January 4, 2024

ದೈವ ದೇವೆರ್ ಉಲ್ಲೆರ್ ಪನ್ಪುನ ದೃಢವಾಯಿನ ವಿಶ್ವಾಸ ಅಗತ್ಯ: ಲಕ್ಷ್ಮೀನಾರಾಯಣ ಅಸ್ರಣ್ಣ

ಉಳ್ಳಾಲ: ಒಂಜಿ ಊರುದ ಧಾರ್ಮಿಕ ಕೇಂದ್ರಲು, ಶೈಕ್ಷಣಿಕ ಸಂಸ್ಥೆಲು ಪೊರ್ಲು ಆದಿತ್ತ್ಂಡ, ಆ ಊರು ಪೊರ್ಲಾದ್ ಜನ ಕ್ಷೇಮಡ್ ಇಪ್ಪುವೆರ್ ಪನ್ಪುನ ಪ್ರತೀತಿ. ಈ ದಿಟ್ಟಿಡ್ ಪ್ರತಿಯೊರಿಲ ತನ್ನ ಸಂಪಾದನೆದ ಒಂಜಿ ಭಾಗನ್ ಧಾರ್ಮಿಕ, ಶೈಕ್ಷಣಿಕ ಬೇಲೆಗ್ ಉಪಯೋಗ ಮಲ್ತ್ಂಡ ನಮ್ಮ ಜೀವನಗ್ ಪುಣ್ಯದ ರೂಪಡ್ ತಿಕ್ಕುಂಡು ಪಂದ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅನುವಂಶಿಕ ಅರ್ಚಕೆರ್ ಲಕ್ಷ್ಮೀನಾರಾಯಣ ಅಸ್ರಣ್ಣ ಪಂಡೆರ್.

ಮೇರ್ ಉಳ್ಳಾಲ ಉಳಿಯದ ಶ್ರೀ ಉಳ್ಳಾಲ್ತಿ ಧರ್ಮರಸು ಕ್ಷೇತ್ರದ ಶ್ರೀ ಉಳ್ಳಾಲ್ತಿ ಅಮ್ಮನ ಮೂಡುಮಾಡಡ್ ಬೊಕ್ಕ ನಾಗಾಲಯಡ್ ಪೊಸತಾದ್ ಶಿಲಾಮಯವಾದ್ ಪುನರ್ ನಿರ್ಮಾಣ ಆಯಿನ ದೈವಸ್ಥಾನದ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶ ಉಚ್ಚಯಡ್ ಶ್ರೀ ಉಳ್ಳಾಲ್ತಿ ಧರ್ಮರಸೆರೆನ ಸಿರಿಮುಡಿ ಉಚ್ಚಯದ ಧಾರ್ಮಿಕ ಸಭೆಟ್ಟ್ ಪಾತೆರಿಯೆರ್.

ನಮಕ್ ದೈವ ದೇವೆರ್ ಉಲ್ಲೆರ್ ಪನ್ಪುನ ದೃಢವಾಯಿನ ವಿಶ್ವಾಸ ಅಗತ್ಯ, ಆ ಕ್ಷೇತ್ರಗ್ ನಮ ದಾದ ಮಲ್ಪೊಡು ಪನ್ಪುನೆರ್ದ್, ಅಲ್ಪ ಇಪ್ಪುನ ಕಾರಣಿಕ ಶಕ್ತಿಲು ನಮಡ ಎಡ್ಡೆ ಬೇಲೆನ್ ಮಲ್ಪೆರೆ ಪ್ರೇರೇಪಣೆ ಕೊರ್ಪುಂಡು ಪಂದ್ ಪಂಡೆರ್.

ಕ್ಷೇತ್ರದ ಪ್ರಧಾನ ತಂತ್ರಿಲು ಟಿ. ಅನಂತ ಪದ್ಮನಾಭ ಉಪಾಧ್ಯಾಯ, ಶ್ರೀ ಕ್ಷೇತ್ರದ ಧರ್ಮದರ್ಶಿಲು, ದರ್ಶನ ಪಾತ್ರಿ ದೇವು ಮೂಲ್ಯಣ್ಣ ಎಡ್ಡೆಪ್ಪು ಬಯಕಿಯೆರ್.

ಲೇಸ್ ದ ಗುರ್ಕಾರ್ಮೆನ್ ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರ್ ಶ್ರೀನಿವಾಸ ಸಪಲ್ಯ ಬೊಂಬೈ ಒಯಿಸ್ ದಿತ್ತೆರ್.

ಮಲ್ಲ ಬಿನ್ನೆರಾದ್ ದ.ಕ ಮೊಗವೀರ ಮಹಾಜನ ಸಂಘ ಉಚ್ಚಿಲದ ಗುರ್ಕಾರೆ ಜಯ ಸಿ ಕೋಟ್ಯಾನ್, ಉಳ್ಳಾಲ ಮೊಗವೀರ ಸಂಘದ ಗುರ್ಕಾರೆ ಮನೋಜ್ ಸಾಲ್ಯಾನ್, ಸೈಂಟ್ ಸೆಬಾಸ್ಟಿಯನ್ ಚರ್ಚ್ ಪೆರ್ಮನ್ನೂರುದ ಗುರ್ಕಾರೆ ವಂ. ಸಿಪ್ರಿಯನ್ ಪಿಂಟೋ, ಉಳ್ಳಾಲ ಪೊಲೀಸ್ ನಿರೀಕ್ಷಕೆರ್ ಬಾಲಕೃಷ್ಣ ಎಚ್ ಎನ್, ಗಾಳದ ಕೊಂಕಣಿ ಅಭ್ಯುದಯ ಸಂಘದ ಗುರ್ಕಾರೆ ನರಸಿಂಹ ನಾಯಕ್ ಹರೇಕಳ, ಉಳ್ಳಾಲ ನಗರಸಭಾ ಸ್ಥಾಯಿ ಸಮಿತಿದ ಗುರ್ಕಾರ್ದಿ ವೀಣಾ ಶಾಂತಿ ಡಿ.ಸೋಜಾ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ ರಮೇಶ್ ಮೆಂಡನ್, ಕಾರ್ಯಾಧ್ಯಕ್ಷೆರ್ ಹರೀಶ್ ಕುತ್ತಾರ್, ವ್ಯವಸ್ಥಾಪನಾ ಸಮಿತಿ ಗುರ್ಕಾರೆ ರಾಜೇಶ್ ಉಳಿಯ ಇತ್ತೆರ್.

ಬ್ರಹ್ಮಕಲಶ ಉಚ್ಚಯ ಸಮಿತಿದ ಗುರ್ಕಾರೆ ಕದ್ರಿ ನವನೀತ ಶೆಟ್ಟಿ ಎದ್ಕೊನಿಯೆರ್. ಪ್ರಧಾನ ಕಾರ್ಯದರ್ಶಿ ರವಿಶಂಕರ್ ಸೋಮೇಶ್ವರ ಸೊಲ್ಮೆ ಸಂದಾಯೆರ್. ಆನಂದ ಶೆಟ್ಟಿ ಭಟ್ನಗರ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಜ‌.6: ಥಾಣೆ ಘೋಡ್ ಬಂದರ್ ರೋಡ್ ಅಸೋಸಿಯೇಶನ್ ದ 10ನೇ ವರ್ಷದ ಲೇಸ್

ಥಾಣೆ ಘೋಡ್ ಬಂದರ್ ರೋಡ್ ಅಸೋಸಿಯೇಶನ್ ದ 10ನೇ ವರ್ಷದ ಲೇಸ್ ಜ‌.6 ಸನಿಯಾರ ಥಾಣೆ ಶ್ರೀ ಕಾಶೀನಾಥ್ ಘನೇಕರ್ ಸಭಾಗ್ರಹಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಥಾಣೆ ಘೋಡ್ ಬಂದರ್ ರೋಡ್ ಕನ್ನಡ ಎಸೋಸಿಯೇಶನ್ ದ ಗುರ್ಕಾರೆ ಹರೀಶ್ ಡಿ. ಸಾಲಿಯಾನ್ ಒಯಿಸೊನ್ವೆರ್.

ಮಲ್ಲ ಬಿನ್ನೆರಾದ್ ಶಿವರಾಮ್ ಶೆಟ್ಟಿ, ಡಾಕ್ಟರ್ ಅನಘ ಹೇರೂರ್, ಸತ್ಯಹಾಸ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

10ನೇ ವರ್ಷದ ಈ ಲೇಸ್ ಡ್ ಜೋಕ್ಲೆನ ಎಲ್ಯ ನಾಟಕ “ಈಸೂರು ಸ್ವತಂತ್ರ ಗ್ರಾಮ’ ಪೊಂಜೊವುಲೆನ ಕೂಟದ ನಾಟಕ, ನಾರಾಯಣ ಶೆಟ್ಟಿ ನಂದಳಿಕೆ ಬರೆತಿನ, ಚಂದ್ರಕಾಂತ ಸಾಲಿಯಾನ್ ಸಸಿಹಿತ್ಲು ನಿರ್ದೇಶನದ “ಎನ್ನ ಮರ್ಮಲ್” ನಡಪರೆ ಉಂಡು.

ಅಂಚೆನೆ ಚಂದ್ರಕಾಂತ್ ಸಾಲಿಯಾನ್ ಸಸಿಹಿತ್ಲು ಮೆರೆನ ನಿರ್ದೇಶನದ, ದಿ.ಶ್ರೀನಾಥ್ ಮುಲ್ಕಿ ಬರೆತಿನ 93ನೇ ಪ್ರಾಯೋಗದ ತುಳು ನಾಟಕ “ಊರೇ ಗತಿ” ಬೊಂಬೈ ನವೋದಯ ಕಲಾ ರಂಗದಕ್ಲೆರ್ದ್ ನಡಪರೆ ಉಂಡು. ಅತ್ತಂದೆ ಸಾಂಸ್ಕೃತಿಕ ನೃತ್ಯಲ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಕೂಟದ ಮಾತಾ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಜ.5-7: ಬೆಂಗ್ಲೂರು ಅರಮನೆ ಮೈದಾನಡ್ ಸಿರಿಧಾನ್ಯ, ವಾಣಿಜ್ಯ ಮೇಳ

ಕೃಷಿ ಇಲಾಖೆ ಕರ್ನಾಟಕ ರಾಜ್ಯ ಕೃಷಿ ಉತ್ಪನ್ನಲೆನ ಸಂಸ್ಕರಣೆ ಬೊಕ್ಕ ರಫ್ತು ನಿಗಮ ನಿಯಮಿತ ಸಂಸ್ಥೆದ ಒಟ್ಟುಸೇರಿಗೆಡ್ ಜ.5-7 ಮುಟ್ಟ ಬೆಂಗ್ಲೂರುದ ಅರಮನೆ ಮೈದಾನಡ್ ಸಿರಿಧಾನ್ಯ ಬೊಕ್ಕ ಸಾವಯವ ಅಂತರಾಷ್ಟ್ರೀಯ ವಾಣಿಜ್ಯ ಮೇಳ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಸಿರಿಧಾನ್ಯಲೆನ ಗುಣನ್ ತೆರಿದ್, ಎಡ್ಡೆ ಆರೋಗ್ಯಗಾದ್ ಗಲಸೊಡು.‌ ಸಾವಯವ ಬುಲೆಪಾದ್ ಸಿರಿಧಾನ್ಯ ಕ್ರಾಂತಿ ಮಲ್ಪೊಡು ಪಂದ್ ರಾಜ್ಯ ಸರ್ಕಾರ ತೆರಿಪಾದ್ಂಡ್.

ಇನಿ ಡೆಲ್ಲಿಡ್ ಕಾಂಗ್ರೆಸ್ ನಾಯಕೆರೆನ ಸಭೆ

ಲೋಕಸಭೆ ವೋಟು ಕೈತಡೇ ಬರೊಂದು ಇಪ್ಪುನೆರ್ದಾವರ ಕಾಂಗ್ರೆಸ್ ನಾಯಕೆರ್ ಇನಿ ಡೆಲ್ಲಿಡ್ ಸಭೆ ನಡಪಾಯೆರೆ ಉಲ್ಲೆರ್.

ಕಾಂಗ್ರೆಸ್ ಗುರ್ಕಾರೆ ಮಲ್ಲಿಕಾರ್ಜುನ ಖರ್ಗೆ ಮುತಾಲಿಕೆಡ್ ಈ ಸಭೆ ನಡಪರೆ ಉಂಡು. ಸಾರ್ವತ್ರಿಕ ವೋಟುಡು ಪಕ್ಷ ಮಲ್ಪೊಡಾಯಿನ ಬೇಲೆದ ಬಗೆಟ್ಟ್ ಸಭೆಟ್ಟ್ ಚರ್ಚೆ ಮಲ್ಪೆರೆ ಉಂಡು.

ಇರಾನ್ ಡ್ ಬಾಂಬ್ ಪುಡಾದ್ 103 ಜನ ತೀರ್ ಪೋಯೆರ್

ಇರಾನ್ ದ ರೆವಲ್ಯೂಷನರಿ ಗಾರ್ಡ್ಸ್ ದ ಕಮಾಂಡರ್ ಮೇಜರ್ ಜನರಲ್ ಖಾಸಿಂ ಸುಲೇಮಾನಿ ಕೆರಿನ 4ನೇ ವರ್ಷದ ನೆಂಪುಗಾದ್ ಆಯೋಜನೆ ಮಲ್ತಿನ ಲೇಸ್ ಡ್ 2 ಕಡೆಟ್ಟ್ ಬಾಂಬ್ ಪುಡಾದ್ 103 ಜನ ತೀರ್ ಪೋಯೆರ್.

ಅತ್ತಂದೆ ಈ ಘಟನೆಡ್ 211 ಜನಕ್ಕ್ ಪೆಟ್ಟಾತ್ಂಡ್. ಟೆಹರಾನ್ ರ್ದ್ 820 ಕಿ.ಮೀ ದೂರಡ್ ಇಪ್ಪುನ ಕೆರ್ಮಾನ್ ನಗರಡ್ ಈ ಘಟನೆ ನಡತ್ ದ್ಂಡ್.

ಕೊತ್ತಂಬರಿ ಸೊಪ್ಪು ಆರೋಗ್ಯಗ್ ಎಡ್ಡೆ?

ತೆನಸ್ ಡ್ ಸಾಮಾನ್ಯವಾದ್ ಗಲಸುನ ಕೊತ್ತಂಬರಿ ಸೊಪ್ಪುರ್ದ್ ಮೂತ್ರಪಿಂಡದ ಸುಮಾರ್ ಸಮಸ್ಯೆ ನಿವಾರಣೆ ಆಪುಂಡು.

ವನಸ್ ಡ್ ಪರಿಮಳ ಕೊರ್ಪುನ ನೆರ್ದ್ ಮೂತ್ರಪಿಂಡದ ಶುದ್ಧೀಕರಣ ಬೊಕ್ಕ ಎಡ್ಡೆ ಆರೋಗ್ಯಗ್ ಪ್ರಯೋಜನ ಆತ್ಂಡ್. ಉಂದು ಕೆಂಪು ನೆತ್ತೆರ್ ದ ಕಣನ್ ಉತ್ಪಾದನೆ ಮಲ್ಪುನ, ನೆತ್ತೆರ್ ದ ಸಮಸ್ಯೆನ್ ನಿಯಂತ್ರಣ ಮಲ್ಪುನ ಸಾಮರ್ಥ್ಯ ಉಂಡು.

ಮೂತ್ರಪಿಂಡದ ತೊಂದರೆಗ್ ಕಾರಣ ಆಪುನ ಪಾದರಸದ ಕುರುಹುನ್ ದೇಹರ್ದ್ ದೆಪ್ಪೆರೆ ಕೊತ್ತಂಬರಿ ಸಹಕಾರಿ ಆಪುಂಡು. ಈ ಸೊಪ್ಪುಡು ವಿಟಮಿನ್- A,C,E,K,B ಉಂಡು.

ತುಳುನಾಡ್, ಮಲೆನಾಡ್ ಜಿಲ್ಲೆಡ್ ಭಾರೀ ಬರ್ಸ!

ರಾಜ್ಯ ಇಡೀ ಶೀತಗಾಳಿ ಬೀಜುನೆರ್ದಾವರ ಸುಮಾರ್ ಕಡೆಟ್ಟ್ ಮುಗಲ್ ದ ವಾತಾವರಣ ನಿರ್ಮಾಣ ಆದ್ ಕೆಲವು ಕಡೆಟ್ಟ್ ಬರ್ಸ ಬರೊಂದು ಉಂಡು.

ಜ.9-22 ಮುಟ್ಟ ಸುಮಾರ್ ಜಿಲ್ಲೆಡ್ ಬರ್ಸ ಬರ್ಪುಂಡು ಪಂದ್ ಹವಮಾನ ಇಲಾಖೆ ಪಂದಿತ್ತ್ಂಡ್. ಇನಿ ಬೊಲ್ಪುರ್ದ್ ತುಳುನಾಡ್ ಬೊಕ್ಕ ಮಲೆನಾಡ್ ಪ್ರದೇಶಡ್ ಬರ್ಸ ಬರೊಂದು ಉಂಡು.

ದಕ್ಷಿಣ ಕನ್ನಡ, ಒಡಿಪು, ಉತ್ತರ ಕನ್ನಡ ಜಿಲ್ಲೆಡ್ ಬರ್ಸರ್ದಾವರ ಜನಜೀವನ ಅಸ್ತವ್ಯಸ್ತ ಆತ್ಂಡ್.

ರೇಡಿಯೊ ಮಣಿಪಾಲಡ್ ಮಧುರಗಾನ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಧುರಗಾನ ಲೇಸ್ ಜ.4 ಗುರುವಾರ ಬಯ್ಯಗ್ 6.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಶಿಕ್ಷಕೆರ್ ಸಹನಾ ಸುರೇಂದ್ರಕುಮಾರ್ ಪಿಲಾರ್ ಪಾಲ್ ಪಡೆಯೆರೆ ಉಲ್ಲೆರ್. ಜ.5 ಕ್ಕ್ ಮಧ್ಯಾಹ್ನ 2.30ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.