June 25, 2021

ತುಳುನಾಡ ಜನಮನಗೆಂದಿ ಯೂಟ್ಯೂಬರ್ಸ್. ಅರ್ಪಿತ್ ಇಂದ್ರವರ್ಧನ್ ಬೊಕ್ಕ ಸಚಿನ್ ಶೆಟ್ಟಿ

✍️ಬರವು : ನೀತು ಬೆದ್ರ.

ಬದಲಾವಣೆದ ಗಾಳಿ ನರಮಾನಿನ ಮಿತ್ತ್ ಬೂರಿಲೆಕನೇ ನರಮಾನಿ ಬದಲಾವೊಂದು ಬತ್ತೇ. ಇನಿತ ದಿನಮಾನಿಗಾನಗ ಇಲ್ಲಡ್ ಕುಲೊಂದು ಲೋಕ ತೂಪಿಲೆಕಾತುಂಡು. ತನ್ಕುಲೆಗ್ ಇತ್ತಿ ಪ್ರತಿಭೆನ್ ತೋಜಾಯೆರೆ ಒಂಜಾತ್ ಒಂಜಿ ಅವಕಾಶ ಉಂಡೇ ಉಂಡು. ಯೂಟ್ಯೂಬ್. ಅಂದು ಮಾತೆರ್ಲಾ ತನ್ಕುಲೆಗ್ ವಾ ವಿಷಯ ಗೊತ್ತಿಜ್ಜಿ, ವಾ ಇಚಾರದ ಬಗ್ಗೆ ತೆರಿಯೊಡಾಂಡ ಒಂಜಾ ಗೂಗಲ್ಡ್ ಪೋದು ನಾಡುವೇ ಇಜ್ಜಾ ಯೂಟ್ಯೂಬ್ ಪೋದ್ ವಿಡಿಯೋ ತೂಪೆ. ಪ್ರತಿ ಒಂಜಿ ಇಚಾರಲಾ ನೆಟ್ಟ್ ತಿಕ್ಕುಡು ಪನೋಲಿ. ಯೂಟ್ಯೂಬ್ಡ್ ತನ್ನನೇ ಆಯಿನ ವಿಡಿಯೋ ಮಲ್ತೊಂದು ತುಳುನಾಡಿಡೀ ಪುದರ್ ಕನತಿನ ರಡ್ಡ್ ಜನಕುಲು ಬಗ್ಗೆ ಇನೀ ತೆರಿಯೊಂದು ಬರ್ಕ.

ಒರೀ ಜನಕುಲೆನ್ ತೆಲಿಪಾಯರೇ ಒರಿಯೇ ಪಾತೆರೊಂದು ತೆಲಿಪಾಪುನ ಮ್ಯಾಡ್ ಇನ್ ಕುಡ್ಲದ ಗುರ್ಕಾರೆ ಅರ್ಪಿತ್ ಇಂದ್ರವರ್ಧನ್. ನನೋರಿ ಹಾ ಹಾ ತೆಲಿತೊಂದು ತಾನು ಪೋಯಿನಲ್ಪ ಪೂರಾ ಕಡೆತ ವಿಡಿಯೋ ಮಲ್ತೊಂದು ತನ್ನನೇ ಆಯಿನ ಪೋಟೋಗ್ರಾಪಿ ಮುಖೇನ ಜನಮಂದೆಲೆನ ಮೋಕೆ ಪಡೆಯಿನ ಶಟರ್ ಬಾಕ್ಸ್ ದ ಗುರ್ಕಾರೆ ಸಚಿನ್ ಶೆಟ್ರ್.

ಅರ್ಪಿತ್ ಇಂದ್ರವರ್ಧನ್

ಶ್ರೀ ಇಂದ್ರವರ್ಧನ್ ಬೊಕ್ಕ ಶ್ರೀಮತಿ ಯಶವಂತಿ ಇಂದ್ರವರ್ಧನ್ ಮೊಕುಲೆನ ಮೋಕೆದ ಮಗೆ ಅರ್ಪಿತ್. ಎನ್ ಐ ಟಿ ಕೆ ಸುರತ್ಕಲ್ ಬರವು ಕೊಟ್ಯಗ್ ಕಾರ್ ದೀಯಿನ ಮೇರ್ ಎಸ್ ಡಿ ಎಂ ಕುಡ್ಲಡ್ ಪದವಿ ವಿದ್ಯಾಭ್ಯಾಸ ಕಲ್ತಿನಾರ್.
ಬೆಂಗಳೂರುದ ಮಿರ್ಚಿ 95 ರೇಡಿಯೋ ಕೇಂದ್ರಡ್ ಆರ್.ಜೆ ಆದ್,ಬೊಕ್ಕ ಕುಡ್ಲ ರೇಡಿಯೋ ಕೇಂದ್ರ ಬೇಲೆ ಮಲ್ತಿನಾರ್. ವಿ.4 ನ್ಯೂಸ್ಡ್ ವಿ.ಜೆ ಆದ್, ಮದರೆಂಗಿ, ಪಾರ್ಟಿದ ಡಿ.ಜೆ ಆದ್ ಎಂ.ಸಿ ಆದ್ ರಂಗುದ ಲೇಸುಗ್ ಪೊರ್ಲು ಕನತಿನ ಪ್ರತಿಭಾನ್ವಿತೆ.
ಏಪಲಾ ತನ್ನ ಗುರು ವಿಸ್ಮಯ ವಿನಾಯಕ್ ಮೆರೆನ್ ನೆನೆಪುನ ಅರ್ಪಿತ್ ರಂಗ್,ರಡ್ಡ್ ಎಕ್ರೆ ತುಳು ಸಿನೆಮಾಡ್ ಅಭಿನಯ ಮಲ್ತಿನಾರ್.
2019 ಒಕ್ಟೋಬರ್ ತಿಂಗೊಳುಡ್ ತನ್ನ ದೋಸ್ತಿಯಾಯಿನ ನವಾಝ್ ನೊಟ್ಟುಗ್ ಸೇರ್ದ್ ತನ್ನನೇ ಆಯಿನ ಯೂಟ್ಯೂಬ್ ಚಾನೆಲ್ ಶುರು ಮಲ್ತೆರ್. ಜನಕುಲೆನ್ ತೆಲಿಪಾವುನ ಸ್ಟ್ಯಾಂಡ್ ಆಪ್ ಕಾಮೆಡಿ ಮುಖೇನ ಜನಕುಲೆಗ್ ಕೈತಾಲಾಯಿನಾರ್.

ತನ್ನ ಚಾನೆಲ್ದ ಮುಖೇನ ಸಂತು ಪನ್ಪಿನ ಪುದರ್ಡ್ ಶಟ್ ಅಪ್ ಸಂತು ಪನ್ಪಿ ಡೈಲಾಂಗ್ ಒರುಟು ಬ್ರೇಕಿಂಗ್ ದ ನ್ಯೂಸ್ ,ಚಾ – ಟೀ ಸಂದರ್ಶನ,ಕಾಮೇಡಿ ಸ್ಕೆಚ್,ವೀಕ್ ಕೀ ಬಾದ್,ಚಾರ್ಲಿ 777ಟೀಸರ್ ಸ್ಪೂಪ್ ,ಟೋಟಲ್ ಟೈಮ್ ಪಾಸ್,ಮೂವೀ ರಿವಿವ್,ಸಾಂಗ್ ಸ್ಪೂಪ್ ,ವಿಸ್ಮಯ ವಿನಾಯಕೆರೆ ಸ್ಟ್ಯಾಂಡ್ ಆಪ್ ಕಾಮೆಡಿ ತಾಮಾಶೆ ಪ್ಯಾಕ್ಟರಿ,ಸ್ಮಾಲ್ ಬಂಡರ್ಸ್ ,ತುಳು ಮ್ಯಾಡ್ ಆ್ಯಡ್ಸ್ ,ಡೈಲಾಂಗ್ ಮಿಕ್ಸ್ ,ವೀಕ್ ಕಿ ಬಾದ್,ಅನ್ ಪ್ಲಗ್ ಕವರ್ಸ್ ಇಂಚಿತ್ತಿನ ವಿಡಿಯೋ ಮುಖೇನ ಪ್ರಸಿದ್ದಿಯಾತಿನಾರ್. ಈ ಚಾನೆಲ್ಗ್ ಒಂಜಿ ಲಕ್ಷ ಜನ ಚಂದಾದಾರೆರ್ ಆತೀನ ನಮಕ್ ಮಾತ ಪೆರ್ಮೆದ ವಿಚಾರಲಾ ಅಂದು. ಈ ಮಾತ ಕಾರ್ಯ ಸಾದನೆಗ್ ಮೆರ್ನ ಅಮ್ಮ,ಅಮ್ಮೆರ್,ಅಕ್ಕ ಅಂಚೆನೆ ಮ್ಯಾಡ್ ಇನ್ ಕುಡ್ಲದ ಮಾತ ಸದಸ್ಯೆರೆನ ಬೆರಿತಾಂಗ್ ಮಸ್ತ್ ಮುಖ್ಯವಾದ್ ಉಂಡುಂದ್ ಪನ್ಪೆರ್ ಅರ್ಪಿತ್.

ಸಚಿನ್ ಶೆಟ್ಟಿ

ದಿ ಕಡಬ ಸೀತಾರಾಮ ಎಂ ಶೆಟ್ಟಿ ಬೊಕ್ಕ ಶ್ರೀಮತಿ ಜಯಶ್ರೀ ಎಸ್ ಶೆಟ್ಟಿ ದಂಪತಿಲೆ ಪೇರ ಸಂಸಾರದ ಮಗೆ ಸಚಿನ್ ಕಾಪುಡು ಪುಟ್ಟುದು ಬುಲೆಯಿನಾರ್. ಕಾಪು ವಿದ್ಯಾನಿಕೇತನ ಶಾಲೆಡ್ ಬರವು ಕಲ್ತುದ್, ಆ್ಯಂಟ್ ಎನಿಮೇಶನ್ ಮುಲ್ಪ ಡಿಪ್ಲೊಮಾ ಕಲ್ತಿನಾರ್. ಎಲ್ಯ ಪ್ರಾಯೋಡೆ ಯಾನ್ ದಾದಾಲ ಮಲ್ಪೊಡ್ ಪಂದ್ ಮೊಬೈಲ್ ಟೆಕ್ನಿಷನ್ ಕಲ್ತುದ್ ನೊಕಿಯಾ ಕೇರ್ ಬೇಲೆ ಮಲ್ತುದ್ ಪಣವು ಒರಿಪಾದ್ ಎನಿಮೇಶನ್ ಕಲ್ತಿನಾರ್. ಕಲ್ಪುನಗಲಾ ಬೇಲೆ ಮಲ್ತೊಂದು ಬಂಗದ ಸಾದಿಡ್ ನಡತ್ ಬರವುನ್ ಗೇನಗ್ ಗೆಂತೊಂದಿನಾರ್ ಸಚಿನ್. ವಿ4ನ್ಯೂಸ್ ,ಉಡುಪಿ ಚಾನೆಲ್ ಲಾ ಬೆಂತಿನಾರ್.

2013 ಡ್ ಶಟರ್ ಬಾಕ್ಸ್ ಯೂಟೂಬ್ ಚಾನೆಲ್ ಶುರುಮಲ್ತುದ್ ಸುರುಕು ಕಿರು ಚಿತ್ರ,ಅಲ್ಬಮ್‌ ಸಾಂಗ್ ಮಲ್ತೊಂದ್ ಇಪ್ಪುನಗ ಅರೆಗ್ ಬೆರಿಸಾಯ ಕೊರಿನಾರ್ ತುಳು ಕನ್ನಡ ಚಿತ್ರನಟೆ ಪ್ರಥ್ವಿ ಅಂಬರ್.ಅಯಿರ್ದ್ ಬೊಕ್ಕ ತನ್ನ ಸೊಲೋ ರೈಡ್ ದ ವಿಡಿಯೋನ್ ಯೂಟೂಬ್ ಪಾಡುವೆರ್.
2017ಡ್ ಕಾಶ್ಮೀರ ಟೂ ಕನ್ಯಾಕುಮಾರಿ ,2018ಡ್ ಭೂತಾನ್ ನೇಪಾಲ್,2019ಡ್ ಹಿಮಾಚಲ್,2020ಡ್ ಉತ್ತರ ಕರ್ನಾಟಕ,ಕಚ್ಛ್ ಗುಜರಾತ್,2021ಡ್ ಕೇರಳ ಇಂಚಿನ ಕಡೆ ಪೂರ ಟ್ರಾವೆಲ್ ಮಲ್ತಿನಾರ್.
ತನ್ನ ರೈಡ್ ದ ಒಟ್ಟುಗ್ ಮದಿಮೆದಲೇಸು,ಪ್ರಿ ವೆಡ್ಡಿಂಗ್ ವಿಡಿಯೋಗ್ರಪಿ ಎನಿಮೇಶನ್ ಮಲ್ತೊಂದಿತ್ತಿನಾರ್ “ಅಮ್ಮೆರ್ ಪೋಲಿಸ್”, “ಗಂಧದಕುಡಿ”, “ಕನಸು ಕಣ್ಣುತೆರೆದಾಗ” ಸಿನೆಮಾದ ವಿಡಿಯೋಗ್ರಾಪಿ ಮಲ್ದಿನ ಅನುಭವಿ.
ಮಸ್ತ್ ಕಡೆಟ್ ಮಾನಾದಿಗೆ ಗೆತೊಂದಿನ ಸಚಿನ್ ಮೆರೆಗ್ ಅಂತರರಾಷ್ಟ್ರೀಯ,ಬೊಕ್ಕ ರಾಷ್ಟ್ರೀಯ ಪ್ರಶಸ್ತಿ, ಕೊಲ್ಕತ್ತಾ ಪಿಲ್ಮ್ ಪೆಸ್ಟಿವಲ್ ಪ್ರಶಸ್ತಿಲಾ ತಿಕ್ಕುದುಂಡು. ತನ್ನ ಯೂಟೂಬ್ ಚಾನೆಲ್ ವ್ಲೋಗ್ ಮಲ್ತೊಂದು,ಚಾರ್ಲಿ 777 ಟೀಸರ್ ಸ್ಪೂಪ್ ಜನಕುಲೆನ ಮನಸ್ಸು ಗೆಂದುದುಂಡು ಪನ್ಪಿ ಪೆರ್ಮೆ ನಮ್ಮ ತುಳುವೆರೆಗ್. ಮೆರ್ನ ಚಾನೆಲ್ದ ಚಂದಾದಾರೆರುಲಾ ಕೈತಲ್ ಕೈತಲ್ ಒಂಜಿ ಲಕ್ಷ ಜನ ಆವೊಂದು ಬೈದುಂಡು. ಸಚಿನೆರ್ನಾ ಈ ಮಾತ ಸಾದನೆದ ಪಜ್ಜೆಗು ಪಜ್ಜೆ ದೀದ್ ಬೆರಿಸಾಯ ಕೊರಿನಕುಲು ಅರ್ನ ಅಮ್ಮ,ಅಮ್ಮೆರ್ ಬೊಕ್ಕ ದೋಸ್ತಿನಕುಲು.

ಈ ರಡ್ಡ್ ಜನ ಜವನೆರುಲಾ ತುಳುನಾಡಿಡೀ ಪುದರ್ ಪುಗಾರ್ತೆಡ್ ಮೆನ್ಕೊಂದುಲ್ಲೆರು. ನನ ದುಂಬುದ ಮೊಕುಲೆನ ಸಾದನೆದ ತಾದಿ ಉಂದೇ ರೀತಿ ದುಂಬು ಪೋವಡ್. ಮೊಕುಲು ನಂಬಿನಂಚಿನ ದೈವ ದೇವೆರೆನಾ ಬೆರಿಸಾಯ ಮೊಕುಲೆಗ್ ಇಂಚೆನೆ ಇಪ್ಪಡು ಪಂದ್ ಸಮಸ್ತ ಅಭಿಮಾನಿಲೆನ ಮದಿಪು.

ಮಲಬಾರ್‌ ಗೋಲ್ಡ್ ಆಂಡ್ ಡೈಮಂಡ್ಸ್ ಉಡುಪಿ ವತಿಡ್ದ್ ಬಡಾನಿಡಿಯೂರು ಗ್ರಾಮದ ಕೊರೊನಾ ವಾರಿಯರ್ಸ್ ಗ್ ಫುಡ್ ಕಿಟ್

ಒಡಿಪು, ಜೂನ್ 25: ಕೊರೊನಾ ಲಾಕ್ ಡೌನ್ ದ ಪೊರ್ತುಡ್ ನಿರಂತರ ಬಡ ನಿರಾಶ್ರಿತೆರೆಗ್, ಕೊರೊನಾ ವಾರಿಯರ್ಸ್‌ ಗ್ ಬಂಜಿದ ಬಡಾವ್ ತೆಕ್ಕಾವುನ ಕೆಲಸ ಉಡುಪಿ ಮಲಬಾರ್ ಗೋಲ್ಡ್ ಆಂಡ್ ಡೈಮಂಡ್ಸ್ ಉಡುಪಿ ಮಲ್ತೊಂದುಂಡ್..ಉಡುಪಿ ಶಾಖೆದ ಮುಖ್ಯಸ್ಥೆರಾಯಿನ ಹಫೀಜ್ ರೆಹಮಾನ್ ತಾನೇ ಸ್ವತಃ ಬಂಗೊಡ್‌ ಉಪ್ಪುನಕ್ಲೆನ ಇಲ್ಲಗ್ ಅತ್ತುಂಡ ಗ್ರಾಮದ ಸಂಘ ಸಂಸ್ಥೆದ ಮುಖೇನ ಫುಡ್ ಕಿಟ್ ನ್ ಕೊರ್ಪಿನ ಬೇಲೆ ಮಲ್ತೊಂದುಲ್ಲೆರ್.

ಈ ಬೇಲೆಡ್ ಮೆರೆಗ್ ಸಾಥ್ ಕೊರ್ಪಿನಕುಲು ಶಾಖೆದ ಸ್ಟೋರ್ ಮೆನೇಜರ್ ರಾಘವೇಂದ್ರ ನಾಯಕ್ ಬೊಕ್ಕ ತನ್ಸೀಮ್ ಶಿರ್ವ ಮೊಕುಲು.ಇದಮುಟ್ಟ ಸುಮಾರ್ ಉಡುಪಿ ಜಿಲ್ಲೆಡ್ 6000 ಡ್ದ್ ಲಾ ಜಾಸ್ತಿ ಕಿಟ್ ಲೆನ್ ಬಡ ಜನಕ್ಲೆಗ್ ಹಸ್ತಾಂತರ ಮಲ್ತುದೆರ್..ಮೊಕಲೆನ್ ಕಾರ್ಯೊನ್ ಇಡೀ ಉಡುಪಿದ ಜನತೆ ಮೆಚ್ಚಿದ್‌ ಕೊಂಡಾಡುಂಡ್.

ಶುಕ್ರವಾರದಾನಿ ಬಡಾನಿಡಿಯೂರು ಗ್ರಾಮದ 6‌ ಜನ ಕೊರೊನಾ ವಾರಿಯರ್ಸ್ ಗ್ ಫುಡ್ ಕಿಟ್ ಕೊರಿಯೆರ್..ಈ ಪೊರ್ತುಡ್ ಉಡುಪಿ ಮಲಬಾರ್ ಗೋಲ್ಡ್ ಆಂಡ್ ಡೈಮಂಡ್ಸ್ ದ ಮುಖ್ಯಸ್ಥೆರಾಯಿನ ಹಫೀಜ್ ರೆಹಮಾನ್,ಸ್ಟೋರ್ ಮೆನೇಜರ್ ರಾಘವೇಂದ್ರ ನಾಯಕ್,ಚಾರಿಟಿ ಮೆನೇಜರ್ ತನ್ಸೀಮ್ ಶಿರ್ವ ಬಡಾನಿಡಿಯೂರು ಗ್ರಾಮ ಪಂಚಾಯತ್ ದ ಪಿಡಿಓ ಶ್ರೀಮತಿ ಮಾಲತಿ, ಪಂಚಾಯತ್ ಉಪಾಧ್ಯಕ್ಷೆರಾಯಿನ ಶೀಲಾ ಸುಧಾಕರ್, ನವಶಕ್ತಿ ಸಂಜೀವಿನಿ ಒಕ್ಕೂಟದ ಅಧ್ಯಕ್ಷೆರಾಯಿನ ಲತಾ ಅಶೋಕ್, ಉಪಾಧ್ಯಕ್ಷೆ ತಾರಾ ಪ್ರಭಾಕರ್, ಕಾರ್ಯಂತೆರಾಯಿನ ವತ್ಸಲಾ ಉಪಸ್ಥಿತರಿತ್ತೆರ್..ಸಂಜೀವಿನಿ ಒಕ್ಕೂಟದ ವತಿಡ್ದ್ ಕೊರೊನಾ ವಾರಿಯರ್ಸ್ ಗ್ ರೈನ್ ಕೋಟ್ ಕೊರಿಯೆರ್.

ಮುಮ್ತಾಜ್ ಬೇಗಮ್‌ ಮೆರ್ನ ‘ಸ್ವಾತಂತ್ರ್ಯದ ಕಹಳೆ’ ಕೃತಿಗ್ ಮುಸ್ಲಿಂ ಸಾಹಿತ್ಯ ಪ್ರಶಸ್ತಿ

ಕುಡ್ಲ, ಜೂನ್ 25: ಕನ್ನಡಡ್ ಪ್ರಕಟ ಆಯಿನ ಮುಸ್ಲಿಂ ಬರಹಗಾರರ ಅತ್ಯುತ್ತಮ ಕೃತಿಗ್ ಕರ್ನಾಟಕ ಮುಸ್ಲಿಂ ಲೇಖಕರ ಸಂಘ ಪ್ರತಿ ವರ್ಷ ಕೊರ್ಪಿನ 2019ನೇ ಸಾಲ್ ದ ರಾಜ್ಯ ಮಟ್ಟದ ‘ಮುಸ್ಲಿಂ ಸಾಹಿತ್ಯ ಪ್ರಶಸ್ತಿ’ಗ್ ಪೆರಿಯ ಸಾಹಿತಿ, ದಿವಂಗತ ಮುಮ್ತಾಜ್ ಬೇಗಮ್‌ (73) ಮೆರ್ನ ‘ಸ್ವಾತಂತ್ರ್ಯದ ಕಹಳೆ’ ಕೃತಿ ಆಯ್ಕೆಯಾತುಂಡು .

ಖತಾರ್‌ಡ್ ಉಪ್ಪುನ ಯುನೆಸ್ಕೊದ ಆರ್ಥಿಕ ಬೊಕ್ಕ ಆಡಳಿತ ಸಹಾಯಕೆರಾದ್ ದುಬೈನ ಅಲ್ ಮೀರ್ ಸಂಸ್ಥೆ ಬೊಕ್ಕ ಫ್ಯೂಜಿ ಗಾರ್ಮೆಂಟ್ಸ್’ದ ಕಾರ್ಯದರ್ಶಿಯಾದ್ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಬೊಕ್ಕ ಕರಾವಳಿ ಲೇಖಕಿ ಬೊಕ್ಕ ವಾಚಕಿಯೆರೆನ ಸಂಘದ ಸಕ್ರಿಯ ಸದಸ್ಯೆರಾದ್ ಬೇಲೆ ಮಲ್ತೊಂದು ಇತ್ತಿನ ಮುಮ್ತಾಜ್ ಬೇಗಮ್ ಕಿನ್ಯ ಪ್ರಯೋಡೆ ಬರೆಯೊಂದು ಇತ್ತಿನಾರ್.
‘ಅವ್ಯಕ್ತ’ ಬೊಕ್ಕ ‘ಅಂಕುರ’ (ಕಥಾ ಸಂಕಲನ), ‘ಪರದೇಶಿ’ (ಧಾರವಾಹಿ), ‘ವರ್ತುಲ’ ಅಂಚನೇ ‘ಬಂದಳಿಕೆ’ (ಕಾದಂಬರಿ), ‘ಚಿಂಪಿ’ (ಮಕ್ಕಳ ಸಾಹಿತ್ಯ), ‘ಸರ್ವ ಋತುಗಳು ನಿನಗಾಗಿ’ (ಕವನ ಸಂಕಲನ) ‘ಟು ದಿ ಅನ್‌ನೌನ್ ಡೆಸ್ಟಿನೇಶನ್’ (ಇಂಗ್ಲಿಷ್ ಕಾದಂಬರಿ) ಮೆರ್ನ ಪ್ರಕಟಿತ ಕೃತಿಲು.

ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಹೆಲ್ಪ್ಲೈನ್ ವತಿರ್ದ್ ಜನಾಂದೋಲನ ಲೇಸ್

ಕುಡ್ಲ , ಜೂ.25: ‘ಮಾತೆರೆಗ್ಲಾ ಉಚಿತ ಲಸಿಕೆ’ ಪಂದ್ ಹೋರ್ಡಿಂಗ್ ಪಾಡಿನ ಮಲ್ಲಿಕಟ್ಟೆದ ಕೈತಲ್ ಪೋಯಿನ ದ.ಕ. ಜಿಲ್ಲಾ ಕಾಂಗ್ರೆಸ್ ಹೆಲ್ಪ್‌ಲೈನ್‌ದ ನಿಯೋಗ ‘ಮಾತೆರೆಗ್ಲಾ ಲಸಿಕೆ. ಆಂಡ , ಉಚಿತ ಲಸಿಕೆ ಓಲುಂಡು ?’ ಪಂದ್ ಪ್ರಶ್ನೆ ಮಲ್ಪುನ ಮುಖೇನ ಗುರುವಾರ ಜನಾಂದೋಲನ ಕಾರ್ಯಕ್ರಮ ನಡಪಾಯೆರ್ .

ಲೇಸ್ ಉದಿಪನ ಮಲ್ತ್ ಪಾತೆರಿನ ಮಾಜಿ ಸಚಿವ, ಶಾಸಕ ಯು.ಟಿ. ಖಾದರ್ ‘ನಾಮಫಲಕ ಮಾತ್ರವೇ ಉಚಿತ ಅತ್ತoದೆ ಲಸಿಕೆ ಧರ್ಮದ ಇಜ್ಜಿ . ಇಂಚ ಸುಳ್ಳು ಪನ್ಪಿನವು ನಾಚಿಗೆ ಪಂದ್ ಪಂಡೆರ್ ಕರಿನ 7 ವರ್ಷರ್ದ್ ಮಾತಾ ಅಶ್ವಾಸನೆಲೆನ್ ಕೊರ್ದು ವಂಚನೆ ಮಲ್ತಿನ ಕೇಂದ್ರ ಬೊಕ್ಕ ರಾಜ್ಯ ಸರಕಾರ, ಇತ್ತೇ ಉಚಿತ ಲಸಿಕೆ ಕೊರಂದೆ ವಂಚನೆ ಮಲ್ತೊಂದು ಉಲ್ಲೆರ್ ಪಂದ್ ಅಗ್ರಹ ಮಲ್ತೆರ್ .

ಸೋಮವಾರರ್ದ್ ಒಡಿಪುಡು ನರ್ಮ್ ಬಸ್ ಸಂಚಾರ

ಒಡಿಪು , ಜೂ.25: ಇತ್ತೇ ಒಡಿಪುಡು ಹೆಬ್ರಿ ಭಾಗಡ್ ನರ್ಮ್ ಬಸ್‌ ಸಂಚಾರ ಮಲ್ತೊಂದು ಉಂಡು , ನನ ಸೋಮವಾರರ್ದ್ ಪೇಂಟೆಡ್ ಜಾಸ್ತಿ ಸಂಖ್ಯೆಡ್ ನರ್ಮ್ ಬಸ್‌ ಸಂಚಾರ ಮಲ್ಪುನ ಬಗ್ಗೆ ಕೆಎಸ್ಸಾರ್ಟಿಸಿ ಚಿಂತನೆ ನಡಪಾವೊಂದು ಉಂಡು ಪಂದ್ ನಿಗಮದ ಮೂಲ ತೆರಿಪಾದುಂಡು .

ತನ್ನ ಒಂಜಿ ತಿಂಗೊಲ್ದ ನಿವೃತ್ತಿ ವೇತನನ್ ಕೋವಿಡ್ ಸಹಾಯನಿಧಿಗ್ ಕೊರಿನ ಮಾಜಿ ಶಾಸಕ ವಿಜಯ ಕುಮಾರ್ ಶೆಟ್ಟಿ

ಕುಡ್ಲ , ಜೂ. 25: ಕೋವಿಡ್ ಸಹಾಯನಿಧಿಗ್ ಮಾಜಿ ಶಾಸಕ ವಿಜಯ ಕುಮಾರ್ ಶೆಟ್ಟಿ ಮೇರ್ ತನ್ನ ಒಂಜಿ ತಿಂಗೊಲ್ ದ ನಿವೃತ್ತಿ ವೇತನನ್ ದ.ಕ.ಜಿಲ್ಲಾಧಿಕಾರಿಗ್ ಕೊರಿಯೆರ್ .

ಈ ಪೊರ್ತುಡು ಮಾಜಿ ಉಪಮೇಯರ್ ಪುರುಷೋತ್ತಮ ಚಿತ್ರಾಪುರ, ಹುಸೈನ್ ಕಾಟಿಪಳ್ಳ, ಮಾಜಿ ಕಾರ್ಪೊರೇಟರ್ ಕುಮಾರ್ ಮೆಂಡನ್ ಪಾಲ್ ಪಡೆದಿತ್ತೆರ್ .

ಬಡಾನಿಡಿಯೂರು ಗ್ರಾಮ ಪಂಚಾಯತ್ ಡ್ ವಿಮಾ ಸಪ್ತಾಹಗ್ ಚಾಲನೆ

ಒಡಿಪು, ಜೂನ್ 25:ವಿಮಾ ಸಪ್ತಾಹದ ಅಂಗವಾದ್‌ ಜಿಲ್ಲಾ ಪಂಚಾಯತ್ ರಾಷ್ಟ್ರೀಯ ಗ್ರಾಮೀಣ ಜೀವನೋಪಾಯ ಸಂಜೀವಿನಿದ ಸದಸ್ಯೆರೆಗ್ ‌ಬಡಾನಿಡಿಯೂರು ಗ್ರಾಮ ಪಂಚಾಯತ್ ದ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಆಯಿನ ಶ್ರೀಮತಿ ಮಾಲತಿ ಮೇರ್ ಪ್ರಧಾನಮಂತ್ರಿ ಜೀವನ ಜ್ಯೋತಿ ಬೊಕ್ಕ ಸುರಕ್ಷಾ ವಿಮಾ ಯೋಜನೆದ ಸದುಪಯೋಗ ಮಲ್ತೊನರೆಗ್ ಮಾಹಿತಿ ಕೊರಿಯೆರ್.

ನವಶಕ್ತಿ ಸಂಜೀವಿನಿ ಬಡಾನಿಡಿಯೂರುದ ಮಾತಾ ಪದಾಧಿಕಾರಿಲು ಈ ಯೋಜನೆಗ್ ಅರ್ಜಿ ಪಾಡಿಯೆರ್..ಪಂಚಾಯತ್ ದ ಸದಸ್ಯೆರಾಯಿನ ಶ್ರೀ ಮತಿ ಯಶೋದ ಆಚಾರ್ಯ ವಿಮಾ ಯೋಜನೆ ದ ಅರ್ಜಿನ್‌ ಸಂಜೀವಿನಿದ ಪದಾಧಿಕಾರಿಲೆಗ್ ಹಸ್ತಾಂತರ ಮಲ್ತೆರ್.

ಈ ಪೊರ್ತುಡ್ ನವಶಕ್ತಿ ಸಂಜೀವಿನಿ ಸಂಘದ ಗ್ರಾಮ ಒಕ್ಕೂಟದ ಅಧ್ಯಕ್ಷೆರಾಯಿನ ಶ್ರೀ ಮತಿ ಲತಾ ಅಶೋಕ್, ಉಪಾಧ್ಯಕ್ಷೆರಾಯಿನ ಶ್ರೀ ಮತಿ ತಾರಾ ಪ್ರಭಾಕರ್, ಕಾರ್ಂತೆರಾಯಿನ ಶ್ರೀ ಮತಿ ವತ್ಸಲಾ, ಅಂಚೆನೆ ಬಾಕಿದ ಪದಾಧಿಕಾರಿಲು ಉಪಸ್ಥಿತರಿತ್ತೆರ್..ನವಶಕ್ತಿ ಸಂಜೀವಿನಿ ಬಡಾನಿಡಿಯೂರು ಗ್ರಾಮೊಡ್ ಒಟ್ಟುಗ್ 60 ಸಂಘೊಲೆಡ್ 600 ಜನ ಪೊಂಜೊವುನಕುಲು ಸದಸ್ಯೆರಾದುಲ್ಲೆರ್.ಮಾತಾ ಸದಸ್ಯೆರ್ ಲಾ ಸರಕಾರದ ಯೋಜನೆಲೆನ ಸದುಪಯೋಗ ಪಡೆತೊನೊಡ್ ,ಪೊಂಜೊವುನಕುಲು ಎರೆನಲಾ ಹಂಗ್ ದಾಂತೆ ಸ್ವಾಭಿಮಾನಿಯಾದ್ ಬದುಕೊಡ್ ಪಂಡುದ್ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಶ್ರೀಮತಿ ಮಾಲತಿ ಈ ಪೊರ್ತುಡ್ ತೆರಿಪಾಯೆರ್..

ಎಂಐಟಿದ ಜಂಟಿ ನಿರ್ದೇಶಕೆರಾದ್ ಡಾ.ಸೋಮಶೇಖರ ಭಟ್ ಆಯ್ಕೆ

ಮಣಿಪಾಲ, ಜೂ.25: ಮಣಿಪಾಲ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿದ ಪೊಸ ಜಂಟಿ ನಿರ್ದೇಶಕೆರಾದ್ ಇಲೆಕ್ಟ್ರಾನಿಕ್ಸ್ ಎಂಡ್ ಕಮ್ಯುನಿಕೇಷನ್ ಇಂಜಿನಿಯರಿಂಗ್ ವಿಭಾಗದ ಪ್ರಾಧ್ಯಾಪಕೆರಾಯಿನ ಡಾ.ಸೋಮಶೇಖರ ಭಟ್ ಆಯ್ಕೆ ಆತೆರ್ .

ಈತ್ ಮುಟ ಸಂಸ್ಥೆದ ಸಹ ನಿರ್ದೇಶಕೆ(ಅಭಿವೃದ್ಧಿ)ರಾದ್ ಬೇಲೆ ಮಲ್ತೊಂದು ಇತ್ತಿನ ಡಾ.ಭಟ್, ಕರಿನ ಆಜಿ ವರ್ಷರ್ದ್ ಎಂಐಟಿದ ಜಂಟಿ ನಿರ್ದೇಶಕೆರಾದ್ ಬೇಲೆ ಮಲ್ತೊಂದು ಇತ್ತಿನ ಡಾ.ಬಿ.ಎಚ್.ವಿ.ಪೈ ಮೆರೆರ್ದ್ ಅಧಿಕಾರ ಸ್ವೀಕಾರ ಮಲ್ತೇರ್ .