January 3, 2024

ಜ.12: “ಗಿಡ್ಡಿ” ತುಳು ನಾಟಕ ಪ್ರದರ್ಶನ

ಕೇಟರಿಂಗ್ ಉದ್ಯಮಿ, ಸಮಾಜಸೇವಕೆರ್, ಬರವುಗಾರೆರ್, ಸಂಘಟಕೆರ್, ರಂಗನಟೆ ವಿಶ್ವನಾಥ್ ಶೆಟ್ಟಿ ಪೇತ್ರಿ ಮೆರೆನ ಕಥಾ ಸಂಕಲನ “ತ್ಯಾಂಪರನ ಡೋಲು” ಇತ್ತೆ ಪುಗರ್ತೆದ ಕವಿ, ಬರವುಗಾರ್ತಿ ‘ಅಕ್ಷತಾ ರಾಜ್ ಪೆರ್ಲ’ ಮೆರೆರ್ದ್ “ಗಿಡ್ಡಿ” ಪನ್ಪುನ ತುಳು ನಾಟಕವಾದ್ ಅನುವಾದ ಆದ್ ಜ.12 ಕ್ಕ್ ಒಡಿಪುಡು ನಡಪುನ ‘ಕೆಮ್ತೂರು ದೊಡ್ಡಣ್ಣ ಶೆಟ್ಟಿ ನೆಂಪುಗಾದ್ ನಡಪರೆ ಇಪ್ಪುನ ನಾಟಕ ಪಂತೊಡು ಪ್ರದರ್ಶನ ಆವೆರೆ ಉಂಡು.

“ಗಿಡ್ಡಿ” ನಾಟಕ ಸಾರರ್ದ್ ಪ್ರದರ್ಶನ ಆವಡ್, ಈ ನಾಟಕನ್ ಬೊಂಬೈ ಡ್ ಪ್ರದರ್ಶನ ಮಲ್ತಿನ ಪೆರ್ಮೆದ ಕಥೆಗಾರೆ ‘ವಿಶ್ವನಾಥ್ ಶೆಟ್ಟಿ ಪೇತ್ರಿ’ ಮೆರೆಗ್ ಅಭಿನಂದನೆ ಸಂದಾಯೆರ್.

ವರದಿ: ಮಾಧವ್ ಪಡೀಲ್

ಕಟೀಲ್ ಪಿಯು ಕಾಲೇಜ್ ದ ಪ್ರಾಂಶುಪಾಲೆರಾದ್ ಡಾ.ವಿಜಯ್ ವಿ. ನೇಮಕ

ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಪ್ರಥಮ ದರ್ಜೆ ಕಾಲೇಜ್ ಡ್ ಕರಿನ 30 ವರ್ಷೊರ್ದಿಂಚ ಕಾಮರ್ಸ್ ಉಪನ್ಯಾಸಕೆರಾದ್ ಬೇಲೆ ಮಲ್ತೊಂದು ಬತ್ತಿನ ಡಾ. ವಿಜಯ್ ವಿ ಮೆರೆನ್ ಕಾಲೇಜ್ ದ ಆಡಳಿತ ಮಂಡಳಿ ಜ.1 ಕ್ಕ್ ಕಾಲೇಜ್ ದ ಪ್ರಾಂಶುಪಾಲೆರಾದ್ ನೇಮಕ ಮಲ್ದ್ಂಡ್. ‌

ಕಾಲೇಜ್ ದ ಎನ್ ಎಸ್ ಎಸ್ ಅಧಿಕಾರಿಯಾದ್, ಸಂಯೋಜಕೆರಾದ್, ಮಂಗಳೂರು ವಿಶ್ವವಿದ್ಯಾನಿಲಯದ ಪಠ್ಯರಚನಾ ಮಂಡಳಿ ಬೊಕ್ಕ ಪರೀಕ್ಷಾ ಮಂಡಳಿದ ಸದಸ್ಯೆರಾದ್ ಬೇಲೆ ಮಲ್ತಿನ ಮೇರ್ ಕುಂದಾಪುರ ವಡೇರಹೋಬಳಿದ ಲಕ್ಷ್ಮೀ ಬೊಕ್ಕ ದಿ.ಶೀನ ಪೂಜಾರಿ ದಂಪತಿಲೆನ ಮಗೆ ಆತೆರ್.‌

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದಕುಲು 35ನೇ ಮಾಸಿಕ ಸೇವಾ ಯೋಜನೆ ಬೊಕ್ಕ 36ನೇ ತುರ್ತು ಸೇವಾ ಯೋಜನೆದ ಮುಕೇನ 2 ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಕುಡ್ಲ ಕೋಡಿಕಲ್ಲ್ ನಿವಾಸಿ ಆಯಿನ ತುಳಸಿನಿ ಮೆರೆನ ಕಂಡನಿ ಹರೀಶ್ 2 ವರ್ಷದ ಪಿರವು ಕ್ಯಾನ್ಸರ್ ಸೀಕ್ ರ್ದ್ ತೀರ್ ಪೋತೆರ್. ಮೆರೆನ 19 ವರ್ಷದ ಮಗಲ್ ವಿಕಲಚೇತನರಾದ್ ಒವ್ವೇ ಕೆಲಸಗ್ಲಾ ನನೊರಿಯನ್ ಅವಲಂಬನೆ ಮಲ್ಪುನ ಸ್ಥಿತಿಡ್ ಉಲ್ಲೆರ್‌. ಮೆರೆನ ತಿಂಗೊಲ್ದ ಮರ್ದ್ ಬೊಕ್ಕ ಡಾಕ್ಟರ್ ನ ಚಿಕಿತ್ಸೆಗ್ ಮಸ್ತ್ ಕಾಸ್ ದ ಅವಶ್ಯಕತೆ ಉಂಡು. ಆರ್ಥಿಕವಾದ್ ಮಸ್ತ್ ಬಡಪತ್ತ್ ಡ್ ಉಲ್ಲ, ಅಂಚಾದ್ ಎನ್ನ ಮಗಲೆನ ನನದ ಚಿಕಿತ್ಸೆಗ್ ಸಹಕಾರ ಮಲ್ಪೊಡು ಪಂದ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಕೂಟಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 35ನೇ ಮಾಸಿಕ ಸೇವಾ ಯೋಜನೆದ ಮುಕೇನ 20,000 ರೂ. ದ ಚೆಕ್ ನ್ ಬಡಗ ಎಡಪದವು ಪಂಚಾಯತ್ ಮಾಜಿ ಗುರ್ಕಾರೆ ಹರೀಶ್ ಕೆ.ವಿ ಮೆರೆನ ಸಮ್ಮುಖಡ್ ಎಡಪದವು ರಾಮ ಮಂದಿರಡ್ ಕೊರಿಯೆರ್.

ಅಂಚೆನೆ ಕುಡ್ಲ ತಾಲೂಕ್ ದ ಬಡಗ ಎಡಪದವು ಗ್ರಾಮದ ಉರ್ಕಿ ನಿವಾಸಿ ಶಿವಾನಂದ ಗೌಡ 31 ವರ್ಷದಾರ್ ತನ್ನ ಎಲ್ಯ ಪ್ರಾಯಡೇ ತನ್ನ 2 ಕಿಡ್ನಿನ್ ಕಳೆವೊಂದು ಸಂಕಷ್ಟಡ್ ಉಲ್ಲೆರ್. ತನ್ನ ಅಪ್ಪೆನ ಕಿಡ್ನಿನ್ ಟ್ರಾನ್ಸ್ ಪ್ಲಾಂಟ್ ಮಲ್ಪರೆ ನಿರ್ಧಾರ ಮಲ್ದೆರ್. ಈ ಶಸ್ತ್ರ ಚಿಕಿತ್ಸೆಗ್ ಸುಮಾರ್ 12 ಲಕ್ಷ ರೂ. ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಅಂಚೆನೆ ಶಿವಾನಂದ ಮೆರೆನ ಇಲ್ಲದಕುಲು ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಕೂಟಗ್ ಬಿನ್ನಾಪು ಸಂದಾಯೆರ್. ಈ ಬಿನ್ನಾಪುಗ್ ಸ್ಪಂದಿಸಾಯಿನ ಕೂಟ ತನ್ನ 36ನೇ ತುರ್ತು ಸೇವಾ ಯೋಜನೆದ ಮುಕೇನ 25000 ರೂ. ಚೆಕ್ ನ್ ಅಯೋಧ್ಯಾ ಶ್ರೀ ರಾಮ ಮಂದಿರ ಟ್ರಸ್ಟ್ ತಾಲೂಕ್ ಸಂಚಾಲಕೆರ್, ವಿಶ್ವ ಹಿಂದೂ ಪರಿಷತ್ ಭಜರಂಗದಳ ಗುರುಪುರ ಪ್ರಖಂಡದ ಕಾರ್ಯದರ್ಶಿ ದಿನೇಶ್ ಮಿಜಾರ್, ಹರೀಶ್ ಎಡಪದವು, ವಿಶ್ವ ಹಿಂದೂ ಪರಿಷತ್ ಬಜರಂಗದಳ ಗುರುಪುರ ಪ್ರಖಂಡದ ಸಹ ಸಂಚಾಲಕೆರ್ ಚಂದ್ರಕಾಂತ್ ನಾಯಕ್, ವಿಶ್ವ ಹಿಂದೂ ಪರಿಷತ್ ಗುರ್ಕಾರೆ ಜೈ ಶ್ರೀ ರಾಮ್ ಶಾಖೆ ಎಡಪದವು ಮೊಕ್ಲೆನ ಸಮ್ಮುಖಡ್ ಎಡಪದವು ರಾಮ ಮಂದಿರಡ್ ಕೊರಿಯೆರ್.

ಈ ಪೊರ್ತುಡು ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ದ ಪದುಕೆರ್ ಪಾಲ್ ಪಡೆದಿತ್ತೆರ್.

ಡಾ.ನಿಟ್ಟೆ ಶಂಕರ ಅಡ್ಯಂತಾಯ ಪ್ರಥಮ ದರ್ಜೆ ಕಾಲೇಜ್ ಬೊಕ್ಕ ಮುಲ್ಪದ ಹಿರಿಯ ವಿದ್ಯಾರ್ಥಿ ಸಂಘದ ಒಟ್ಟುಸೇರಿಗೆಡ್ ವಿಶ್ವ ಹಿರಿಯ ವಿದ್ಯಾರ್ಥಿಲೆನ ಸಭೆ

ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಅಧೀನ ಸಂಸ್ಥೆ ಡಾ.ನಿಟ್ಟೆ ಶಂಕರ ಅಡ್ಯಂತಾಯ ಪ್ರಥಮ ದರ್ಜೆ ಕಾಲೇಜ್ ಬೊಕ್ಕ ಮುಲ್ಪದ ಹಿರಿಯ ವಿದ್ಯಾರ್ಥಿ ಸಂಘದ ಒಟ್ಟುಸೇರಿಗೆಡ್ ವಿಶ್ವ ಹಿರಿಯ ವಿದ್ಯಾರ್ಥಿಲೆನ ಸಭೆ-2023 ಇಂಚಿಪ್ಪ ಜಸ್ಟೀಸ್ ಕೆ.ಎಸ್. ಹೆಗ್ಡೆ ಉದ್ಯಮಾಡಳಿತ ಶಿಕ್ಷಣ ಸಂಸ್ಥೆದ ಸಭಾಂಗಣಡ್ ನಡತ್ಂಡ್.

ನಿಟ್ಟೆ ಸಂಕೀರ್ಣದ ನಿರ್ವಹಣೆ ಬೊಕ್ಕ ಅಭಿವೃದ್ಧಿ ನಿರ್ದೇಶಕೆರ್ ಪ್ರೊಫೆಸರ್ ಎ.ಯೋಗೀಶ್ ಹೆಗ್ಡೆ ಗುರ್ಕಾರ್ಮೆ ಒಯಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ನಿಟ್ಟೆ ವಿಶ್ವವಿದ್ಯಾಲಯದ ಉಪಕುಲಪತಿ ಡಾ.ಎಂ.ಎಸ್ ಮೂಡಿತ್ತಾಯ, ನಿಟ್ಟೆ ತಾಂತ್ರಿಕ ಶಿಕ್ಷಣ ವಿಭಾಗದ ಒತ್ತು ಗುರ್ಕಾರೆ ಡಾ. ಗೋಪಾಲ್ ಮೊಗೆರಾಯ, ವಿದ್ಯಾರ್ಥಿ ಕಲ್ಯಾಣ ಬೊಕ್ಕ ಹಳೆ ವಿದ್ಯಾರ್ಥಿಲೆನ ಸಂಬಂಧಿತ ಅಧಿಕಾರಿ ಪ್ರಸನ್ನ ಕೈಲಾಜೆ ಪಾಲ್ ಪಡೆದಿತ್ತೆರ್.

ಪೂರ್ವ ವಿದ್ಯಾರ್ಥಿನಿ ಅನುರಾಧಾ ಭಟ್ ಪ್ರಾರ್ಥನೆ ಮಲ್ತೆರ್. ಹಿರಿಯ ವಿದ್ಯಾರ್ಥಿ ಸಂಘದ ಗುರ್ಕಾರೆ ದರ್ವಿಶ್ ಎದ್ಕೊನಿಯೆರ್. ಸಂಸ್ಥೆದ ಪ್ರಾಂಶುಪಾಲೆರ್ ಡಾ. ವೀಣಾ ಬಿ.ಕೆ, ಸಂಸ್ಥೆದ ಇಂಚಿಪ್ಪದ ಬುಲೆವಣಿಗೆದ ಬಗೆಟ್ಟ್ ಪ್ರಸ್ತಾವನೆ ಮಲ್ತೆರ್.

ಮಲ್ಲ ಬಿನ್ನೆರ್ ನಿಟ್ಟೆ ತಾಂತ್ರಿಕ ಶಿಕ್ಷಣ ವಿಭಾಗದ ಒತ್ತು ಗುರ್ಕಾರೆ ಡಾ.ಗೋಪಾಲ್ ಮೊಗೆರಾಯೆರ್ ಸಂಸ್ಥೆದ ಅಭಿವೃದ್ಧಿಡ್ ಪೂರ್ವ ವಿದ್ಯಾರ್ಥಿಲು ಸಹಕಾರ ಮಲ್ಪರೆ ಕೇನೊಂಡೆರ್. ಈ ಪೊರ್ತುಡು ಸಂಸ್ಥೆದ ಪ್ರಾಂಶುಪಾಲೆರ್ ಸೇರ್ದ್ ವಿಶ್ವವಿದ್ಯಾಲಯಡ್ ಬೇತೆ ಬೇತೆ ಜಬದಾರಿನ್ ನಿರ್ವಹಿಸಾಯಿನ ಇತ್ತೆದ ಉಪಕುಲಪತಿ ಡಾ.ಎಂ ಎಸ್ ಮೂಡಿತ್ತಾಯ ಮೆರೆಗ್ ಸನ್ಮಾನ ಮಲ್ತೆರ್.

ಸನ್ಮಾನ ಸ್ವೀಕಾರ ಮಲ್ತಿನ ಡಾ. ಮೂಡಿತ್ತಾಯೆರ್ ಪಾತೆರ್ದ್, ಹಿರಿಯ ವಿದ್ಯಾರ್ಥಿಲು ಸಂಸ್ಥೆದೊಟ್ಟಿಗೆ ಅವಿನಾಭಾವ ಸಂಬಂಧನ್ ಬುಲೆಪಾವುನೆತ್ತೊಟ್ಟಿಗೆ ಸಂಸ್ಥೆದ ಬುಲೆವಣಿಗೆಗ್ ಪ್ರೇರಣೆ ಅವೊಡು ಪಂದ್ ಸಲಹೆ ಕೊರಿಯೆರ್.

ಲೇಸ್ ಡ್ ನೆರ್ದ್ ದುಂಬು ಕೆಲಸ ಮಲ್ತಿನ ಉಪನ್ಯಾಸಕೆರ್, ಶಿಕ್ಷಕೇತರ ಸಿಬ್ಬಂದಿಲು ಬೊಕ್ಕ ಬೇತೆ ಬೇತೆ ಕಡೆಟ್ಟ್ ಇಪ್ಪುನ ಹಿರಿಯ ವಿದ್ಯಾರ್ಥಿಲು ಪಾಲ್ ಪಡೆದಿತ್ತೆರ್. ಲೇಸ್ ದ ಬೊಕ್ಕ ಹಿರಿಯ ವಿದ್ಯಾರ್ಥಿಲು ಬೊಕ್ಕ ಉಪನ್ಯಾಸಕೆರೆನ ಸ್ನೇಹ ಮಿಲನ, ಸಾಂಸ್ಕೃತಿಕ ಲೇಸ್ ನಡತ್ಂಡ್.

ತಾಂತ್ರಿಕ ಶಿಕ್ಷಣ ಸಂಸ್ಥೆದ ಸಹಾಯಕ ಗ್ರಂಥಪಾಲಕೆರ್ ಸತೀಶ್ ಶೆಟ್ಟಿ ಸನ್ಮಾನಿತೆರೆನ ಪರಿಚಯ ಮಲ್ತೆರ್. ಪೂರ್ವ ವಿದ್ಯಾರ್ಥಿ ಸಂಘದ ಕಾರ್ಯದರ್ಶಿ ಡಾ. ಸುಧೀರ್ ಎಂ. ಸೊಲ್ಮೆ ಸಂದಾಯೆರ್. ಪ್ರೊಫೆಸರ್ ರಾಕೇಶ್ ಶೆಟ್ಟಿ ಲೇಸ್ ನ್ ಸುಧಾರಿಕೆ ಮಲ್ತೆರ್. ಉಪನ್ಯಾಸಕೆರ್ ಡಾ.ದಯಾನಂದ ಬಾಯಾರ್, ಅರ್ಚನಾ ಭಟ್ ಸಹಕಾರ ಕೊರಿಯೆರ್.

ಪೂನಾ ತುಳುನಾಡ ಫೌಂಡೇಶನ್ ದ ಕಾರ್ಯಕಾರಿ ಸಮಿತಿ ರಚನೆ

ಮಾನಾದಿಗೆದ ಗುರ್ಕಾರೆಯಾದ್ ತಾರಾನಾಥ ರೈ ಮೇಗಿನಗುತ್ತು, ಸ್ಥಾಪಕಾಧ್ಯಕ್ಷೆರಾದ್ ರೋಹನ್ ಪುರುಷೋತ್ತಮ ಶೆಟ್ಟಿ ಆಯ್ಕೆ

ಪೂನಾ: ಪೂನಾದ ತುಳು ಕನ್ನಡಿಗೆರೆನ ಸ್ವಾಭಿಮಾನಿ ಸಂಘಟನೆ ತುಳುನಾಡ ಫೌಂಡೇಶನ್ ಪುಣೆದ ಮಾನಾದಿಗೆದ ಗುರ್ಕಾರೆಯಾದ್ ತಾರಾನಾಥ ರೈ ಮೇಗಿನಗುತ್ತು, ಸ್ಥಾಪಕಾಧ್ಯಕ್ಷೆರಾದ್ ಪುಗರ್ತೆದ ಸಮಾಜ ಸೇವಕೆರ್, ನ್ಯಾಯವಾದಿ ರೋಹನ್ ಪುರುಷೋತ್ತಮ ಶೆಟ್ರ್ ಆಯ್ಕೆ ಆತೆರ್.

ಅಂಚೆನೆ ಅರೆನ ಗುರ್ಕಾರ್ಮೆಡ್ ಕಾರ್ಯಕಾರಿ ಸಮಿತಿ ರಚನೆ ಆತ್ಂಡ್.

ಪೊಸ ಕೂಟದ ಒತ್ತು ಗುರ್ಕಾರೆಯಾದ್ ವಿಕೇಶ್ ರೈ ಶೇಣಿ, ಅಕ್ಷಿತ್ ಸಾಲ್ಯಾನ್, ಸುಪ್ರೀತಾ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿಯಾದ್ ಸುಜಯ್ ದಿನೇಶ್ ಶೆಟ್ಟಿ, ಜತೆ ಕಾರ್ಯದರ್ಶಿಯಾದ್ ರತನ್ ಸಾಲ್ಯಾನ್ ಬೊಕ್ಕ ಸಮೀಕ್ಷಾ ಪೂಜಾರಿ, ಕೋಶಾಧಿಕಾರಿಯಾದ್ ಕಿರಣ್ ಮೂಲ್ಯ, ಜತೆ ಕೋಶಾಧಿಕಾರಿಯಾದ್ ಸೂರಜ್ ಬಂಗೇರ ಬೊಕ್ಕ ಪ್ರೀತಮ್ ಶೆಟ್ಟಿ ಆಯ್ಕೆ ಆತೆರ್.

ಸಾಮಾಜಿಕ ಸಮಿತಿ ಸದಸ್ಯೆರಾದ್ ಪೂಜಾ ಜಹಗೀರದಾರ್, ಸಂತೋಷ್ ಶೆಟ್ಟಿ, ಅಹಾನ್ ದೇವಾಡಿಗ, ಶೈಕ್ಷಣಿಕ ಸಮಿತಿಗ್ ವಿಂದಿ ಪೂಜಾರಿ, ಮಲ್ಲಣ್ಣ ಲಿಂಗಾಯತ್, ಪ್ರತೀಕ್ ಪೂಜಾರಿ, ಸಮೀಕ್ಷಾ ಶೆಟ್ಟಿ, ಕ್ರೀಡಾ ಸಮಿತಿಗ್ ವಿನೀತ್ ಪೂಜಾರಿ, ದೀಕ್ಷಾ ಶೆಟ್ಟಿ, ರಾಜೇಂದ್ರ ಕೋಟ್ಯಾನ್, ಕೌಶಿಕ್ ಶೆಟ್ಟಿ, ಸಾಂಸ್ಕೃತಿಕ ಸಮಿತಿಗಾದ್ ರವಿರಾಜ್ ಶೆಟ್ಟಿ, ರೇಷ್ಮಾ ನಾಯ್ಕ್, ಸ್ವಾತಿ ಪೂಜಾರಿ, ಸಹನಾ ಕುಲಾಲ್, ಶಿವಪ್ರಸಾದ್ ಪೂಜಾರಿ, ಸಾಮಾಜಿಕ ಮಾಧ್ಯಮ ಸಮಿತಿಗ್ ಹೃತಿಕ್ ಶೆಟ್ಟಿ, ವಿನೀತಾ ಗೌಡ, ಸುಜಿತ್ ಮೂಲ್ಯ ಬೊಕ್ಕ ತನ್ವಿ ಶೆಟ್ಟಿ ಆಯ್ಕೆ ಆತೆರ್.

ಸಮಿತಿ ಸದಸ್ಯೆರಾದ್ ಆನಂದ್ ಜಾಲಿಹಾಳ, ಧೀರಜ್ ಬಂಗೇರ, ಅಂಕಿತ್ ಸಾಲ್ಯಾನ್, ಮಹೇಶ್ ನಾಯ್ಕ್, ಪ್ರಾಣೇಶ್ ಶೆಟ್ಟಿ, ಸಚಿನ್ ಕೋಟ್ಯಾನ್, ಶಶಿಧರ ಕೋಟ್ಯಾನ್, ಅದಿಯೋ ಬಡಿಗೇರ, ಪ್ರಸಾದ್ ಪೂಜಾರಿ, ತರುಣ್ ಶೆಟ್ಟಿ, ದೀಕ್ಷಿತಾ ಹೆಗ್ಡೆ, ರೋಹನ್ ಕೋಟ್ಯಾನ್, ಸುಜಿತ್ ಸಾಲ್ಯಾನ್ ಬೊಕ್ಕ ಅಂಕಿತ್ ಪೂಜಾರಿ ಆಯ್ಕೆ ಆತೆರ್.

ಸಂಘದ ಸಲಹಾ ಸಮಿತಿದ ಸದಸ್ಯೆರಾದ್ ಸಾಹಿತಿ ಪಾಂಗಾಳ ವಿಶ್ವನಾಥ ಶೆಟ್ಟಿ, ಚಂದ್ರಶೇಖರ ಶೆಟ್ಟಿ ನಿಟ್ಟೆ, ಮಿಯ್ಯಾರ್ ರಾಜ್ ಕುಮಾರ್ ಎಂ ಶೆಟ್ಟಿ, ಪುರುಷೋತ್ತಮ ಶೆಟ್ಟಿ ಕಾಪು, ವಿಶ್ವನಾಥ ಶೆಟ್ಟಿ ಹಿರಿಯಡ್ಕ ಬಸ್ತಿ, ಗೀತಾ ರಾಮಣ್ಣ ಶೆಟ್ಟಿ, ಚಂದ್ರಕಾಂತ ಹಾರಕೂಡೆ, ರೂಪೇಶ್ ಶೆಟ್ಟಿ, ಪ್ರಶಾಂತ್ ಶೆಟ್ಟಿ ಹೆರ್ಡೆಬೀಡು, ಮನೋಹರ್ ಶೆಟ್ಟಿ ರಂಜಿತ್ ಕ್ಯಾಟರರ್ಸ್, ಲತಾ ರಘುನಾಥ ಗೌಡ, ದೇವಕಿ ರಮೇಶ್ ಶೆಟ್ಟಿ, ಉಮಾ ಸದಾಶಿವ ಶೆಟ್ಟಿ, ಪ್ರೇಮಾ ಪುರುಷೋತ್ತಮ ಶೆಟ್ಟಿ, ಮಹೇಶ್ ಹೆಗ್ಡೆ ಪೊಳಲಿ, ಯಶವಂತ್ ಶೆಟ್ಟಿ ತಾಮರು ಬೊಕ್ಕ ಗೋವರ್ಧನ ಶೆಟ್ಟಿ  ಆಯ್ಕೆ ಆತೆರ್.

ರಾಮಭಕ್ತೆರೆನ ಮಿತ್ತ್ ಕಾಂಗ್ರೆಸ್ ಗ್ ಈತೊಂಜಿ ಬೆಚ್ಚ ದಾಯೆ?: ಶಾಸಕೆರ್ ಕಾಮತ್

ಅಯೋಧ್ಯೆಡ್ ರಾಮಮಂದಿರ ಉದಿಪನಗ್ ಮೂರ್ತ ನಿಘಂಟ್ ಆಯಿಲೆಕ್ಕನೇ ರಾಜ್ಯದ ಕರಸೇವಕೆರೆನ ಮಿತ್ತ್ ಕೇಸ್ ಲೆನ್ ಕುಡ ದುಂಬು ಕನತ್ ದ್ ಕಾಂಗ್ರೆಸ್ ಸರ್ಕಾರ ತನ್ನ ಹಿಂದೂ ವಿರೋಧಿ ನೀತಿನ್ ಬೊಕ್ಕ ಅಲ್ಪಸಂಖ್ಯಾತೆರೆನ ಓಲೈಕೆ ರಾಜಕಾರಣನ್ ದುಂಬರಿಸಾದ್ಂಡ್ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಬೆಚ್ಚ ಆತೆರ್.

ಕೋರ್ಟ್ ನಿರ್ದೇಶನದ ಮಿತ್ತ್ ಈ ಕ್ರಮ ದೆತೊಂದುಂಡು, ನೆಟ್ಟ್ ಸರ್ಕಾರದ ಒವ್ವೇ ಒತ್ತಡ ಇಜ್ಜಿ ಪಂದ್ ಹುಬ್ಬಳ್ಳಿ ಧಾರವಾಡ ಪೊಲೀಸ್ ಆಯುಕ್ತೆರ್ ಹೇಳಿಕೆ ಕೊರ್ತೆರ್. ಸ್ವತಃ ಗೃಹ ಸಚಿವೆರೇ “ಪರತ್ತ್ ಕೇಸ್ ನ್ ಇತ್ಯರ್ಥ ಮಲ್ಪರೆ ಸೂಚನೆ ಕೊರ್ತೆರ್, ಅಯಿನಂಚೆನೆ ಈ ಕ್ರಮ ದೆತೊಂದ ಪಂದ್ ಹೇಳಿಕೆ ಕೊರ್ತೆರ್. ಮುಲ್ಪ ಏರೆನ ಪಾತೆರ ನಿಜ? ದಾದ ಇತ್ತ್ಂಡಲ ಕಾಂಗ್ರೆಸ್ ಸರ್ಕಾರ ಈ ಮುಕೇನ ಹಿಂದೂ ವಿರೋಧಿಯಾದ್ ನಡತೊಂದು ಇಪ್ಪುನೇ ನಿಜ. ಅಯಿಟ್ಟ್ ಒವ್ವೇ ಸಂಶಯ ಇಜ್ಜಿ. ರಾಮಭಕ್ತೆರೆನ ಮಿತ್ತ್ ಈತೊಂಜಿ ಪಗೆ ಸಾಧಿಸಾವುನ ಕಾಂಗ್ರೆಸ್ಸ್ ದಕುಲು ರಾಮಭಕ್ತೆರೆನ ವೋಟು ಎಂಕ್ಲೆಗ್ ಬೊರ್ಚಿ ಪಂದ್ ಪನಡ್ ತೂಕ ಪಂದ್ ಸವಾಲ್ ಪಾಡಿಯೆರ್.

ಇಡೀ ದೇಶದ ಜನಕುಲು ರಾಮ ಮಂದಿರದ ಗೌಜಿಡ್ ಇಪ್ಪುನಗ ನಮ್ಮ ರಾಜ್ಯಡ್ ಮಾತ್ರ ಕಾಂಗ್ರೆಸ್ ಸರ್ಕಾರ ರಾಮಭಕ್ತೆರೆನ ಮಿತ್ತ್ ಬೆಚ್ಚಡ್ ಉಂಡು. ಅಂಚಾದ್ ಕರಸೇವಕೆರ್ ಬೊಕ್ಕ ಹಿಂದೂಪರ ಕಾರ್ಯಕರ್ತೆರೆಗ್ ಉದ್ದೇಶಪೂರ್ವಕವಾದ್ ತೊಂದರೆ ಕೊರಿಯೆರೆ ದುಂಬಾತ್ಂಡ್. 31 ವರ್ಷದ ಪಿರವುದ ಕೇಸ್ ಗ್ ಕುಡಜೀವ ಕೊರ್ದು ಹಿಂದೂ ಕಾರ್ಯಕರ್ತೆರೆನ್ ಪೋಡಿಪಾವುನ ಬೇಲೆ ಉಂದಾತ್ಂಡ್. ಇತ್ತೆನೇ ಜಿಲ್ಲೆಡ್ ಸುಮಾರ್ ಹಿಂದೂ ಕಾರ್ಯಕರ್ತೆರೆನ್ ಗಡಿಪಾರ್ ಮಲ್ದ್ಂಡ್. ನನಾತ್ ಪೊರ್ಂಬಾಟಗಾರೆರೆನ್ ಗಡಿಪಾರ್ ಮಲ್ಪರೆ ತಯಾರಿ ನಡಪುನವು ಕಾಂಗ್ರೆಸ್ ಹಿಂದೂಲೆನ್ ಪೋಡಿಪಾವೊಂದು ಉಂಡು. ನೆಕ್ಕ್ ಪೋಡಿಪುನ ಪ್ರಶ್ನೆನೇ ಇಜ್ಜಿ ಪಂದ್ ಶಾಸಕೆರ್ ಪಂಡೆರ್.

ಜ.6: ಕರಂಬಾರು ತುಳುವೆರೆ ತುಡರ್ ಫ್ರೆಂಡ್ಸ್ ದ ವಾರ್ಷಿಕ ಉಚ್ಚಯ

ಕರಂಬಾರು ತುಳುವೆರೆ ತುಡರ್ ಫ್ರೆಂಡ್ಸ್ ದ 8ನೇ ವರ್ಷದ ಉಚ್ಚಯದ ಲೆಕ್ಕೊಡು ಜ.6 ಸನಿಯಾರ ಕರಂಬಾರು ಶ್ರೀ ಮಾರಿಯಮ್ಮ ಕೋಟೆ ಬಬ್ಬುಸ್ವಾಮಿ ದೈವೊಲ್ಯದ ಚಾವಡಿಡ್ ಸಾಂಸ್ಕೃತಿಕ ಬೊಕ್ಕ ಸಭಾ ಲೇಸ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಕರಂಬಾರು ತುಳುವೆರೆ ತುಡರ್ ಫ್ರೆಂಡ್ಸ್ ದ ಗುರ್ಕಾರೆ ಸುಧೀರ್ ಪೂಜಾರಿ ಲೆಪ್ಪೋಲೆಡ್ ತೆರಿಪಾದೆರ್.

ಜೇಸಿಐ ಕೊಕ್ಕಡ ಕಪಿಲಾ ಘಟಕದ ಪದಗ್ರಹಣ

ಶಿಬರಾಜೆ: ಜೇಸಿಐ ಕೊಕ್ಕಡ ಕಪಿಲಾ ಘಟಕದ ಪೊಸ ಗುರ್ಕಾರೆ ಬೊಕ್ಕ ಪದುಕೆರೆನ 4ನೇ ವರ್ಷದ ಪದಗ್ರಹಣ ಲೇಸ್ ಜ.1 ಕ್ಕ್ ಗ್ರಾಮಾಭ್ಯುದಯ ಕಾರ್ಯಕ್ರಮ ಅನುಷ್ಠಾನ ಸಮಿತಿ ಶಿಬರಾಜೆ ಪಾದೆ ವಠಾರಡ್ ನಡತ್ಂಡ್.

ಲೇಸ್ ಡ್ ಸಭೆತ್ತ ಗುರ್ಕಾರ್ಮೆನ್ ಜಿತೇಶ್ ಎಲ್ ಪಿರೇರಾ ಒಯಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ಗುರು ಯಂ.ಪಿ, ಜೆ.ಎಫ್.ಎಂ ಶಂಕರ್ ರಾವ್, ಜೇಸಿ ಶ್ರೀಧರ್ ರಾವ್, ಜೇಸಿ ವಿಕ್ಟರ್ ಸುವಾರಿಸ್, ಜೇಸಿ ದೀಪ, ಜೆಜೆಸಿ ಪ್ರತೀಕ್ಷಾ ಕೆ ಶೆಟ್ಟಿ ಪಾಲ್ ಪಡೆದಿತ್ತೆರ್.

2024 ತ್ತ ಪೊಸ ಗುರ್ಕಾರೆಯಾದ್ ಸಂತೋಷ್ ಜೈನ್, ಕಾರ್ಯದರ್ಶಿಯಾದ್ ಅಕ್ಷತ್ ರೈ, ಮಹಿಳಾ ಜೇಸಿ ಗುರ್ಕಾರ್ದಿಯಾದ್ ಶೋಭಾ ಪಿ, ಜೂನಿಯರ್ ಜೇಸಿ ಗುರ್ಕಾರೆಯಾದ್ ಹರ್ಷಿತ್, ಜೇಸಿ ಲಿಟಲ್ ವಿಭಾಗದ ಗುರ್ಕಾರೆಯಾದ್ ವಿವಿಯನ್ ಸುವಾರಿಸ್ ಪದಗ್ರಹಣ ಸ್ವೀಕಾರ ಮಲ್ತೆರ್.

ಪದಗ್ರಹಣ ಸ್ವೀಕಾರದ ಬೊಕ್ಕ ಪೊಸ ಗುರ್ಕಾರೆ ಸಂತೋಷ್ ಜೈನ್ ಪಾತೆರ್ದ್, ಎಡ್ಡೆ ಕೆಲಸ ಮಲ್ಪುನ ಮುಕೇನ ಪೂರ್ವ ಅಧ್ಯಕ್ಷೆರೆನ ಮಾದರಿಡೇ ಜೇಸಿ ಚಟುವಟಿಕೆನ್ ದುಂಬಾರಿಸಾವೊಂದು ಬರ್ಪೆ ಪಂದ್ ಪಂಡೆರ್.

ಜೆ.ಎಫ್.ಎಂ ಶಂಕರ್ ಪಾತೆರ್ದ್ ಶಿಬರಾಜೆ ಪಾದೆಡ್ ಜೇಸಿ ಪದಗ್ರಹಣ ಲೇಸ್ ಗ್ ಇತೊಂಜಿ ಸಂಖ್ಯೆಡ್ ಜನ ಸೇರಿನವು ಮಸ್ತ್ ಇಸೇಸ. ಸೇರಿನ ಜನಕ್ಲೆಗ್ ಜೇಸಿದ ಬಗೆಟ್ಟ್ ಅಭಿರುಚಿ ಮೂಡಡ್, ಅಂಚೆನೆ ಜೇಸಿ ಕೊಕ್ಕಡ ಕಪಿಲಾ ಘಟಕ ತತ್ವ ಆದರ್ಶನ್ ಪಾಲನೆ ಮಲ್ಪುನ ಸುರುಟ್ಟ್ ಉಂಡು ಪಂದ್ ಪಂಡೆರ್.

ಮಲ್ಲ ಬಿನ್ನೆರಾದ್ ಬತ್ತಿನ ಗುರು ಯಂ.ಪಿ ಪಾತೆರ್ದ್, ಈ ಊರುಡು ಇತ್ತ್ ದ್ ದೂರದ ಊರುಡು ಕೆಲಸ ಮಲ್ತೊಂದು ಇಪ್ಪುನ ಎಂಕ್ ಫಲ ತಾಂಬೂಲ ದೀದ್ ಲೆಪ್ಪೋಲೆ ಕೊರ್ನೆಕ್ಕ್ ಯಾನ್ ಆಭಾರಿ. ಜೇಸಿ ಕಾಸ್ ಮಲ್ಪುನೆ ಎಂಚ, ಗುಣವಂತೆರಾಪುನೆ ಎಂಚ, ಮಾನವೆರಾಪುನೆ ಎಂಚ ಪಂದ್ ಕೊರ್ಪುಂಡು. ಜೇಸಿಡ್ ಎಡ್ಡೆಡ್ಡೆ ಜ್ಞಾನಿಲು ಉಲ್ಲೆರ್. ಅಂಚಿನಕ್ಲೆನ ಎಪಲ ಸಂಪರ್ಕರ್ದ್ ಜೇಸಿಡ್ ಎಡ್ಡೆ ಕೆಲಸನ್ ಮಲ್ಪರೆ ಸಾಧ್ಯ ಪಂದ್ ಪಂಡೆರ್.

ಸಭೆಟ್ಟ್ ನಿವೃತ ಅಧ್ಯಾಪಕೆರ್ ತಿರುಮಲೇಶ್ವರ ಭಟ್ ಅರಸಿನಮಕ್ಕಿ ಮೆರೆಗ್ ಸನ್ಮಾನ ಮಲ್ತೆರ್. ಆದ್ಯ, ದಕ್ಷ, ಮನಸ್ವಿ ಪ್ರಾರ್ತನೆ ಮಲ್ತೆರ್. ಜಿತೇಶ್ ಎಲ್ ಪಿರೇರಾ ಎದ್ಕೊನಿಯೆರ್. ಪ್ರಿಯ ಲೇಸ್ ನ್ ಸುಧಾರಿಕೆ ಮಲ್ತೆರ್. ಅಕ್ಷಯ್ ರೈ ಸೊಲ್ಮೆ ಸಂದಾಯೆರ್.

ಮಾತ ಧರ್ಮದ ಜನಕುಲ್ಲ ಸೌಹಾರ್ದಡ್ ಸಹಬಾಳ್ವೆ ಮಲ್ಪೊಡು: ಪೇಜಾವರ ಶ್ರೀ

ಪಕ್ಷಿಕೆರೆ : ಅಯೋಧ್ಯೆ ಶ್ರೀ ರಾಮ ಮಂದಿರ ನಿರ್ಮಾಣದ ಟ್ರಸ್ಟಿಲು, ನೀಲಾವರ ಗೋಶಾಲೆದ ಸ್ಥಾಪಕೆರ್, ನಿರಂತರ ಸಮಾಜದ ಸಂಘಟನೆ, ಏಳ್ಗೆಗ್ ಬೇಲೆ ಮಲ್ಪುನ ಪೇಜಾವರ ಮಠಾಧೀಶೆರಾಯಿನ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀ ಸ್ವಾಮೀಜಿಗ್ 60 ಸಂವತ್ಸರ ಆಯಿನ ಲೆಕ್ಕೊಡು ಅಂಗಾರೆ ಆರೆನ ಪುಟ್ಟಿನ ಊರು ಪಕ್ಷಿಕೆರೆತ್ತ ಚಂದ್ರಗಿರಿ ಇಲ್ಲಲ್ ಸಾರ್ವಜನಿಕೆರ್, ಅಭಿಮಾನಿಲು, ಭಕ್ತೆರ್ ಸೇರ್ದ್ ಮಾನಾದಿಗೆ ಮಲ್ತೆರ್.

ಮಾನಾದಿಗೆ ಸ್ವೀಕಾರ ಮಲ್ತಿನ ಪೇಜಾವರ ಶ್ರೀ ಪಾತೆರ್ದ್, ಗ್ರಾಮೀಣ ಪ್ರದೇಶಡ್ ಪುಟುದು ಬುಲೆಯಿನ ಯಾನ್ ಹರಿಕೃಷ್ಣ ಪುನರೂರು, ಕೊ.ಅ. ಉಡುಪ ಮೊಕ್ಲೆನ ಆದರ್ಶನ್ ತೆರಿವೊನಿಯೆರೆ ಸಾಧ್ಯ ಆಂಡ್. ಅಪ್ಪ ಅಮ್ಮನ ಜೀವನ ಪಾಠ ಕಲ್ತ್ ದ್ ಈ ಮಟ್ಟಗ್ ಬುಲೆತೆ. ಜೀವನಡ್ ಕಲ್ಪೆರೆ ಮಸ್ತ್ ಉಂಡು. ಸರ್ವ ಧರ್ಮದ ಬಾಂಧವ್ಯದ ಮುಕೇನ ಸಹಬಾಳ್ವೆನೇ ಜೀವನ ಆವಡ್ ಪಂದ್ ಪಂಡೆರ್.

ಈ ಪೊರ್ತುಡು ಕಟೀಲ್ ಕ್ಷೇತ್ರದ ಅರ್ಚಕೆರ್ ಲಕ್ಷ್ಮೀ ನಾರಾಯಣ ಆಸ್ರಣ್ಣ, ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು, ಪ್ರದೀಪ್ ಕುಮಾರ್ ಕಲ್ಕೂರ, ಭುವನಾಭಿರಾಮ ಉಡುಪ, ಪಟೇಲ್ ವಾಸುದೇವ ರಾವ್, ದೇವಪ್ರಸಾದ್ ಪುನರೂರು, ಕೆಮ್ರಾಲ್ ಗ್ರಾಪಂ ಗುರ್ಕಾರೆ ಮಯ್ಯದ್ದಿ, ಕಸ್ತೂರಿ ಪಂಜ ಪಾಲ್ ಪಡೆದಿತ್ತೆರ್.

ಕುಕ್ಕೆ ದೇವಲ್ಯದ ಆನೆ ಮಾವುತೆ ಶ್ರೀನಿವಾಸ ಗೌಡ್ರೆಗ್ ಮಾನಾದಿಗೆ

ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆನೆ ಮಾವುತೆರ್ ಶ್ರೀನಿವಾಸ ಗೌಡ ಮೆರೆಗ್ ಡಾ| ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ಬೊಕ್ಕ ಅಖಿಲ ಭಾರತ ಅಯ್ಯಪ್ಪ ಸೇವಾ ಸಮಿತಿದ ಒಟ್ಟುಸೇರಿಗೆಡ್ ಮಾನಾದಿಗೆ ನಡತ್ಂಡ್.

ಆನೆ ಮಾವುತೆ ಶ್ರೀನಿವಾಸ ಗೌಡ್ರೆನ ಪುಟ್ಟಿನ ಊರು, ಎಲ್ಯರ್ದೆ ಬುಲೆಯಿನ ರೀತಿ, ತನ್ನ ಅಜ್ಜೆರ್ನ ಕಾಲರ್ದ್ ವಂಶ ಪರಂಪರೆಯಾದ್ ಆನೆ ಮಾವುತೆರಾದ್ ಸೇವೆ ಸಂದಾಯಿನ ಬಗೆಟ್ಟ್ ಅಂಚೆನೆ ಉಜಿರೆದ ಕೃಷ್ಣ ಆನೆದ ಮಾವುತೆರಾದ್ ಸಂದಾಯಿನ ಸೇವೆ ಬೊಕ್ಕ ಬೇತೆ ಬೇತೆ ಲೇಸ್ ಡ್ ಬಿನ್ನೆರೆನ್ ಎದ್ಕೊನುನ ರೀತಿ, ಮೆರವಣಿಗೆಡ್ ಪಾಲ್ ಪಡೆಪುನ ರೀತಿ, ಧರ್ಮಸ್ಥಳಡ್ ಶಂಕರ ಆನೆದ ಮಾವುತೆರಾದ್ ಬೊಕ್ಕ ಕುಕ್ಕೆ ಸುಬ್ರಹ್ಮಣ್ಯಡ್ ಕರಿನ 15 ವರ್ಷೊದಿಂಚ ಯಶಸ್ವಿನಿ ಆನೆದ ಮೋಕೆದ ಮಾವುತೆರಾದ್, ಪ್ರಾಮಾಣಿಕವಾದ್, ಭಕ್ತೆರೆನ ಮೋಕೆಗ್ ಪಾತ್ರೆರಾದ್ ಸೇವೆ ಸಂದಾದ್ ದೇವಲ್ಯರ್ದ್ ನಿವೃತ್ತೆರಾಯಿನ ಶ್ರೀನಿವಾಸ ಮೆರೆನ್ ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಸಂಸ್ಥಾಪಕೆರ್ ಡಾ|ರವಿ ಕಕ್ಕೆಪದವು ಬೊಕ್ಕ ಸುಬ್ರಹ್ಮಣ್ಯದ ಅಖಿಲ ಭಾರತ ಅಯ್ಯಪ್ಪ ಸೇವಾ ಸಮಿತಿದ ಸ್ಥಾಪಕಾಧ್ಯಕ್ಷೆರ್ ಉಮೇಶ್. ಕೆ. ಮೇರ್ ಶಾಲ್ ಪೊದೆತ್ ದ್, ಮಾಲೆ ಪಾಡ್ದ್, ನೆಂಪು ಕಾಣಿಕೆ ಬೊಕ್ಕ ಫಲಪುಷ್ಪ ಕೊರ್ದು ಸನ್ಮಾನ ಮಲ್ತೆರ್.

ಸನ್ಮಾನಿತೆರೆನ ಬಗೆಟ್ಟ್ ನಿವೃತ್ತ ಉಪನ್ಯಾಸಕೆರ್ ವಿಶ್ವನಾಥ ನಡುತೋಟ ಪ್ರಸ್ತಾವನೆದೊಟ್ಟಿಗೆ ಪಾತೆರಿಯೆರ್. ಅಯ್ಯಪ್ಪ ಸೇವಾ ಸಮಿತಿದ ಗುರ್ಕಾರೆ ಉಮೇಶ ಕೆ.ಎಂ., ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಒತ್ತು ಗುರ್ಕಾರೆ ವೆಂಕಟೇಶ ಎಚ್.ಎಲ್. ಸನ್ಮಾನಿತೆರೆನ ಬಗೆಟ್ಟ್ ಎಡ್ಡೆಪ್ಪು ಮದಿತೆರ್ .

ಸನ್ಮಾನ ಸ್ವೀಕಾರ ಮಲ್ತಿನ ಶ್ರೀನಿವಾಸ್ ಪಾತೆರ್ದ್, ಯಾನ್ ಸುಬ್ರಹ್ಮಣ್ಯಡ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರೆನ ಕೃಪೆರ್ದ್ 15 ವರ್ಷ ಮುಟ್ಟ ನಿರಂತರವಾದ್ ಯಶಸ್ವಿ ಆನೆದ ಸೇವೆನ್ ಪ್ರಾಮಾಣಿಕವಾದ್ ಮಲ್ದೆ. ಮಾತ ಜನತ್ತ ಪ್ರೀತಿಗ್ ಪಡೆದೆ. ಆ ಎನ್ನ ಸೇವೆನ್ ಗುರುತಿಸಾದ್ ಇನಿ ಎಂಕ್ ಕೊರ್ನ ಸನ್ಮಾನ ಎಂಕ್ ಮಸ್ತ್ ಖುಷಿ ಕೊರ್ತುಂಡು ಪಂದ್ ಪಂಡೆರ್.

ಈ ಪೊರ್ತುಡು ಸುಬ್ರಹ್ಮಣ್ಯ ರೋಟರಿ ಕ್ಲಬ್ ಪೂರ್ವದ ಗುರ್ಕಾರೆ ಲೋಕೇಶ ಬಿ ಎನ್, ಸುಬ್ರಹ್ಮಣ್ಯದ ಪತ್ರಕರ್ತೆರ್ ಪ್ರಕಾಶ್, ಅಭಿಷೇಕ್ ನಡುತೋಟ, ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಪುಷ್ಪ ಕುಮಾರಧಾರ, ಸೂರ್ಯ ಭಟ್, ಕಾರ್ತಿಕ್, ಬೆಳ್ಳಿಯಪ್ಪ, ರಮ್ಯ ಪಾಲ್ ಪಡೆದಿತ್ತೆರ್.