ಎಲ್ಯ ಪ್ರಾಯೊಡೇ ಕಂಬಳ ಕ್ಷೇತ್ರಡ್ ವಿಶೇಷ ಸಾಧನೆ ಮಲ್ತಿನ ಜವನೆ ತ್ರಿಷಾಲ್ ಪೂಜಾರಿ ಬೋಳಾರ್

ತನ್ನ ಕಿನ್ಯ ಪ್ರಾಯೊಡೇ ಎರುತ ಪಿರವು ಪೋದು ಇತ್ತೆದ ಯುವ ಪೀಳಿಗೆಗ್ ಸ್ಫೂರ್ತಿ ಆಯಿನ ಕುಡ್ಲದ ಜವನೆ ತ್ರಿಷಾಲ್ ಪೂಜಾರಿ ಬೋಳಾರ್.

ಕುಡ್ಲದ ಮಂಗಳಾದೇವಿ ದ ಕೈತಲ್ ಬೋಳಾರ್ ಡ್ ಉಪ್ಪುನ ಮೇರ್ ಎಲ್ಯ ಪ್ರಾಯಡೆ ಎರುತ ಮಿತ್ತ್, ಕಂಬಳ ಕ್ರೀಡೆದ ಮಿತ್ತ್ ಆಕರ್ಷಣೆ ಪಡೆದ್ ತನ್ನ 16 ವರ್ಷ ಪ್ರಾಯೋಡೆ ಈ ಕಲೊಕ್ಕು ಬೈದೆರ್.

ತನ್ನ ಪಿಯುಸಿ ವ್ಯಾಸಂಗನ್ ಕುಡ್ಲದ ಸಂತ ಅಲೋಶಿಯಸ್ ಕಾಲೇಜ್ ಡ್ ಮಲ್ತಿನ ಮೇರ್, ಎಸ್.ಡಿ.ಎಂ ಕಾಲೇಜ್ ಡ್ ಡಿಗ್ರಿ ಮಲ್ದೆರ್ ಅಂಚನೇ ಫೈನಾನ್ಸ್ ಬೊಕ ಎಚ್ಆರ್ ಡ್ ಎಂ.ಬಿ.ಎ ಮಲ್ತ್ ದ್ ತನ್ನ ಸ್ವಂತ ಉದ್ಯೋಗ ಮಲ್ತೊಂದು ಕಂಬಳ ಕ್ಷೇತ್ರಗ್ ಜತ್ತೆರ್. “ಎಂಕ್ ಲಾ ಎರು ಬೋಡು ತಾನ್ ಲಾ ಕಂಬಳ ಗ್ ಪೋವೊಡು ” ಪನ್ಪಿನ ಅಂಗಲ್ಪುಡು ತಾನ್ ದ್ವಿತೀಯ ಪಿಯುಸಿ ವ್ಯಾಸಂಗ ಮಲ್ಪುನಗನೇ ಸುರುತ ಅಡ್ಡಪಲಯಿ ಎರು ಕಟ್ಟಿಯೆರ್ ಅವ್ವೆ ವರ್ಷ ಕಂಬಳಡ್ ಪಾಲ್ ಪಡೆದ್ ಅವ್ವೆ ವರ್ಷಡ್ ಕಂಬಳಡ್ 11 ಮೆಡಲ್ ಕಂತಿನ ಪುಗಾರ್ತೆ ಮೆರೆಗ್ ಉಂಡು. ಏಳ್ ವರ್ಷ ಎರು ಗಿಡದಿನ ಮೆರ್ನ ಈ ಕೂಟ ಗ್ ಮೂಜಿ ವರ್ಷ ಚಾಂಪಿಯನ್ ಶಿಪ್ ಲಾ ಪಡೆತ್oಡ್.ಇಲ್ಲಡ್ ಇತ್ತೆ 5 ಎರು ಸಾಂಕೊಂದು ಉಲ್ಲೆರ್  ಎರುಕುಲ್ಲಾ ಬೇತೆ ಬೇತೆ ವಿಭಾಗಡ್ ಇನಾಮು ಗೆಂದ್ ದ್ ಪುದರ್ಲಾ ಮಲ್ದುಂಡು.ದಕ್ಷಿಣ ಕನ್ನಡ, ಉಡುಪಿ, ಕಾಸ್ರೋಡುಡು ನಡಪುನ ಮಾತಾ ಕಂಬಳಡ್ ಲಾ ತ್ರಿಷಾಲ್ ಪೂಜಾರ್ಲೆನ ಎರುಕುಲು ಪಾಲ್ ಪಡೆದ್ ಪುಗಾರ್ತೆ ಪಡೆದ್oಡ್.2021 ನೇ ಇಸವಿಡ್ ಆಯಿನ 8 ಕಂಬಳಡ್ 7 ಕಂಬಳಡ್ ಮೆರ್ನ ಎರು ಇನಾಮು ಪಡೆತ್oಡ್. ಕರಿನ 8 ವರ್ಷ ರ್ದ್ ಈ ಕಲೊಕು ಜೈದಿನ ಮೇರ್ನ ಎರುಕುಲು ಇನಿ ಮುಟ ಸರಿ ಸುಮಾರ್ 60 ರ್ದ್ 70 ಮುಟ ಇನಾಮುಲ ಪಡೆತ .

ಪೊಸ ಜವಣ್ಯೆರ್ ,ಪೊಸ ಜೋಕುಲು ನನಾತ್ ಕಂಬಳ ಕ್ಷೇತ್ರಗ್ ಬರೊಡು, ಎರು ಕಟ್ಟೊಡು, ಕಂಬಳಡ್ ಪಾಲ್ ಪಡೆಯೊಡು ನನಾತ್ ಈ ಕ್ಷೇತ್ರಡ್ ಸಾಧನೆ ಮಲ್ಪೊಡು ಪನ್ಪಿನವು ತ್ರಿಷಾಲ್ ಪೂಜಾರ್ಲೆನ ಆಶಯ.

ಬಾರಿ ಸೌಮ್ಯ ಸ್ವಭಾವದ, ಮಾತೆರ್ಡಲ ಮೋಕೆಡ್ ಪಾತೆರುನ, ಗೌರವ ಸ್ವಭಾವದ ಎಲ್ಯ ಪ್ರಾಯದ ತ್ರಿಷಾಲ್ ಪೂಜೆರ್ಲೆಗ್ ಕಂಬಳ ಕ್ಷೇತ್ರಡ್ ನನಾತ್ ಅವಕಾಶೊಲು ತಿಕ್ಕಡ್, ಆರ್ನ ಭವಿಷ್ಯ ನನಾತ್ ಉಜ್ವಲ ಆವಡ್, ದುಂಬುದ ಯುವ ಪೀಳಿಗೆಗ್ ಮೆರ್ನ ಸಾಧನೆ ಸ್ಫೂರ್ತಿ ಆವಡ್ ಪನ್ಪಿನವು  ಆಶಯ.