July 2021

ಕೇಂದ್ರಡ್ ಬಾಕಿ ಒರಿನ ಒಡಿಪುದ ಯೋಜನೆಲು ಬೇಗಡೆ ಪೂರ್ಣ : ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ

ಒಡಿಪು, ಜುಲೈ 17: ಕೇಂದ್ರ ಸರಕಾರದ ಮಟ್ಟಡ್ ಮಂಜೂರಾತಿಗ್ ಬಾಕಿ ಉಪ್ಪುನ ಜಿಲ್ಲೆದ ಬೇತೆ ಬೇತೆ ಯೋಜನೆ ಬೊಕ್ಕ ಕಾಮಗಾರಿದ ಪಟ್ಟಿನ್ ಬೆಗೋಡೆ ಸಲ್ಲಿಸಾದ್ ಈ ಬಗ್ಗೆ ಕೇಂದ್ರದ ಸಂಬಂಧ ಪಟ್ಟಿನ ಸಚಿವೆರ್ನೊಟ್ಟುಗು ಚರ್ಚೆ ಮಲ್ತ್ , ಬೆಗೋಡೆ ಮಂಜೂರು ಮಲ್ಪರೆ ಪ್ರಯತ್ನ ಮಲ್ಪುವ ಪಂದ್ ನೂತನ ಕೇಂದ್ರ ಕೃಷಿ ಬೊಕ್ಕ ರೈತೆರ್ನ ಕಲ್ಯಾಣ ಇಲಾಖೆದ ರಾಜ್ಯ ಸಚಿವೆ ಶೋಭಾ ಕರಂದ್ಲಾಜೆ ಪಂಡೆರ್ .

ಶುಕ್ರವಾರ ಕಾಂಡೆ ಹೊಸದಿಲ್ಲಿದ ತಮ್ಮ ಕಚೇರಿರ್ದ್ ವೀಡಿಯೋ ಸಭೆತ ಮುಖೇನ ಒಡಿಪು -ಚಿಕ್ಕಮಗಳೂರು ಕ್ಷೇತ್ರಡ್ ಮುಂಗಾರುರ್ದು ಆಯಿನ ಹಾನಿದ ಬಗ್ಗೆ ಪರಿಶೀಲನಾ ಸಭೆ ನಡಪಾದ್ ಪಾತೆರಿಯೆರ್.

ಅಂಚೆ ಇಲಾಖೆದ ಬೇತೆ ಬೇತೆ ಹುದ್ದೆಗ್ ನೇಮಕಾತಿ

ಒಡಿಪು, ಜುಲೈ 17: ಭಾರತೀಯ ಅಂಚೆ ಇಲಾಖೆದ ವತಿರ್ದ್ ನಗರ ಅಂಚೆ ವಿಭಾಗದ ವ್ಯಾಪ್ತಿಡ್ ಅಂಚೆ ಜೀವವಿಮೆ ಬೊಕ್ಕ ಗ್ರಾಮೀಣ ಅಂಚೆ ಜೀವವಿಮಾ ಏಜೆಂಟ್ ಆದ್ ಬೇಲೆ ಮಲ್ಪರೆ 18ರ್ದ್ 50 ವರ್ಷ ದುಲಾಯಿದ , ಕನಿಷ್ಟ ಎಸೆಸೆಲ್ಸಿ ಪಾಸ್ ಆಯಿನ ಅರ್ಹ ಅಭ್ಯರ್ಥಿಲೆರ್ದ್ ಅರ್ಜಿ ಸ್ವೀಕಾರ ಮಲ್ಪುವ.

ಆಸಕ್ತೆರ್ ಆಧಾರ್‌ ಕಾರ್ಡ್, ಪಾನ್‌ಕಾರ್ಡ್, ಎಸೆಸೆಲ್ಸಿ ಅಂಕಪಟ್ಟಿ ಮೂಲ ಪ್ರತಿ, ಝೆರಾಕ್ಸ್ ಪ್ರತಿ ಬೊಕ್ಕ ಎರಡು ಪಾಸ್‌ಪೋರ್ಟ್ ಸೈಜ್ ದ ಭಾವಚಿತ್ರ ದೊಟ್ಟುಗು ಪೇಂಟೆದ ಪ್ರಧಾನ ಅಂಚೆ ಕಚೇರಿಡ್ ಜುಲೈ 30 ತಾರೀಖ್ ಗ್ ಕಾಂಡೆ 10 ಗಂಟೆಗ್ ನಡಪುನ ಸಂದರ್ಶನಡ್ ಪಾಲ್ ಪಡೆನ್ಪಿನಕ್ಲೆಗ್ ಪನೊಲಿ .

ಎಚ್ಚದ ಮಾಹಿತಿಗಾದ್ ದೂರವಾಣಿ ಸಂಖ್ಯೆ: 0820-2520471 ಅಥವಾ ಮೊ.ನಂ: 9448291071 ಗ್ ಲೆಪ್ಪು ಕೊರ್ರೆ ಒಡಿಪು ವಿಭಾಗದ ಅಂಚೆ ಅಧೀಕ್ಷಕೆರ್ ಪ್ರಕಟಣೆಡ್ ಪಂಡೆರ್.

ಕರ್ನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾಲಯ ಆನ್ಲೈನ್ ಡ್ ಪರೀಕ್ಷಾ ಶುಲ್ಕ ಕಟ್ಟರೆ ಅವಕಾಶ

ಬೆಂಗ್ಳೂರು,ಜುಲೈ 17: ಕರ್ನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾನಿಲಯಡ್ 2001-02 ರಿಂದ 2014-15 ಬೊಕ್ಕ 2018-19 ರ್ದ್ 2020-21ನೇ(ಜುಲೈಆವೃತ್ತಿ) ಶೈಕ್ಷಣಿಕ ಸಾಲ್ ಡ್ ಪ್ರವೇಶಾತಿ ಪಡೆಯಿನ ಸ್ನಾತಕ ಬೊಕ್ಕ ಸ್ನಾತಕೋತ್ತರ ಜೋಕುಲು ವಾರ್ಷಿಕ ಬೊಕ್ಕ ಸೆಮಿಸ್ಟರ್ ಪರೀಕ್ಷೆಗ್ ಆನ್‍ಲೈನ್ ಮುಖೇನ ಪರೀಕ್ಷಾ ಶುಲ್ಕ ಪಾವತಿಸಾಯೆರೆ ಅಧಿಸೂಚನೆ ಕೊರ್ತೆರ್ .

ಬಿಎ, ಬಿಕಾಂ, ಬಿಎಡ್, ಬಿಎಡ್ (ವಿಶೇಷ ಶಿಕ್ಷಣ), ಎಂಎ, ಎಂಕಾಂ, ಎಂಬಿಎ, ಎಲ್‍ಎಲ್‍ಎಂ, ಎಂಬಿಎ(ಲಾ), ಎಂಟಿಎಂ, ಎಂಎಡ್, ಎಂಲಿಬ್‍ಐಎಸ್ಸಿ, ಎಲ್ಲಾ ಎಂಸ್ಸಿ, ಮತ್ತು ಎಲ್ಲಾ ಪಿಜಿ ಡಿಪ್ಲೋಮಾ, ಡಿಪ್ಲೋಮಾ ಬೊಕ್ಕ ಸರ್ಟಿಫಿಕೇಟ್ ಕೋರ್ಸ್ದ ಜೋಕ್ಲೆಗ್ ಆನ್‍ಲೈನ್ ಮುಖೇನ ಪರೀಕ್ಷಾ ಶುಲ್ಕ ಕಟ್ಟರೆ ಅವಕಾಶ ಕೊರ್ತೆರ್ .

ಜೋಕುಲು ವಿಶ್ವವಿದ್ಯಾನಿಲಯದ ಅಧಿಕೃತ ವೆಬ್‍ಸೈಟ್ www.ksoumysuru.ac.in ಡ್ ಅತ್ತುಂಡ http://ksouportal . com/views/ExamHome.aspx ನ ಮುಖೇನ ಪರೀಕ್ಷಾ ಶುಲ್ಕನ್ ಕಡ್ಡಾಯವಾದ್ ಅಂತರ್‍ಜಾಲದ (Online) ಮುಖೇನ ಪಾವತಿ ಮಲ್ಪೊಲಿ.

ಕೊರೋನ ನೆಗೆಟಿವ್ ವರದಿ ಉಪ್ಪುನಕ್ಲೆನ್ ಮಾತ್ರ ರಾಜ್ಯದುಲಯಿ ಪ್ರವೇಶ : ಸಚಿವ ಡಾ.ಕೆ.ಸುಧಾಕರ್

ಒಡಿಪು, ಜುಲೈ 16: ಮಹಾರಾಷ್ಟ್ರ ಬೊಕ್ಕ ಕೇರಳ ರಾಜ್ಯರ್ದ್ ಕೊರೋನ ನೆಗೆಟಿವ್ ವರದಿ ಉಪ್ಪುನಕ್ಲೆನ್ ಮಾತ್ರ ರಾಜ್ಯದುಲಯಿ ಬುಡೊಡು ಪಂದ್ ಗಡಿ ಪ್ರದೇಶಡ್ ಉಪ್ಪುನ ಜಿಲ್ಲೆದ ಜಿಲ್ಲಾಡಳಿತಗ್ ಸರಕಾರ ಇತ್ತೇ ಸೂಚನೆ ಕೊರ್ತುಂಡು . ಅಂಚನೇ ಅಲ್ಪರ್ದ್ ಬರ್ಪಿನಕುಲು ಕಡ್ಡಾಯವಾದ್ ಲಸಿಕೆ ಪಾರ್ದ್ ಉಪ್ಪೊಡು ಪಂದ್ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಅಂಚನೇ ವೈದ್ಯಕೀಯ ಶಿಕ್ಷಣ ಸಚಿವ ಡಾ.ಕೆ.ಸುಧಾಕರ್ ಪಂಡೆರ್ .

ಒಡಿಪು ಅಜ್ಜರಕಾಡು ಸರಕಾರಿ ಆಸ್ಪತ್ರೆದ ಪಿರವು ಉಪ್ಪುನ ಪೊಸತಾದ್ ಕಟ್ಟಿನ ಜಿಲ್ಲಾಸ್ಪತ್ರೆದ ನಿರ್ಮಾಣ ಕಾರ್ಯದ ಜಾಗೆ ಪರಿಶೀಲನೆ ಮಲ್ತಿ ಬೊಕ್ಕ ಉದ್ದೇಶಿಸಿರುವ ಆರ್ ಪಂಡೆರ್.

ಈ ಪೊರ್ತುಡು ಒಡಿಪು ಶಾಸಕ ಕೆ.ರಘುಪತಿ ಭಟ್, ಕರಾವಳಿ ಅಭಿವೃದ್ಧಿ ಪ್ರಾಧಿಕಾರದ ಗುರ್ಕಾರ್ಲಾಯಿನ ಮಟ್ಟಾರು ರತ್ನಾಕರ ಹೆಗ್ಡೆ, ಜಿಲ್ಲಾಧಿಕಾರಿ ಜಿ.ಜಗದೀಶ್, ಡಿಎಚ್‌ಓ ಡಾ.ನಾಗಭೂಷಣ ಉಡುಪ, ಸರ್ಜನ್ ಡಾ.ಮಧುಸೂದನ್ ನಾಯಕ್, ಬಿಜೆಪಿ ಜಿಲ್ಲಾಧ್ಯಕ್ಷ ಸುರೇಶ್ ನಾಯಕ್ ಕುಯಿಲಾಡಿ ಪಾಲ್ ಪಡೆದಿತ್ತೆರ್.

ಉತ್ತರ ಕನ್ನಡದ ಪೊಸ ಎಸ್.ಪಿ ಆದ್ ವರ್ತಿಕಾ ಕಟಿಯಾರ್ ನೇಮಕ

ಕಾರವಾರ, ಜುಲೈ 16: ಜಿಲ್ಲೆದ ಪೊಸ ಪೊಲೀಸ್ ವರಿಷ್ಠಾಧಿಕಾರಿಯಾದ್ ವರ್ತಿಕಾ ಕಟಿಯಾರ್ ಮೆರೆನ್ ವರ್ಗಾವಣೆ ಮಲ್ತ್ ರಾಜ್ಯ ಸರ್ಕಾರ ಬುಧವಾರ ಆದೇಶ ಕೊರ್ತುಂಡು . ಪ್ರಸ್ತುತ ಹುದ್ದೆಡ್ ಉಪ್ಪುನ ಶಿವಪ್ರಕಾಶ ದೇವರಾಜು ಮೆರೆನ್ ಇತ್ತೆನೆ ಜಾರಿಗ್ ಬರ್ಪಿಲಕ ವರ್ಗಾವಣೆ ಮಲ್ದೆರ್ .

2010ರ ಐ.ಪಿ.ಎಸ್ ಬ್ಯಾಚ್ ಅಧಿಕಾರಿಯಾಯಿನ ವರ್ತಿಕಾ, ಪ್ರಸ್ತುತ ಬೆಂಗ್ಳೂರುದ ರಾಜ್ಯ ಅಪರಾಧ ದಾಖಲೆದ ಬ್ಯುರೊದ ಎಸ್.ಪಿ.ಯಾದ್ ಬೇಲೆ ಮಲ್ತೊಂದು ಉಲ್ಲೆರ್.