June 9, 2021

ದೈವದ ಅಣಿಟ್, ದೇವಲ್ಯದ ಮಾಡ್‌ಡ್ ಅಂಚೆನೆ ತೇರ್‌ದ ಕೊಡಿಟ್ಟತ್ತಿನ ತುಳುನಾಡ ಬಾವುಟಗ್ ಕನ್ನಡಿಗರ್ದ್ ಅಪಮಾನ

ಕುಡ್ಲ: ತುಳುನಾಡ್‌ದ ಸಂಸ್ಕೃತಿ, ಆಚಾರ ವಿಚಾರದ ಸಂಕೇತ ಆಯಿನ ತುಳುನಾಡ್‌ದ ಬಾವುಟೊನ್ ಕನ್ನಡಿಗೆ ಒರಿ ಅಪಪ್ರಚಾರ ಮಲ್ತ್ ದ್ ಅವೆನ್ ಚಪ್ಪಲ್‌ಗ್ ಪಾಡ್ದ್ ನಮ್ಮ ದೈವದ ಸಂಸ್ಕೃತಿನೇ ಪೊಲಿಪುನಂಚಿನ ಬೇಲೆ ಮಲ್ಲೊಂದುಲ್ಲೆ. ಈ ವಿಚಾರವಾದ್ ಸಂಬಂಧ ಪಟ್ಟಿ ತುಳುನಾಡ್‌ದ ಮಸ್ತ್ ಸಂಸ್ಥೆ ಬೊಕ್ಕ ಮಾತ ತುಳು ಸಂಘಟನೆಲು ಲಕ್ಕದ್ ಅಯಿತ್ತ ಬಗ್ಗೆ ಕ್ರಮ ದೆತೊನೊಡು ಪಂಡ್‌ದ್ ಸಾಮಾಜಿಕ ಜಾಲತಾಣೋಡು ಒತ್ತಾಯ ಮತ್ತೊಂದುಲ್ಲೆರ್. ಅವತ್ತಾಂದೆ ಬೊಂಬೈ, ಗೋವಾ ಬೊಕ್ಕ ಬೆಂಗಳೂರು ಇಂಚಿನ ಮಾತಾ ಕಡೆಟ್ಟ್ ಇತ್ತಿನ ತುಳುವೆರ್ ಮಸ್ತ್ ಬೇಜಾರ್ ಪಟೊoಡೆರ್.

ತುಳುನಾಡ್‌ಡ್ ತುಳುವೆರೆಗ್ ಸರಕಾರಿ ಕೆಲಸ ಇಜ್ಜಿ. ತುಳು ಬಾಸೆ, ಸಂಸ್ಕೃತಿನ್ ಒರಿಪುನಲ್ಪ ಸರಕಾರದ ಸಾಕಾರ ಇಜ್ಜಿ, ಸರಕಾರ ತುಳುನಾಡ್‌ದ ಜನೊಕ್ಲನ್ ಸಸಾರ ಮಲ್ಪುನೆನ್ ತೂದು ಇತ್ತೆ ತುಳು ಸಂಸ್ಕೃತಿದ, ತುಳುನಾಡ ಬಾವುಟನ್ ಚಪ್ಪಲ್‌ಗ್ ಪಾಡ್ದ್ ಒಂಜಿ ನೀಚ ರೀತಿಡ್ ವರ್ತನೆ ಮಲ್ತಿನಂಚಿನ ಪರಿಸ್ಥಿತಿ ಈ ಕನ್ನಡಿಗರೆರ್ರ್ದ್ ಬೈದ್‌ಂಡ್‌ಂದಾಂಡ ಅವು ತುಳು ಸಂಸ್ಕೃತಿ, ತುಳು ಬಾಸೆಗ್ ಮಲ್ತಿನ ಅಪಚಾರ ಪಂದ್ ಎನ್ನೊಲಿ. ಈ ವಿಚಾರೊಡು ನಮ್ಮ ಊರುದ ಸಂಸದೆರ್‌, ಮಂತ್ರಿಲು, ಶಾಸಕೆರ್ ನಕುಲಾವಡ್ ಅತ್ತಾಂಡ ದೈವ ಚಾಕಿರಿದಕುಲಾವಡ್ ಅವೆನ್ ತೂದು ಮನಿಪಂದೆ ಕುಲ್ಲುದು ಪೊರ್ಲು ತೂವೊಂದುಪ್ಪುನವು ಬಾರಿ ಬೇಜಾರ್‌ದ ಸಂಗತಿ.

ತುಳು ಮಣ್ಣ್ ದ ಜನೊಕ್ಲೆನ ವೋಟು ದೆತೊಂದು ಗೆಂದ್‌ದಿನ ಜನಪ್ರತಿನಿಧಿನಕುಲು ಈ ಬಗೆಟ್ ಗಟ್ಟಿ ಸ್ವರ ಲಕ್ಕಾದ್ ತುಳು ಮಣ್ಣದ ಬಾವುಟಗ ರಾಜ ಮರ್ಯಾದಿ ತಿಕ್ಕುಲೆಕ್ಕ ಮಲ್ಪೊಡು ಪಂಡ್‌ದ್ ತುಳುವೆರ್ ಕೇನೊಂದುಲ್ಲೆರ್. ಸೂರ್ಯ ಎನ್. ಕೆ. ಪನ್ಪಿನ ವ್ಯಕ್ತಿ ತುಳುನಾಡ ಬಾವುಟೊದ ಚಿತ್ರೋನು ಚಪ್ಪಲಿಡ್ ಪ್ರಿಂಟ್ ಮಲ್ತ್ದ್ ಫೇಸ್ ಬುಕ್‌ಡ್ ಪಾಡ್ದ್ , ನನ ಬಿಕಿನಿಲ ಬರ್ಪುಂಡು ಪಂಡ್‌ದ್ ಕನ್ನಡೊಡು ಬರೆದ್ ಪಾಡ್ದ್ ತುಳುವೆರೆನ ಸ್ವಾಭಿಮಾನಿ ತುಳುವೆರೆನ ಕೋಪಗ್ ಕಾರಣ ಆತೆ . ಆಯಗ್ ಸರಿ ಆಯಿನ ಬುದ್ಧಿ ಕಲ್ಪಾದ್ ಆಯಡ ಕ್ಷಮೆ ನಟ್ಟಾವೊಡು, ಆಯಗೆ ಶಿಕ್ಷೆ ಅವೊಡು ಪಂಡ್‌ದ್ ಕೋಟ್ಯಾಂತರ ತುಳುವೆರ್ ಒತ್ತಾಯ ಮಲ್ದೆರ್ .

ತಬಲಾ ಕಲಾವಿದೆರಾಯಿನ ಸುರೇಶ್ ದಂಪತಿ ಆತ್ಮಹತ್ಯೆ

ಕುಡ್ಲ, ಜೂನ್ 9: ದಂಪತಿ ಆತ್ಮಹತ್ಯೆ ಮಲ್ದಿನ ಘಟನೆ ಕದ್ರಿ ಪಿಂಟೋಸ್ ಲೇನ್ ಡ್ ಇನಿ ಕಾಂಡೆ ನಡತುಂಡು.

ತಬಲ ಕಲಾವಿದ ಸುರೇಶ್ ಬೊಕ್ಕ ಆರ್ನ ಪತ್ನಿ ವಾಣಿ ಮೃತೆರ್ . ಸುರೇಶ್ ಮೇರ್ ಖ್ಯಾತ ತಬಲ ಕಲಾವಿದೇರಾದಿತ್ತೆರ್ . ಆರ್ನ ಬೊಡೆದಿ ವಾಣಿ ಖಾಸಗಿ ಕಾಲೇಜ್ ಕ್ಲರ್ಕ್ ಆದ್ ಬೇಲೆ ಮಳ್ತೊಂದಿತ್ತೆರ್ . ಕಾಸ್ ದ ಸಮಸ್ಯೆ ಆತ್ಮಹತ್ಯೆಗ್ ಕಾರಣ ಆದುಪ್ಪು ಪನ್ಪಿನ ಸಂಶಯ ಉಂಡು .

ಬುಧವಾರ ಕಾಂಡೆ ಸುರೇಶ್ ಗುವೆಲ್ ಗ್ ಲಾಗಿದ್ ಆತ್ಯಹತ್ಯೆ ಮಲ್ದೆರ್ , ಆರ್ನ ಬೊಡೆದಿ ವಾಣಿ ಬಲ್ಲ್ ಪಾಡೊಂದೆರ್.

ಕೊರೋನಾಗ್ ಬಲಿ ಆಯಿನ ಪ್ರವಾಸೋದ್ಯಮ ಇಲಾಖೆದ ಸಹಾಯಕ ನಿರ್ದೇಶಕೆರ್

ಉಡುಪಿ, ಜೂನ್ 9: ವಿಶ್ವಮಾನ್ಯತೆ ಪಡೆಯಿನ ಒಡಿಪುದ ಪಡುಬಿದ್ರೆ ಬ್ಲ್ಯೂ ಫ್ಯಾಗ್ ಬೀಚ್ ಅಭಿವೃದ್ಧಿಗ್ ಬೇಲೆ ಮಲ್ತಿನ ಪ್ರವಾಸೋದ್ಯಮ ಇಲಾಖೆದ ಸಹಾಯಕ ನಿರ್ದೇಶಕ ಸೋಮಶೇಖರ ಬನವಾಸಿ ಕೋವಿಡ್ರ್ದ್ ತೀರ್ ಪೋಯೆರ್ .

ಕುಡ್ಲದ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದ್ ಇತ್ತಿನ ಆರ್ ಮರ್ದ್ ಫಲಕಾರಿಯಾವಂದೆ ತೀರ್ ಪೋಯೆರ್ . ಮೂಲತಃ ಉತ್ತರ ಕನ್ನಡ ಜಿಲ್ಲೆದ ಬನವಾಸಿದಾರ್ ಆಯಿನ ಸೋಮಶೇಖರ ಮೇರ್ ದಕ್ಷಿಣ ಕನ್ನಡ ಜಿಲ್ಲೆ, ಒಡಿಪು ಜಿಲ್ಲೆದ ಪ್ರವಾಸೋದ್ಯಮ ಅಭಿವೃದ್ಧಿ ವಿಚಾರಡ್ ಬಾರಿ ಶ್ರಮವಹಿಸ್ ದ್ ಬೇಲೆ ಮಲ್ದೆರ್

ನ. 24 ತಾರೀಖ್ ಗ್ ಒಡಿಪು ಸಹಾಯಕ ನಿರ್ದೇಶಕೇರಾದ್ ಅಧಿಕಾರ ಸ್ವೀಕಾರ ಮಲ್ತಿನ ಮೇರ್ , ಪಡುಬಿದ್ರೆ ಬೀಚ್‍ಗ್ ಬ್ಲೂ ಫ್ಲ್ಯಾಗ್ ಅಂತಾರಾಷ್ಟ್ರೀಯ ಮಾನ್ಯತೆ ತಿಕ್ಕುನಲ್ಪ ಬೇಲೆ ಮಲ್ದೆರ್.

ಭಾರತಡ್ ಕಡಿಮೆ ಆಯಿನ ಕೊರೋನ ರಡ್ಡನೇ ಅಲೆ

ನವದೆಹಲಿ ಜೂ.09: ಭಾರತದಡ್ ಕೊರೋನಾ 2ನೇ ಅಲೆ ಇಳಿಕೆದ ತಾದಿ ದುಂಬು ವರಿದುಂಡು , ಅಂಗಾರೆ ಕಾಂಡೆ 8 ಗಂಟೆಗ್ ಮುಕ್ತಾಯಾವಾಯಿನ 24 ಗಂಟೆದ ಪೊರ್ತುಡು 86,498 ಪೊಸ ಪ್ರಕರಣ ಪತ್ತೆಯಾತುಂಡು , ಇಂದು ಕರಿನ 62 ದಿನರ್ದ್ ಕನಿಷ್ಠ ಪ್ರಮಾಣ ಆದುಂಡು .

ಅಂಗಾರೆದ ಅಂಕಿ ಸಂಖ್ಯೆದೊಟ್ಟುಗು ದೇಶಡ್ ಒಟ್ಟು ಸೋಂಕಿತೆರ್ನ ಸಂಖ್ಯೆ 2,89,96,473ಕ್ಕ್ ಮುಟ್ಟುದುಂಡು , ಸೈತಿನಕ್ಲೆನ ಸಂಖ್ಯೆ 3,51,309ಕ್ಕ್ ಏರ್ದುಂಡು ಪಂದ್ ಐಸಿಎಂಆರ್ ಮಾಹಿತಿ ಕೊರ್ತೆರ್ .

ಬ್ಲಾಕ್ ಫಂಗಸ್ಗ್ ಕೇಂದ್ರರ್ದ್ ರಾಜ್ಯಗ್ ಜಾಸ್ತಿ ಮರ್ದ್ ಪೂರೈಕೆ : ಡಿವಿಎಸ್

ಬೆಂಗ್ಳೂರು ಜೂ.09: ಕೋವಿಡ್ ಸಾಂಕ್ರಾಮಿಕದ ನಡುಟುಲಾ ಕರ್ನಾಟಕಡ್ ಬ್ಲಾಕ್ ಫಂಗಸ್ ಸೋಂಕು ಜಾಸ್ತಿ ಆವೊಂದು ಉಂದು . ಬ್ಲಾಕ್ ಫಂಗಸ್ ನಿರ್ವಹಣೆಗ್ ಇತ್ತೇ ಹೆಚ್ಚುವರಿಯಾದ್ 2,490 ವಯಲ್ಸ್ ಆಂಫೊಟೆರಿಸಿನ್-ಬಿ ಮರ್ದ್ ನ್ ರಾಜ್ಯಗ್ ಕೇಂದ್ರರ್ದ್ ಪೂರೈಕೆ ಮಲ್ದೆರ್ .

ಈ ಬಗ್ಗೆ ಕೇಂದ್ರ ಸಚಿವ ಸದಾನಂದಗೌಡ ಮೇರ್ ಟ್ವೀಟ್ ಮೂಲಕ ಮಾಹಿತಿ ಕೊರ್ತೆರ್ . ಕರ್ನಾಟಕಗ್ ಕುಡೋರ 2,490 ವಯಲ್ಸ್ ಆಂಫೊಟೆರಿಸಿನ್- ಬಿ ಮರ್ದ್ ಪೂರೈಕೆ ಮಲ್ದೆರ್ ಪಂದ್ ಕೇಂದ್ರ ಸಚಿವ ಡಿವಿಎಸ್ ಟ್ವೀಟ್ ಮುಖೇನ ಮಾಹಿತಿ ಕೊರ್ತೆರ್.

ಅಮೇರಿಕಾದ ಯಕ್ಷ ಪ್ರೇಮಿಲೆರ್ದ್ ಯಕ್ಷಗಾನ ಕಲಾವಿದೆರೆಗ್ ಸಾಕಾರ

ಒಡಿಪು , ಜೂ.9: ಕೊರೋನರ್ದಾವರ ಕಷ್ಟಡ್ ಉಪ್ಪುನ ಯಕ್ಷಗಾನ ಕಲಾವಿದೆರೆಗ್ ಸಾಕಾರ ಕೊರಿಯೆರೆ ಅಮೆರಿಕದ ಮಿಯಾಮಿಯಡ್ ಉಪ್ಪುನ ಮಹದೇವ ಜಿ.ಭಟ್ ವರ್ಗಾಸರ ಮೇರ್ ತನ್ನ ದೋಸ್ತಿನಕ್ಲೆನೊಟ್ಟುಗು ಸೇರ್ದ್ ಒಟ್ಟು ಮಲ್ತಿನ 1700 ಡಾಲರ್ (ಒಟ್ಟು 1.21ಲಕ್ಷ ರೂ.) ಪಣವುನು ಒಡಿಪುದ ಯಕ್ಷಗಾನ ಕಲಾರಂಗ ಸಂಸ್ಥೆಗ್ ಕಡಪಾದೆರ್.

ಯಕ್ಷಗಾನ ಕಲಾರಂಗ ಈ ಕಾಸ್ ನ್ ಆರ್ಥಿಕ ಸಂಕಷ್ಟಡ್ ಉಪ್ಪುನ ಕಲಾವಿದೇರಾಯಿನ ಸಂಪಾಜೆ ಶೀನಪ್ಪ ರೈ, ಸುರತ್ಕಲ್ (20,000 ರೂ.), ಪುರುಷೋತ್ತಮ ಪೂಂಜಾ, ಕುಡ್ಲ (20,000 ರೂ.), ಕೃಷ್ಣ ಭಂಡಾರಿ ಗುಣವಂತೆ, ಹೊನ್ನಾವರ (20,000ರೂ.), ಹಳ್ಳಾಡಿ ಜಯರಾಮ ಶೆಟ್ಟಿ, ಬಾರಕೂರು (15,000), ಬೆದ್ರಾಡಿ ನರಸಿಂಹ ನಾಯಕ್, ಅಂಪಾರು (15,000), ಪ್ರಸನ್ನ ಭಟ್ ಬಾಳ್ಕಟ್, ಕಿರಿಮಂಜೇಶ್ವರ (10,000), ಹೊಳಮೊಗೆ ನಾಗಪ್ಪ, ಕುಂದಾಪುರ (7,000), ದಾಸನಡ್ಕ ರಾಮ ಕುಲಾಲ, ಕಾಸರಗೋಡು (7,000) ಬೊಕ್ಕ ಆಲ್ಮನೆ ಚಂದ್ರಶೇಖರ, ತೀರ್ಥಹಳ್ಳಿ (7,000ರೂ.) ಮೆಕ್ಲೆಗ್ ಕೊರ್ತೆರ್ .

” ಕೃಷ್ಣಾನುಗ್ರಹ ” ಅನಾಥಾಶ್ರಮಗ್ ಕಾಂಗ್ರೆಸ್ ಕೊಡುಗೆ

ಒಡಿಪು , ಜೂ.9: ಕಾರ್ಕಳ ನಗರ ಕಾಂಗ್ರೆಸ್ ಗುರ್ಕಾರ್ಲಾಯಿನ ಮದುರಾಜ್ ಶೆಟ್ಟಿ ಮುತಾಲಿಕೆಡ್ , ಬ್ಲಾಕ್ ಕಾಂಗ್ರೆಸ್ ಹೆಬ್ರಿ ಬೊಕ್ಕ ಬ್ಲಾಕ್ ಕಾಂಗ್ರೆಸ್ ಕಾರ್ಕಳ ಅಟ್ಟನೆ ಮಲ್ತಿನ ‘ಅನಾಥೇರ್ ನೊಟ್ಟುಗು ಒಂಜಿ ದಿನ’ ಕಾರ್ಯಕ್ರಮದಡಿ ಅನಾಥ ಜೋಕ್ಲೆನ ಆಶಾಕಿರಣ ಒಡಿಪು ಸಂತೆಕಟ್ಟೆದ ಕೃಷ್ಣಾನುಗ್ರಹ ಅನಾಥಾಶ್ರಮಗ್ ಜಿಲ್ಲಾ ಕಾಂಗ್ರೆಸ್ ಗುರ್ಕಾರ್ಲಾಯಿನ ಅಶೋಕಕುಮಾರ್ ಕೊಡವೂರು ಮುತಾಲಿಕೆಡ್ ಅನಾಥ ಜೋಕ್ಲೆಗ್ ಫಲ ವಸ್ತು , ಆಹಾರ ಬೊಕ್ಕ ಬೇತೆ ವಸ್ತುಲೆನ್ ಕೊರಿಯೆರ್ .

ಪಕ್ಷದ ವತಿರ್ದ್ ಕೊರೋನಾ ನಿರ್ವಹಣೆದ ಮೂಲಭೂತ ಆದ್ಯತೆದಡಿ ಥರ್ಮಾಸ್ ಪ್ಲಾಸ್ಕ್, ಸ್ಟೀಮ್ ಇನ್ಹೆಲರ್, ಥರ್ಮಲ್ ಗನ್, ಇನ್ವ ರ್ಟರ್, ಪೇಂಪರ್ಸ್, ಮಾಸ್ಕ್, ಕ್ರೇಡಲ್ ಮೇಟ್ರೆಸ್, ಬಿಸ್ಕಿಟ್, ಲೇಕ್ಟೋಜಿನ್, ಸಿರಿಲೇಕ್, ರಾಗಿಮಾಲ್ಟ್, ತರಕಾರಿ ಫಲವಸ್ತು ಸೇರಿನಂಚ ಜೋಕ್ಲೆಗ್ ಪೂರಕವಾಯಿನ ಸತ್ವಯುತ ಆಹಾರ, ಔಷದೀಯ ಪ್ಯಾಕೇಜ್ ಕೊರಿಯೆರ್.