June 11, 2021

ಕತಾರ್ ದ ಮಣ್ಣ್ ಡ್ ತುಳುಕೂಟದ ಆಶ್ರಯೊಡು ವಿಶ್ವ ಪರಿಸರ ದಿನಾಚರಣೆ

ದೋಹಾ ಕತಾರ್ : ತುಳು ಕೂಟ , ಕತಾರ್ ಉಂದೆತ್ತ ಆಶ್ರಯೊಡು ಇಂಚೊಗು ವಿಶ್ವ ಪರಿಸರ ದಿನಾಚರಣೆ ಕೂಟದ ಗುರ್ಕಾರ್ದಿ ಚೈತಾಲಿ ಉದಯ್ ಶೆಟ್ಟಿ ಮೆರೆನ ಮುತಾಲಿಕೆಡ್ ಕೋವಿಡ್ ನಿಯಮಾವಳಿ ಪ್ರಕಾರ ನಡತ್ಂಡ್.’ಜಾಯ್ ಆಫ್ ಗಿವಿಂಗ್'(ದಾನ ಕೊರ್ಪಿನೆಟ್ಟುಪ್ಪುನ ಕುಸಿ) ವೀಕ್ ‘ ಪನ್ಪಿನ ಪರಿಕಲ್ಪನೆಡ್ ಏಳ್ ದಿನ ಲೇಸ್ ನಡತ್ಂಡ್.

ಈ ಲೇಸ್ ಪ್ರಕೃತಿ ಬೊಕ್ಕ ಪರಿಸರೊನು ಮೋಕ್ಯೆ ಮಲ್ಪುನಕ್ಲೆನ್ ಒಟ್ಟು ಮಲ್ಪಾವುನತ್ತಾವಂದೆ ಸದ್ಯದ ಸಂಕಷ್ಟದ ಕಾಲೊಡು ದಾನ, ಸಹಾಯ ಮಲ್ಪುನೆತ್ತ ಬಿಲೆತ್ತ ವಿಚಾರೊಡು ಚಿಂತನೆ ಮಲ್ಪುನೆಕ್ಕ್ ಸಾಕ್ಷಿ ಆಂಡ್.ಈ ವಾರೊಡು ಕೂಟದ ಸದಸ್ಯೆರ್ ಅಕ್ಲೆನ ಇಷ್ಟದ ಗಿಡೊಕ್ಲೆನ್ ಪಗತೊಂಡೆರ್. ಅಂಚೆನೆ ಕೂಟದ ಲೆಕ್ಕೊಡು ಸದಸ್ಯೆರೆಗ್ ‘ಭಗೀರ ‘ ಪನ್ಪಿನ ಪುದರ್ ದ ದೈಕ್ಲೆನ್ ಪಟ್ಟಿಯೆರ್. ಸಪ್ತಾಹದ ಮುಗಿತಲದ ಲೇಸ್ ಜೂನ್ 5ನೇ ತಾರೀಕಿ ಗ್ ಕತಾರ್ ದ ಕತಾರ್ ಫಿನ್ ಲ್ಯಾಂಡ್ ಇಂಟರ್ ನ್ಯಾಷನಲ್ ಸ್ಕೂಲ್ ನ ವಠಾರೊಡು ಐಸಿಬಿಎಫ್ ಬೊಕ್ಕ ಕರ್ನಾಟಕ ಮೂಲದ ಬೇತೆ ಬೇತೆ ಸಂಘಟನೆಲೆನ ಗುರ್ಕಾರ್ಲು ಬೊಕ್ಕ ಬಿನ್ನೆರೆನ ಎದುರುಡು ದೈ ನಡ್ಪಿನ ಮೂಲಕ ನಡತ್ಂಡ್. ಕುಡ್ಲದ ಟೆರೆಸ್ ಗಾರ್ಡನ್ ತಜ್ಞೆರ್ ಬ್ಲಾನಿ ಡಿಸೋಜಾ ಮೆರೆನ ಒಟ್ಟುಗು ಝೂಮ್ ಡ್ ಪಾತೆರಕತೆಲ ಇತ್ತ್ಂಡ್.ಕತಾರ್ ದ ಉಷ್ಣ ಹವಾಮಾನೊಡ್ಲ ಮಲ್ಪೊಡಾಯಿನ ತೋಟಗಾರಿಕೆದ ಮಾಹಿತಿ ಪಟ್ಟೊಂಡೆರ್.ಕತಾರ್ ದ ಬೇತೆ ಬೇತೆ ಒಕ್ಕೂಟೊಲೆನ ಸಾಲ್ ಡ್ ಸುರುತ್ತ ಪಂತೆಡುಪ್ಪುನ ತುಳುಕೂಟ ಕತಾರ್, ಕೆಲವು ವರ್ಸೊರ್ದಿಂಚಿ ಮಸ್ತ್ ಸಮಾಜಮುಖಿ ಯೋಜನೆಲೆನ್ ಯಶಸ್ವಿಯಾದ್ ಮಲ್ತೊಂದು ಬತ್ತ್ ದ್ ಪರಿಸರ ಸಂರಕ್ಷಣೆಗೆ ಮಲ್ಲ ಕೊಡುಗೆ ಕೊರೊಂದುಂಡು. ಸದಸ್ಯೆರೆಗ್ ಕೊರ್ತಿನ ಭಗೀರ ದೈಕ್ಲೆನ್ ಮೂಜಿ ತಿಂಗೊಲು ಪೊರ್ಲುಡೆ ಸಾಂಕ್ಂಡ ಅವೆಕ್ಕ್ ಪ್ರತಿಯಾದ್ ಕುಡೊಂಜಿ ಭಗೀರ ದೈ ಕೊರ್ಪ ಪಂಡ್ ದ್ ತುಳು ಕೂಟದ ಗುರ್ಕಾರ್ದಿ ಪಂಡೆರ್.

ತುಲುನಾಡ್ ಗಾಯಿನ ಅಪಚಾರದ ಬಗ್ಗೆ ಸೊರೊ ದೆತ್ತಿನ ಕೇರಳ ತುಲು ಅಕಾಡೆಮಿದ ಗುರ್ಕಾರ್ಲು

ಕೇರಳ : ತುಲು ಭಾಸೆಗ್, ತುಲು ಸಂಸ್ಕೃತಿಗ್ ಅಪಚಾರ ಮಲ್ಪುನವು ಮಾಮಲ್ಲ ತಪ್ಪು. ಈ ರೀತಿಡ್ ತುಲು ಸಂಸ್ಕೃಗ್ ಅಪಚಾರ ಮಲ್ತುಂಡ ಏರ್ ಆಂಡಲಾ ಅಕ್ಲೆಗ್ ತಕ್ಕ ಕಾನೂನು ಕ್ರಮ ದೆತೊನೊಡು ಪಂದ್, ಒವ್ವೆ ಸಂಸ್ಕೃತಿ ಆವಡ್ ಒವು ಭಾಷೆನೆ ಆವಡ್ ಸಂಸ್ಕೃತಿಗ್ ವಿರುದ್ಧವಾಯಿನ ಬೇಲೆ ಮಲ್ಪರೆ ಬಲ್ಲಿ ಇಂದು ಕಾನೂನು ಪ್ರಕಾರ ಅಪರಾಧ ಪಂದ್ ನೆಕ್ಕ್ ತಕ್ಕ ಕ್ರಮ ದೆತೊನೊಡು ಪಂದ್ ಕೇರಳ ತುಲು ಅಕಾಡೆಮಿದ ಗುರ್ಕಾರ್ಲಾಯಿನ ಉಮೇಶ್ ಶಾಲಿಯಾನ್ಆಗ್ರಹ ಮಲ್ತೆರ್ .

ಕೋವಿಡ್ ಯೋಧೆರೆಗ್ ಡೆಟ್ಟೋಲ್ ಸಲ್ಯೂಟ್ ಅಭಿಯಾನ

ಬೆಂಗ್ಳೂರು, ಜೂನ್ 11 : ಪ್ರಸಿದ್ದ ಜರ್ಮ್ ಪ್ರೊಟೆಕ್ಷನ್ ಬ್ರ್ಯಾಂಡ್ ಡೆಟಾಲ್ #DettolSalutes ಪನ್ಪಿನ ಅಭಿಯಾನನ್ ಸುರು ಮಲ್ದುಂಡು . ನೆತ್ತ ಇತಿಹಾಸಡ್ ಸುರುತ್ತ ಸಲ ಡೆಟಾಲ್, ಕೋವಿಡ್ -19 ಯೋಧೆರೆಗ್ ಗೌರವ ಸೂಚಕವಾದ್ ಐತ ಸಾಂಪ್ರದಾಯಿಕ ಲೋಗೊನು ಕೋವಿಡ್ ರಕ್ಷಕನ (ಕೋವಿಡ್ ಪ್ರೊಟೆಕ್ಟರ್) ಚಿತ್ರದೊಟ್ಟುಗು ಬದಲಾವಣೆ ಮಲ್ದುಂಡು .

ಡೆಟಾಲ್ ಭಾರತಡ್ ಇಂಚಿನ 100 ಜನ ಕೋವಿಡ್ ಯೋಧೇರ್ನ ಅನುಭವನ್ ಒಟ್ಟು ಮಲ್ದೆರ್ ಬೊಕ್ಕ ಅವ್ವೆತೋ ಜನಕ್ಲೆಗ್ ನಿಸ್ವಾರ್ಥವಾದ್ ಸಹಾಯ ಮಲ್ದಿನ ಕೋವಿಡ್ ರಕ್ಷಕೆರ್ನ ಗೌರವಾರ್ಥವಾದ್ ಅವೆನ್ ಲಿಕ್ವಿಡ್ ಹ್ಯಾಂಡ್‌ವಾಶ್ ಪ್ಯಾಕ್‌ಡ್ ಪಾರ್ದ್ ಜನಕ್ಲೆಗ್ ಮುಟ್ಟವುನ ಬೇಲೆ ಮಲ್ತೊಂದು ಉಲ್ಲೆರ್.

ಆತೆ ಅತ್ತoದೆ , ಈ ಅನುಭವ ಕಥನನ್ ಜಾಸ್ತಿ ಜಾಸ್ತಿ ಜನಕ್ಲೆಗ್ ಮುಟ್ಟಾಯೆರೆ ಡೆಟಾಲ್ www.DettolSalutes.com ಪನ್ಪಿನ ವೆಬ್‌ಸೈಟ್ ನ್ ಲಾ ಸುರು ಮಲ್ದುಂಡು . ಕಸ್ಟಮೈಸ್ ಮಲ್ತಿನ ವರ್ಚುವಲ್ ಪ್ಯಾಕ್‌ಲೆನ್ ಸುರು ಮಲ್ಪುನ ಮುಖೆನ ಬೊಕ್ಕ ಅವೆನ್ ಅಕ್ಲೆನ ಸಾಮಾಜಿಕ ಮಾಧ್ಯಮ ಚಾನಲ್‌ಡ್ ಪಟ್ಟುನ ಮುಖೇನ ಕೋವಿಡ್ ರಕ್ಷಕೆರೆನ್ ಅಕ್ಲೆನ ನಡುಟು ಗುರ್ತಿಸಾವುನ ಬೇಲೆ ಮಲ್ದೆರ್.