July 13, 2021

ಕರ್ನಾಟಕ ರಾಜ್ಯ ಸಹಕಾರಿ ಮಹಾಮಂಡಲದ ನಿರ್ದೇಶಕೇರಾದ್ ಉಡುಪಿ ಮಲಬಾರ್ ಗೋಲ್ಡ್ ವತಿಡ್ದ್ ಮಾನಾದಿಗೆ

ಉಡುಪಿ : ಕರ್ನಾಟಕ ರಾಜ್ಯ ಸಹಕಾರಿ ಮಹಾಮಂಡಲದ ನಿರ್ದೇಶಕೇರಾದ್ ಆಯ್ಕೆ ಆಯಿನ ಜಯಕರ ಶೆಟ್ಟಿ ಇಂದ್ರಾಳಿ ಮೆರೆಗ್ ಉಡುಪಿ ಮಲಬಾರ್ ಗೋಲ್ಡ್ &ಡೈಮಂಡ್ಸ್ ವತಿಡ್ದ್ ಮಾನಾದಿಗೆ ಮಲ್ತೆರ್.ಬುಧವಾರ ಉಡುಪಿದ ಜಗನ್ನಾಥ ಸಭಾಭವನಡ್ ನಡತಿನ ಸ್ನೇಹಕೂಟಡ್ ಈ ಮಾನಾದಿಗೆ ನಡತುಂಡ್.

ಈ ಪೊರ್ತುಡ್ ಮಲಬಾರ್ ಗೋಲ್ಡ್ & ಡೈಮಂಡ್ಸ್ ಉಡುಪಿದ ಮುಖ್ಯಸ್ಥೆರಾಯಿನ ಹಫೀಜ್ ರೆಹಮಾನ್ ಈ ಮಾನಾದಿಗೆ ಮಲ್ತೆರ್.ಮಲಬಾರ್ ಗೋಲ್ಡ್ ದ ಸ್ಟೋರ್ ಮೆನೇಜರ್ ರಾಘವೇಂದ್ರ ನಾಯಕ್ ತುಳುಕೂಟದ ಮಹಮ್ಮದ್ ಮೌಲಾ,ಗಂಗಧರ ಕಿದಿಯೂರು,ತಾರಾ ಆಚಾರ್ಯ,ಚೈತನ್ಯ ಎಮ್.ಜಿ.,ಉಪಸ್ಥಿತರಿತ್ತೆರ್.

ಮಲ್ಪೆ ಅಯ್ಯಪ್ಪ ಮಂದಿರದ ಪೊಸ ಅಧ್ಯಕ್ಷೆರಾದ್ ಧನಂಜಯ್ ಕಾಂಚಾನ್ ಮಲ್ಪೆ ಆಯ್ಕೆ

ಮಲ್ಪೆ, ಜುಲೈ 13: ಮಲ್ಪೆ ಅಯ್ಯಪ್ಪ ಮಂದಿರದ ಪೊಸ ಅಧ್ಯಕ್ಷೆರಾದ್ ಧನಂಜಯ್ ಕಾಂಚಾನ್ ಮಲ್ಪೆ ಮೇರ್ ಆಯ್ಕೆ ಆತೆರ್.ನಿರಂತರವಾದ್ ಧಾರ್ಮಿಕ ಕ್ಷೇತ್ರೊಡ್ ತೊಡಗಿಸಾವೊಂದುಪ್ಪುನ ಧನಂಜಯ್ ಮೇರ್ ಉಡುಪಿ ತಾಲೂಕು ಭಜನಾ ಒಕ್ಕೂಟದ ಅಧ್ಯಕ್ಷೆರಾದುಲ್ಲೆರ್.

ಬೇತೆ ಬೇತೆ ಸಂಘ ಸಂಸ್ಥೆಲೆಡ್ ಕ್ರಿಯಾಶೀಲೆರಾದ್ ಬೇಲೆ ಮಲ್ತೊಂದುಲ್ಲೆರ್..ಎಲ್ಯಪ್ರಾಯೊಡೇ ಭಜನೆಡ್ ಆಸಕ್ತಿ ಇತ್ತಿನ ಮೇರ್ ಭಜನಾ ಮಂದಿರದ ಬುಲೆಚ್ಚಿಲ್ ಗಾದ್ ಎಡ್ಡೆ ಬೇಲೆ ಮಲ್ತೊಂದು ,ಭಜನಾ ಕ್ಷೇತ್ರೊಡ್ ನಿರಂತರವಾದ್ ತೊಡಗಿಸಾವೊಂದು ಊರುದಕ್ಲೆನ ಉಡಲ್ ಗೆಂದುದೆರ್..

ಕುಡ್ಲ ಲಯನ್ಸ್ ಕ್ಲಬ್ ದ ಪೊಸ ಪದಾಧಿಕಾರಿಲೆನ ಪದಗ್ರಹಣ ಲೇಸ್

ಕುಡ್ಲ, ಜುಲೈ 13: ಲಯನ್ಸ್ ಕ್ಲಬ್ ಕುಡ್ಲ ಘಟಕಗ್ ಪೊಸ ಪದಾಧಿಕಾರಿಲೆನ ಪದಗ್ರಹಣ ಲೇಸ್ ಪೇಂಟೆದ ಮಲ್ಲಿಕಟ್ಟೆ ಲಯನ್ ಸೇವಾ ಮಂದಿರಡ್ ನಡತುಂಡು.

ನಿಕಟ ಪೂರ್ವ ಗುರ್ಕಾರ್ಲಾಯಿನ ಕೃಷ್ಣನಂದ ಪೈ ಮುತಾಲಿಕೆಡ್ ಪದಗ್ರಹಣ ಲೇಸ್ ನಡತುಂಡು . ಪೊಸ ಗುರ್ಕಾರ್ಲಾದ್ ಬಿ.ಸತೀಶ್ ರೈ, ಕಾರ್ಯದರ್ಶಿಯಾದ್ ಸುಪ್ರಿತಾ ಜಿ. ಶೆಟ್ಟಿ, ಕೋಶಾಧಿಕಾರಿಯಾದ್ ಡೆನ್ನಿಸ್ ರೋಡ್ರಿಗಸ್ ಸಹಿತ ಕೆಲವು ಪದಾಧಿಕಾರಿಲು ಪ್ರಮಾಣ ವಚನ ಸ್ವೀಕಾರ ಮಲ್ತೆರ್ .

ನಿಕಟಪೂರ್ವ ಕಾರ್ಯದರ್ಶಿ ಪ್ರಶಾಂತ್ ಕಡಬಾ ಬೊಕ್ಕ ನಿಕಟಪೂರ್ವ ಕೋಶಾಧಿಕಾರಿ ಎಂ.ಸುಧಕರ್ ಶೆಟ್ಟಿ ಮೇರ್ ನಿರ್ಗಮನ ಗುರ್ಕಾರ್ಲಾಯಿನ ಕೃಷ್ಣನಂದ ಪೈ ಬೊಕ್ಕ ಆರ್ನ ಧರ್ಮಪತ್ನಿ ಕವಿತಾ ಪೈ ಮೆರೆನ್ ಮಾನದಿಗೆ ಮಲ್ತೆರ್.

ಇನಿ ಎಸೆಸೆಲ್ಸಿ ಜೋಕ್ಲೆಗ್ ಸೀದಾ ಫೋನ್ ಇನ್ ಕಾರ್ಯಕ್ರಮ

ಕುಡ್ಲ, ಜುಲೈ 13: ಪ್ರಸಕ್ತ ಸಾಲ್ ದ ಎಸೆಸೆಲ್ಸಿ ಪರೀಕ್ಷೆ ಜು.19 ಬೊಕ್ಕ 22ಕ್ಕ್ ನಡಪರೇ ಉಂಡು , ಪರೀಕ್ಷೆಗ್ ಸಂಬಂಧ ಪಟ್ಟಿನಂಚ ಸಂದೇಹ ಪರಿಹರ ಮಲ್ಪರೆ ಇನಿ ಕಾಂಡೆ 10:30ಕ್ ದ.ಕ. ಜಿಲ್ಲೆದ ಜೋಕ್ಲೆಗ್ ‘ನೇರ ಫೋನ್ ಇನ್’ ಕಾರ್ಯಕ್ರಮ ಅಟ್ಟನೆ ಮಲ್ದೆರ್ .

ಪರೀಕ್ಷೆ ಬಗ್ಗೆ ಜಿಲ್ಲೆಡ್ ಮಲ್ದಿನ ತಯಾರಿ ಬೊಕ್ಕ ಪರೀಕ್ಷೆ ಬರೆಪಿನ ಜೋಕ್ಲೆಗ್ ಅನುಮಾನ, ಸಂದೇಹ ಇತ್ತುಂಡ ಪ್ರಶ್ನೆ ಕೇಂದ್ ಅವೆನ್ ಪರಿಹರಿಸಾಯೆರೆ ಜಿಲ್ಲಾ ಸಾರ್ವಜನಿಕ ಶಿಕ್ಷಣ ಇಲಾಖೆ ಆಕಾಶವಾಣಿ ಕುಡ್ಲ ಒಟ್ಟು ಸೇರಿಗೆಡ್ ಈ ಲೇಸ್ ಅಟ್ಟನೆ ಮಲ್ದೆರ್ .

ದೂ.ಸಂ.: 0824-2211999, 8277038000 ಗ್ ಲೆಪ್ಪು ಕೊರ್ಪಿನ ಮುಖೇನ ಜಿಲ್ಲೆದ ಮಾತಾ ಜೋಕುಲು ಬೊಕ್ಕ ಪೋಷಕೆರ್ ಪ್ರಯೋಜನ ಪಡೆಯರೆ ಸಾರ್ವಜನಿಕ ಶಿಕ್ಷಣ ಇಲಾಖೆದ ದ.ಕ. ಜಿಲ್ಲಾ ಉಪನಿರ್ದೇಶಕೆರಾಯಿನ (ಆಡಳಿತ) ಪ್ರಕಟನೆಡ್ ತೆರಿಪಾದೆರ್.