January 2024

ಮಾ.24: ಕುರ್ಲಾ ಪಶ್ಚಿಮ ಬಂಟರ ಭವನಡ್ ಕರ್ನಾಟಕ ಜಾನಪದ ನೃತ್ಯ ವೈಭವ ” ಸಾಂಸ್ಕೃತಿಕ ನೃತ್ಯ ಪಂತೊ

ಬೆಂಗ್ಲೂರು ಕರ್ನಾಟಕ ಜಾನಪದ ಪರಿಷತ್ತು (ರಿ.) ದ ‘ಮಹಾರಾಷ್ಟ್ರ ಘಟಕದ “ಕರ್ನಾಟಕ ಜಾನಪದ ನೃತ್ಯ ವೈಭವ ” ಸಾಂಸ್ಕೃತಿಕ ನೃತ್ಯ ಪಂತೊ ಮಾ.24 ಕ್ಕ್ ಕುರ್ಲಾ ಪಶ್ಚಿಮ ಬಂಟರ ಭವನಡ್ ನಡಪರೆ ಉಂಡು.

ಈ ಪಂತೊದ ನಿಯಮಲು:

1.ಪ್ರತೀ ಕೂಟಡ್ ಕಮ್ಮಿ ಪಂಡ 8 ನೃತ್ಯಗಾರೆರ್ ಇಪ್ಪೊಡು, ಗರಿಷ್ಟ ನಿರ್ಬಂಧ ಇಜ್ಜಿ.
2.ವರ್ಷದ ಮಿತಿಗ್ ನಿರ್ಬಂಧ ಇಜ್ಜಿ.
3.ಲಿಂಗ ತಾರತಮ್ಯ ಇಜ್ಜಿ
4. ನೃತ್ಯ ಕರ್ನಾಟಕ ಜಾನಪದ ಇಸಯಡ್ ಆದಿಪ್ಪೊಡು
5. ಕರ್ನಾಟಕದ ಮಾತ ಭಾಷೆಲೆಗ್ ಅವಕಾಶ ಉಂಡು.
6. 4-6 ನಿಮಿಷ ಮಾತ್ರ ಅವಕಾಶ
7. ಸುರುತ್ತ, ರಡ್ಡನೇ, ಮೂಜಿನೇ ಇನಾಮುಲು ಕ್ರಮವಾದ್, ತಲಾ 25 ಸಾರ,20 ಸಾರ ಬೊಕ್ಕ 15 ಸಾರ ನಗದು ಕೊರ್ದು ಮಾನಾದಿಗೆ ಮಲ್ಪೆರೆ ಉಂಡು
8. ಪಾಲ್ ಪಡೆಯಿನ ಮಾತ ಕೂಟಲೆಗ್ ಸರಿಯಾಯಿನ ಮಾನಾದಿಗೆ ಕೊರಿಯೆರೆ ಉಂಡು.
9. ನೆರ್ದ್ ದುಂಬುದ ನಿರ್ವಹಣೆದ ವಿಡಿಯೋ ಕ್ಲಿಪಿಂಗ್ ನ್ ಕಡಪಾವೊಡು.
10. ಒವ್ವೇ ಕಾರಣಗ್ಲಾ ನೃತ್ಯ ಕಲಾವಿದೆರೆನ ಪುನರಾವರ್ತನೆ ಆವೆರೆ ಬಲ್ಲಿ. ಒರಿಯಾಗ್ ಒರನೇ ಅವಕಾಶ, ಅತ್ತಂದೆ ಪದ್ಯ ಧ್ವನಿ ಮುದ್ರಿತನೇ ಆದಿಪ್ಪೊಡು, ಲೈವ್ ಗ್ ಅವಕಾಶ ಇಜ್ಜಿ
11‌.ನಿರ್ಣಾಯಕೆರೆನ ತೀರ್ಮಾನನೇ ಅಕೇರಿ
12.ಅಕೇರಿದ ಹಂತದ ಬದಲಾವಣೆದ ಮಾತ ಹಕ್ಕುಲೆನ್ ಸಂಘಟಕೆರೆಗ್ ಕೊರಿಯೆರೆ ಆಪುಂಡು.

ಅಂಚೆನೆ ಎಚ್ಚದ ಪೊಲಬುಗಾದ್ 9323822352,
9820370090, 9969812319, 9987959750 ಈ ನಂಬರ್ ಗ್ ಸಂಪರ್ಕ ಮಲ್ಪೊಲಿ ಪಂದ್
ಬೆಂಗ್ಲೂರು ಕರ್ನಾಟಕ ಜಾನಪದ ಪರಿಷತ್ತು (ರಿ.) ಬೆಂಗ್ಲೂರು, ಮಹಾರಾಷ್ಟ್ರ ಘಟಕ ತೆರಿಪಾದ್ಂಡ್.

ಕಲಾವಿದೆರೆನ್ ಶಿಕ್ಷಣ ಸಾಧಕೆರೆನ್ ಗುರುತಿಸಾವುನ ಬೇಲೆ ಮೆಚ್ಚುಡಾಯಿನವು: ಪಟ್ಲ ಸತೀಶ್ ಶೆಟ್ಟಿ

ಮುಲ್ಕಿ: ಸಂಘ ಸಂಸ್ಥೆಲು ಸಮಾಜ ಸೇವೆ, ಕಲೆ ಕಲಾವಿದೆರೆಗ್ ಮಾನಾದಿಗೆ ಬೊಕ್ಕ ಶಿಕ್ಷಣಡ್ ಸಾಧನೆ ಮಲ್ತಿನ ಪ್ರತಿಭೆಲೆಗ್ ಮಾನಾದಿಗೆ ಮಲ್ಪುನ ಬೇಲೆನ್ ಮೆಚ್ಚುಡಾಯಿನವು ಪಂದ್ ಯಕ್ಷ ಧ್ರುವ ಪಟ್ಲ ಫೌಂಡೇಶನ್ ದ ಗುರ್ಕಾರೆ ಪಟ್ಲ ಸತೀಶ್ ಶೆಟ್ಟಿ ಪಂಡೆರ್.

ಮೇರ್ ಕಿನ್ನಿಗೋಳಿ ಕೈತಲ್ದ ಕೊಡೆತ್ತೂರುಡ್ ನಡತಿನ ಕೊಡೆತ್ತೂರು ಆದರ್ಶ ಕೂಟದ ವಾರ್ಷಿಕೋಚ್ಚಯದ ಪೊರ್ತುಡು ನಡತಿನ ಯಕ್ಷಗಾನದ ಸಭಾ ಲೇಸ್ ಡ್ ಪಾತೆರಿಯೆರ್.

ಬೊಕ್ಕ ಪಾವಂಜೆ ಯಕ್ಷಗಾನ ಮೇಳದ ಕಲಾವಿದೆರ್ ಸಂದೇಶ ಮಂದಾರ, ವಗೆನಾಡು ಪ್ರಶಾಂತ್ ಶೆಟ್ಟಿ ಬೊಕ್ಕ ಸಮಾಜ ಸೇವಕಿ ವನಜ ಮೊಕ್ಲೆಗ್ ಸನ್ಮಾನ ನಡತ್ಂಡ್.

ಶೈಕ್ಷಣಿಕ ಸಾಧನೆ ಮಲ್ತಿನ ಕೈತಲ್ದ ಕಲ್ಪಾರ್ಥಿಲು ಅದೀತಿ ಅಮೀನ್, ದಿಕ್ಷೀತ್ ಕೋಟ್ಯಾನ್, ಗವಿದರ್ಶನ ಶೆಟ್ಟಿ, ಪ್ರೀತಿ ಎಸ್ ಕೋಟ್ಯಾನ್, ಶ್ರೇಯಾ ಆಚಾರ್ಯ, ಸುರಕ್ಷಾ ಶೆಟ್ಟಿಗ್ ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ದೇವಸ್ಯಮಠ ವೇದವ್ಯಾಸ ಉಡುಪ. ಕೆ.ವಿ ಶೆಟ್ಟಿ, ಕಿನ್ನಿಗೋಳಿ ಯುಗಪುರುಷದ ಭುವನಾಭಿರಾಮ ಉಡುಪ, ಪ್ರಕಾಶ್ ಶೆಟ್ಟಿ, ಜಯಂತ ಕರ್ಕೇರ, ನಿತಿನ್ ಶೆಟ್ಟಿ ಪಾಲ್ ಪಡೆದಿತ್ತೆರ್.

ದಾಮೋದರ ಶೆಟ್ಟಿ ಎದ್ಕೊನಿಯೆರ್. ರಿದಿ ಶೆಟ್ಟಿ ಸೊಲ್ಮೆ ಸಂದಾಯೆರ್. ಕೇಶವ ಕರ್ಕೇರ ಲೇಸ್ ದ ಸುಧಾರಿಕೆ ಮಲ್ತೆರ್. ಬೊಕ್ಕ ಪಾವಂಜೆ ಮೇಳದಕ್ಲೆರ್ದ್ ಆಟ ನಡತ್ಂಡ್.

ಗೆಜ್ಜೆಗಿರಿ ಜಾತ್ರೆದ ಲೆಪ್ಪೋಲೆ ಬುಡುಗಡೆ

ದೇಯಿ ಬೈದಿತಿ ಕೋಟಿ ಚೆನ್ನಯ ಮೂಲಸ್ಥಾನ ಶ್ರೀ ಕ್ಷೇತ್ರ ಗೆಜ್ಜೆಗಿರಿ ಜಾತ್ರೆ ಫೆ.25-29 ಮುಟ್ಟ ನಡಪರೆ ಉಂಡು.

ನೆತ್ತ ಲೆಪ್ಪೋಲೆನ್ ಕುಡ್ಲದ ಕಂಕನಾಡಿ ಬ್ರಹ್ಮಬೈದರ್ಕಳ ಗರಡಿಡ್ ನಡತಿನ ಬಿಲ್ಲವ ಸಂಘಲೆನ ಸಭೆಟ್ಟ್ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಗೆಜ್ಜೆಗಿರಿ ಕ್ಷೇತ್ರಾಡಳಿತ ಸಮಿತಿದ ಗುರ್ಕಾರೆ ಪೀತಾಂಬರ ಹೆರಾಜೆ ಬೊಕ್ಕ ಗೆಜ್ಜೆಗಿರಿ ಜಾತ್ರಾ ಉಚ್ಚಯದ ಕಾರ್ಯಾಧ್ಯಕ್ಷೆರ್ ಶೈಲೇಂದ್ರ ಸುವರ್ಣ, ಬಿಲ್ಲವ ಸಂಘಟನೆಲು ಬೊಕ್ಕ ಸಮಾಜ ಭಾಂಧವೆರ್ ಮಾತೆರ್ಲಾ ಗೆಜ್ಜೆಗಿರಿ ಜಾತ್ರಾ ಉಚ್ಚಯಡ್ ಏಪಲ ಪಾಲ್ ಪಡೆದ್ ಸಹಕಾರ ಕೊರೊಡು ಪಂದ್ ಕೇನೊಂಡೆರ್.

ಬಿಲ್ಲವ ಸಂಘಲೆನ ಸಭೆಟ್ಟ್ ಸಮಾಜದ ಪ್ರಮುಖೆರ್ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್, ಶ್ರೀ ನಾರಾಯಣ ಗುರು ವಿಚಾರ ವೇದಿಕೆ ರಾಜ್ಯಾಧ್ಯಕ್ಷೆರ್ ಸತ್ಯಜಿತ್ ಸುರತ್ಕಲ್, ಕುಡ್ಲ ಅಸೋಸಿಯೇಷನ್ ಸೌದಿ ಅರೇಬಿಯಾ ದಮ್ಮಾಮ್ (MASA) ದ ನಿಕಟ ಪೂರ್ವ ಗುರ್ಕಾರೆ ಸತೀಶ್ ಕೆ ಬಜಾಲ್, ಯುವವಾಹಿನಿ ಕೇಂದ್ರ ಸಮಿತಿದ ಗುರ್ಕಾರೆ ಹರೀಶ್ ಕೆ ಪೂಜಾರಿ, ಗುರು ಚಾರಿಟೇಬಲ್ ಟ್ರಸ್ಟ್ ದ ಗುರ್ಕಾರೆ ಜಯಾನಂದ ಪೂಜಾರಿ, ಗೆಜ್ಜೆಗಿರಿತ್ತ ಒತ್ತು ಗುರ್ಕಾರೆ ರವಿ ಪೂಜಾರಿ ಚಿಲಿಂಬಿ, ಕಾರ್ಪೊರೇಟರ್ ಅನಿಲ್ ಕುಮಾರ್ ಪಂಜಿಮುಗೇರು, ಕಾರ್ಪೊರೇಟರ್ ಸಂದೀಪ್ ಗರೋಡಿ, ಬಿಲ್ಲವ ಸೇವಾ ಸಮಾಜ ಕಂಕನಾಡಿದ ಗುರ್ಕಾರೆ ದಿನೇಶ್ ಅಂಚನ್, ಕಂಕನಾಡಿ ಗರಡಿ ಮೆನೇಜರ್ ಕಿಶೋರ್, ಕೊಣಾಜೆ ಗ್ರಾಮ ಚಾವಡಿ ಬಿಲ್ಲವ ಸಂಘದ ಗುರ್ಕಾರೆ ರವೀಂದ್ರ ಬಂಗೇರ, ಉರ್ವ ಬಿಲ್ಲವ ಸಂಘದ ಗುರ್ಕಾರೆ ಹರಿಪ್ರಸಾದ್, ಯುವವಾಹಿನಿ ಕಂಕನಾಡಿ ಘಟಕದ ಗುರ್ಕಾರೆ ಲೋಕೇಶ್ ಅಮೀನ್, ಗೆಜ್ಜೆಗಿರಿತ್ತ ವಕ್ತಾರೆರ್ ರಾಜೇಂದ್ರ ಚಿಲಿಂಬಿ, SNDP ಕೊಡಿಕಲ್ ದ ನಿಕಟ ಪೂರ್ವ ಗುರ್ಕಾರೆ ಪುರುಷೋತ್ತಮ ಪೂಜಾರಿ, ಕಾವೂರು ಬಿಲ್ಲವ ಸಂಘದ ಗುರ್ಕಾರೆ ಚಂದ್ರಶೇಖರ್, ವಾಮಂಜೂರು ಬಿಲ್ಲವ ಸಂಘದ ವೀರಣ್ಣ ಪೂಜಾರಿ, ಮಳಲಿ ಬಿಲ್ಲವ ಸಂಘದ ಉಮೇಶ್ ಪೂಜಾರಿ, ಮಂಗಳಾದೇವಿ ಬಿಲ್ಲವ ಸಂಘದ ಪ್ರಭಾ, ಬೊಕ್ಕ ಬೇತೆ ಬೇತೆ ಬಿಲ್ಲವ ಸಂಘಟನೆಲೆನ ಪ್ರಮುಖೆರ್ ಮೋಹನ್ ಪಡೀಲ್, ಧರ್ಮರಾಜ್ ಅಮ್ಮುಂಜೆ, ನೀಲಯ್ಯ ಪೂಜಾರಿ, ಭಾಸ್ಕರ್ ಕೋಟ್ಯಾನ್, ರಾಮಚಂದ್ರ ಸುವರ್ಣ, ಕೆ. ಜನಾರ್ಧನ, ಕೆ.ಸದಾಶಿವ, ಮಹಾಬಲ ಪೂಜಾರಿ, ರಮಾನಂದ ಕೆ, ಜಯಪೂಜಾರಿ, ಶಶಿಕಾಂತ್, ಪ್ರಥ್ವಿರಾಜ್, ಜಯರಾಮ ಬಂಗೇರ ಬೊಲ್ತೇರ್, ನಾರಾಯಣ ಮಚ್ಚಿನ ಬೊಲ್ತೇರ್, ಶೇಖರ್ ಅಮೀನ್ ಮರೋಳಿ, ಮೋಹನ್ ಇಂಜಿನಿಯರ್, ಹೇಮಂತ್ ಗರೋಡಿ, ಪ್ರಕಾಶ್ ಗರೋಡಿ, ಜಯಂತ್ ನೀರ್ ಮಾರ್ಗ, ಡಾ. ರಾಕೇಶ್ ಕುಮಾರ್, ವಿದ್ಯಾ ರಾಕೇಶ್, ಸುಲೇಖ, ಸದಾನಂದ ಪೂಜಾರಿ, ಶಂಕರ್ ಪೂಜಾರಿ ವಾಮಂಜೂರು, ರವಿಚಂದ್ರ ಕೋಡಿಕಲ್, ತುಕಾರಾಮ್ ಎಚ್, ಬಿ. ಜಯರಾಮ, ವಿಜಯಕುಮಾರ್, ಯತೀಶ್ ಸುವರ್ಣ, ನಾಗೇಶ್ ಪೂಜಾರಿ ಕಾವೂರು, ಯೋಗೀಶ್ ಪೂಜಾರಿ, ಚೇತನ್ ಕುಮಾರ್, ಭೂಷಣ್ ಸನಿಲ್, ಪ್ರಮೋದ್ ಕೋಟ್ಯಾನ್ ಗೋಕರ್ಣ ಸೇವಾದಳ, ಅಭಿಷೇಕ್, ಲತೀಶ್ ಕುಮಾರ್, ನಾರಾಯಣ ಪೂಜಾರಿ ಇರಾ, ಲಕ್ಷ್ಮಣ್, ಯಶವಂತ್ ಪೂಜಾರಿ, ಗುರು ಮನೆಲ್ ಮೊಕುಲು ಮಾತ ಇತ್ತೆರ್.

ಐಕಳ ಜೋಡುಕರೆ ಕಂಬುಲದ ಅಟ್ಟಣೆದ ತಯಾರಿ

ಮುಲ್ಕಿ: 48 ನೇ ವರ್ಷದ ಐಕಳ ಬಾವ ಕಾಂತಾಬಾರೆ ಬೂದಾಬಾರೆ ಜೋಡುಕರೆ ಕಂಬುಲ ಉಚ್ಚಯ ಫೆ.3 ಕ್ಕ್ ನಡಪರೆ ಉಂಡು.

ನೆತ್ತ ಅಟ್ಟಣೆಗಾದ್ ಸನಿಯಾರ ಏಳಿಂಜೆ ಕ್ಷೇತ್ರದ ಅರ್ಚಕೆರ್ ಗಣೇಶ್ ಭಟ್ ಬೊಕ್ಕ ವರುಣ್ ಭಟ್ ಮೊಕುಲು ಬೇತೆ ಬೇತೆ ಧಾರ್ಮಿಕ ವಿಧಿ ವಿಧಾನನ್ ನಡಪಾಯೆರ್. ಸಂಪ್ರದಾಯದಂಚೆನೆ ಕುದಿ ಕಂಬುಲ ಲೇಸ್ ನಡತ್ಂಡ್.

ಈ ಪೊರ್ತುಡು ಕಂಬುಲ ಸಮಿತಿದ ಗುರ್ಕಾರೆ ಐಕಳ ಬಾವ ಡಾ.ದೇವಿ ಪ್ರಸಾದ್ ಶೆಟ್ಟಿ, ಗಣನಾಥ ಜೆ ಶೆಟ್ಟಿ, ರವಿಚಂದ್ರ ಶೆಟ್ಟಿ ಐಕಳಬಾವ, ಲೀಲಾಧರ ಶೆಟ್ಟಿ, ಸುಕುಮಾರ್ ಭಂಡಾರಿ, ಸಮಿತಿದ ಪದುಕೆರ್ ಚಿತ್ತರಂಜನ್ ಭಂಡಾರಿ, ಪ್ರಕಾಶ್ ಶೆಟ್ಟಿ ಪಡುಹಿತ್ಲು, ದಯಾನಂದ ಶೆಟ್ಟಿ ಐಕಳ, ಸ್ವರಾಜ್ ಶೆಟ್ಟಿ, ದೇವಿ ಪ್ರಸಾದ್ ಶೆಟ್ಟಿ ಐಕಳ, ಅಮರನಾಥ ಶೆಟ್ಟಿ, ಜಯಪಾಲ ಶೆಟ್ಟಿ, ತಾರಾನಾಥ ಶೆಟ್ಟಿ ಪಾಲ್ ಪಡೆದಿತ್ತೆರ್.‌

ತುಳು‌ ಭಾಷೆನ್ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪೆರೆ ಆಗ್ರಹ: ಮಾಜಿ ಶಾಸಕೆರ್ ಮೊಯಿದ್ದೀನ್ ಬಾವ

ಕುಡ್ಲ: ತುಳು‌ ಭಾಷೆನ್ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪೆರೆ ಆಗ್ರಹ ಮಲ್ತ್ ದ್ ಮಾಜಿ ಶಾಸಕೆರ್ ಮೊಯಿದ್ದೀನ್ ಬಾವ ಮೇರೆರ್ದ್ ಇನಿರ್ದ್ ಫೆ.2 ಮುಟ್ಟ ವಿಶೇಷವಾಯಿನ ಪೋಸ್ಟ್‌ ಖಾರ್ಡ್ ಅಭಿಯಾನ ನಡಪರೆ ಉಂಡು.

ಈ ಅಭಿಯಾನ ಕುಡ್ಲದ ಹಂಪನ್ ಕಟ್ಟೆ ಶಾಖೆರ್ದ್ ಕರ್ನಾಟಕ ಸಿಎಂ, ಭಾರತದ ಪ್ರಧಾನ ಮಂತ್ರಿ, ಕೇರಳ ಸಿಎಂ ಗ್ ಸುರುತ್ತ ಪತ್ರನ್ ರಿಜಿಸ್ಟರ್ ಪೋಸ್ಟ್ ಮಲ್ಪುನ ಮುಕೇನ ಚಾಲನೆ ಕೊರಿಯೆರೆ ಉಂಡು.

ಮಾಜಿ ಶಾಸಕೆರ್ ಮೊಯಿದ್ದೀನ್ ಬಾವ ಪಾತೆರ್ದ್, ಈ ಅಭಿಯಾನದ ಮುಕೇನ ತುಳು ಭಾಷೆನ್ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪೆರೆ ಸರ್ಕಾರಗ್ ಆಗ್ರಹ ಮಲ್ಪುವ, ನನದ ಬಜೆಟ್ ದ ಪೊರ್ತುಡು ಕೇಂದ್ರದೊಟ್ಟಿಗೆ ಪಾತೆರಕತೆ ನಡಪಾದ್ ಅಧಿಕೃತ ಭಾಷೆಯಾದ್ 8ನೇ ಪರಿಚ್ಛೇದಗ್ ತುಳು ಭಾಷೆನ್ ಸೇರ್ಸಾದ್ ಆದೇಶ ಕೊರೊಡು. ಅತ್ತಂದೆ ಈ ಅಭಿಯಾನಗ್ ಇತ್ತೆನೇ ಸುಮಾರ್ ಜನ ದೇಶ ವಿದೇಶರ್ದ್ ಸಹಕಾರ ಸೂಚಿಸಾದೆರ್. ತುಳುನಾಡ್ ದ ಜನಕುಲು ಎಡ್ಡೆ ಸ್ಪಂದನೆ ಕೊರ್ಪುನ ಮುಕೇನ ಅಭಿಯಾನದ ಯಶಸ್ವಿ ಬೊಕ್ಕ ತುಳು ಭಾಷೆನ್ ಅಧಿಕೃತ ಭಾಷೆಯಾದ್ ಮಲ್ಪೆರೆ ಸಹಕಾರ ಕೊರೊಡು, ಇನಿರ್ದ್ ಫೆ.2 ಮುಟ್ಟ ನಡಪುನ ಈ ಅಭಿಯಾನಡ್ ಪ್ರಧಾನಿಗ್ ಕನಿಷ್ಟ 10 ಸಾರ ಪತ್ರ, ಸಿಎಂಗ್ 10 ಸಾರ ಪತ್ರ ರವಾನೆ ಆವೊಡು ಪಂದ್ ಆಗ್ರಹ ಮಲ್ದೆರ್.

ಈ ಪೊರ್ತುಡು ತುಳುನಾಡು ರಕ್ಷಣಾ ವೇದಿಕೆದ ಗುರ್ಕಾರೆ ಯೋಗೀಶ್ ಶೆಟ್ಟಿ ಜೆಪ್ಪು, ಭಾರತಿ ಪಚ್ಚನಾಡಿ, ಸುರತ್ಕಲ್ ಬ್ಲಾಕ್ ಕಾಂಗ್ರೆಸ್ ನಿಕಟ ಪೂರ್ವ ಗುರ್ಕಾರೆ ಉಮೇಶ್ ದಂಡಕೇರಿ, ಪ್ರಶಾಂತ್ ಭಟ್ ಕಡಬ, ಹಾರಿಸ್ ಬೈಕಂಪಾಡಿ, ಅಸಿಫ್ ಚೊಕ್ಕಬೆಟ್ಟು, ರಹೀಮ್ ಮಲ್ಲೂರು, ಹನೀಫ್ ಮಲ್ಲೂರು, ನೌಫಲ್ ಉದ್ದಬೆಟ್ಟು ಪಾಲ್ ಪಡೆದಿತ್ತೆರ್.

ಡಾ.ಜನಾರ್ದನ ಭಟ್ರೆನ ಪ್ರಾಸಂಗಿಕ ಕೃತಿ ಬುಡುಗಡೆ

ಕಿನ್ನಿಗೋಳಿ: ಬುಕುನ್ ದೆತೊಂದು ಓದೊಡು. ಓದುದು ಲೇಖಕೆರೆಗ್ ತನ್ನ ಅಭಿಪ್ರಾಯನ್ ತೆರಿಪಾವೊಡು. ಆ ಮುಕೇನ ಬರವುಗಾರೆರೆನ್ ಪ್ರೋತ್ಸಾಹ ಮಲ್ಪೊಡು ಪಂದ್ ಕಸಾಪ ಮಾಜಿ ಗುರ್ಕಾರೆ ಡಾ. ಹರಿಕೃಷ್ಣ ಪುನರೂರು ಪಂಡೆರ್.

ಮೇರ್ ಕನ್ನಡ ಸಾಹಿತ್ಯ ಪರಿಷತ್ತು ಮುಲ್ಕಿ ತಾಲೂಕ್ ಘಟಕದ ಕುಕ್ಕಟ್ಟೆ ಕೊಲ್ಲೂರು ದೇವದಾಸ ಮಲ್ಯರೆನ ಇಲ್ಲದ ಜಾಲ್ ಡ್ ಆಯೋಜನೆ ಮಲ್ತಿನ ಲೇಸ್ ಡ್ ಪುಗರ್ತೆದ ಸಾಹಿತಿ ಡಾ. ಬಿ.ಜನಾರ್ದನ ಭಟ್ ಮೆರೆನ ಪೊಸ ಕೃತಿ ಪ್ರಾಸಂಗಿಕನ್ ಬುಡುಗಡೆ ಮಲ್ತ್ ದ್ ಪಾತೆರಿಯೆರ್.

ನಿವೃತ್ತ ಉಪನ್ಯಾಸಕೆರ್, ಸಾಹಿತಿಲು ಬಿ. ರಾಮಚಂದ್ರ ಭಟ್, ಬಿ. ಜನಾರ್ದನ ಭಟ್. ಬಿ. ಸೀತಾರಾಮ ಭಟ್, ವಿದ್ವಾಂಸೆರ್ ಕೆ.ಎಲ್. ಕುಂಡಂತಾಯ, ಕಸಾಪ ಮುಲ್ಕಿ ಘಟಕಾಧ್ಯಕ್ಷೆರ್ ಮಿಥುನ ಕೊಡೆತ್ತೂರು. ವೀಣಾ ಶಶಿಧರ್, ದೇವದಾಸ ಮಲ್ಯ ಚಾವಡಿಡ್ ಇತ್ತೆರ್.

ಶಶಿಕಲಾ ಕೆಮ್ಮಡೆ ಭಾವಗೀತೆ ಪದ ಪಂಡೆರ್. ಮಾಧವ ಕೆರೆಕಾಡು ಎದ್ಕೊನಿಯೆರ್. ಶರತ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್. ರಘುನಾಥ ಕಾಮತ್ ಸೊಲ್ಮೆ ಸಂದಾಯೆರ್.