ಅಡ್ವೆ: ನಂದಿಕೂರು ಕೋಟಿ ಚೆನ್ನಯ ಜೋಡುಕರೆ ಕಂಬುಲ ಸಮಿತಿದ 31 ನೇ ವರ್ಷದ ಕಂಬುಲ ಉಚ್ಚಯ ಜ.20 ಸನಿಯಾರ ನಡಪರೆ ಉಂಡು.
ಈ ಲೇಸ್ ಡ್ ಕಂಬುಲಾಭಿಮಾನಿಲು ಮಾತೆರ್ಲಾ ಬತ್ತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಮಾನಾದಿಗೆದ ಗುರ್ಕಾರೆ ಶಾಸಕೆರ್ ಸುರೇಶ್ ಶೆಟ್ಟಿ ಗುರ್ಮೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಗ್ಲೂರು: ಬೆಂಗ್ಲೂರುದ ಚಂದ್ರಾಲೇಔಟ್ ಡ್ ಇಪ್ಪುನ ಸಂಗೀತ ನಿರ್ದೇಶಕೆ ಗುರುಕಿರಣ್ ಮೆರೆನ ಮಾಮಿ ಕಸ್ತೂರಿ ಶೆಟ್ಟಿ ಮೆರೆನ ಇಲ್ಲಡ್ ಕಲ್ವೆರ್ ಕಂಡ್ ದ್ ಪೋತೆರ್ ಪಂದ್ ಪೊಲೀಸೆರ್ ತೆರಿಪಾದೆರ್.
ಕಸ್ತೂರಿ ಶೆಟ್ಟಿ ಮೇರ್ 2023ತ್ತ ಡಿ.31 ಕ್ಕ್ ಮಧ್ಯಾಹ್ನ, ರೂಮ್ ದ ಕಬಾಟ್ ಡ್ 2.05 ಲಕ್ಷ ರೂ. ಕಾಸ್ ದೀದಿತ್ತೆರ್. ಆಂಡ ಇತ್ತೆ ಆ ಕಾಸ್ ನಾಪತ್ತೆ ಆತ್ಂಡ್. ಇಲ್ಲದ ಬೇಲೆದಾರ್ ನ ಮಿತ್ತ್
ಸಂಸಯ ಉಂಡು ಪಂದ್ ಕಸ್ತೂರಿ ಶೆಟ್ಟಿ ಮೇರ್ ಚಂದ್ರಾಲೇಔಟ್ ಪೊಲೀಸ್ ಠಾಣೆಡ್ ದೂರು ದಾಖಲ್ ಮಲ್ದೆರ್.
ಕೇಸ್ ದಾಖಲ್ ಮಲ್ತಿನ ಪೊಲೀಸೆರ್ ಇಲ್ಲದ ಬೇಲೆದಾರ್ ರತ್ನಮ್ಮ ಮೆರೆನ್ ಲೆತ್ತ್ ದ್ ವಿಚಾರಣೆ ನಡಪಾದೆರ್. ರತ್ನಮ್ಮ ಕರಿನ ಆಜಿ ತಿಂಗೊರ್ಲೊದಿಂಚ ಕಸ್ತೂರಿ ಶೆಟ್ಟಿ ಮೆರೆನ ಇಲ್ಲಡ್ ಕೆಲಸ ಮಲ್ತೊಂದು ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
ಸುಬ್ರಹ್ಮಣ್ಯ ರೋಟರಿ ಕ್ಲಬ್ ದ ಇಸೇಸ ಸಭೆ ರೋಟರಿ ಕ್ಲಬ್ ದ ಪೂರ್ವ ಗುರ್ಕಾರೆ ಗೋಪಾಲ್ ಎಣ್ಣೆಮಜಲ್ ಮೆರೆನ ಇಲ್ಲಲ್ ಜ.8 ಕ್ಕ್ ನಡತ್ಂಡ್.
ಸಭೆಟ್ಟ್ 2024-25 ಸಾಲ್ ದ ಗುರ್ಕಾರೆಯಾದ್ ರೋಟೇರಿಯನ್ ಚಂದ್ರಶೇಖರ್ ನಾಯರ್, ಕಾರ್ಯದರ್ಶಿಯಾದ್ ಚಿದಾನಂದ ಕುಳ ಮೇರ್ ಆಯ್ಕೆ ಆಯೆರ್.
ರೋಟರಿ ಕ್ಲಬ್ ದ ನಿಕಟ ಪೂರ್ವ ಕಾರ್ಯದರ್ಶಿ ಡಾ/ ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಮುತಾಲಿಕೆಡ್ ಆಯೋಜನೆ ಮಲ್ತಿನ ಕಬಡ್ಡಿ ಟೂರ್ನಮೆಂಟ್ ಗ್ ರೋಟರಿ ಕ್ಲಬ್ ರ್ದ್ 30,000/- ರೂ. ಇನಾಮುನ್ ಕೊರ್ಪ ಪಂದ್ ತೀರ್ಮಾನ ಮಲ್ತೆರ್.
ಸುಬ್ರಮಣ್ಯ ರೋಟರಿ ಕ್ಲಬ್ ಸುಮಾರ್ 21 ವರ್ಷನ್ ಮುಗಿತ್ ದ್ ಸುಮಾರ್ ಪ್ರಶಸ್ತಿನ್ ಜಿಲ್ಲಾಮಟ್ಟಡ್ ಪಡೆತ್ಂಡ್. ಸುಮಾರ್ ಸರಕಾರಿ ಶಾಲೆಗ್ ಕಂಪ್ಯೂಟರ್, ಲೇಖನಿ ಸಾಮಗ್ರಿನ್ ಕೊರ್ತುಂಡು. ಸುಬ್ರಮಣ್ಯದ ದೇವಲ್ಯದ ಪರಿಸರಡ್ ಪರ್ಪಿನ ನೀರ್ ದ ಯೋಜನೆನ್ ಮಲ್ದ್ಂಡ್. ಅಂಚಾದ್ ಈ ವರ್ಷದ ಎಡ್ಡೆ ಕೆಲಸಗ್ ರೋಟರಿ ಅಂತರಾಷ್ಟ್ರೀಯ ಸೈಟೇಶನ್ ಅವಾರ್ಡ್ ಪಡೆತ್ಂಡ್.
ಸಭೆತ್ತ ಚಾವಡಿಡ್ ರೋಟರಿ ಕ್ಲಬ್ ದ ಗುರ್ಕಾರೆ ಪ್ರಶಾಂತ್ ಕೋಡಿಬೈಲ್, ಕಾರ್ಯದರ್ಶಿ ಮೋಹನ್ ದಾಸ್ ಎಣ್ಣೆಮಜಲು, ಪೂರ್ವ ಅಸಿಸ್ಟೆಂಟ್ ಗವರ್ನರ್ ಶಿವರಾಮ ಎನೆಕಲ್ಲು, ರಾಮಕೃಷ್ಣ ಮಲ್ಲಾರ ಪಾಲ್ ಪಡೆದಿತ್ತೆರ್.
ಕ್ಲಬ್ ದ ಕಾರ್ಯದರ್ಶಿ ಮೋಹನ್ ದಾಸ್ ಎಣ್ಣೆಮಜಲು ಎದ್ಕೊನಿಯೆರ್. ಪೂರ್ವಾಧ್ಯಕ್ಷೆರ್ ವಿಜಯಕುಮಾರ್ ಸೊಲ್ಮೆ ಸಂದಾಯೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ‘ಚಿಣ್ಣರ ದನಿ ಲೇಸ್ ದ 27ನೇ ಸಂಚಿಕೆ ಜ.10 ಬುದಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ಡ್ ಬಾಲ ಪ್ರತಿಭೆ ಮನಸ್ವಿನಿ ಕುಲಾಲ್ ಕಾರ್ಲಪದವು ಪಾಲ್ ಪಡೆಯೆರ್. ಜ.11 ಗುರುವಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಮೀರಾ ಭಾಯಂದರ್ ಶ್ರೀ ನಿತ್ಯಾನಂದ ಸೇವಾ ಸಂಸ್ಥೆ (ರಿ.) ದ 15ನೇ ವರ್ಷದ ಲೆಕ್ಕೊಡು ಶ್ರೀ ಕ್ಷೇತ್ರ ಗಣೇಶ್ ಪುರಿಗ್ ಪಾದಯಾತ್ರೆ ಫೆ.3 ಸನಿಯಾರ ನಡಪರೆ ಉಂಡು.
ಈ ಪಾದಯಾತ್ರೆ ಮೀರಾರೋಡ್ ಶ್ರೀ ಗಣೇಶ್ ಜೈ ಅಂಬಾ ಮಾತಾ ಮಂದಿರರ್ದ್ ಧಾರ್ಮಿಕ ವಿಧಿ ವಿಧಾನ, ಭಜನೆ ಬೊಕ್ಕ ಮಂಗಳಾರತಿ ಆದ್ ಸುರು ಆಪುಂಡು.
ಈ ಪಾದಯಾತ್ರೆ ಲೇಸ್ ಬೇವಿನಕೊಪ್ಪ ಶ್ರೀ ವಿಜಯಾನಂದ ಸ್ವಾಮೀಜಿ ಬೊಕ್ಕ ಸಾಂತಿಂಜ ಶ್ರೀ ಜನಾರ್ದನ ಭಟ್ರೆನ ಉಪಸ್ಥಿತಿಡ್, ಆಶೀರ್ವಾದದೊಟ್ಟಿಗೆ ಸುರು ಆಪುಂಡು ಪಂದ್ ಮೀರಾ ಭಾಯಂದರ್ ಶ್ರೀ ನಿತ್ಯಾನಂದ ಸೇವಾ ಸಂಸ್ಥೆ (ರಿ.) ದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ತುಳು ರಂಗಭೂಮಿಡ್ ಅತೀ ಕಡಮೆ ಪೊರ್ತುಡು ಚಾರಿತ್ರಿಕ ದಾಖಲೆ ನಿರ್ಮಾಣ ಮಲ್ತಿನ ವಿಜಯ್ಕುಮಾರ್ ಕೊಡಿಯಾಲ್ಬೈಲ್ ನಿರ್ದೇಶನದ ಕಲಾಸಂಗಮ ಕಲಾವಿದೆರೆನ “ಶಿವದೂತೆ ಗುಳಿಗೆ” ನಾಟಕದ 555ನೇ ಸಂಭ್ರಮ ಜ.11 ಕ್ಕ್ ಗುರುವಾರ ಬಯ್ಯ 5 ಗಂಟೆಗ್ ಕುಡ್ಲದ ಅಡ್ಯಾರ್ ಗಾರ್ಡನ್ಡ್ ನಡಪರೆ ಉಂಡು.
ಈ ಬಗೆಟ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ವಿಜಯ್ಕುಮಾರ್ ಕೊಡಿಯಾಲ್ಬೈಲ್, 2020ನೇ ಜನವರಿ 2 ತಾರೀಕ್ಗ್ ಶಿವದೂತೆ ಗುಳಿಗೆ ನಾಟಕ ಸೂರುತ್ತ ಸರ್ತಿ ಪ್ರದರ್ಶನ ಆದಿತ್ತ್ಂಡ್. ದಕ್ಷಿಣ ಕನ್ನಡ, ಒಡಿಪು ಜಿಲ್ಲೆ, ಕೇರಳ ರಾಜ್ಯ, ದುಬೈ, ಮಸ್ಕತ್, ಬಹ್ರೈನ್, ಬೊಂಬೈ, ಪೂಣಾ, ನಾಸಿಕ್, ಗುಜರಾತ್, ಬರೋಡ, ಬೆಂಗಳೂರು, ಮೈಸೂರ್, ಹುಬ್ಬಳ್ಳಿ, ಧಾರವಾಡ, ದಾವಣಗೆರೆ, ಶಿವಮೊಗ್ಗ, ಮಡಿಕೇರಿ, ಫಟ್ಟ ಪ್ರದೇಶ ಬೊಕ್ಕ ಕರ್ನಾಟಕದಾದ್ಯಂತ ಪ್ರದರ್ಶನ ಆದಿತ್ತ್ದ್ 2025 ಮುಟ್ಟ ಮಸ್ತ್ ರಾಜ್ಯ-ವಿದೇಶಲೆಡ್ ಪ್ರದರ್ಶನ ಕೊರಿಯರೆ ತಯಾರ್ ಆತ್ಂಡ್. 555ನೇ ಗೌಜಿದ ಪೊರ್ತುಡು ತುಳು ಪಿಚ್ಚರ್ದ ಟೈಟಲ್ ಬುಡುಗಡೆ ಆಯರೆ ಉಂಡು ಪಂದ್ ಪಂಡೆರ್.
ತುಳು ಅಂಚನೆ ಕನ್ನಡ ಭಾಷೆಡ್ ಪ್ರದರ್ಶನ ಆಯಿನ ನಾಟಕ ನನ ಕೆಲ ಸಮಯಡ್ ಮಲಯಾಳಂ ಭಾಷೆಡ್ಲ ಪ್ರದರ್ಶನ ಕೊರಿಯರೆ ಉಂಡು. ಇಡೇ ಮುಟ್ಟ ಸುಮಾರ್ 15 ಲಕ್ಷ ಜನ ಈ ನಾಟಕನ್ ತೂತೆರ್. ಕೆಲ ಪ್ರದರ್ಶನಲೆನ್ 5 ಸಾರರ್ದ್ 8 ಸಾರ ಜನ ತೂತಿನಲ ಉಂಡು. 2025ತ್ತ ಡಿಸೆಂಬರ್ದ ಪ್ರದರ್ಶನ ಇತ್ತೆನೇ ಬುಕ್ಕಿಂಗ್ ಆತಿನವು ವಿಶೇಷ. ಬೇಗಡೇ 1 ಸಾರ ಪ್ರದರ್ಶನ ಶಿವದೂತೆ ಗುಳಿಗೆ ನಾಟಕಡ್ ಆಯರೆ ಉಂಡು ಪಂದ್ ಪಂಡೆರ್.
ಈ ಲೇಸ್ನ್ ಕೊಪ್ಪ ಗೌರಿಗದ್ದೆದ ಅವಧೂತ ಶ್ರೀ ಶ್ರೀ ವಿನಯ್ ಗುರೂಜಿ ಮೇರ್ ತುಡರ್ ಅರ್ಲಾದ್ ಉದಿಪನ ಮಲ್ಪರೆ ಉಲ್ಲೆರ್. ಹಿರಿಯ ಪತ್ರಕರ್ತೆರ್ ಪರಮಾನಂದ ಸಾಲಿಯಾನ್ ಮೆರೆಗ್ ದಿ. ವನಿತಾ ಆನಂದ ಶೆಟ್ಟಿ ಪ್ರಶಸ್ತಿ ಕೊರ್ಪುನ ಲೇಸ್ ನಡಪರೆ ಉಂಡು. ಹಿರಿಯ ಚಲನಚಿತ್ರ ನಿರ್ದೇಶಕೆರ್ ರಾಜೇಂದ್ರ ಸಿಂಗ್ ಬಾಬು, ಪುಗರ್ತೆದ ನಟೆ ರಕ್ಷಿತ್ ಶೆಟ್ಟಿ, ಸಂಗೀತ ನಿರ್ದೇಶಕೆರ್ ಗುರುಕಿರಣ್, ನಿರೂಪಕಿ ಅನುಶ್ರೀ ಲೇಸ್ಡ್ ಪಾಲ್ ಪಡೆಯರೆ ಉಲ್ಲೆರ್.
ಗುರ್ಕಾರ್ಮೆನ್ ಎಸ್ಸಿಡಿಸಿಸಿ ಬ್ಯಾಂಕ್ ಅಧ್ಯಕ್ಷೆರ್ ಡಾ.ಎಂ.ಎನ್. ರಾಜೇಂದ್ರ ಕುಮಾರ್ ವಹಿಸೊನರೆ ಇತ್ತ್ದ್, ಜಾಗತಿಕ ಬಂಟರ ಸಂಘ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ಉದ್ಯಮಿ ಕನ್ಯಾನ ಸದಾಶಿವ ಶೆಟ್ಟಿ, ಶಶಿಧರ್ ಶೆಟ್ಟಿ ಬರೋಡ, ಆರ್.ಕೆ. ನಾಯರ್, ಪದ್ಮರಾಜ್ ಆರ್., ಹಿರಿಯ ಪತ್ರಕರ್ತೆರ್ ಮನೋಹರ್ ಪ್ರಸಾದ್, ಬಿ. ನಾಗರಾಜ್ ಶೆಟ್ಟಿ, ಚಿತ್ರ ನಿರ್ಮಾಪಕೆರ್ ಪ್ರಕಾಶ್ ಪಾಂಡೇಶ್ವರ್, ಎಸಿಪಿ ಎಸ್. ಮಹೇಶ್ ಕುಮಾರ್, ಕಾಸರಗೋಡು ಚಿನ್ನಾ, ಕುಮಾರ್ ಎನ್. ಬಂಗೇರ, ಹರೀಶ್ ಬಂಗೇರ ಮಲ್ಲ ಬಿನ್ನೆರಾದ್ ಲೇಸ್ಡ್ ಪಾಲ್ ಪಡೆಯರೆ ಉಲ್ಲೆರ್.
ಪತ್ರಿಕಾಗೋಷ್ಠಿಡ್ ಸ್ವರಾಜ್ ಶೆಟ್ಟಿ, ಪ್ರಜಿತ್, ಸಂಗೀತ ನಿರ್ದೇಶಕೆರ್ ಎ.ಕೆ. ವಿಜಯ್ ಕೋಕಿಲ, ಚಂದ್ರ ಕೊಡಿಯಾಲ್ ಬೈಲ್, ಪ್ರೇಮ್ ಶೆಟ್ಟಿ ಸುರತ್ಕಲ್, ನಿತೇಶ್ ಪೂಜಾರಿ ಏಳಿಂಜೆ ಇತ್ತೆರ್.
ಬೊಂಬೈ: ಗಣೇಶ ಪುರಿಡ್ ನಿವಾಸ ಮಲ್ತೊನ್ನ ಶ್ರೀ ಗುರುದೇವ ನಿತ್ಯಾನಂದ ಸ್ವಾಮಿಲೆನ 60ನೇ ವರ್ಷದ ಸುವರ್ಣ ಪಾದುಕ ಉಚ್ಚಯ ಜ.16-23 ಮುಟ್ಟ ಮಾಟುಂಗಾ ಲೇಬಲ್ ಕ್ಯಾಂಪ್ ಡ್ ನಡಪರೆ ಉಂಡು.
ಜ.16 ಅಂಗಾರೆ ಬೊಲ್ಪುಗು ಸಪ್ತಾಹ ಸುರು ಆದ್ ಜ.23 ಅಂಗಾರೆ ಬೊಲ್ಪುಗು ಸಪ್ತಾಹ ಮಂಗಳಾಚರಣೆ, ಬೊಕ್ಕ ಗಣಹೋಮ, ಗುರುಪಾದುಕ ಅಭಿಷೇಕ, ಮಧ್ಯಾಹ್ನ ಮಹಾಪ್ರಸಾದ ಬಯ್ಯಗ್ ಸುವರ್ಣ ಪಾದುಕಾ ಪುರಮೆರವಣಿಗೆ ಬೊಕ್ಕ ಬೇತೆ ಬೇತೆ ಲೇಸ್ ದೊಟ್ಟಿಗೆ ಮುಗಿತಲ ಆಪುಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಶ್ರೀ ಸದ್ಗುರು ದಯಾನಂದ ಶಾಲಿಗ್ರಾಮ ಸ್ವಾಮೀಲೆನ ಭಕ್ತೆ ನಿತ್ಯಾನಂದ ಕರುಣ, ಶ್ರೀ ಸದ್ಗುರು ನಿತ್ಯಾನಂದ ಆಶ್ರಮದ ಟ್ರಸ್ಟಿಲು ಲೆಪ್ಪೋಲೆಡ್ ತೆರಿಪಾದೆರ್.
ವಸಾಯಿ ಸಾರ್ವಜನಿಕ ಶ್ರೀ ಶನೀಶ್ವರ ಸೇವಾ ಸಮಿತಿದ ಬೊಳ್ಳಿ ಪರ್ಬದ ಲೆಕ್ಕೊಡು ಸಾರ್ವಜನಿಕ ಭಜನಾ ಕಾರ್ಯಕ್ರಮ ಜ.14 ಕ್ಕ್ ವಸಾಯಿದ ದಿವಾನ್ ಮಾನ್ ಶ್ರೀ ಹನುಮಾನ್ ಮಂದಿರಡ್ ನಡಪರೆ ಉಂಡು.
ಈ ಲೇಸ್ ನ್ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಭಜನಾ ಪರಿಷತ್ ಬೊಂಬೈ ಘಟಕದ ಗುರ್ಕಾರೆ ಧರ್ಮದರ್ಶಿಲು ದೇವು ಬಿ ಪೂಜಾರಿ ಉದಿಪನ ಮಲ್ಪುವೆರ್.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ತೀರ್ಥ ಪ್ರಸಾದ ದೆತೊಂದು ಶ್ರೀ ಶನೀಶ್ವರ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ವಸಾಯಿ ಸಾರ್ವಜನಿಕ ಶ್ರೀ ಶನೀಶ್ವರ ಸೇವಾ ಸಮಿತಿದ ಮಾನಾದಿಗೆದ ಗುರ್ಕಾರೆ ಪಾಂಡು ಎಲ್ ಶೆಟ್ಟಿ, ಗುರ್ಕಾರೆ ಉಮೇಶ್ ಎಚ್ ಕರ್ಕೇರ, ಗೌರವ ಪ್ರಧಾನ ಕಾರ್ಯದರ್ಶಿ ಪ್ರಭಾಕರ್ ಎನ್ ಬಂಗೇರ, ಗೌರವ ಕೋಶಾಧಿಕಾರಿ ಉಮೇಶ್ ಎಮ್ ಕರ್ಕೇರ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ: ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದಶಾವತಾರ ಯಕ್ಷಗಾನ ಮಂಡಳಿದ ಆಜಿ ಮೇಳದ ಆಟ ಜ.14 ರ್ದ್ ಕುಡ ಬೊಲ್ಪು ಮುಟ್ಟ ಪ್ರದರ್ಶನ ಆಪುಂಡು.
ಈ ವರ್ಷ ಮೇಳ ತಿರುಗಾಟ ನಡಪಾದ್ ಸುಮಾರ್ ಒಂಜರೆ ತಿಂಗೊಲ್ದ ಬೊಕ್ಕ ಪಂಡ ಜ.14 ರ್ದ್ ಕುಡ ಬೊಲ್ಪು ಮುಟ್ಟ ಪ್ರದರ್ಶನ ಆಪುಂಡು.
ಉಚ್ಛ ನ್ಯಾಯಾಲಯದ ಆದೇಶ ಬೊಕ್ಕ ಶ್ರೀ ಕ್ಷೇತ್ರದ ಭಕ್ತೆರೆನ ಆಪೇಕ್ಷೆದ ಮಿತ್ತ್ ಜ.14 ಕ್ಕ್ ಮಕರ ಸಂಕ್ರಾಂತಿರ್ದ್ ಬೊಲ್ಪು ಮುಟ್ಟ ಆಟ ನಡಪರೆ ಉಂಡು.
ಬೊಲ್ಪುಗು 6 ಗಂಟೆಗ್, ಮಧ್ಯಾಹ್ನ 12.30 ರ್ದ್ 1.30 ಬೊಕ್ಕ ರಾತ್ರೆ 8.30 ಕ್ಕ್ ಚೌಕಿ ಪೂಜೆ ನಡಪರೆ ಉಂಡು ಪಂದ್ ದೇವಲ್ಯದ ಆಡಳಿತ ಸಮಿತಿ ಗುರ್ಕಾರೆ ಬೊಕ್ಕ ಅನುವಂಶಿಕ ಮೊಕ್ತೇಸರೆರ್ ಕೊಡೆತ್ತೂರುಗುತ್ತು ಸನತ್ ಕುಮಾರ್ ಶೆಟ್ಟಿ, ಅನುವಂಶಿಕ ಮೊಕ್ತೇಸರೆರ್ ವಾಸುದೇವ ಅಸ್ರಣ್ಣ ಹೇಳಿಕೆ ಕೊರ್ತೆರ್.
ಅಯೋಧ್ಯೆಡ್ ಶ್ರೀ ರಾಮ ದೇವೆರೆನ ಮಂದಿರ ಉದಿಪನ ಬೊಕ್ಕ ಶ್ರೀ ರಾಮನ ವಿಗ್ರಹ ಪ್ರತಿಷ್ಠಾಪನೆದ ಲೆಕ್ಕೊಡು ಬೊಂಬೈ ದಿ. ಉಗ್ಗು ದೇವಿ ನಾರಾಯಣ ಮೊಕ್ಲೆನ ಜೋಕುಲು ಬೊಕ್ಕ ಗೆಳೆಯರ ಬಳಗದ ಒಟ್ಟುಸೇರಿಗೆಡ್ ಚಿತ್ರ ಕಲಾ ಪಂತೊ (ದೇವೆರೆನ ಚಿತ್ರ ಬುಡ್ಪಾವುನ ಪಂತೊ) ಜ.21 ಕ್ಕ್ ಪಡ್ಡೆದ್ರ ಸಾಗರ ವಿದ್ಯಾಮಂದಿರದ ಸಭಾಗೃಹಡ್ ನಡಪರೆ ಉಂಡು.
ಈ ಪಂತೊಡು ಮಲ್ಪೆರ್ದ್ ಪೆಜಮಾಡಿ ಮುಟ್ಟದ ಮೊಗವೀರೆರ್ ಬೊಕ್ಕ ಸಾಗರ ವಿದ್ಯಾ ಮಂದಿರದ ಮಾತ ಕಲ್ಪಾರ್ಥಿಲು ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ ಈ ಪಂತೊಡು ಗೆಂದಿನಕ್ಲೆಗ್ ನಗದು ಇನಾಮುನ್ ಕೊರ್ಪೆರ್.
