ಜ.19-30 : “ತುಳುನಾಡ ಕೈಲಾಸ” ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನಡ್ ಬ್ರಹ್ಮಕಲಶ ಉಚ್ಚಯ

ಪ್ರತಿ ದಿನಲ 5000 ಭಕ್ತೆರ್ , ಬ್ರಹ್ಮಕಲಶದಾನಿ 20,000 ಭಕ್ತೆರ್ ಬರ್ಪಿನ ಅಂದಾಜಿ

ಹಳೆಯಂಗಡಿ: “ತುಳುನಾಡ್ ದ ಕೈಲಾಸ” ಪನ್ಪಿನ ಪುಗರ್ತೆ ಪಡೆದಿನ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನ ದ ಬ್ರಹ್ಮಕಲಶ ಉಚ್ಚಯ 2023 ನೇ ವರ್ಷದ ಜನವರಿ 19 ಗುರುವಾರೊರ್ದು 30 ಸೋಮಾರ ಮುಟ್ಟ ಲಕ್ಷಾಂತರ ಭಕ್ತೆರೆನ ಸಮ್ಮುಖೊಡು ಭಾರಿ ಶ್ರದ್ಧಾ ಭಕ್ತಿಡ್ ಅಂಚೆನೆ ಗೌಜಿಡ್ ನಡಪರೆ ಉಂಡು ಪಂದ್ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ್ ನಾನಿಲ್ ತೆರಿಪಾಯೆರ್.

ಆರ್ ಪಾವಂಜೆದ ಮಿತ್ತ ದೇವಸ್ಥಾನದ ಅಂಗಣೊಡು ಐತಾರ (ಡಿ.18) ನಡತಿನ ಸುದ್ದಿಗೋಷ್ಠಿಡ್ ಪಾತೆರ್ದ್ ನೆತ್ತ ಮಾಹಿತಿ ಕೊರಿಯೆರ್. ಪಿರಾಕ್ ದ ಕಾಲೊಡು ನಂದಿನಿ ತುದೆಬರಿತ್ತ ಪಾವಂಜೆದ ಪೊರ್ಲುದ ಪರಿಸರೊಡು ಎತ್ತರದ ಜಾಗೆಡ್ ಲಿಂಗರೂಪೊಡು ಉದಿಪನ ಆದ್ “ಪಾಳೆ ಉಂಜ ಮಹಾದೇವ” ಪನ್ಪಿ ಪುದರ್ ಡ್ ಪೂಜೆ ಪಡೆದ್ ಏಳ್ ಚೌಕ ಗ್ರಾಮಸ್ಥೆರ್ನ ಬೊಕ್ಕ ಭಕ್ತೆರ್ನ ಆರಾಧ್ಯ ದೇವೆರೆರಾದ್ ಇಷ್ಟಾರ್ಥ ಈಡೇರಿಕೆ ಮಲ್ತೊಂದು ಬೈದಿನ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯದ ಜೀರ್ಣೋದ್ಧಾರ ದ ಬೇಲೆ ಮುಕ್ಕಾಲ್ ವಾಸಿ ಮುಗಿದ್ಂಡ್. ತಾಂಬೂಲ ಪ್ರಶ್ನೆದ ಪ್ರಕಾರ ಕ್ಷೇತ್ರದ ಜೀರ್ಣೋದ್ಧಾರ ದ ಕಜ್ಜೊಗು ಜತ್ತ್ ದ್ 16 ಉಪಸಮಿತಿ ಮಲ್ತ್ ದ್ ಆಯಾ ಜಬದಾರಿಲೆನ್ ಪಟ್ ದ್ ಕೊರ್ತುಂಡು ಪಂದ್ ಆರ್ ತೆರಿಪಾಯೆರ್. ಬ್ರಹ್ಮಕಲಶದ ನಿಲೆಟ್ಟ್ ಪಾವಂಜೆ ಕ್ಷೇತ್ರ ಒಂಜಿ ಮಾಮಲ್ಲ ಪ್ರೇಕ್ಷಣೀಯ ಅಂಚೆನೆ ಮಲ್ಲ ಧಾರ್ಮಿಕ ಕೇಂದ್ರ ಆದ್ ಪರಿವರ್ತನೆ ಆವರೆ ಉಂಡು, ಚೇಳಾಯಿರು ಕಡೆರ್ದ್ ಪಾವಂಜೆ ಗ್ ಸಂಪರ್ಕ ಮಲ್ಪುನ ತೂಂಕನದ ಸಂಕ ನಿರ್ಮಾಣ ಅಂಚೆನೆ ಕ್ಷೇತ್ರದ ಸುತ್ತಮುತ್ತ 3000 ದೈಕ್ಲೆನ್ ನಡ್ಪಿನ ಯೋಜನೆ ಮಾತ ಉಂಡು. ದಾನಿಲೆನ ಬೊಕ್ಕ ಭಕ್ತೆರೆನ ಸಕಾಯೊಡು ಅವು ಪೂರ್ಣ ಆವರೆ ಉಂಡು ಪಂಡೆರ್.

ಸುಮಾರ್ 5 ಕೋಟಿ ಅಂದಾಜಿ ಕರ್ಚಿಡ್ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ನಡಪರೆ ಉಂಡು.ರಾಜಮಾರ್ಗೊರ್ದು ಮಿತ್ತ ದೇವಸ್ಥಾನೊಗು ಸಂಪರ್ಕ ಮಲ್ಪುನ ರಸ್ತೆ ನಿರ್ಮಾಣ ಬೊಕ್ಕ ತುದೆ ಬರಿಟ್ ತಡೆಗೋಡೆ ನಿರ್ಮಾಣ ಯೋಜನೆ ಗ್ ಮಾನ್ಯ ಶಾಸಕೆರ್ ಉಮಾನಾಥ ಕೋಟ್ಯಾನ್ ಮೆರೆನ ಮುಕೇನ ರಾಜ್ಯ ಸರ್ಕಾರೊರ್ದು 4.5 ಕೋಟಿ ರೂ. ಅನುದಾನ ಮಂಜೂರು ಆತ್ಂಡ್ ಪಂದ್ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಜೊತೆ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ತೆರಿಪಾಯೆರ್. ದೇವಸ್ಥಾನೊಗು ಬರಿಯರೆ ರಸ್ತೆ ನಿರ್ಮಾಣ ಅತ್ತಾಂದೆ ಬಡಕಾಯಿ, ಮುಡಾಯಿ ಬೊಕ್ಕ ಪಡ್ಡಾಯಿದ ರಾಜಗೋಪುರದ ನವೀಕರಣ, ಪರತ್ತ್ ಮುಟ್ಟುಲೆನ ರಿಪೇರಿ, ಕುಡ ಮೂಜಿ ದಿಕ್ಕ್ ಡ್ ಲ ಮುಟ್ಟು ನಿರ್ಮಾಣ, ಪ್ರಾಯದಕ್ಲೆಗ್ ಬೊಕ್ಕ ಅಶಕ್ತೆರೆಗ್ ಮಿತ್ತ್ ಬರಿಯರೆ ಲಿಫ್ಟ್ , ದೇವಲ್ಯದ ಉಲಯಿ ಬೊಕ್ಕ ಪಿದಯಿ ಹಾಸ್ ಕಲ್ಲ್ , ಪೊಸತ್ತ್ ಚಂದ್ರಮಂಡಲ ತೇರ್, ರಕ್ತೇಶ್ವರಿ, ನಾಗನ ಕಟ್ಟೆ, ಗಣಪತಿ ಗುಡಿ ಮುಖಮಂಟಪ, ವಸಂತ ಮಂಟಪ ದ ನವೀಕರಣ ಬೇಲೆ ಮುಕ್ಕಾಲ್ ಅಂಶ ಮುಗಿದ್ಂಡ್. ಕರಿನ ಸೆಪ್ಟೆಂಬರ್ ತಿಂಗೊಲುರ್ದು ಚೌಕ ಗ್ರಾಮದ ಗ್ರಾಮಸ್ಥೆರ್, ಸಂಘ ಸಂಸ್ಥೆ ದಕುಲು ಶ್ರಮದಾನ ಮಲ್ತೊಂದುಲ್ಲೆರ್ ಪಂದ್ ಆರ್ ಪಂಡೆರ್. 2023ನೇ ಇಸ್ವಿದ ಜನವರಿ 19 ತಾರೀಕ್ ರ್ದ್ 30 ತಾರೀಕ್ ಮುಟ್ಟ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ ಪ್ರತಿದಿನ ಧಾರ್ಮಿಕ ವಿಧಿವಿಧಾನ, ಅನ್ನಸಂತರ್ಪಣೆ, ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟುಗು ಭಾರಿ ಗೌಜಿಡ್ ನಡಪರೆ ಉಂಡು. 19 ತಾರೀಕ್ ಗ್ ಕಾಂಡೆ ಉಗ್ರಾಣ ಮೂರ್ತ, ಮಧ್ಯಾಹ್ನ 3 ಗಂಟೆಗ್ ಪಡುಪಣಂಬೂರು ಅರಮನೆರ್ದ್ ಹಸಿರು ಹೊರೆ ಕಾಣಿಕೆ ಮೆರವಣಿಗೆ ಬರ್ರೆ ಉಂಡು. ಜ.22 ತಾರೀಕ್ ಗ್ ಸಾನಿಧ್ಯಡ್ ಶ್ರೀ ಮಹಾಲಿಂಗೇಶ್ವರ ಬೊಕ್ಕ ಪರಿವಾರ ದೇವೆರೆನ ಪುನರ್ ಪ್ರತಿಷ್ಠೆ ಆದ್ ಕೊಡಿ ಏರುಂಡು. ಜ.28 ಶನಿವಾರ ಬ್ರಹ್ಮಕುಂಭಾ ಭಿಷೇಕ ನಡಪರೆ ಉಂಡು.ಪ್ರತಿದಿನತ್ತ ಧಾರ್ಮಿಕ ಸಭಾ ಕಾರ್ಯಕ್ರಮೊಡು ಬೇತೆ ಬೇತೆ ಮಠತ್ತ ಸ್ವಾಮಿಲೆನ ಆಶೀರ್ವಚನ ಅಂಚೆನೆ ಕೇಂದ್ರ ಸಚಿವೆರ್, ರಾಜ್ಯ ಸಚಿವೆರ್, ಗಣ್ಯೆರ್ ಬಿನ್ನೆರ್ ಪಾಲ್ ಪಡೆವರೆ ಉಲ್ಲೆರ್ ಪಂದ್ ಆರ್ ತೆರಿಪಾಯೆರ್. ಉಚ್ಚಯದ ಪ್ರತಿದಿನಲ ಮಧ್ಯಾಹ್ನ 2.30 ಗಂಟೆರ್ದ್ ರಾತ್ರಿ 8 ಗಂಟೆ ಮುಟ್ಟ ನಡಪುನ ಸಾಂಸ್ಕೃತಿಕ ಕಾರ್ಯಕ್ರಮಕ್ಕದ ಲೆಡ್ ಪೌರಾಣಿಕ ಬೊಕ್ಕ ಭಾರತೀಯ ಸಂಸ್ಕೃತಿ ತೊಜಪಾವುನ ವಿಚಾರೊಗು ಆದ್ಯತೆ ಕೊರ್ತುಂಡು. ಬಯ್ಯಡ್ 6 -7 ಗಂಟೆ ಮುಟ್ಟ ಬೇತೆ ಬೇತೆ ಭಜನಾ ಮಂಡಳಿರ್ದ್ ಭಜನಾ ಸೇವೆ ನಡಪರೆ ಉಂಡು. ಭಕ್ತೆರೆಗ್ ರಡ್ಡ್ ಪೊರ್ತು ಉಪಾಹಾರ ಅಂಚೆನೆ ರಡ್ಡ್ ಪೊರ್ತು ಅನ್ನಸಂತರ್ಪಣೆ ನಡಪರೆ ಉಂಡು. ದಿನೊಕ್ಕು 5000 ಭಕ್ತೆರ್ ಬರ್ಪಿನ ನಿರೀಕ್ಷೆ ಉಂಡು. ಬ್ರಹ್ಮಕಲಶದ ದಿನ (ಜ.28)ಅಂದಾಜಿ 20 ಸಾರ ಜನ ಸೇರುನ ನಿರೀಕ್ಷೆ ಉಂಡು. ಅಯಿಕ್ಕ್ ಬೋಡಾಪಿನ ಪಾರ್ಕಿಂಗ್ ವ್ಯವಸ್ಥೆ ಅಂಚೆನೆ ಹೈವೇ ಡ್ ಖಂಡೆವುದಲ್ಪರ್ದ್ ಪಡುಪಣಂಬೂರು ಮುಟ್ಟ ಲೈಟಿಂಗ್ ವ್ಯವಸ್ಥೆ ಸೇರ್ದ್ ಮಾತ ವ್ಯವಸ್ಥೆ ಲ ಮಲ್ದ್ಂಡ್ ಪಂದ್ ರಾಮದಾಸ್ ಪಾವಂಜೆ ಪಂಡೆರ್. ಕ್ಷೇತ್ರದ ಪ್ರಧಾನ ಅರ್ಚಕೆರ್ ಪಿ.ವಾಸುದೇವ ಭಟ್ ಪಾತೆರ್ದ್, ಗರ್ಭಗುಡಿತ್ತ ಪ್ರಥಮಾವರಣ,ದ್ವಿತೀಯಾವರಣ ಬೊಕ್ಕ ತೃತೀಯಾವರಣ ಗಟ್ಟಿ ಇತ್ತಿನೆರ್ದಾವರ ಗರ್ಭಗುಡಿತ್ತ ನವೀಕರಣ ಮಲ್ಪುನ ಅವಶ್ಯಕತೆ ಬೈದಿಜಿ. ಉಲಯಿಡ್ ಇತ್ತಿನ ಪರ ಮಣ್ಣ್ ನ್ ದೆತ್ತ್ ದ್ ಪೊಸ ಮಣ್ಣ್ ಪಾಡ್ದ್ ಸಮತಟ್ಟ್ ಮಲ್ದ್ಂಡ್ ಪಂದ್ ತೆರಿಪಾಯೆರ್. ಸುದ್ದಿಗೋಷ್ಠಿಡ್ ಪವಿತ್ರಪಾಣಿ ಪಿ.ಗಣೇಶ್ ಭಟ್,ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಪ್ರಕಾಶ್ ಎನ್ ಶೆಟ್ಟಿ, ಕೋಶಾಧಿಕಾರಿ ಅಂಚೆನೆ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಬಿ.ಸೂರ್ಯ ಕುಮಾರ್, ಜೊತೆ ಕೋಶಾಧಿಕಾರಿಲು ಸುಧಾಕರ ಆರ್.ಅಮೀನ್ ಬೊಕ್ಕ ಜ್ಯೋತಿ ರಾಮಚಂದ್ರ ಸದಸ್ಯೆರಾಯಿನ ಪ್ರಮೀಳಾ ಚಂದ್ರಶೇಖರ್, ಜನಾರ್ಧನ ಪಡುಪಣಂಬೂರು, ವ್ಯವಸ್ಥಾಪನಾ ಸಮಿತಿದ ರಘು ಕೆ.ದೇವಾಡಿಗ, ಸುಕುಮಾರ್ ಸಿ., ಸುಲೋಚನ ಮೊಕುಲು ಮಾತ ಇತ್ತೆರ್.