July 2021

ಎಸೆಸೆಲ್ಸಿ ಪರೀಕ್ಷೆಗ್ ಕುಡ್ಲಡ್ ಮಾತಾ ತಯಾರಿ

ಕುಡ್ಲ, ಜುಲೈ 28: ಎಸೆಸೆಲ್ಸಿ ಪರೀಕ್ಷೆಗ್ ದ.ಕ. ಜಿಲ್ಲೆಡ್ ಸಕಲ ಸಿದ್ಧತೆನ್ ಮಲ್ದೆರ್ ಇತ್ತೇ , 9 ಜನ ಕೊರೋನ ಸೋಂಕಿತ ಜೋಕುಲು ನೋಂದಾವಣೆ ಮಲ್ದೆರ್ ಅಕ್ಲೆಗ್ ಕೋವಿಡ್ ಕೇರ್ ಸೆಂಟರ್‌ಡ್ ಸಕಲ ವ್ಯವಸ್ಥೆದೊಟ್ಟುಗು ಪರೀಕ್ಷೆಗ್ ತಯಾರಿ ಮಲ್ದೆರ್ .

ಸಂಸದ ನಳಿನ್ ಕುಮಾರ್ ಕಟೀಲ್ ಗುರ್ಕಾರ್ಮೆಡ್ ದ.ಕ. ಜಿಲ್ಲಾ ಪಂಚಾಯತ್‌ದ ನೇತ್ರಾವತಿ ಸಭಾಂಗಣಡ್ ಕೋಡೆ ದ.ಕ. ಜಿಲ್ಲಾ ಅಭಿವೃದ್ಧಿ ಸಮನ್ವಯ ಬೊಕ್ಕ ಉಸ್ತುವಾರಿ (ದಿಶಾ) ಸಮಿತಿ ಸಭೆಟ್ ಡಿಡಿಪಿಐ ಮಲ್ಲೇಸ್ವಾಮಿ ಈ ಮಾಹಿತಿ ಕೊರಿಯೆರ್ .

ದ.ಕ. ಜಿಲ್ಲೆಡ್ ಈ ಸಲ 179 ಪರೀಕ್ಷಾ ಕೇಂದ್ರಡ್ 29351 ರೆಗ್ಯುಲರ್, 694 ಖಾಸಗಿ, 2050 ಶಾಲಾ ಪುನರಾವರ್ತಿತ ಅಭ್ಯರ್ಥಿಲು , 538 ಖಾಸಗಿ ಪುನರಾವರ್ತಿತ ಸೇರಿನಂಚ ಒಟ್ಟು 32636 ಜೋಕುಲು ಎಸೆಸೆಲ್ಸಿ ಪರೀಕ್ಷೆ ಬರೆಯರೆ ಉಲ್ಲೆರ್ .

ಕೋವಿಡ್ ಮಾರ್ಗಸೂಚಿ ಪಾಲಿಸಾದ್ ನಮಾಜ್ ಮಲ್ಪರೆ ಮಾಣಿ ಉಸ್ತಾದ್ ಕರೆ

ಕುಡ್ಲ, ಜುಲೈ 18: ಸರಕಾರದ ಕೋವಿಡ್ ಮಾರ್ಗಸೂಚಿನ್ ಪಾಲಿಸಾವುನ ಮುಖೇನ ಈದ್ ನಮಾಝ್ ಬೊಕ್ಕ ಖುತ್ಬಾನ್ ಆನಿ ಕಾಂಡೆ ಆಯಿನಾತ್ ಬೇಗ ಮಲ್ಪರೆ ಮಾತಾ ಮೊಹಲ್ಲಾಡ್ ಪ್ರಯತ್ನ ಮಲ್ಪೊಡು ಪಂದ್ ಒಡಿಪು, ಚಿಕ್ಕಮಗಳೂರು, ಹಾಸನ, ಸಂಯುಕ್ತ ಜಮಾಅತ್ ಬೊಕ್ಕ ದ.ಕ. ಜಿಲ್ಲೆದ ಬೇತೆ ಬೇತೆ ಮೊಹಲ್ಲಾದ ಖಾಝಿ ಝೈನುಲ್ ಉಲಮಾ ಎಂ. ಅಬ್ದುಲ್ ಹಮೀದ್ ಮುಸ್ಲಿಯಾರ್ ಮಾಣಿ ತೆರಿಪಾದೆರ್ .

ಕುಡ್ಲಡ್ ಬಾರಿ ಬರ್ಸ : ರೆಡ್ ಅಲರ್ಟ್ ಘೋಷಣೆ

ಬೆಂಗ್ಳೂರು ಜುಲೈ 18: ಕರಾವಳಿ ಭಾಗದ ಉತ್ತರ ಕನ್ನಡ, ದಕ್ಷಿಣ ಕನ್ನಡ, ಒಡಿಪುಡು ಜು.18 ಬೊಕ್ಕ 19 ಗ್ ತೆಡಿಲ್ ಸಮೇತ ಬಾರಿ ಬರ್ಸ ಬರ್ರೆ ಉಂಡು “ರೆಡ್‌ ಅಲರ್ಟ್‌’ ಘೋಷಣೆ ಮಲ್ದೆರ್ ಪಂದ್ ಹವಾಮಾನ ಇಲಾಖೆ ತೆರಿಪಾದುಂಡು .

ರಾಜ್ಯದ ಕರಾವಳಿ ಬೊಕ್ಕ ದಕ್ಷಿಣ ಒಳನಾಡ್ ಡ್ ಮುಂಗಾರು ಬಿರುಸು ಆತುಂಡು , ಈ ಭಾಗದ ಜಿಲ್ಲೆಡ್ ಜು.20 ಮುಟ ಬಾರಿ ಬರ್ಸ ಬರ್ಪಿನ ಮುನ್ಸೂಚನೆ ಉಂಡು .

ದಕ್ಷಿಣ ಒಳನಾಡ್ ದ ಶಿವಮೊಗ್ಗ, ಕೊಡಗು, ಹಾಸನ, ಚಿಕ್ಕಮಗಳೂರು ಜಿಲ್ಲೆಡ್ ಲಾ ‘ಆರೆಂಜ್ ಅಲರ್ಟ್‌’, ತುಮಕೂರು, ದಾವಣಗೆರೆ, ಚಿತ್ರದುರ್ಗ, ಬಳ್ಳಾರಿ ಜಿಲ್ಲೆಡ್ ‘ಯೆಲ್ಲೊ ಅಲರ್ಟ್‌’ ಘೋಷಣೆ ಮಲ್ದೆರ್.

ಸಕಲಕಲಾವಲ್ಲಭ ಅರಳು ಪ್ರತಿಭೆಲಾಯಿನ ಕುಮಾರಿ ಶ್ರಾವ್ಯಶ್ರೀ – ಕಾವ್ಯಶ್ರೀ

“ಕಲ್ಪುನ ಆಸಕ್ತಿ ಇತ್ತ್oಡ ಯಾವು ,ಮಾತಾ ಕಲೆಕ್ಲೆನ್ಲಾ  ಕರಗತ ಮಲ್ತೊಂದು ಸಾಧನೆದ ಶಿಖರ ಏರೆರೆ  ಸಾಧ್ಯ . ಕಲಿಕಾ ಆಸಕ್ತಿದೊಟ್ಟುಗು ಕಲೆತುಲಯಿ ತನನ್ ತಾನ್ ತೊಡಗಾವೊಂದಿನ ಒಂಜೇ ಕುಟುಮದ ಅಪ್ರತಿಮ ಪ್ರತಿಭೆಲಾಯಿನ ಕುಮಾರಿ ಶ್ರಾವ್ಯಶ್ರೀ ಬೊಕ್ಕ ಕುಮಾರಿ ಕಾವ್ಯಶ್ರೀ ಉಬರಳೆ. 

ದುರ್ಗಾಪ್ರಸಾದ್ ಬೊಕ್ಕ ವಿಜಯಲಕ್ಷ್ಮಿ ದಂಪತಿಲೆನ ರಡ್ಡ್ ಪಿಂಗಾರದ ಪುರ್ಪಲಾಯಿನ ಈ ಜೋಕುಲು ತನ್ನ ಕಿನ್ಯ ಪ್ರಯೋಡೆ ಕಲಾಮಾತೆನ ಆಶೀರ್ವಾದ ಪಡೆತೆರ್ ಪಂಡ ತಪ್ಪಾವಂದ್.

ತನ್ನ ಪ್ರಾಥಮಿಕ ಶಿಕ್ಷಣನ್ ಕೇರಳದ ಎಸ್. ಆರ್. ಎ. ಯು. ಪಿ. ಎಸ್ ಕುಬಣುರುಡು ಮಲ್ತಿನ ಮೆಕುಲು ಪ್ರೌಢ ಶಾಲಾ ಶಿಕ್ಷಣನ್ ಕೇರಳದ ಜಿ. ಎಚ್. ಎಸ್. ಎಸ್ ಬೇಕೂರುಡು ಮಲ್ತರ್. ಐರ್ದ್ ಬೊಕ್ಕ ತನ್ಕುಲೆ ಪದವಿ ಶಿಕ್ಷಣಗ್ ಕುಡ್ಲಗ್ ಬತ್ತಿನ ಕುಮಾರಿ ಶ್ರಾವ್ಯಶ್ರೀ  ತನ್ನ ಪಿಯುಸಿ ಶಿಕ್ಷಣನ್ ಕುಡ್ಲದ ಕೆನರಾ ಕಾಲೇಜ್ ಡ್ ಮಲ್ತ್oಡ ಕುಮಾರಿ ಕಾವ್ಯಶ್ರೀ ಅತ್ತಾವರದ ಸರೋಜಿನಿ ಮಧುಸೂಧನ್ ಕುಶೆ ಕಾಲೇಜ್ ಡ್ ಪಿಯುಸಿ ಶಿಕ್ಷಣ ಮುಗಿತ್ ದ್ ಕುಡ್ಲದ ಕೆನರಾ ಕಾಲೇಜ್ ಡ್ ಪದವಿ ಶಿಕ್ಷಣ ಮಲ್ತೊಂದು ಉಲ್ಲೆರ್.ಪ್ರಸ್ತುತ ಕುಡ್ಲಡೆ ವ್ಯಾಸಂಗ ಮಲ್ತೊಂದು ಉಪ್ಪುನ ಈ ರಡ್ಡ್ ಜೋಕುಲು, ನೃತ್ಯ,ಯಕ್ಷಗಾನ,ಸಂಗೀತ,ಹರಿಕಥೆ ಇಂಚ ಅವ್ವೆತೋ ಕಲೆಕ್ಲೆನ್ ಪ್ರಯೋಗ ಮಲ್ದಿನ ಮೆಕುಲು ತಮ್ಮ ಸಂಗೀತ ಶಿಕ್ಷಣನ್ ಗುರುಕುಲಾಯಿನ ಸುನೀತಾ ಬೈಪಾಡಿತ್ತಾಯ ಕುಬನೂರು, ಬೇಕೂರು  ಬೊಕ್ಕ ಭರತನಾಟ್ಯ ಶಿಕ್ಷಣನ್ ಗುರುಕುಲಾಯಿನ  ವಿದುಶಿ ವಿದ್ಯಾಲಕ್ಷ್ಮಿ ಕುಂಬ್ಳೆ ಮೆಕ್ಲೆಡ ಕಲ್ತೊಂದು ಉಲ್ಲೆರ್.
ಅಂಚನೇ ಹರಿಕಥೆ ಅಭ್ಯಾಸನ್ ಕಲಾರತ್ನ ಶಮ್ನಾಡಿಗ ಕುಂಬ್ಳೆ ಮೆರೆಡ ಕಲ್ತೊಂದು ಉಲ್ಲೆರ್.

ಕಲಿಕೆಡ್ಲಾ ಒಂಜಿ ಪಜ್ಜೆ ದುಂಬು ಉಪ್ಪುನ ಈ ರಡ್ಡ್ ಕಲಾವಿದೆರ್ ಅವ್ವೆತೋ ರಾಜ್ಯ ಮಟ್ಟ, ತಾಲೂಕು ಮಟ್ಟಡ್  ದೇಶಭಕ್ತಿಗೀತೆ, ಜಾನಪದ ಗೀತೆ,ಚಿತ್ರಕಲೆ, ನೃತ್ಯ ಮಲ್ದಿನ ಪುಗಾರ್ತೆ ಮೆಕ್ಲೆನವು .ಭರತನಾಟ್ಯಮ್ ಡ್  ಸೀನಿಯರ್, ಶಾಸ್ತ್ರೀಯ ಸಂಗೀತಡ್ ಜೂನಿಯರ್ ವಿಭಾಗಡ್ ಉಪ್ಪುನ ಈ ರಡ್ಡ್ ಪ್ರತಿಭೆಲು ಯುವ ಪೀಳಿಗೆಗ್ ಸ್ಫೂರ್ತಿ ಪಂಡ ತಪ್ಪಾವಂದ್.

“ಏರೆಗೇ ಆವಡ್  ಯಶಸ್ಸ್ ಪಡೆಯರೇ ರಹಸ್ಯ ಸೂತ್ರೊಲು ದಾಲ ಇಜ್ಜಿ. ಉನ್ನತ ಸ್ಥಾನಗ್ ಮುಟ್ಟೊಡು ಪನ್ಪಿನ ಬಯಕೆ ಅವ್ವೆತೋ ಉತ್ಸಾಹಿಲೆಗ್ ಉಪ್ಪುಂಡು. ಐಕಾದೆ ಅಕುಲು ತಾದಿ ನಾಡೊಂದು ಅಕ್ಲೆನ ಗುರಿ ಮುಟ್ಟುವೆರ್, ಐಕ್ ಪ್ರತ್ಯಕ್ಷ ಉದಾರ್ಮೆ ಈ ರಡ್ಡ್ ಜೋಕುಲು. ಶಾಲಾ ಮಟ್ಟದ ಅವ್ವೆತೋ ಪಂಥೋಡು ಪಾಲ್ ಪಡೆದ್ ಇನಾಮು ಗೆಂದಿನ ಪೆರ್ಮೆ ಮೆಕ್ಲೆನವು. ಪ್ರೌಢ ಶಾಲಾ ವಿಭಾಗದ ರಾಮಾಯಣ ಪರೀಕ್ಷೆಡ್ 94% ಪಡೆದ್ ಮಂಜೇಶ್ವರ ತಾಲೂಕುಗು ಸುರುತ್ತ ಸ್ಥಾನ ಕನೈದಿನ ಪೆರ್ಮೆ ಕುಮಾರಿ ಶ್ರಾವ್ಯಶ್ರೀ ಮೆರೆಗ್ ಉಂಡು.

ಸಕಲಕಲಾವಲ್ಲಭೆರಾಯಿನ ಈ ಅರಳು ಪ್ರತಿಭೆಲೆಗ್ ಪೋಷಕೆರ್ನ ಸಾಕಾರ, ಕುಟುಂಬ ದಕ್ಲೆನ ಪ್ರೋತ್ಸಾಹನೇ ಸ್ಫೂರ್ತಿ ಪಂದ್ ಈ ರಡ್ಡ್ ಜೋಕುಲು ಪನ್ಪೆರ್. ನ್ರತ್ಯ, ಭರತನಾಟ್ಯ, ಸಂಗೀತ, ಚಿತ್ರಕಲೆ, ಹರಿಕಥೆ ಇಂಚ ನಾನಾ ಕಲಾ ಕ್ಷೇತ್ರಡ್ ತನ್ನ ಕಲಾ ಪ್ರೌಢಿಮೆನ್ ಮೆರೆತಿನ ಈ ರಡ್ಡ್ ಪುರ್ಪೊಲು ಇತ್ತೆ ಕಲಾ ಕ್ಷೇತ್ರಡ್ ಅಂಚನೇ ಶೈಕ್ಷಣಿಕ ಕ್ಷೇತ್ರಡ್ ದಾಲ ಸಾಧನೆ ಮಲ್ಪೊಡು, ಪನ್ಪಿನ ಹಠಟ್ ಛಲ ಬುಡಂದೆ ಹಠ ಕಟ್ದ್ ಸಾಧನೆದ ತಾದಿಗ್ ಪಜ್ಜೆ ದೀವೊಂದು ಉಪ್ಪುನ ಈ ಜೋಕ್ಲೆಗ್ ನನಾತ್ ಅನನ್ಯ ಅವಕಾಶಲು ನಾಡೊಂದು ಬರಡ್  ಕಿನ್ಯ ಪ್ರಯೋಡೆ ಕಟ್ಟಿನ ಮಾಮಲ್ಲ ಕನ ನೆರವೇರಡ್ ಪಂದ್ ನಮ್ಮ ಆಶಯ.

✍️ಶ್ರೀನಿಧಿ ಶೆಟ್ಟಿ 

ಗ್ರಾಮಾಭಿವೃದ್ಧಿ ಯೋಜನೆ ಒಕ್ಕೂಟದ ಪ್ರಗತಿಬಂಧು ಸ್ವಸಹಾಯ ಸಂಘದ ಸದಸ್ಯೆರೆಗ್ ಲಾಭಾಂಶ ವಿತರಣೆ ಪಟ್ಟುನ ಲೇಸ್

ಕಲ್ಲಡ್ಕ ಜುಲೈ 17, ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಸದಸ್ಯೆರೆಗ್ ಕೋರೋನ ಸಂಕಷ್ಟದ ಪೊರ್ತುಡು ಲಾಭಾಂಶ ವಿತರಣೆ ಮಲ್ದಿನವು ಬಾರಿ ಕೃತಜ್ಞತಾಪೂರ್ವಕ ವಾತುಂಡು . ಪಂದ್ ಗ್ರಾಮಾಭಿವೃದ್ಧಿ ಯೋಜನೆದ ಕಲ್ಲಡ್ಕ ವಲಯದ ಒಕ್ಕೂಟ ಗುರ್ಕಾರ್ಲಾಯಿನ ಶ್ರೀಯುತ ಈಶ್ವರ ನಾಯ್ಕೆರ್ ಕಲ್ಲಡ್ಕದ ಪೂರ್ಲಿಪ್ಪಾಡಿ ಮರಾಠಿ ಸಮಾಜ ಸೇವಾ ಭವನಡ್ ನಡತಿನ ಗ್ರಾಮಾಭಿವೃದ್ಧಿ ಯೋಜನೆದ ಒಕ್ಕೂಟದ ಪ್ರಗತಿಬಂಧು ಸ್ವಸಹಾಯ ಸಂಘದ ಸದಸ್ಯೆರೆಗ್ ಲಾಭಾಂಶ ವಿತರಣೆ ಸಂಘದ ಸುರಕ್ಷಾ ವಿಮಾ ಮೊತ್ತ ಬೊಕ್ಕ ಪ್ರಕೃತಿ ವಿಕೋಪ ಇತ್ತಿನ ಕುಟುಂಬಗ್ ಪರಿಹಾರ ನಿಧಿ ವಿತರಣಾ ಕಾರ್ಯಕ್ರಮನ್ ತುಡರ್ ಅರ್ಲಾದ್ ಉದಿಪನ ಮಲ್ತ್ ಪಾತೆರಿಯೆರ್ .

ಮಲ್ಲ ಬಿನ್ನೆರ್ ಆಯಿನ ಗ್ರಾಮಾಭಿವೃದ್ಧಿ ಯೋಜನೆ ಬಿ ಸಿ ಟ್ರಸ್ಟ್( ರಿ) ವಿಟ್ಲ ನೆತ್ತ ಯೋಜನಾಧಿಕಾರಿ ಶ್ರೀಯುತ ಚನ್ನಪ್ಪಗೌಡ ಮೇರ್ ಶ್ರೀಯುತ ಕಾವಂದೆರ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಮುಖೇನ ಸದಸ್ಯೆರೆಗ್ ಅವ್ವೆತೋ ಲೇಸ್ ಅಟ್ಟನೆ ಮಲ್ದೆರ್ ಆನಿ ನಡಿನ ದೈ ಇನಿ ಫಲ ಕೊರ್ಪಿಲಕ ಬುಳೆತುಂಡು , ಇತ್ತೆದ ಕಷ್ಟದ ಪರಿಸ್ಥಿತಿಗ್ ಸಾಕಾರ ಕೊರ್ಪಿಲಕ ಪ್ರಸಾದ ರೂಪಡ್ ಸದಸ್ಯೆರೆಗ್ ಲಾಭಾಂಶನ್ ವಿತರಣೆ ಮಲ್ತೆರ್ ,ನಮ್ಮ ಕಲ್ಲಡ್ಕ ವಲಯದ 27 ಸಂಘದ ಗುಣಮಟ್ಟದ ವ್ಯವಹಾರಗ್ 5 ಲಕ್ಷದ 50 ಸಾವಿರ ಲಾಭಾಂಶ ಬೈದುಂಡು ಪಂದ್ ಮಾಹಿತಿ ಕೊರಿಯೆರ್.

ಲೇಸ್ ದ ಗುರ್ಕಾರ್ಮೆ ವಹಿಸಿನ ಗೋಳ್ತಮಜಲು ಗ್ರಾಮ ಪಂಚಾಯತ್ ದ ಗುರ್ಕಾರ್ಲಾಯಿನ ಶ್ರೀಯುತ ಅಭಿಷೇಕ್ ಶೆಟ್ಟಿ ಗ್ರಾಮದ ಅಭಿವೃದ್ಧಿ ದೃಷ್ಟಿರ್ದ್ ಯೋಜನೆ ಮಲ್ಪುನ ಮಾತಾ ಕಾರ್ಯಕ್ರಮಗ್ ಲಾ ಪಂಚಾಯತಿರ್ದ್ ಪೂರ್ಣ ಸಾಕಾರ ಕೊರ್ಪ ಪಂದ್ ಪಂಡೆರ್.

ಈ ಲೇಸ್ ಡ್ ಕಲ್ಲಡ್ಕ ಹಾಲು ಉತ್ಪಾದಕರ ಸಂಘದ ಕಾರ್ಯನಿರ್ವಹಣಾಧಿಕಾರಿ ಶ್ರೀಯುತ ರಾಜೇಶ್ ಕೊಟ್ಟಾರಿ ,ಕಲ್ಲಡ್ಕ ಮರಾಠಿ ಸಮಾಜಸೇವಾ ಸಂಘದ ಕಾರ್ಯದರ್ಶಿ ನಾರಾಯಣ ನಾಯ್ಕ, ಗೋಳ್ತಮಜಲು ಬಿ ಒಕ್ಕೂಟದ ಅಧ್ಯಕ್ಷೆ ಶಿವಪ್ಪಗೌಡ, ಕಲ್ಲಡ್ಕ ಒಕ್ಕೂಟ ಅಧ್ಯಕ್ಶೆರಾಯಿನ ಶ್ರೀಮತಿ ತುಳಸಿ, ಜ್ಞಾನವಿಕಾಸ ಸಮನ್ವಯಾಧಿಕಾರಿ ಸವಿತಾ, ವಲಯ ಸೇವಾ ಪ್ರತಿನಿಧಿಲಾಯಿನ ವಿದ್ಯಾ, ಗಿರಿಜಾ, ಕೌಶಿತ, ಉಷಾ ಬೊಕ್ಕ ಸ್ವಸಹಾಯ ಸಂಘದ ಸದಸ್ಯೆರ್ ಪಾಲ್ ಪಡೆದಿತ್ತೆರ್ .

ವಲಯ ಮೇಲ್ವಿಚಾರಕಿ ಶ್ರೀಮತಿ ಸವಿತಾ ನಾರಾಯಣ ಎದುಕೊಂಡೆರ್ ,ಸೇವಾ ಪ್ರತಿನಿಧಿ ಶ್ರೀಮತಿ ಮಾಲತಿ ಸೊಲ್ಮೆ ಸಂದೈತ ಮಲ್ತೆರ್ . ಲೆಕ್ಕ ಪರಿಶೋಧಕ ಶ್ರೀಯುತ ಶಿವಪ್ರಸಾದ್ ಲೇಸ್ ನಡಪಾದ್ ಕೊರಿಯೆರ್ .

ಖಾಸಗಿ ಸಹಭಾಗಿತ್ವದ ವೈದ್ಯಕೀಯ ಕಾಲೇಜು ಸ್ವೀಕೃತ ಅತ್ತ್ ; ಕ್ಯಾಂಪಸ್ ಫ್ರಂಟ್

ಒಡಿಪು , ಜುಲೈ 17: ಶಿಕ್ಷಣದ ವಿಷಯಡ್ ರಾಜ್ಯೋಡೆ ಪುಗಾರ್ತೆ ಪಡೆಯಿನ ನಮ್ಮಒಡಿಪು ಜಿಲ್ಲೆಡ್ ಸರ್ಕಾರಿ ವೈದ್ಯಕೀಯ ಕಾಲೇಜು ಸ್ಥಾಪನೆ ಮಲ್ಪರೆ ಕ್ಯಾಂಪಸ್ ಫ್ರಂಟ್ ಒಡಿಪು ಜಿಲ್ಲಾ ಸಮಿತಿದ ಮುತಾಲಿಕೆಡ್ ನಡಪಾಯಿನ ಹೋರಾಟದ ಪರಿಣಾಮವಾದ್ ಸರಕಾರದ ಮಿತ್ತ್ ಆಯಿನ ಒತ್ತಡರ್ದ್ ರಾಜ್ಯ ವೈದ್ಯಕೀಯ ಶಿಕ್ಷಣ ಸಚಿವ ಡಾ.ಸುಧಾಕರ್ ಮೇರ್ ಜಿಲ್ಲೆಡ್ ಸರ್ಕಾರಿ ವೈದ್ಯಕೀಯ ಕಾಲೇಜು ಸ್ಥಾಪನೆ ಈ ವರ್ಷ ಸುರು ಆಯೆರೆ ಉಂಡು ಪಂದ್ ಹೇಳಿಕೆ ಕೊರ್ತೆರ್ . ಆಂಡ ಮುಲ್ಪ ಪ್ರಮುಖ ಆಕ್ಷೇಪ ದಾದ ಪಂಡ ಡಾ. ಸುಧಾಕರ್ ಮೇರ್ ಪರಿಪೂರ್ಣವಾದ್ ಸರ್ಕಾರದ ಅಧೀನಡ್ ಕಾಲೇಜು ಸ್ಥಾಪನೆ ಮಲ್ಪುನ ಬದಲಾದ್ ಖಾಸಗಿ ಸಹಭಾಗಿತ್ವಡ್ ಸ್ಥಾಪನೆ ಮಲ್ಪುನ ಬಗ್ಗೆ ಹೇಳಿಕೆ ಕೊರ್ತೆರ್ . ಜಿಲ್ಲೆದ ಜನಕ್ಲೆನ ಬೇಡಿಕೆದ ಅನುಸಾರವಾದ್ ಪರಿಪೂರ್ಣವಾಯಿನ ಸರ್ಕಾರಿ ವೈದ್ಯಕೀಯ ಕಾಲೇಜ್ ಸ್ಥಾಪನೆ ಮಲ್ಪರೆ ಒತ್ತಾಯ ಮಲ್ಪುವ . ನಮ್ಮ ಬೇಡಿಕೆ ನಡಪುನ ಮುಟಲ ನಮ್ಮ ಹೋರಾಟ ಇಂಚನೇ ಉಪ್ಪುಂಡು ಬೊಕ್ಕ ಖಾಸಗಿ ಸಹಭಾಗಿತ್ವದ ವೈದ್ಯಕೀಯ ಕಾಲೇಜ್ ನ್ ನಮ ಸ್ವೀಕಾರ ಮಲ್ಪುಜ . ಜಿಲ್ಲೆದ ಜನಕ್ಲೆನ ಹಕ್ಕಾಯಿನ ಸರಕಾರಿ ವೈದ್ಯಕೀಯ ಕಾಲೇಜ್ ಸ್ಥಾಪನೆ ಮಲ್ಪರೆ ಮಾತಾ ಜೋಕುಲು, ಸಾಮಾಜಿಕ ಕಾರ್ಯoತೆರ್ , ಪ್ರಗತಿಪರ ಚಿಂತಕೆರ್ ಬೊಕ್ಕ ಜನಸಾಮಾನ್ಯೆರ್ ನಮ್ಮೊಟ್ಟುಗು ಕೈ ಜೋಡಾವೊಡು ಪಂದ್ ಕ್ಯಾಂಪಸ್ ಫ್ರಂಟ್ ಒಡಿಪು ಜಿಲ್ಲಾಧ್ಯಕ್ಶೆರಾಯಿನ ಅಸೀಲ್ ಜಿಲ್ಲೆದ ಜನಕ್ಲೆಗ್ ಕರೆ ಕೊರ್ತೆರ್ .

ಕಾರ್ಕಳ ಬ್ಲಾಕ್ ಮಹಿಳಾ ಕಾಂಗ್ರೆಸ್ ಪದಗ್ರಹಣ

ಕಾರ್ಕಳ ಜುಲೈ 17: ಕಾರ್ಕಳ ಬ್ಲಾಕ್ ಮಹಿಳಾ ಕಾಂಗ್ರೆಸ್ ಕಾರ್ಕಳ ನೆತ್ತ ಪೊಸತಾದ್ ಮಹಿಳಾ ಕಾಂಗ್ರೆಸ್ ಗುರ್ಕಾರ್ಲಾದ್ ಆಯ್ಕೆಯಾಯಿನ ಅನಿತಾ ಡಿಸೋಜಾ ಮೆರ್ನ ಪದಗ್ರಹಣ ಲೇಸ್ ಬ್ಲಾಕ್ ಕಾಂಗ್ರೆಸ್ ಕಚೇರಿಡ್ ನಡತುಂಡು.

ನಿಕಟಪೂರ್ವ ಮಹಿಳಾ ಕಾಂಗ್ರೆಸ್ ಗುರ್ಕಾರ್ಲಾಯಿನ ನಳಿನಾಕ್ಷಿ ಆಚಾರ್ಯ ಮೇರ್ ತನ್ನ ಗುರ್ಕಾರ್ಮೆದ ಪೊರ್ತುಡು ತಂಕ್ ಸಾಕಾರ ಕೊರಿನ ಮಾಜಿ ಶಾಸಕ ಗೋಪಾಲ ಭಂಡಾರಿಲೆಗ್ ಅಂಚನೇ ಒಟ್ಟುಗು ಸಾಕಾರ ಕೊರಿನ ಪಕ್ಷದ ಬೇತೆ ಬೇತೆ ಘಟಕದ ಗುರ್ಕಾರ್ಲು ಬೊಕ್ಕ ಪದಾಧಿಕಾರಿಲೆಗ್ ಬೊಕ್ಕ ಮಹಿಳಾ ಕಾಂಗ್ರೆಸ್ ಪದಾಧಿಕಾರಿಲು ಕೊರಿನ ಸಾಕರಾಗ್ ಸೊಲ್ಮೆ ಸಂದೈತ ಮಲ್ತೆರ್.