November 2023

ಡಿ.1: ಅಲಂಗಾರು, ಪೆರ್ಡೂರು ಶ್ರೀ ಬ್ರಹ್ಮಬೈದರ್ಕಳ ಗರಡಿಡ್ ಕಾಯಿದ ಪೂಜೆ

ಪೆರ್ಡೂರು: ಅಲಂಗಾರು, ಪೆರ್ಡೂರು ಶ್ರೀ ಬ್ರಹ್ಮಬೈದರ್ಕಳ ಗರಡಿಡ್ ಕಾಯಿದ ಪೂಜೆ ಡಿ.1 ಸುಕ್ರಾರ ನಡಪರೆ ಉಂಡು.

ರಾತ್ರೆ ಶ್ರೀ ನೀಲಾವರ ಮೇಳದಕ್ಲೆರ್ದ್ ಪೊಸ ಪ್ರಸಂಗದ ಆಟ ನಡಪರೆ ಉಂಡು.

ಪಂಜಿ ಸಾಂಕುನ ರೈತೆರೆಗ್ ಸಂಕಷ್ಟ

ಕರಿನ ವರ್ಷೊದಿಂಚ ಆಫ್ರಿಕನ್, ಪಂಜಿಜ್ವರ ಇಪ್ಪುನೆರ್ದಾವರ ಕರ್ನಾಟಕಡ್ ಪಂಜಿಲೆನ ಬುಲೆವಣಿಗೆ ಕಮ್ಮಿ ಆತ್ಂಡ್.

ಪಂಜಿ ಸಾಂಕುನ ರೈತೆರ್ ನೆರ್ದ್ ಮಸ್ತ್ ಸಂಕಷ್ಟಡ್ ಉಲ್ಲೆರ್. ಪಂಜಿ ಮಾಸದ ಮಾರ್ಕೆಟ್ ಡ್ ಪಂಜಿಲೆನ ಸಂಖ್ಯೆ ಕಮ್ಮಿ ತೋಜೊಂದು ಉಂಡು. ಸಾಂಕುನ ಬಿಲೆ ಎಚ್ಚ ಆತ್ಂಡ್. ಇಂಚಾದ್ ಕುಡ್ಲ, ಪುತ್ತೂರ್, ಸುಳ್ಯ ಜಿಲ್ಲೆ ಇಡೀ ಪಂಜಿ ಮಾಸದ ಬಿಲೆ ಎಚ್ಚಾತ್ಂಡ್. ಕೆಜಿಗ್ 280 ರೂ. ಹೋಲ್ ಸೇಲ್ ಗ್ 250 ರೂ. ಬೊಕ್ಕ ಜೀವದ ಪಂಜಿಗ್ 30 ದ ಲೆಕ್ಕ ಉಂಡು.

ಕರಿನ 3 ವರ್ಷೊದಿಂಚ ಪಂಜಿ ಮಾಸದ ಬಿಲೆ ಎಚ್ಚಾಯಿರ್ನೆದಾವರ ಪಂಜಿ ಮಾಸ ಮಾರುನ ಅಂಗಡಿ ಮಾಲೀಕೆರ್, ಗ್ರಾಹಕೆರ್ ಸ್ಪಂದಿಸಾವೊಡು ಪಂದ್ ರೈತ ಮುಖಂಡೆರ್ ವೆಂಕಟೇಶ್ ಸುಳ್ಯ, ಆನಂದ ಈಶ್ವರಮಂಗಲ ಮೊಕುಲು ಪ್ರತಿಕೆಡ್ ತೆರಿಪಾದೆರ್.

ಮುಲ್ಕಿ ಸೀಮೆ ಅರಸು ಕಂಬುಲದ ಜರ್ಸಿ ಬುಡುಗಡೆ

ಮುಲ್ಕಿ ಸೀಮೆ ಅರಸು ಕಂಬುಲದ ಲೆಕ್ಕೊಡು ಮುಲ್ಕಿ ಅರಮನೆ ವೆಲ್ಫೇರ್ ಆಂಡ್ ಚಾರಿಟೇಬಲ್ ಟ್ರಸ್ಟ್ ದ ಮುತಾಲಿಕೆಡ್ ಜರ್ಸಿ ಟಿಶರ್ಟ್ ನ್ ಮುಲ್ಕಿ ಸೀಮೆ ಅರಸು ಎಂ. ದುಗ್ಗಣ್ಣ ಸಾವಂತೆರೆನ ಉಪಸ್ಥಿತಿಡ್ ಭಾರತ್ ಕೋ ಆಪರೇಟಿವ್ ಬ್ಯಾಂಕ್ ದ ಚೇರ್ ಮ್ಯಾನ್‌ ಸೂರ್ಯಕಾಂತ್ ಸುವರ್ಣ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಬೋಲಂಬಳ್ಳಿ ಶ್ರೀ ಪದ್ಮಾವತಿ ದೇವಿ ದೇವಲ್ಯದ ಧರ್ಮದರ್ಶಿಲು ಧರ್ಮರಾಜ್ ಜೈನ್, ಮುಲ್ಕಿ ಅರಮನೆತ್ತ ಆಶಾಲತಾ, ಎಂ ಗೌತಮ್ ಜೈನ್ ಪಾಲ್ ಪಡೆದಿತ್ತೆರ್.

ಡಿ.1ರ್ದ್ ಸಿಮ್ ದೆತೊನರೆ ಪೊಸ ರೂಲ್!

ನನ ಸಿಮ್ ಕಾರ್ಡ್ ದೆತೊನುನ ಬೊಕ್ಕ ಮಾರಾಟ ಮಲ್ಪುನ ನಿಯಮಲು ಡಿ.1 ರ್ದ್ ಬದಲ್ ಆಪುಂಡು.

ಒಂಜೇ ಐಡಿಡ್ ಜನ ಸುಮಾರ್ ಸಿಮ್ ನ್ ದೆತೊನೊಂದು ಇತ್ತೆರ್. ಆಂಡ ಇತ್ತೆ ಒಂಜೇ ಐಡಿಡ್ ಸೀಮಿತ ಸಿಮ್ ನ್ ದೆತೊನೊಡಾಪುಂಡು. ಅಂಚೆನೆ ಸಿಮ್ ನ್ ಮಾರಾಟ ಮಲ್ಪುನ ವಿತರಕೆರ್ ತನ್ನ ಪೊಲೀಸ್ ಪರಿಶೀಲನೆ ಬೊಕ್ಕ ಬಯೋಮೆಟ್ರಿಕ್ ಪರಿಶೀಲನೆ ಮಲ್ಪೊಂಡು. ನೆನ್ ನಿರ್ಲಕ್ಷ್ಯ ಮಲ್ತ್ ದ್ ಸಿಮ್ ಮಾರಾಟ ಮಲ್ತ್ಂಡ ಅಕ್ಲೆಗ್ 10 ಲಕ್ಷ ರೂ. ಫೈನ್ ಬೊಕ್ಕ ಜೈಲ್ ಶಿಕ್ಷೆ ಕೊರ್ಪುಂಡು.

ಇನಿ ಪ್ರಧಾನಿ ಮೋದಿ ಇಸೇಸ ವಿಡಿಯೋ ಕಾನ್ಫರೆನ್ಸ್

ಪ್ರಧಾನ ಮಂತ್ರಿ ನರೇಂದ್ರ ಮೋದಿ ವಿಕಾಸ್ ಭಾರತ್ ಸಂಕಲ್ಪ ಯಾತ್ರೆದ ಫಲಾನುಭವಿಲೆನೊಟ್ಟಿಗೆ ಇನಿ ಬೊಲ್ಪುಗು ವಿಡಿಯೋ ಕಾನ್ಫರೆನ್ಸಿಂಗ್ ಮುಖೇನ ಪಾತೆರಿಯೆರೆ ಉಲ್ಲೆರ್.

ಅತ್ತಂದೆ ಮಹಿಳಾ ಕಿಸಾನ್ ಡ್ರೋನ್ ಕೇಂದ್ರನ್ ಪ್ರಧಾನಿ ಉದಿಪನ ಮಲ್ಪುವೆರ್. ಉಂದು ಮಹಿಳಾ ಸ್ವಸಹಾಯ ಗುಂಪುಲೆಗ್ ಡ್ರೋನ್ ನ್ ಕೊರ್ಪುಂಡು. ನೆತ್ತ ಅಡಿಟ್ಟ್ ನನದ 3 ವರ್ಷಡ್ ಈ ಗುಂಪುಲೆಗ್ 15 ಸಾರ ಡ್ರೋನ್ ನ್ ಕೊರ್ಪುಂಡು. ಪೊಂಜೋವುನಕ್ಲೆಗ್ ಡ್ರೋನ್ ರಾಪಾಯೆರೆ, ಗಲಸೆರೆ ಬೋಡಾಯಿನ ತರಬೇತಿನ್ ಕೊರ್ಪುಂಡು.

ಡಿ.16: ಕುಳಾಯಿಡ್ ಪ್ರತಿಭಾ-ಪುರಸ್ಕಾರ, ವಾರ್ಷಿಕ ಉಚ್ಚಯ ಲೇಸ್

ಶಾಲಾ ಶಿಕ್ಷಣ ಬೊಕ್ಕ ಸಾಕ್ಷರತಾ ಇಲಾಖೆ, ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್ ಸಹಕಾರಿ (ಫಿಶರೀಸ್) ಹಿರಿಯ ಪ್ರಾಥಮಿಕ ಶಾಲೆ ಕುಳಾಯಿ ಬೊಕ್ಕ ಹಳೆ ವಿದ್ಯಾರ್ಥಿ ಸಂಘದ ಒಟ್ಟುಸೇರಿಗೆಡ್ ಪ್ರತಿಭಾ-ಪುರಸ್ಕಾರ ಬೊಕ್ಕ ವಾರ್ಷಿಕ ಉಚ್ಚಯ ಲೇಸ್ ಡಿ.16 ಸನಿಯಾರ ನಡಪರೆ ಉಂಡು.

ಆನಿ ಬಯ್ಯಗ್ ಸಭಾ ಲೇಸ್, ಶಾಲೆದ ಜೋಕುಲೆರ್ದ್ ಬೊಕ್ಕ ಹಳೆ ವಿದ್ಯಾರ್ಥಿಲೆರ್ದ್ ನೃತ್ಯ ಲೇಸ್ ಬೊಕ್ಕ ಹಳೆ ವಿದ್ಯಾರ್ಥಿ ಸಂಘದ ಮುತಾಲಿಕೆಡ್ ನಮ್ಮ ಟಿವಿ ಬಲೆ ಬುಲಿಪಾಲೆ ಪ್ರಶಸ್ತಿ ಗೆಂದಿನ ನವರಸ ಕಲಾವಿದೆರ್ ಸುರತ್ಕಲ್ ಅಭಿನಯದ ನಿರೆಲ್ ನಾಟಕ ನಡಪರೆ ಉಂಡು ಪಂದ್ ಹಳೆ ವಿದ್ಯಾರ್ಥಿ ಸಂಘದ ಗುರ್ಕಾರೆ ಮಾಧವ ಸುವರ್ಣ, ಶಾಲಾಭಿವೃದ್ಧಿ ಸಮಿತಿದ ಗುರ್ಕಾರೆ ಮಂಜುಳಾ, ಕುಳಾಯಿ ಸಹಕಾರಿ ಫಿಶರೀಸ್ ಹಿರಿಯ ಪ್ರಾಥಮಿಕ ಶಾಲೆದ ಮುಖ್ಯ ಶಿಕ್ಷಕಿ ಶೋಭ, ಶಿಕ್ಷಕ ವೃಂದ ಬೊಕ್ಕ ಕಲ್ಪಾರ್ಥಿಲು ಲೆಪ್ಪೋಲೆಡ್ ತೆರಿಪಾದೆರ್.

ಕಾಂಗ್ರೆಸ್ ಮೈತ್ರಿ ಕೂಟ ಒಂಜಿ ಧರ್ಮದಕ್ಲೆನ್ ಮೆಚ್ಚಾವುನವು ದೇಶಗ್ ಹಾಳ್: ಶಾಸಕೆರ್ ವೇದವ್ಯಾಸ ಕಾಮತ್

ಕುಡ್ಲ : ದೇಶನ್ ಒಟ್ಟು ಸೇರ್ಸಾವುನ ಕೆಲಸ ಬಿಜೆಪಿ ಮಲ್ತ್ಂಡ, ಕಾಂಗ್ರೆಸ್ ಏಪದಲೆನೇ ತನ್ನ ಸ್ವಾರ್ಥಕ್ಕಾದ್ ದೇಶನ್ ಬೇತೆ ಬೇತೆ ಮಲ್ಪುನ ಕೆಲಸನ್ ಮಲ್ತೊಂದು ಉಂಡು. ಬಿಹಾರ ಡ್ ಸಾರ್ವಜನಿಕ ರಜೆತ್ತ ವಿಷಯಡ್ ಆಯಿನ ವಿವಾದ I.N.D.I.A ಮೈತ್ರಿ ಕೂಟದ ಜಿಹಾದಿ ಮನಸ್ಥಿತಿನ್ ಜಗತ್ತ್ ಗ್ ತೂಪಾವೊಂದುಂಡು ಪಂದ್ ಶಾಸಕೆರ್ ವೇದವ್ಯಾಸ್‌ ಕಾಮತ್‌ ಮೇರ್ ಬೆಚ್ಚ ಆತೆರ್.

ಬಿಹಾರದ ಶಿಕ್ಷಣ ಇಲಾಖೆ ಘೋಷಣೆ ಮಲ್ತಿನ 2024 ತ್ತ ಸಾರ್ವಜನಿಕ ರಜೆತ್ತ ಪಟ್ಟಿಡ್ ಹಿಂದೂಲೆನ ಶ್ರೀ ಕೃಷ್ಣಜನ್ಮಾಷ್ಟಮಿ, ರಕ್ಷಾ ಬಂಧನ, ರಾಮನವಮಿ, ಶಿವರಾತ್ರಿ, ವಸಂತ ಪಂಚಮಿ, ಜೀವಿತ ಪುತ್ರಿಕಾ ಪರ್ಬಗ್ ಕೊರೊಂದು ಇತ್ತಿನ ರಜೆನ್ ಕ್ಯಾನ್ಸಲ್ ಮಲ್ದ್ಂಡ್. ಇಸ್ಲಾಂ ಪರ್ಬಲೆಗ್ ಎಚ್ಚದ ರಜೆನ್ ಘೋಷಣೆ ಮಲ್ದ್ಂಡ್. ಉರ್ದು ಶಾಲೆಲು ಸೇರಿನಂಚೆನೆ ಮುಸ್ಲಿಂ ಪ್ರಾಬಲ್ಯ ಇಪ್ಪುನ ಸರ್ಕಾರಿ ಶಾಲೆಗ್ ಐತಾರದ ಬದಲ್ ಸುಕ್ರಾರ ವಾರದ ರಜೆನ್ ಘೋಷಣೆ ಮಲ್ದ್ಂಡ್. ಆ ಮುಖೇನ ಮುಸ್ಲಿಮೆರೆಗಾದ್ ಸರ್ಕಾರಿ ವಾರದ ರಜೆನ್ ಬದಲ್ ಮಲ್ತಿನ ದೇಶದ ಸುರುತ್ತ ರಾಜ್ಯ ಬಿಹಾರ ಆತ್ಂಡ್. ನೆರ್ದ್ ದುಂಬು ಬಜಿ ಮೆಚ್ಚಾವುನ ರಾಜಕೀಯಗಾದ್ ಕಾಶ್ಮೀರಗ್ ಆರ್ಟಿಕಲ್ 370 ಮುಖೇನ ತಾನಮಾನ ಕೊರ್ದು, ಪ್ರತ್ಯೇಕತಾವಾದಗ್, ಭಯೋತ್ಪಾದನೆಗ್, ಅಶಾಂತಿಗ್ ಕಾಂಗ್ರೆಸ್ ಕಾರಣ ಆದಿತ್ತ್ಂಡ್. ಆ ಸಮಸ್ಯೆನ್ ಸರಿ ಮಲ್ಪರೆ ಪ್ರಧಾನಿ ನರೇಂದ್ರ ಮೋದಿಯೆರೇ ಬರೊಡಾಂಡ್. ಇತ್ತೆ ಬಿಹಾರಡ್ ತನ್ನ ಮೈತ್ರಿ ಕೂಟದ ಜೆಡಿಯು ಪಕ್ಷದ ಮುಖೇನ ಅಂಚಿನನೇ ಸಮಸ್ಯೆನ್ ಸೃಷ್ಟಿ ಮಲ್ತ್ ದ್ ಭವಿಷ್ಯಡ್ ದೇಶದೊಲಯಿ ಕುಡ ಅಶಾಂತಿ, ಅಭದ್ರತೆನ್ ಸುರು ಮಲ್ತೊಂದು ಉಂಡು. ಇತ್ತೆನೇ ನೆನ್ ಉಂತಾಯಿಜಿಂಡ ಕಾಂಗ್ರೆಸ್‌ ಪಕ್ಷ ನನದ ದಿನಟ್ಟ್ ರಾಜ್ಯಡ್ ಇಂಚಿನನೇ ನಿಯಮನ್ ಜಾರಿಗ್ ಕನಪುನೆಟ್ಟ್ ಅಚ್ಚರಿ ಇಜ್ಜಿ. ಇಡೀ ದೇಶದ ವಾ ರಾಜ್ಯಡ್ಲಾ ಇಜ್ಜಂದಿನ ನಿರ್ಧಾರನ್ ಬಿಹಾರಡ್ ಮಾತ್ರ ಕನಯೆರೆ ಮೊಘಲ್‌ ಕಾಲದ ಮನಸ್ಥಿತಿದಕ್ಲೆರ್ದ್ ಮಾತ್ರ ಸಾಧ್ಯ ಪಂದ್ ಶಾಸಕೆರ್ ಕಾಮತ್ ಆರೋಪ ಮಲ್ದೆರ್ .