July 3, 2021

ಕುಡ್ಲಡ್ ಕ್ರಿಕೆಟ್ ಸ್ಟೇಡಿಯಂ ನಿರ್ಮಾಣ ಆಯೆರೆ ಉಂಡು : ಅಭಯಚಂದ್ರ ಜೈನ್

ಕುಡ್ಲ , ಜು.3: ಪದ್ಮಶ್ರೀ ಪುರಸ್ಕೃತ ದಿ. ಮಿಲ್ಕಾ ಸಿಂಗ್ ಕ್ರೀಡಾಪಟುಲೆಗ್ ಸ್ಫೂರ್ತಿದ ಚಿಲುಮೆಯಾತುಂಡು , ಮೆರೆಗ್ ಮರಣೋತ್ತರ ಭಾರತ ರತ್ನ ಕೊರೊಡು ಪಂದ್ ಮಾಜಿ ಕ್ರೀಡಾ ಸಚಿವ ಅಭಯಚಂದ್ರ ಜೈನ್ ಆಗ್ರಹ ಮಲ್ತೆರ್ .

ದ.ಕ. ಜಿಲ್ಲಾ ಕಾಂಗ್ರೆಸ್ ವತಿರ್ದ್ ಮಿಲ್ಕಾ ಸಿಂಗ್ ಭಾವಚಿತ್ರಗ್ ಮಾಲಾರ್ಪಣೆ ಮಲ್ತ್ ಸಂತಾಪ ಸೂಚನೆದ ಬೊಕ್ಕ ಸುದ್ದಿ ಗಾರೆರ್ನೋಟ್ಟಿಗೆ ಪಾತೆರಿಯೆರ್.

ಟೋಕಿಯೋಡ್ ಒಲಿಂಪಿಕ್ಸ್ ನಡತೊಂದು ಉಂಡು , ಅಲ್ಪ ಭಾರತೀಯ ಕ್ರೀಡಾಪಟುಲು ದಾಖಲೆ ನಿರ್ಮಾಣ ಮಲ್ಪುವ ಪನ್ಪಿನ ಆಶಯಡ್ ಭಾರತದ ‘ಫ್ಲೈಯಿಂಗ್ ಸಿಖ್’ ಖ್ಯಾತಿದ ಮಿಲ್ಕಾ ಸಿಂಗ್‌ನಕ್ಲೆನ್ ನೆಂಪು ಮಲ್ಪುನ ಬೇಲೆನ್ ಕಾಂಗ್ರೆಸ್ ವತಿರ್ದ್ ಮಲ್ಪುವ ಪಂದ್ ಪಂಡೆರ್.

ಕ್ರೀಡಾ ಸಚಿವೆರಾಯಿನ ಪೊರ್ತುಡು ಎಮ್ಮೆಕೆರೆಡ್ ಅಂತಾರಾಷ್ಟ್ರೀಯ ಮಟ್ಟದ ಈಜುಕೊಳ ನಿರ್ಮಾಣಗ್ ಐನ್ ಕೋಟಿ ರೂಪಾಯಿದ ಅನುದಾನದೊಟ್ಟುಗು ಶಿಲಾನ್ಯಾಸ ನಡಪರೇ ಉಂಡು ಪಂದ್ ಪಂಡೆರ್.

ಡೆಲ್ಟಾ ಪ್ಲಸ್ ಆತಂಕ : ತಲಪಾಡಿಡ್ ಜಾಸ್ತಿ ಆಯಿನ ಆತಂಕ

ಉಳ್ಳಾಲ, ಜುಲೈ 3 : ಡೆಲ್ಟಾ ಪ್ಲಸ್ ಆತಂಕ ನೆಲೆಟ್ಟ್ ಕರ್ನಾಟಕ- ಕೇರಳದ ತಲಪಾಡಿ ಗಡಿಟ್ ಪೊಲೀಸೆರ್ ತಪಾಸಣೆನ್ ಶುಕ್ರವಾರರ್ದ್ ಜಾಸ್ತಿ ಮಲ್ದೆರ್ . ಕೇರಳರ್ದ್ ಬರ್ಪಿನ ಮಾತಾ ಗಾಡಿನ್ ಜಾಸ್ತಿ ತಪಾಸಣೆ ಮಲ್ದೆರ್.

ಈ ಕಾರಣರ್ದ್ ಶುಕ್ರವಾರ ತಲಪಾಡಿ ಗಡಿಟ್ ಗಾಡಿ ಸಾಲ್ ಉಂತುದುಂಡು. 72 ಗಂಟೆದ ಉಲಯಿ ನೆಗೆಟಿವ್ ರಿಪೋರ್ಟ್ ಇಜ್ಜಂದಿನಕ್ಲೆಗ್ ಗಡಿಟೇ ರ‍್ಯಾಂಡಂ ಪರೀಕ್ಷೆ ನಡಪಾಯೆರ್ .

ನಿತ್ಯ ಉದ್ಯೋಗ, ವ್ಯವಹಾರಗ್ ಬರ್ಪಿನಕ್ಲೆಗ್ ಶುಕ್ರವಾರರ್ದ್ 15 ದಿನಕೊರ ವರದಿ ಸಲ್ಲಿಕೆನ್ ಕಡ್ಡಾಯ ಮಲ್ದೆರ್ . ಕಾಂಡೆ ಬೈಕ್ ಬೊಕ್ಕ ಕಾರ್ ಲೆನ್ ಪೊಲೀಸೆರ್ ತೀವ್ರ ತಪಾಸಣೆ ಮಲ್ದೆರ್ . ಟೆಸ್ಟ್ ಮಲ್ಪಾಯಿನ ಬೊಕ್ಕನೆ ಮಾತೆರೆನ್ಲ ಕುಡ್ಲಗ್ ಪೋಯೆರೆ ಅವಕಾಶ ಕೊರ್ತೆರ್.

ಅಪರ ಸರಕಾರಿ ವಕೀಲೆರ್ನ ಹುದ್ದೆಗ್ ಅರ್ಜಿ ಲೆಪ್ಪೋಲೆ

ಒಡಿಪು , ಜುಲೈ 3: ಜಿಲ್ಲೆದ ಒಡಿಪು ಬೊಕ್ಕ ಕಾರ್ಕಳ ತಾಲೂಕು ಅಪರ ಸರಕಾರಿ ವಕೀಲೆರ್ನ ಹುದ್ದೆಡ್ ಭರ್ತಿ ಮಲ್ಪರೆ ರಾಜ್ಯ ಸರಕಾರ ಮಂಜೂರಾತಿ ಕೊರ್ತುಂಡು , ಏಳ್ ವರ್ಷದ ಕಾಲ ವಕೀಲೆರ್ನ ವೃತ್ತಿ ಪೂರೈಕೆ ಅರ್ಹ ವಕೀಲೆರೆರ್ದ್ ಅರ್ಜಿ ಆಹ್ವಾನ ಮಲ್ದೆರ್ .

ಅರ್ಜಿ ಸಲ್ಲಿಸಾಯೆರೆ ಜುಲೈ 15 ಕಡೆತ ದಿನ. ಅರ್ಜಿ ನಮೂನೆ ಬೊಕ್ಕ ಎಚ್ಚದ ಮಾಹಿತಿಗಾದ್ ಜಿಲ್ಲಾಧಿಕಾರಿ ಕಚೇರಿದ ಆಡಳಿತ ಶಾಖೆನ್ ಲೆಪ್ಪು ಕೊರೊಡು ಪಂದ್ ಜಿಲ್ಲಾಧಿಕಾರಿ ಜಿ. ಜಗದೀಶ್ ಪ್ರಕಟಣೆಡ್ ತೆರಿಪಾದೆರ್.

ಹುಷಾರ್ ದಾಂತೆ ತೀರ್ ಪೋಯಿನ ಶಿಕ್ಷಣ ತಜ್ಞ ಹಾಜಿ ಡಿ.ಕೆ ಅಹಮದ್

ಕುಡ್ಲ, ಜುಲೈ 3: ಶಿಕ್ಷಣ ತಜ್ಞ ಹಾಜಿ ಡಿ.ಕೆ. ಅಹ್ಮದ್ (ಕುಂಞಿ ಅಹ್ಮದ್ ಮಾಸ್ಟರ್ ಕೈಕಂಬ) ಅಲ್ಪಕಾಲದ ಅಸೌಖ್ಯರ್ದ್ ಕೈಕಂಬದ ಸ್ವಗೃಹಡ್ ಶುಕ್ರವಾರ ಕಾಂಡೆ ತೀರ್ ಪೋಯೆರ್ . ಮೆರೆಗ್ 84 ವರ್ಷ ಆತುಂಡು .

ಮೃತೆರ್ ಸಹಾಯಕ ಶಿಕ್ಷಣ ಅಧಿಕಾರಿಯಾದ್ ಸೇವೆ ಮಲ್ದೆರ್ . ಮೇರ್ ಸದಾ ಕ್ರಿಯಾಶೀಲೆರಾದ್ , ಮೃದು ಸ್ವಭಾವ ದಾರ್. ಉಲಮಾ, ಸಾದಾತುದ ನಿಕಟ ಸಂಬಂಧ ಇತ್ತಿನ ಅಹ್ಮದ್ ಹಾಜಿ ಮೇರ್ ಮೂಳೂರು ಸುನ್ನಿ ಸೆಂಟರ್, ಕೈಕಂಬ ಸುನ್ನಿ ಮರ್ಕಝ್ ಸಹಿತ ನನಾತ್ ಸಂಘ-ಸಂಸ್ಥೆಡ್ ಸಕ್ರಿಯೆರಾದ್ ಇತ್ತೆರ್ .