ಕುಡ್ಲ: ಚಿಲಿಂಬಿಗುಡ್ಡೆ ಶ್ರೀ ರಾಮಾಂಜನೇಯ ಯುವಕ ಮಂಡಲ (ರಿ.) ನೆತ್ತ ಮುತಾಲಿಕೆಡ್ ಆಟಿಡೊಂಜಿ ಐತಾರ ಲೇಸ್ ಜುಲೈ 30 ಕ್ಕ್ ಐತಾರ ಬಯ್ಯಗ್ 4 ಗಂಟೆಗ್ ಶ್ರೀ ರಾಮಾಂಜನೇಯ ಸಭಾಭವನಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಉತ್ತರಾಖಂಡದ 5 ವರ್ಷದ ತೇಜಸ್ ತಿವಾರಿ ಚೆಸ್ ಡ್ ವಿಶ್ವದಾಖಲೆ ಮಲ್ದೆ.
ಎಲ್ಯ ಪ್ರಾಯಡೇ FIDE ರೇಟಿಂಗ್ (1149) ಪಡೆಯಿನ ಆಟಗಾರೆ ಆತೆ. 4ನೇ ವರ್ಷಡ್ ಜಿಲ್ಲಾ ಬೊಕ್ಕ ರಾಜ್ಯ ಮಟ್ಟದ ಚೆಸ್ ಗೊಬ್ಬೊಂದು ಇತ್ತಿನ ತೇಜಸ್, 13 ರಾಜ್ಯಡ್ ನಡತಿನ ಚೆಸ್ ಪಂತೊಡು ಪಾಲ್ ಪಡೆತೆ.
ಕರಿನ ವರ್ಷ 8 ವರ್ಷದೊಲಯಿದಕ್ಲೆನ ವಿಭಾಗಡ್ ಉತ್ತರಾಖಂಡಡ್ ನಡತಿನ ಪಂತೊಡು ಬೊಕ್ಕ ಭುವನೇಶ್ವರದ ರಾಷ್ಟ್ರೀಯ ಶಾಲೆದ ಚೆಸ್ ಡ್ ಟ್ರೋಫಿ ಗೆಂದ್ ದೆ.
24 ಕ್ಯಾರೆಟ್ 10 ಗ್ರಾಂ. ಬಂಗಾರ್ ದ ಬಿಲೆ ಇನಿ 380 ರೂ. ಕಮ್ಮಿ ಆತ್ಂಡ್.
ಕೋಡೆ 60490 ರೂ. ಇತ್ತಿನ ಬಂಗಾರ್ ದ ಬಿಲೆ ಇತ್ತೆ 60110 ರೂ. ಆತ್ಂಡ್. ಅಂಚೆನೆ 22 ಕ್ಯಾರೆಟ್ 10 ಗ್ರಾಂ ಬಂಗಾರ್ ದ ಬಿಲೆ 350 ರೂ. ಕಮ್ಮಿಯಾದ್ 55100 ರೂ. ಆತ್ಂಡ್. ಕೋಡೆ ನೆತ್ತ ಬಿಲೆ 55,450 ಇತ್ಂಡ್. ಆಂಡ ಬೊಳ್ಳಿ ಬಿಲೆಟ್ಟ್ ಒವ್ವೇ ಎಚ್ಚಿಕಮ್ಮಿ ಆತಿಜಿ. ಬೆಂಗ್ಲೂರ್ ಡ್ ಒಂಜಿ ಕೆಜಿ ಬೊಳ್ಳಿ ಬಿಲೆ 77250 ರೂ. ಆತ್ಂಡ್.
ಕಟೀಲ್: ದುಂಬುದ ಕಾಲಡ್ ಆಟಿ ತಿಂಗೊಲ್ ಪಂಡ ಕಷ್ಟದ ದಿನಕುಲು. ಆಚರಣೆಡ್ ವೈಜ್ಞಾನಿಕ ಕಾರಣಲು ಇತ್ತ್ಂಡ್. ಆರೋಗ್ಯದಾಯಕ ತೆನಸ್ ಲ ಇತ್ತ್ಂಡ್. ಗಂಜಿ ವನಸ್ ಗ್ ಇಪ್ಪುನ ಮಹತ್ವ ನಮಕ್ ತೆರಿದ್ ಇಪ್ಪೊಡು. ತುಳು ನಾಡ್, ನುಡಿ, ಆಚರಣೆದ ಬಗ್ಗೆ ಅಭಿಮಾನ ಇಪ್ಪೊಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.
ಮೇರ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಶಿಕ್ಷಣ ಸಂಸ್ಥೆದ ಶ್ರೀ ವಿದ್ಯಾ ಚಾವಡಿಡ್ ನಡತಿನ ಆಟಿದ ನೆಂಪು ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ರಂಗನಟೆ ನವೀನ್ ಡಿ.ಪಡೀಲ್ ಪಾತೆರ್ದ್, ಕಲಿಕೆಡ್ ಸಾಧನೆ ಮಲ್ಪೊಡು. ಅಂಚ ಪಂದ್ ಬದಕ್ ಡ್ ಪಾಠನ್ ಓದುದ್ ಪರೀಕ್ಷೆಡ್ ಪಾಸಾಪುನೇ ಮಾತ್ರ ಸಾಧನೆ ಅತ್ತ್. ಬೇತೆ ಬೇತೆ ಕ್ಷೇತ್ರಡ್ಲಾ ಸಾಧನೆ ಮಲ್ಪೊಲಿ. ಪರೀಕ್ಷೆಡ್ ಸೋತೆ ಪಂದ್ ಆತ್ಮಹತ್ಯೆದಂಚಿನ ನಿರ್ಧಾರ ದೆತೊನಿಯೆರೆ ಬಲ್ಲಿ ಪಂದ್ ಪಂಡೆರ್.
ಪಿಯುಸಿ ಪರೀಕ್ಷೆಡ್ ಎಚ್ಚ ಮಾರ್ಕ್ ಪಡೆಯಿನ ಬೊಕ್ಕ ಕ್ರೀಡಾ ಕ್ಷೇತ್ರಡ್ ರಾಷ್ಟ್ರಮಟ್ಟಡ್ ಸಾಧನೆ ಮಲ್ತಿನ 100 ಕಲ್ಪಾರ್ಥಿಲೆನ್ ಬೊಕ್ಕ ನಿವೃತ್ತಿ ಆಯೆರೆ ಇಪ್ಪುನ ಪ್ರೌಢಶಾಲೆದ ಶಿಕ್ಷಕೆರ್ ಸಾಯಿನಾಥ ಶೆಟ್ಟಿ ಬೊಕ್ಕ ಉಪಪ್ರಾಚಾರ್ಯೆರ್ ಸೋಮಪ್ಪ ಅಲಂಗಾರ್ ಮೊಕ್ಲೆಗ್ ಮಾನಾದಿಗೆ ನಡತ್ಂಡ್.
ಕೆ.ಕೆ ಪೇಜಾವರ, ಕಲ್ಲಡ್ಕ ವಿಟ್ಠಲ ನಾಯಕ್ ಮೆರೆರ್ದ್ ಆಟಿದ ಸಂಪ್ರದಾಯ ಬೊಕ್ಕ ಜಿಲ್ಲೆದ ಪುಗರ್ತೆದ ಕಲಾವಿದೆರ್ದ್ ದೇವಪೂಂಜ ತುಳು ಆಟ ನಡತ್ಂಡ್.
ಚಾವಡಿಡ್ ದೈವಾರಾಧನೆದ ಕೊಡಿಯಡಿತ್ತ ಕಲ್ಪನೆನ್ ಮಡಲ್ ಡ್ ವಿಶಿಷ್ಟ ರೀತಿಡ್ ರಚನೆ ಮಲ್ತ್ ದ್ ಇತ್ತೆರ್. ಕಲ್ಪಾರ್ಥಿಲೆಗ್ ತುಳುನಾಡ್ ದ ತೆನಸ್ ವನಸ್ ದ ವ್ಯವಸ್ಥೆ ಇತ್ತ್ಂಡ್.
ಈ ಪೊರ್ತುಡು ದೇವಲ್ಯದ ಆಡಳಿತ ಮಂಡಳಿ ಅಧ್ಯಕ್ಷೆರ್ ಸನತ್ ಕುಮಾರ್ ಶೆಟ್ಟಿ ಕೊಡೆತ್ತೂರುಗುತ್ತು, ಅರ್ಚಕೆರ್ ಲಕ್ಷ್ಮೀ ನಾರಾಯಣ ಅಸ್ರಣ್ಣ, ವೆಂಕಟರಮಣ ಅಸ್ರಣ್ಣ, ಅನಂತಪದ್ಮನಾಭ ಅಸ್ರಣ್ಣ, ಕಮಲಾದೇವಿಪ್ರಸಾದ ಅಸ್ರಣ್ಣ, ಪ್ರದ್ಯುಮ್ನ ರಾವ್ ತಿಬರೂರ್, ಸಂತೋಷ್ ಕುಮಾರ್ ಹೆಗ್ಡೆ ಎಳೆತ್ತೂರ್, ಕೆ.ಎಂ ಶೆಟ್ಟಿ ಮಧ್ಯಗುತ್ತು, ರತ್ನಾಕರ ಶೆಟ್ಟಿ ಮುಂಡ್ಕೂರ್, ಬಿಪಿನಿಚಂದ್ರ ಶೆಟ್ಟಿ ಕೊಡೆತ್ತೂರುಗುತ್ತು, ದೇವಲ್ಯದ ಇಸೇಸ ಅಧಿಕಾರಿ ಮೋಹನ್ ರಾವ್, ತ್ಯಾಗರಾಯ ಆಚಾರ್ಯ, ಹಳೆವಿದ್ಯಾರ್ಥಿ ಸಂಘದ ಲೋಕಯ್ಯ ಸಾಲಿಯಾನ್ ಇತ್ತೆರ್.
ಸೋಮಪ್ಪ ಅಲಂಗಾರ್ ಪ್ರಸ್ತಾವನೆ ಮಲ್ತೆರ್. ವಾದಿರಾಜ ರಾವ್ ತಮ್ಮನ ಇಪ್ಪುನ ಕಲ್ಪಾರ್ಥಿಲೆನ್ ಪಟ್ಟಿ ಓದಿಯೆರ್. ಸಾಯಿನಾಥ ಶೆಟ್ಟಿ ಎದ್ಕೊನಿಯೆರ್. ಶಿಕ್ಷಕಿ ರೋಹಿಣಿ ಶೆಟ್ಟಿ ಬೊಕ್ಕ ಪ್ರದೀಪ್ ಮೇರ್ ಲೇಸ್ ಸುಧಾರಿಕೆ ಮಲ್ತೆರ್. ಸುಷ್ಮಾ ಸೊಲ್ಮೆ ಸಂದಾಯೆರ್.
ಆಂದ್ರಪ್ರದೇಶ: ಶ್ರೀಕಾಕುಳಂ ಜಿಲ್ಲೆದ ಕಡಲ್ದ ಬರಿಕ್ಕ್ ಸೈತ್ತಿನ ನೀಲಿ ತಿಮಿಂಗಿಲ ಬೈದುಂಡ್. ಈ ವಿಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.
ಸುಮಾರ್ 25 ಅಡಿ ಉದ್ದದ ನೀಲಿ ತಿಮಿಂಗಿಲ 5 ಟನ್ ತೂಕ ಉಂಡ್ ಪಂದ್ ಅಂದಾಜಿ ಮಲ್ತ್ ದೆರ್.
ಬಂಗಾಳಕೊಲ್ಲಿಡ್ ಇಂಚಿನ ಮೀನ್ ಬಜಿ ಅಪರೂಪ. ಆಂದ್ರಪ್ರದೇಶಡ್ ಬಾರಿ ಬರ್ಸ ಇಪ್ಪುನೆದಾರ್ತ ಕೆಲವ್ ಕಡೆಟ್ ಪ್ರವಾಹ ಬೈದುಂಡ್. ಈ ಪೊರ್ತುಡ್ ಸೈತಿನ ಮೀನ್ ಕಡಲ್ದ ಬರಿಕ್ಕ್ ಬೈದುಂಡ್.
ಒಡಿಪು: ಏಣಗುಡ್ಡೆದ ಕಟಪಾಡಿ ಯುವಜನ ಸೇವಾ ಸಂಘ ಬೊಕ್ಕ ಒಡಿಪು ಜಿಲ್ಲೆದ ತೋಟಗಾರಿಕೆ ಬೊಕ್ಕ ಕೃಷಿ ಇಲಾಖೆದ ಒಟ್ಟು ಸೇರಿಗೆಡ್ (ಹಲಸುಮೇಳ) ಪೆಲಕಾಯಿ ಮೇಳ-2023 ಜುಲೈ 29 ಬೊಕ್ಕ 30 ಕ್ಕ್ ಒಡಿಪುದ ಕಟಪಾಡಿ ಎಸ್.ವಿ.ಎಸ್ ಹೈಸ್ಕೂಲ್ ಡ್ ಬೊಲ್ಪುಗು 9 ಗಂಟೆರ್ದ್ ಬಯ್ಯ 7 ಮುಟ್ಟ ನಡಪರೆ ಉಂಡು.
ಈ ಲೇಸ್ ಡ್ ಬೇತೆ ಬೇತೆ ಬಗೆತ್ತ ಪೆಲಯಿ ಪ್ರದರ್ಶನ, ಮಾರಾಟ, ಬೊಕ್ಕ ಬೇತೆ ಬೇತೆ ತಳಿತ್ತ ಪೆಲಕಾಯಿ ದೈತ್ತ ಮಾರಾಟ, ಸಾವಯವ ಉತ್ಪನ್ನಲು, ಕೆರೆಂಗ್, ಬೇತೆ ಬೇತೆ ತರಕಾರಿ ದೈ, ದೇಸಿ ತರಕಾರಿ ಬಿತ್ತ್ ದ ಮಾರಾಟ, ಬೇತೆ ಬೇತೆ ಬಗೆತ್ತ ಪೆಲಕಾಯಿ ತೆನಸ್ ಲು, ಪೆಲಕಾಯಿ ಹೋಳಿಗೆ, ಐಸ್ ಕ್ರೀಮ್, ಕಲ್ಪ ರಸದ ಪ್ರದರ್ಶನ ಬೊಕ್ಕ ಮಾರಾಟ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಒಡಿಪು: ಪ್ಯಾರ ಮೆಡಿಕಲ್ ಕಾಲೇಜಿದ ಪಾಯಿಕಾನೆಡ್ ಕಲ್ಪಾರ್ಥಿಲೆನ ವಿಡಿಯೋ ಮಲ್ತಿನ ಆರೋಪ ಕೆಂದ್ ಬರೊಂದುಂಡ್. ಮೂಜಿ ಕಲ್ಪಾರ್ಥಿನಕ್ಲೆಗ್ ಒಡಿಪು ಒಂಜನೇ ಹೆಚ್ಚುವರಿ ಸಿವಿಲ್ ಬೊಕ್ಕ ಜೆಎಂಎಫ್ಸಿ ನ್ಯಾಯಾಲಯ ಸುಕ್ರಾರ ಷರತ್ತ್ ಬದ್ದ ಜಾಮೀನ್ ಮಂಜೂರು ಮಲ್ತ್ ಆದೇಶ ಕೊರ್ತೆರ್.
ವಿಡಿಯೋ ಮಲ್ತಿನ ಆರೋಪಿಲಾಯಿನ ಶಬನಾಜ್, ಆಲ್ಫಿಯಾ, ಆಲಿಮಾತುಲ್ ಶಾಫಿಯಾ ಮೊಕ್ಲೆನ ವಿರುದ್ದ ಮಲ್ಪೆ ಪೊಲೀಸ್ ಠಾಣೆಡ್ ಕಲಂ;509,204,175,34 ಐ.ಪಿ.ಸಿ ಬೊಕ್ಕ 66(ಇ) ಐಟಿ ಕಾಯಿದೆಡ್ ಪ್ರಕರಣ ದಾಖಲಾತ್ಂಡ್.
ಪುತ್ತೂರು: ಮರಾಟಿ ಸಮಾಜ ಸೇವಾ ಸಂಘ(ರಿ) ಕೊಂಬೆಟ್ಟು ಬೊಕ್ಕ ಮರಾಟಿ ಯುವ ವೇದಿಕೆ ಕೊಂಬೆಟ್ಟು ಮೊಕ್ಲೆನ ನಿರೆಲ್ಡ್ ಮರಾಟಿ ಯುವ ವೇದಿಕೆ ಭಜನಾ ತಂಡ ಬೊಕ್ಕ ಆರ್ಯಾಪು ಗ್ರಾಮದ ಮರಾಠಿ ಭಾಂದವೆರ್ನ ಸಹಕಾರದೊಟ್ಟಿಗೆ ಕಂಬುಳೊದ ಕಂಡೊಡ್ ಆಟಿದ ಐಸಿರ ಕೆಸರ್ಗದ್ದೆ ಕ್ರೀಡಾಕೂಟ ಆರ್ಯಾಪು ಗ್ರಾಮದ ಮೇಲ್ಮಜಲ್ ಹಳೆಮನೆ ಗದ್ದೆಡ್ ನಡೆಪೆರುಂಡ್.
ಈ ಲೇಸ್ಡ್ ಪೊಜ್ಕೊಕ್ಲೆಗ್ ರಿಲೇ, ಹಗ್ಗ-ಜಗ್ಗಾಟ, ಹಿಂಬದಿ ಓಟ, ಮೂರು ಕಾಲಿನ ಓಟ, ಮಡಕೆ ಹಾಕುನ, 100 ಮೀಟರ್ ಓಟ, ತ್ರೋಬಾಲ್ ಸ್ಪರ್ಧೆ ದೀತೆರ್.
ಆಂಜೊಕ್ಲೆಗ್: ಹಗ್ಗ ಜಗ್ಗಾಟ, ವಾಲಿಬಾಲ್, ರಿಲೇ, 100 ಮೀಟರ್ ಓಟ, ಹಿಂಬದಿ ಓಟ, ಮೂರು ಕಾಲಿನ ಓಟ, ನಿಧಿ ಶೋಧ, ಮಡಕೆ ಹಾಕುನ, ಕೆಸರ್ಡ್ ಜಾರ್ ಕಂಬ ಬರ್ತುನ ಸ್ಪರ್ಧೆ ದೀತೆರ್.
ಜೊಕ್ಲೆಗ್: ಓಟ, ಹಿಂಬದಿ ಓಟ, ನಿಂಬೆ ಚಮಚ ಓಟ, ಅಡಿಕೆ ಹಾಲೆ ಎಳೆಯುವುದು, ಮಡಿಕೆ ಹಾಕುನ ಸ್ಪರ್ಧೆ ದಿತೇರ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪಿನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 18 ನೇ ಸಂಚಿಕೆ ಜುಲೈ 28 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಲ್ಪಾರ್ಥಿ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಜುಲೈ 29 ಕ್ಕ್ ಸನಿಯಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಶಿವಧ್ವಜ್ ಶೆಟ್ಟಿ ಕಥೆ, ಚಿತ್ರಕಥೆ, ನಿರ್ದೇಶನದ ಕೊರಮ್ಮ ತುಳು ಪಿಚ್ಚರ್ ಆಗಸ್ಟ್ 11 ಕ್ಕ್ ಬುಡುಗಡೆ ಆಯೆರೆ ಉಂಡು.
ಅಡ್ಯಾರ್ ಮಾಧವ ನಾಯಕ್ ಅರ್ಪಣೆ ಮಲ್ಪುನ ಈ ಪಿಚ್ಚರ್ ಗ್ ಈಶ್ವರಿದಾಸ್ ಶೆಟ್ಟಿ, ರಾಜೇಶ್ವರಿ ರೈ ನಿರ್ಮಾಪಕೆರಾತೆರ್. ಕ್ಯಾಮರ ಮ್ಯಾನ್ ಸುರೇಶ್ ಬೈರಸಂದ್ರ, ಸಂಗೀತ ಶಿನೋಯ್ ವಿ ಜೋಸೆಫ್, ಸಂಕಲನ ಗಣೇಶ್ ನೀರ್ಚಾಲ್, ಸಂಭಾಷಣೆ ಶ್ರೀನಿಧಿ ಡಿ.ಎಸ್, ಅನುವಾದ ಬೊಕ್ಕ ಸಾಹಿತ್ಯ ಕೆ. ಮಹೇಂದ್ರನಾಥ್ ಸಾಲೆತ್ತೂರ್, ಕಲೆ ಸಂತೋಷ್ ಪೂಜಾರಿ ವೇಣೂರ್, ಸಹ ನಿರ್ದೇಶನ ಹರ್ಸಿವ್ ಭಗೀರ, ಪ್ರಸಾದನ ಕುಮಾರ್ ನೊಣವಿನಕೆರೆ, ನಿರ್ಮಾಣ, ನಿರ್ವಹಣೆ ವೀರೇಶ್ ಎಸ್ ಎ, ಕಲೆ ಪರಿಕಾರಲು ಸುಧಾಕರ ಶೆಟ್ಟಿ, ಪ್ರಚಾರ ವಿನ್ಯಾಸ ಯಶ್ವಿನ್ ಕೆ. ಶೆಟ್ಟಿಗಾರ್ ಮಲ್ದೆರ್.
ಈ ಪಿಚ್ಚರ್ ಡ್ ಒಂಜಿ ಊರುದ ಯಜಮಾನೆ ಬೊಕ್ಕ ಆಯನ್ ನಂಬುದು, ಜೀವನನೇ ಆಯಗ್ ಸಮರ್ಪಣೆ ಮಲ್ತಿನ ಕೆಲಸದಾಯನ ಕತೆನ್ ನಮ ತೂವೊಲಿ.
