ಸಿಸಿಬಿ ಕಾರ್ಯಾಚರಣೆ: ಅಮಲ್ ಸೊತ್ತುನ್ ಮಾರಾಟ ಮಲ್ತಿನ ಆರೋಪಿ ಅರೆಸ್ಟ್

ಅಮಲ್ ಸೊತ್ತುನ್ ಮಾರಾಟ ಮಲ್ತೊಂದು ಇತ್ತಿನಾಯನ್ ಕುಡ್ಲ ಸಿಸಿಬಿ ಪೊಲೀಸೆರ್ ಕಾರ್ಯಾಚರಣೆ ನಡಪಾದ್ ಅರೆಸ್ಟ್ ಮಲ್ದೆರ್.

ಈ ಆರೋಪಿ, ಬೆಂಗ್ಲೂರ್ ರ್ದ್ ಕುಡ್ಲಗ್, ಅಮಲ್ ಸೊತ್ತು ಎಂಡಿಎಂಎನ್ ದೆತೊಂದು ಕುಡ್ಲ ಪೇಂಟೆದ ಪಡೀಲ್ ಕೆಂಬಾರ್ ಪರಿಸರಡ್ ಸಾರ್ವಜನಿಕೆರೆಗ್ ಮಾರಾಟ ಮಲ್ತೊಂದು ಇತ್ತೆ. ಈ ಇಸಯ ತೆರಿದ್ ಕುಡ್ಲ ಸಿಸಿಬಿ ಘಟಕದ ಎಸಿಪಿ ಆಯಿನ ಪಿ ಎ ಹೆಗಡೆ ಮೆರೆನ ಮುತಾಲಿಕೆದ ಸಿಸಿಬಿ ಪೊಲೀಸೆರ್ ಕುಡ್ಲ ವಿ.ಹೆಚ್.ಜೆ ಕಾಂಪೌಂಡ್ ದ  ಹರ್ಷಿತ್ ಶೆಟ್ಟಿ (29) ನ್ ಅರೆಸ್ಟ್ ಮಲ್ದೆರ್.

ಈ ಆರೋಪಿಡ ಇತ್ತಿನ ಒಟ್ಟು 25 ಗ್ರಾಂ ತೂಕದ ರೂ. 1,25,000/- ಬಿಲೆತ್ತ ಎಂಡಿಎಂಎ ಅಮಲ್ ಸೊತ್ತು, 1 ಮೊಬೈಲ್ ಫೋನ್, ಬೊಕ್ಕ ಡಿಜಿಟಲ್ ತೂಕ ಮಾಪನನ್ ವಶಕ್ಕ್ ಪಡೆತೆರ್. ಈ ಬಗ್ಗೆ ಕಂಕನಾಡಿ ನಗರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಈ ಕೇಸ್ ದ ಕಾರ್ಯಾಚರಣೆಡ್ ಸಿಸಿಬಿ ಘಟಕದ ಎಸಿಪಿ ಪಿ ಎ ಹೆಗಡೆ, ಪೊಲೀಸ್ ನಿರೀಕ್ಷಕೆರ್ ಶ್ಯಾಮ್ ಸುಂದರ್ ಹೆಚ್ ಎಂ, ಪಿಎಸ್ಐ ನರೇಂದ್ರ ಬೊಕ್ಕ  ಸಿಸಿಬಿ ಸಿಬ್ಬಂದಿಲು ಇತ್ತೆರ್.