ಬೊಲ್ತೇರ್: ಧರ್ಮಸ್ಥಳ ಸೌಜನ್ಯ ಸಾವುಗು ನ್ಯಾಯ ಒದಗಾವುನಂಚ ರಾಜ್ಯದ ಮುಖ್ಯಮಂತ್ರಿ ಸಿದ್ದರಾಮಯ್ಯೆರೆನ್ ಬೊಲ್ತೇರ್ ಶಾಸಕ ಹರೀಶ್ ಪೂಂಜ ಆಗ್ರಹಿಸಾದೆರ್.
ಈ ಪೊರ್ತುಡು ವಿಧಾನ ಪರಿಷತ್ ಶಾಸಕೆರ್ ಪ್ರತಾಪಸಿಂಹ ನಾಯಕ್ ಒಟ್ಟಿಗೆ ಇತ್ತೆರ್.
ಮೂಡುಮನೆ ಬಂದಲೆ ಶ್ರೀಮಂತ ರಾಜಗುಳಿಗ ಕ್ಷೇತ್ರ (ರಿ.) ವತಿರ್ದ್ ನಡಪುನ 100ನೇ ಕೋಲದ ಗೌಜಿ, ಆಟಿಡೊಂಜಿ ದಿನ ಜು.23 ಕ್ಕ್ ಶ್ರೀಮಂತ ರಾಜಗುಳಿಗ ಕ್ಷೇತ್ರದ ಚಾವಡಿಡ್ ನಡಪರೆ ಉಂಡು.
ಈ ಲೇಸ್ ಡ್ ಹಿಂದೂ ಸಾಮ್ರಾಟೆರ್ ಅರುಣ್ ಕುಮಾರ್ ಪುತ್ತಿಲ ಮೇರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಕ್ಷೇತ್ರದ ಧರ್ಮದರ್ಶಿಲು ಸತೀಶ್ ಬಂದಲೆ ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಗಳೂರು: ಭಜನೆದ ಬಗೆಟ್ಟ್ ಎಚ್ಚ ಪೊಲಬು ಇಜ್ಜಂದಿನ ಮಾಯಾನಗರಿ ಬೆಂಗಳೂರುಡು ಊರುದ ಜವನೆರ್ ನ್ ಮಾತಾ ಜಾತಿ ಬೇಧ ಇಜ್ಜಂದೆ ಒಟ್ಟು ಸೇರಾದ್ ಊರುಡು ಆಪುನಂಚನೆ ಭಜನೆ ಮಲ್ಪೊಡು ಪನ್ಪಿನ ಕನ ಕಟ್ಟಿನಾರ್ ರಂಜು ತುಳುರಂಗ ಪ್ರೇಮಿ.ಈ ಕನತ ಪ್ರತಿರೂಪ ಆದ್ ಆದಿ ಚುಂಚನಗಿರಿ ಶ್ರೀ ಬಾಲಗಂಗಾಧರೇಶ್ವರ ದೇವಸ್ಥಾನದ ಸಾನ್ನಿಧ್ಯ ಡ್ ಪುಟ್ಟು ಪಡೆಯಿನ ಭಜನಾ ಮಂಡಳಿಯೇ ಮಕರಶ್ರೀ ಭಜನಾ ಮಂಡಳಿ. ಈ ಭಜನಾ ಮಂಡಳಿದ 1ನೇ ವರ್ಷದ ವಾರ್ಷಿಕೋತ್ಸವ ಉಂದುವೇ ಜುಲೈ, 15ನೇ ತಾರಿಕ್ ಶನಿವಾರದಾನಿ ಶ್ರೀ ಬಾಲ ಗಂಗಾಧರೇಶ್ವರ ದೇವಸ್ಥಾನ, ವಿಜಯನಗರ ಬೆಂಗಳೂರು ಡ್ ಆದಿಚುಂಚನಗಿರಿ ಮಠತ ಶ್ರೀ ಸೌಮ್ಯಾನಂದ ಸ್ವಾಮೀಜಿ ಮೆರೆನ ಉಪಸ್ಥಿತಿ ಟ್, ಮಕರಶ್ರೀ ಭಜನೆ ಮಂಡಳಿದ ಮಾತಾ ಸದಸ್ಯೆರ್ನ ಮುತಾಲಿಕೆಡ್ ಬಾರಿ ಪೊರ್ಲುಡೇ ಸಾಂಗವಾದ್ ನೆರವೇರ್oಡ್.ಈ ಸಂದರ್ಭೊಡ್ ರಾಜಬೂಡುದ ತುಳು ಸಂಘಟನೆದ ಮುಖ್ಯಸ್ಥೆರ್, ಸದಸ್ಯೆರ್, ಪಾಲುಪಡೆದಿತ್ತೆರ್.
ಪ್ರತಿ ಶನಿವಾರ ಮಕರ ಶ್ರೀ ಭಜನೆ ಮಂಡಳಿದ ಸದಸ್ಯರೆಡ್ದ್ ಶ್ರೀ ಬಾಲಗಂಗಾಧರೇಶ್ವರ ದೇವಸ್ಥಾನ, ವಿಜಯನಗರ ಬೆಂಗಳೂರುಡು ಆವೊಂದುಂಡು ಅಂಚೆನೇ ಭಜನೆ ಮಲ್ಪೊಡಯ ಪಂಡ್ದ್ ಉಮೇದ್ ಇತ್ತಿನಕುಲು ಸದಸ್ಯೆರಾವರೆ ಸಂಚಾಲಕರೆಯಿನ ಸುಕೇಶ್ ಕುಲಾಲ್ ಮೆರೆನ ಪೋನ್ ನಂಬರ್ ಗ್ +91 72595 64910 ಪಾತೊರೊಲಿ ಪಂಡ್ದ್ ತೆರಿಪಾದೆರ್.
ವರದಿ :ಯಾದವ ಎಸ್ ಕಲ್ಲಾಪು
ಅಮೆರಿಕಾದ ನ್ಯೂರ್ಜೆಸಿದ ಫ್ರ್ಯಾಂಕ್ಲಿನ್ ಟೌನ್ ಶಿಪ್ಡ್ ಆದಿಚುಂಚನಗಿರಿ ಮಠತ್ತ ನಿರೆಲ್ಡ್ 80 ಕೋಟಿ ರೂ ಕರ್ಚಿಡ್ ನಿರ್ಮಾಣ ಆವೊಂದಿಪ್ಪುನ ಕಾಲಭೈರವೇಶ್ವರ ದೇಗುಲದ ನಿರ್ಮಾಣದ ಕಾಮಗಾರಿನ್ ಮಠಾಧಿಪತಿ ನಿರ್ಮಲಾನಂದನಾಥ ಸ್ವಾಮೀಜಿ ಪರಿಶೀಲನೆ ಮಲ್ತೆರ್.
ಆದಿಚುಂಚನಗಿರಿ ಮಹಾಸಂಸ್ಥಾನ ಈ ಟೌನ್ ಶಿಪ್ಡ್ 20 ಎಕರೆ ಜಮೀನ್ ದೆತೊಂದೆರ್. ಮೂಲ್ ನಿರ್ಮಾಣ ಆವೊಂದಿಪ್ಪುನ 5 ಸಾವಿರ ಚದರ ಮೀಟರ್ ಕಟ್ವಾನಡ್ ಯೋಗ , ಧ್ಯಾನ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮ ಆಯೋಜನೆದ ಉದ್ದೇಶ ದೀತೆರ್.
ಸುರುತ ಹಂತಡ್ ದೇವಾಲಯದ ಅರ್ಚಕೆರ್ನ ಇಲ್ಲ್ ನಿರ್ಮಾಣ ಆವರೆ ಉಂಡು. ಡಾ. ಅಮರನಾಥ ಗೌಡ, ಡಾ. ಬಾಬು ಕಿಲಾರ ಮುತಾಲಿಕೆಡ್ ಈ ಬೇಲೆ ಸುರು ಆಯೆರೆ ಉಂಡು.
ಸುಮಾರ್ 80 ಕೋಟಿ ರೂ. ವೆಚ್ಚದ ಯೋಜನೆ ಉಂದು ಆತ್ಂಡ್. ಕಿಲಾರದಕುಲು ದೇವಾಲಯದ ವಿನ್ಯಾಸ, ಪರಿಸರ ಇಲಾಖೆ ಅನುಮತಿ ಬೊಕ್ಕ ನಿರ್ಮಾಣದ ಜಬದಾರಿ ದೆತೊನರೆ ಉಲ್ಲೆರ್.
ಆಗಸ್ಟ್ 15 ರ್ದ್ ಬೊಕ್ಕ INDIA ಒಕ್ಕೂಟದ ಸಭೆ ನಡಪರೆ ಉಂಡು ಪಂದ್ ವರದಿ ಆತ್ಂಡ್.
ಈ ಸಭೆಟ್ಟ್ 11 ಜನತ್ತ ಸಮನ್ವಯ ಸಮಿತಿ ರಚನೆ ಮಲ್ಪೆರೆ ಉಂಡು. ಅತ್ತಂದೆ ಪ್ರಚಾರ ಸಮಿತಿ, ಸಂವಹನ ಸೇರಿನಂಚನೆ ನಾಲ್ ಐನ್ ಸಮಿತಿನ್ ರಚನೆ ಮಲ್ಪುನ ಸಾಧ್ಯತೆ ಉಂಡು.
ಇಂಚಿಪ್ಪ ಬೆಂಗ್ಲೂರ್ ಡ್ ಸಭೆ ಸೇರಿನ 24 ಪಕ್ಷದ ನಾಯಕೆರ್, ತನ್ನ ಒಕ್ಕೂಟಗ್ INDIA ಪಂದ್ ಪುದರ್ ದೀತೆರ್. ಈ ಸಭೆಟ್ಟ್ ಸೋನಿಯಾ ಗಾಂಧಿ, ರಾಹುಲ್ ಗಾಂಧಿ ಬೊಕ್ಕ ಮಲ್ಲಿಕಾರ್ಜುನ ಖರ್ಗೆ ಪಾಲ್ ಪಡೆದಿತ್ತೆರ್.
ಅರುಣಾಚಲ ಪ್ರದೇಶದ ತವಾಂಗ್ ಡ್ ಬೊಲ್ಪುಗು 3.3 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ರಾಷ್ಟ್ರೀಯ ಭೂಕಂಪಶಾಸ್ತ್ರ ಕೇಂದ್ರದ ರಿಕ್ಟರ್ ಮಾಪಕಡ್ ದಾಖಲ್ ಆತ್ಂಡ್.
ಈ ಭೂಕಂಪ 5 ಕಿಲೋಮೀಟರ್ ಅಡಿಟ್ಟ್ ಆತ್ಂಡ್. ನೆರ್ದ್ ಒವ್ವೇ ಪ್ರಾಣಹಾನಿ, ಆಸ್ತಿ ನಷ್ಟ ಆಯಿನ ಬಗ್ಗೆ ನನಲ ವರದಿ ಆತಿಜಿ.
ವಿಟ್ಲ: ಮಣ್ಣ್ ದಿಂಜಿನ ಲಾರಿ ಕಾರ್ ಗ್ ಗುದ್ದಿನ ಘಟನೆ ವಿಟ್ಲದ ಉಕ್ಕುಡದಲ್ಪದ ಕನ್ಯಾನ ಮಾರ್ಗಡ್ ನಡತ್ಂಡ್.
ಲಾರಿ ಗುದ್ದಿನ ಬಿರ್ಸ್ ಗ್ ಕಾರ್ ದ ಬಲ ಭಾಗ ನಕ್ಕೆ ಆತ್ಂಡ್. ಈ ಕಾರ್ ದೇಲಂತಬೆಟ್ಟು ನಿವಾಸಿ ಅವಿಲ್ ಡಿಸೋಜ ಮೆರೆನವು ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ಟ್ ವಿಟ್ಲ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಬಂಟ್ವಾಳ: ಡ್ರೈವರ್ ನ ಅಕಲ್ ತತ್ತ್ ದ್ ಲಾರಿಯೊಂಜಿ ಇಲ್ಲದ ಮಾಡ್ ದ ಮಿತ್ತ್ ಬೂರ್ದು, ಡ್ರೈವರ್ ಎಲ್ಯ ಪೆಟ್ಟ್ ರ್ದ್ ಒವ್ವೇ ತೊಂದರೆ ಇಜ್ಜಂದೆ ಬಚಾವ್ ಆಯಿನ ಘಟನೆ ವಗ್ಗದ ಬಾಂಬಿಲಡ್ ನಡತ್ಂಡ್.
ಬಾಂಬಿಲದ ಆಶ್ಬಕ್ ಪನ್ಪುನಾರೆನ ಇಲ್ಲದ ಮಾಡ್ ಗ್ ಲಾರಿ ಬೂರ್ದು ಪಲ್ಟಿ ಆತ್ಂಡ್. ಈ ಘಟನೆದ ಬಗ್ಗೆ ಒವ್ವೇ ಕೇಸ್ ದಾಖಲ್ ಆತಿಜಿ.
ಕಾರ್ಲ: ಶ್ರೀ ಗುರು ದುರ್ಗಾ ಮಿತ್ರ ಮಂಡಳಿ (ರಿ.) ನಂದಳಿಕೆ, ಶ್ರೀ ಗುರು ದುರ್ಗಾ ಮಹಿಳಾ ಮಂಡಳಿ ಗೋಳಿಕಟ್ಟೆ ನಂದಳಿಕೆ ನೆತ್ತ ವತಿರ್ದ್ ನಂದಳಿಕೆ ಗ್ರಾಮಸ್ಥೆರೆಗಾದ್ ಕೆಸರ್ ಕಂಡದ ಗ್ರಾಮೀಣ ಕ್ರೀಡಾಕೂಟ ಕೆಸರ್ದ ಗೊಬ್ಬು ಜು.30 ಕ್ಕ್ ಐತಾರ ಬೊಲ್ಪುಗು 9 ಗಂಟೆರ್ದ್ ನಂದಳಿಕೆ ಕೈಯಾರ್ಲ ಶ್ರೀ ವ್ಯಾಘ್ರ ಚಾಮುಂಡೇಶ್ವರೀ ದೇವಲ್ಯದ ಕಂಡೊಡು ನಡಪರೆ ಉಂಡು.
ಈ ಕ್ರೀಡಾಕೂಟಡ್ ಗ್ರಾಮೀಣ ಸೊಗಡುದ ಕ್ರೀಡೆಲು ಪೊಂಜೋವ್ ನಕ್ಲೆಗ್, ಆಂಜೋವ್ ನಕ್ಲೆಗ್ ಬೊಕ್ಕ ಜೋಕುಲೆಗ್ ಬೇತೆ ಬೇತೆ ಪ್ರತ್ಯೇಕ ವಿಭಾಗಡ್ ನಡಪರೆ ಉಂಡು. ಅಂಚೆನೆ ಉದಿಪನ ಲೇಸ್ ಡ್ ಕೃಷಿಕೆರ್ ಎನ್. ಶೈಲೇಶ್ ಶೆಟ್ಟಿ ಮೆರೆಗ್ ತಮ್ಮನ ಮಲ್ಪೆರೆ ಉಂಡು ಪಂದ್ ಮಿತ್ರ ಮಂಡಳಿದ ಕಾರ್ಯದರ್ಶಿ ದೀಕ್ಷಿತ್ ದೇವಾಡಿಗ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ 90.4 Mhz ಡ್ ಪುರಾಣಾಮೃತ- ಪೌರಾಣಿಕ ಪಾತ್ರ ಜೀವನ ಸೂತ್ರ ಸರಣಿ ಲೇಸ್ ದ 105ನೇ ಸಂಚಿಕೆ ಜುಲೈ 22 ಸನಿಯಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ಡ್ ಉಪನ್ಯಾಸಕೆರ್ ಮುಂಡಾಜೆ ಕುಮಾರೇಶ್ವರ ಭಟ್ ಪಾಲ್ ಪಡೆಯೆರ್. ಜುಲೈ 23 ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು ಪಂದ್ ಮಣಿಪಾಲ ಮಾಹೆದ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಕ್ಯಾಂಪಸ್ ಡ್ ಇಪ್ಪುನ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೆಂದ್ರದ ಪ್ರಕಟಣೆಡ್ ತೆರಿಪಾದ್ಂಡ್.
