January 2, 2024

ಉಳ್ಳಾಲ ಶ್ರೀ ಉಳ್ಳಾಲ್ತಿ ಧರ್ಮರಸು ಕ್ಷೇತ್ರದ ಬ್ರಹ್ಮಕಲಶಗ್ ಪುದೆಕಾಣಿಕೆದ ಶೋಭಾಯಾತ್ರೆ

ಉಳ್ಳಾಲ ಶ್ರೀ ಉಳ್ಳಾಲ್ತಿ ಧರ್ಮರಸು ಕ್ಷೇತ್ರದ ಪುನರ್ ಪ್ರತಿಷ್ಠಾ ಅಷ್ಠಬಂಧ ಬ್ರಹ್ಮಕಲಶ ಉಚ್ಚಯ ಡಿ.29 ರ್ದ್ ಜ.7 ಮುಟ್ಟ ಬೇತೆ ಬೇತೆ ವೈದಿಕ, ಧಾರ್ಮಿಕ, ಸಾಂಸ್ಕೃತಿಕ ಲೇಸ್ ದೊಟ್ಟಿಗೆ ನಡಪರೆ ಉಂಡು.

ಈ ಲೇಸ್ ದ ತಯಾರಿಯಾದ್ ಪುದೆಕಾಣಿಕೆ ಮೆರವಣಿಗೆ ಐತಾರ ತೊಕ್ಕೊಟ್ಟು ಓವರ್ ಬ್ರಿಡ್ಜ್ ಡ್ ಇಪ್ಪುನ ಜೈ ವೀರಮಾರುತಿ ವ್ಯಾಯಾಮ ಶಾಲೆರ್ದ್ ಪಿದಾಡ್ ದ್ಂಡ್. ಬ್ರಹ್ಮಶ್ರೀ ನೀಲೇಶ್ವರ ಉಚ್ಚಿಲತ್ತಾಯ ಪದ್ಮನಾಭ ತಂತ್ರಿಲು ಲೇಸ್ ಗ್ ಚಾಲನೆ ಕೊರಿಯೆರ್.

ಈ ಪೊರ್ತುಡು ಕಾಪಿಕಾಡ್ ಶ್ರೀ ಉಮಾಪುರಿ ಉಮಾಮಹೇಶ್ವರ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಎ.ಜೆ ಶೇಖರ್, ಕದ್ರಿ ಕ್ಷೇತ್ರದ ದೈವಜ್ಞೆರ್ ಶ್ರೀರಂಗ ಐತಾಳ್, ಉಳ್ಳಾಲ ಶ್ರೀ ಲಕ್ಷ್ಮೀನರಸಿಂಹ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಶ್ರೀಕರ್ ಕಿಣಿ, ಬೈದೆರೆಪಾಲು ಶ್ರೀ ಮಹಾಗಣಪತಿ ವೈದ್ಯನಾಥ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಚಿತ್ತರಂಜನ್, ಉಳ್ಳಾಲ ಶ್ರೀ ವೀರಭದ್ರ ದುರ್ಗಾಪರಮೇಶ್ವರೀ ದೇವಲ್ಯದ ಗುರ್ಕಾರೆ ಐತಪ್ಪ ಶೆಟ್ಟಿಗಾರ್, ಬಂಡಿಕೊಟ್ಯ ಶ್ರೀ ಮಲರಾಯ ದೈವೊಲ್ಯದ ಆಡಳಿತ ಮೊಕ್ತೇಸರೆರ್ ಸುಂದರ್ ಕೆರೆಬೈಲ್, ಚೀರುಂಭ ಭಗವತೀ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಗಂಗಾಧರ್ ಉಳ್ಳಾಲ್, ಉಳ್ಳಾಲ ಶ್ರೀ ವ್ಯಾಘ್ರ ಚಾಮುಂಡೇಶ್ವರಿ ದೇವಲ್ಯದ ಗುರಿಕಾರೆರ್ ವಸಂತ್ ಅಮೀನ್, ಉಳ್ಳಾಲ ವೈದ್ಯನಾಥ ಸೇವಾ ಸಮಿತಿದ ಗುರ್ಕಾರೆ ಪ್ರವೀಣ್ ಕುಮಾರ್, ಉಳಿಯ ಶ್ರೀ ಸೋಮೇಶ್ವರ ಕ್ಷೇತ್ರ ಸೋಮನಾಥದ ಗುರ್ಕಾರೆ ಉಮಾನಾಥ ನಾಯ್ಕ, ಮಹಾಬಲ ಹೆಗ್ಡೆ ದಬ್ಬೇಲಿ, ಕುತ್ತಾರ್ ಶ್ರೀ ಪಂಜಂದಾಯ ಬಂಟ ವೈದ್ಯನಾಥ ದೈವೊಲ್ಯದ ಒತ್ತು ಗುರ್ಕಾರೆ ಸತೀಶ್ ಉಳ್ಳಾಲ್, ಉಳ್ಳಾಲ ಬಂಡಿಕೊಟ್ಯ ಪುಣ್ಕೆದಡಿ ಚಂದ್ರಹಾಸ ಉಳ್ಳಾಲ ಪಾಲ್ ಪಡೆದಿತ್ತೆರ್.

ಜ.6: ಚಿಲಿಂಬಿಗುಡ್ಡೆ ಶ್ರೀ ರಾಮಾಂಜನೇಯ ಯುವಕ ಮಂಡಲದ 37 ನೇ ವರ್ಷದ ಉಚ್ಚಯ, ಗಣಹೋಮ, ಸತ್ಯನಾರಾಯಣ ಪೂಜೆ

ಕುಡ್ಲ: ಚಿಲಿಂಬಿಗುಡ್ಡೆ ಶ್ರೀ ರಾಮಾಂಜನೇಯ ಯುವಕ ಮಂಡಲ (ರಿ.) ದ 37 ನೇ ವರ್ಷದ ಉಚ್ಚಯ, ಗಣಹೋಮ ಬೊಕ್ಕ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ಜ.6 ಸನಿಯಾರ ನಡಪರೆ ಉಂಡು.

ಆನಿ ಬೊಲ್ಪುಗು ಪ್ರಾರ್ತನೆ ಆದ್ ಗಣಹೋಮ, ಬೊಕ್ಕ ಕೋಡಿಕಲ್ ವಿಶ್ವಕುಮಾರ್ ಜೋಯಿಸೆರೆನ ಮುತಾಲಿಕೆಡ್ ಶ್ರೀ ಸತ್ಯನಾರಾಯಣ ದೇವೆರೆನ ಪೂಜೆ ನಡಪರೆ ಉಂಡು. ಬಯ್ಯಗ್ ಕೈತಲ್ದ ಪ್ರತಿಭೆಲೆರ್ದ್ ಸಾಂಸ್ಕೃತಿಕ ಲೇಸ್, ರಾತ್ರೆ ನಮ್ಮ ಕಲಾವಿದೆರ್ ಬೆದ್ರ ಮೊಕ್ಲೆರ್ದ್ ಮನಸ್ ಮೈದಾನ್ ನಾಟಕ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಸಹಕಾರ ಮಲ್ಪೊಡು ಪಂದ್ ಚಿಲಿಂಬಿಗುಡ್ಡೆ ಶ್ರೀ ರಾಮಾಂಜನೇಯ ಯುವಕ ಮಂಡಲ (ರಿ.) ಬೊಕ್ಕ ಶ್ರೀ ರಾಮಾಂಜನೇಯ ನಿರಂತರ ಕಲಿಕಾ ಕೇಂದ್ರದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ರೇಡಿಯೊ ಮಣಿಪಾಲ್ ಡ್ ಸಾಣೂರು ಬರಿಕೆ ಜಲಜಾಕ್ಷಿ ಮೆರೆನ ಪಾಡ್ದನ

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 ಡ್ ತುಳುವೆರೆ ಜಾಲ್ ಸರಣಿ ಲೇಸ್ ಜ.2 ಅಂಗಾರೆ ಬಯ್ಯಗ್ 4.50 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಕಾರ್ಲ ಸಾಣೂರು ಬರಿಕೆ ಇಲ್ಲದ ಜಲಜಾಕ್ಷಿ ಮೆರೆನ ಪಾಡ್ದನದೊಟ್ಟಿಗೆ ಪಾತೆರಕತೆ ನಡಪಾಯೆರೆ ಉಲ್ಲೆರ್. ಜ.3 ಕ್ಕ್ ಮಧ್ಯಾಹ್ನ 12.50 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆಡ್ ತೆರಿಪಾದ್ಂಡ್.

ಜ.21: ಮೀರಾರೋಡ್ ಶ್ರೀ ದುರ್ಗಾ ಭಜನ್ ಸೇವಾ ಮಂಡಳಿದ 17ನೇ ವರ್ಷದ ಮಹಾಪೂಜೆ

ಥಾಣೆ: ಮೀರಾರೋಡ್ ಶ್ರೀ ದುರ್ಗಾ ಭಜನ್ ಸೇವಾ ಮಂಡಳಿ (ರಿ.) ದ 17ನೇ ವರ್ಷದ ಮಹಾಪೂಜೆ ಜ.21 ಐತಾರ ಮೀರಾರೋಡ್ ಲಕ್ಷ್ಮೀನಾರಾಯಣ ಭಜನೆ ಮಂಡಳಿದ ಕೈತಲ್ದ ಹೋಟೆಲ್ ಶ್ರೀ ಬಾಲಾಜಿ ಇಂಟರ್ ನ್ಯಾಷನಲ್ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ದುರ್ಗಾ ಭಜನ್ ಸೇವಾ ಮಂಡಳಿದ ಗುರ್ಕಾರೆ, ಪದುಕೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

“ದೈವಾರಾಧನೆದ ದಾಖಲೀಕರಣ ಪ್ರಚಾರಗ್ ಮಾತ್ರ ಸೀಮಿತ ಆವರೆ ಬಲ್ಲಿ”: ದೈವ ನರ್ತಕೆರ್ ಲೋಕಯ್ಯ ಸೇರ

ರಘು ಇಡ್ಕಿದು ಮೆರೆನ ‘ಎನ್ನ ನಲಿಕೆ’ ತುಳು ಬೂಕು ಬುಡುಗಡೆ

ಕುಡ್ಲ: ತುಳು ನೆಲತ್ತ ಸಂಸ್ಕೃತಿ, ಆಚಾರ-ವಿಚಾರ, ಸಂಪ್ರದಾಯ, ನಂಬಿಕೆದಂಚಿನ ಜಾನಪದ ಕಮ್ಮೆನದ ಮಹತ್ವದ ಸಂಗತಿಲು ಬೂಕು ರೂಪಡ್ ಶಾಶ್ವತವಾದ್ ದಾಖಲಾವೊಡು. ಸಾಹಿತಿಲು ಈ ದಿಟ್ಟಿಡ್ ಮನಸ್ ಮಲ್ಪೊಡು ಪಂದ್ ಜಿಲ್ಲಾ ರಾಜ್ಯೋತ್ಸವ, ಜಾನಪದ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತೆರ್ ದೈವನರ್ತಕೆರ್ ಲೋಕಯ್ಯ ಸೇರ ಮಾಣಿ ಪಂಡೆರ್.

ಮೇರ್ ಸುರತ್ಕಲ್ ಗೋವಿಂದದಾಸ ಕಾಲೇಜ್ ದ ಸಾಹಿತ್ಯ ಸಂಘ, ದಕ್ಷಿಣ ಕನ್ನಡ ಜಿಲ್ಲಾ ಬೊಕ್ಕ ಕುಡ್ಲ ತಾಲೂಕ್ ಚುಟುಕು ಸಾಹಿತ್ಯ ಪರಿಷತ್, ವಿದ್ಯಾ ಪ್ರಕಾಶನ ಕುಡ್ಲ ಸಂಯುಕ್ತದ ಒಟ್ಟುಸೇರಿಗೆಡ್ ರಘು ಇಡ್ಕಿದು ಮೆರೆನ 30ನೇ ಕೃತಿ ‘ಎನ್ನ ನಲಿಕೆ’ ತುಳು ಕವನ ಸಂಕಲನನ್ ಗೋವಿಂದದಾಸ ಕಾಲೇಜ್ ದ ಸಭಾಂಗಣಡ್ (ಡಿ.30) ಸನಿಯಾರ ಬುಡುಗಡೆ ಮಲ್ತ್ ದ್ ಪಾತೆರಿಯೆರ್.

ಇತ್ತೆದ ಆಧುನಿಕತೆಡ್ ದುಂಬುದ ಆಚಾರ ವಿಚಾರಲು ಮದೆ ಆವೊಂದು ಉಂಡು. ಅವು ನನದ ಪೀಳಿಗೆಗ್ ಒರಿಪುಲೆಕ್ಕ ಗ್ರಂಥರೂಪಡ್ ದಾಖಲಾಪಿನ ಅಗತ್ಯ. ತುಳುನಾಡ್ ದ ದೈವಾರಾಧನೆದ ಮೌಖಿಕ ಸಾಹಿತ್ಯಡ್ ತೂಯಿನಾತ್ ಅದ್ಭುತ ವಿಚಾರಲು ಉಂಡು. ನೆರ್ದ್ ದೈವಾರಾಧನೆ ಬಗೆಟ್ಟ್ ನನಾತ್ ದಾಖಲೀಕರಣ ನಡತೊಂದು ಉಂಡು. ಆಂಡ ಉಂದು ಕೇವಲ ಪ್ರಚಾರಗ್ ಮಾತ್ರ ಸೀಮಿತ ಆವಂದೆ ಕ್ಷೇತ್ರ ಪರಿಣಿತೆರ್, ವಿಷಯತಜ್ಞೆರೆರ್ದ್ ಮೂಲ ಮಾಹಿತಿ ಪಡೆದ್ ನಿಜ ವಿಷಯದ ದಾಖಲೀಕರಣ ಬೇಲೆ ಆವೊಡು ಪಂದ್ ಪಂಡೆರ್.

‌ಗುರ್ಕಾರ್ಮೆನ್ ಒಯಿಸೊನ್ನ ಗೋವಿಂದದಾಸ ಕಾಲೇಜ್ ಪ್ರಾಂಶುಪಾಲೆರ್ ಪ್ರೊ.ಪಿ.ಕೃಷ್ಣಮೂರ್ತಿ ಪಾತೆರ್ದ್, ರಘು ಇಡ್ಕಿದು ಮೆರೆನ ಬೂಕುಡು ಜೀವಂತಿಕೆ ಉಂಡು. ಪೊಸತನದೊಟ್ಟಿಗೆ ವೈವಿಧ್ಯಮಯ ಸಾಹಿತ್ಯ ರಚನೆ ಮೆರೆನ ವಿಶೇಷತೆ ಪಂದ್ ಪಂಡೆರ್.

ಈ ಪೊರ್ತುಡು ಉಪ ಪ್ರಾಂಶುಪಾಲೆರ್ ರಮೇಶ್ ಭಟ್ ಎಸ್.ಜಿ., ಪ್ರಕಾಶಕೆರ್ ಕಲ್ಲೂರು ನಾಗೇಶ, ಪತ್ರಕರ್ತೆರ್ ರಾಜೇಶ್ ಶೆಟ್ಟಿ ದೋಟ, ಚುಟುಕು ಸಾಹಿತ್ಯ ಪರಿಷತ್ ದ.ಕ. ಜಿಲ್ಲಾ ಗುರ್ಕಾರೆ ಹರೀಶ ಸುಲಾಯ ಒಡ್ಡಂಬೆಟ್ಟು, ಕುಡ್ಲ ತಾಲೂಕ್ ಗುರ್ಕಾರೆ ಗೋಪಾಲಕೃಷ್ಣ ಶಾಸ್ತ್ರಿ, ಕೃತಿಕಾರ ರಘು ಇಡ್ಕಿದು ಪಾಲ್ ಪಡೆದಿತ್ತೆರ್.

ಮಂಗಳೂರು ವಿಶ್ವವಿದ್ಯಾಲಯ ತುಳು ಎಂಎ ವಿಭಾಗದ ಪ್ರಾಧ್ಯಾಪಕಿ ಮಣಿ ಮನಮೋಹನ್ ರೈ ಬೂಕುದ ಬಗೆಟ್ಟ್ ಪಾತೆರಿಯೆರ್.

ಕರಾವಳಿ ಲೇಖಕಿಯರ ವಾಚಕಿಯರ ಸಂಘದ ಗುರ್ಕಾರ್ದಿ ಡಾ.ಜ್ಯೋತಿ ಚೇಳಾರು ಗುರ್ಕಾರ್ಮೆಡ್ ನಡತಿನ ಕಬಿಗೋಷ್ಠಿಡ್ ಡಾ.ಸುರೇಶ ನೆಗಳಗುಳಿ, ಡಾ.ಸಂತೋಷ ಆಳ್ವ, ಚೆನ್ನಪ್ಪ ಅಳಿಕೆ, ರೇಮಂಡ್ ಡಿ’ಕುನ್ಹ ತಾಕೊಡೆ, ಸುಲೋಚನಾ ಪಚ್ಚಿನಡ್ಕ, ಸುಮಂಗಲಾ ದಿನೇಶ್ ಶೆಟ್ಟಿ ಕುಂಪಲ, ಅಶೋಕ್ ಎನ್.ಕಡೇಶಿವಾಲಯ, ಉಮೇಶ್ ಶಿರಿಯ, ಜೀವಪರಿ, ಯಶವಂತ ಡಿ.ಎಸ್., ರೇಖಾ ಸುದೇಶ್ ರಾವ್, ಸೌಮ್ಯಾ ಆರ್.ಶೆಟ್ಟಿ, ಅನುರಾಧಾ ರಾಜೀವ್ ಸುರತ್ಕಲ್, ಭಾಸ್ಕರ್ ವರ್ಕಾಡಿ, ಎಸ್.ಕೆ.ಕುಂಪಲ, ಎಂ.ಎಸ್.ವೆಂಕಟೇಶ್ ಗಟ್ಟಿ, ಗೀತಾ ಲಕ್ಷ್ಮೀಶ್, ಸೌಮ್ಯಾ ಗೋಪಾಲ್, ರಶ್ಮಿ ಸನಿಲ್, ರಾಜೇಶ್ವರಿ ಎಚ್.ಬಜ್ಪೆ, ಹಿತೇಶ್ ಕುಮಾರ್ ಪಾಲ್ ಪಡೆದಿತ್ತೆರ್.

ಹರೀಶ್ ಸುಲಾಯ ಒಡ್ಡಂಬೆಟ್ಟು ಎದ್ಕೊನಿಯೆರ್. ಗೋಪಾಲಕೃಷ್ಣ ಶಾಸ್ತ್ರಿ ಸೊಲ್ಮೆ ಸಂದಾಯೆರ್. ಸುಲೋಚನಾ ಪಚ್ಚಿನಡ್ಕ ಲೇಸ್ ದ ಸುಧಾರಿಕೆ ಮಲ್ತೆರ್.

ಎನ್ನ ಜಬದಾರಿ ತೆರಿವೊಂದು ಕ್ಷೇತ್ರದ ಅಭಿವೃದ್ಧಿ ಮಲ್ತೊಂದುಲ್ಲೆ: ಡಾ.ವೈ. ಭರತ್ ಶೆಟ್ಟಿ

ಸುರತ್ಕಲ್ ಸುಭಾಷಿತ ನಗರಡ್ 3 ಕೋಟಿ ರೂ. ಕರ್ಚಿಡ್ ಅಭಿವೃದ್ಧಿ ಬೇಲೆದ ಉದಿಪನ

ಸುರತ್ಕಲ್ ದ ಸುಭಾಷಿತ ನಗರಡ್ 3 ಕೋಟಿ ರೂ. ಕರ್ಚಿಡ್ ಮಾರ್ಗ ಅಭಿವೃದ್ಧಿ, ಫುಟ್ ಪಾತ್, ಚರಂಡಿ, ಮಾರ್ಗ ಹಂಪ್ಸ್ ಇಂಚ ಅಭಿವೃದ್ಧಿ ಕೆಲಸದ ಉದಿಪನ ಲೇಸ್ (ಡಿ.31) ಐತಾರ ಬಯ್ಯಗ್ ನಡತ್ಂಡ್.

ಕುಡ್ಲ ಉತ್ತರ ಕ್ಷೇತ್ರದ ಶಾಸಕೆರ್ ಡಾ. ವೈ.ಭರತ್ ಶೆಟ್ಟಿ ತುಡರ್ ಅರ್ಲಾವುನ ಮುಕೇನ ಲೇಸ್ ದ ಉದಿಪನ ಮಲ್ತ್ ದ್ ಪಾತೆರ್ದ್, “ವೋಟುದ ಪೊರ್ತುಡು ನಿಕುಲು ನಿಕ್ಲೆನ ಜಬದಾರಿನ್ ನೆಂಪುಡು ದೀದ್ ವೋಟು ಪಾಡ್ದರ್. ಅವ್ವೇ ರೀತಿ ಯಾನ್ ಎನ್ನ ಜಬದಾರಿನ್ ತೆರಿದ್ ಕ್ಷೇತ್ರದ ಕೆಲಸ ಮಲ್ತೊಂದು ಬೈದೆ. ಸುರುತ್ತ ವರ್ಷ ಶಕ್ತಿ ಮೀರ್ದ್ ಅನುದಾನ ಕನತ್ ದ್ ಅಭಿವೃದ್ಧಿ ಬೇಲೆನ್ ಮಲ್ದೆ. ರಡ್ಡನೇ ವರ್ಷಡ್ ಸರಕಾರಡ್ ಅನುದಾನದ ಕೊರತೆ ಇತ್ತಿನ ಕಾರಣ ಅಭಿವೃದ್ಧಿ ಬೇಲೆ ಮಲ್ಪರೆ ಆಯಿಜಿ. ಆಂಡಲ ಸುರತ್ಕಲ್ ಭಾಗಡ್ ಎಡ್ಡೆ ಅಭಿವೃದ್ಧಿ ಕೆಲಸನ್ ಮಲ್ತಿನ ಆತ್ಮತೃಪ್ತಿ ಉಂಡು. ಉಂದು ನಿಕ್ಲೆನ ಮಾತೆರ್ನಲ ಸಹಕಾರರ್ದ್ ಆತ್ಂಡ್” ಪಂದ್ ಪಂಡೆರ್.

ಮೇಯರ್ ಸುಧೀರ್ ಶೆಟ್ಟಿ ಪಾತೆರ್ದ್, “ಸುಭಾಷಿತ ನಗರ ರೆಸಿಡೆಂಟ್ಸ್ ವೆಲ್ ಫೇರ್ ಅಸೋಸಿಯೇಷನ್ ಇಡೀ ಊರುದ ಅಭಿವೃದ್ಧಿದ ದೃಷ್ಟಿರ್ದ್ ಮೆಚ್ಚೊಡಾಯಿನ ಬೇಲೆ ಮಲ್ದ್ಂಡ್. ಉಂದು ಮಾತೆರೆಗ್ಲಾ ಮಾದರಿ. ಕುಡ್ಲ ಮಹಾನಗರ ಪಾಲಿಕೆದ 2 ಶಾಸಕೆರೆನ ನಿಸ್ವಾರ್ಥ ಸೇವೆರ್ದ್ ಕೆಲಸ ಮಲ್ತೊಂದು ಉಂಡು. ಸರಕಾರದ ಯೋಜನೆನ್ ಜನಕ್ಲೆಗ್ ಮುಟ್ಟಾವುನ ಕೊಂಡಿಯಾದ್ ಮುಲ್ಪದ ಸಂಘಟನೆ ಪ್ರಾಮಾಣಿಕ ಕೆಲಸನ್ ಮಲ್ದ್ಂಡ್. ಅಯಿಕ್ಕಾದ್ ಅಭಿನಂದನೆಲು ಪಂದ್ ಪಂಡೆರ್.

ಸುಭಾಷಿತ ನಗರ ರೆಸಿಡೆಂಟ್ಸ್ ವೆಲ್ಫೇರ್ ಅಸೋಸಿಯೇಶನ್ ದ ಗುರ್ಕಾರೆ ರಮೇಶ್ ಬಿನ್ನೆರೆನ್ ಎದ್ಕೊನಿಯೆರ್. ಪುಷ್ಪರಾಜ್ ಶೆಟ್ಟಿ ಕುಡುಂಬೂರು ಪ್ರಾಸ್ತಾವಿಕ ಪಾತೆರಿಯೆರ್. ಲೇಸ್ ಡ್ ಶಾಸಕೆರ್ ಡಾ ವೈ ಭರತ್ ಶೆಟ್ಟಿ ಬೊಕ್ಕ ಗುತ್ತಿಗೆದಾರೆ ಸುಧಾಕರ ಎಸ್ ಪೂಂಜ ಮೊಕ್ಲೆಗ್ ಸನ್ಮಾನ ಮಲ್ತೆರ್.

ಚಾವಡಿಡ್ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ತೆರಿಗೆ ಹಣಕಾಸು ನಿರ್ವಹಣೆ ಬೊಕ್ಕ ಅಫೀಸ್ ಲೆನ ಸ್ಥಾಯಿ ಸಮಿತಿ ಗುರ್ಕಾರೆ ವರುಣ್ ಚೌಟ, ಉಪಮೇಯರ್ ಸುನೀತಾ, ಕಾರ್ಪೋರೇಟರ್ ನಯನ ಕೋಟ್ಯಾನ್, ಸರಿತಾ ಶಶಿಧರ್, ಶೋಭಾ ರಾಜೇಶ್, ಗುತ್ತಿಗೆದಾರೆ ಸುಧಾಕರ್ ಎಸ್. ಪೂಂಜಾ, ಬಂಟರ ಸಂಘ ಸುರತ್ಕಲ್ ದ ಗುರ್ಕಾರೆ ಲೋಕಯ್ಯ ಶೆಟ್ಟಿ ಮುಂಚೂರು, ಅಸೋಸಿಯೇಶನ್ ದ ಒತ್ತು ಗುರ್ಕಾರೆ ತಾರಾನಾಥ ಸಾಲ್ಯಾನ್, ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ ಶೆಟ್ಟಿ, ಕೋಶಾಧಿಕಾರಿ ನರಸಿಂಹ ಸುವರ್ಣ, ಸಂಘಟನಾ ಕಾರ್ಯದರ್ಶಿ ಪುಷ್ಪರಾಜ್ ಶೆಟ್ಟಿ ಕುಡುಂಬೂರು, ಪಿಡಬ್ಲ್ಯೂಡಿ ಇಂಜಿನಿಯರ್ ವಸಂತ್ ರಾಜ್ ಪಾಲ್ ಪಡೆದಿತ್ತೆರ್.

ರಾಜೇಶ್ವರಿ ಡಿ.ಶೆಟ್ಟಿ ಬೊಕ್ಕ ಗುರುಪ್ರಸಾದ್ ಲೇಸ್ ನ್ ಸುಧಾರಿಕೆ ಮಲ್ತೆರ್. ಬೊಕ್ಕ ಸುಭಾಷಿತನಗರ ಅಸೋಸಿಯೇಶನ್ ರ್ದ್ ಸ್ನೇಹ ಸಮ್ಮಿಲನ, ಸಾಧಕೆರೆಗ್ ಮಾನಾದಿಗೆ, ಸಾಂಸ್ಕೃತಿಕ ಲೇಸ್ ನಡತ್ಂಡ್.

ಫ್ರೆಂಡ್ಸ್ ಪಡುಪಣಂಬೂರು ಕೂಟದ ಕ್ರಿಕೆಟ್ ಪಂತೊದ ಲೆಪ್ಪೋಲೆ ಬುಡುಗಡೆ

ಮುಲ್ಕಿ: ಫ್ರೆಂಡ್ಸ್ ಪಡುಪಣಂಬೂರು ಕೂಟದ ಕ್ರಿಕೆಟ್ ಪಂತೊ ಫೆ.3 ಬೊಕ್ಕ 4 ಕ್ಕ್ ನಡಪರೆ ಉಂಡು.

ನೆತ್ತ ಲೆಪ್ಪೋಲೆನ್ ಮುಲ್ಕಿ ಸೀಮೆ ಅರಸೆರ್ ಎಂ ದುಗ್ಗಣ್ಣ ಸಾವಂತೆರ್ ಬುಡುಗಡೆ ಮಲ್ತೆರ್. ಈ ಪೊರ್ತುಡು ಸತೀಶ್ ಭಟ್ ಬೊಕ್ಕ ಕೂಟದ ಸದಸ್ಯೆರ್ ಪಾಲ್ ಪಡೆದಿತ್ತೆರ್.

ಡೆಂಗ್ಯೂ, ಕ್ಯಾನ್ಸರ್‌ಗ್ ಬಪ್ಪಂಗಾಯಿದ ಇರೆತ್ತ ಮರ್ದ್

ಬಪ್ಪಂಗಾಯಿ (ಗಂಡ್ ಕಾಯಿ) ಮರತ್ತ ಇರೆಟ್ಟ್ ಆರೋಗ್ಯಗ್ ಮಸ್ತ್ ಪ್ರಯೋಜನ ಉಂಡು.

ಫೈಟೋನ್ಯೂಟ್ರಿಯೆಂಟ್ಸ್ ಬೊಕ್ಕ ಆಂಟಿಆಕ್ಸಿಡೆಂಟ್ ಅಂಶಲು ಬಪ್ಪಂಗಾಯಿ ಇರೆಟ್ಟ್ ಮಸ್ತ್ ಉಂಡು. ಬಪ್ಪಂಗಾಯಿ ಇರೆತ್ತ ಚಾ, ರಸ ಪರ್ಂಡ ಜೀರ್ಣಕ್ರಿಯೆ ಸಮಸ್ಯೆ ನಿವಾರಣೆ ಆಪುಂಡು. ಗ್ಯಾಸ್ಟ್ರಿಕ್, ಅಂಗೈ ಉರಿಲ ಕಮ್ಮಿ ಆಪುಂಡು. ಡೆಂಗ್ಯೂ ಜ್ವರರ್ದ್ ನರಲೊಂದು ಇಪ್ಪುನಕುಲು ಬಪ್ಪಂಗಾಯಿ ಇರೆತ್ತ ರಸ ಪರ್ಂಡ ಪ್ಲೇಟ್‌ಲೆಟ್ಸ್ ಎಚ್ಚಾಪುಂಡು. ಸಕ್ಕರೆ ಸೀಕ್ ನ್ ಕಮ್ಮಿ ಮಲ್ಪುನ ಕೆಲವು ಮರ್ದ್ ದ ಗುಣ ನೆತ್ತ ಇರೆಟ್ಟ್ ಉಂಡು.

ಉಂದು ಸಮತೋಲನದ ನೆತ್ತೆರ್ ದ ಸಮಸ್ಯೆಗ್ ಸಕಾಯ ಆಪುಂಡು. ಬಪ್ಪಂಗಾಯಿ ಇರೆತ್ತ ರಸನ್ ತರೆಕ್ಕ್ ಪೂಜಿಂಡ ಕುಜಲ್ ಬುಲೆಪುಂಡು. ಆರೋಗ್ಯ ಸರಿ ಮಲ್ಪುಂಡು. ನೆತ್ತ ಇರೆಟ್ಟ್ ಕ್ಯಾನ್ಸರ್ ವಿರೋಧಿ ಗುಣ ಲಕ್ಷಣ ಉಂಡು. ಅತ್ತಂದೆ ಬಚ್ಚುನೆ, ಮಲಬದ್ಧತೆ, ಮಲೇರಿಯಾ ಸೀಕ್ ದ ವಿರುದ್ಧಲ ರಕ್ಷಣೆ ಕೊರ್ಪುಂಡು. ನಮ್ಮ ಆಹಾರ ಪದ್ಧತಿಡ್ ಬಪ್ಪಂಗಾಯಿ ಪರ್ಂದ್ ರ್ದ್ ಎಚ್ಚಾದ್ ಅವೆತ್ತ ಇರೆನ್ ಒಂತೆ ಒಂತೆನೆ ಗಲಸ್ಂಡ ಸುಮಾರ್ ಆರೋಗ್ಯ ಪ್ರಯೋಜನನ್ ಪಡೆವೊಲಿ ಪಂದ್ ಪುಲಮರ್ದ್ ದ ಪಂಡಿತೆರ್ ತೆರಿಪಾದೆರ್.

ನಿಟ್ಟೆ ಮಹಾಲಿಂಗ ಅಡ್ಯಂತಾಯ ಸ್ಮಾರಕ ತಾಂತ್ರಿಕ ಶಿಕ್ಷಣ ಸಂಸ್ಥೆದ ಗ್ರಂಥಾಲಯ, ಮಾಹಿತಿ ಕೇಂದ್ರದ ಚಾವಡಿ ಉದಿಪನ

ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಅಂಗಸಂಸ್ಥೆ ನಿಟ್ಟೆ ಮಹಾಲಿಂಗ ಅಡ್ಯಂತಾಯ ಸ್ಮಾರಕ ತಾಂತ್ರಿಕ ಶಿಕ್ಷಣ ಸಂಸ್ಥೆದ ಗ್ರಂಥಾಲಯ ಬೊಕ್ಕ ಮಾಹಿತಿ ಕೇಂದ್ರದ ನವೀಕರಣ ಮಲ್ತಿನ ಆವರಣದ ಉದಿಪನ ನಡತ್ಂಡ್.

ಈ ಲೇಸ್ ನ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ನಿರಂಜನ್ ಚಿಪ್ಲೂಣ್ಕರ್ ಮೆರೆನ ಉಪಸ್ಥಿತಿಡ್ ಹಿರಿಯೆರಾಯಿನ ನಿಟ್ಟೆ ತಾಂತ್ರಿಕ ಶಿಕ್ಷಣ ಸಂಸ್ಥೆದ ಆಡಳಿತ ಮಂಡಳಿ ಸದಸ್ಯೆರ್ ಪ್ರೊ. ಭಾಮೀ ಶೆಣೈ ಉದಿಪನ ಮಲ್ತ್ ದ್ ಪಾತೆರಿಯೆರ್.

ನಿಟ್ಟೆ ವಿದ್ಯಾಸಂಸ್ಥೆದ ನಿರ್ಮಾತೃ ಕೀರ್ತಿಶೇಷ ಜಸ್ಟೀಸ್ ಕೆ.ಎಸ್. ಹೆಗ್ಡೆರೆನ ಭಾವಚಿತ್ರನ್ ನಿಟ್ಟೆ ವಿಶ್ವವಿದ್ಯಾಲಯದ ತಾಂತ್ರಿಕ ಸಂಶೋಧನಾ ಘಟಕದ ನಿರ್ದೇಶಕೆರ್ ಡಾ. ಶ್ರೀನಿಕೇತನ್ ಅನಾವರಣ ಮಲ್ತೆರ್.

ಈ ಪೊರ್ತುಡು ನಿಟ್ಟೆ ವಿಶ್ವವಿದ್ಯಾಲಯದ ಉಪ ಕುಲಸಚಿವೆರ್ ಡಾ.ರೇಖಾ ಭಂಡಾರ್ಕರ್, ಪರೀಕ್ಷಾಂಗ ಉಪ ನಿಯಂತ್ರಕೆರ್ ಡಾ. ಸುಬ್ರಹ್ಮಣ್ಯ ಭಟ್, ಕಾಲೇಜ್ ದ ಪೂರ್ವ ಗ್ರಂಥಪಾಲಕೆರ್ ಯಾಜಿ ಡಾ.ದಿವಾಕರ ಭಟ್, ಬೇತೆ ಬೇತೆ ವಿಭಾಗದ ಮುಖ್ಯಸ್ಥೆರ್ ಬೊಕ್ಕ ಶಿಕ್ಷಕ ಶಿಕ್ಷಕೇತರ ಸಿಬ್ಬಂದಿಲು ಪಾಲ್ ಪಡೆದಿತ್ತೆರ್.

ಹಾಲಿ ಗ್ರಂಥಪಾಲಕೆರ್ ಡಾ. ಪ್ರೀತಮ್ ಶೆಟ್ಟಿ ಕೆ.ವಿ ಎದ್ಕೊನಿಯೆರ್. ಗ್ರಂಥಾಲಯ ಬೊಕ್ಕ ಮಾಹಿತಿ ವಿಜ್ಞಾನ ವಿಭಾಗದ ಸಿಬ್ಬಂದಿಲು ಸಹಕಾರ ಮಲ್ತೆರ್.

ನಿಟ್ಟೆ ಮಾತೃಜಾ ಸೇವಾ ಸಿಂಧು ಕೂಟದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ನಿಟ್ಟೆ ಮಾತೃಜಾ ಸೇವಾ ಸಿಂಧು ಕೂಟದಕುಲು 18ನೇ ಸೇವಾ ಯೋಜನೆದ ಮುಕೇನ ಕುಡೊಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಕಲ್ಲಮುಂಡೇರ್ ಕುದ್ರಿಪದವುದ 4 ವರ್ಷದ ಯಶಿಕಾ ಪನ್ಪಿನ ಎಲ್ಯ ಬಾಲೆ RHABDOMYOSARCOMA ಪನ್ಪುನ ಸೀಕ್ ರ್ದ್ ಕುಡ್ಲದ ಕೆ.ಎಂ.ಸಿ ಅತ್ತಾವರ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಂಡು. ಈ ಬಾಲೆದ ಚಿಕಿತ್ಸೆಗ್ 13 ಲಕ್ಷದ ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಆಂಡ ಆತೊಂಜಿ ಕಾಸ್ ಒಟ್ಟು ಮಲ್ಪರೆ ಆವಂದಿನ ಕಾರಣ ನಿಟ್ಟೆ ಮಾತೃಜಾ ಸೇವಾ ಕೂಟಗ್ ಬಿನ್ನಾಪು ಮಲ್ದೆರ್. ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ ಡಿ.18 ಕ್ಕ್ ನಡತಿನ ಷಷ್ಠಿ ಮಹೋಚ್ಚಯಡ್ ನಿಧಿ ಸಂಗ್ರಹಣೆ ಮಲ್ತೆರ್. ಅವೆಟ್ಟ್ ಸಂಗ್ರಹ ಆಯಿನ 61 ಸಾರ ರೂ. ನ್ ಇನಿ ಕಾರ್ಲ ಶ್ರೀ ಮಾರಿಯಮ್ಮ ದೇವಲ್ಯಡ್ ಕೂಟದ ಸದಸ್ಯೆರೆನ ಸಮ್ಮುಖಡ್ ಕುಟುಂಬಗ್ ಕೊರಿಯೆರ್.