July 6, 2021

ಖಾಸಗಿ ಬಸ್ ಪ್ರಯಾಣ ದರ ಏರಿಕೆಗ್ ತಡೆ : ದ.ಕ ಜಿಲ್ಲಾಧಿಕಾರಿ

ಕುಡ್ಲ ,ಜುಲೈ 6 : ದ.ಕ.ಜಿಲ್ಲೆದ ಖಾಸಗಿ ಬಸ್ ಮಾಲಕೆರ್ನ ಸಂಘವು ಏರಿಕೆ ಮಲ್ದಿನ ಬಸ್ ಪ್ರಯಾಣ ದರಕ್ ತಾತ್ಕಾಲಿಕ ತಡೆ ಕೊರ್ತೆರ್ ಪಂದ್ ದ.ಕ. ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ. ತೆರಿಪಾದೆರ್ .

ಸೋಮವಾರ ಬಸ್ ಮಾಲಕೆರ್ನ ಸಂಘದ ಪ್ರತಿನಿಧಿನಕ್ಲೆನೊಟ್ಟುಗು ಸಭೆ ನಡಪಾಯಿ ಬೊಕ್ಕ ಸುದ್ದಿಗಾರೆರೆಗ್ ಮಾಹಿತಿ ಕೊರಿನ ಜಿಲ್ಲಾಧಿಕಾರಿ, ಲಾಕ್‌ ಡೌನ್ ದ ದುಂಬು ಚಾಲ್ತಿಡ್ ಇತ್ತಿನ ಪ್ರಯಾಣ ದರನ್ ದೆತೊನೊಡು ಪಂದ್ ಮಾಲಕೆರೆಗ್ ಸೂಚನೆ ಕೊರ್ತೆರ್ . ಪ್ರಯಾಣ ದರ ಏರಿಕೆಗ್ ಸಂಬಂಧಿ ಈ ವಾರದುಲಯಿ ಆರ್‌ಟಿಎ ಸಭೆ ನಡಪಾವೆರ್ . ಆ ಸಭೆಟ್ ದರ ಜಾಸ್ತಿ ಮಲ್ಪೊಡ ಅತ್ತ್ ಬೊರ್ಚ ಪನ್ಪಿನ ವಿಚಾರದ ಬಗ್ಗೆ ತೀರ್ಮಾನ ದೆತೊನುವ ಪಂದ್ ಜಿಲ್ಲಾಧಿಕಾರಿ ಪಂಡೆರ್ .

ಮಸೀದಿಡ್ ಕೋವಿಡ್ ಮಾರ್ಗಸೂಚಿ ಪಾಲಿಸಾಯೆರೆ ಖಾಝೀ ಮಾಣಿ ಉಸ್ತಾದ್ ಕರೆ

ಕುಡ್ಲ, ಜುಲೈ 6: ಮಾತಾ ಮಸೀದಿ, ದರ್ಗಾಡ್ ಕೋವಿಡ್ ಮಾರ್ಗಸೂಚಿ ಪಾಲಿಸಾವೊಡು ಪಂದ್ ಒಡಿಪು , ಚಿಕ್ಕಮಗಳೂರು, ಶಿವಮೊಗ್ಗ, ಹಾಸನ ಸಂಯುಕ್ತ ಜಮಾಅತ್ ಬೊಕ್ಕ ದ.ಕ ಜಿಲ್ಲೆದ ಬೇತೆ ಬೇತೆ ಮೊಹಲ್ಲಾದ ಖಾಝಿ ಝೈನುಲ್ ಉಲಮಾ ಎಂ.ಅಬ್ದುಲ್ ಹಮೀದ್ ಮುಸ್ಲಿಯಾರ್ ಮಾಣಿ ಕರೆ ಕೊರ್ತೆರ್ .

ಕೋವಿಡ್ -19 ಮಾರ್ಗಸೂಚಿ ಪಾಲಿಸಾವುನ ಷರತ್ತ್ ದೊಟ್ಟುಗು ಮಸೀದಿ ಬೊಕ್ಕ ದರ್ಗಾಲೆನ್ ಸುರು ಮಲ್ಪರೆ ರಾಜ್ಯ ಸರಕಾರ ಅನುಮತಿ ಕೊರ್ತುಂಡು . ಈ ಸಂಬಂಧ ಸರಕಾರ ಬೊಕ್ಕ ರಾಜ್ಯ ವಖ್ಫ್ ಮಂಡಳಿ ಸುತ್ತೋಲೆ ಕೊರ್ತುಂಡು . ಮಾತಾ ಮಸೀದಿ ದರ್ಗಾಡ್ ಕೋವಿಡ್ ಮಾರ್ಗಸೂಚಿನ್ ಪಾಲಿಸಾವೊಡು ಪಂದ್ ಆರ್ ಪ್ರಕಟಣೆಡ್ ತೆರಿಪಾದುಂಡು.

ಒಡಿಪು ಜಿಲ್ಲೆಡ್ ರಾತ್ರಿ ಕರ್ಫ್ಯೂ : ಪರಿಷ್ಕೃತ ಮಾರ್ಗಸೂಚಿ ಪ್ರಕಟ

ಒಡಿಪು ,ಜುಲೈ 6 : ಜಿಲ್ಲೆಡ್ ಸೋಮವಾರರ್ದ್ ಕೋವಿಡ್-19 ನಿಯಂತ್ರಣಗಾದ್ ರಾಜ್ಯವಿಪತ್ತು ನಿರ್ವಹಣಾ ಪ್ರಾಧಿಕಾರದ ಕಾಯ್ದೆ 2005ಟ್ಟ್ ನಿಹಿತವಾಯಿನ ಅಧಿಕಾರದ ಪ್ರಕಾರ ಕೋವಿಡ್-19 ಕಣ್ಗಾವಲು, ನಿಯಂತ್ರಣ ಬೊಕ್ಕ ಎಚ್ಚರಿಕೆಗಾದ್ ಈ ದುಂಬು ಇತ್ತಿನ ಮಾತಾ ಆದೇಶಲೆನ್ ರದ್ದು ಮಲ್ತ್ ಜು.5 ರ್ದ್ ಕಾಂಡೆ 6:00 ಗಂಟೆರ್ದ್ ಜು.19 ನೆ ಕಾಂಡೆ 6:00 ಗಂಟೆ ಮುಟ ಅನ್ವಯಿಸುಲಕ ಪೊಸ ಮಾರ್ಗಸೂಚಿಲೆನ್ ಕೊರ್ತೆರ್ ಪಂದ್ ಜಿಲ್ಲಾಧಿಕಾರಿ ಜಿ.ಜಗದೀಶ್ ತೆರಿಪಾದೆರ್ .

ಪರಿಷ್ಕೃತ ಮಾರ್ಗಸೂಚಿಲು ದುಂಬುದ ಆದೇಶ ಮುಟ ಚಾಲ್ತಿಡ್ ಉಪ್ಪುಂಡು ಪಂದ್ ಜಿಲ್ಲಾಧಿಕಾರಿ ಪ್ರಕಟಣೆಡ್ ತೆರಿಪಾದೆರ್.

ತೆಂಕನಿಡಿಯೂರು ಕಾಲೇಜು ಪ್ರಾಂಶುಪಾಲೆರಾದ್ ಡಾ. ಗಣನಾಥ ಶೆಟ್ಟಿ ಎಕ್ಕಾರು ಆಯ್ಕೆ

ಒಡಿಪು, ಜುಲೈ 6 : ಸರಕಾರಿ ಪ್ರಥಮ ದರ್ಜೆ ಕಾಲೇಜು ಬೊಕ್ಕ ಸ್ನಾತಕೋತ್ತರ ಅಧ್ಯಯನ ಕೇಂದ್ರ ತೆಂಕನಿಡಿಯೂರು ಮುಲ್ತ ಪೊಸ ಪ್ರಾಂಶುಪಾಲರಾದ್ ಡಾ. ಗಣನಾಥ ಶೆಟ್ಟಿ ಎಕ್ಕಾರು ಅಧಿಕಾರ ಸ್ವೀಕಾರ ಮಲ್ದೆರ್ . ಡಾ. ಗಣನಾಥ ಶೆಟ್ಟಿ ಎಕ್ಕಾರು ಮೆರೆಗ್ ಸೇವಾ ನಿವೃತ್ತರಾಯಿನ ಪ್ರಾಂಶುಪಾಲೆರಾಯಿನ ಪ್ರೊ. ಬಾಲಕೃಷ್ಣ ಎಸ್. ಹೆಗ್ಡೆ ಅಧಿಕಾರ ಹಸ್ತಾಂತರ ಮಲ್ತೆರ್ . ಈ ಪೊರ್ತುಡು ಪ್ರಾದೇಶಿಕ ಜಂಟಿ ನಿರ್ದೇಶಕೆರಾಯಿನ ಪ್ರೊ. ವಸಂತರಾಜ ಶೆಟ್ಟಿ ಪಾಲ್ ಪಡೆದಿತ್ತೆರ್ .

ಡಾ. ಎಕ್ಕಾರು ಕರ್ನಾಟಕ ಸರಕಾರದ ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆದ ರಾಜ್ಯ ಎನ್.ಎಸ್.ಎಸ್. ಕೋಶಡ್ ರಾಜ್ಯ ಎನ್.ಎಸ್.ಎಸ್. ಅಧಿಕಾರಿ ಬೊಕ್ಕ ಸರಕಾರದ ಪದನಿಮಿತ್ತ ಜಂಟಿ ಕಾರ್ಯದರ್ಶಿಯಾದ್ 6 ವರ್ಷ ಸೇವೆ ಮಲ್ದೆರ್ . ಕಾಲೇಜು ಶಿಕ್ಷಣ ಇಲಾಖೆದ ಬೇತೆ ಬೇತೆ ಕಾಲೇಜ್ ಡ್ ಉಪನ್ಯಾಸಕೆರಾದ್ , ಸಹ ಪ್ರಾಧ್ಯಾಪಕೆರಾದ್ ಬೇಲೆ ಮಲ್ದೆರ್ . ಕಾವೂರು ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ಡ್ ಸ್ಥಾಪಕ ಪ್ರಾಂಶುಪಾಲರಾದ್ 4 ವರ್ಷ ಬೇಲೆ ಮಲ್ದೆರ್ . ಜಾನಪದ ಬೊಕ್ಕ ಸಾಹಿತ್ಯ ಕ್ಷೇತ್ರಡ್ ಬೇಲೆ ಮಲ್ದಿನ ಕೃತಿಲೆನ್ ಪ್ರಕಟ ಮಲ್ದೆರ್ . ಡಾ. ಎಕ್ಕಾರು ಒಡಿಪು ತಾಲಾಕು ಕನ್ನಡ ಸಾಹಿತ್ಯ ಪರಿಷತ್ತ್ ದ ಗುರ್ಕಾರ್ಲಾದ್ , ಕುಡ್ಲ ವಿ.ವಿ. ಎನ್.ಎಸ್.ಎಸ್. ಸಂಯೋಜನಾಧಿಕಾರಿಯಾದ್ , ಕನ್ನಡ ಅಧ್ಯಾಪಕರ ಸಂಘದ ಗುರ್ಕಾರ್ಲಾದ್ ಬೇಲೆ ಮಲ್ದೆರ್ . ಮೇರ್ ಎನ್.ಎಸ್.ಎಸ್.ಗೆ ಮಲ್ದಿನ ಸೇವೆಗಾದ್ ರಾಜ್ಯ ಸರಕಾರರ್ದ್ ಅತ್ಯುತ್ತಮ ಸಂಯೋಜನಾಧಿಕಾರಿಯಾದ್ ರಾಜ್ಯ ಪ್ರಶಸ್ತಿ ಬೊಕ್ಕ ಕೇಂದ್ರ ಸರಕಾರರ್ದ್ ರಾಷ್ಟ್ರ ಪ್ರಶಸ್ತಿ ಪಡೆತೆರ್..

ಲಾಕ್ ಡೌನ್ ಪೊರ್ತುಡು ತುಳು ಲಿಪಿನ್ ಪೂರ್ಣವಾದ್ ಕಲ್ತ್ ಅವ್ವೆ ಲಿಪಿಟ್ ಹನುಮಾನ್ ಚಾಲೀಸಾ ಬರೆಯಿನ ಒಡಿಯೂರು ಸ್ವಾಮೀಜಿ

ಬಂಟ್ವಾಳ, ಜುಲೈ 6: ಬಂಟ್ವಾಳ ತಾಲೂಕುದ ಒಡಿಯೂರು ಶ್ರೀಗುರುದೇವಾನಂದ ಸ್ವಾಮೀಜಿಲು ಲಾಕ್ ಡೌನ್ ಪೊರ್ತುಡು ತುಳು ಲಿಪಿನ್ ಪೂರ್ಣವಾದ್ ಕಲ್ತ್ ಅವ್ವೆ ಲಿಪಿಟ್ ತುಳಸೀದಾಸೆರ್ನ ಹನುಮಾನ್ ಚಾಲೀಸನ್ ನೇರವಾದ್ ಅನುವಾದಿಸಾದ್ ಜನಕ್ಲೆನ ಮನ ಗೆಂದಿಯೆರ್ .

ದಕ್ಷಿಣದ ಗಾಣಗಾಪುರ ಪಂದ್ ಗುರ್ತಿಸಾಯಿನ ದ.ಕ ಜಿಲ್ಲೆದ ಬಂಟ್ವಾಳ ತಾಲೂಕುದ ಒಡಿಯೂರುಡು ಉಪ್ಪುನ ಶ್ರೀಗುರುದೇವದತ್ತ ಸಂಸ್ಥಾನನ್ ಶ್ರೀಗುರುದೇವಾನಂದ ಸ್ವಾಮೀಜಿ, ಮಾರ್ಚ್ ತಿಂಗೊಲುರ್ದು ಜುಲೈ ಮುಟ ಲಿಪಿನ್ ಕಲ್ತ್ , ಲಿಪಿ ಮುಖೇನ ಲೀಲಾಜಾಲವಾದ್ ಬರೆಯುನೆನ್ ಕಲ್ತೆರ್ . ತುಳು ಭಾಷೆ, ಕನ್ನಡ ಲಿಪಿತ ಮುಖೇನ ಸಾಹಿತಿ ವಿ.ಬಿ.ಅರ್ತಿಕಜೆ ಬರೆಯಿನ ತುಳಸೀದಾಸೆರ್ ರಚನೆ ಮಲ್ತಿನ ಹನುಮಾನ್ ಚಾಲೀಸಾನ್ ಸುರುತ್ತ ಸಲ ತುಳು ಲಿಪಿಟ್ ಬರೆಯೆರ್ .

ಈ ಸಲತ ಲಾಕ್ಡೌನ್ ಪೊರ್ತುಡು ತುಳಸೀದಾಸ್ ಹನುಮಾನ್ ಚಾಲೀಸಾನ್ ನೇರವಾದ್ ತುಳು ಭಾಷೆಗ್ ಅನುವಾದಿಸಾದ್ ತುಳುಲಿಪಿಟೇ ರಚನೆ ಮಲ್ತೆರ್ . ಆತೆ ಅತ್ತoದೆ ಏಕೀಶ್ಲೋಕ ರಾಮಾಯಣ, ಶ್ರೀಕೃಷ್ಣ ಲೀಲಾಮೃತ, ಚರ್ತುಶ್ಲೋಕಿ ಮದ್ಭಾಗವತ ಇಂಚ ಪುರಾಣಲೆನ್ ತುಳು ಲಿಪಿಟೇ ಬರೆದ್ ಮುಗಿತ್ ದೆರ್ .