January 1, 2024

ಜ.9: ಮಂಕುಡೆ ಶ್ರೀ ಧರ್ಮಶಾಸ್ತಾವು ಭಕ್ತವೃಂದದ ಇರುಮುಡಿ ಕಟ್ಟುನ ಲೇಸ್, ಆಟ

ಮಂಕುಡೆ ಶ್ರೀ ಧರ್ಮಶಾಸ್ತಾವು ಭಕ್ತವೃಂದದ ಇರುಮುಡಿ ಕಟ್ಟುನ ಲೇಸ್ ಬೊಕ್ಕ ಆಟ ಜ.9 ಮಂಕುಡೆ ಮಹಾವಿಷ್ಣುಮೂರ್ತಿ ದೇವಲ್ಯಡ್ ನಡಪರೆ ಉಂಡು.

ಆನಿ ಬೊಲ್ಪುಗು ಇರುಮುಡಿ ಕಟ್ಟಿಯೆರೆ, ಮಧ್ಯಾಹ್ನ ಮಹಾ ಮಂಗಳಾರತಿ, ಪ್ರಸಾದ ಪಟ್ಟಿಯೆರೆ ಬೊಕ್ಕ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಶ್ರೀ ದೇವಿ ಮಹಾತ್ಮೆ ಆಟ ಬೊಕ್ಕ ಮನಾದಾನಿ (ಜ.10) ಬೊಲ್ಪುಗು ಯಾತ್ರೆ ಪಿದಾಡುಂಡು.

ಈ ಲೇಸ್ ಗ್ ಭಕ್ತೆರ್ ಮಾತೆರ್ಲಾ ಬತ್ತ್ ದ್, ಶ್ರೀ ಸ್ವಾಮಿನ ಯಾತ್ರೆ ಪೊರ್ಲುಡು ಆವಡ್ ಪಂದ್ ಆಶೀರ್ವಾದ ಮಲ್ತ್ ದ್, ಶ್ರೀ ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಮಂಕುಡೆ ಶ್ರೀ ಧರ್ಮಶಾಸ್ತಾವು ಭಕ್ತವೃಂದದ ಗುರುಸ್ವಾಮಿ, ಶಿಷ್ಯವೃಂದದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ನಿಟ್ಟೆ ಮಾತೃಜಾ ಸೇವಾ ಸಿಂಧು ಕೂಟದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ 61 ಸಾರ ರೂ. ಪನವುದ ಸಕಾಯ

ನಿಟ್ಟೆ ಮಾತೃಜಾ ಸೇವಾ ಸಿಂಧು ಕೂಟದಕುಲು 17ನೇ ಸೇವಾ ಯೋಜನೆದ ಮುಕೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.

ಕಿನ್ನಿಗೋಳಿದ ಪೂಜಿತ್ ಶೆಟ್ಟಿಗಾರ್ ಪನ್ಪುನ 6 ತಿಂಗೊಲ್ದ ಬಾಲೆಗ್ ಕಣ್ಣ್ ದ ಕ್ಯಾನ್ಸರ್ ಉಂಡು.

ಇತ್ತೆ ಬೆಂಗ್ಲೂರುದ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಂಡು. ಈ ಬಾಲೆದ ಚಿಕಿತ್ಸೆಗ್ ಸುಮಾರ್ 15 ಲಕ್ಷ ರೂ. ದ ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್ ಆಂಡ ಆತೊಂಜಿ ಕಾಸ್ ಒಟ್ಟು ಮಲ್ಪರೆ ಆವಂದಿನ ಕಾರಣ ನಿಟ್ಟೆ ಮಾತೃಜಾ ಸೇವಾ ಕೂಟಗ್ ಬಿನ್ನಾಪು ಸಂದಾದೆರ್. ಈ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ ಡಿ.18 ಕ್ಕ್ ನಡತಿನ ಷಷ್ಠಿ ಮಹೋಚ್ಚಯಡ್ ನಿಧಿ ಸಂಗ್ರಹಣೆ ಮಲ್ತೆರ್. ಅವೆಟ್ಟ್ ಸಂಗ್ರಹ ಆಯಿನ 61 ಸಾರ ರೂ. ನ್ ಇನಿ ಕಾರ್ಲ ಶ್ರೀ ಮಾರಿಯಮ್ಮ ದೇವಲ್ಯಡ್ ಕೂಟದ ಸದಸ್ಯೆರೆನ ಸಮ್ಮುಖಡ್ ಕುಟುಂಬಗ್ ಕೊರಿಯೆರ್.

ಇನಿ ಅತ್ತೂರು ಶ್ರೀ ಕ್ಷೇತ್ರ ಪರ್ಪಲೆಗಿರಿ ಪುನರುತ್ಥಾನದ ವಿಜ್ಞಾಪನಾ ಪತ್ರ ಬುಡುಗಡೆ ಲೇಸ್

ಒಡಿಪು: ಕಾರ್ಲ ಶ್ರೀ ಕ್ಷೇತ್ರ ಅತ್ತೂರು ಕೃಷ್ಣಗಿರಿ ಕಲ್ಕುಡ ದೈವೊಲ್ಯ ಟ್ರಸ್ಟ್ (ರಿ.) ಬೊಕ್ಕ ಶ್ರೀ ಕ್ಷೇತ್ರ ಅತ್ತೂರು ಪರ್ಪಲೆಗಿರಿ ಪುನರುತ್ಥಾನ ಸಮಿತಿದ ಒಟ್ಟುಸೇರಿಗೆಡ್ ಶ್ರೀ ಕ್ಷೇತ್ರ ಪರ್ಪಲೆಗಿರಿ ಪುನರುತ್ಥಾನದ ವಿಜ್ಞಾಪನಾ ಪತ್ರ ಬುಡುಗಡೆ ಲೇಸ್ (ಇನಿ) ಜ.1 ಸೋಮಾರ ಬಯ್ಯಗ್ ಅತ್ತೂರು ಶ್ರೀ ಕ್ಷೇತ್ರ ಪರ್ಪಲೆಗಿರಿಟ್ಟ್ ನಡಪರೆ ಉಂಡು.

ಈ ಲೇಸ್ ಮಾತ ಹಿಂದೂ ಭಾಂದವೆರ್ ಪಾಲ್ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಜ.6: ಮಿಯ್ಯಾರ್ ಲವ-ಕುಶ ಬಯಲು ಕಂಬುಲ

ಮಿಯ್ಯಾರ್ ಲವ-ಕುಶ ಬಯಲು ಕಂಬುಲ ಜ.6 ಸನಿಯಾರ ನಡಪರೆ ಉಂಡು.

ಈ ಲೇಸ್ ಡ್ ಕಂಬುಲ ಕ್ರೀಡಾ ಅಭಿಮಾನಿಲು, ಕಂಬುಲ ಕೂಟಡ್ ಪಾಲ್ ಪಡೆಪುನ ಮಾತ ಕೂಟದಕುಲು ಪಾಲ್ ಪಡೆವೊಡು ಪಂದ್ ಕಂಬುಲ ಸಮಿತಿದ ಗುರ್ಕಾರೆ, ಕಾರ್ಲ ಶಾಸಕೆರ್ ಸುನಿಲ್ ಕುಮಾರ್ ಲೆಪ್ಪೋಲೆಡ್ ತೆರಿಪಾದೆರ್.

ಪ್ರಸಂಗಕರ್ತೆರ್ ಅಗರಿ ಭಾಸ್ಕರ ರಾವ್ ನನ ನೆಂಪು ಮಾತ್ರ

ವೃತ್ತಿಡ್ ಇಂಜಿನಿಯರ್ ಆಯಿನ ಕಲೆ-ಸಾಹಿತ್ಯಾಸಕ್ತಿರ್ದ್ 30 ರ್ದ್ ಎಚ್ಚ ಪ್ರಸಂಗನ್ ಯಕ್ಷಗಾನ ಕ್ಷೇತ್ರಗ್ ಕೊರ್ನ ಅಗರಿ ಭಾಸ್ಕರ ರಾವ್ (76) ಬೆಂಗ್ಲೂರುಡು ದೇವೆರೆ ಪಾದೊ ಸೇರಿಯೆರ್.

ಯಕ್ಷಗಾನದ ಪುಗರ್ತೆದ ಭಾಗವತೆರಾಯಿನ ಅಗರಿ ಶ್ರೀನಿವಾಸ ಭಾಗವತೆರೆನ ಮಗೆ ಹಿರಿಯೆರಾಯಿನ ರಘುರಾಮೆರ್ ಪುಗರ್ತೆದ ಭಾಗವತೆರಾಂಡ ಅಮ್ಮೆರ್ ನ ಕುಡೊಂಜಿ ಪ್ರವೃತ್ತಿ ಆಯಿನ ಪ್ರಸಂಗ ರಚನೆನ್ ಮೇರ್ ದುಂಬರಿಸಾದ್ ಸುಮಾರ್ ಪ್ರಸಂಗನ್ ಬರೆತೆರ್.

ಶ್ರೀ ವಿಶ್ವಕರ್ಮ ಮಹಾತ್ಮೆ, ಶ್ರೀಹರಿ ಲೀಲಾರ್ಣವ, ಶ್ರೀದೇವಿ ತ್ರಿಕರ್ಣೇಶ್ವರೀ ಮಹಾತ್ಮೆ, ಶ್ರೀ ಗುಂಡುಬಾಳ ಕ್ಷೇತ್ರ ಮಹಾತ್ಮೆ, ರಾಣೀ ಅಪ್ರಮೇಯಿ ಸೇರಿನಂಚೆನೆ ಮೆರೆನ ಸುಮಾರ್ ಪ್ರಸಂಗಲು ರಂಗಡ್ ಪ್ರದರ್ಶನ ಆತ್ಂಡ್. ತುಳು ಭಾಷೆಡ್ಲಾ ಪ್ರಸಂಗ ರಚನೆ ಮಲ್ದೆರ್. 2018 ಟ್ಟ್ ‘ಯಕ್ಷಗಾನ ಪ್ರಸಂಗ ದಶಕ’ ಶೀರ್ಷಿಕೆಡ್ ಡಾ.ಪಾದೆಕಲ್ಲು ವಿಷ್ಣು ಭಟ್ರೆನ ಸಂಪಾದಕತ್ವಡ್ ಒಡಿಪುದ ಶೇವಧಿ ಪ್ರಕಾಶನರ್ದ್ ಪತ್ತ್ ಪ್ರಸಂಗಲು ಪ್ರಕಟ ಆದಿತ್ತ್ಂಡ್‌. ಅವೆನ್ ಮಾರಿನೆರ್ದ್ ಬತ್ತಿನ ಕಾಸ್ ನ್ ಕಲಾವಿದೆರೆನ ಕ್ಷೇಮ ಚಿಂತನೆಗ್ ಕೆಲಸ ಮಲ್ಪುನ ಒಡಿಪುದ ಯಕ್ಷಗಾನ ಕಲಾರಂಗಗ್ ಕೊರ್ತೆರ್.

ಮೆರೆಗ್ ಬೊಡೆದಿ, ಮಗೆ, ಮಗಲ್ ಉಲ್ಲೆರ್‌.

ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ರ್ದ್ ಕುಕ್ಕೆ ಆದಿ ಸುಬ್ರಹ್ಮಣ್ಯದಲ್ಪ ಸ್ವಚ್ಛತೆದ ಬೇಲೆ

ಸುಬ್ರಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯಡ್ ನಡತಿನ ವರ್ಷದ ಜಾತ್ರೆದ ಬೊಕ್ಕ ಅಲ್ಪಲ್ಪ ಬೂರ್ದಿತ್ತಿನ ಕಜವುನ್ ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದಕುಲು ಐತಾರ ಪೆಜಿದ್ ಇಡೀ ಪರಿಸರನ್ ಸ್ವಚ್ಛ ಮಲ್ತೆರ್.

ಜಾತ್ರೆದಾನಿ ಬೇರದಕುಲು ಬೊಕ್ಕ ಸಾರ್ವಜನಿಕೆರ್ ಅಲ್ಪಲ್ಪ ಕಜವು ಪಾಡ್ದಿತ್ತೆರ್. ಇಡೀ ಪರಿಸರಡ್ ಕಜವು ದಿಂಜಿದ್ ಇತ್ತ್ಂಡ್. ಅಲ್ಪಲ್ಪ ಪ್ಲಾಸ್ಟಿಕ್ ಬಾಟ್ಲಿ, ತೊಟ್ಟೆ, ತೊಟ್ಟಿಲ್ ಬೊಕ್ಕ ತೆನಸ್ ದ ಮೂಟೆಲು ಇತ್ತ್ಂಡ್. ಕೆಲವು ಕಡೆಟ್ಟ್ ವಾಸನೆಲ ಬರೊಂದು ಇತ್ತ್ಂಡ್. ಉಂದೆನ್ ತೂಯಿನ ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಸಂಸ್ಥಾಪಕೆರ್ ಡಾ| ರವಿ ಕಕ್ಕೆಪದವು ಬೊಕ್ಕ ಆರೆನ ಸುಮಾರ್ 60 ಸ್ವಯಂಸೇವಕೆರ್ ಜನಾರ್ಧನ ಗೌಡ ಮೆರೆನ ಮುತಾಲಿಕೆಡ್ ಇಡೀ ಪರಿಸರನ್ ಸ್ವಚ್ಛ ಮಲ್ತೆರ್.

ಅಂಚೆನೆ ಕ್ಷೇತ್ರಗ್ ಬರ್ಪುನ ಭಕ್ತೆರ್ ಏರ್ಲಾ ಕಜವು, ಪ್ಲಾಸ್ಟಿಕ್ ಬಾಟ್ಲಿ, ಚೀಲದ ಪಟ್ಟಣನ್ ಅಲ್ಪಲ್ಪ ಪಾಡೊರ್ಚಿ. ಕೈತಲ್ ಇಪ್ಪುನ ಡಸ್ಟ್ ಬಿನ್ ಡ್ ಪಾಡೊಡು. ಎಲ್ಯ ಕಜವು, ಪ್ಲಾಸ್ಟಿಕ್ ನ್ ತನ್ನ ಬ್ಯಾಗ್ ಡ್ ಪಾಡೊಂದು ಒಲ್ಪಾಂಡಲ ಕಜವುದ ಬುಟ್ಟಿಗ್ ಪಾಡೊಡು ಪಂದ್ ಮೊಕುಲು ಬಿನ್ನಾಪು ಮಲ್ದೆರ್. ಅತ್ತಂದೆ ಒಲ್ಪ ಸ್ವಚ್ಛತೆ ಇಪ್ಪುಂಡು ಅಲ್ಪ ದೇವೆರೆನ ಸಾನಿಧ್ಯ ಉಂಡು. ದೇವೆರೆನ ಪಾವಿತ್ರತೆನ್ ಮಾತೆರ್ಲಾ ಕಾಪಾಡೊಂದು ಬರೊಡು ಪಂದ್ ಪಂಡೆರ್.

ಕುಡ್ಲ ಕಂಬುಲದ ರಿಸಲ್ಟ್

ಬಂಗ್ರಕೂಳೂರು: ಕುಡ್ಲ “ರಾಮ- ಲಕ್ಷ್ಮಣ” ಜೋಡುಕರೆ ಕಂಬುಲ ಡಿ‌.30 ಕ್ಕ್ ನಡತ್ಂಡ್.

ಈ ಕಂಬುಲ ಕೂಟಡ್ ಗೆಂದಿನಕ್ಲೆನ ಪೊಲಬು ಇಂಚ ಉಂಡು.

ಕನೆಪಲಯಿ: 8 ಜತೆ
ಅಡ್ಡಪಲಯಿ: 4 ಜತೆ
ಬಲ್ಲ್ ದ ಮಲ್ಲ: 22 ಜತೆ
ನಾಯೆರ್ ದ ಮಲ್ಲ: 29 ಜತೆ
ಬಲ್ಲ್ ದ ಎಲ್ಯ: 26 ಜತೆ
ನಾಯೆರ್ ದ ಎಲ್ಯ: 81 ಜತೆ
ಒಟ್ಟು ಎರ್ಲೆನ ಸಂಖ್ಯೆ: 170 ಜತೆ ಇತ್ತ್ಂಡ್.

ಕನೆಪಲಯಿ: (ನೀರ್ ತೂದು ಇನಾಮು)
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಬೈಂದೂರು ಮಹೇಶ್ ಪೂಜಾರಿ
ರಡ್ಡನೇ ಇನಾಮು: ಬೇಲಾಡಿ ಬಾವ ಅಶೋಕ್ ಶೆಟ್ಟಿ
ಪಲಯಿ ಮುಟ್ಟಿನಾರ್: ತೆಕ್ಕಟ್ಟೆ ಸುಧೀರ್ ದೇವಾಡಿಗ

ಅಡ್ಡ ಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಸಾವ್ಯ ಗಂಗಯ್ಯ ಪೂಜಾರಿ
ರಡ್ಡನೇ ಇನಾಮು: ಮಂಗಳೂರು ಕಂಬಳಾಭಿಮಾನಿ ವಕೀಲ ವೃಂದ
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್

ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಎ”
ಗಿಡತಿನಾರ್: ಬಂಬ್ರಾಣಬೈಲು ವಂದಿತ್ ಶೆಟ್ಟಿ
ರಡ್ಡನೇ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಸಿ”
ಗಿಡತಿನಾರ್: ಕಾವೂರು ದೋಟ ಸುದರ್ಶನ್

ಬಲ್ಲ್ ದ ಎಲ್ಯ:
ಸುರುತ್ತ ಇನಾಮು: ಸುರತ್ಕಲ್ ಪಾಂಚಜನ್ಯ ಯೋಗಿಶ್ ಪೂಜಾರಿ
ಗಿಡತಿನಾರ್: ಮಾಸ್ತಿಕಟ್ಟೆ ಸ್ವರೂಪ್
ರಡ್ಡನೇ ಇನಾಮು: ಸಾಲಿಗ್ರಾಮ ಕಾರ್ಕಡ ಪುಟ್ಟು ಹೊಳ್ಳರಮನೆ ನಟರಾಜ್ ಹೊಳ್ಳ
ಗಿಡತಿನಾರ್: ಪಣಪಿಲ ಪ್ರವೀಣ್ ಕೋಟ್ಯಾನ್

ನಾಯೆರ್ ದ ಮಲ್ಲ:
ಸುರುತ್ತ ಇನಾಮು: ಬೋಳದಗುತ್ತು ಸತೀಶ್ ಶೆಟ್ಟಿ “ಬಿ”
ಗಿಡತಿನಾರ್: ಬೈಂದೂರು ವಿಶ್ವನಾಥ ದೇವಾಡಿಗ
ರಡ್ಡನೇ ಇನಾಮು: ಹೊಸ್ಮಾರ್ ಸೂರ್ಯಶ್ರೀ ರತ್ನ ಸದಾಶಿವ ಶೆಟ್ಟಿ “ಎ”
ಗಿಡತಿನಾರ್: ಬೈಂದೂರು ಮಂಜುನಾಥ ಗೌಡ

ನಾಯೆರ್ ದ ಎಲ್ಯ:
ಸುರುತ್ತ ಇನಾಮು: ಕಟೀಲ್ ಕಿನ್ನಿಗೋಳಿ ಪ್ರಖ್ಯಾತ್ ಪ್ರಣೀತ್ ಶೆಟ್ಟಿ
ಗಿಡತಿನಾರ್: ಮಾಸ್ತಿಕಟ್ಟೆ ಸ್ವರೂಪ್
ರಡ್ಡನೇ ಇನಾಮು: ಮೂಡುಬೆಳ್ಳೆ ಜವನೆರ್
ಗಿಡತಿನಾರ್: ಹೀರೆಬೆಟ್ಟು ಪ್ರದೀಪ್

ಬೈಕ್‌ ಸ್ಕಿಡ್‌ ಆದ್ ತೀರ್ ಪೋಯಿನ ನಾಟಕ ಕಲಾವಿದೆ!!!

ಬಂಟ್ವಾಳ: ನಾಟಕ ಕಲಾವಿದೆಯೊರಿ ಬೈಕ್‌ ಸ್ಕಿಡ್‌ ಆದ್ ಬೂರ್ದು ಜಾಗೆಡೇ ತೀರ್ ಪೋಯಿನ ಘಟನೆ ವಗ್ಗ ಕೈತಲ್ದ ಕೊಡ್ಯಮಲೆಡ್ ನಡತ್ಂಡ್.

ಬಂಟ್ವಾಳ ತಾಲೂಕ್ ದ ದೇವಶ್ಯಪಡೂರು ಗ್ರಾಮದ ಮುರಾಯಿದೊಟ್ಟು, ನೂಜೆ ದಿ.ಬೇಬಿ ಮೆರೆನ ಮಗೆ ಗೌತಮ್‌ (26) ಈ ಘಟನೆಡ್ ತೀರ್ ಪೋಯಿನಾರ್.

ಬೆದ್ರ ಪಿಂಗಾರ ಕಲಾವಿದೆರ್‌ ಕೂಟದ ಕಲಾವಿದೆರಾಯಿನ ಮೇರ್ ಡಿ.30 ಕ್ಕ್ ಬೆಳುವಾಯಿಡ್ ಕದಂಬ ನಾಟಕ ಮುಗಿತ್ ದ್ ಇಲ್ಲಗ್ ಬನ್ನಗ ಈ ಘಟನೆ ನಡತ್ಂಡ್.

ಬೊಲ್ಪುಗು ತಾದಿಡ್ ಪೋಪುನಕುಲು ತೂದು ಪೊಲೀಸೆರೆಗ್ ತೆರಿಪಾದೆರ್. ಟ್ರಾಫಿ ಎಸ್‌.ಐ.ಸುತೇಶ್‌ ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್.

ಇನಿ ಮೀರಾ ಗಾಂವ್ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಶ್ರೀ ಸಾರ್ವಜನಿಕ ಸತ್ಯ ನಾರಾಯಣ ಮಹಾಪೂಜೆ

ಮೀರಾ ಗಾಂವ್ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಶ್ರೀ ಸಾರ್ವಜನಿಕ ಸತ್ಯ ನಾರಾಯಣ ಮಹಾಪೂಜೆ ಜ.1 ಸೋಮಾರ (ಇನಿ) ಬಯ್ಯಗ್ ಗೌಜಿಡ್ ನಡಪರೆ ಉಂಡು.

ಅಂಚೆನೆ ಶ್ರೀ ಮಹಾಲಿಂಗೇಶ್ವರ ಮಹಿಳಾ ಭಜನಾ ಮಂಡಳಿದಕ್ಲೆರ್ದ್ ಭಜನೆ ಆದ್ ತೀರ್ಥಪ್ರಸಾದ, ಅನ್ನದಾನ ಸೇವೆ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಪ್ರಸಾದ ದೆತೊಂದು ಶ್ರೀ ಮಹಾಲಿಂಗೇಶ್ವರ ದೇವೆರೆನ ಬೊಕ್ಕ ಶ್ರೀ ಸತ್ಯನಾರಾಯಣ ದೇವೆರೆನ ಕೃಪೆಗ್ ಪಾತ್ರರಾವೊಡು, ಅಂಚೆನೆ ಪೂಜೆ ಮಲ್ಪಪಾವುನಕುಲು ಬಯ್ಯಗ್ 5.30 ತ್ತೊಲಯಿ ಬತ್ತ್ ದ್ ಮಲ್ಪಾವೊಡು ಪಂದ್ ಸ್ಥಾಪಕೆರ್ ದಿ. ವಿಶ್ವನಾಥ್ ಪೂಂಜ, ಕೃಷ್ಣ ಶೆಟ್ಟಿ, ಟ್ರಸ್ಟಿಲು ಬಾಬಾ ರಂಜನ್ ಶೆಟ್ಟಿ, ಸಾಣೂರು ಸಾಂತಿಂಜ ಜನಾರ್ಧನ ಭಟ್, ಮಾಧವ ಭಟ್, ಪ್ರಧಾನ ಅರ್ಚಕೆರ್, ಸಮಿತಿ ಸದಸ್ಯೆರ್, ಶ್ರೀ ಮಹಾಲಿಂಗೇಶ್ವರ ಟ್ರಸ್ಟ್ ದಕುಲು, ಮೀರಾ ಸೊಸೈಟಿ ಸರ್ವಸದಸ್ಯೆರ್ ತೆರಿಪಾದೆರ್.