May 2023

ತೋಕೂರು ಶ್ರೀ ಸುಬ್ರಹ್ಮಣ್ಯನ ನಡೆಟ್ಟ್ ಭಾರಿ ಶ್ರದ್ಧಾ ಭಕ್ತಿಡ್ ನಡತ್ಂಡ್ ನಾಗಮಂಡಲ ಉಚ್ಚಯ

ತೋಕೂರು: ಶ್ರೀ ಸುಬ್ರಾಯ ದೇವೆರ್ನ ಪುಣ್ಯದ ನಡೆ ಶ್ರೀ ತೋಕೂರು ಸುಬ್ರಹ್ಮಣ್ಯ ದೇವಲ್ಯಡ್ ಮೇ 23 ಕ್ಕ್ ಭಾರಿ ಶ್ರದ್ಧಾ ಭಕ್ತಿಡ್ ನಾಗಮಂಡಲ ಉಚ್ಚಯ ನಡತ್ಂಡ್.

ತುಳುನಾಡ ಪುಗರ್ತೆದ ನಾಗಪಾತ್ರಿ ಸಗ್ರಿ ಗೋಪಾಲಕೃಷ್ಣ ಸಾಮಗೆರ್ ಬೊಕ್ಕ ಮುದ್ದೂರು ಕೃಷ್ಣಪ್ರಸಾದ್ ವೈದ್ಯೆರ್ನ ಕೂಟದಕುಲು ನಾಗ ದೇವೆರ್ ಬೊಕ್ಕ ನಾಗಕನ್ನಿಕೆ ನರ್ತನದ ಒರುಟ್ಟು ಉಚ್ಚಯೊನು ನಡಪಾದ್ ಕೊರಿಯೆರ್.

ಬೊಲ್ಪುಗು ದೇವಲ್ಯದ ನಾಗಸನ್ನಿಧಿಡ್ ಪ್ರಾಯಶ್ಚಿತ್ತ ಪೂರ್ವಕ ಕಲಶಾಧಿವಾಸ, ಅಧಿವಾಸ ಹೋಮ, ಕಲಶಾಭಿಷೇಕ ಹೋಮ, ಮಹಾಪೂಜೆ, ಬ್ರಾಹ್ಮಣ ಸುವಾಸಿನಿ ವಟು ಆರಾಧನೆ, ಅನ್ನಸಂತರ್ಪಣೆ ನಡತ್ಂಡ್. ಬಯ್ಯಡ್ ದೀಪಾರಾಧನೆ, ನಾಗಸನ್ನಿಧಿಡ್ ಹಾಲ್ಹಿಟ್ಟು ಸೇವೆ ನಡತ್ಂಡ್.

ಈ ಪೊರ್ತುಡು ಕ್ಷೇತ್ರದ ತಂತ್ರಿಲು ಶಿಬರೂರು ಗೋಪಾಲಕೃಷ್ಣ ತಂತ್ರಿಲು, ಅರ್ಚಕೆರ್ ಟಿ.ಕೆ. ಮಧುಸೂದನ ಆಚಾರ್ಯ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಡಾ.ಹರಿಕೃಷ್ಣ ಪುನರೂರು, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್ ಕುಮಾರ್ ಹೆಗ್ಡೆ, ಕಾರ್ಯದರ್ಶಿ ರಾಮಣ್ಣ ದೇವಾಡಿಗ ಬೊಕ್ಕ ಮಾತ ಸಮಿತಿದ ಸರ್ವ ಸದಸ್ಯೆರ್, ಊರು ಪರವೂರುದ ಭಕ್ತೆರ್ ಭಾರಿ ಸಂಖ್ಯೆಡ್ ಸೇರ್ದ್ ಕ್ಷೇತ್ರಡ್ 36 ವರ್ಷೊರ್ದು ಬೊಕ್ಕ ನಡತಿನ ನಾಗಮಂಡಲ ಉಚ್ಚಯೊಗು ಸಾಕ್ಷಿ ಆಯೆರ್.

Padmanabha Pakshikere honoured in Muscat ಶನಿ ಪೂಜೆದ ಸಂಘಟಕೆ ಪಕ್ಷಿಕೆರೆ ಪದ್ಮನಾಭ ಶೆಟ್ಟಿಗಾರ್ ರೆಗ್ ಮಸ್ಕತ್ ಡ್ ತಮ್ಮನ

ಕರಿನ ಮೂಜಿ ದಶಕರ್ದ್ ಶನೀಶ್ವರ ಪೂಜೆದೊಟ್ಟಿಗೆ ತಾಳಮದ್ದಳೆದ ಹಿಮ್ಮೇಳ ಕಲಾವಿದೆಯಾದ್, ಸಂಘಟಕೆಯಾದ್ ಪುಗರ್ತೆ ಪಡೆಯಿನ ಪದ್ಮನಾಭ ಶೆಟ್ಟಿಗಾರ್ ಪಕ್ಷಿಕೆರೆ ಮೆರೆನ್ ಮಸ್ಕತ್ ಡ್ ಬಿರುವ ಜವನೆರ್ ಮಸ್ಕತ್ ಮೊಕುಲು ತಮ್ಮನ ಮಲ್ತೆರ್.

ಪಲಯೆ ನೋಣಯ್ಯ ಶೆಟ್ಟಿಗಾರ್ ಮೆರೆರ್ದ್ ಬಾಲ ಪಾಠ, ಬೊಕ್ಕ ದಿವಾಣ ಭೀಮ ಭಟ್ ಮೆರೆರ್ದ್ ಚೆಂಡೆ ಮದ್ದಳೆ ಕಲ್ತ್ ದ್ ಹವ್ಯಾಸಿ ವಲಯಡ್ ಸುಮಾರ್ ಸಂಘಡ್ ತಾಳಮದ್ದಳೆ, ಬಯಲಾಟಡ್ ಹಿಮ್ಮೇಳ ವಾದಕರಾದ್ ಸೇವೆ ಸಂದಾದೆರ್. ಶ್ರೀ ಶನೀಶ್ವರ ಭಕ್ತ ವೃಂದ, ಪಕ್ಷಿಕೆರೆ ಪನ್ಪುನ ಕೂಟ ಕಟ್ಟ್ ದ್ ಮಸ್ಕತ್, ದುಬೈ, ಅಬುದಾಬಿ, ಬೊಂಬೈ, ಊರು ಪರವೂರುಡ್ ಶನಿ ಪೂಜೆ ತಾಳಮದ್ದಳೆ ಸಂಘಟನೆ ಮಲ್ತೆರ್.

ರಡ್ಡನೇ ಸರ್ತಿ ಮಸ್ಕತ್ ಗ್ ಕೂಟ ಸಂಯೋಜಕೆರಾದ್ ಬತ್ತಿನ ಮೇರ್ ಸ್ವಾಮಿ ಕೊರಗಜ್ಜ, ಶ್ರೀ ಶನೀಶ್ವರ ಮಹಾತ್ಮೆ ಪನ್ಪಿನ ತಾಳಮದ್ದಳೆ ನಡಪಾದ್ ಕೊರ್ನ ನಿಲೆಟ್ಟ್ ಮಾನಾದಿಗೆ ಮಲ್ತೆರ್. ಕದ್ರಿ ನವನೀತ ಶೆಟ್ಟಿ ಬೊಕ್ಕ ದಯಾನಂದ ಜಿ. ಕತ್ತಲ್ ಸಾರ್ ಪರಿಚಯ ಮಲ್ತ್ ದ್ ಅಭಿನಂದನೆ ಮಲ್ತೆರ್.

ಈ ಪೊರ್ತುಡು ಬಿರುವ ಜವನೆರ್ ಸಂಘಟನೆದ ಗುರುಪ್ರಸಾದ್ ರಾಮ ಅಮೀನ್ ಸನಿಲ್, ನಿತಿನ್ ಕುಮಾರ್ ಹುಣಸೆಕಟ್ಟೆ, ಶಂಕರ್ ಉಪ್ಪೂರ್, ಶ್ರೀಧರ ಅಮೀನ್ ಚಂದ್ರಕಾಂತ್ ಕೋಟ್ಯಾನ್, ದಾಮೋದರ ಕುಂದರ್, ಮಾಧುರಿ ಸುವರ್ಣ ಇತ್ತೆರ್. ಶ್ವೇತ ಸುವರ್ಣ ಈ ಲೇಸ್ ದ ಸುಧಾರಿಕೆ ಮಲ್ತೆರ್.

Padmanabha Pakshikere honoured in Muscat

Padmanabha Shettiger Pakshikere is a talamadddale artist and has also been conducting Shaniswara pooja from the past three decades was honoured in Oman, Muscat by the association ‘ Biruva Jawaner’.

He had organised a group to conduct Swami Koragajja, Sri Shaniswara Mahatmay talamadddale for the second time at Muscat and was honoured by Kadri Navneet Shetty and Dayanand Kattalsar who introduced him to the gathering.

ಎ.ಸಿ.ಭಂಡಾರಿ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರೆ!?

ಕುಡ್ಲ: ಕಾಂಗ್ರೆಸ್ ದ ಹಿರಿಯ ಕಾರ್ಯಕರ್ತೆ,ತುಳು ಬಾಷೆ, ಸಾಹಿತ್ಯಗ್ ಪ್ರಾಮಾಣಿಕವಾದ್ ಪುಗೆಲ್ ಕೊರ್ನ ಎ.ಚಂದ್ರಶೇಖರ ಭಂಡಾರಿ ಮೇರ್ ಈ ಸರ್ತಿದ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರೆ ಆಪೆರಾ ಪನ್ಪಿನ ಪ್ರಶ್ನೆ ಜನಕ್ಲೆಡ ಮೂಡೊಂದುಂಡು.

ಕರಿನ ಸರ್ತಿ ಕಾಂಗ್ರೆಸ್ ಸರ್ಕಾರ ಅರ್ಧೊಡು ಜಪ್ಪುನಗ ತುಳು ಸಾಹಿತ್ಯ ಅಕಾಡೆಮಿ ದ ಗುರ್ಕಾರ್ಮೆದ ಜಬದಾರಿನ್ಲ ಅರ್ಧೊಡೆ ಉಂತುದಿತ್ತ್ಂಡ್. ಅಂಚಾದ್ ಈ ಸರ್ತಿ ಕಾಂಗ್ರೆಸ್ ಕುಡೊರ ಅಧಿಕಾರೊಗು ಬತ್ತಿತ್ತ್ ದ್ ಹಿರಿಯೆರಾಯಿನ ಎ.ಸಿ. ಭಂಡಾರಿಲು ಕರಿನ ಸರ್ತಿದ ಅರ್ಧೊಡೆ ಉಂತುದಿತ್ತಿನ ಕೆಲಸೊನ್ ಈ ಸರ್ತಿ ದುಂಬವರಿಯರೆ ಬೋಡಾದ್ ಕುಡೊರ ಸರಕಾರ ಅರೆಗ್ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಮೆದ ಪಟ್ಟೊನು ಕೊರ್ಪುಂಡಾ ಪನ್ಪಿನ ಸಂಕಲ್ಪೊನು ಜನಕುಲು ದೀವೊಂದೆರ್.

ಅಂಚಾದ್ ಈ ಸರ್ತಿಗ್ ಲ ಅಧ್ಯಕ್ಷೆರಾದ್ ನನ ದುಂಬಗ್ ಅರೆನೇ ದುಂಬು ಕೊನೊಪೆರಾ ಪನ್ಪಿನ ಸುದ್ದಿ ಕೇಂಡ್ ದ್ ಬರೊಂದುಂಡು. ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರಾದಿಪ್ಪುನಗಲ ಪ್ರಾಮಾಣಿಕವಾದ್ ಆಡಳಿತ ತೊಜಪಾಯಿನ ಎ.ಸಿ.ಭಂಡಾರಿ ಮೇರ್ ಒರಿ ಏರ್ಲಾ ದ್ವೇಷ ಮಲ್ಪಂದಿನಂಚಿನ ಎಡ್ಡೆ ಉಡಲ್ ದ ಅಜಾತಶತ್ರು ರಾಜಕಾರಣಿ.

ಶಾಂತ ಸ್ವಭಾವೊಡು ಎಡ್ಡೇನೆ ಆಡಳಿತ ಮಲ್ಪುನಂಚಿನ ಆಡಳಿತಗಾರೆ. ಅಂಚೆನೆ ಈ ಸರ್ತಿ ತುಳು ಬಾಷೆನ್ ರಾಜ್ಯದ ಅಧಿಕೃತ ಬಾಷೆ ಮಲ್ಪೊಡು ಪನ್ಪಿನ ಪಟ್ಟ್ ಪತೊಂದಿನ ಮೇರ್ ಈ ಸರ್ತಿ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರೆ ಆಪೆರಾ ಪನ್ಪಿನ ಮಲ್ಲ ಅಂಗಲ್ಪುಡು ಜನಕುಲು ಉಲ್ಲೆರ್.

ದೈವ ಶಕ್ತಿಲು ಕಾರ್ಣಿಕ ಮೆರೆದಿನ ನಾಡ್ ಈ ತುಳುನಾಡ್ : ದುಗ್ಗಣ್ಣ ಸಾವಂತೆರ್

ಹಳೆಯಂಗಡಿ: ಈ ನಮ್ಮ ತುಳುನಾಡ್ ದೈವ ಶಕ್ತಿಲು ಕಾರ್ಣಿಕ ಮೆರೆದಿನ ನಾಡ್. ಇಂಚಿನ ಶಕ್ತಿಲೆನ ಸಾನ್ನಿಧ್ಯ ವೃದ್ಧಿದ ಮುಕೇನ ನಮ್ಮ ಭಕ್ತಿ, ಪರಂಪರೆನ್ ಒರಿತ್ ಬದ್ ಸೌಹಾರ್ದತೆನ್ ಮೆರೆವೊಡು ಪಂದ್ ಮೂಲ್ಕಿ ಸೀಮೆದ ಅರಸೆರಾಯಿನ ಎಂ. ದುಗ್ಗಣ್ಣ ಸಾವಂತೆರ್ ತೆರಿಪಾಯೆರ್.

ಆರ್ ಪಡುಪಣಂಬೂರುದ ಮೂಲ್ಕಿ ಸೀಮೆ ಅರಮನೆ ಆವರಣಡ್ ಕಲ್ಲುರ್ಟಿ ದೈವಸ್ಥಾನದ ಪ್ರತಿಷ್ಠಾಪನೆಗ್ ಚಾಲನೆ ಕೊರ್ದು ಪಾತೆರಿಯೆರ್.

ಅಚಾಡಿ ಅಜಿತೇಂದ್ರ ಇಂದ್ರ ಮೇರ್ ಧಾರ್ಮಿಕ ವಿಧಿ ವಿಧಾನ ನಡಪಾದ್ ಕೊರಿಯೆರ್.

ಮೂಲ್ಕಿ ಅರಮನೆತ್ತ ಬಸದಿದ ಅರ್ಚಕೆರ್ ಬಾಬು ಇಂದ್ರ ಪೂಜಾವಿಧಾನ ನಡಪಾದ್ ಕೊರಿಯೆರ್. ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಅರ್ಕುಲ ಬೂಡು ರತ್ನರಾಜ್ ಶೆಟ್ಟಿ, ಕೂಳೂರು ಬೂಡು ಹರಿಶ್ಚಂದ್ರ ಬಲ್ಲಾಳ್, ಸಂತಗುರು ಸಾಯಿ ಈಶ್ವರ್ ಶಂಕರಪುರ, ಎರ್ಮಾಳು ಬೂಡು ಶಂತನು ರಾಜ್, ಮೂಲ್ಕಿ ಅರಮನೆತ್ತ ಚಂದ್ರಶೇಖರ್ ಜಿ., ಆಶಾಲತಾ, ಗೌತಮ್ ಜೈನ್, ಪವಿತ್ರೇಶ್ ಜೈನ್, ರಕ್ಷಾ, ತೋಕೂರುಗುತ್ತು ಉಮೇಶ್ ಶೆಟ್ಟಿ, ನಾಲ್ಕೂರು ಪಂಜುರ್ಲಿ ದೈವಸ್ಥಾನದ ಜಗದೀಶ್ ಆಚಾರ್ಯ, ನವೀನ್ ಶೆಟ್ಟಿ ಎಡ್ಮೆಮಾರ್, ಕೊಲ್ನಾಡುಗುತ್ತು ರಾಮಚಂದ್ರ ನಾಯ್ಕ್, ವಿದ್ಯಾಧರ ಶೆಟ್ಟಿ, ಅನಿಲ್ ಶೆಟ್ಟಿ, ಸುದೇಶ್‌ಕುಮಾರ್ ಮೊಕುಲು ಇತ್ತೆರ್ .

ಬೊಲ್ತೇರ್ ಡ್ ಜೋರು ಬರ್ಸ: ಪುಗರ್ತೆದ ಗಡಾಯಿಕಲ್ಲ್ ಗ್ ಹಾಕ್ಂಡ್ ತೆಡಿಲ್

ಬೊಲ್ತೇರ್: ತಾಲೂಕ್ ಇಡೀ ಅಂಗಾರೆ ಬಯ್ಯಗ್ ಎಡ್ಡೆ ಬರ್ಸ ಬೈದ್ಂಡ್.

ತೆಡಿಲ್ ಮೆಂಚ್ ದ ಬರ್ಸರ್ದ್ ಒಂಜಿ ಸಾರ ಅಡಿ ಎತ್ತರದ ಪುಗರ್ತೆದ ಗಡಾಯಿಕಲ್ಲ್ ಗ್ ತೆಡಿಲ್ ಹಾಕ್ ದ್ ತೂ ತೋಜಿದ್ಂಡ್.

ಒಂಜಿ ಗಂಟೆರ್ದ್ ಎಚ್ಚ ಪೊರ್ತು ಗಾಳಿ ಬರ್ಸ ಬೈದ್ಂಡ್. ತೆಡಿಲ್ ದ ಬಿರ್ಸ್ ಗ್ ಗಡಾಯಿಕಲ್ಲ್ ಡ್ ಕೆಲವು ಪೊರ್ತು ತೂ ತೋಜಿದ್ಂಡ್. ನೆನ್ ಕೈತಲ್ ದಕುಲು ವಿಡಿಯೋ ಮಲ್ತ್ ದ್ ಸಾಮಾಜಿಕ ಜಾಲತಾಣಗ್ ಅಪ್ ಲೋಡ್ ಮಲ್ದೆರ್.

ಕರಿನ ವರ್ಷಲ ತೆಡಿಲ್ ಹಾಕ್ ದ್ ಗಡಾಯಿಕಲ್ಲ್ ಡ್ ಒಂಜಿ ಮೆಯಿತ್ತ ಕಲ್ಲ್ ದ ತುಂಡು ಬೂರ್ದು ಪುಡಾಯಿನ ಸೌಂಡ್ ಕೇಂದ್ಂಡ್.‌ ಉಂದು ಮುಲ್ಪ ಮರಿಯಲಡ್ ಆಪಿನಿ ಸಹಜ ಪಂದ್ ಮುಲ್ಪದ ಕೈತಲ್ ದಕುಲು ಪಂತೆರ್.

ಎಲ್ಲೆ ಪುತ್ತೂರ್ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಪತ್ತನಾಜೆ ಉಚ್ಚಯ

ಪುತ್ತೂರ್: ಪುಗರ್ತೆದ ಪುತ್ತೂರ್ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ (ಮೇ25) ಎಲ್ಲೆ ರಾತ್ರೆ ಪತ್ತನಾಜೆ ಉಚ್ಚಯ ನಡಪರೆ ಉಂಡು.

‌ಉಚ್ಚಯದ ಬೊಕ್ಕ ಭಕ್ತೆರೆಗ್ ಪ್ರಸಾದ ರೂಪಡ್ ಫಲವಸ್ತುನ್ ಕೊರ್ಪೆರ್. ಪತ್ತನಾಜೆದ ದಿನ ಬೊಲ್ಪುಗು, ಮಧ್ಯಾಹ್ನ ಇಸೇಸ ಪೂಜೆ, ಬಯ್ಯಗ್ ಶ್ರೀ ದೇವೆರೆನ ನಿತ್ಯ ಬಲಿ ಉಚ್ಚಯಡ್ ಉಡಿಕೆ, ಚೆಂಡೆ, ವಾದ್ಯ ಸುತ್ತು, ಪಲ್ಲಕಿ ಉಚ್ಚಯ ಬೊಕ್ಕ ಸೇವೆದ ಬಳಕ ವಸಂತ ಪೂಜೆ ಸೇವೆ ಮಲ್ತಿನ ಭಕ್ತೆರೆಗ್ ಪ್ರಸಾದ ಕೊರಿಯೆರೆ ಉಂಡು.

ದೇವೆರ್ ಗರ್ಭಗುಡಿ ಪ್ರವೇಶ ಮಲ್ತಿನ ಪತ್ತನಾಜೆ ಉಚ್ಚಯದ ಪ್ರಸಾದ ರೂಪವಾದ್ ಫಲವಸ್ತುನ್ ದೇವಲ್ಯದ ಪಿದಯಿ ಭಕ್ತಾದಿಲೆಗ್ ಕೊರ್ಪೆರ್.

ಪೊರ್ತಾದ್ ಗರ್ಭಗುಡಿ ಪ್ರವೇಶ ಮಲ್ಪುನ ದೇವೆರ್:

ಪತ್ತನಾಜೆದಾನಿ ದೇವೆರೆನ ಉಚ್ಚಯ ಮೂರ್ತಿನ್ ಗರ್ಭ ಗುಡಿತ್ತ ಉಲಯಿ ಕೊನೊಪಿನ ದುಂಬು ಬ್ರಹ್ಮ ವಾಹಕೆರ್ ಉಚ್ಚಯ ಮೂರ್ತಿನ್ ಆನೆ ಮುಟ್ಟುದ ಮುಖೇನ ಉಲಯಿ ಕೊನೊದು ಕುಡ ಪಿರ ಕೊನಪೆರ್. ಇಂಚ ಮೂಜಿ ಸರ್ತಿ ಪೋದು ಬರ್ಪಿನ ಕ್ರಮತ್ತ ಬೊಕ್ಕ ಅಕೇರಿಗ್ ಉಚ್ಚಯ ಮೂರ್ತಿನ್ ಉಲಯಿ ಸೇರ್ಸಾನವೇ ಇಸೇಸ ಆತ್ಂಡ್.

7 ವರ್ಷದ ಪೊಣ್ಣನ್ 4.50 ಲಕ್ಷ ರೂ. ಕೊರ್ದು ಮದಿಮೆ ಆಯಿನ 38 ವರ್ಷದ ಜನ

ರಾಜಸ್ಥಾನದ ಧೋಲ್ಪುರ್ ಜಿಲ್ಲೆದ ಉನ್ಮಾಡ್ ಡ್ ಭೂಪಾಲ್ ಸಿಂಗ್ (38) ಪನ್ಪಿನ ಜನ 4.50 ಲಕ್ಷ ರೂ. ಕೊರ್ದು 7 ವರ್ಷದ ಪೊಣ್ಣನ್ ಮದಿಮೆ ಆಯಿನ ಘಟನೆ ನಡತ್ ದ್ಂಡ್.

ಪೊಣ್ಣನ ಪೋಷಕೆರೇ ಈ ಮದಿಮೆ ನಿಶ್ಚಯ ಮಲ್ದಿನಿ ಪಂದ್ ತೆರಿದ್ ಬೈದ್ಂಡ್. ಪೊಲಬು ಪಡೆಯಿನ ಪೊಲೀಸೆರ್ ಆರೋಪಿನ್ ಅರೆಸ್ಟ್ ಮಲ್ದೆರ್. ಪೊಣ್ಣನ್ ರಕ್ಷಣೆ ಮಲ್ತ್ ದ್ ಆರೈಕೆ ಕೇಂದ್ರಗ್ ಲೆತೊಂದು ಪೋತೆರ್ ಪಂದ್ ಜಿಲ್ಲಾ ಎಸ್ಪಿ ತೆರಿಪಾದೆರ್.