January 2024

ತೋಕೂರುದ 5ನೇ ವರ್ಷೊದ ಯಕ್ಷಗಾನ ಬಯಲಾಟದ ಲೆಪ್ಪೋಲೆ ಬುಡುಗಡೆ

ಯಕ್ಷ ದೇಗುಲದ ಪತ್ತ್ ಸಮಸ್ತೆರ್ 10ನೇ ತೋಕೂರುದ 5ನೇ ವರ್ಷೊದ ಯಕ್ಷಗಾನ ಬಯಲಾಟದ ಲೆಪ್ಪೋಲೆ ಬುಡುಗಡೆ ಲೇಸ್ ಜ.28 ಐತಾರ ಓಂಕಾರೇಶ್ವರಿ ಮಂದಿರಡ್ ನಡತ್ಂಡ್.

ಲೆಪ್ಪೋಲೆನ್ ವಿಶ್ವಬ್ಯಾಂಕ್ ಪರ್ಪಿನ ನೀರ್ ಬೊಕ್ಕ ಪರಿಸರ ನೈರ್ಮಲ್ಯ ಸಮಿತಿದ ಗುರ್ಕಾರೆ ಗಣೇಶ್ ಜಿ. ಬಂಗೇರ ಮೇರ್ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಮಂದಿರದ ಗುರ್ಕಾರೆ ಸದಾಶಿವ ಕುಂದರ್, ಅರ್ಚಕೆರ್ ಕೃಷ್ಣಕುಮಾರ್, ಯಕ್ಷ ದೇಗುಲದ ಪತ್ತ್ ಸಮಸ್ತೆರ್ 10ನೇ ತೋಕೂರುದ ಗುರ್ಕಾರೆ ಸದಾಶಿವ ಸಾಲ್ಯಾನ್, ಒತ್ತು ಗುರ್ಕಾರೆ ಸಂಪತ್ ಜೆ. ಶೆಟ್ಟಿ ಬೊಕ್ಕ ಪದ್ಮರಾಜ ಕರ್ಕೇರ, ಜತೆ ಕಾರ್ಯದರ್ಶಿ ಪ್ರೇಮಲತಾ ಯೋಗೀಶ್, ಮಾನಾದಿಗೆದ ಸಲಹೆಗಾರೆ ಗೋಪಾಲಕೃಷ್ಣ ಸಾಲ್ಯಾನ್, ಸಂಜೀವ ಕರ್ಕೇರ, ಸುರೇಶ್ ಬಿ ದೇವಾಡಿಗ ಬೊಕ್ಕ ದಿನಕರ ಸಾಲ್ಯಾನ್, ಸೀತಾರಾಮ ಸಾಲ್ಯಾನ್, ರಾಜೇಶ್, ಹಿಮಕರ್ ಕೋಟ್ಯಾನ್, ಶ್ರೀನಿವಾಸ, ಉದಯ್ ಕುಮಾರ್ ಪಾಲ್ ಪಡೆದಿತ್ತೆರ್. ಲೇಸ್ ನ್ ಪ್ರಧಾನ ಕಾರ್ಯದರ್ಶಿ ಭಾಸ್ಕರ್ ಅಮೀನ್ ತೋಕೂರು ಸುಧಾರಿಕೆ ಮಲ್ತೆರ್.

ಜ.29-31: ಕುಪ್ಪೆಟ್ಟು ಪಂಜುರ್ಲಿ ಧರ್ಮ ಚಾವಡಿಡ್ ಕೋಲ ಬಲಿ ಸೇವೆ

ಕುಪ್ಪೆಟ್ಟು ಪಂಜುರ್ಲಿ ಧರ್ಮ ಚಾವಡಿ ಕಾಂಜಿರ್ಕೋಡಿ ಗೋಕುಲ ನಿವಾಸಡ್ ಕೋಲ ಬಲಿ ಸೇವೆ ಜ.29-31 ಮುಟ್ಟ ನಡಪರೆ ಉಂಡು.

ಜ.29 ಸೋಮಾರ ಕಾಂಜಿರ್ಕೋಡಿ ಇಲ್ಲಡ್ ಬೊಲ್ಪುಗು ಗಣಹೋಮ, ನಾಗತಂಬಿಲ, ದೈವೊಲೆನ ಶುದ್ಧಿ, ನವಗ್ರಹ ಶಾಂತಿ, ಮೃತ್ಯುಂಜಯ ಶಾಂತಿ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ದುರ್ಗಾನಮಸ್ಕಾರ ಪೂಜೆ, ಭಜನಾ ಸಂಕೀರ್ತನೆ ನಡಪರೆ ಉಂಡು.

ಜ.30 ಅಂಗಾರೆ ಬೊಲ್ಪುಗು ಶ್ರೀ ಸತ್ಯನಾರಾಯಣ ಪೂಜೆ, ಜುಮಾದಿ ಹೋಮ ಪಂಚಕಜ್ಜಾಯ, ಮಧ್ಯಾಹ್ನ ಭಂಡಾರ ಬರಿಯೆರೆ, ಎಣ್ಣೆಬೂಳ್ಯ, ಅನ್ನ ಪ್ರಸಾದ ಸೇವೆ, ಮೈಸಂದಾಯ, ರಕ್ತೇಶ್ವರೀ, ಜುಮಾದಿ-ಬಂಟ, ಸತ್ಯದೇವತೆ, ಹಿರಿಯಜ್ಜ, ಮಂತ್ರದೇವತೆ, ಕಲ್ಲುರ್ಟಿ, ಕುಪ್ಪೆಟ್ಟು ಪಂಜುರ್ಲಿ, ಕುಟುಂಬದ ಕಲ್ಲುರ್ಟಿ ಪಂಜುರ್ಲಿ, ಚಾಮುಂಡಿ-ಗುಳಿಗ, ರಾಹು ಬೊಕ್ಕ ಕೊರಗಜ್ಜ ದೈವೊದ ಕೋಲ-ಬಲಿ ಸೇವೆ ನಡಪರೆ ಉಂಡು.

ಜ.31 ಬುಧಾರ ಕುಪ್ಪೆಟ್ಟು ಪಂಜುರ್ಲಿ ದೈವೊದ ಅಗೆಲ್ ಸೇವೆ, ಶಶಿಕಲಾ ಬೊಕ್ಕ ಹೊನ್ನಪ್ಪ ಪೂಜಾರಿ, ಮನ್ವಿತ್‌ ಸನ್ವಿತ್‌ ಮೊಕ್ಲೆನ ಪರಕೆದ ಲೆಕ್ಕೊಡು ರಾತ್ರೆ ಕೊರಗಜ್ಜ ದೈವೊದ ಕೋಲ ಬಲಿ ಸೇವೆ ನಡಪರೆ ಉಂಡು.

ಪುಗರ್ತೆದ ಸಿನೆಮಾ ನಟೆ, ಸಿರಿ ಬ್ರ್ಯಾಂಡ್ ರಾಯಭಾರಿ ರಮೇಶ್ ಅರವಿಂದ್ ಸಿರಿ ಸಂಸ್ಥೆದ ಪ್ರಧಾನ ಕಚೇರಿಗ್ ಭೇಟಿ

ಪ್ರತಿಯೊಂಜಿ ಸಿರಿ ಉತ್ಪನ್ನಲೆಡ್ ಭಾವನಾತ್ಮಕ ಸಂಬಂಧ ಉಂಡು: ರಮೇಶ್ ಅರವಿಂದ್

ಬೊಲ್ತೇರ್: ಪುಗರ್ತೆದ ಚಿತ್ರ ನಟೆ, ಶ್ರೀ ಧರ್ಮಸ್ಥಳ ಸಿರಿ ಗ್ರಾಮೋದ್ಯೋಗ ಸಂಸ್ಥೆದ ಉತ್ಪನ್ನಲೆನ ರಾಯಭಾರಿ ರಮೇಶ್ ಅರವಿಂದ್ ಮೇರ್ ಸಿರಿ ಸಂಸ್ಥೆದ ಪ್ರಧಾನ ಕಚೇರಿ ಉಜಿರೆಗ್ ಜ.26 ಕ್ಕ್ ಭೇಟಿ ಕೊರಿಯೆರ್.

ಸಿರಿ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಕೆ.ಎನ್ ಜನಾರ್ದನ ಮೆರೆನ ಗುರ್ಕಾರ್ಮೆಡ್ ನಡತಿನ ಸಭಾ ಲೇಸ್ ಡ್ ಮೇರ್ ಪಾತೆರ್ದ್, ವೀರೇಂದ್ರ ಹೆಗ್ಗಡೆರೆನ, ಮಾತೃಶ್ರೀ ಹೇಮಾವತಿ ಅಮ್ಮನ ಮಾರ್ಗದರ್ಶನಡ್ ಬೊಕ್ಕ ಸಿರಿ ಎಂ.ಡಿ ಕೆ.ಎನ್ ಜನಾರ್ಧನ ಮೆರೆನ ದುಂಬಾತ್ತಿಗೆಡ್ ನಡತೊಂದು ಇಪ್ಪುನ ಈ ಸಿರಿ ಸಂಸ್ಥೆಡ್ ಉತ್ಪಾದನೆ ಆವೊಂದು ಇಪ್ಪುನ ಸಿರಿ ಉತ್ಪನ್ನಲೆಗ್ ರಾಯಭಾರಿಯಾದ್ ಕೆಲಸ ಮಲ್ತೊಂದು ಇಪ್ಪುನವು ಮಸ್ತ್ ಪೆರ್ಮೆ ಆವೊಂದು ಉಂಡು.‌ ಸಿರಿ ಸಂಸ್ಥೆದ ಪ್ರತಿಯೊಂಜಿ ಉತ್ಪನ್ನಲೆಡ್ ಭಾವನಾತ್ಮಕ ಸಂಬಂಧ ಉಂಡು. ದಾಯೆ ಪಂಡ ಈ ಸಂಸ್ಥೆಡ್ ಉತ್ಪಾದನೆ ಆವೊಂದು ಇಪ್ಪುನ ಪ್ರತೀ ಉತ್ಪನ್ನಲೆಡ್ ಬಡಪತ್ತ್ ದ ಪೊಣ್ಣು ಜೋಕ್ಲೆನ ಪರಿಶ್ರಮ ಉಂಡು. ನಮ ಮಾತ ನಮ್ಮ ದಿನೊಲ ಗಲಸೆರೆ ಸಿರಿ ಉತ್ಪನ್ನಲೆನ್ ಉಪಯೋಗ ಮಲ್ತ್ಂಡ ನಮ್ಮ ಸಿರಿ ಸಂಸ್ಥೆಡ್ ಬೆನೊಂದು ಇಪ್ಪುನ ಪ್ರತಿಯೊಂಜಿ ಪೊಣ್ಣು ಜೋಕ್ಲೆನ ಬಾಳ್ ಡ್ ಏಪಲ ತೆಲಿಕೆ, ನೆಮ್ಮದಿನ್ ತೂಯೆರೆ ಸಹಕಾರಿ ಆಪುಂಡು. ಅಂಚಾದ್ ಪೂಜ್ಯೆರ್ ಬೊಕ್ಕ ಮಾತೃಶ್ರೀ ಅಮ್ಮನ ಆಸರೆಡ್ ಬೆನೊಂದು ಇಪ್ಪುನ ಮಾತ ಸಿರಿ ಸಿಬ್ಬಂದಿಲು ಏಪಲ ತೆಲಿಕೆಡ್ ಪರಸ್ಪರ ಪ್ರೀತಿ, ನಂಬಿಕೆ, ವಿಶ್ವಾಸ ದೀದ್ ಶ್ರದ್ಧೆರ್ದ್, ಇಷ್ಟಪಟ್ಟ್ ಡ್ ಸಂಸ್ಥೆದ ಕೆಲಸ ಕಾರ್ಯನ್ ಮಲ್ತ್ಂಡ ಖಂಡಿತವಾದ್ಲಾ ಯಶಸ್ಸ್ ನಮ್ಮಡೇ ಬರ್ಪುಂಡು ಪಂದ್ ಸಿರಿ ಸಿಬ್ಬಂದಿಲೆಗ್ ಸ್ಪೂರ್ತಿ ಕೊರಿಯೆರ್. ನೆತ್ತೊಟ್ಟಿಗೆ ಗಣರಾಜ್ಯೋತ್ಸವ ಸಂಭ್ರಮಾಚರಣೆದ ಬಗೆಟ್ಟ್ ತನ್ನ ವಿದ್ಯಾರ್ಥಿ ಜೀವನದ ಕುಸಿತ್ತ ಅನುಭವನ್ ಪಟ್ಟೊನಿಯೆರ್.

ಸಿರಿ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಕೆ.ಎನ್ ಜನಾರ್ದನ ಮೇರ್ ಪಾತೆರ್ದ್, ಪೂಜ್ಯೆರ್, ಅಮ್ಮನ ಬೊಕ್ಕ ಸಿರಿ ಸಂಸ್ಥೆದ ಮಿತ್ತ್ ಮಸ್ತ್ ಪ್ರೀತಿ, ಅಭಿಮಾನ ಇಪ್ಪುನ ರಮೇಶ್ ಅರವಿಂದ್ ಮೇರ್ ತನ್ನ ಜೀವನಡ್ ಅಳವಡಿಸಾಯಿನ ಸರಳತೆ, ಸಜ್ಜನಿಕೆ ಬೊಕ್ಕ ಮೌಲ್ಯಯುತ ಜೀವನ ಶೈಲಿದ ಬಗೆಟ್ಟ್ ಮೆಚ್ಚಿದ್, ಮಾತ ಸಿರಿ ಸಿಬ್ಬಂದಿಲೆನ ಪರವಾದ್ ರಮೇಶ್ ಅರವಿಂದ್ ಮೆರೆಗ್ ಶಾಲ್ ಪೊದೆಪಾದ್, ಸ್ಮರಣಿಕೆ ಕೊರ್ದು ಸನ್ಮಾನ ಮಲ್ತ್ ದ್ ಮಾನಾದಿಗೆ ಮಲ್ತೆರ್.

ಲೇಸ್ ಡ್ ಸಿರಿ ಸಂಸ್ಥೆದ ಆಡಳಿತ ಮಂಡಳಿದ ನಿರ್ದೇಶಕೆರ್ ರಾಜೇಶ್ ಪೈ, ಸಿರಿ ಸಂಸ್ಥೆದ ಆಡಳಿತ ಬೊಕ್ಕ ಲೆಕ್ಕಪತ್ರ ವಿಭಾಗದ ನಿರ್ದೇಶಕೆರ್ ಪ್ರಸನ್ನ ಯು ಬೊಕ್ಕ ಮಾತ ಸಿಬ್ಬಂದಿ ವರ್ಗದಕುಲು ಪಾಲ್ ಪಡೆದಿತ್ತೆರ್. ಸಿರಿ ಗೋಡೌನ್ ಮ್ಯಾನೇಜರ್ ಜೀವನ್ ಕುಮಾರ್ ಲೇಸ್ ದ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.

ಅವೆರ್ದ್ ಬೊಕ್ಕ ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಭೇಟಿ ಕೊರ್ನ ರಮೇಶ್ ಅರವಿಂದ್ ಮೇರ್ ಶ್ರೀ ಮಂಜುನಾಥ ಸ್ವಾಮಿನ ದರ್ಶನ ಪಡೆಯೆರ್. ಬೊಕ್ಕ ಡಾ| ವೀರೇಂದ್ರ ಹೆಗ್ಗಡೆರೆನ್ ಭೇಟಿ ಮಲ್ತ್ ದ್ ಆರೆನ ಆಶೀರ್ವಾದ ಪಡೆದ್, ಸಿರಿ ಸಂಸ್ಥೆದ ಅಭಿವೃದ್ಧಿ ಬಗೆಟ್ಟ್ ಚರ್ಚೆ ಮಲ್ತೆರ್. ಈ ಪೊರ್ತುಡು ರಮೇಶ್ ಅರವಿಂದೆರೆನ ರಾಯಭಾರಿಡ್ ಸಿರಿ ಸಂಸ್ಥೆ ಸಮಗ್ರ ಏಳಿಗೆ ಆವೊಂದು ಇಪ್ಪುನೆಕ್ಕ್ ಮೆರೆನ ಬಗ್ಗೆ ಪ್ರಶಂಸೆ ಕೊರಿಯೆರ್.

ಮೂಡುಮಟ್ಟಾರು ಶ್ರೀ ಬಬ್ಬರ್ಯ ದೈವೊಲ್ಯಡ್ ಸಾನ್ನಿಧ್ಯ ಸಂಕೋಚ, ದೈವ ಸಂದರ್ಶನ- ಬಾಲಾಲಯ ಪ್ರತಿಷ್ಠೆ

ಕಾಪು: ಮೂಡುಮಟ್ಟಾರು ಶ್ರೀ ಬಬ್ಬರ್ಯ ದೈವೊಲ್ಯಡ್ ಜೀರ್ಣೋದ್ಧಾರದ ಲೆಕ್ಕೊಡು ಜ.29 ಸೋಮಾರ (ಇನಿ) ಸಾನ್ನಿಧ್ಯ ಸಂಕೋಚ, ದೈವ ಸಂದರ್ಶನ- ಬಾಲಾಲಯ ಪ್ರತಿಷ್ಠೆ ನಡಪರೆ ಉಂಡು.

ಈ ಲೇಸ್ ಕುತ್ಯಾರು ಕೇಂಜ ಶ್ರೀಧರ ತಂತ್ರಿಲೆನ ಮಾರ್ಗದರ್ಶನಡ್, ವೇ.ಮೂ. ಶಿರ್ವ ರಘಪತಿ ಗುಂಡುಭಟ್ ಮೆರೆನ ಮುತಾಲಿಕೆಡ್ ಸಂಪ್ರದಾಯದಂಚೆನೆ ಸಂಪನ್ನ ಆಪುಂಡು.

ಈ ಲೇಸ್ ಡ್ ಊರುದ ಬೊಕ್ಕ ಪರವೂರುದ ಭಕ್ತೆರ್ ಬತ್ತ್ ದ್, ಶ್ರೀ ಬಬ್ಬರ್ಯ ಪರಿವಾರ ಶಕ್ತಿಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಮೂಡುಮಟ್ಟಾರು ಶ್ರೀ ಬಬ್ಬರ್ಯ ದೈವೊಲ್ಯದ ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ ನಿತ್ಯಾನಂದ ಹೆಗ್ಡೆ ನಡಿಬೆಟ್ಟು, ಕಾರ್ಯಾಧ್ಯಕ್ಷೆರ್ ಮಟ್ಟಾರು ರತ್ನಾಕರ ಹೆಗ್ಡೆ, ಆಡಳಿತ ಮೊಕ್ತೇಸರೆರ್ ಭಗವಾನ್ ದಾಸ್ ಶೆಟ್ಟಿ, ಹಳೆಮನೆ, ಪದುಕೆರ್, ಸದಸ್ಯೆರ್ ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮೇ 1 ಕ್ಕ್ ಶ್ರೀ ಕ್ಷೇತ್ರ ಧರ್ಮಸ್ಥಳಡ್ 52ನೇ ವರ್ಷದ ಉಚಿತ ಸಾಮೂಹಿಕ ವಿವಾಹ

ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಮೇ1 ಬುದಾರ ಬಯ್ಯಗ್ 6.45 ಕ್ಕ್ ಗೋಧೋಳಿ ಲಗ್ನಡ್ 52ನೇ ವರ್ಷೊದ ಉಚಿತ ಸಾಮೂಹಿಕ ವಿವಾಹ ನಡಪರೆ ಉಂಡು.

ಮದಿಮಾಯಗ್ ಧೋತಿ, ಶಾಲ್ ಬೊಕ್ಕ ಮದಿಮಾಲೆಗ್ ಸೀರೆ, ರವಿಕೆ, ಕರಿಮಣಿ ಬೊಕ್ಕ ಪೂತ್ತ ಮಾಲೆ ಕೊರ್ಪೆರ್. ರಡ್ಡನೇ ಮದಿಮೆಗ್ ಅವಕಾಶ ಇಜ್ಜಿ. ಅಂಚೆನೆ ಮದಿಮೆದ ಮಾತ ಕರ್ಚಿ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಧರ್ಮೊತ್ಥಾನ ಟ್ರಸ್ಟ್ ದ ಮುತಾಲಿಕೆಡ್ ನಡಪುಂಡು.

ವರದಕ್ಷಿಣೆ ಬೊಕ್ಕ ಮದಿಮೆಗ್ ಆಪುನ ಎಚ್ಚದ ಕರ್ಚಿನ್ ಉಂತಾವುನ ಉದ್ದೇಶರ್ದ್ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಗಡೆರ್ 1972 ಟ್ಟ್ ಸುರು ಮಲ್ತಿನ ಉಚಿತ ಸಾಮೂಹಿಕ ವಿವಾಹ ಪ್ರತಿ ವರ್ಷ ನಡತೊಂದು ಉಂಡು. ಇಡೇ ಮುಟ್ಟ ಒಟ್ಟು 12,777 ಜೋಡಿ ಸಾಮೂಹಿಕ ಮದಿಮೆ ಆತೆರ್. ಸುಖ-ಶಾಂತಿ, ನೆಮ್ಮದಿದ ಜೀವನ ನಡಪಾವೊಂದು ಉಲ್ಲೆರ್. ಅಂಚೆನೆ ಸಾಮೂಹಿಕ ಮದಿಮೆಡ್ ಮದಿಮೆ ಆಯೆರೆ ಇಷ್ಟ ಇತ್ತಿನಕುಲು ಎ.20 ತ್ತೊಲಯಿ ಅಕ್ಲೆನ ಪೊಲಬು ಬೊಕ್ಕ ಸರಿಯಾಯಿನ ದಾಖಲೆದೊಟ್ಟಿಗೆ ಅರ್ಜಿ ಸಂದಾವೊಲಿ. ಎಚ್ಚದ ಪೊಲಬುಗಾದ್ 08256-266644, ವಾಟ್ಯಾಪ್ ನಂ: 9663464648, 8147263422 ನಂಬರ್ ನ್ ಲೆಪ್ಪು ಕೊರ್ಲೆ.

ದೈವೊಲ್ಯಲೆನ ಜೀರ್ಣೋದ್ಧಾರರ್ದ್ ಗ್ರಾಮದ ಅಭಿವೃದ್ಧಿ ಸಾಧ್ಯ-ನಳಿನ್ ಕುಮಾರ್ ಕಟೀಲ್

ಮುಲ್ಕಿ: ಕಿನ್ನಿಗೋಳಿ ಕೈತಲ್ದ ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯದ ಜೀರ್ಣೋದ್ಧಾರ ಬ್ರಹ್ಮಕಲಶದ ಲೆಪ್ಪೋಲೆನ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಅಮ್ಮನ ಸನ್ನಿಧಾನಡ್ ದೇವೆರೆಗ್ ಪ್ರಾರ್ತನೆ ಮಲ್ತ್ ದ್ ಬುಡುಗಡೆ ಮಲ್ತೆರ್.

ಬ್ರಹ್ಮಕಲಶ ಸಮಿತಿದ ಗುರ್ಕಾರೆ ನಳಿನ್ ಕುಮಾರ್ ಕಟೀಲ್ ಪಾತೆರ್ದ್, ದೈವೊಲ್ಯಲೆನ ಜೀರ್ಣೋದ್ಧಾರರ್ದ್ ಗ್ರಾಮದ ಅಭಿವೃದ್ಧಿ ಸಾಧ್ಯ ಪಂದ್ ಪಂಡೆರ್.

ಈ ಪೊರ್ತುಡು ಸಮಿತಿದ ಕಾರ್ಯಾಧ್ಯಕ್ಷೆರ್ ಉಮಾನಾಥ ಕೋಟ್ಯಾನ್, ಮಾನಾದಿಗೆದ ಕಾರ್ಯಾಧ್ಯಕ್ಷೆರ್ ಬ್ರಿಜೇಶ್ ಚೌಟ, ಜಾಗತಿಕ ಬಂಟರ ಸಂಘ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ, ಮಿಥುನ್ ರೈ, ಕಟೀಲ್ ಅಸ್ರಣ್ಣ ಬಂಧುಲು ಬೊಕ್ಕ ಸಮಿತಿದ ಪ್ರಮುಖೆರ್, ಮಾಗಣೆದ ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.

ಅಯೋಧ್ಯೆಡ್ ರಾಮಮಂದಿರ ಉದಿಪನ: ಬೋಳ ಮೃತ್ಯುಂಜಯ ರುದ್ರ ಸೋಮನಾಥೇಶ್ವರ ದೇವಲ್ಯ, ಶ್ರೀ ವೀರ ಮಾರುತಿ ದೇವಲ್ಯಡ್ ರಾಮೋಚ್ಚಯ ಲೇಸ್

ಅಯೋಧ್ಯೆದ ಶ್ರೀರಾಮಚಂದ್ರನ ಜನ್ಮ ಭೂಮಿಡ್ ರಾಮಮಂದಿರ ಉದಿಪನ ಬೊಕ್ಕ ಬಾಲರಾಮನ ಪ್ರಾಣ ಪ್ರತಿಷ್ಠಾಪನೆ ಆಯಿನ ಲೆಕ್ಕೊಡು ಬೋಳ ಮೃತ್ಯುಂಜಯ ರುದ್ರ ಸೋಮನಾಥೇಶ್ವರ ದೇವಲ್ಯ ಬೊಕ್ಕ ಶ್ರೀ ವೀರ ಮಾರುತಿ ದೇವಲ್ಯಡ್ ರಾಮೋಚ್ಚಯ ಲೇಸ್ ಜ.22 ಕ್ಕ್ ರಾಮಭಕ್ತೆರೆನ ಸಹಕಾರಡ್ ನಡತ್ಂಡ್.

ಈ ಲೇಸ್ ಬೋಳ ಶ್ರೀ ಮೃತ್ಯುಂಜಯ ರುದ್ರ ಸೋಮನಾಥೇಶ್ವರ ದೇವಲ್ಯದ ಆಡಳಿತ ಮಂಡಳಿ, ರಾಷ್ಟ್ರೀಯ ಸ್ವಯಂ ಸೇವಕ ಸಂಘ ಬೊಕ್ಕ ವಿಶ್ವ ಹಿಂದೂ ಪರಿಷತ್, ಬೋಳ ಘಟಕದ ಒಟ್ಟುಸೇರಿಗೆಡ್ ನಡತ್ಂಡ್.

ಆನಿ ದೇವಲ್ಯಡ್ ಸಾಮೂಹಿಕ ರಾಮತಾರಕ ಮಂತ್ರಪಠಣೆ, ಭಜನಾ ಸಂಕೀರ್ತನೆ, ಮೃತ್ಯುಂಜಯ ರುದ್ರ ಸೋಮನಾಥೇಶ್ವರ ದೇವೆರೆಗ್, ವೀರಮಾರುತಿ ದೇವೆರೆಗ್ ಇಸೇಸ ಪೂಜೆ ಬೊಕ್ಕ ಶ್ರೀ ರಾಮನ ಭಾವಚಿತ್ರಗ್ ದೇವಲ್ಯದ ಪ್ರಧಾನ ಅರ್ಚಕೆರ್ ಶ್ರೀನಿವಾಸ ಭಟ್ರೆನ ಮುತಾಲಿಕೆಡ್ ಪೂಜೆ ಸಂದಾದ್ ಭಕ್ತೆರೆಗ್ ಪ್ರಸಾದ ಪಟ್ಟಿಯೆರ್.

ಈ ಪೊರ್ತುಡು ಅಯೋಧ್ಯೆಡ್ ಕರಸೇವಕೆರಾದ್ ಸೇವೆ ಮಲ್ತಿನ ಊರುದ ಹಿರಿಯೆರ್ ಜಗನ್ನಾಥ ಶೆಟ್ಟಿ ಕಲ್ಬೆಟ್ಟು ಬೊಕ್ಕ ಜಯರಾಮ ಶೆಟ್ಟಿ ಪೊಸರ್ಮ ಪರಾಡಿ ಮೊಕ್ಲೆನ್ ಹಿರಿಯ ಬಿನ್ನೆರೆನ ಉಪಸ್ಥಿತಿಡ್ ಮಾನಾದಿಗೆ ಮಲ್ತೆರ್. ಶ್ರೀ ರಾಮ ದೇವೆರೆನ ಪ್ರಾಣ ಪ್ರತಿಷ್ಠೆದ ದೃಶ್ಯಾವಳಿದ ನೇರಪ್ರಸಾರನ್ ಮಲ್ಲ ಪರದೆದ ಮುಕೇನ ಭಕ್ತೆರ್ ಕಣ್ಣ್ ದೀಜಾಯೆರ್.

ಗ್ರಾಮದ ರಾಮ ಭಕ್ತೆರೆನ ಸಹಕಾರಡ್ ಸಾಮೂಹಿಕ ಅನ್ನ ಪ್ರಸಾದ ಸೇವೆ ನಡತ್ಂಡ್. ರಾತ್ರೆ ದೇವಲ್ಯಡ್ ಬೊಕ್ಕ ಶ್ರೀ ಮಹಾಲಿಂಗೇಶ್ವರ ದೇವೆರೆನ ಸನ್ನಿಧಿಡ್ ಇಸೇಸ ದೀಪಾಲಂಕಾರ, ಶ್ರೀ ರಾಮತಾರಕ ಮಂತ್ರಪಠಣೆ ಬೊಕ್ಕ ಭಜನಾ ಸಂಕೀರ್ತನೆ ನಡತ್ಂಡ್.

ಕುಂಪಲ ಶ್ರೀ ಆದಿಶಕ್ತಿ ಚಾಮುಂಡೇಶ್ವರಿ ಶ್ರೀ ಕ್ಷೇತ್ರಗ್ ಬಾಲಯೋಗಿ ಅಮೃತನಂದ ಸ್ವಾಮೀಜಿ ಭೇಟಿ

ಕುಂಪಲ ಶ್ರೀ ಆದಿಶಕ್ತಿ ಚಾಮುಂಡೇಶ್ವರಿ ಶ್ರೀ ಕ್ಷೇತ್ರಡ್ ನಡಪುನ ಪ್ರತಿಷ್ಠಾಪನೆ ಬ್ರಹ್ಮಕಲಶ ಲೇಸ್ ಡ್ ಶ್ರೀ ಕೃಷ್ಣ ಮುಖ್ಯಪ್ರಾಣ ಮಾರುತಿ ಮಠತ್ತ ಶ್ರೀ ಬಾಲಯೋಗಿ ಅಮೃತನಂದ ಸ್ವಾಮೀಜಿ ಪಾಲ್ ಪಡೆದ್ ಆಶೀರ್ವಚನ ಕೊರಿಯೆರ್.

ಈ ಲೇಸ್ ಡ್ ದೇವಲ್ಯದ ಮುಖ್ಯಸ್ಥೆರ್ ಚರಣ್ ಬೇಬಿ ಕೇಶವ ಶಾಂತಿ, ದೇವದಾಸ್, ಶಿವಪ್ರಸಾದ್, ದೇವೇಶ ಸರಲಯ, ರಾಜೇಶ್ ಪೂಜಾರಿ, ದಯಾನಂದ ಲಕ್ಷ್ಮೀಗುಡ್ಡೆ, ತುಕಾರಾಮ್ ಉಳ್ಳಾಲ ಬೈಲ್, ಕೃಷ್ಣ ಕುಂಪಲ, ಶರಣ್ ರಾಜ್ ಪಾಲ್ ಪಡೆದಿತ್ತೆರ್.

ಶುಂಠಿ ಆರೋಗ್ಯಗ್ ಎಡ್ಡೆ

ಶುಂಠಿಡ್ ಇಪ್ಪುನ ಜಿಂಜರಾಲ್ ಅಂಶಡ್ ಉರಿಯೂತನ್ ಕಮ್ಮಿ ಮಲ್ಪುನ ಗುಣ ಇಪ್ಪುರ್ನೆದಾವೆರ ಉಂದು ಬಂಜಿಗ್ ಮಸ್ತ್ ಪರಿಣಾಮಕಾರಿಯಾದ್ ಬೇಲೆ ಮಲ್ಪುಂಡು.

ಶುಂಠಿ ಆಂಟಿ ಆಕ್ಸಿಡೆಂಟ್ ರ್ದ್ ಸಮೃದ್ದ ಆತ್ಂಡ್. ಕೆಲವು ಸೀಕ್ ಲೆನ ಮಿತ್ತ್ ಪರಿಣಾಮಕಾರಿಯಾದ್ ಬೇಲೆ ಮಲ್ಪುಂಡು. ಪ್ರತಿದಿನೊಲ ಶುಂಠಿನ್ ಒಂತೆ ಒಂತೆನೇ ಸೇವನೆ ಮಲ್ಪುರ್ನೆದಾವೆರ ಹವಾಮಾನ ಬದಲಾವಣೆ ಪೊರ್ತುಡು ಬರ್ಪುನ ಜ್ವರನ್ ಕಮ್ಮಿ ಮಲ್ಪುಂಡು. ಅತ್ತಂದೆ ಚಳಿಗಾಲಡ್ ಬರ್ಪುನ ಶೀತ ಬೊಕ್ಕ ತೆಮ್ಮನ್ ಕಮ್ಮಿ ಮಲ್ಪುಂಡು.

ಫೆ.2: ಧರ್ಮಸ್ಥಳಡ್ ಭಗವಾನ್ ಶ್ರೀ ಬಾಹುಬಲಿ ಮೂರ್ತಿಗ್ ಪಾದಾಭಿಷೇಕ

ಉಜಿರೆ: ಧರ್ಮಸ್ಥಳದ ರತ್ನಗಿರಿಟ್ಟ್ ವಿರಾಜಮಾನ ಆದಿಪ್ಪುನ ಭಗವಾನ್ ಶ್ರೀ ಬಾಹುಬಲಿ ಮೂರ್ತಿಗ್ ಫೆ.2 ಸುಕ್ರಾರ ಬೊಲ್ಪುಗು ಮೆರವಣಿಗೆದ ಬೊಕ್ಕ 216 ಕಲಶರ್ದ್ ಪಾದಾಭಿಷೇಕ ನಡಪರೆ ಉಂಡು.

ಈ ಲೇಸ್ ಡ್ ಕಾರ್ಲ ಜೈನಮಠತ್ತ ಪೂಜ್ಯ ಲಲಿತಕೀರ್ತಿ ಭಟ್ಟಾರಕ ಸ್ವಾಮೀಜಿ ಮಂಗಲ ಪ್ರವಚನ ಕೊರಿಯೆರೆ ಉಲ್ಲೆರ್. ನೆತ್ತ ಅಟ್ಟಣೆಗಾದ್ ಫೆ.1 ಗುರುವಾರ ರತ್ನಗಿರಿಟ್ಟ್ ಬೊಲ್ಪುಗು ತೋರಣ ಮೂರ್ತ, ವಿಮಾನಶುದ್ಧಿ, ಶೋಡಷ ಕಲಶಾಭಿಷೇಕ, ಬಯ್ಯಗ್ ನಾಂದಿಮಂಗಲ ಇಂಚ ಧಾರ್ಮಿಕ ವಿಧಿ-ವಿಧಾನಲು ನಡಪರೆ ಉಂಡು.