June 2, 2021

ಅಂಬಲಪಾಡಿ ದೇವಳರ್ದ್ ಕಿಟ್ ಹಸ್ತಾಂತರ

ಒಡಿಪು, ಜೂನ್ 2: ಒಡಿಪುದ ಅಂಬಲಪಾಡಿ ಶ್ರೀ ಜನಾರ್ದನ ಮಹಾಕಾಳಿ ದೇವಸ್ಥಾನ ವತಿರ್ದ್ ಒಡಿಪುದ 161ಸಿ ದರ್ಜೆದ ದೇವಸ್ಥಾನಗ್ 208 ಸಿಬಂದಿಲೆಗ್ ಸುಮಾರ್ 4 ಲಕ್ಷ ರೂ. ವೆಚ್ಚದ ಆಹಾರ ಕಿಟ್ ನ್ ದೇವಸ್ಥಾನದ ಕ್ಷೇತ್ರಾಧಿಕಾರಿ ಡಾ. ನಿ. ಬೀ. ವಿಜಯ ಬಲ್ಲಾಳ್ ಅಂಗಾರೆ ತಾಲೂಕು ಕಚೇರಿ ಕಂದಾಯ ಅಧಿಕಾರಿ ಉಪೇಂದ್ರ ಮೆರೆಗ್ ಕೊರಿಯೆರ್ .

ಕರಿನ ವರ್ಷ ಸರ್ಕಾರಿ ಅಧಿಕಾರಿಲು , ಶಾಸಕ ಬೊಕ್ಕ ಸಚಿವೆರ್ನ ಸೂಚನೆ ಮಿತ್ತ್ ಬಡಜನಕ್ಲೆಗ್ 4 ಸಾರ ಆಹಾರ ಕಿಟ್, ಒಂಜಿ ತಿಂಗೊಲ್ ದ ಕಾಲಾ ವಲಸೆ ಕಾರ್ಮಿಕೆರ್ ಕೆಲವು ಆಸ್ಪತ್ರೆದ ಸೋಂಕಿತ ರೋಗಿಲು ಬೊಕ್ಕ ಜಿಲ್ಲಾಸ್ಪತ್ರೆ ಸಿಬಂದಿಲೆಗ್ ದಿನಾಲ 2,500 ವನಸ್ ದ ವ್ಯವಸ್ಥೆ ಮಲ್ತಿತ್ತ ಪಂದ್ ಡಾ. ಬಲ್ಲಾಳ್ ಪಂಡೆರ್ .

ಕಷ್ಟದ ಪೊರ್ತುಡುಲಾ ಸಾಕಾರ ಕೊರ್ಪಿನ ಒಡಿಪುದ ಮಲಬಾರ್ ಗೋಲ್ಡ್ ಆಂಡ್ ಡೈಮಂಡ್ಸ್

ಅಜೆಕಾರು, ಜೂನ್ 2: ಏಪಲಾ ಸಮಾಜಮುಖಿ ಕೆಲಸಡ್ ದುಂಬು ಬರ್ಪಿನ ಒಡಿಪು ದ ಮಲಬಾರ್ ಗೋಲ್ಡ್ ಅಂಡ್ ಡೈಮಂಡ್ಸ್ ಆರೋಗ್ಯ, ಶಿಕ್ಷಣ, ಬಡ ಪೊಣ್ಣು ಜೋಕ್ಲೆನ ಮದಿಮೆ , ಪಾಪದಕ್ಲೆಗ್ ಇಲ್ಲ್ ಕಟ್ಟರೆ ಸಾಕಾರ ಇಂಚ ಸಾಕಾರ ಕೊರೊಂದು ಉಲ್ಲೆರ್.

ಕೋವಿಡ್ ದ ಈ ಸಂಕಷ್ಟದ ಪೊರ್ತುಡ್ ಲಾ ಅಧಿಕ ಪಡಿತರ ಕಿಟ್ ಲೆನ್ ಪಾಪದಕ್ಲೆಗ್ ಜಿಲ್ಲೆಡ್ ಕೊರೊಂದು ಉಲ್ಲೆರ್, ಮುಲ್ಪದ ಒಟ್ಟು 40ರ್ದ್ ಜಾಸ್ತಿ ಆಶಾ ಕಾರ್ಯಕರ್ತೆರ್ ಬೊಕ್ಕ ಕಷ್ಟಡ್ ಉಪ್ಪುನಕ್ಲೆಗ್ ಪಡಿತರ ಕಿಟ್ ಕೊರಿಯೆರ್.

ಈ ಪೊರ್ತುಡು ಮಲಬಾರ್ ಗೋಲ್ಡ್ ಗುರ್ಕಾರ್ಲಾಯಿನ ರಾಘವೇಂದ್ರ ನಾಯಕ್, ಸಂಸ್ಥೆದ ನಿತ್ಯಾನಂದ ನಾಯಕ್, ಸುಜಿತ್ ನಾಯಕ್, ಆರೋಗ್ಯಾಧಿಕಾರಿ ಅನುಷಾ ಶೆಟ್ಟಿ ಬೊಕ್ಕ ಆಶಾ ಕಾರ್ಯಕರ್ತೆರ್ ಪಾಲ್ ಪಡೆದಿತ್ತೆರ್.

ಬಿರುವ ಬ್ರದರ್ಸ್ ವತಿರ್ದ್ ಪಣವುದ ಸಾಕಾರ

ಬಂಟ್ವಾಳ, ಜೂನ್ 2: ಬಂಟ್ವಾಳ ತಾಲೂಕುದ ಸಜೀಪ ಮೂಡ ಗ್ರಾಮದ ಪಣೋಲಿಬೈಲ್ ದ ಪ್ರಭಾಕರ ಪೂಜಾರಿಲು ಕಾಂಕ್ರೀಟ್ ಬೇಲೆಗ್ ಪೋನಗ ಪಿಕಪ್ ಗಾಡಿ ರ್ದ್ ಬೂರ್ದು ತರೆಕ್ ಗಂಭೀರ ಗಾಯ ಆದ್ ಕುಡ್ಲದ ಖಾಸಗಿ ಆಸ್ಪತ್ರೆಡ್ ಮರ್ದ್ ಪಡೆಯೊಂದು ಉಲ್ಲೆರ್ ಇಲ್ಲದಕ್ಲೆಗ್ ಮರ್ದ್ ದ ಖರ್ಚ್ ತೂಯೆರೆ ಕಷ್ಟ ಉಪ್ಪುನೆರ್ದಾವರ , ಮೆಕ್ಲೆನ ಕಷ್ಟಗ್ ಆಸರೆಯಾಪಿನ ನೆಲೆಟ್ಟ್ ನಮ್ಮ ‘ಬಿರುವ ಬ್ರದರ್ಸ್ ಗ್ರೂಪ್ 15,000  ಪಣವುದ ಸಾಕಾರನ್ ಅಕ್ಲೆನ ಇಲ್ಲಗ್ ಪೋದು ಕೊರಿಯೆರ್.

ಈ ಪೊರ್ತುಡು ಬಿರುವ ಬ್ರದರ್ಸ್ ಗ್ರೂಪ್ ದ ಸ್ಥಾಪಕ ಅಶ್ವಿನ್ ಪೂಜಾರಿ ಕಾರಾಜೆˌ ಪಣೋಲಿಬೈಲ್ˌ ಸದಸ್ಯೆರಾಯಿನ ಸಂದೀಪ್ ಪೂಜಾರಿ ಕರ್ಮರ್ , ಅಶ್ಪಿನ್ ಪೂಜಾರಿ ಕೊಲ್ಯ ಬೊಕ್ಕ ಸಾಕಾರ ಕೊರಿನ ನಿತೇಶ್ ಪಣೋಲಿಬೈಲ್ ಪಾಲ್ ಪಡೆದಿತ್ತೆರ್ .

ಕುಡ್ಲ ಯುವ ವಕೀಲೆರೆಗ್ ಲಸಿಕೆ ಕಾರ್ಯಕ್ರಮ

ಕುಡ್ಲ, ಜೂನ್ 2: : ವಕೀಲೆರ್ನ ಸಂಘದ ವತಿರ್ದ್ ಪೇಂಟೆದ ಯುವ ವಕೀಲೆರೆಗ್ ಕೋವಿಡ್ ಮುಂಚೂಣಿ ಯೋಧೇರ್ ಪನ್ಪಿನ ನೆಲೆಟ್ಟ್ ಲಸಿಕೆ ಕೊರ್ಪಿನ ಲೇಸ್ ನ್ಯಾಯಾಲಯ ಆವರಣಡ್ ನಡತುಂಡು.

ಜಿಲ್ಲಾ ಪ್ರಧಾನ ಬೊಕ್ಕ ಸತ್ರ ನ್ಯಾಯಾಧೀಶ ಮುರಳೀಧರ ಪೈ ಮೆರ್ನ ಮುತಾಲಿಕೆಡ್ ಆರೋಗ್ಯ ಇಲಾಖೆದ ಅಧಿಕಾರಿಲು ಸುಮಾರ್ 200 ಯುವ ವಕೀಲೆರೆಗ್ ಲಸಿಕೆ ಕೊರಿಯೆರೆ .

ಕುಡ್ಲ ವಕೀಲೆರ್ನ ಸಂಘದ ಗುರ್ಕಾರ್ಲಾಯಿನ ಎನ್. ನರಸಿಂಹ ಹೆಗ್ಡೆ, ಪ್ರಧಾನ ಕಾರ್ಯದರ್ಶಿ ಎಚ್.ವಿ. ರಾಘವೇಂದ್ರ, ಉಪಾಧ್ಯಕ್ಷೇರಾಯಿನ ಜಿನೇಂದ್ರ ಕುಮಾರ್, ಜೊತೆ ಕಾರ್ಯದರ್ಶಿ ಪ್ರಮೀಳಾ, ಕಾರ್ಯಕಾರಿ ಸಮಿತಿ ಸದಸ್ಯೆರಾಯಿನ ಪ್ರಮೋದ್ ಕೆರ್ವಾಶೆ, ರವಿರಾಜ ಶೆಟ್ಟಿ, ಪ್ರೇಮ್ ಅಂಚನ್, ಶುಕರಾಜ ಕೊಟ್ಟಾರಿ, ವಿನಯ ಕುಮಾರ್, ಚಂದ್ರಹಾಸ ಕೊಟ್ಟಾರಿ ಪಾಲ್ ಪಡೆದ್ ಲಸಿಕೆ ಅಭಿಯಾನಡ್ ಆರೋಗ್ಯ ಇಲಾಖೆ ಸಿಬ್ಬಂದಿಗ್ ಉಪಯುಕ್ತ ಮಾಹಿತಿ ಕೊರಿಯೆರ್.

ಫೇಸ್ ಬುಕ್ ಪೇಜ್ಡ್ ಪದ್ಯ ಪಂಡಿನ ಕುಡ್ಲ ಪೊಲೀಸೆರ್

ಕುಡ್ಲ , ಜೂನ್ 02; ಕೋವಿಡ್ ಆತಂಕದ ನಡುಟುಲಾ ಪೊಲೀಸೆರ್ ಕಾರ್ಯ ಕ್ಷಮತೆ ಮೆರೆತೆರ್ . ಮಾತೆರ್ಲ ಇಲ್ಲಡೆ ಕುಟುಂಬದ ಒಟ್ಟುಗು ಕಾಲಕಳೆನಗ ಪೊಲೀಸೆರ್ ಮಾತ್ರ ದೊಂಬು ಬರ್ಸ ಪಂದ್ ಎನ್ನಂದೆ ಬೇಲೆ ಮಲ್ತೊಂದು ಉಲ್ಲೆರ್ .

ಕೊರೊನಾ ಆತಂಕದ ನಡುಟುಲಾ ಪ್ರಾಣದ ಹಂಗ್ ಬುರ್ದು ಬೇಲೆ ಮಲ್ಪುನ ಕುಡ್ಲ ಪೊಲೀಸೆರ್ ಮಾತ್ರ ಅಂಗಾರೆ ಚೂರ್ ರಿಲ್ಯಾಕ್ಸ್ ಆತೆರ್ . ಖಾಕಿದುಲಯಿ ಉಪ್ಪುನ ಪ್ರತಿಭಾವಂತೆರೆಗ್ ಕುಡ್ಲ ನಗರ ಪೊಲೀಸ್ ಕಮೀಷನರ್ ಎನ್. ಶಶಿಕುಮಾರ್ ವಿಶೇಷ ವೇದಿಕೆ ಕೊರ್ತೆರ್ .

ಫೇಸ್‌ಬುಕ್‌ಡ್ ಪದ್ಯದ ಮುಖೇನ ಪುಗಾರ್ತೆ ಪಡೆಯಿನ ಅರವಿಂದ್ ವಿವೇಕ್ ಪೇಜ್‌ಡ್ ಕುಡ್ಲ ಕಮಿಷನೇಟರ್ ವ್ಯಾಪ್ತಿದ ಪೊಲೀಸೆರ್ ಮನ ಬುರ್ದು ಪದ್ಯ ಪಂಡೆರ್ .

ಕೋವಿಡ್ ಗೆಂದ್ದ್ ಬತ್ತಿನ ಬೊಲ್ತೆರ್ದ ಕೂಡು ಕುಟುಂಬ

ಕುಡ್ಲ , ಜೂನ್ 2: ಕೊರೊನಾ ಮಹಾಮಾರಿ ಮನುಷ್ಯ ಕುಲ ಈ ದುಂಬು ತೂವಂದಿನoಚಿನ ಪೋಡಿಗೆಗ್ ನೂಕುದುಂಡು. ಆಂಡ ಈ ಕಿಲ್ಲರ್ ಕೊರೊನಾನ್ ನಮಡ ಉಪ್ಪುನ ಆತ್ಮವಿಶ್ವಾಸ ಪನ್ಪಿ ಏಕಮಾತ್ರ ಅಸ್ತ್ರರ್ದ್ ದೂರ ಮಲ್ಪೊಲಿ ಪಂದ ದಕ್ಷಿಣ ಕನ್ನಡ ಜಿಲ್ಲೆದ ಬೊಲ್ತೆರ್ ದ ಕುಟುಂಬ ಒಂಜಿ ಸಾಬೀತ್ ಮಲ್ದುಂಡು . 13 ಜನ ಉಪ್ಪುನ ಕೂಡು ಕುಟುಂಬ ಒಂಜಿ ಆತ್ಮವಿಶ್ವಾಸರ್ದೇ ಕೊರೊನಾ ಗೆಂದ್ದೆರ್ .

ಬಂಗಾಡಿದ ಶಿವಪ್ಪ ಪೈ ಮೆರ್ನ 13 ಜನ ಉಪ್ಪುನ ಕುಟುಂಬ ಕೊರೊನಾಗ್ ಅಕ್ಷರಶಃ ತತ್ತರಿಸಾದ್ ಪೋದಿತ್ತುಂಡು . ಆಂಡ 13 ಜನತ ಒಗ್ಗಟ್ಟು ಬೊಕ್ಕ ಆತ್ಮವಿಶ್ವಾಸರ್ದ್ ಕೊರೊನಾರ್ದ್ ಪೈ ಕುಟುಂಬ ಮುಕ್ತ ಆತುಂಡು .

ಇತ್ತೇ 13 ಜನತ ವರದಿ ನೆಗೆಟಿವ್ ಬೈದುಂಡು , ಹೋಮ್ ಐಸೋಲೇಷನ್ ಕೂಡಾ ಮುಗಿದುಂಡು . ಕೊರೊನಾ ಬಗ್ಗೆ ಪೋಡಿಗೆ ಬೊರ್ಚಿ ಆಂಡ ಜಾಗ್ರತೆ ಉಪ್ಪಡ್ ಪಂದ್ ಜನಕ್ಲೆಗ್ ಪಂಡೆರ್.

ಫಲಾನುಭವಿಲೆಗ್ ದೋಣಿ, ಇಂಜಿನ್ ಬಲೆ ಕೊಡುಗೆ

ಓಡಿಪು , ಜೂ.2: ಮೀನುಗಾರಿಕೆ ಇಲಾಖೆರ್ದ್ 2020-21ನೇ ಸಾಲ್ ದ ಪರಿಶಿಷ್ಟ ಜಾತಿ/ಪಂಗಡ ಸಾಂಪ್ರದಾಯಿಕ ನಾಡದೋಣಿ ಮೀನುಗಾರೆರೆಗ್ ಎಫ್.ಆರ್.ಪಿ. ದೋಣಿ ಸರಬರಾಜು ವಿಶೇಷ ಘಟಕ ಬೊಕ್ಕ ಗಿರಿಜನ ಉಪ ಯೋಜನೆದಡಿಟ್ ಒಡಿಪು ಕ್ಷೇತ್ರದ ಆಜಿ ಜನ ಫಲಾನುಭವಿಲೆಗ್ ಮಂಜೂರಾಯಿನ ದೋಣಿ, ಬಲೆ, ಇಂಜಿನ್ ಲೆನ್ ಕೋಡೆ ಪಟ್ಟಿಯೆರ್.

ಒಡಿಪು ಶಾಸಕ ಕೆ.ರಘುಪತಿ ಭಟ್ ಉಂದೆನ್ ಮಾತಾ ಫಲಾನುಭವಿಲೆಗ್ ಪಟ್ಟಿಯೆರ್ . ಈ ಪೊರ್ತುಡು ಒಡಿಪು ನಗರಸಭೆ ನಾಮನಿರ್ದೇಶಿತ ಸದಸ್ಯ ವಿಜಯ್ ಕುಂದರ್, ಮೀನುಗಾರಿಕಾ ಪೆರಿಯ ಉಪನಿರ್ದೇಶಕ ಗಣೇಶ್, ಉಪನಿರ್ದೇಶಕ ಶಿವಕುಮಾರ್ ಜಿ.ಎಂ, ಸಹಾಯಕ ನಿರ್ದೇಶಕರ ದಿವಾಕರ ಖಾರ್ವಿ, ಇಲಾಖಾ ಸಿಬ್ಬಂದಿ ರವಿ ಎಚ್. ಪಾಲ್ ಪಡೆದಿತ್ತೆರ್ .

ಬೈಂದೂರು ಸಮುದಾಯ ಆರೋಗ್ಯ ಕೇಂದ್ರ ಗ್ ಮೆಡಿಕಲ್ ಕಿಟ್ ವಿತರಣೆ

ಬೈಂದೂರು, ಜೂ.2: ಸುಮುಖ ಸರ್ಜಿಕಲ್ಸ್ ವತಿರ್ದ್ ಕೊರ್ಪಿನ ಸುಮಾರ್ 1.50 ಲಕ್ಷ ಮೌಲ್ಯದ ಪಿಪಿಇ ಕಿಟ್, ಫೇಸ್‌ಶೀಲ್ಡ್, ಮಾಸ್ಕ್, ಸ್ಯಾನಿಟೈಸರ್, ಪಲ್ಸ್ ಆಕ್ಸೀಮೀಟರ್, ವಿಟಮಿನ್ ಮಾತ್ರೆ ಸೇರಿನಂಚ ವೈದ್ಯಕೀಯ ಪರಿಕರಲೆನ್ ಬೈಂದೂರು ಸಮುದಾಯ ಆರೋಗ್ಯ ಕೇಂದ್ರಗ್ ಕೊರಿಯೆರ್ .

ಈ ಪರಿಕರಲೆನ್ ಕೇಂದ್ರದ ವೈದ್ಯಾಧಿಕಾರಿ ಡಾ.ನಂದಿನಿ ಮೆರೆಗ್ ಬಿಜೆಪಿ ಜಿಲ್ಲಾಧ್ಯಕ್ಷ ಕುಯಿಲಾಡಿ ಸುರೇಶ್ ನಾಯಕ್ ಕೊರಿಯೆರ್ . ಈ ಪೊರ್ತುಡು ಬಿಜೆಪಿ ಮುಖಂಡ ಬೊಕ್ಕ ಸಂಸ್ಥೆದ ಬಿ.ಎಸ್.ಸುರೇಶ್ ಶೆಟ್ಟಿ ಬೊಕ್ಕ ಪಾಂಡುರಂಗ ಪಡಿಯಾರ್, ಬಿಜೆಪಿ ಬೈಂದೂರು ಮಂಡಲ ಗುರ್ಕಾರ್ಲಾಯಿನ ದೀಪಕ್ ಕುಮಾರ್ ಶೆಟ್ಟಿ, ಜಿಲ್ಲಾ ಪ್ರಧಾನ ಕಾರ್ಯದರ್ಶಿಲಾಯಿನ ಸದಾನಂದ ಉಪ್ಪಿನ ಕುದ್ರು, ಮನೋಹರ್ ಎಸ್. ಕಲ್ಮಾಡಿ, ಜಿಲ್ಲಾ ವಕ್ತಾರ ಗುರುಪ್ರಸಾದ್ ಶೆಟ್ಟಿ ಕಟಪಾಡಿ, ಜಿಲ್ಲಾ ಕಾರ್ಯಾಲಯ ಕಾರ್ಯದರ್ಶಿ ಸತ್ಯಾನಂದ ನಾಯಕ್ ಅತ್ರಾಡಿ, ಪಕ್ಷದ ಪ್ರಮುಖೆರಾಯಿನ ಬಿ.ಎಸ್.ಸುರೇಶ್ ಶೆಟ್ಟಿ, ಪಾಂಡುರಂಗ ಪಡಿಯಾರ್, ಜಿಪಂ ಸದಸ್ಯ ಸುರೇಶ್ ಬಟಾವಾಡಿ, ಜಗನ್ನಾಥ್, ನಾಗರಾಜ್ ಖಾರ್ವಿ ಪಾಲ್ ಪಡೆದಿತ್ತೆರ್.

ಕೋವಿಡ್ ನೆಲೆಟ್ಟ್ ಅಜ್ಜಾವರದ ಚೈತನ್ಯ ಸೇವಾಶ್ರಮಡ್ ನಡತೊಂದು ಉಪ್ಪುನ ಅಗ್ನಿ ಹೋತ್ರ ಹೋಮ

ಅರಂತೋಡು ಜೂನ್ 2: ಸುಳ್ಯ ಅಜ್ಜಾವರದ ಚಯಿತನ್ಯ ಸೇವಾಶ್ರಮಡ್ ಲೋಕಡ್ ವ್ಯಾಪಾಕವಾದ್ ತೋಜೋoದು ಉಪ್ಪುನ ಕೊವಿಡ್ ಪ್ರಕರಣಗ್ ಸಂಬಂಧಿ ಅಗ್ನಿ ಹೋತ್ರ ಹೋಮ ನಡತೊಂದು ಉಂಡು .

ಪ್ರತಿ ದಿನ ಕಾಂಡೆ ಬೊಕ್ಕ ಬೈಯ್ಯಗ್ ಆಶ್ರಮದ ಟ್ರಸ್ಟಿ ಬೊಕ್ಕ ಶಿಕ್ಷಕಿಯಾಯಿನ ಪ್ರಣವ ಮೆರ್ ಅಗ್ನಿ ಹೋತ್ರ ಹೋಮ ನಡಪಾವೊಂದು ಬರೊಂದ್ ಉಲ್ಲೆರ್.ಮುಖ್ಯವಾದ್ ಗೋ ತ ನುಂಗಿನ ಅಂಬಿ ತುಪ್ಪ ಬೊಕ್ಕ ಬೇತೆ ವಸ್ತುಲೆನ್ ಉಪಯೋಗ ಮಲ್ತ್ದ್ ಅಗ್ನಿ ಹೋತ್ರ ಹೋಮ ಮಲ್ತೊಂದು ಉಲ್ಲೆರ್ .