ತಮಿಳುನಾಡ್ ದ ಪುಗರ್ತೆದ ವಿಲ್ಲುಪುರಂಡ್ ಇಪ್ಪುನ ಮುರುಗನ್ ದೇವಸ್ಥಾನದ ಉಚ್ಚಯಡ್ ಗಲಸಿನ ಲಿಂಬೆಪುಳಿನ್ ಏಲಂ ಮಲ್ದೆರ್.
ಒರ್ಂಬ ದಿನ ನಡಪುನ ಈ ಉಚ್ಚಯದ ಅಕೇರಿದ ದಿನ ಪೂಜೆಗ್ ಗಲಸುನ ಲಿಂಬೆನ್ ಏಲಂ ಮಲ್ಪುವೆರ್. ಈ ಸರ್ತಿ 9 ಲಿಂಬೆ ಪುಳಿ 2.3 ಲಕ್ಷ ರೂ. ಗ್ ಏಲಂ ಆತ್ಂಡ್.
ಈ ಲಿಂಬೆಪುಳಿಕ್ಕ್ ದೇವೆರ್ನ ಶಕ್ತಿ ಉಪ್ಪುಂಡು. ಬಂಜೆತನ ನಿವಾರಣೆ ಮಲ್ಪುನ ಶಕ್ತಿ ಉಂಡು. ಬೊಕ್ಕ ಧನಾತ್ಮಕ ಶಕ್ತಿನ್ ರೂಪಿಸಾವುನ ಮಹತ್ವದ ಪಾತ್ರ ಒಯಿಸುಂಡು ಪನ್ಪಿನ ಮುಲ್ಪದ ಭಕ್ತೆರೆನ ನಂಬಿಕೆ ಆತ್ಂಡ್.
ಬ್ರೆಜಿಲ್ ದ ಅಮೆಜಾನ್ ಕಾಡ್ ಡ್ ಇಂಚಿಪ್ಪ ಪತ್ತೆ ಆದಿತ್ತಿನ ಜಗತ್ತ್ ಡೇ ಮಸ್ತ್ ಮಲ್ಲ ಅನಕೊಂಡ ಉಚ್ಚು ಅನಾ ಜೂಲಿಯಾ ಸೈತ್ಂಡ್.
ಸುಮಾರ್ 26 ಅಡಿ ಉದ್ದ ಬೊಕ್ಕ 200 ಕೆಜಿ ತೂಕದ ಈ ಮಲ್ಲ ಉಚ್ಚುನ್ ಏರೋ ಗುಂಡು ಪಾಡ್ದ್ ಕೆರ್ತೆರ್ ಪಂದ್ ಸಂಶಯ ಬೈದ್ಂಡ್.
ಡಿಸ್ನಿ+ ಡ್ ಪ್ರಸಾರ ಆಪುನ ನ್ಯಾಷನಲ್ ಜಿಯಾಗ್ರಫಿಕ್ ದ ಪೋಲ್ ಟು ಪೋಲ್ ವಿತ್ ವಿಲ್ ಸ್ಮಿತ್ ಪಿಕ್ಚರ್ ದ ಶೂಟಿಂಗ್ ದ ಪೊರ್ತುಡು ಡಚ್ ಜೀವ ಶಾಸ್ತ್ರಜ್ಞೆರ್ ಡಾ. ಫ್ರೀಂಕ್ ಫೋಕ್ ಈ ಮಲ್ಲ ಉಚ್ಚುನ್ ಪತ್ತೆ ಮಲ್ತ್ ದಿತ್ತೆರ್.
2023-24 ನೇ ಸಾಲ್ ದ ಫಸ್ಟ್ ಪಿಯುಸಿ ಪರೀಕ್ಷೆ ರಿಸಲ್ಟ್ ಎಲ್ಲೆ ಪ್ರಕಟ ಆಪುಂಡು.
ಕರ್ನಾಟಕ ಶಾಲಾ ಪರೀಕ್ಷಾ ಬೊಕ್ಕ ಮೌಲ್ಯಾಂಕನ ಮಂಡಳಿದ ವೆಬ್ ಸೈಟ್ karresults.nic.in ಡ್ ರಿಸಲ್ಟ್ಈ ಬೊಲ್ಪುಗು 9 ಗಂಟೆರ್ದ್ 11 ಗಂಟೆದೊಲಯಿ ಪ್ರಕಟ ಆಪುಂಡು.
ಮಾತ ಕಲ್ಪಾರ್ಥಿಲು ರೋಲ್ ನಂಬರ್ ಆಧರಿಸಾದ್ ತನ್ನ ಫಲಿತಾಂಶನ್ ಈ ವೆಬ್ ಸೈಟ್ ಡ್ ತೂವೊಲಿ. ರಿಸಲ್ಟ್ ನ್ ಈ ಸರ್ತಿ ಬೇಗನೇ ಪ್ರಕಟ ಮಲ್ಪೆರೆ ಮಂಡಳಿ ದುಂಬಾತ್ಂಡ್. ಅವ್ವೇ ದಿನ ಕಾಲೇಜ್ ಡ್ಲಾ ರಿಸಲ್ಟ್ ಪ್ರಕಟ ಆಪುಂಡು. ಕಾಲೇಜ್ ಡ್ಲಾ ವಿದ್ಯಾರ್ಥಿಲು ರಿಸಲ್ಟ್ ನ್ ತೂವೊಲಿ.
ಸಸಿಹಿತ್ಲು ರಂಗ ಸುದರ್ಶನ (ರಿ.) ದ ಮುತಾಲಿಕೆಡ್ ಎ.6 ಕ್ಕ್ ಸಸಿಹಿತ್ಲು ಭಗವತಿ ದೇವಸ್ಥಾನದ ವಠಾರಡ್ ಬಿಸು ರಂಗ ಪರ್ಬ ನಡಪರೆ ಉಂಡು.
ಬಯ್ಯಗ್ ಕೈತಲ್ದ ಪ್ರತಿಭೆಲೆರ್ದ್ ತುಳು ಪದ ರಂಗಿತ, ರಾತ್ರೆ ಪರಮ ಪದ್ಮ ಕಲಾವಿದೆರೆರ್ದ್ ತುಳು ಪೌರಾಣಿಕ ಜಾನಪದ ನಾಟಕ ಮಾಯಕೊದ ಮಾಣಿ ನಡಪರೆ ಉಂಡು.
ಅಂಚೆನೆ ಬಿಸು ಚಾವಡಿದ ಲೇಸ್ ಡ್ ಸಸಿಹಿತ್ಲು ಭಗವತಿ ಕ್ಷೇತ್ರದ ಅನುವಂಶಿಕ ಮೊಕ್ತೇಸರೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ತುಡರ್ ಅರ್ಲಾವೆರ್. ಕುಡ್ಲ ಯೋಜಕ ಇಂಡಿಯಾ ಪ್ರೈ.ಲಿ ದ ಆಡಳಿತ ನಿರ್ದೇಶಕೆರ್ ಜಗದೀಶ ಬೋಳೂರು ಗುರ್ಕಾರ್ಮೆನ್ ಒಯಿಸೊನ್ವೆರ್.
ಪಡುಪಣಂಬೂರು ಮುಲ್ಕಿ ಸೀಮೆ ಅರಮನೆತ್ತ ಅರಸೆರ್ ದುಗ್ಗಣ್ಣ ಸಾವಂತೆರ್, ವಿದ್ಯಾ ತಪಸ್ವಿ ವಾಮನ ಇಡ್ಯಾ ಮೆರೆಗ್ ಗುರು ಗೌರವನ್ ಪ್ರಧಾನ ಮಲ್ಪುವೆರ್. ಬೊಂಬೈ ಭಾರತ್ ಕೋ ಆಪರೇಟಿವ್ ಬ್ಯಾಂಕ್ ದ ಅಧ್ಯಕ್ಷೆರ್ ಸೂರ್ಯಕಾಂತ್ ಜೆ. ಸುವರ್ಣ ಇಸೇಸ ಅಭಿನಂದನೆ ಸಂದಾವೆರ್. ಬಜಪೆ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕ್ ದ ಅಧ್ಯಕ್ಷೆರ್ ಎಕ್ಕಾರು ಮೋನಪ್ಪ ಶೆಟ್ಟಿ ಕಲಾ ಸಂಘಟಕೆರ್, ಭಾಸ್ಕರ ಸುವರ್ಣ ಸಸಿಹಿತ್ಲು ಮೆರೆಗ್ ಪುಟ್ಟೂರುದ ಪುರಸ್ಕಾರ ಪ್ರದಾನ ಮಲ್ಪುವೆರ್.
ಮಲ್ಲ ಬಿನ್ನೆರಾದ್ ಕುಡ್ಲ ವಿಕಾಸ್ ಶಿಕ್ಷಣ ಸಂಸ್ಥೆದ ಟ್ರಸ್ಟಿ ಸೂರಜ್ ಶೆಟ್ಟಿ, ಉದ್ಯಮಿ ಸತೀಶ್ ಮುಂಚೂರು, ಗುಜರಾತ್ ಬೊಯಿಸರ್ ಹೋಟೆಲ್ ಉದ್ಯಮಿ ಸುಹಾಸಿನಿ ನಾಯ್ಕ್, ಸಸಿಹಿತ್ಲು ಅಗ್ಗಿದಕಳಿಯ ಅಯ್ಯಪ್ಪ ಸೇವಾ ಸಮಿತಿದ ಗೌರವಾಧ್ಯಕ್ಷೆರ್ ಉದಯ ಬಿ. ಸುವರ್ಣ, ಹಳೆಯಂಗಡಿ ಪಿಸಿಎ ಬ್ಯಾಂಕ್ ದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಹಿಮಕರ್ ಟಿ ಸುವರ್ಣ ಪಾಲ್ ಪಡೆಯೆರೆ ಉಲ್ಲೆರ್.
ರಾಜೇಂದ್ರ ಪ್ರಸಾದ್ ಎಕ್ಕಾರು ಅಭಿನಂದನಾ ಭಾಷಣ ಮಲ್ಪುವೆರ್. ನಮ್ಮ ಟಿವಿ ನಿರೂಪಕೆರ್ ನವೀನ್ ಶೆಟ್ಟಿ ಎಡ್ಮೆಮಾರ್ ಈ ಲೇಸ್ ನ್ ಸುಧಾರಿಕೆ ಮಲ್ಪೆರೆ ಉಲ್ಲೆರ್.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಸಸಿಹಿತ್ಲು ರಂಗ ಸುದರ್ಶನ (ರಿ.) ದ ನಿರ್ದೇಶಕ ಮಂಡಳಿದ ನಿರ್ದೇಶಕೆರ್ ಪರಮಾನಂದ್ ವಿ. ಸಾಲ್ಯಾನ್ ಲೆಪ್ಪೋಲೆಡ್ ತೆರಿಪಾದೆರ್.
ಈ ವರ್ಷ ಶ್ರೀಲಂಕಾ ಆತಿಥ್ಯಡ್ ನಡಪರೆ ಇಪ್ಪುನ ಮಹಿಳಾ ಏಷ್ಯಾ ಕಪ್ ಟಿ20 ಟೂರ್ನಿದ ವೇಳಾಪಟ್ಟಿ ಬುಡುಗಡೆ ಆತ್ಂಡ್.
ಜು.18-28 ಮುಟ್ಟ ಈ ಮ್ಯಾಚ್ ನಡಪರೆ ಉಂಡು. ಈ ಸರ್ತಿ 8 ಟೀಮ್ ಪಾಲ್ ಪಡೆಯೆರೆ ಉಂಡು. ಗ್ರೂಪ್-ಎ ಭಾರತ, ಪಾಕಿಸ್ತಾನ, ಯುಎಇ, ನೇಪಾಳ ಬೊಕ್ಕ ಗ್ರೂಪ್-ಬಿ ಶ್ರೀಲಂಕಾ, ಬಾಂಗ್ಲಾದೇಶ, ಮಲೇಷ್ಯಾ ಬೊಕ್ಕ ಥೈಲ್ಯಾಂಡ್ ಸ್ಥಾನ ಪಡೆತ್ಂಡ್.
ಭಾರತ ಜು.19 ಕ್ಕ್ ಯುಎಇ ದ ಎದುರು, ಜು.21 ಕ್ಕ್ ಪಾಕಿಸ್ತಾನ ಬೊಕ್ಕ ಜು.23 ಕ್ಕ್ ನೇಪಾಳದ ಎದುರು ಪಂತೊಡು ಗೊಬ್ಬೆರೆ ಉಂಡು.
ಬೊಂಬೈ ಬಿಲ್ಲವರ ಎಸೋಸಿಯೇಶನ್ ದ ಮುತಾಲಿಕೆಡ್ ಶ್ರೀ ಗುರುನಾರಾಯಣ ಸಾಹಿತ್ಯ ಪ್ರಶಸ್ತಿ ಬೊಕ್ಕ ಯಕ್ಷಗಾನ ಕಲಾ ಪ್ರಶಸ್ತಿ ಕೊರ್ಪುನ ಲೇಸ್ ಮಾ.29 ಸುಕ್ರಾರ (ಇನಿ) ಬಯ್ಯಗ್ ಬಿಲ್ಲವರ ಭವನದ ಶ್ರೀ ನಾರಾಯಣ ಗುರು ಸಭಾಗೃಹಡ್ ನಡಪರೆ ಉಂಡು.
ಈ ಪ್ರಶಸ್ತಿನ್ ದಿ. ಜಯ ಸಿ. ಸುವರ್ಣೆರೆನ ಅಮ್ಮ ದಿ. ಅಚ್ಚು ಸಿ ಸುವರ್ಣ ಮೆರೆನ ನೆಂಪುಗಾದ್ ಕೊರೊಂದು ಉಲ್ಲೆರ್.
ಈ ಲೇಸ್ ದ ಗುರ್ಕಾರ್ಮೆನ್ ಬೊಂಬೈ ಬಿಲ್ಲವರ ಎಸೋಸಿಯೇಶನ್ ದ ಗುರ್ಕಾರೆ ಹರೀಶ್ ಜಿ. ಅಮೀನ್ ಒಯಿಸೊನ್ವೆರ್. ಪುಗರ್ತೆದ ಸಾಹಿತಿ ಶ್ಯಾಮಲಾ ಮಾಧವ್ ಬೊಕ್ಕ ಪುಗರ್ತೆದ ಪ್ರಸಂಗಕಾರೆ ಕೊಲ್ಯಾರು ರಾಜು ಶೆಟ್ಟಿ ಮೊಕುಲು ಪ್ರಶಸ್ತಿಗ್ ಆಯ್ಕೆ ಆತೆರ್.
ಅಂತಾರಾಷ್ಟ್ರೀಯ ವಾಸ್ತು ತಜ್ಞೆರ್ ಅಶೋಕ್ ಪುರೋಹಿತ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಪುಗರ್ತೆದ ಸಾಹಿತಿ ಮಿತ್ರಾ ವೆಂಕಟ್ರಾಜ್ ಮಾನಾದಿಗೆದ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್.
ಉದ್ಯಮಿ ವಿನಯ ಎಂ.ಕುಕ್ಯಾನ್ ಬೊಕ್ಕ ಬೊಂಬೈ ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರ್ ಸೂರ್ಯಕಾಂತ್ ಜಯ ಸುವರ್ಣ ಪ್ರಶಸ್ತಿ ಪ್ರಾಯೋಜಕೆರಾತೆರ್.
ಅಂಚೆನೆ ಗುರುನಾರಾಯಣ ಯಕ್ಷಗಾನ ಮಂಡಳಿದ ಕಲಾವಿದೆರೆರ್ದ್ ಕೃಷ್ಣಾರ್ಜುನ ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು ಪಂದ್ ಗೌರವ ಪ್ರಧಾನ ಕಾರ್ಯದರ್ಶಿ ಹರೀಶ್ ಜಿ ಸಾಲ್ಯಾನ್, ಗೌರವ ಪ್ರಧಾನ ಕೋಶಾಧಿಕಾರಿ ರಾಜೇಶ್ ಜೆ ಬಂಗೇರ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಶಕುಂತಲಾ ಕೆ. ಕೋಟ್ಯಾನ್ ಬೊಕ್ಕ ಅಕ್ಷಯ ಸಂಪಾದಕ ಮಂಡಳಿ, ಸಾಂಸ್ಕೃತಿಕ ಉಪಸಮಿತಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಎಪ್ರಿಲ್ ತಿಂಗೊಲ್ಡ್ ಒಟ್ಟು 14 ದಿನ ಬ್ಯಾಂಕ್ ಬಂದ್ ಇಪ್ಪುಂಡು. ಆಂಡ ಕರ್ನಾಟಕಡ್ ಎಪ್ರಿಲ್ ತಿಂಗೊಲ್ಡ್ 9 ರಜೆ ದಿನ ಉಂಡು.
ಬ್ಯಾಂಕ್ ಲು ರಜೆ ಇತ್ತ್ಂಡಲ ಸುಮಾರ್ ಬ್ಯಾಂಕಿಂಗ್ ಸೇವೆ ಆನ್ ಲೈನ್ ಡ್ ಉಂಡು. ಅಂಚಾದ್ ಎಚ್ಚದ ಬ್ಯಾಂಕ್ ಬಳಕೆದಾರೆರೆಗ್ ರಜೆರ್ದ್ ತೊಂದರೆ ಇಪ್ಪುಜಿ.
ಮುಲ್ಕಿ: ಮುಲ್ಕಿ ಬೆದ್ರ ವಿಧಾನಸಭೆ ಕ್ಷೇತ್ರ ವ್ಯಾಪ್ತಿದ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಕಾರ್ಯಕರ್ತೆರೆನ ಸಮಾವೇಶ ಹಳೆಯಂಗಡಿ ಓಂ ಸಂಕೀರ್ಣದ ಸಭಾಭವನಡ್ ನಡತ್ಂಡ್.
ಸಭೆಟ್ಟ್ ಮಾಜಿ ಸಚಿವೆರ್ ರಮಾನಾಥ ರೈ ಪಾತೆರ್ದ್, ರಾಜ್ಯದ ಪುಗರ್ತೆದ ಮುಖ್ಯಮಂತ್ರಿಲಾಯಿನ ಸಿದ್ದರಾಮಯ್ಯ ಮುತಾಲಿಕೆದ ಕಾಂಗ್ರೆಸ್ ರ್ದ್ ಗ್ಯಾರಂಟಿಲೆನೊಟ್ಟಿಗೆ ಸುಮಾರ್ ಪುಗರ್ತೆದ ಯೋಜನೆಲು ಜಾರಿಗ್ ಬೈದ್ಂಡ್, ಜನಕ್ಲೆನ ಬದ್ ಕ್ ಸುಧಾರ್ ದ್ಂಡ್. ಬಿಜೆಪಿದಕುಲು ಬಜೀ ಅಪಪ್ರಚಾರದ ಮುಕೇನ ತನ್ನ ಬೇಳೆನ್ ಬೆಯಿಪಾವರೆ ಕುತಂತ್ರ ನಡಪಾವೊಂದು ಉಲ್ಲೆರ್. ಜನಕ್ಲೆಗ್ ಕಾಂಗ್ರೆಸ್ ಸರಕಾರದ ಸಾಧನೆಲೆನ ಬಗೆಟ್ಟ್ ಪೊಲಬು ಕೊರ್ದು ನನದ ಲೋಕಸಭೆ ವೋಟುಡು ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಪದ್ಮರಾಜ ಮೆರೆಗ್ ಗೆಂದಾಯೆರೆ ಕಾರ್ಯಕರ್ತೆರ್ ಸಹಕಾರ ಮಲ್ಪೊಡು ಪಂದ್ ಪಂಡೆರ್.
ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಪದ್ಮರಾಜ್ ಪಾತೆರ್ದ್, ಕರಿನ ಸುಮಾರ್ ವರ್ಷೊದಿಂಚ ಬಿಜೆಪಿ ಆಡಳಿತರ್ದ್ ಜಿಲ್ಲೆದ ಅಭಿವೃದ್ಧಿ ಕಮ್ಮಿ ಆತ್ಂಡ್. ಜನಕ್ಲೆಡ ಕೋಮು ಸಾಮರಸ್ಯ ಭಾವನೆ ಕಡಿಮೆ ಆವೊಂದು ಉಂಡು. ಕಾಂಗ್ರೆಸ್ ಪಕ್ಷ ಅಧಿಕಾರಗ್ ಬತ್ತ್ಂಡ ಜಿಲ್ಲೆಡ್ ಉದ್ಯೋಗ ಸೃಷ್ಟಿದೊಟ್ಟಿಗೆ ಬೀಚ್ ಅಭಿವೃದ್ಧಿಗ್ ಪ್ರಾಧಾನ್ಯತೆ ಕೊರ್ಪ ಪಂದ್ ಪಂಡ್ ದ್ ಈ ಸರ್ತಿ ಕಾಂಗ್ರೆಸ್ ಪಕ್ಷನ್ ಬಹುಮತರ್ದ್ ಗೆಂದಾಯೆರೆ ಕಾರ್ಯಕರ್ತೆರ್ ಬೆನೊಡು ಪಂದ್ ಪಂಡೆರ್.
ಚಾವಡಿಡ್ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರ್ ಹರೀಶ್ ಕುಮಾರ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಬೆದ್ರ ವಿಧಾನಸಭೆ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ವೀಕ್ಷಕೆರ್ ವಸಂತ್ ಬರ್ನಾಡ್, ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಪ್ರಧಾನ ಕಾರ್ಯದರ್ಶಿ ಮಂಜುನಾಥ ಕಂಬಾರ, ಕಾಂಗ್ರೆಸ್ ನಾಯಕೆರ್ ಗುರುರಾಜ್ ಎಸ್ ಪೂಜಾರಿ, ಅಶೋಕ್ ಪೂಜಾರ, ಶಾಹುಲ್ ಹಮೀದ್ ಬಜ್ಪೆ, ಪ್ರಮೋದ್ ಕುಮಾರ್, ಸುರೇಶ್, ಹಸನಬ್ಬ, ಆಲ್ವಿನ್ ಪಾಲ್ ಪಡೆದಿತ್ತೆರ್.
Do something every day to move toward your goal
Get going and keep going, Just do it.
ಕುಂಪಲ: ಮಾರುತಿಮಠ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಸ್ಥಾನಡ್ ಶನಿಪೂಜೆ ಸಪ್ತಾಹ ಮಾ.24-31 ಮುಟ್ಟ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶನಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೇನೊಂದೆರ್.
