ಜ.28: ಒಡಿಪು ಎಂ.ಜಿ.ಎಂ ಕಾಲೇಜ್ ದ ಮುದ್ದಣ ಮಂಟಪಡ್ ಕೆಮ್ತೂರು ತುಳು ನಾಟಕ, ಪ್ರಶಸ್ತಿ ಪ್ರದಾನ ಲೇಸ್

ಒಡಿಪು ತುಳುಕೂಟ (ರಿ.) ದ 22ನೇ ವರ್ಸೊದ ಕೆಮ್ತೂರು ತುಳು ನಾಟಕ, ಪ್ರಶಸ್ತಿ ಪ್ರದಾನ ಲೇಸ್ ಜ.28 ಐತಾರ ಬಯ್ಯಗ್ ಒಡಿಪು ಎಂ.ಜಿ.ಎಂ ಕಾಲೇಜ್ ದ ಮುದ್ದಣ ಮಂಟಪಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಒಡಿಪು ತುಳುಕೂಟದ ಗುರ್ಕಾರೆ ಬಿ. ಜಯಕರ ಶೆಟ್ಟಿ ಇಂದ್ರಾಳಿ ಒಯಿಸೊನ್ವೆರ್. ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಒಡಿಪು ಮಾಜಿ ಶಾಸಕೆರ್ ಕೆ. ರಘಪತಿ ಭಟ್, ಉದ್ಯಮಿ ಪ್ರಸಾದ್ ರಾಜ್ ಕಾಂಚನ್, ಮುನಿಯಾಲು ಉದಯ ಕೃಷ್ಣ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಉದಯಕುಮಾರ್ ಶೆಟ್ಟಿ, ಎಂ.ಜಿ.ಎಂ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರೊ. ಲಕ್ಷ್ಮೀನಾರಾಯಣ ಕಾರಂತ ಪ್ರಶಸ್ತಿ ಪ್ರದಾನ ಮಲ್ಪೆರೆ ಉಲ್ಲೆರ್. ಬೊಕ್ಕ ಪೆರಿಯ ರಂಗ ಕಲಾವಿದೆರ್ ದಯಾನಂದ ಶೆಟ್ಟಿ ಹೇರೂರು ಮೆರೆಗ್ ಮಾನಾದಿಗೆ ನಡಪರೆ ಉಂಡು.

ಅಂಚೆನೆ ಸಭಾ ಲೇಸ್ ದ ಬೊಕ್ಕ ಕೆಮ್ತೂರು ತುಳು ನಾಟಕ ಪಂತೊದ ಪ್ರಶಸ್ತಿ ಗೆಂದಿನ ಮಣಿಪಾಲ ಸಂಗಮ‌ ಕಲಾವಿದೆರೆರ್ದ್ ಮರಣ ಗೆಂದಿನಾಯೆ ನಾಟಕದ ಪ್ರದರ್ಶನ ನಡಪರೆ ಉಂಡು ಪಂದ್ ಒಡಿಪು ತುಳುಕೂಟದ ಸ್ಥಾಪಕ ಗುರ್ಕಾರೆ ಡಾ| ಭಾಸ್ಕರಾನಂದ ಕುಮಾರ್, ಗುರ್ಕಾರೆ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.