June 2021

ಡಾನ್ ಬೊಸ್ಕೊ ಆಂಗ್ಲ ಮಾಧ್ಯಮ ಶಾಲೆ : ಸಿಬಿಎಸ್ಇ ಸೀನಿಯರ್ ಸೆಕೆಂಡರಿ ಶಾಲೆ ಉದಿಪನ

ಶಿರ್ವ, ಜೂನ್ 30: ಕೇಂದ್ರೀಯ ಶಿಕ್ಷಣ ಮಂಡಳಿರ್ದ್ ಗ್ರೇಡ್‌ 11 ಬೊಕ್ಕ 12ತ್ತ ಸಿಬಿಎಸ್‌ಇ ಪಠ್ಯಕ್ರಮ ಮಾನ್ಯತೆ ಪಡೆದ್ , ಶಿರ್ವ ಡಾನ್‌ ಬೊಸ್ಕೊ ಆಂಗ್ಲ ಮಾಧ್ಯಮ ಶಾಲೆ ಸೀನಿಯರ್‌ ಸೆಕೆಂಡರಿ ಸ್ಕೂಲ್‌ ಆದ್ ಮೇಲ್ದರ್ಜೆಗ್ ಏರ್ದುಂಡು , ನೂತನ ಶೈಕ್ಷಣಿಕ ವರ್ಷದ ಚಟುವಟಿಕೆದ ಉದಿಪನ ಜೂ. 29 ತಾರೀಖ್ ಗ್ ನಡತುಂಡು .

ಶಿರ್ವ ಆರೋಗ್ಯ ಮಾತಾ ದೇವಾಲಯದ ಪ್ರಧಾನ ಧರ್ಮಗುರು, ಶಾಲಾ ಸಂಚಾಲಕ ರೆ| ಫಾ| ಡೆನ್ನಿಸ್‌ ಡೇಸಾ ಸಂಸ್ಥೆದ ಗ್ರೇಡ್‌ 11 ದ ಶೈಕ್ಷಣಿಕ ಚಟುವಟಿಕೆನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ಒಡಿಪು ಕೆಥೋಲಿಕ್‌ ಧರ್ಮಪ್ರಾಂತ್ಯದ ಬಿಷಪ್‌ ರೈ|ರೆ|ಡಾ| ಜೆಲಾಲ್ಡ್‌ ಐಸಾಕ್‌ ಲೋಬೋ ಬೊಕ್ಕ ಕುಡ್ಲ ಕೆಥೋಲಿಕ್‌ ಶಿಕ್ಷಣ ಮಂಡಳಿದ ಕಾರ್ಯದರ್ಶಿ ರೆ|ಫಾ| ಅಂಟನಿ ಶೇರಾ ವರ್ಚುವಲ್‌ ಆದ್ ಆಶೀರ್ವಚನ ಕೊರ್ದು ಎಡ್ಡೆಪ್ಪು ಬಯಕಿಯೆರ್.ಮಲ್ಲ ಬಿನ್ನೆರ್ ಆದ್ ಶಿರ್ವ ಗ್ರಾ.ಪಂ. ಗುರ್ಕಾರ್ಲಾಯಿನ ಕೆಆರ್‌.ಪಾಟ್ಕರ್‌ ಪಾಲ್ ಪಡೆದಿತ್ತೆರ್.

ಚರ್ಚ್‌ ಆರ್ಥಿಕ ಮಂಡಳಿದ ಕಾರ್ಯದರ್ಶಿ ಲೀನಾ ಮಚಾದೋ,ಸದಸ್ಯೆರಾಯಿನ ಮೆಲ್ವಿನ್‌ ಅರಾನ್ಹಾ,ನೋರ್ಬರ್ಟ್‌ ಇ. ಮಚಾದೋ, ಜೂಲಿಯಾನ್‌ ರೊಡ್ರಿಗಸ್‌,ಮೆಲ್ವಿನ್‌ ಡಿ‡ಸೋಜಾ, ವಿಲ್ಸನ್‌ ರೊಡ್ರಿಗಸ್‌,ಪುಷ್ಪಾ ಫೆರ್ನಾಂಡಿಸ್‌, ಕ್ಯಾಂಪಸ್‌ದ ಬೇತೆ ಬೇತೆ ಶಿಕ್ಷಣ ಸಂಸ್ಥೆದ ಮುಖ್ಯಸ್ಥೆರ್ ,ಶಾಲಾಡಳಿತ ಮಂಡಳಿದ ಸದಸ್ಯೆರ್ ,ಉಪಪ್ರಾಂಶುಪಾಲೆ ಐರಿನ್‌ ಕಾಡೋìಜಾ ಬೊಕ್ಕ ಶಿಕ್ಷಕ-ಶಿಕ್ಷಕೇತರ ವೃಂದದಕುಲು ಪಾಲ್ ಪಡೆದಿತ್ತೆರ್.

ಕೊರೋನ ವಾರಿಯರ್ಸ್ ಗ್ ಮಾನದಿಗೆ ಮಲ್ತಿನ ಡಾ. ಭರತ್ ಶೆಟ್ಟಿ

ಕುಡ್ಲ, ಜೂನ್ 30: ಕೊರೊನಾ ವಿರುದ್ದದ ಹೋರಾಟಡ್ ಆಶಾಕಾರ್ಯಕರ್ತೆರ್ ಅಂಗನವಾಡಿ, ಎನ್‌ಎನ್‌ಎಂ ಲು , ದಾದಿಲು , ವೈದ್ಯೇರ್ನ ಬೇಲೆ ಬಾರಿ ಪುಣ್ಯದ ಕಾರ್ಯ ಆದ್ ಉಂಡು ಮೆಕ್ಲೆನ್ ಗುರ್ತಿಸಾದ್ ಅಕ್ಲೆಗ್ ಮಾನದಿಗೆ ಮಲ್ಪುನ ಶ್ಲಾಘನೀಯ ಪಂದ್ ಮೀನುಗಾರಿಕಾ, ಬಂದರು ಸಚಿವ ಅಂಗಾರ ಪಂಡೆರ್ .

ಮೇರ್ ಬೈಕಂಪಾಡಿ ವಿದ್ಯಾರ್ಥಿ ಸಂಘ, ಜಿಲ್ಲಾಡಳಿತ, ರೆಡ್‌ಕ್ರಾಸ್ ಒಟ್ಟು ಸೇರಿಗೆಡ್ ಕರಿನ ಮೂಜಿ ದಿನರ್ದ್ ನಡತೊಂದು ಉಪ್ಪುನ ಲಸಿಕೆ ಮೇಳಡ್ ಪಾಲ್ ಪಡೆದ್ ಕೊರೊನಾ ವಾರಿಯರ್ಸ್ ಗ್ ಮಾನದಿಗೆ ಮಲ್ತ್ ಪಾತೆರಿಯೆರ್.

ಕರ್ನಾಟಕ ಬ್ಯಾರಿ ಸಾಹಿತ್ಯ ಅಕಾಡೆಮಿ : ಗೌರವ ಪ್ರಶಸ್ತಿ ಪ್ರಕಟ

ಕುಡ್ಲ, ಜೂನ್ 30: ಕರ್ನಾಟಕ ಬ್ಯಾರಿ ಸಾಹಿತ್ಯ ಅಕಾಡೆಮಿ ವತಿರ್ದ್ 2021ನೇ ಸಾಲ್ ದ ಗೌರವ ಪ್ರಶಸ್ತಿ ಬೊಕ್ಕ ಗೌರವ ಪುರಸ್ಕೃತರ ಪಟ್ಟಿನ್ಅಕಾಡೆಮಿ ಅಂಗಾರೆ ಪ್ರಕಟ ಮಲ್ದುಂಡು.

ಈ ಸಲದ ಗೌರವ ಮಾನದಿಗೆ ಹರೇಕಳ ಹಾಜಬ್ಬ (ಬ್ಯಾರಿ ಭಾಷೆ ಬೊಕ್ಕ ಶಿಕ್ಷಣ ಕ್ಷೇತ್ರ), ಹುಸೈನ್ ಕಾಟಿಪಳ್ಳ (ಬ್ಯಾರಿ ಕಲೆ ಬೊಕ್ಕ ಸಾಹಿತ್ಯ) ಪಡೆಯರೇ ಉಲ್ಲೆರ್.

ಗೌರವ ಪುರಸ್ಕೃತೆರ್ ಅಶ್ರಫ್ ಅಪೋಲೊ ಕಲ್ಲಡ್ಕ (ಬ್ಯಾರಿ ಸಂಗೀತ), ಡಾ.ಕೆ.ಎ.ಮುನೀರ್ ಬಾವಾ( ಸಂಘಟಕೆರ್ ), ಮರಿಯಮ್ ಫೌಝಿಯ ಬಿ.ಯಸ್. ( ಸಾಧಕಿ), ಬ್ಯಾರಿ ಝುಲ್ಫಿ ( ಯುವ ಪ್ರತಿಭೆ), ಮುಹಮ್ಮದ್ ಬಶೀರ್ ಉಸ್ತಾದ್ ಒಡಿಪು (ಬ್ಯಾರಿ ದಫ್),
ಮುಹಮ್ಮದ್ ಫರಾಝ್ ಅಲಿ (ಬಾಲಪ್ರತಿಭೆ) ಪಂದ್ ಪ್ರಕಟಣೆ ತೆರಿಪಾದುಂಡು

ಸೀಫುಡ್ ಕಾರ್ಖಾನೆಗ್ ಭೇಟಿ ಕೊರಿನ ಸಚಿವ ಅಂಗಾರ : ಸ್ಥಳೀಯೇರ್ನ ಆಕ್ರೋಶ

ಮೂಡುಬಿದಿರೆ, ಜೂನ್ 30 : ‘ನಿಡ್ಡೋಡಿ ಗ್ರಾಮದ ಕೊಳತ್ತಾರು ಪದವು ಸರ್ಕಾರಿ ಜಾಗಡ್ ಕಟ್ಟರೆ ಉಪ್ಪುನ ಸರ್ಕಾರದ ಬೃಹತ್ ಸೀಫುಡ್ ಕಾರ್ಖಾನೆಗ್ ಅಂಗಾರೆ ಜಾಗೆ ಪರಿಶೀಲನೆಗ್ ಬತ್ತಿನ ಬಂದರು ಬೊಕ್ಕ ಮೀನುಗಾರಿಕೆ ಸಚಿವ ಅಂಗಾರ ಬೊಕ್ಕ ಕೈತಲ್ ದ ಶಾಸಕ ಉಮಾನಾಥ ಕೋಟ್ಯಾನ್ ವಿರುದ್ಧ ಗ್ರಾಮಸ್ಥೆರ್ ಪ್ರತಿಭಟನೆ ನಡಪಾಯೆರ್ .

‘ಕೈಗಾರಿಕೆದ ಸಾಧಕ ಬಾಧಕದ ಬಗ್ಗೆ ನಮಕ್ ಸ್ಪಷ್ಟ ಮಾಹಿತಿ ಕೊರಂದೆ , ನಮ್ಮ ಅಭಿಪ್ರಾಯವ ಪಡೆಯಂದೆ ಸ್ಥಳ ಪರಿಶಿಲನೆಗ್ ಬೈದರ್ ‘ ಪಂದ್ ಸ್ಥಳೀಯೆರ್ ಸಚಿವೆರ್ನ ಬೊಕ್ಕ ಶಾಸಕೆರ್ನ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಾಯೆರ್ .

ಬ್ಯಾರಿ ಸಾಹಿತ್ಯ ಅಕಾಡೆಮಿದ ತೆರವಾಯಿನ ಸ್ಥಾನಗ್ ಸದಸ್ಯೆರ್ನ ನಾಮ ನಿರ್ದೇಶನ

ಕುಡ್ಲ , ಜೂ.30: ಕರ್ನಾಟಕ ಬ್ಯಾರಿ ಸಾಹಿತ್ಯ ಅಕಾಡಮಿಗ್ ತೆರವಾಯಿನ ರಡ್ಡ್ ಸಹ- ಸದಸ್ಯೆರ್ನ ಸ್ಥಾನಗ್ ಇಂಚೋಗು ನಡತಿನ ಸರ್ವ ಸದಸ್ಯ ಸಭೆಟ್ ಸಾದತ್ ಶಿವಮೊಗ್ಗ ಬೊಕ್ಕ ಪುತ್ತೂರುದ ಕಮರುದ್ದೀನ್ ಸಾಲ್ಮರ ಮೆರೆನ್ ನಾಮನಿರ್ದೇಶನ ಮಲ್ತೆರ್ ಪಂದ್ ಬ್ಯಾರಿ ಸಾಹಿತ್ಯ ಅಕಾಡಮಿದ ಗುರ್ಕಾರ್ಲಾಯಿನ ರಹೀಂ ಉಚ್ಚಿಲ್ ಪ್ರಕಟಣೆಡ್ ತೆರಿಪಾಯೆರ್.

ತುಳುನಾಡ ಪೊರ್ಲು ಸೇವಾ ಟ್ರಸ್ಟ್(ರಿ.) ವತಿರ್ದ್ ಅಶಕ್ತೆರೆಗ್ ಪಣವುದ ಸಾಕಾರ

ಕುಡ್ಲ, ಜೂನ್ 30: ಶ್ರೀದುರ್ಗಾಪರಮೇಶ್ವರಿ ಅಪ್ಪೆನ ಅನುಗ್ರಹರ್ದ್ ಜನ ಸೇವೆಯೇ ಜನಾರ್ಧನ ಸೇವೆ ಪನ್ಪಿನ ನೆಲೆಟ್ಟ್ ಯುವ ಮನಸ್ಸ್ ದ ಸೇವಾ ಮನೋಭಾವನೆಡ್ ಕರಿನ 57 ತಿಂಗೊಲ್ ದ ಪಿರವು ಪುಟ್ಟಿನ ತುಳುನಾಡ ಪೊರ್ಲು ಸೇವಾ ಟ್ರಸ್ಟ್(ರಿ.) ಕುಡ್ಲ ಇತ್ತೇ ತನ್ನ 58ನೇ ತಿಂಗೊಲ್ ದ ಸೇವಾ ಪಯಣಡ್ 3 ಅಶಕ್ತೆರೆಗ್ ಸಾಕಾರ ಕೊರ್ತೆರ್ .

ಕಿಡ್ನಿ ವೈಫಲ್ಯರ್ದ್ ಉಪ್ಪುನ ಬಂಟ್ವಾಳ ದ ಮೊಗರ್ನಾಡು ನರಿಕೊಂಬು ನಿವಾಸಿ ಸತೀಶ್ ಕುಲಾಲ್ ಮೆರ್ನ ಚಿಕಿತ್ಸೆಗ್ 20,000 ಚೆಕ್ದ ಪಣವುದ ಸಾಕಾಯ ,ಲಿವರ್ ಸಂಬಂಧಿತ ಖಾಯಿಲೆರ್ದ್ ಬಳಲೊಂದು ಉಪ್ಪುನ ಬಂಟ್ವಾಳ ತಾಲೂಕುದ ಬಡಗಬೆಳ್ಳೂರು ಕೈತಲ್ ದ ಕೊಳ್ತಮಜಲು ನಿವಾಸಿ ಮಾಯಿಲಪ್ಪ ಪೂಜಾರಿಲ್ ಮೆರ್ನ ಚಿಕಿತ್ಸೆಗ್ 20,000 ಚೆಕ್ ದ ಪಣವುದ ಸಾಕಾಯ ಬೊಕ್ಕ ತಾರೀಖ್ 24.05.2021ಕ್ಕ್ ಪುಟ್ಟುದು ಥೈರಾಯ್ಡ್, ಕಿಡ್ನಿ ಸಮಸ್ಯೆ ಬೊಕ್ಕ ಹೃದಯದ ಪಂಪಿಂಗ್ ಸಮಸ್ಯೆರ್ದ್ ಉಪ್ಪುನ ಒಡಿಪು ಕಾರ್ಕಳ ತಾಲೂಕುದ ಇನ್ನಾ ಗ್ರಾಮದ ಹೊಸಮನೆತ ಅಶೋಕ್ ಬೊಕ್ಕ ದಿವ್ಯ ದಂಪತಿಲೆನ ಪೊಣ್ಣು ಬಾಲೆದ ಮರ್ದ್ ದ ಖರ್ಚ್ ಗ್ 30,000 ಪಣವುದ ಸಾಕರನ್ ಬಂಟ್ವಾಳ ನಗರ ಪೊಲೀಸ್ ಠಾಣೆ ಬಿ.ಸಿ ರೋಡ್ ಡ್ ಕೊರಿಯೆರ್ .

ಈ ಪೊರ್ತುಡು ಬಂಟ್ವಾಳ ನಗರ ಪೊಲೀಸ್ ಠಾಣೆದ ಇನ್ಸ್ಪೆಕ್ಟರ್ ಚೆಲುವರಾಜ್ ಬಿ, ಸಿಬ್ಬಂದಿ ವರ್ಗ ಬೊಕ್ಕ ಟ್ರಸ್ಟ್ ದ ಸೇವಾ ಮಾಣಿಕ್ಯೆರ್ ಪಾಲ್ ಪಡೆದಿತ್ತೆರ್..

ಐ ಲೇಸಾ’ ಡಿಜಿಟಲ್ ಚಾವಡಿ ಜಾಗತಿಕವಾದ್ ನಡಪಾಯಿನ “ತುಳು ಭಗವದ್ಗೀತೆ ಸಾರ ಪ್ರವಚನ” ದ ಮುಗಿತಲದ ಲೇಸ್

ಹಿಂದೂ ಧರ್ಮದ ಸಾರಾಂಶೊನು ಅರ್ಥ ಮಲ್ತೊನೆರೆ ಸಾಧ್ಯ ಇಪ್ಪುನ ಪವಿತ್ರ ಗ್ರಂಥ ‘ಭಗವದ್ಗೀತೆ’. ಪ್ರಶ್ನೋತ್ತರ ರೂಪೊಡುಪ್ಪುನ ಪವಿತ್ರ ಭಗವದ್ಗೀತೆಡ್ ನಮ್ಮ ಜೀವನದ ಮಾತಾ ಪ್ರಶ್ನೆಲೆಗ್ಲಾ ಉತ್ತರ ಉಂಡು. ಭಗವದ್ಗೀತೆ ಅಪ್ಪೆ ಭಾಷೆಡ್ ಇತ್ತ್ಂಡ ತೆರಿಯೊನೆರೆ ಭಾರೀ ಸುಲಭ ಆಪುಂಡು ಪಂಡ್ದ್ ಪೂಜ್ಯ ಖಾವಂದೆರ್ ಡಾ. ಡಿ. ವೀರೇಂದ್ರ ಹೆಗ್ಗಡೆರ್ ಪಂಡೆರ್. ಐ-ಲೇಸಾ ಬೊಕ್ಕ ಇಸ್ಕಾನ್ ಬೆಂಗಳೂರು ಸಂಯುಕ್ತ ಆಶ್ರಯೊಡ್ ಆನ್ ಲೈನ್ ಜೂಮ್ ಮೂಲಕ ಬುಡಂದೆ 6 ದಿನ ನಡತ್ತಿನ “ತುಳುವ ಜಾಲ್ ಡ್ ಕೃಷ್ಣ ಪಾರ್ದನ” (ತುಳು ಭಾಷೆಡ್ ಭಗವದ್ಗೀತೆ ಸಾರದ ಪ್ರವಚನ) ಕಜ್ಜೊದ ಮುಗಿತಲದ ಲೇಸ್ಡ್ ಡಾ. ವೀರೇಂದ್ರ ಹೆಗ್ಗಡೆರ್ ಶುಭಾನುಗ್ರಹ ಕೊರಿಯೆರ್. ತುಳು ಭಾಷೆಡ್ ಭಗವದ್ಗೀತೆದ ಸಾರೊನು ಲೋಕೊರ್ಮೆ ಪಸೆರೊಂದಿಪ್ಪುನ ಐ-ಲೇಸಾ ದ ಕಜ್ಜೊಲೆನ್ ಕೊಂಡಾಡಿಯೆರ್. ಭಗವದ್ಗೀತೆಡ್ ಶ್ರೀ ಸಾಮಾನ್ಯೆರೆಗ್ ಅರ್ಥ ಆಪಿನ ರೀತಿಡ್ ವಿಷಯೊಲು ಸೇರ್ದ್ಂಡ್. ಸಂಶಯೊಲೆಗ್ ನಿವೃತ್ತಿ ಕೊರ್ಪಿನ ಗ್ರಂಥಲಾ ಅಂದ್. ಉಂದು ನಮ್ಮ ಭಾರತ ದೇಶದ ಪುಗಾರ್ತೆದ ಬೊಕ್ಕ ಒಪ್ಪಿಗೆ ಆತಿನ ಪವಿತ್ರ ಗ್ರಂಥ. ವಿದೇಶೊಲೆಡ್ ಇಪ್ಪುನ ಹಿಂದೂ ಬಂಧುಲು ಭಗವದ್ಗೀತೆನ್ ಓದುದ್ ಅರ್ಥ ತೆರಿಯೊಂಡೆರ್ಡ ಅಕಲೆನ ಮಾತಾ ಸಮಸ್ಯೆಳೆಗ್ಲಾ ಸರಿಯಾಯಿನ ಉತ್ತರ ಭಗವದ್ಗೀತೆಡ್ ತಿಕ್ಕುಂಡುಂದು ಪೂಜ್ಯ ಖಾವಂದೆರ್ ತೆರಿಪಾಯೆರ್.

ಶ್ಲೋಕದೊಟ್ಟುಡು ಲೇಸ್ ಸುರು ಆಂಡ್. ಒಡಿಯೂರು ಮಠಾದೀಶೆ ಶ್ರೀ ಗುರುದೇವಾನಂದ ಸ್ವಾಮಿಲು ಆಶೀರ್ವಚನ ಕೊರಿಯೆರ್. ಕೇಮಾರು ಸಾಂದೀಪನೀ ಸಾದನಾಶ್ರಮದ ಶ್ರೀ ಈಶ ವಿಠಲದಾಸ ಸ್ವಾಮಿಲು, ಪೂನಾ ಇಸ್ಕಾನ್ ದ ಶ್ರೀ ಸರ್ವ ಲಕ್ಷಮಣ ದಾಸೆರ್, ಮುಖ್ಯ ಪ್ರವಚನಕಾರೆ ಶ್ರೀ ಪ್ರಸಾದೇಶ್ವರ ಕೃಷ್ಣ ದಾಸೆರ್ ಪ್ರವಚನ ಕೊರ್ದು ಹರಸಿಯೆರ್. ಉಡುಪಿ ಪೇಜಾವರ ಅಧೊಕ್ಷಜ ಮಠಾದೀಶೆ ಶ್ರೀ ವಿಶ್ವ ತೀರ್ಥ ಸ್ವಾಮಿಲು, ಉಡುಪಿ ಪಲಿಮಾರು ಮಠಾದೀಶೆ ಶ್ರೀ ವಿದ್ಯಾಧೀಶ ಸ್ವಾಮಿಲು, ಶ್ರೀ ಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯ ಮಠಾದೀಶೆ ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮಿಲು, ಜೈನ ಕಾಶಿ ಮೂಡುಬಿದ್ರೆ ಜಗದ್ಗುರು ಸ್ವಸ್ತಿಶ್ರೀ ಡಾ. ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯ ಮಹಾಸ್ವಾಮೀಜಿ, ಶ್ರೀ ಧಾಮ ಮಾಣಿಲ ಶ್ರೀ ಮಹಾಲಕ್ಷ್ಮೀ ಕ್ಷೇತ್ರದ ಶ್ರೀ ಮೋಹನದಾಸ ಪರಮಹಂಸ ಸ್ವಾಮಿಲು, ಕಾಸರ್ಗೋಡ್ ಕೊಂಡೆವೂರು ಶ್ರೀ ಯೋಗಾನಂದ ಸರಸ್ವತಿ ಸ್ವಾಮಿಲು, ಶ್ರೀ ಸುಂದರದಾಸ ಫ್ರಭುಜಿ ಬೃಂದಾವನ ಇಸ್ಕಾನ್ ಈ ಮಾತಾ ಪೂಜನೀಯೆರ್ ಆಶೀರ್ವಚನ ಕೊರಿಯೆರ್. ಆರ್.ಎಸ್.ಎಸ್. ಮುಖಂಡ್ ಡಾ. ಕಲ್ಲಡ್ಕ ಪ್ರಭಾಕರ ಭಟ್, ಅಖಿಲ ಭಾರತ ತುಳು ಒಕ್ಕೂಟದ ಗುರ್ಕಾರೆ ಶ್ರೀ ಧರ್ಮಪಾಲ್ ದೇವಾಡಿಗ, ಕಾರ್ಯಂತೆರ್ ನಿಟ್ಟೆ ಶಶಿಧರ್ ಶೆಟ್ಟಿ, ತುಳು ಮುಖಂಡೆರ್,ಸಾಹಿತಿ,ಚಿಂತಕೆರ್ ಡಾ. ಉದಯ ಧರ್ಮಸ್ಥಳ ಈ ಮಾತಾ ತುಳುವ ಗಣ್ಯೆರ್ ಎಡ್ಡೆಪ್ಪು ಬಯಕ್ದೆರ್.
ಇಸ್ಕಾನ್ ಬೆಂಗಳೂರು ಸೌತ್ ದ ಅಧ್ಯಕ್ಷೆ ಶ್ರೀ ಹೆಚ್.ಜಿ. ನರಹರಿ ಚೈತನ್ಯ ದಾಸೆರ್ ಶುಭ ಹಾರೈಕೆ ಮಲ್ದೆರ್. ಐಲೇಸಾದ ಮುತಾಲಿಕೆ ತಾರಾಗಾಯಕೆ ಶ್ರೀ ರಮೇಶ್ಚಂದ್ರ, ಸುಧಾಕರ್ ಶೆಟ್ಟಿ, ಛಾಯಾಪತಿ ಕಂಚಿಬೈಲ್, ಪ್ರೇಮಲತಾ ದಿವಾಕರ್, ಡಾ. ಸುಶೀಲಾ ವಿದ್ಯಾರಣ್ಯ, ದೀಪ್ತಿ ಪ್ರಶಾಂತ್ ಈ ಮಾತಾ ಗಾಯಕೆರ್ ಭಜನೆ, ಭಕ್ತಿ ಗೀತೆಳೆನ್ ಪಂಡೆರ್. ಕಡಲಾಯೆರೆದ ತುಳು ಸಂಘಟಕೆ, ಕರ್ನಾಟಕ ತುಳು ಅಕಾಡೆಮಿ ಸದಸ್ಯೆರ್ ಶ್ರೀ ಸರ್ವೋತ್ತಮ ಶೆಟ್ಟಿ ಅಬುಧಾಬಿ ಮುಗಿತಲದ ಮದಿಪು ಕೊರಿಯೆರ್.ಲೇಸ್ದ ಮಧ್ಯಾಂತರೊಡು ಇಸ್ಕಾನ್ ದ ಅರ್ಚಕೆರ್ ಕೃಷ್ಣಶಯನ ಪೂಜೆ ನಡಪಾದ್ ಕೊರಿಯೆರ್. ಐಲೇಸಾದ ಶಾಂತಾರಾಮ ವಿ. ಶೆಟ್ಟಿ ಲೇಸ್ ಸುದಾರ್ಮೆ ಮಲ್ತೆರ್, ಗೋಪಾಲ್ ಪೂಜಾರಿ ಪಟ್ಟೆ ಬೊಕ ಸೂರಿ ಮಾರ್ನಾಡ್ ತಾಂತ್ರಿಕ, ಪ್ರಚಾರ, ವಿನ್ಯಾಸದ ಸಾಕಾಯ ಕೊರ್ತೆರ್.

ಐಲೇಸಾದ ಮುಖ್ಯ ರುವಾರಿ ಶ್ರೀ ರಮೇಶ್ಚಂದ್ರ, ಸುಧಾಕರ್ ಶೆಟ್ಟಿ, ಪಳ್ಳಿ ವಿಶ್ವನಾಥ್ ಶೆಟ್ಟಿ, ಶಿವಾನಂದ ಸಾಲ್ಯಾನ್, ನರೇಂದ್ರ ಕಬ್ಬಿನಾಲೆ, ವಿವೇಕಾನಂದ ಮಂಡೆಕೆರೆ, ಮಾ.ಸುವಿದ್, ಗೀತಾ ರಾಘವೇಂದ್ರ, ಡಾ.ಸುಶೀಲಾ ವಿದ್ಯಾರಣ್ಯ ಮೊಕಲೆನ ತಂಡ ಬೊಕ ಇಸ್ಕಾನ್ ತಂಡದ ಉಮೇದ್ ದ ಶ್ರಮೊಟ್ಟು ನಡತ್ತಿನ ಲೇಸ್ ಗೆಲ್ಮೆಡ್ ಸಂಪನ್ನ ಆಂಡ್.
ವರದಿ: ಪಳ್ಳಿ ವಿಶ್ವನಾಥ್ ಶೆಟ್ಟಿ ಬೆಂಗಳೂರು.