July 2021

ಕಾಸ್ರೊಡು : ಬಿಜೆಪಿ ರ್ದ್ ಎಸ್ಪಿ ಕಚೇರಿಗ್ ಪ್ರತಿಭಟನಾ ಜಾಥ

ಕಾಸ್ರೋಡು,ಜುಲೈ 15: ಬಿಜೆಪಿ ಕೇರಳ ರಾಜ್ಯಾಧ್ಯಕ್ಷ ಕೆ.ಸುರೇಂದ್ರನ್ ಬೊಕ್ಕ ಬಿಜೆಪಿ ನಾಯಕೆರ್ನ ಮಿತ್ತ್ ಸುಳ್ಳು ಮೊಕದ್ದಮೆನ್ ಪಾಡೊಂದು ಉಲ್ಲೆರ್ ಪಂದ್ ಆರೋಪ ಮಲ್ತ್ ಬಿಜೆಪಿ ಕಾಸರಗೋಡು ಜಿಲ್ಲಾ ಸಮಿತಿದ ಮುತಾಲಿಕೆಡ್ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕಚೇರಿಗ್ ಬುಧವಾರ ಪ್ರತಿಭಟನಾ ಜಾಥಾ ನಡತುಂಡು .

ಪ್ರತಿಭಟನೆನ್ ಉದಿಪನ ಮಲ್ತಿನ ಬಿಜೆಜಿ ಜಿಲ್ಲಾಧ್ಯಕ್ಷ ಕೆ.ಶ್ರೀಕಾಂತ್, ಪಾತೆರ್ದ್ , ಸಿಪಿಎಂ ಪಕ್ಷದ ನಾಯಕೆರ್ನ ನಿರ್ದೇಶನದಲಕ ಬಿಜೆಪಿ ನಾಯಕೆರ್ನ ವಿರುದ್ಧ ಮೊಕದ್ದಮೆನ್ ಪಾಡೊಂದು ಉಲ್ಲೆರ್. ಮಂಜೇಶ್ವರದ ಬಿಎಸ್ಪಿ ಅಭ್ಯರ್ಥಿಗ್ ಬಿಜೆಪಿ ನಾಯಕೆರ್ ಕಾಸ್ ಕೊರ್ತುಜೆರ್, ಬೆದರಿಕೆ ಪಾಡ್ದ್ಜೆರ್ ಪಂದ್ ಆರೋಪ ಮಲ್ತೆರ್.

ರಾಜ್ಯ ಸಭೆ ಸದನ ನಾಯಕೆರಾದ್ ಪಿಯೂಷ್ ಗೋಯಲ್ 

ನವೆದಹಲಿ, ಜುಲೈ 15: ಪ್ರಸ್ತುತ ರಾಜ್ಯಸಭೆದ ಉಪ ಮಹಡಿ ನಾಯಕೆರಾಯಿನ ಕೇಂದ್ರ ಸಚಿವ ಪಿಯೂಷ್ ಗೋಯಲ್  ಭಾರತೀಯ ಜನತಾ ಪಕ್ಷದ ರಾಜ್ಯಸಭೆದ ಸದನದ ನಾಯಕೆರ್ ಆಯೆರ್ . ಸಧ್ಯ ಕರ್ನಾಟಕದ ರಾಜ್ಯಪಾಲೆರಾಯಿನ ಪೆರಿಯ ನಾಯಕ ಥಾವರ್ ಚಂದ್ ಗೆಹ್ಲೋಟ್ ಮೆರ್ನ ರಾಜೀನಾಮೆದ ಬೊಕ್ಕ ತೆರವಾಯಿನ ಸ್ಥಾನನ್ ಗೋಯಲ್ ದೆತೊನೆರೆ ಉಲ್ಲೆರ್ .

ಪೆರಿಯ ಸಂಸದೀಯ ನಾಯಕೆರಾಯಿನ ಗೋಯಲ್ ಮೇರ್ ತ್ರಿವಳಿ ತಲಾಖ್ ಬೊಕ್ಕ ಅನುಚ್ಛೇದ 370 ದಂಚಿನ ನಿರ್ಣಾಯಕ ಮಸೂದೆನ್ ಅಂಗೀಕರಿಸಾವುನ ಪೊರ್ತುಡು ಪರಿಣಾಮಕಾರಿ ಸನ್ನಿವೇಶಡ್ ಫ್ಲೋರ್ ಮ್ಯಾನೇಜರ್ ಆತೆರ್ .

ಕೈಕಂಬದ ರೋಸಾ ಮಿಸ್ತಿಕಾ ಪ್ರೌಢ ಶಾಲೆಡ್ ಬೆಥನಿ ಸಂಸ್ಥಾಪನಾ ದಿನ

ಗುರುಪುರ, ಜುಲೈ 16: ಗುರುಪುರ ಕಿನ್ನಿಕಂಬಳದ (ಕೈಕಂಬ) ಬೆಥನಿ ಸಂಸ್ಥೆದ ರೋಸಾ ಮಿಸ್ತಿಕಾ ಪ್ರೌಢ ಶಾಲೆಡ್ ಗುರುವಾರ ಬೆಥನಿ ಸಂಸ್ಥಾಪನಾ ದಿನಾಚರಣೆ ಬೊಕ್ಕ ಬೆಥನಿ ಸಂಸ್ಥೆದ ಶತಮಾನ ಆರಂಭೋತ್ಸವ ಸಭೆ ನಡತುಂಡು .ಶಾಲಾ ಸಂಚಾಲಕಿ ಸಿಸ್ಟರ್ ಮಾರಿ ಬೆಲ್ ಸಭೆತ ಗುರ್ಕಾರ್ಮೆ ವಹಿಸಿಯೆರ್.

ರೋಸಾಮಿಸ್ತಿಕಾ ಪ್ರೌಢಶಾಲೆದ ಮುಖ್ಯ ಶಿಕ್ಷಕಿ ಸಿಸ್ಟರ್ ಲೊಲಿಟಾ ಪಿರೇರಾ ಪಾತೆರ್ದ್ ಫಾ. ರೇಮಂಡ್ ಮಸ್ಕರೇನಸ್ ಮೆರೆರ್ದ್ ಸ್ಥಾಪನೆ ಆಯಿನ ಬೆಥನಿ ಸಂಸ್ಥೆ ಬೊಕ್ಕ ಬೆಥನಿ ವಿದ್ಯಾ ಸಂಸ್ಥೆಗ್ ಜು. 16ಕ್ಕ್ ನೂದು ವರ್ಷ ಆಪುಂಡು ಪಂದ್ ಪಂಡೆರ್.

ವಿಶ್ವ ಜನಸಂಖ್ಯಾ ದಿನಾಚರಣೆ ಬೊಕ್ಕ ಮಲೇರಿಯಾ/ ಡೆಂಗ್ಯೂ ವಿರೋಧಿ ಮಾಸಾಚರಣೆ 2021 – ಶಾಸಕ ರಘುಪತಿ ಭಟ್ ಉದಿಪನ

ಒಡಿಪು, ಜುಲೈ 16: ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಒಡಿಪು ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆ ಒಡಿಪು ತಾಲೂಕು ಆರೋಗ್ಯಾಧಿಕಾರಿಲೆನ ಕಛೇರಿ, ಒಡಿಪು ಕರ್ನಾಟಕ ರಾಜ್ಯ ಸರಕಾರಿ ನೌಕರರ ಸಂಘ, ಜಿಲ್ಲಾ ಶಾಖೆ ಒಡಿಪು ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ, ಅಂಬಲಪಾಡಿ ಒಡಿಪು ಮೆಕ್ಲೆನ ಒಟ್ಟು ಸೇರಿಗೆಡ್ ಇನಿ ತಾರೀಖ್ 16-07-2021 ದಾನಿ ನಡತಿನ ವಿಶ್ವ ಜನಸಂಖ್ಯಾ ದಿನಾಚರಣೆ ಬೊಕ್ಕ ಮಲೇರಿಯಾ/ ಡೆಂಗ್ಯೂ ವಿರೋಧಿ ಮಾಸಾಚರಣೆ 2021 ಲೇಸ್ ಡ್ ಶಾಸಕ ಶ್ರೀ ಕೆ. ರಘುಪತಿ ಭಟ್ ಮೇರ್ ಪಾಲ್ ಪಡೆದ್ ಲೇಸ್ ಉದಿಪನ ಮಲ್ತೆರ್ ಅಂಚನೇ ಕರಪತ್ರ ಬುಡುಗಡೆ ಮಲ್ತೆರ್ .

ಈ ಪೊರ್ತುಡು ಒಡಿಪು ನಗರ ಸಭೆಯ ಗುರ್ಕಾಲಾಯಿನ ಸುಮಿತ್ರಾ ಆರ್ ನಾಯಕ್, ಸ್ಥಳೀಯ ನಗರಸಭಾ ಸದಸ್ಯೆರಾಯಿನ ಹರೀಶ್ ಶೆಟ್ಟಿ, ಜಿಲ್ಲಾ ಆರೋಗ್ಯಾಧಿಕಾರಿಲಾಯಿನ ನಾಗಭೂಷಣ್ ಉಡುಪ, ಜಿಲ್ಲಾ ವಾರ್ತಾಧಿಕಾರಿಲಾಯಿನ ಮಂಜುನಾಥ್, ಶ್ರೀ ಕ್ಷೇತ್ರ ಧರ್ಮಸ್ಥಳ ಯೋಜನೆ, ಕರಾವಳಿ ಪ್ರಾದೇಶಿಕ ಕಚೇರಿ ಉಡುಪಿದ ಪ್ರಾದೇಶಿಕ ನಿರ್ದೇಶಕೆರಾಯಿನ ವಸಂತ್ ಸಾಲ್ಯಾನ್, ಕರ್ನಾಟಕ ರಾಜ್ಯ ಸರಕಾರಿ ನೌಕರರ ಸಂಘ ಜಿಲ್ಲಾ ಶಾಖೆದ ಗುರ್ಕಾರ್ಲಾಯಿನ ಸುಬ್ರಹ್ಮಣ್ಯ ಶೇರಿಗಾರ್, ಉಡುಪಿ ತಾಲೂಕು ವೈದ್ಯಾಧಿಕಾರಿಲಾಯಿನ ವಾಸುದೇವ್ ಅಡಿಗ ಪಾಲ್ ಪಡೆದಿತ್ತೆರ್.

ಬಂಟ್ವಾಳ ಶ್ರೀ ಆದಿಶಕ್ತಿ ಚಾಮುಂಡೇಶ್ವರೀ ಕ್ಷೇತ್ರಗ್ ಶಿಲಾನ್ಯಾಸ ಲೇಸ್

ಬಂಟ್ವಾಳ, ಜುಲೈ 16: ಬಂಟ್ವಾಳದ ಕಸ್ಟ ಗ್ರಾಮದ ಅಗ್ರಾರ್ ಕೈತಲ್ ದ ದರ್ಬೆ ಶ್ರೀ ಆದಿಶಕ್ತಿ ಚಾಮುಂಡೇಶ್ವರೀ ಕ್ಷೇತ್ರ ಬೊಕ್ಕ ಗೋಶಾಲೆ ಟ್ರಸ್ಟ್ ವತಿರ್ದ್ ಭಕ್ತೆರ್ನ ಸಾಕರಡ್ ಪೊಸತಾದ್ ನಿರ್ಮಾಣ ಆಯೆರೆ ಉಪ್ಪುನ ಶ್ರೀ ಆದಿಶಕ್ತಿ ಚಾಮುಂಡೇಶ್ವರೀ ಕ್ಷೇತ್ರಗ್ ಗುರುವಾರ ಶಿಲಾನ್ಯಾಸ ನಡತುಂಡು .

ಕ್ಷೇತ್ರದ ಆರಾಧ್ಯ ಶಕ್ತಿ ಶ್ರೀ ಆದಿಶಕ್ತಿ ಚಾಮುಂಡೇಶ್ವರೀ ಬೊಕ್ಕ ಪರಿವಾರ ದೇವೆರೆಗ್ ಪೂಜೆ ಮಲ್ತಿ ಬೊಕ್ಕ ವೇದಮೂರ್ತಿ ನಾಳ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಪ್ರಧಾನ ಅರ್ಚಕೇರಾಯಿನ ರಾಘವೇಂದ್ರ ಅಸ್ರಣ್ಣ ಮೆರ್ನ ಪೌರೋಹಿತ್ಯಡ್ ಶಾಸ್ಪೋಕ್ತವಾದ್ ದೇವಸ್ಥಾನ ನಿರ್ಮಾಣಗ್ ಶಿಲಾನ್ಯಾಸ ನಡಪಾಯೆರ್ .

ಈ ಪೊರ್ತುಡು ಶಿಲ್ಪಿ ಹರೀಶ್, ಕ್ಷೇತ್ರದ ಗುರ್ಕಾರ್ಲಾಯಿನ ವಿಶ್ವನಾಥ ಕರ್ಕೇರಾ, ದೀಕ್ಷಿತ್, ದೇವಿ ದರ್ಶನಪಾತ್ರಿ ರಂಜಿತ ಪಾಲ್ ಪಡೆದಿತ್ತೆರ್.