ದೇಶ ವಿದೇಶದ ಪ್ರೇಕ್ಷಕೆರೆನ ಮನಸ್ ಗೆಂದ್ ದ್ಂಡ್ ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ ಬಾಲ ಕಲಾವಿದೆರ್ ಪ್ರದರ್ಶನ ಮಲ್ತಿನ ಯಕ್ಷಗಾನ ನಾಟ್ಯ ವೈಭವ

ದುಬೈ: ಯು.ಎ.ಇ ಬಂಟ್ಸ್ ದ ವೇದಿಕೆಡ್ ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ ಬಾಲ ಕಲಾವಿದೆರ್ ಪ್ರದರ್ಶನ ಮಲ್ತಿನ ಯಕ್ಷಗಾನ ನಾಟ್ಯ ವೈಭವ ದೇಶ ವಿದೇಶದ ಪ್ರೇಕ್ಷಕೆರೆನ ಮನಸ್ ಗೆಂದ್ ದ್ಂಡ್.

ಇಂಚಿಪ್ಪ ದುಬೈಡ್ ನಡತಿನ ಯುಎಇ ಬಂಟ್ಸ್ ದ 46ನೇ ಕೂಡುಕಟ್ಟ್ ದ ಸಾಂಸ್ಕೃತಿಕ ಲೇಸ್ ದ ಅಂಗವಾದ್ ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ ಎಲ್ಯ ಜೋಕುಲು ಬೊಕ್ಕ ಬಾಲ ಕಲಾವಿದೆರ್ ಅಭಿನಯ ಮಲ್ತಿನ ಯಕ್ಷಗಾನ ನಾಟ್ಯ ವೈಭವನ್ ತೂಯಿನ ಬಿನ್ನೆರ್ ಆಳ್ವಾಸ್ ಸಂಸ್ಥೆದ ರೂವಾರಿ ಮೋಹನ್ ಆಳ್ವ, ಚಲನಚಿತ್ರ ನಟೆ, ನಿರ್ದೇಶಕೆ ಶಿವಧ್ವಜ್, ಸಿಐಡಿ ಖ್ಯಾತಿದ ದಯಾ ಶೆಟ್ಟಿ, ಹರೀಶ್ ಶೆಟ್ಟಿ ಬೊಕ್ಕ ಬೊಂಬೈದ ರಂಗ ಕರ್ಮಿ ಅಶೋಕ್ ಪಕ್ಕಳ ಮೆಚ್ಚುಗೆದ ಪಾತೆರ ಪಾತೆರಿಯೆರ್.

ಕುಡ್ಲದ ಪುಗರ್ತೆದ ಟಿವಿ ಚಾನೆಲ್ ಡ್ ನೇರ ಪ್ರಸಾರ ಆತ್ಂಡ್. ದೇಶ ವಿದೇಶಡ್ ನಾಟ್ಯ ವೈಭವ ಪುಗರ್ತೆನ್ ಪಡೆತ್ಂಡ್.

ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ ಸಂಚಾಲಕೆರ್ ದಿನೇಶ್ ಶೆಟ್ಟಿ ಕೊಟ್ಟಿಂಜ ಮೆರೆನ ಮಾರ್ಗದರ್ಶನಡ್, ಯಕ್ಷ ಗುರು ಶೇಖರ್ ಡಿ. ಶೆಟ್ಟಿಗಾರ್ ಬೊಕ್ಕ ಶರತ್ ಕುಡ್ಲ ಮೆರೆನ ನಿರ್ದೇಶನಡ್ ಮಾ.ನಿಲೇಶ್ ನಾರಾಯಣ ಶೆಟ್ಟಿ, ಮಾ.ಆದಿತ್ಯ ದಿನೇಶ್ ಶೆಟ್ಟಿ, ಮಾ.ಅಥರ್ವ ವಸಂತ ಶೆಟ್ಟಿ, ಕು.ನವೋಮಿ ಸಾಯಿನಾಥ್ ಶೆಟ್ಟಿ, ಕು.ಪ್ರೀಶ ಸಂತೋಷ್ ಶೆಟ್ಟಿ, ಕು.ಪ್ರಾಪ್ತಿ ಜಯನಂದ ಪಕ್ಕಳ ಅಭಿನಯ ಮಲ್ದೆರ್. ನೈಪಥ್ಯಡ್ ಗಿರೀಶ್ ನಾರಾಯಣ್, ಬಾಲಕೃಷ್ಣ ಶೆಟ್ಟಿಗಾರ್, ಆನಂದ ಸಾಲ್ಯಾನ್, ಭಾಸ್ಕರ ನೀರುಮಾರ್ಗ ಸಹಕಾರ ಮಲ್ದೆರ್.

ಗುರುಕುಲಾಯಿನ ಶರತ್ ಕುಡ್ಲ ಬೊಕ್ಕ ಬಾಲ ಕಲಾವಿದೆರೆಗ್ ಬಂಟ್ಸ್ ಸಂಘದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ, ಸಲಹೆ ಸಮಿತಿದ ಸದಸ್ಯೆರ್ ದಿನೇಶ್ ಶೆಟ್ಟಿ ಕೊಟ್ಟಿಂಜ‌ ಮೇರ್ ನೆಂಪುದ ಕಾಣಿಕೆ, ಪ್ರಮಾಣ ಪತ್ರ ಕೊರ್ದು ಮಾನಾದಿಗೆ ಮಲ್ತೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)