January 8, 2024

ಗರುಡ ಪಂಚೆಮಿ ತುಳು ನಾಟಕದ ಸುವರ್ಣ ಸಂಭ್ರಮ

ಪತ್ರಕರ್ತೆರ್ ಜಗನ್ನಾಥ ಶೆಟ್ಟಿ ಬಾಳ ಮೆರೆಗ್ “ರಂಗ ಕಲಾಬಂಧು” ಬಿರುದು ಪ್ರದಾನ

ಶ್ರೀ ಲಲಿತೆ ಕಲಾವಿದರು (ರಿ.) ಕುಡ್ಲ ಕೂಟದಕ್ಲೆರ್ದ್ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಪ್ರಾಯೋಜಕತ್ವಡ್ ತ್ರಿರಂಗ ಸಂಗಮ ಬೊಂಬಾಯಿ ಮುತಾಲಿಕೆಡ್ “ಗರುಡ ಪಂಚೆಮಿ” ಪನ್ಪಿನ ತುಳು ನಾಟಕದ ಯಶಸ್ವಿ 50ನೇ ಪ್ರದರ್ಶನದ ಲೆಕ್ಕೊಡು ಸುವರ್ಣ ಸಂಭ್ರಮ ಲೇಸ್ ಜ. 10 ಬುಧವಾರ ಬಯ್ಯ 5.30 ಗಂಟೆಗ್ ಕುಡ್ಲದ ಪುರಭವನಡ್ ನಡಪರೆ ಉಂಡು.

ಈ ಬಗೆಟ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ನಾಟಕದ ಲೇಖಕೆರ್ ಅಂಚನೆ ಶ್ರೀ ಲಲಿತೆ ಕಲಾವಿದೆರ್ ತಂಡಗ್ ಬೆರಿತಾಂಗ್ ಆದ್ ಇಪ್ಪುನ ನವನೀತ್ ಶೆಟ್ಟಿ ಕದ್ರಿ ಪಾತೆರ್ದ್, ಶ್ರೀ ಲಲಿತೆ ಕೂಟದ ಗುರ್ಕಾರ್ಲು ಕಿಶೋರ್ ಡಿ. ಶೆಟ್ಟಿ ಮೇರ್ ಯಕ್ಷಗಾನದ ಹವ್ಯಾಸಿ ಕಲಾವಿದೆರ್ ಬೊಕ್ಕ ಕಿನ್ಯ ಪ್ರಾಯೊಡೇ ನಾಟಕಡ್ ಪಾತ್ರ ಮಲ್ತೊಂದಿತ್ತೆರ್. ನಾಟಕದ ಅಭಿರುಚಿನ್ ಯಕ್ಷಗಾನದ ಅಭಿರುಚಿತೊಟ್ಟಿಗೆ ಬುಳೆಪಾವೊಂದು ಪೋವೊಂದಿತ್ತೆರ್. ಒರಿಯೊರ್ದೊರಿ ಅಸಲ್ ನಾಟಕನ್ ಸೂರುತ್ತ ಸರ್ತಿ ದುಬಾಯಿಗ್ ಕೊನತ್ತ್‌ದ್ ಅಲ್ಪಲ ಪ್ರದರ್ಶನ ಕೊರ್ತಿನಾರ್ ಕಿಶೋರ್ ಡಿ. ಶೆಟ್ಟಿ.

ಚಾರಿತ್ರಿಕ ಬೊಕ್ಕ ಪೌರಾಣಿಕ ನಾಟಕಲು ಒರಿಯೊಡು ಅಯಿಕ್ಕ್ ವಿಶೇಷವಾಯಿನ ಆದ್ಯತೆನ್ ಕೊರೊಡು ಪನ್ಪಿನ ನಿಲೆಟ್ಟ್ ಸುಮಾರಾತ್ ಪೌರಾಣಿಕ ನಾಟಕನ್ ಮಲ್ತೆರ್. ಕಟೀಲ್‌ದಪ್ಪೆ ಉಳ್ಳಾಲ್ತಿ ಮೆರೆನ ಸುರೂತ್ತ ಪೌರಾಣಿಕ ನಾಟಕ. ಈ ನಾಟಕ 324 ಸರ್ತಿ ಪ್ರದರ್ಶನ ಆತ್ಂಡ್. ಅವೆಡ್ದ್ ಬೊಕ್ಕ ಮಣ್ಣ್‌ದ ಮಗಲ್ ಅಬ್ಬಕ್ಕ, ದೇವುಪೂಂಜ ಇಂಚ ಬೇತೆ ನಾಟಕಲೆನ್ ಮಲ್ತ್‌ದ್ ಅವೆನ್ ದೇಶ ವಿದೇಶಲೆಡ್ ಪ್ರದರ್ಶನ ಕೊರಿನ ಪೆರ್ಮೆ ಈ ನಾಟಕ ಕೂಟಗ್ ಉಂಡು. ಗರುಡ ಪಂಚೆಮಿ ನಾಟಕಲ ವಿಶೇಷವಾದಿತ್ತ್‌ದ್ ಜನಕ್ಲೆನ ಪ್ರೋತ್ಸಾಹರ್ದಾವರ ಇತ್ತೆ 50 ನೇ ಪ್ರದರ್ಶನ ಕೊರೊಂದುಂಡು ಪಂದ್ ಪಂಡೆರ್.

ಈ ಲೇಸ್‌ನ್ ಶ್ರೀ ಕ್ಷೇತ್ರ ಕಟೀಲ್ ಮುಲ್ಪದ ಅನುವಂಶಿಕ ಅರ್ಚಕೆರ್ ಅನಂತ ಪದ್ಮನಾಭ ಅಸ್ರಣ್ಣೆರ್ ತುಡರ್ ಅರ್ಲಾದ್ ಉದಿಪನ ಮಲ್ಪರೆ ಉಲ್ಲೆರ್. ಕುಡ್ಲ ಮಹಾನಗರ ಪಾಲಿಕೆದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಲೇಸ್‌ದ ಗುರ್ಕಾಮೆ ವಹಿಸೊನರೆ ಉಲ್ಲೆರ್. ಕರ್ನಾಟಕ ರಾಜ್ಯ ಕಾರ್ಯನಿರತ ಪತ್ರಕರ್ತರ ಸಂಘದ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಆಯಿನ ಜಗನ್ನಾಥ ಶೆಟ್ಟಿ ಬಾಳ ಮೆರೆಗ್ “ರಂಗ ಕಲಾಬಂಧು” ಬಿರುದು ತಿಕ್ಕರೆ ಉಂಡು. ಅಂಚನೆ ತ್ರಿರಂಗ ಸಂಗಮ ಬೊಂಬಾಯಿದ ಸಂಚಾಲಕೆರ್ ಆಯಿನ ಕರ್ನೂರು ಮೋಹನ್ ರೈ, ಅಶೋಕ್ ಪಕ್ಕಳ, ನವೀನ್ ಶೆಟ್ಟಿ ಇನ್ನ ಬಾಳಿಕೆ ಮೊಕುಲೆಗ್ ಮಾನಾದಿಗೆ ನಡಪರೆ ಉಂಡು.

ಮಲ್ಲ ಬಿನ್ನೆರಾದ್ ತುಳು ಕನ್ನಡ ಪಿಚ್ಚರ್‌ದ ನಿರ್ಮಾಪಕೆರ್ ಬೊಕ್ಕ ನಿರ್ದೇಶಕೆರ್ ಪ್ರಕಾಶ್ ಪಾಂಡೇಶ್ವರ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕೆರ್ ರಾಜೇಶ್ ಜಿ., ಯಕ್ಷಧ್ರುವ ಪಟ್ಲ ಫೌಂಡೇಶನ್‌ದ ಕಾರ್ಯದರ್ಶಿ ಪುರುಷೋತ್ತಮ್ ಭಂಡಾರಿ ಸೇರ್ದ್ ಮಸ್ತ್ ಜನ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಪಂಡೆರ್.

ಪತ್ರಿಕಾಗೋಷ್ಠಿಡ್ ಶ್ರೀ ಲಲಿತೆ ಕೂಟದ ಗುರ್ಕಾರ್ಲು ಕಿಶೋರ್ ಡಿ. ಶೆಟ್ಟಿ, ನಿರ್ದೇಶಕೆರ್ ಜೀವನ್ ಉಳ್ಳಾಲ್, ಸಮಗ್ರ ತಂಡದ ನಿರ್ವಹಣೆಗಾರೆರ್ ಮೋಹನ್ ಕೊಪ್ಪಲ್, ಪ್ರದೀಪ್ ಆಳ್ವ ಕದ್ರಿ, ಸಲಹೆಗಾರೆರ್ ಗೋಕುಲ್ ಕದ್ರಿ ಪಾಲ್ ಪಡೆದ್ ಇತ್ತೆರ್.

ಐಕಳಡ್ ಧರ್ಮಾರ್ಥ ವೈದ್ಯಕೀಯ ತಪಾಸಣೆ ಶಿಬಿರ

ಮುಲ್ಕಿ: ಕಿನ್ನಿಗೋಳಿ ಕೈತಲ್ ಐಕಳ ಕಾಂತಾಬಾರೆ ಬೂದಾಬಾರೆ ಜೋಡುಕರೆ ಕಂಬುಲ ಉಚ್ಚಯದ ಲೆಕ್ಕೊಡು ಬೇತೆ ಬೇತೆ ಸಂಘಟನೆದ ಸಹಕಾರಡ್ ಶ್ರೀನಿವಾಸ್ ಆಸ್ಪತ್ರೆ ಮುಕ್ಕ ಸುರತ್ಕಲ್ ದ ತಜ್ಞ ವೈದ್ಯೆರ್ದ್ ಧರ್ಮೊಗು ವೈದ್ಯಕೀಯ ತಪಾಸಣೆ ಶಿಬಿರ ಐಕಳ ಬಾವ ಧರ್ಮ ಚಾವಡಿಡ್ ನಡತ್ಂಡ್.

ಶಿಬಿರನ್ ಶಾಸಕೆರ್ ಉಮನಾಥ ಕೋಟ್ಯಾನ್ ಉದಿಪನ ಮಲ್ತ್ ದ್ ಪಾತೆರ್ದ್, ಗ್ರಾಮೀಣ ಪ್ರದೇಶಡ್ ಸೇವಾ ಸಂಸ್ಥೆಲು ಆರೋಗ್ಯದ ಹಿತಗಾದ್ ಮಲ್ತೊಂದು ಇಪ್ಪುನ ಧರ್ಮೊದ ಲೇಸ್ ಗ್ ಅಭಿನಂದನೆ ಸಂದಾಯೆರ್.

ಲೇಸ್ ದ ಗುರ್ಕಾರ್ಮೆನ್ ಐಕಳ ಕಂಬುಲ ಸಮಿತಿದ ಗುರ್ಕಾರೆ ಡಾ.ದೇವಿ ಪ್ರಸಾದ್ ಶೆಟ್ಟಿ ಐಕಳಬಾವ ಒಯಿಸೊಂದು ಪಾತೆರ್ದ್, ಸಮಿತಿ ಮುತಾಲಿಕೆಡ್ ಸೇವಾ ಲೇಸ್ ಲು ಏಪಲ ನಡಪಾಡ್ ಪಂದ್ ಪಂಡೆರ್.

ಈ ಪೊರ್ತುಡು ಮುಕ್ಕ ಶ್ರೀನಿವಾಸ್ ಆಸ್ಪತ್ರೆದ ಎಲು ಬೊಕ್ಕ ಕೀಲ್ ವಿಭಾಗದ ಮುಖ್ಯಸ್ಥೆರ್ ಪ್ರೊ.ಡಾ. ಶಶಿರಾಜ್ ಶೆಟ್ಟಿ, ಕಟೀಲ್ ಪ್ರಾಥಮಿಕ ಆರೋಗ್ಯ ಕೇಂದ್ರದ ವ್ಯೆದ್ಯಾಧಿಕಾರಿ ಡಾ. ಭಾಸ್ಕರ್ ಕೋಟ್ಯಾನ್, ಮುಲ್ಕಿ ವಲಯ ಪತ್ರಕರ್ತ ಸಂಘದ ಗುರ್ಕಾರೆ ನಿಶಾಂತ್‌ ಶೆಟ್ಟಿ, ಕಿನ್ನಿಗೋಳಿ ರೋಟರಿ ಕ್ಲಬ್ ದ ಗುರ್ಕಾರೆ ತ್ಯಾಗರಾಜ್ ಆಚಾರ್ಯ, ಲಯನ್ಸ್ ಕ್ಲಬ್ ದ ಗುರ್ಕಾರ್ದಿ ಹಿಲ್ಡಾ ಡಿಸೋಜ, ಬಸ್ ಮಾಲಕರ ಸಂಘದ ಗುರ್ಕಾರೆ ದುರ್ಗಾಪ್ರಸಾದ ಹೆಗ್ಡೆ, ಏಳಿಂಜೆ ಶ್ರೀದೇವಿ ಮಹಿಳಾ ಬೊಕ್ಕ ಯುವತಿ ಮಂಡಲದ ಗುರ್ಕಾರ್ದಿ ಉಮಾವತಿ ಬೊಕ್ಕ ಕಂಬುಲ ಸಮಿತಿದ ಪದುಕೆರ್ ಚಿತ್ತರಂಜನ್ ಭಂಡಾರಿ ಪಾಲ್ ಪಡೆದಿತ್ತೆರ್.

ಕಂಬುಲ ಸಮಿತಿದ ಸ್ವರಾಜ್ ಶೆಟ್ಟಿ ಎದ್ಕೊನಿಯೆರ್. ಪ್ರಕಾಶ್ ಶೆಟ್ಟಿ ಪಡುಮನೆ ಸೊಲ್ಮೆ ಸಂದಾಯೆರ್. ಶ್ರೀಶ ಸರಾಫ್ ಐಕಳ ಸುಧಾರಿಕೆ ಮಲ್ತೆರ್. ಬೊಕ್ಕ ಮಲ್ಲ ಆರೋಗ್ಯ ಶಿಬಿರ ನಡತ್ಂಡ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 41 ನೇ ಸಂಚಿಕೆ ಜ.8 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ನ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರಾಯಿನ ಆರ್ ಶಿವಕುಮಾರ್ ನಡಪಾದ್ ಕೊರಿಯೆರೆ ಉಲ್ಲೆರ್. ಜ.9 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಜ.10 ಮುಟ್ಟ ಭಾರೀ ಬರ್ಸ ಬರ್ಪಿನ ಅಂದಾಜಿ

ಅರಬ್ಬಿ ಕಡಲ್ ಡ್ ತುಫಾನ್ ಲಕ್ಕಿನೆರ್ದಾವೆರ ಗಾಳಿದ ಚಲನೆಡ್ ವ್ಯತ್ಯಾಸ ಆತ್ಂಡ್. ನೆರ್ದಾವರ ಜ.10 ಮುಟ್ಟ ರಾಜ್ಯದ ಸುಮಾರ್ ಕಡೆಟ್ಟ್ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ತೆರಿಪಾದ್ಂಡ್.

ದಕ್ಷಿಣ ಕನ್ನಡ, ಒಡಿಪು, ಉತ್ತರ ಕನ್ನಡಡ್ ಎಚ್ಚ ಬರ್ಸ ಬರ್ಪಿನ ಅಂದಾಜಿ ಉಂಡು. ಬೆಂಗ್ಲೂರು ನಗರ, ಕೋಲಾರ, ಮಂಡ್ಯ, ಮೈಸೂರು, ತುಮಕೂರು ಜಿಲ್ಲೆಡ್ ಸಾಧಾರಣ ಬರ್ಸ ಬರ್ಪುಂಡು.

ಶಿವಮೊಗ್ಗ, ಚಿಕ್ಕಮಗಳೂರು ಹಾಸನ ಸೇರಿನಂಚೆನೆ ಮಲೆನಾಡು ಪ್ರದೇಶಡ್ ಬರ್ಸ ಬರ್ಪುಂಡು ಪಂದ್ ತೆರಿದ್ ಬೈದ್ಂಡ್.

ಚಿತ್ರನಟೆ ಯಶ್ ನ ಪುಟ್ಟುಪರ್ಬದ ಬ್ಯಾನರ್ ಕಟ್ ನಗ ಕರೆಂಟ್ ಹಾಕ್ ದ್ ತೀರ್ ಪೋಯೆರ್ 3 ಜವನೆರ್

ಚಿತ್ರನಟೆ ಯಶ್ ನ ಪುಟ್ಟುಪರ್ಬದ ಲೆಕ್ಕೊಡು ಬ್ಯಾನರ್ ಕಟ್ ನಗ ಕರೆಂಟ್ ಹಾಕ್ ದ್ 3 ಜನ ಜವನೆರ್ ತೀರ್ ಪೋಯಿನ ಘಟನೆ ಗದಗ ಜಿಲ್ಲೆದ ಲಕ್ಷ್ಮೇಶ್ವರದ ಸೂರಣಗಿಡ್ ನಡತ್ಂಡ್.

ಈ ಘಟನೆಡ್ ತೀರ್ ಪೋಯಿನಕುಲು ಹನುಮಂತ ಹರಿಜನ, ಮುರಳಿ ನಡುವಿನಮನಿ ಬೊಕ್ಕ ನವೀನ ಪಂದ್ ತೆರಿದ್ ಬೈದ್ಂಡ್.

ಅಂಚೆನೆ ಈ ಘಟನೆಡ್ ಮಂಜುನಾಥ್, ದೀಪಕ್ ಬೊಕ್ಕ ಪ್ರಕಾಶ್ ಗ್ ಪೆಟ್ಟಾತ್ಂಡ್. ಮೊಕ್ಲೆನ್ ‌ಕೈತಲ್ದ ಆಸ್ಪತ್ರೆಗ್ ದಾಖಲ್ ಮಲ್ದೆರ್.

ರಾಜ್ಯಮಟ್ಟದ ಕರಾಟೆ ಪಂತೊಡು ಅಮರ್ ಜೋಕ್ಲೆನ ಎಡ್ಡೆ ಸಾಧನೆ

ಮೂಲ್ಕಿ: ಕೆರೆಕಾಡು “ನಮ್ಮನೆ” ಇಲ್ಲದ ಅಮರ್ ಜೋಕುಲಾಯಿನ ನವೀಶ್ ಎನ್. ಪೂಜಾರಿ ಬೊಕ್ಕ ನಮಿಷಾ ಎನ್. ಪೂಜಾರಿ ಮೊಕುಲು ಕುಡ್ಲ ಮಂಗಳಾದೇವಿದ ಖಾಸಗಿ ಶಾಲೆಡ್ ಐತಾರ ನಡತಿನ ರಾಜ್ಯಮಟ್ಟದ ಕರಾಟೆ ಸ್ಪರ್ಧೆ ಎಡ್ಡೆ ಸಾಧನೆ ಮಲ್ದೆರ್.

ನವೀಶ್ ಮೇರ್ “ಕುಮಿಟೆ” ವಿಭಾಗಡ್ ಬಂಗಾರ್ ದ ಪದಕ ಅಂಚೆನೆ “ಕಟಾ” ವಿಭಾಗಡ್ ಬೊಳ್ಳಿದ ಪದಕ ಗೆಂದ್ ದೆರ್ ನಮಿಷಾ ಮೇರ್ ಕುಮಿಟೆ ಬೊಕ್ಕ ಕಟಾ ರಡ್ಡ್ ವಿಭಾಗದ ಪಂತೊಡುಲ ಕಂಚಿದ ಪದಕ ಪಡೆತೆರ್.

ಮುಖ್ಯ ಶಿಕ್ಷಕೆರ್ ಈಶ್ವರ ಕಟೀಲು ಅಂಚೆನೆ ಶಿಕ್ಷಕೆರ್ ನಾಗರಾಜ್ ಕುಲಾಲ್ ಕುಬೆವೂರು ಮೊಕ್ಲೆರ್ದ್ ತರಬೇತಿ ಪಡೆಯೊಂದುಲ್ಲೆರ್.

ನವೀಶ್ ಬೊಕ್ಕ ನಮಿಷಾ ಮೊಕುಲು ಪತ್ರಕರ್ತೆ, ರಂಗಭೂಮಿ ಕಲಾವಿದೆ ನರೇಂದ್ರ ಕೆರೆಕಾಡು ಅಂಚೆನೆ ತೋಕೂರು ನಿಟ್ಟೆ ಶಿಕ್ಷಣ ಸಂಸ್ಥೆದ ಡಾ.ರಾಮಣ್ಣ ಶೆಟ್ಟಿ ಆಂಗ್ಲ ಮಾಧ್ಯಮ ಶಾಲೆದ ಸಹ ಶಿಕ್ಷಕಿ ಉಷಾ ಪೂಜಾರ್ತಿ ದಂಪತಿನ ಜೋಕುಲು. ಇರುವೆರ್ಲ ಕಿಲ್ಪಾಡಿ ಬೆಥನಿ ಆಂಗ್ಲ ಮಾಧ್ಯಮ ಶಾಲೆಯ 4ನೇ ತರಗತಿಡ್ ಕಲ್ತೊಂದುಲ್ಲೆರ್.

ಜ.9: ಕಾರ್ಲ ಶ್ರೀ ರಾಮಾಂಜನೇಯ ಭಜನಾ ಮಂದಿರಡ್ ಇರುಮುಡಿ, ಶಬರಿಮಲೆ ಯಾತ್ರೆ

ಪೆರ್ನೆದ ಕೊರತಿಕಟ್ಟೆ ಅಯ್ಯಪ್ಪ ಭಕ್ತ ವೃಂದದ ಮುತಾಲಿಕೆಡ್ ಕಾರ್ಲ ಶ್ರೀ ರಾಮಾಂಜನೇಯ ಭಜನಾ ಮಂದಿರಡ್ ಜ.9 ಅಂಗಾರೆ ಇರುಮುಡಿ ಕಟ್ಟ್ ದ್ ಶಬರಿಮಲೆ ಯಾತ್ರೆ ನಡಪರೆ ಉಂಡು.

ಈ ಲೇಸ್ ಅಯ್ಯಪ್ಪ ವೃತಾಧಾರಿ ಗುರುಸ್ವಾಮಿ ರಮಾನಂದ ಮೆರೆನ ಮಾರ್ಗದರ್ಶನಡ್ ನಡಪುಂಡು.

ಬೊಲ್ಪುಗು ಇರುಮುಡಿ ಕಟ್ಟಿಯೆರೆ, ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ರಾತ್ರೆ ಅಪ್ಪ ಸೇವೆ, ಪಂದಳ ಪೂಜೆ, ಪ್ರಸಾದ ಪಟ್ಟುನ ಲೇಸ್, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಪೆರ್ನೆದ ಕೊರತ್ತಿಕಟ್ಟೆ ಅಯ್ಯಪ್ಪ ಭಕ್ತವೃಂದದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಕುಮಾರಧಾರ ಪರಿಸರ ಸ್ವಚ್ಛತೆ ಮಲ್ತಿನ ಡಾ.ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್

ಸುಬ್ರಹ್ಮಣ್ಯ: ಸುಬ್ರಹ್ಮಣ್ಯದ ಡಾ.ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದಕುಲು ಜ.7 ಐತಾರ ಕುಮಾರಧಾರ ಸುತ್ತಮುತ್ತದ ಪರಿಸರನ್ ಸ್ವಚ್ಛತೆ ಮಲ್ತೆರ್.

ಶ್ರೀ ಕ್ಷೇತ್ರಗ್ ಮಸ್ತ್ ಸಂಖ್ಯೆಡ್ ಭಕ್ತಾದಿಲು ಬರೊಂದು ಉಲ್ಲೆರ್. ದೇವೆರೆನ ದರ್ಶನ ಪಡೆವೊಂದು ಉಲ್ಲೆರ್. ಆಂಡ ದೂರದ ಊರುರ್ದ್ ಬೇತೆ ಬೇತೆ ಕ್ಷೇತ್ರಲೆರ್ದ್ ಗಾಡಿಡ್ ಬರ್ಪುನ ಭಕ್ತಾದಿಲು ಮಾರ್ಗದ ಬರಿಟ್ಟ್ ಕಜವು, ಪ್ಲಾಸ್ಟಿಕ್ ಬಾಟಲಿ, ನೀರ್ ದ ಕ್ಯಾನ್, ತೆನಸ್ ದ ಡಬ್ಬಿನ್ ದಕ್ಕ್ ದ್ ಇಡೀ ಪರಿಸರನ್ ಮಾಲಿನ್ಯ ಮಲ್ತೊಂದು ಉಲ್ಲೆರ್. ಉಂದೆನ್ ತೂಯಿನ ಡಾ. ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಸಂಸ್ಥಾಪಕೆರ್ ಡಾ. ರವಿ ಕಕ್ಕೆಪದವು ಬೊಕ್ಕ ಸಮಾಜ ಸೇವಾ ಟ್ರಸ್ಟ್ ದಕುಲು ತನ್ನ ಸ್ವಯಂಸೇವಕೆರೆನೊಟ್ಟಿಗೆ ಸ್ವಚ್ಛತೆದ ಬೇಲೆ ಮಲ್ತೆರ್. ಈ ಪೊರ್ತುಡು ಸ್ವಚ್ಛತೆದ ಜಬದಾರಿನ್ ಒಯಿಸೊನ್ನ ಜನಾರ್ಧನ್ ಗೌಡ ಮೆರೆಗ್ ಸನ್ಮಾನ ಮಲ್ತೆರ್.