ಶೈಕ್ಷಣಿಕ ಕ್ಷೇತ್ರಡ್ ಸಹಯೋಗ ಬೊಕ್ಕ ಗುಣಮಟ್ಟನ್ ತೂಪಾವುನ ನಿಲೆಟ್ಟ್ ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಆಫ್ ಕ್ಯಾಂಪಸ್ ಸೆಂಟರ್ ದ ಡಾ. ನಿಟ್ಟೆ ಶಂಕರ ಅಡ್ಯಂತಾಯ ಸ್ಮಾರಕ ಪ್ರಥಮ ದರ್ಜೆ ಕಾಲೇಜ್ ಭಾರತೀಯ ಚಾರ್ಟೆಡ್ ಅಕೌಂಟೆಂಟ್ಸ್ ಆಫ್ ಇಂಡಿಯಾದ (ಐಸಿಎಐ) ಶೈಕ್ಷಣಿಕ ವಿಭಾಗದೊಟ್ಟಿಗೆ ಶೈಕ್ಷಣಿಕ ಬೊಕ್ಕ ಸಂಶೋಧನಾ ಸಹಯೋಗಗಾದ್ ಜ.11 ಕ್ಕ್ ಕುಡ್ಲಡ್ ನಡತಿನ ಲೇಸ್ ಡ್ ಪರಸ್ಪರ ತಿಳುವಳಿಕೆ ಪತ್ರಗ್ ಸೈ ಪಾಡಿಯೆರ್.
ಡಾ. ನಿಟ್ಟೆ ಶಂಕರ ಅಡ್ಯಂತಾಯ ಸ್ಮಾರಕ ಪ್ರಥಮ ದರ್ಜೆ ಕಾಲೇಜ್ 1988 ರ್ದ್ ಕಾರ್ಲದ ನಿಟ್ಟೆ ಗ್ರಾಮಡ್ ಪದವಿ ಶಿಕ್ಷಣನ್ ಕೊರೊಂದು ಉಂಡು. ಇತ್ತೆ 2022 ನೇ ಸಾಲ್ ರ್ದ್ ಗ್ರಾಮೀಣ ಪ್ರದೇಶಡ್ ಜಾಗತಿಕ ಗುಣಮಟ್ಟದ ಶಿಕ್ಷಣನ್ ಕೊರ್ಪುನ ಧ್ಯೇಯದೊಟ್ಟಿಗೆ ಸಂಸ್ಥೆ ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಆಫ್ ಕ್ಯಾಂಪಸ್ ಸೆಂಟರ್ ದ ಭಾಗವಾದ್ ಶೈಕ್ಷಣಿಕ ಚಟುವಟಿಕೆನ್ ದುಂಬಾರಿಸಾದ್ಂಡ್. ಈ ದಿಟ್ಟಿಡ್ ಶೈಕ್ಷಣಿಕ ಚಟುವಟಿಕೆಗ್ ಪೂರಕವಾದ್ ದೇಶದ ಸುಮಾರ್ ಸಂಸ್ಥೆದೊಟ್ಟಿಗೆ ಸಹಯೋಗಗ್ ಒಪ್ಪಂದ ಮಲ್ದ್ಂಡ್. ಐಸಿಎಐದೊಟ್ಟಿಗೆದ ಈ ಒಪ್ಪಂದ ಸಂಸ್ಥೆ ಶೈಕ್ಷಣಿಕ ಬದ್ದತೆನ್ ನನಾತ್ ಸರಿ ಮಲ್ಪೆರೆ ಉಂಡು. ಐಸಿಎಐದೊಟ್ಟಿಗೆ ಈ ಒಪ್ಪಂದ ವಾಣಿಜ್ಯ ಶಾಸ್ತ್ರ ಬೊಕ್ಕ ನಿರ್ವಹಣಾ ಶಾಸ್ತ್ರದಡಿಟ್ಟ್ ಕೊರ್ಪುನ ಇಸಯಲೆಗ್ ಶೈಕ್ಷಣಿಕ ಸಹಕಾರನ್ ಕೊರ್ಪುನ ಧ್ಯೇಯ ಉಂಡು. ಈ ಮುಕೇನ ಶಿಕ್ಷಣ ಸಂಸ್ಥೆ ಎಚ್ಚ ಪರಿಣಾಮಕಾರಿಯಾದ್ ಶೈಕ್ಷಣಿಕ ಬೊಕ್ಕ ಸಂಶೋದನೆಡ್ ಇಪ್ಪೆರೆ ಬೋಡಾಯಿನ ಜ್ಞಾನ ಬೊಕ್ಕ ಕೌಶಲ್ಯನ್ ಪರಸ್ಪರ ವಿನಿಮಯ ಮಲ್ಪುನಲ್ಪ ಈ ಸಹಯೋಗ ಸಕಾಯ ಕೊರೊಂದು ಉಂಡು. ಅತ್ತಂದೆ ಈ ಮುಕೇನ ನನದ ಪೀಳಿಗೆದ ಪದವೀಧರೆರೆನ್ ಔದ್ಯೋಗಿಕ ಕ್ಷೇತ್ರಡ್ ನಿಪುಣ ಮಲ್ಪುನ ಉದ್ದೇಶ ಈ ಜ್ಞಾಪನಾ ಪತ್ರಡ್ ಉಂಡು.
ತಿಳುವಳಿಕೆ ಪತ್ರಗ್ ಸೈನ್ ಪಾಡುನ ಪೊರ್ತುಡು ಐಸಿಎಐ ದ ಶೈಕ್ಷಣಿಕ ಮಂಡಳಿ ಒತ್ತು ಗುರ್ಕಾರೆ ದಯಾನಿವಾಸ್ ಶರ್ಮ ಪಾತೆರ್ದ್, ಈ ನಮ್ಮ ಸಂಸ್ಥೆದ ನಡುತ್ತ ಒಪ್ಪಂದ ಶೈಕ್ಷಣಿಕ ವಲಯದ ಪಠ್ಯಕ್ರಮ ಉದ್ಯಮದ ಗುಣಮಟ್ಟ ಬೊಕ್ಕ ಬೇಡಿಕೆನ್ ಪೂರೈಸಾಯೆರೆ ಸಕಾಯ ಮಲ್ಪುಂಡು ಪಂದ್ ಪಂಡೆರ್.
ಲೇಸ್ ಡ್ ಪಾಲ್ ಪಡೆದಿತ್ತಿನ ಸಿ.ಎ. ಕೆಂದ್ರೀಯ ಪರಿಷತ್ ಸದಸ್ಯೆರ್ ಎಸ್. ಶ್ರೀನಿವಾಸ್ ಕೋಥಾ ಪಾತೆರ್ದ್, ಈ ರೀತಿದ ಸಹಯೋಗಲು ಶಿಕ್ಷಣರಂಗಡ್ ಸಕಾರಾತ್ಮಕ ಬದಲಾವಣೆನ್ ಕನಯೆರೆ ಅಗತ್ಯ ಇಪ್ಪುನ ಪ್ರಾಯೋಗಿಕ ಕೌಶಲ್ಯ ಬೊಕ್ಕ ನೈತಿಕ ಮೌಲ್ಯ ಇಪ್ಪುನ ನವ ಪದವಿದರೆರೆನ್ ರೂಪಿಸಾಯೆರೆ ಸಹಕಾರಿ ಆತ್ಂಡ್ ಪಂದ್ ಪಂಡೆರ್.
ಐಸಿಎಐ ಶೈಕ್ಷಣಿಕ ಮಂಡಳಿ ಗುರ್ಕಾರೆ ವಿಶಾಲ್ ಪಿ. ದೋಷಿ ತಿಳುವಳಿಕಾ ಪತ್ರಗ್ ಸೈನ್ ಪಾಡುನ ಸಂಸ್ಥೆಗ್ ಅಭಿನಂದನೆ ತೆರಿಪಾಯೆರ್.
ಪರಸ್ಪರ ಸಹಯೋಗದ ತಿಳುವಳಿಕೆ ಪತ್ರಗ್ ಸೈನ್ ಪಾಡುನ ಪೊರ್ತುಡು ಲೇಸ್ ಡ್ ಐಸಿಎಐ ದ ಕುಡ್ಲ ಶಾಖೆದ ಗುರ್ಕಾರೆ ಸಿಎ ಗೌತಮ್ ನಾಯಕ್ ಎಂ, ನಿಟ್ಟೆ ಪರಿಗಣಿತ ವಿಶ್ವಿದ್ಯಾಲಯದ ಉಪಕುಲಪತಿ ಡಾ. ಎಂ.ಎಸ್. ಮುಡಿತ್ತಾಯ, ಡಾ.ಎನ್.ಎಸ್.ಎ.ಎಂ. ಪ್ರಥಮ ದರ್ಜೆ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ.ವೀಣಾಕುಮಾರಿ. ಬಿ.ಕೆ. ಪಾಲ್ ಪಡೆದಿತ್ತೆರ್.
pallavi shetty