ಕೆದಿಲ : ಬಲೆ ತುಲು ಲಿಪಿ ಕಲ್ಪುಗ ಮುಗಿತಲ ಲೇಸ್
ಶ್ರೀ ದೇವಿ ಭಜನಾ ಮಂಡಳಿ ಗಾಂಧಿನಗರ ಕೆದಿಲ ಬೊಕ್ಕ ಶ್ರೀ ದೇವಿ ಸ್ಪೋರ್ಟ್ಸ್ ಕ್ಲಬ್ ಗಾಂಧಿನಗರ ಕೆದಿಲ ಮೊಕ್ಲೆನ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಜೈ ತುಲುನಾಡ್ (ರಿ.) ಮೊಕ್ಲೆನ ಒಟ್ಟು ಸೇರಿಗೆಡ್ ನಡತಿನ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ಮುಗಿತಲ ಲೇಸ್ ತೇದಿ ಮಾಯಿ 15 ಪೋಪುನಾನಿ 27-02-2021 ಐತಾರೊದಾನಿ ಬಂಟ್ವಾಳ ತಾಲೂಕ್ದ ಕೆದಿಲ ಶ್ರೀದೇವಿ ಭಜನಾ ಮಂದಿರಡ್ ನಡತ್ಂಡ್. ಲೇಸ್ಡ್ ಮಲ್ಲ ಬಿನ್ನೆರಾದ್ ಶ್ರೀ ಡಾ|| ರವೀಶ್ ಪಡುಮಲೆ ಒತ್ತ್ಪಾಲ್ಡ್ ಇತ್ತೆರ್.
ಬೊಕ್ಕ ಪಾತೆರ್ನ ಆರ್ ತುಲು ಲಿಪಿ, ತುಲು ಬಾಸೆದ ಬುಲೆಚ್ಚಿಲ್ಡ್ ಊರ ಕೂಟೊಲೆದ ಕೈ ಸೇರಿಗೆ ಮಸ್ತ್ ಅಗತ್ಯೊ ಉಪ್ಪುನವು, ಈ ದಿಟ್ಟಿಡ್ ಕೂಟೊಲೊಟ್ಟು ಸೇರ್ದ್ ತುಲುಬೆನ್ನಿ ಬೆನೊಡು, ಅಯಿಕ್ಕಾದ್ ಮಾತೆರ್ಲ ತುಲುಕ್ಕಾದ್ ಬೆನೊಂದಿಪ್ಪುನ ಜೈ ತುಲುನಾಡ್ (ರಿ.) ಸಂಘಟನೆಗ್ ಸೇರ್ದ್ ತುಲುತ ಬುಲೆಚ್ಚಿಲ್ಗ್ ಕೈ ಸೇರಾವೊಡು, ತುಲುವೆರೆನ ಮಿತ್ತ್ ಆವೊಂದಿಪ್ಪುನ ದಬ್ಬಾಳಿಕೆನ್ ತುಲುವೆರ್ ಮೊಟ್ಟುದ್ ಉಂತೊಡ್ ಪಂದ್ ಪಂಡೆರ್. ಲೇಸ್ದ ಗುರ್ಕಾರ್ಮೆಡ್ ಕೆ ಕೆ ಶೆಟ್ಟಿ ಕುರುಂಬ್ಲಾಜೆ ಇತ್ತೆರ್. ಲೇಸ್ಡ್ ತುಲು ಲಿಪಿ ಪರೀಕ್ಷೆ ಬರೆದ್ ಉತ್ತೀರ್ಣ ಆಯಿನಗ್ಲೆಗ್ ಆಜೋಲೆ ಪಟ್ಯೆರ್. ಲೇಸ್ಡ್ ತುಲು ಲಿಪಿ ಕಲ್ಪಾದಿಲಾಯಿನ ಜಗದೀಶ ಗೌಡ ಕಲ್ಕಳ, ಪೂರ್ಣಿಮಾ ಬಂಟ್ವಾಳ ಬೊಕ್ಕ ಜನಾರ್ಧನ್ ಪೆರ್ನೆ ಮೊಕ್ಲೆಗ್ ಆಯೋಜಕರೆನ ಪರವಾದ್ ಮಾನಾದಿಗೆ ನಡತ್ಂಡ್. ಮಿತ್ತರ್ಮೆಡ್ ಪುಷ್ಪರಾಜ್ ಹೆಗ್ಗಡೆ ಸತ್ತಿಕಲ್, ಚಿನ್ನಪ್ಪ ಗೌಡ ಕಂಪ, ವೇದಮೂರ್ತಿ ಶ್ರೀ ಕೃಷ್ಣ ಉಪಾಧ್ಯಾಯ, ಜಯಂತಿ ದಯಾನಂದ ಶೆಟ್ಟಿ ಮಿತ್ತಿಲ ಒತ್ತ್ಪಾಲ್ಡ್ ಇತ್ತೆರ್. ಈ ಸಂದರ್ಭೊಡ್ ಜೈ ತುಲುನಾಡ್ (ರಿ.) ಸಂಘಟನೆರ್ದ್ ನನ ದುಂಬುದ ಲೇಸ್ದ ಲೆಪ್ಪೋಲೆಡ್ ಬೊಕ್ಕ ಲೇಸ್ಡ್ ಆಯಿನಾತ್ ತುಲು ಬಾಸೆ, ತುಲು ಲಿಪಿನ್ ಗಲಸೊಡ್ ಪಂದ್ ಶ್ರೀದೇವಿ ಭಜನಾ ಮಂಡಳಿ ಬೊಕ್ಕ ಶ್ರೀದೇವಿ ಸ್ಪೋರ್ಟ್ಸ್ ಕ್ಲಬ್ದಕ್ಲೆಡ ಅರಿಕೆ ಮಲ್ತೆರ್. ಲೇಸ್ನ್ ಭರತೇಶ್ ಗೌಡ ಕೊಳಚಪ್ಪು ಬೊಕ್ಕ ಗೀತಾ ಜಯಪ್ರಸಾದ್ ಕೆದಿಲ ನಡಪಾದ್ ಕೊರ್ಯೆರ್.
