ್ ಕೊರ್ದು ಪಟ್ಲಗುತ್ತು ಮಹಾಬಲ ಶೆಟ್ರೆನ್ ಮಾನಾದಿಗೆ ಮಲ್ಪೆರೆ ಉಂಡು ಪಂದ್ ದುಬೈ ಯಕ್ಷಗಾನ ಅಭ್ಯಾಸ ಕೇಂದ್ರದ ಸಂಚಾಲಕೆರ್ ಕೊಟ್ಟಿಂಜ ದಿನೇಶ ಶೆಟ್ಟಿ ಮೇರ್ ಪತ್ರಿಕಾಗೋಷ್ಠಿಡ್ ತೆರಿಪಾದೆರ್.
ಈ ಪೊರ್ತುಡು ಭವಾನಿಶಂಕರ ಶರ್ಮ, ವೆಂಕಟೇಶ ಶಾಸ್ತ್ರಿ ಪುತ್ತಿಗೆ, ಗಿರೀಶ್ ನಾರಾಯಣ್ ಕಾಟಿಪಳ್ಳ, ಶ್ರೀಮತಿ ಜಯಾನಂದ ಪಕ್ಕಳ, ವಸಂತ ಶೆಟ್ಟಿ ಬಾಳೆಪುಣಿಗುತ್ತು, ಪ್ರಕಾಶ್ ಪಕ್ಕಳ, ರಾಜೇಶ್ ಕುತ್ತಾರು, ಬಾಲಕೃಷ್ಣ ಶೆಟ್ಟಿ ಮಾಡೂರುಗುತ್ತು, ವಿಜಯ ಶೆಟ್ಟಿ, ಅತ್ತಂದೆ ಕೇಂದ್ರದ ಗುರುಕುಲಾಯಿನ ಶೇಖರ್ ಡಿ. ಶೆಟ್ಟಿಗಾರ್ ಕಿನ್ನಿಗೋಳಿ ಬೊಕ್ಕ ಶರತ್ ಕುಡ್ಲ ಇತ್ತೆರ್.
June 11 th: Patla guttu Mahabala Shetty to be honoured in Dubai
Dubai: The UAE Yakshagana Abhyasa Kendra identifies one achiever in the field of Yakshagana and honours him with Yakshashree Raksha award.
Patla Guttu Mahabala Shetty who is a Yakshagana artist and organiser has been selected for this award for the year 2022-23.
Editorial