July 25, 2023

ತೋಡುಗು ಬೂರ್ದು ಬಚಾವಾಯಿನ ಅಜ್ಜಿ

ಕಿಲೆಂಜಾರು ಗ್ರಾಮದ ಕಮಲಾ ಪೂವಪ್ಪ ಪೂಜಾರಿ ಮೇರ್ ಇನಿ ಕೈತಲ್ದ ತೋಡುಡು ಬತ್ತಿನ ಬೊಲ್ಲಡ್ ಪೋದು ಬಚಾವಾತಿನ ಸಂಗತಿ ನಡದ್ಂಡ್.

ತೋಡುದ ನೀರ್ ದ ರಭಸಗ್ ಆರ್ ಬೂರ್ದು ಇತ್ತ್ಂಡಲ ದೇವೆರೆನ ದಯಟ್ ಬೊಲ್ಲಡ್ ಮಸ್ತ್ ದೂರ ಪೋದು ಬಚಾವ್ ಆತೆರ್.

ಅರೆನ ಕೈ ಬೊಕ್ಕ ಕಾರ್ ಗ್ ಪೆಟ್ಟಾತ್ಂಡ್. ಆರ್ ಬಚಾವ್ ಆಯಿನ ದೇವೆರೆನ ದಯೆ ಪಂದ್ ಊರುದಕುಲು ಪನೊಂದುಲ್ಲೆರ್.

ಸೂಪರ್ ಸ್ಟಾರ್ ಸೂರ್ಯನ ಪುಟ್ಟುಪರ್ಬಗ್ ಫ್ಲೆಕ್ಸ್ ಕಟ್ಟ್ ನಗ ಕರೆಂಟ್ ಶಾಕ್; ತೀರ್ ಪೋಯೆರ್ 2 ಕಲ್ಪಾರ್ಥಿಲು

ಸೌತ್ ಸಿನಿಮಾ ಇಂಡಸ್ಟ್ರಿದ ಸೂಪರ್ ಸ್ಟಾರ್ ಸೂರ್ಯ ಮೆರೆನ 48ನೇ ಪುಟ್ಟುಪರ್ಬದ ಬ್ಯಾನರ್ ನ್ ಕಟ್ಟ್ ನಗ ಕರೆಂಟ್ ಶಾಕ್ ಹಾಕ್ ದ್ 2 ಜನ ಕಲ್ಪಾರ್ಥಿ ಅಭಿಮಾನಿಲು ತೀರ್ ಪೋಯಿನ ಘಟನೆ ಆಂಧ್ರಪ್ರದೇಶಡ್ ನಡತ್ಂಡ್.

ನಕ್ಕಾ ವೆಂಕಟೇಶ್ ಬೊಕ್ಕ ಪೋಲೂರಿ ಸಾಯಿ ಪನ್ಪುನ 2 ಅಭಿಮಾನಿಲು ತೀರ್ ಪೋಯಿನಕುಲು. ಈ ಘಟನೆದ ಬಗೆಟ್ಟ್ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದುಲ್ಲೆರ್.

ಬೆಂಜನಪದವು ಕೊರಗಜ್ಜನ ಸನ್ನಿಧಿಡ್ ಕರಿಗಂಧ ತುಳು ಭಕ್ತಿಗೀತೆ ಬುಡುಗಡೆ

ಬೆಂಜನಪದವುದ ವಿಜಯ್ ಮೆರೆನ ಮುತಾಲಿಕೆಡ್ ಕೊರಗಜ್ಜನ ಕರಿಗಂಧ ಪನ್ಪಿನ ತುಳು ಭಕ್ತಿ ಸುಗಿಪುನ್ ಕೊರಗಜ್ಜನ ಸಾನಿಧ್ಯಡ್ ಪ್ರಾರ್ತನೆ ಸಂದೈತ ಮಲ್ಪುನೆತ್ತೊಟ್ಟಿಗೆ R.M creation ಯೂಟ್ಯೂಬ್ ಚಾನಲ್‌ಡ್ ಜುಲೈ 23 ತಾರೀಕ್ ಬಯ್ಯ 6 ಗಂಟೆಗ್ ಬುಡುಗಡೆ ಮಲ್ತೆರ್.

ದುಬೈಡ್ ಇತ್ತಿನ ತುಳುನಾಡ್ ದ ಜವನೆರೆನ ಮಲ್ಲ ಬೆನ್ನಿ ಈ ಭಕ್ತಿಸುಗಿಪುದ ಪಿರವುಡ್ ಉಂಡು. ಆತೆ ಅತ್ತಂದೆ ಆರ್.ಎಮ್ ಕ್ರಿಯೇಷನ್ ಅರ್ಪಣೆ ಮಲ್ಪುನ ಸುಧಾಕರ್ ಸಸಿಹಿತ್ಲು ಮೆರೆನ ರಾಗ ಸಂಯೋಜನೆ ಬೊಕ್ಕ ಸಾಹಿತ್ಯ ಅಂಚನೆ ರಂಜಿತ್ ಮೊಗರು ಮೆರೆನ ಸ್ವರಟ್, ತುಳುನಾಡ ಕೊರಗಜ್ಜ ದೈವೊದ ಭಕ್ತಿ ಸುಗಿಪುದ ಪದ ಬುಡುಗಡೆ ಆತ್ಂಡ್. ಈ ಭಕ್ತಿ‌ಸುಗಿಪುದ ಸಂಗೀತನ್ ಗುರು ಬಾಯರ್ ಕೊರ್ತೆರ್. ಲತೇಶ್ ಸುರತ್ಕಲ್, ಮಹೇಶ್ ಕನ್ಯಾನ, ವಿನಿತ್ ರಾಜ್ ಕೋಟ್ಯಾನ್, ಯತೀಶ್ ಕುನ್ಹಿತ್ತಿಲ್ ನೆತ್ತ ನಿರ್ಮಾಪಕೆರಾತೆರ್. ಡಿಒಪಿ ಹಿತೇಶ್ ಸುರತ್ಕಲ್ ಮಲ್ತಿನ ಈ ಭಕ್ತಿಸುಗಿಪು ಗಜಾಲ್ ಬೀಟ್ಸ್ ದುಬೈ ಮಲ್ದ್ಂಡ್. ಪ್ರಚಾರ ಸತೋಷ್ ಪುಚೆರ್ ಮಲ್ದೆರ್.

ಈ ಭಕ್ತಿಸುಗಿಪು ಕೆನಿಯೆರೆ ಈ ಲಿಂಕ್ ನ್ ಕ್ಲಿಕ್ ಮಲ್ಪುಲೆ:

https://www.youtube.com/watch?v=7JwjWr8pCJU

ಜು. 29: ಮಂತ್ರದೇವತೆ, ಕೊರಗಜ್ಜ ಕ್ಷೇತ್ರಡ್ ಆಟಿದ ಅಗೇಲ್ ಸೇವೆ, ನೇಮೊಚ್ಚಯ

ಒಡಿಪು ಶ್ರೀ ಮೂಕಾಂಬಿಕಾ ದುರ್ಗಾ ಪರಮೇಶ್ವರಿ, ಮಾಸ್ತಿಯಮ್ಮ ಶ್ರೀ ಪಂಜುರ್ಲಿ, ವರ್ತೇಶ್ವರಿ, ಮಂತ್ರದೇವತೆ ಚಾಮುಂಡಿ ರಾಹು ಗುಳಿಗ, ಕೊರಗಜ್ಜ ಕ್ಷೇತ್ರಡ್ ಜುಲೈ 29 ಕ್ಕ್ ಸನಿಯಾರ ಆಶಾಡ ಮಾಸದ ಅಗೇಲ್ ಸೇವೆ ಬೊಕ್ಕ ಶ್ರೀ ಕ್ಷೇತ್ರದ ಕಾರ್ಣಿಕ ದೈವ ಮಂತ್ರದೇವತೆ ಬೊಕ್ಕ ಕೊರಗಜ್ಜ ದೈವೊದ ನೇಮೊಚ್ಚಯ ‌ನಡಪರೆ ಉಂಡು.

ಈ ಲೇಸ್ ಡ್ ಎಚ್ಚದ ಸಂಖ್ಯೆಡ್ ಭಕ್ತಾದಿಲು ಪಾಲ್ ಪಡೆದ್, ದೈವ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಮಂಡಳಿ ಬೊಕ್ಕ ಅರ್ಚಕೆರೆನ ವರ್ಗ ಲೆಪ್ಪೋಲೆಡ್ ತೆರಿಪಾದೆರ್.

ಇಲ್ಲದ ಗೋಡೆ ಬೂರ್ದು ತೀರ್ ಪೋಂಡು ಪೊಣ್ಣು ಬಾಲೆ

ಕರಿನ ಮೂಜಿ ದಿನರ್ದ್ ಬುಡಂದೆ ಬರ್ಸ ಬತ್ತಿನ ಕಾರಣ ಇಲ್ಲದ ಗೋಡೆ ಬೂರ್ದು ಒಂಜಿ ವರ್ಷದ ಪೊಣ್ಣು ಬಾಲೆ ತೀರ್‌ಪೋಯಿನ ಘಟನೆ ದಾವಣಗೆರೆ ಜಿಲ್ಲೆದ ಹರಿಹರ ತಾಲೂಕುದ ಕುಂಬಳೂರು ಗ್ರಾಮಡ್ ನಡತ್ಂಡ್.

ಕೆಂಚಪ್ಪ ಬೊಕ್ಕ ಲಕ್ಷ್ಮಿದೇವಿ ಮೊಕ್ಲೆನ ಬಾಲೆ ಸ್ಪೂರ್ತಿ ತೀರ್ ‌ಪೋಯಿನಿ ಪಂದ್ ಗುರುತಿಸಾದೆರ್.

ಈ ಘಟನೆರ್ದ್ ಸ್ಪೂರ್ತಿ ಅರೆನ ಅಪ್ಪ ಕೆಂಚಪ್ಪ ಮೆರೆಗ್ ಗಾಯ ಆದ್ ಅರೆನ್ ಜಿಲ್ಲಾಸ್ಪತ್ರೆಗ್ ದಾಖಲೆ ಮಲ್ತ್ ದೆರ್.

ಜು.24 ದಾನಿ ರಾತ್ರೆ ಡ್ ಜೆತ್ತ್ ಇತ್ತಿನ ಪೊರ್ತುಡು ಇಲ್ಲದ ಗೋಡೆ ಬೂರ್ದ್ಂಡ್. ಜಾಗೆಗ್ ತಹಶೀಲ್ದಾರ್ ಪೃಥ್ವಿ ಸಾನಿಕಂ ಬೊಕ್ಕ ಪೋಲಿಸೆರ್ ಬತ್ತ್ ದ್ ಪರಿಶೀಲನೆ ಮಲ್ತ್ ದೆರ್.

ಕೃಷಿ ಸಾಧಕೆರ್ ಪೂವಪ್ಪ ಪೂಜಾರಿ ಪಾದೆಬೆಟ್ಟು ಮೆರೆಗ್ ಮಾನಾದಿಗೆ

ಮುಲ್ಕಿ : ಹೊಸ ಅಂಗಣ ಪತ್ರಿಕೆದ ನಿರೆಲ್ ಡ್ ಕೃಷಿ ಸಾಧಕೆರ್ ಪೂವಪ್ಪ ಪೂಜಾರಿ ಪಾದೆಬೆಟ್ಟು ಮೆರೆಗ್ ಅಂಗಾರೆ ಪುನರೂರು ಟೂರಿಸ್ಟ್ ಹೋಮ್ ಚಾವಡಿಡ್ ಅಂಗಾರೆ ನಡತಿನ ತಿಳಗಳ ಬೆಳಕು ಲೇಸ್ ಡ್ ಮಾನಾದಿಗೆ ನಡತ್ಂಡ್.

ಧರ್ಮದರ್ಶಿ ಹರಿಕೃಷ್ಣ ಪುನರೂರು ಅಧ್ಯಕ್ಷತೆ ಒಯಿಸ್ ದೆರ್.

ಈ ಪೊರ್ತುಡು ಕಾಪು ವಲಯ ಪತ್ರಕರ್ತೆರ್ನ ಸಂಘದ ಅಧ್ಯಕ್ಷೆರ್ ಎಚ್ಕೆ ಹೆಜ್ಮಾಡಿ ಮೆರೆ ಗ್ ಲ ಮಾನಾದಿಗೆ ಮಲ್ತೆರ್.

ಮಲ್ಲ ಬಿನ್ನೆರಾದ್ ಕೆನರಾ ಬ್ಯಾಂಕ್ ಮುಲ್ಕಿ ಶಾಖೆದ ಅಧ್ಯಕ್ಷೆರ್ ಅತುಲ್ ಪಂಡಿತ್ , ಕೃಷಿ ಸಾಧಕೆರ್, ಗ್ರಾಪಂ ಮಾಜಿ ಅಧ್ಯಕ್ಷೆರ್ ಪ್ರಾಣೇಶ್ ಹೆಜ್ಮಾಡಿ, ಮುಲ್ಕಿ ನಗರಪಂಚಾಯತ್ ಸದಸ್ಯೆರ್ ಹರ್ಷರಾಜ್ ಜಿ.ಎಂ.,ಉದ್ಯಮಿ ಜಾನ್ ಕ್ವಾಡ್ರಸ್ ಇತ್ತೆರ್.

ಲೇಸ್ ಡ್ ಹೊಸ ಅಂಗಣ ಸಂಪಾದಕೆರ್ ಹರಿಶ್ಚಂದ್ರ ಪಿ. ಸಾಲ್ಯಾನ್, ಉಪ ಸಂಪಾದಕೆರ್ ವಾಸು ಪೂಜಾರಿ ಚಿತ್ರಾಪು, ವಿಜಯ ಕುಮಾರ್ ಕುಬೆವೂರು, ರವಿಚಂದ್ರ ಮುಲ್ಕಿ, ಜಯಪಾಲ ಶೆಟ್ಟಿ ಐಕಳ, ಅಬ್ದುಲ್ ರಜಾಕ್, ವಾಮನ ನಡಿಕುದ್ರು ಮೊಕುಲು ಮಾತ ಇತ್ತೆರ್.

ಇನಿ INDIA ಒಕ್ಕೂಟದ ಸಭೆ

ಮಣಿಪುರ ಗಲಾಟೆದ ಇಚಾರವಾದ್ ವಿರೋಧ ಪಕ್ಷಲೆನ ಮೈತ್ರಿಕೂಟ INDIA ದ ಇನಿ ಸಭೆ ನಡಪರೆ ಉಂಡು.

ರಾಜ್ಯಸಭೆ ವಿರೋಧ ಪಕ್ಷದ ನಾಯಕೆ, ಕಾಂಗ್ರೆಸ್ ರಾಷ್ಟ್ರೀಯ ಅಧ್ಯಕ್ಷೆರ್ ಮಲ್ಲಿಕಾರ್ಜುನ ಖರ್ಗೆ ಮೆರೆನ ಕಚೇರಿಡ್ ಈ ಸಭೆ ನಡಪರೆ ಉಂಡು.

ನೆಟ್ಟ್ ಮಣಿಪುರಗ್ ಸಂಬಂಧಪಟ್ಟಿನ ಸಮಸ್ಯೆಲೆನ ಬಗ್ಗೆ ಸಂಸತ್ತ್ ಡ್ ದೆತೊನ್ನ ಬಗ್ಗೆ ಚರ್ಚೆ ಮಲ್ಪೆರೆ ಉಂಡು. ಕಾಂಗ್ರೆಸ್, ಡಿಎಂಕೆ, ಎಸ್ ಪಿ, ಎಎಪಿ ಸೇರಿನಂಚೆನೆ ಸುಮಾರ್ ಪಕ್ಷಲು ಸಭೆಟ್ಟ್ ಪಾಲ್ ಪಡೆಯೆರೆ ಉಂಡು.

ಜು.30: ಜವನೆರ್ ಪೆರಾರ ಅಟ್ಟಣೆ ಮಲ್ಪುನ ಕೆಸರ್ದ ಗೊಬ್ಬು

ಜವನೆರ್ ಪೆರಾರ ಅಟ್ಟಣೆ ಮಲ್ಪುನ ಕೆಸರ್ದ ಗೊಬ್ಬು 2023 ಉಂದುವೇ ಜುಲೈ 30 ಐತಾರದಾನಿ ಕಾಂಡೆ ಪೆರಾರ ಕ್ಷೇತ್ರದ ಬಂಟಕಂಬ ರಾಜಾಂಗಣದ ಬರಿತ ಕಂಡೊಡು ಗರ್ದ್ ಡ್ ನಡಪರೆ ಉಂಡು.

ಈ ಲೇಸ್ ಗ್ ನಿಕುಲು ಮಾತ ಬತ್ತ್ ದ್ ಪೊರ್ಲು ಮಲ್ತ್ ಕೊರೊಡು ಪಂದ್ ಜವನೆರ್ ಪೆರಾರ ಲೆಪ್ಪೋಲೆಡ್ ತೆರಿಪಾದೆರ್.