ತುಳುನಾಡ್ ದ ರೈತಾಪಿ ಬಂಧುಲೆನ ವೀರ ಕ್ರೀಡೆಯಾಯಿನ ಕಂಬುಲಗ್ ಸುಮಾರ್ ಸಾವಿರರ್ದ್ ಜಾಸ್ತಿ ವರ್ಷದ ಇತಿಹಾಸ ಉಂಡು. ತುಳುನಾಡ್ ಡ್ ನಡಪುನ ಬಲಿಪುನ ಎರುಕುಲೆನ ಪಂತನೇ ಕಂಬುಲ. ತುಳುನಾಡ್ ಡ್ ಯಕ್ಷಗಾನ ಜಾನಪದ ಕಲೆ ಆಂಡ, ಕಂಬುಲ ಜಾನಪದ ಕ್ರೀಡೆ.
ಯಕ್ಷಗಾನ ಬೊಕ್ಕ ಕಂಬುಲ ತುಳುನಾಡ್ ದ ಪುದರ್ ಡ್ ಅಂಟ್ ದ್ ಪೊತುಂಡು. ಕುಂದಾಪುರರ್ದ್ ಕಾಸ್ರೋಡು ಮುಟ್ಟ ಪಸರ್ನ ತುಳುನಾಡ್ ದ ಕಂಬುಲ ಬಾರಿ ಜನಪ್ರಿಯತೆನ್ ಗಳಿಸಾದ್ಂಡ್. ಕಂಬುಲದ ಕ್ರೀಡೆಡ್ ಉಂದುವೆ ಸುರುತ ಸರ್ತಿ ರಾಜಧಾನಿ ಬೆಂಗಳೂರುಡು ಕಂಬುಲನ್ ಆಯೋಜನೆ ಮಲ್ತ್ ದೆರ್. ರಾಜ್ಯ ಸರಕಾರದ ಸರಕಾರದೊಟ್ಟಿಗೆ ಬೆಂಗಳೂರು ಕಂಬುಲ ಸಮಿತಿದ ಗೌರವಾಧ್ಯಕ್ಷೆರ್ ಬೊಕ್ಕ ರಾಜ್ಯದ ಉಪಮುಖ್ಯಮಂತ್ರಿಲಾಯಿನ ಡಿ.ಕೆ ಶಿವಕುಮಾರ್ ಅರೆನ ಪ್ರೋತ್ಸಾಹದೊಟ್ಟಿಗೆ ಈ ಸರ್ತಿ ಅರಮನೆ ಮೈದಾನಡ್ ಸುಮಾರ್ 55 ಎಕ್ರೆ ಜಾಗೆಡ್ ನಮ್ಮ ಪರಂಪರೆನ್ ದ.ಕ, ಒಡಿಪು, ಬೊಕ್ಕ ಕಾಸ್ರೋಡು ಜಿಲ್ಲಾ ಕಂಬುಲ ಸಮಿತಿ, ತುಳುಕೂಟ ಬೆಂಗಳೂರು, ದಕ್ಷಿಣ ಕನ್ನಡ, ಒಡಿಪು, ಬೊಕ್ಕ ಕಾಸ್ರೋಡು ಜಿಲ್ಲಾ ಸರ್ವ ಸಂಘ ಸಂಸ್ಥೆದ ಒಟ್ಟು ಸೇರಿಗೆಡ್ ಬೆಂಗಳೂರು ಕಂಬುಲ ಸಮಿತಿ ವತಿರ್ದ್ ಬೆಂಗಳೂರು ಕಂಬುಲ ನಮ್ಮ ಕಂಬುಲ ಪನ್ಪುನ ಪುದರ್ಡ್ ನ.25 ಬೊಕ್ಕ 26 ದಾನಿ ಆಯೋಜನೆ ಮಲ್ತ್ ದೆರ್.
ಕರ್ನಾಟಕ ಪರಂಪರೆದ ಪೊಸ ಆಯಾಮಲೆನ್ ತೊಜಿಪಾವುನ ದೃಷ್ಟಿಡ್ ಈ ನಮ್ಮ ಕಂಬುಲ ಕಾರ್ಯಕ್ರಮದ ಯಶಸ್ವಿಗಾದ್ ಕೆರೆ ನಿರ್ಮಾಣದೊಟ್ಟಿಗೆ ಪಂತೊಡ್ ಪಾಲ್ ಪಡೆಯುನ ಎರುಕುಲೆನ ಫಲಿತಾಂಶಗಾದ್ ಲೇಸರ್ ತೀರ್ಪುಗಾರೆರೆನ್ ಅಳವಡಿಸಾದ್, ಕಂಬುಲಗ್ ಬರ್ಪಿನ ಜನಕ್ಲೆಗ್ ಗ್ಯಾಲರಿ, ಪಾರ್ಕಿಂಗ್ ವ್ಯವಸ್ಥೆ, ಮನೋರಂಜನೆಗಾದ್ ಜನಪದ ನೃತ್ಯ, ಸಂಗೀತ ಕಾರ್ಯಕ್ರಮ, ತುಳುನಾಡ್ ದ ವಿಶೇಷ ತಿನಸ್, ಇಂಚಿನ ಮಾತ ವ್ಯವಸ್ಥೆನ್ ಆಯೋಜನೆ ಮಲ್ತ್ ದೆರ್. ಈ ಐತಿಹಾಸಿಕ ಯೋಜನೆಗ್ ಸರಿಸುಮಾರ್ 6 ರ್ದ್ 8 ಕೋಟಿ ಖರ್ಚ್ ಉಂಡು ಪಂದ್ ಅಂದಾಜ್ ಮಲ್ತ್ ದ ಪಂದ್ ಬೆಂಗಳೂರು ಕಂಬುಲ ಸಮಿತಿದ ಸದಸ್ಯೆರ್ ತೆರಿಪಾದೆರ್.
pallavi shetty