June 23, 2021

ತುಳು ಅಕಾಡೆಮಿ ಸದಸ್ಯೆರೆಡ್ದ್ ದೈವಾರಾಧಕೆರೆಗ್‌ ಫುಡ್ ಕಿಟ್

ಒಡಿಪು, ಜೂನ್ 23: ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾಯಿನ ತಾರಾ ಉಮೇಶ್ ಆಚಾರ್ಯ, ಬೊಕ್ಕ ಡಾ.ಆಕಾಶ್ ರಾಜ್ ಜೈನ್ ದೈವಾರಾಧನಾ ಕಲಾವಿದೆರೆಗ್ ಮಾಸ್ಕ್,ಬಿಸ್ಕಿಟ್ ಬೊಕ್ಕ ಫುಡ್ ಕಿಟ್ ಕೊರ್ದ್ ಸಹಕಾರ ಮಲ್ತೆರ್.

ಇನಿರ್ದ್ ಕುಡ್ಲಡ್ ಮಾತಾ ಅಂಗಡಿಡ್ ಬೇರ ಮಲ್ಪರೆ ಅವಕಾಶ : ಕೋಟ ಶ್ರೀನಿವಾಸ ಪೂಜಾರಿ

ಕುಡ್ಲ, ಜೂನ್ 23: ಕೊರೋನಾ ಪಾಸಿಟಿವಿಟಿ ದರ ಕಮ್ಮಿ ಆಂಡಲಾ ಜಿಲ್ಲಾಡಳಿತರ್ದ್ ಲಾಕ್ ಡೌನ್ ಕ್ರಮಲೆನ್ ದಕ್ಷಿಣ ಕನ್ನಡ ಜಿಲ್ಲೆಡ್ ದುಂಬು ಕೊಂತೆರ್. ಆಂಡ ಅಂಗಡಿ ಗುರ್ಕಾರ್ಲು ಸೇರಿನಂಚ ಸಾರ್ವಜನಿಕೆರ್ನ ಬಿನ್ನಾಪು ಗಾದ್ , ಇನಿರ್ದ್ ಜಿಲ್ಲೆಡ್ ಅನ್ ಲಾಕ್ ಮಲ್ತೊಂದು ಉಲ್ಲೆರ್ . ಮಾತಾ ಅಂಗಡಿ ಸುರು ಮಲ್ಪರೆ ಅವಕಾಶ ಕೊರ್ತೆರ್ .

ಈ ಬಗ್ಗೆ ಮಾಹಿತಿ ಕೊರಿನ ಜಿಲ್ಲಾ ಉಸ್ತುವಾರಿ ಸಚಿವ ಕೋಟಾ ಶ್ರೀನಿವಾಸ ಪೂಜಾರಿ ಮೇರ್ , ಇನಿರ್ದ್ ಜಿಲ್ಲೆಯಾಧ್ಯಂತ ಮಾತಾ ಅಂಗಡಿ ಮುಂಗಟ್ಟುಲೆನ್ ಕಾಂಡೆ 7 ಗಂಟೆರ್ದ್ ಮಧ್ಯಾಹ್ನ 2 ಗಂಟೆ ಮುಟ ಬೇರ ಮಲ್ಪರೆ ಅವಕಾಶ ಉಂಡು .

ಜೋಕ್ಲೆಗ್ ಭರ್ಜರಿ ನ್ಯೂಸ್ : ಸರಕಾರದ ವತಿರ್ದ್ ಜೋಕ್ಲೆಗ್ ಟ್ಯಾಬ್ ಪಟ್ಟುನ ಲೇಸ್ ಗ್ ಚಾಲನೆ

ಬೆಂಗ್ಳೂರು, ಜೂನ್ 23 : ಜೋಕ್ಲೆಗ್ ಉಚಿತವಾದ್ ಟ್ಯಾಬ್ ಪಟ್ಟುನ ಲೇಸ್ ಗ್ ಇನಿ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಚಾಲನೆ ಕೊರಿಯರೆ ಉಲ್ಲೆರ್ .

ಉನ್ನತ ಶಿಕ್ಷಣದ ಜೋಕ್ಲೆಗ್ ಉಚಿತವಾದ್ ಟ್ಯಾಬ್ ಕೊರೊಂದು ಉಲ್ಲೆರ್ . 1.55 ಲಕ್ಷ ಜೋಕ್ಲೆಗ್ ಉಚಿತವಾದ್ ಟ್ಯಾಬ್ ಕೊರ್ಪ . ಕೋವಿಡ್ ಸಂಕಷ್ಟದ ನೆಲೆಟ್ಟ್ ನಗರ ಬೊಕ್ಕ ಗ್ರಾಮೀಣ ಜೋಕ್ಲೆನ ಕಲಿಕೆಗ್ ತಾರತಮ್ಯ ನಿವಾರಣೆಗಾದ್ ಉಚಿತವಾದ್ ಟ್ಯಾಬ್ ಕೊರ್ಪ . ವಿಧಾನಸೌಧಡ್ ಇನಿ ಕಾಂಡೆ 11 ಗಂಟೆಗ್ ಟ್ಯಾಬ್ ವಿತರಣೆಗ್ ಚಾಲನೆ ಕೊರ್ಪಿನ ಮುಖೇನ ನಡಪರೇ ಉಂಡು ಪಂದ್ ಪಂಡೆರ್.

ಹುಷಾರ್ದಾಂತೆ ತೀರ್ ಪೋಯಿನ ಖ್ಯಾತ ಸಂಗೀತಗಾರ್ತಿ ಬೊಕ್ಕ ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತ ಪರಸ್ಸಲಾ ಬಿ ಪೊನ್ನಮ್ಮಲ್

ತಿರುವನಂತಪುರಂ, ಜೂನ್ 23 :ಕರಿನ ಎನ್ಮ ದಶಕರ್ದ್ ಶಾಸ್ತ್ರೀಯ ಸಂಗೀತ ಪ್ರಿಯೆರೆನ್ ತನ್ನ ನಂಬರೇ ಆವಂದಿನ ಸಂಗೀತ ಕಚೇರಿದ ಮುಖೇನ ರಂಜಿಸಾಯಿನ ಪ್ರಸಿದ್ಧ ಕರ್ನಾಟಕ ಸಂಗೀತಗಾರ್ತಿ ಬೊಕ್ಕ ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತ ಪರಸ್ಸಲಾ ಬಿ ಪೊನ್ನಮ್ಮಲ್ ಮೇರ್ ಅಂಗಾರೆ ಮುಲ್ಪದ ವಲಿಯಾಸಡ್ ಉಪ್ಪುನ ತಮ್ಮ ಸ್ವಗ್ರಹಡ್ ತೀರ್ ಪೋಯೆರ್.

96 ವರ್ಷ ಆಯಿನ ಮೇರ್ ಹುಷಾರ್ ದಾಂತೆ ತೀರ್ ಪೋಯೆರ್ ಪಂದ್ ಕುಟುಂಬದಕುಲು ತೆರಿಪಾದೆರ್.

ಅಭ್ಯುದಯ ಭಾರತೀ ಸೇವಾ ಟ್ರಸ್ಟ್ (ರಿ.) ಕಾಟಿಪಳ್ಳ ವತಿರ್ದ್ ಜಾಸ್ತಿ ಮೂಲ ಪುದರ್ ಪಟ್ಟಿ ಮಲ್ಪುನ ಪಂಥ

ಕಾಟಿಪಳ್ಳ, ಜೂನ್ 23: ನಮ ಉಪ್ಪುನ ಜಾಗೆದ ತುಳುನಾಡ್ ದ ಪರಂಪರೆದ ಮೂಲ ಪುದರ್ ಇತ್ತೆದ ಪೀಳಿಗೆಗ್ ತೆರಿಪಾವುನ ನೆಲೆಟ್ಟ್ ಅಭ್ಯುದಯ ಭಾರತೀ ಸೇವಾ ಟ್ರಸ್ಟ್ (ರಿ.) ಕಾಟಿಪಳ್ಳ ವತಿರ್ದ್ ಕಾಟಿಪಳ್ಳ ವ್ಯಾಪ್ತಿಡ್ ಬರ್ಪಿನ ಪಿನ್ ಕೋಡ್ (575030)ದ ಮೂಲ ಪುದರ್ ಪಟ್ಟಿ ಮಲ್ಪುನ ಪಂಥ ನಡಪರೇ ಉಂಡು.

ಉದಾರ್ಮೆಗ್ : ಇತ್ತೆದ ಪುದರ್ 2ನೇ ಬ್ಲಾಕ್ ಕಾಟಿಪಳ್ಳ ಮೂಲ ಪುದರ್ : ವಿಟ್ಲ ಪದವು.

ನಿಕ್ಲೆಗ್ ಗೊತ್ತುಪ್ಪುನ ಪುದರ್ ನ್ ಪಟ್ಟಿ ಮಲ್ತ್ ವಾಟ್ಸಪ್ಪ್ ಮುಖೇನ 8050152342 ಈ ಸಂಖ್ಯೆಗ್ ತಾರೀಖ್ 30/6/2021 ತ್ತ ಉಲಯಿ ಕಡಪಾವೊಡು.