January 2024

ಕಲ್ಯಾಣ್ ತುಳುನಾಡ ತುಳುವೆರ್ ಮುತಾಲಿಕೆಡ್ ಅರಸಿನ ಕುಂಕುಮ ಲೇಸ್

ಕಲ್ಯಾಣ್ ತುಳುನಾಡ ತುಳುವೆರ್ ದ ಮುತಾಲಿಕೆಡ್ ಅರಸಿನ ಕುಂಕುಮ ಲೇಸ್ ಜ.27 ಕ್ಕ್ ನ್ಯೂ ಪಾರ್ವತಿ ಕೋ ಆಪರೇಟಿವ್ ಹೌಸಿಂಗ್ ಸೊಸೈಟಿ ಕಲ್ಯಾಣ್ ಪೂರ್ವಡ್ ನಡತ್ಂಡ್.

ಈ ಲೇಸ್ ನ್ ಶ್ರೀ ಕೃಷ್ಣ ಶೆಟ್ಟಿ ಬೊಕ್ಕ ರೇಖಾ ಶೆಟ್ಟಿ ದಂಪತಿಲೆನೊಟ್ಟಿಗೆ ಸದಸ್ಯೆರ್ ಮಾತೆರ್ಲಾ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಈ ಲೇಸ್ ಸಂಸ್ಥೆದ ಸಂಸ್ಥಾಪಕೆರ್ ಅಶೋಕ್ ಎಲ್. ಪೂಜಾರಿ ಉಲ್ಯಗುತ್ತು ಪಂಜ- ಕೊಯಿಕುಡೆ ಮೆರೆನ ಉಪಸ್ಥಿತಿಡ್ ನಡತ್ಂಡ್.

ಈ ಪೊರ್ತುಡು ಮಹಿಳಾ ಭಜನಾ ಸದಸ್ಯೆರ್ ಪ್ರಭಾವತಿ ಸುವರ್ಣ, ರೇಖಾ ಶೆಟ್ಟಿ, ಪದ್ಮಿನಿ ಕೋಟಿಯನ್, ಸುಮಿತ್ರಾ ಶೆಟ್ಟಿ, ಉಮಾ ಶೆಟ್ಟಿ, ಅಂಜನಾ ಪೂಜಾರಿ, ದೇವಕಿ ಪೂಜಾರಿ, ಸುಮತಿ ಕರ್ಕೇರ, ಸುಮಿತ್ರಾ ಪೂಜಾರಿ ಬೊಕ್ಕ ಭವಾನಿ ಪೂಜಾರಿ ಪಾಲ್ ಪಡೆದಿತ್ತೆರ್.

ಪೊಂಜೋವುನಕುಲು ಪೂವು, ಎಳ್ಳು ಬೊಕ್ಕ ಬೆಲ್ಲ ಪಟ್ಟೊಂಡೆರ್. ಪೊಂಜೋವುನಕ್ಲೆಗಾದ್ ಪಂತೊ ನಡತ್ಂಡ್. ಪ್ರಭಾವತಿ ಸುವರ್ಣೆರ್ ಸೊಲ್ಮೆ ಸಂದಾಯೆರ್. ಲೇಸ್ ಉಪಹಾರದೊಟ್ಟಿಗೆ ಮುಗಿತಲ ಆಂಡ್.

ಕ್ಯಾನ್ಸರ್ ಸೀಕ್ ದಕ್ಲೆಗ್ ಕೂಜಲ್ ದಾನ ಮಲ್ತಿನ ಪೊಣ್ಣು

ಕಲ್ಲಡ್ಕ: ಬಂಟ್ವಾಳ ತಾಲೂಕ್ ದ ಕಣಿಯೂರು ಸರಕಾರಿ ಪ್ರಾಥಮಿಕ ಶಾಲೆ 4ನೇ ಕ್ಲಾಸ್ ದ ಕಲ್ಪಾರ್ಥಿ ಹರ್ಷಿಕಾ (9) ತನ್ನ ಕೂಜಲ್ ನ್ ಕ್ಯಾನ್ಸರ್ ಸೀಕ್ ದಕ್ಲೆಗ್ ದಾನ ಮಲ್ದೆರ್.

ಹರ್ಷಿಕಾ ಕಣಿಯೂರು ಲೋಕೇಶ್ ಬೊಕ್ಕ ರೇಣುಕಾ ಕಣಿಯೂರು ದಂಪತಿಲೆನ ಮಗಲಾತೆರ್.

ಹರ್ಪಿಕಾನ ಅಮ್ಮ ರೇಣುಕಾ ಕಾಣಿಯೂರು ಜ್ಞಾನ ದೀಪ ಶಿಕ್ಷಕಿ, ಎಡ್ಡೆ ಸಂಪನ್ಮೂಲ ವ್ಯಕ್ತಿ, ನಿರೂಪಕೆರಾದ್ ಜೋಕುಲು ಇಲ್ಲಡ್ ಪೋಷಕೆರೆನ ಪಾತೆರನ್ ಎಂಚ ಅನುಕರಿಸಾವೆರ್ ಪನ್ಪುನೆಕ್ಕ್ ತನ್ನ ಮಗಲೆನ್ ಉದಾಹರಣೆ ಕೊರ್ಪೆರ್.

ತನ್ನ ಮಗಲ್ 1ನೇ ಕ್ಲಾಸ್ ಡ್ ಇಪ್ಪುನಗ ಶಾಲೆಡ್ ತನ್ನ ದೋಸ್ತಿಲು ಕೂಜಲ್ ಕಟ್ ಮಲ್ತಿನೆನ್ ತೂದು ಇಲ್ಲಲ್ ಬತ್ತ್ ದ್ ಅಮ್ಮಡ ತನ್ನ ಕೂಜಲ್ ನ್ ಕಟ್ ಮಲ್ಪೆರೆ ಪನ್ನಗ, ಬೊರ್ಚಿ ಕೂಜಲ್ ಮಲ್ಲ ಆಯಿ ಬೊಕ್ಕ ಕಟ್ ಮಲ್ತ್ಂಡ ಕೂಜಲ್ ಇಜ್ಜಂದಿನ ಅವೆತೊ ಜನಕ್ ನಮ್ಮ ಕೂಜಲ್ ಕೊರ್ದು ಅಕ್ಲೆನ್ ಪೊರ್ಲು ಮಲ್ಪೊಲಿ ಪಂದ್ ಇತ್ತೆರ್. ಕೂಜಲ್ ಇಜ್ಜಂದಿನ ಕ್ಯಾನ್ಸರ್ ಸೀಕ್ ದಕ್ಲೆನ ಫೋಟೋ ತೋಪಾಯೆರ್, ಅವೆಕ್ಕ್ ಎಲ್ಯ ಬಾಲೆ ಎತ್ ಉದ್ದ ಬರೊಡು ಕೊರಿಯೆರೆ ಪಂದ್ ಕುಡ ಪ್ರಶ್ನೆ ಮಲ್ತ್ ದ್ ಕೆನ್ನಗ 30 ಸೆಂಟಿಮೀಟರ್ ಪಂದ್ ಇತ್ತೆರ್. ಆ ದಿನರ್ದ್ ಬಾಲೆ ಕೂಜಲ್ ಬುಲೆಪಾವುನ ಯೋಚನೆಡೇ ಇತ್ತ್ಂಡ್. ಪೋಷಕೆರ್ ಮರತ್ಂಡಲ ಬಾಲೆ ಮರತಿಜಿ. ಪ್ರತಿ ವಾರ ಕೂಜಲ್ ನ್ ಅಳತೆ ಮಲ್ತೊಂದು ಇತ್ತ್ಂಡ್. ಮುರಾನಿ ಒಂಜಿ ದಿನ ಬತ್ತ್ ದ್ ಎನ್ನ ಕೂಜಲ್ 30 ಸೆಂಟಿಮೀಟರ್ ಆತ್ಂಡ್ ಕಟ್ ಮಲ್ಪೊಲೆ ಪನ್ನೆಕ್ಕ್ ತನ್ನ ಮಗಲೆನ ಇಷ್ಟದಲೆಕ್ಕ ಕೂಜಲ್ ನ್ ಕಟ್ ಮಲ್ತ್ ದ್ ಯುವಶಕ್ತಿ ಕಡೆ ಶಿವಾಲಯದ ಸಂಘಟನೆದ ಮುಕೇನ ಕ್ಯಾನ್ಸರ್ ಸೀಕ್ ದಕ್ಲೆಗ್ ದಾನ ಮಲ್ತೆರ್.

ವೇಣೂರು ಭಗವಾನ್ ಬಾಹುಬಲಿ ಸ್ವಾಮಿ ಮಹಾ ಮಸ್ತಕಾಭಿಷೇಕಗ್ ತಯಾರ್ ಆಂಡ್ ಅಟ್ಟಳಿಗೆ

ವೇಣೂರು: ದಿಗಂಬರ ಜೈನ ತೀರ್ಥಕ್ಷೇತ್ರ ಸಮಿತಿ ವೇಣೂರು ದ.ಕ ಬೊಕ್ಕ ವೇಣೂರು ಭಗವಾನ್ ಬಾಹುಬಲಿ ಸ್ವಾಮಿ ಮಹಾ ಮಸ್ತಕಾಭಿಷೇಕ ಮಹೋಚ್ಚಯ-2024 ನೆತ್ತ ಒಟ್ಟು ಸೇರಿಗೆಡ್ ಫೆ.22 ರ್ದ್ ಮಾರ್ಚ್ 1 ಮುಟ್ಟ ವೇಣೂರು ಭಗವಾನ್ ಬಾಹುಬಲಿ ಸ್ವಾಮಿ ಮಹಾಮಸ್ತಕಾಭಿಷೇಕ ಮಹೋಚ್ಚಯ ನಡಪರೆ ಉಂಡು.

ಇಂಚಾದ್ ಭಗವಾನ್ ಬಾಹುಬಲಿ ಸ್ವಾಮಿನ ಮಹಾಮಸ್ತಕಾಭಿಷೇಕಗ್ ಮಿತ್ತ್ ಪೋದು ಬೇತೆ ಬೇತೆ ಬಗೆತ್ತ ಅಭಿಷೇಕ ಮಲ್ಪರೆ ಅಟ್ಟಳಿಗೆ (ಮೊಟ್ಟು) ಆತ್ಂಡ್.

ಸ್ಯಾಮ್ಸಂಗ್ ಕಂಪೆನಿದ ಪೊಸ ವಿನ್ಯಾಸದ ಗ್ಯಾಲಕ್ಸಿ S24 Family ಮೊಬೈಲ್ ಮಾರ್ಕೆಟ್ ಡ್ ಬುಡುಗಡೆ

ಉಜಿರೆ: ಸ್ಯಾಮ್ಸಂಗ್ ಕಂಪೆನಿದ ಪೊಸ ವಿನ್ಯಾಸದ ಗ್ಯಾಲಕ್ಸಿ S24 Family ಮೊಬೈಲ್ ಜ.24 ಕ್ಕ್ ಉಜಿರೆ ocean ಪಾರ್ಲ್ ದ ಮಾರ್ಕೆಟ್ ಡ್ ಬುಡುಗಡೆ ಆಂಡ್.

ಲೇಸ್ ಡ್ ಝೋನಲ್ ಸೇಲ್ಸ್ ಮ್ಯಾನೇಜರ್ ಇಸ್ಮಾಯಿಲ್ ಶರೀಫ್, ಏರಿಯಾ ಬಿಸಿನೆಸ್ ಮ್ಯಾನೇಜರ್ ನಾಗೇಂದ್ರ ಪ್ರಭು, ಏರಿಯಾ ಬಿಸಿನೆಸ್ ಸೇಲ್ಸ್ ಆಫೀಸರ್ ವಿಜಯ್ ದಾಸ್, ಅಜಯ್ ಬಿ.ಎಂ, ತಾಲೂಕ್ ದ ಅಧಿಕೃತ ವಿತರಕೆರ್ ಕಲ್ಲಾರಿ ಕಮ್ಯುನಿಕೇಶನ್ ಮಾಲಕೆರ್ ಜಗದೀಶ್ ಆಚಾರ್ಯ ಪಾಲ್ ಪಡೆದಿತ್ತೆರ್. ಈ ಲೇಸ್ ಗ್ ತುಡರ್ ಅರ್ಲಾವುನ ಮುಕೇನ ಚಾಲನೆ ಕೊರಿಯೆರ್.

ಮೊಬೈಲ್ ಬುಡುಗಡೆ ಮಲ್ತಿನ ಝೋನಲ್ ಸೇಲ್ಸ್ ಮ್ಯಾನೇಜರ್ ಇಸ್ಮಾಯಿಲ್ ಶರೀಫ್ ಮೇರ್ ಪಾತೆರ್ದ್, ಮೊಬೈಲ್ ದ ವೈಶಿಷ್ಟ್ಯದ ಬಗೆಟ್ಟ್ ಪೊಲಬು ಕೊರಿಯೆರ್.

ಬೊಕ್ಕ ಮೊಬೈಲ್ ದ ಅಡ್ವಾನ್ಸ್ ಕೊರ್ನ ಬೆನಕ ಹಾಸ್ಪಿಟಲ್ ವೈದ್ಯೆರ್ ಗೋಪಾಲಕೃಷ್ಣ, ದಿಶಾ ಫುಡ್ ಕಾರ್ನರ್ ದ ಅಕ್ಷಯ್, ಉದ್ಯಮಿ ಜಗದೀಶ್ ಆಚಾರ್ಯ, ದುಬೈದ ಉದ್ಯಮಿ ಅಕ್ಷಯ್, ದಿಶಾ ಬೇಕರಿದ ದಿನೇಶ್, ಮೊಬೈಲ್ ಶಾಪ್ ದ ಮಾಲಕೆರ್ ರಿಶಾದ್, ಪವರ್ ಆನ್ ಬ್ಯಾಟರಿದ ಮಾಲಕೆರ್ ಶೀತಲ್ ಜೈನ್ ಬೊಕ್ಕ ಲ್ಯಾಡಿಂಗ್ ಡೀಲರ್ ಸಾಹುಲ್ ಹಮೀದ್ ಮೆರೆಗ್ ಪೊಸ ಮೊಬೈಲ್ ನ್ ಕೊರಿಯೆರ್.

ಲೇಸ್ ಡ್ ರಿಟೇಲರ್ ಫಾಲ್ಸ್ ಮೊಬೈಲ್ ಮಾಲಕೆರ್ ರಾಘವೇಂದ್ರ, ಹೈಟೆಕ್ ಮೊಬೈಲ್ ಮಾಲಕೆರ್ ಶರೀಫ್, ಅಯಾನ್ಶ್ ಎಂಟರ್‌ಪ್ರೈಸಸ್ ದ ಮಾಲಕೆರ್ ಅರಿಹಂತ್ ಜೈನ್, ಸ್ಮಾರ್ಟ್ ಮೊಬೈಲ್ ಮಾಲಕೆರ್ ಅಕ್ಷತ್ ಬೊಕ್ಕ ಕಲ್ಲಾರಿ ಕಮ್ಯುನಿಕೇಶನ್ ದ ಸಿಬ್ಬಂದಿಲು ಪಾಲ್ ಪಡೆದಿತ್ತೆರ್. ಬೊಕ್ಕ ಬಿನ್ನೆರೆಗ್ ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್. ಈ ಲೇಸ್ ನ್ ಗಣೇಶ್ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.

ಪುಗರ್ತೆದ ದೈವ ನರ್ತಕೆರ್ ಅಶೋಕ್ ಬಂಗೇರ ಗಂಧಕಾಡು ನನ ನೆಂಪು ಮಾತ್ರ

ಕುಡ್ಲ: ಪುಗರ್ತೆದ ದೈವ ನರ್ತಕೆರ್ ಅಶೋಕ್ ಬಂಗೇರ ಗಂಧಕಾಡು (47) ಮೇರ್ ದೈವೊದ ನೇಮ ಕಟ್ಟ್ ದ್ ಇಪ್ಪುನಗ ತಿಗಲೆ ಬೇನೆ ಬತ್ತ್ ದ್ ದೇವೆರೆ ಪಾದೊ ಸೇರಿಯೆರ್.

ಮೆರೆಗ್ ಕುಡ್ಲ ಪೇಂಟೆದ ಹಳೆಯಂಗಡಿ ಕೈತಲ್ ಲೆಕ್ಕೇಸಿರಿ ದೈವೊದ ನೇಮದ ಸೇವೆಡ್ ಇಪ್ಪುನಗ ತಿಗಲೆ ಬೇನೆ ಬೈದ್ಂಡ್. ಬೊಕ್ಕ ಮೆರೆನ್ ಪೇಂಟೆದ ಖಾಸಗಿ ಆಸ್ಪತ್ರೆಗ್ ಸೇರ್ಸಾನಗ ತಾದಿ ನಡುಟ್ಟ್ ತೀರ್ ಪೋತೆರ್.

ಒಂತೆ ದಿನ ಹುಷಾರ್ ದಾಂತೆ ಇತ್ತಿನ ಮೇರ್ ಈ ಸರ್ತಿರ್ದ್ ನೇಮ ಕಟ್ಟುನೆನ್ ಉಂತಾಯೆರೆ ನಿರ್ಧಾರ ಮಲ್ತ್ ದ್ ಇತ್ತೆರ್. ಆಂಡ ವಿಧಿಯಾಟ ಬೇತೆನೇ ಇತ್ತ್ಂಡ್. ಉಂದುವೇ ಆರೆನ ಅಕೇರಿನ ನೇಮ ಆತ್ಂಡ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 44ನೇ ಸಂಚಿಕೆ ಜ.29 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರ್ ಆರ್. ಶಿವಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಜ.30 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಪುತ್ತೂರು “ಕೋಟಿ – ಚೆನ್ನಯ” ಜೋಡುಕರೆ ಕಂಬುಲಡ್ ಗೆಂದಿನಕುಲು

31ನೇ ವರ್ಷದ ಪುತ್ತೂರು “ಕೋಟಿ – ಚೆನ್ನಯ” ಜೋಡುಕರೆ ಕಂಬುಲ ಜ.27 ಕ್ಕ್ ನಡತ್ಂಡ್.

ಈ ಕಂಬುಲ ಕೂಟಡ್ ಗೆಂದಿನಕ್ಲೆನ ಪೊಲಬು ಇಂಚ ಉಂಡು:

ಕನೆಪಲಯಿ: 6 ಜತೆ
ಅಡ್ಡಪಲಯಿ: 4 ಜತೆ
ಬಲ್ಲ್ ದ ಮಲ್ಲ: 15 ಜತೆ
ನಾಯೆರ್ ದ ಮಲ್ಲ: 40 ಜತೆ
ಬಲ್ಲ್ ದ ಎಲ್ಯ: 25 ಜತೆ
ನಾಯೆರ್ ದ ಎಲ್ಯ: 97 ಜತೆ
ಒಟ್ಟು ಎರ್ಲೆನ ಸಂಖ್ಯೆ: 187 ಜತೆ

ಕನೆಪಲಯಿ: (6.5 ಕೋಲ್ ನಿಶಾನೆಗ್ ನೀರ್ ರಾಪಾದೆರ್)
ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಬೈಂದೂರು ಮಹೇಶ್ ಪೂಜಾರಿ

ಅಡ್ಡ ಪಲಯಿ:
ಸುರುತ್ತ ಇನಾಮು: ನಾರಾವಿ ಯುವರಾಜ್ ಜೈನ್
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್
ರಡ್ಡನೇ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಸಾವ್ಯ ಗಂಗಯ್ಯ ಪೂಜಾರಿ

ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಎ”
ಗಿಡತಿನಾರ್: ಬೈಂದೂರು ಮಂಜುನಾಥ ಗೌಡ
ರಡ್ಡನೇ ಇನಾಮು: ನೂಜಿಪ್ಪಾಡಿ ಡಾ.ಪ್ರವೀಣ್ ಹೊಳ್ಳ “ಬಿ”
ಗಿಡತಿನಾರ್: ಬಾರಾಡಿ ನತೀಶ್

ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ಸುರತ್ಕಲ್ ಪಾಂಚಜನ್ಯ ಯೋಗಿಶ್ ಪೂಜಾರಿ “ಬಿ”
ಗಿಡತಿನಾರ್: ಭಟ್ಕಳ ಶಂಕರ್
ರಡ್ಡನೇ ಇನಾಮು: ನೂಜಿಪ್ಪಾಡಿ ಚಂದ್ರಶೇಖರ ಹೊಳ್ಳ “ಬಿ”
ಗಿಡತಿನಾರ್: ಬೈಂದೂರು ಮಂಜುನಾಥ ಗೌಡ

ನಾಯೆರ್ ದ ಮಲ್ಲ:
ಸುರುತ್ತ ಇನಾಮು: ಇರುವೈಲು ಪಾನಿಲ ಬಾಡ ಪೂಜಾರಿ “ಎ”
ಗಿಡತಿನಾರ್: ಬೈಂದೂರು ಮಂಜುನಾಥ ಗೌಡ
ರಡ್ಡನೇ ಇನಾಮು: ನಕ್ರೆ ಮಹೋಧರ ನಿವಾಸ ಇಶಾನಿ ತುಕ್ರ ಭಂಡಾರಿ
ಗಿಡತಿನಾರ್: ಮಾಳ ಆಧೀಶ್ ಪೂಜಾರಿ

ನಾಯೆರ್ ದ ಎಲ್ಯ:
(ಸಮಾನ ಇನಾಮು)
ಮುನಿಯಾಲ್ ಉದಯ ಕುಮಾರ್ ಶೆಟ್ಟಿ
ಗಿಡತಿನಾರ್: ಮಾಸ್ತಿಕಟ್ಟೆ ಸ್ವರೂಪ್

ಒಡಿಪಿ ಬ್ರಹ್ಮಗಿರಿ ಪ್ರಥಮ ಗಣನಾಥ ಹೆಗ್ಡೆ “ಬಿ”
ಗಿಡತಿನಾರ್: ಉಜಿರೆ ಹೊಸಮನೆ ಸ್ಪಂದನ್ ಶೆಟ್ಟಿ

ಫೆ.11: ಕುಂದಾಪುರ ತಾಲೂಕ್ ಯುವ ಬಂಟರ ಸಂಘದ ಮುತಾಲಿಕೆಡ್ ಭಾವೈಕ್ಯ ಲೇಸ್

ಕುಂದಾಪುರ ತಾಲೂಕ್ ಯುವ ಬಂಟರ ಸಂಘ (ರಿ.) ಮುತಾಲಿಕೆಡ್ ಫೆ.11 ಐತಾರ ಭಾವೈಕ್ಯ ಲೇಸ್ ನಡಪರೆ ಉಂಡು.

ಸಂಘದ ಮಾನಾದಿಗೆದ ಗುರ್ಕಾರೆಯಾದ್ ಬಿ.ಉದಯ ಕುಮಾರ ಶೆಟ್ಟಿ ಉಲ್ಲೆರ್. ಮಹಾಸಮಾಗಮದ ಮಹಾದಾನಿಲಾದ್ ಬೊಂಬೈ ಹೇರಂಬ ಆಗ್ರೋ ಇಂಡಸ್ಟ್ರೀಸ್ ದ ಸಿಎಂಡಿ ಕುಳೂರು ಕನ್ಯಾನ ಸದಾಶಿವ ಶೆಟ್ಟಿ, ಬೆಂಗ್ಲೂರು ಸೌತ್ ಫೀಲ್ಸ್ ಪೈಂಟ್ಸ್ ಸಿಎಂಡಿ ಎಸ್ ಎಸ್ ಹೆಗ್ಡೆ, ದುಬೈ ಫಾರ್ಚೂನ್ ಗ್ರೂಪ್ ಆಫ್ ಹೋಟೆಲ್ಸ್ ದ ವಕ್ವಾಡಿ ಪ್ರವೀಣ್ ಕುಮಾರ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ ತಾರಾ ಮೆರೆಗ್ ಆದ್ ನಟೆ ರಿಷಭ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಈ ಲೇಸ್ ದೊಟ್ಟಿಗೆ ಬಂಟೆರೆನ ನನದ ರಾಜಕೀಯ, ಸಾಂಸ್ಕೃತಿಕ, ಆರ್ಥಿಕ ಸವಾಲ್ ಲು ಮಾತು ಮಂಥನ, 18 ಬಂಟೆರ ಸಂಘಲೆನ ನಡುಟ್ಟ್ ಸಮೂಹ ನೃತ್ಯ ಪಂತೊ, ರೂರಲ್ ಆಯುರ್ವೇದ ಕಾಲೇಜ್ ದಕ್ಲೆನ ಆಯುರ್ವೇದ ಶಿಬಿರ, ರಾಜೇಶ್ ಕೃಷ್ಣನ್, ಎಂ.ಡಿ ಪಲ್ಲವಿ, ಮಾನಸ ಹೊಳ್ಳ ಮೊಕ್ಲೆರ್ದ್ ಸಂಗೀತ ಸಂಜೆ, ರಾಜ್ಯ ಬೊಕ್ಕ ರಾಷ್ಟ್ರ ಮಟ್ಟದ ಯುವ ಸಾಧಕೆರೆಗ್ ಅಭಿನಂದನೆ, ಇಸೇಸ ಚೇತನೆರೆಗ್ ಪ್ರೋತ್ಸಾಹಧನ, ವಿದ್ಯಾರ್ಥಿ ವೇತನ ವಿತರಣೆ, ಎಜೆ ಹಾಸ್ಪಿಟಲ್ ಬೊಕ್ಕ ಸಂಶೋಧನಾ ಕೇಂದ್ರ ಕುಡ್ಲ ಮೊಕ್ಲೆರ್ದ್ ಉಚಿತ ಆರೋಗ್ಯ ತಪಾಸಣೆ, ಪ್ರಸಾದ್ ನೇತ್ರಾಲಯ ಮೆರೆರ್ದ್ ಧರ್ಮೊಗು ಕಣ್ಣ್ ದ ಪರೀಕ್ಷೆ, ಚಿತ್ರ ಬುಡ್ಪಾವುನ ಪಂತೊ, ರಂಗೋಲಿ ಪಂತೊ, ಧ್ಯೇಯ ವಾಕ್ಯ ರಚನೆ ನಡಪರೆ ಉಂಡು ಪಂದ್ ಗುರ್ಕಾರೆ ಡಾ| ಅಂಪಾರು ನಿತ್ಯಾನಂದ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ನಿತೀಶ್ ಶೆಟ್ಟಿ ಬಸ್ರೂರು, ಕೋಶಾಧಿಕಾರಿ ಅಕ್ಷಯ್ ಹೆಗ್ಡೆ ಮೊಳಹಳ್ಳಿ, ಲೇಸ್ ದ ಸಂಯೋಜಕೆರ್ ಪ್ರತಾಪ್ ಚಂದ್ರ ಶೆಟ್ಟಿ ಹಳ್ನಾಡು ಲೆಪ್ಪೋಲೆಡ್ ತೆರಿಪಾದೆರ್.