July 4, 2021

ಹಿಂದು ಜಾಗರಣ ವೇದಿಕೆ ಉಳ್ಳಾಲ ತಾಲೂಕು ವತಿರ್ದ್ ಶ್ರದ್ಧಾಂಜಲಿ ಸಭೆ

ಉಳ್ಳಾಲ, ಜುಲೈ 4:ಇಂಚೋಗು ತೀರ್ ಪೋಯಿನ ಹಿಂಜಾವೇ ಸಕ್ರಿಯ ಕಾರ್ಯಕರ್ತೇರಾಯಿನ ಕುಂಪಲದ ರಾಜು ಮೆರೆಗ್ ಸಾರ್ವಜನಿಕ ಶ್ರದ್ಧಾಂಜಲಿ ಸಭೆ ಆಶ್ರಯ ಕಾಲೋನಿ ಕೊರಗಜ್ಜ ಕ್ಷೇತ್ರದ ವಠಾರಡ್ ಹಿಂದು ಜಾಗರಣ ವೇದಿಕೆ ಕುಂಪಲ ಘಟಕದ ವತಿರ್ದ್ ನಡತುಂಡು .

ಲೇಸ್ ಡ್ ಬೇತೆ ಬೇತೆ ಸಂಘ ಸಂಸ್ಥೆದ ಪ್ರಮುಖೆರ್ , ಹಿಂಜಾವೇ ಜಿಲ್ಲಾ ಪ್ರಮುಖೆರ್ ಬೊಕ್ಕ ಉಳ್ಳಾಲ ತಾಲೂಕು ಪ್ರಮುಖೆರ್ , ಕಾರ್ಯಂತೆರ್ ಪಾಲ್ ಪಡೆದಿತ್ತೆರ್.

ಹುಷಾರ್ದಾಂತೆ ತೀರ್ ಪೋಯಿನ ಜಿ. ಪಂ ಮಾಜಿ ಸದಸ್ಯೆರಾಯಿನ ಕೆ. ಎಸ್. ದೇವರಾಜ್

ಸುಬ್ರಹ್ಮಣ್ಯ, ಜುಲೈ 4: : ಕಡಬ ತಾಲೂಕುದ ಸುಬ್ರಹ್ಮಣ್ಯ ಕೈತಲ್ ದ ಯೇನೆಕಲ್ಲು ನಿವಾಸಿ ಮಾಜಿ ಜಿ.ಪಂ. ಸದಸ್ಯ, ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ನಿರ್ದೇಶಕ ಕೆ.ಎಸ್. ದೇವರಾಜ್ (55ವರ್ಷ) ಮೇರ್ ಕೋಡೆ ಕುಡ್ಲ ಖಾಸಗಿ ಆಸ್ಪತ್ರೆಡ್ ತೀರ್ ಪೋಯೆರ್.

ಕರಿನ ಕೆಲವು ದಿನರ್ದ್ ಹುಷಾರ್ ದಾಂತೆ ಇತ್ತಿನ ಮೇರ್ ಕುಡ್ಲದ ಖಾಸಗಿ ಆಸ್ಪತ್ರೆಡ್ ಮರ್ದ್ ಪಡೆಯೊಂದು ಇತ್ತೆರ್. ಮೃತೆರ್ ಬೊಡೆದಿ ರಡ್ಡ್ ಜೋಕುಲೆರ್ದ್ ದೂರ ಆತೆರ್.

ಕೆ.ಎಸ್.ದೇವರಾಜ್ ಮೇರ್ ಪ್ರಭಾವಿ ಮುಖಂಡೆರಾದ್ ಇತ್ತೆರ್ . ರಾಜಕೀಯ, ಸಾಮಾಜಿಕ, ಸಹಕಾರಿ, ಧಾರ್ಮಿಕ ಕ್ಷೇತ್ರಡ್ ತೋಡಗಾವೊಂದು. ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಗುರ್ಕಾರ್ಲಾದ್ , ಏನೆಕಲ್ಲು ಕೃಷಿ ಪತ್ತಿನ ಸಹಕಾರಿ ಸಂಘದ ಗುರ್ಕಾರ್ಲಾದ್, ಮಂಡಲ ಪಂಚಾಯತ್ ಸದಸ್ಯೆರಾದ್ ಬೇಲೆ ಮಲ್ದೆರ್.

ಮಸೀದಿಡ್ ನಮಾಜ್ ಮಲ್ಪರೆ ಅವಕಾಶ ಮಲ್ತ್ ಕೊರ್ರೆ ಬಿನ್ನಾಪು

ಕುಡ್ಲ , ಜುಲೈ 4:: ರಾಜ್ಯ ಸರಕಾರದ ಕೋವಿಡ್-19 ಮಾರ್ಗಸೂಚಿಯನ್ ಪಾಲಿಸಾವೊಂದು ಮಸೀದಿಡ್ ನಮಾಝ್ ಮಲ್ಪರೆ ಅವಕಾಶ ಮಲ್ತ್ ಕೊರೊಡು ಪಂದ್ ದ.ಕ.ಜಿಲ್ಲಾಧಿಕಾರಿಲೆಗ್ ದ.ಕ. ಮುಸ್ಲಿಂ ಎಸೋಸಿಯೇಶನ್‌ದ ನಿಯೋಗ ಬಿನ್ನಾಪು ಮಲ್ದೆರ್ .

ಕೊರೋನ ಸೋಂಕುದ ರಡ್ಡನೇ ಅಲೆತ ನೆಲೆಟ್ಟ್ ಪಾಡಿನಂಚಿನ ಲಾಕ್‌ಡೌನ್‌ರ್ದ್ ಮಸೀದಿಲೆನ್ ಮುಚ್ಚಿದೆರ್ . ಅಂಚಾದ್ ಕರಿನ ರಡ್ಡ್ ತಿಂಗೊಲುರ್ದು ಮುಸ್ಲಿಮೇರ್ ಇಲ್ಲಡೆ ನಮಾಝ್ ಮಲ್ತೊಂದು ಉಲ್ಲೆರ್ . ಇತ್ತೇ ಪೇಂಟೆಡ್ ಕೊರೋನ ಸಕ್ರಿಯ ಪ್ರಕರಣ ಕಮ್ಮಿ ಆವೊಂದು ಉಪ್ಪುನೆರ್ದಾವರ ಸರಕಾರದ ಮಾತಾ ಮುನ್ನೆಚ್ಚರಿಕೆ ಕ್ರಮ ಬೊಕ್ಕ ನಿರ್ದೇಶನನ್ ಪಾಲೀಸಾವೊಂದು ಮಸೀದಿಡ್ ಪ್ರಾರ್ಥನೆ ಮಲ್ಪರೆ ಅನುಮತಿ ಕೊರೊಡು ಪಂದ್ ಮುಸ್ಲಿಂ ಎಸೋಸಿಯೇಶನ್‌ದ ಸ್ಥಾಪಕಾಧ್ಯಕ್ಷ ಎಸ್.ಎಂ. ರಶೀದ್ ಹಾಜಿ ಪಂಡೆರ್ .

ಕಷ್ಟದ ಪೊರ್ತುಡು ರೋಟರಿ ಕ್ಲಬ್ ಸೇವೆ ಅನನ್ಯ : ಜಿಲ್ಲಾಧಿಕಾರಿ ಡಾ. ರಾಜೇಂದ್ರ

ಕುಡ್ಲ , ಜುಲೈ 4:: ಕೋವಿಡ್‌ದ ಸಂದಿಗ್ಧ ಪರಿಸ್ಥಿತಿಡ್ ರೋಟರಿ ಕ್ಲಬ್‌ದಂಚಿನ ಸಮಾಜ ಸೇವಾ ಸಂಸ್ಥೆಲು ಮಲ್ತೊಂದು ಉಪ್ಪುನ ಸೇವಾಕಾರ್ಯ ಅನನ್ಯವಾಯಿನವು ಪಂದ್ ದ.ಕ. ಜಿಲ್ಲಾಧಿಕಾರಿ ಡಾ.ಕೆ.ವಿ. ರಾಜೇಂದ್ರ ಪಂಡೆರ್ .

ವಿಶೇಷ ಜೋಕುಲು ‘ಸಾನಿಧ್ಯ’ ಶಾಲೆಗ್ ಬರಿಯರೆ ಅನುಕೂಲ ಆಪಿಲಕ ರೋಟರಿ ಕ್ಲಬ್ ಕುಡ್ಲ ಮೆಟ್ರೋ ಬೊಕ್ಕ ಅಮೆರಿಕದ ರೋಟರಿ ಕ್ಲಬ್ ಜೊತೆಯಾದ್ ಸೇರ್ದ್ ಶಾಲಾ ಬಸ್‌ನ್ ದಾನವಾದ್ ಕೊರ್ತಿನವು ಶ್ಲಾಘನೀಯ. ವಿಶೇಷ ಜೋಕ್ಲೆನ ಸುಪ್ತ ಪ್ರತಿಭೆನ್ ಪ್ರಚೋದಿಸಾದ್ ತರಬೇತಿ ಕೊರ್ದು , ಅಕ್ಲೆನ್ ಮುಖ್ಯವಾಹಿನಿಗ್ ಕನಿಯರೇ ಪ್ರಯತ್ನ ಬರೊಂದು ಉಪ್ಪುನ ಸಾನಿಧ್ಯದ ಆಡಳಿತ ವರ್ಗ, ಶಿಕ್ಷಕ ವೃಂದ ಉತ್ತಮ ಸೇವಾಕಾರ್ಯ ಮಳ್ತೊಂದುಲ್ಲೆರ್ ಪಂದ್ ಜಿಲ್ಲಾಧಿಕಾರಿ ಪಂಡೆರ್.