July 18, 2023

ವಿಪಕ್ಷದ ಒಕ್ಕೂಟಗ್ INDIA ಪಂದ್ ಪುದರ್

ಬೆಂಗ್ಲೂರ್ ಡ್ ನಡತೊಂದು ಇಪ್ಪುನ ವಿರೋಧ ಪಕ್ಷದ 26 ರಾಜಕೀಯ ಪಕ್ಷಲೆನ ನಾಯಕೆರ್ ಇನಿ ಸಭೆ ನಡಪಾದ್ ಮಲ್ಲ ನಿರ್ಧಾರ ದೆತೊಂದೆರ್.

ಅಕ್ಲೆನ ಕೂಡುಕಟ್ಟ್ ಗ್ (ಮೈತ್ರಿಕೂಟ) INDIA ಪಂದ್ ಪುದರ್ ದೀತೆರ್. INDIA ಪಂಡ..
I-Indian (ಭಾರತೀಯ)
N-National (ರಾಷ್ಟ್ರೀಯ)
D-Democratic (ಪ್ರಜಾಸತ್ತಾತ್ಮಕ)
I-Inclusive (ಅಂತರ್ಗತ)
A-Alliance (ಒಕ್ಕೂಟ).

ಬೊಳ್ಳಿದ ನಾಗಾಭರಣ ಪರಕೆ ಸಂದಾಯಿನ ಸಿಎಂ ಸಿದ್ದರಾಮಯ್ಯೆರ್ನ ಅಭಿಮಾನಿ

ಮೈಸೂರ್: ಸಿದ್ದರಾಮಯ್ಯ ಮೇರ್ ಮುಖ್ಯಮಂತ್ರಿ ಆಯಿನೆಕ್ಕ್ ಮೆರೆನ ಅಭಿಮಾನಿಯೊರಿ ದೇವಲ್ಯಗ್ ಬಂಗಾರ್ದ ಲೇಪನ ಇಪ್ಪುನ ಬೊಳ್ಳಿದ ನಾಗಾಭರಣ ಕೊರ್ದು ಪರಕೆ ಸಂದಾಯೆರ್.‌

ಮೇರ್ ಸಿದ್ದರಾಮಯ್ಯ ಮೆರೆನ ಪುಟ್ಟಿನ ಊರು ಸಿದ್ದರಾಮನಹುಂಡಿ ಗ್ರಾಮಡ್ ಇಪ್ಪುನ ಮೆರೆನ ಇಲ್ಲ ದೇವೆರ್ ಸಿದ್ದರಾಮೇಶ್ವರ ದೇವೆರೆಗ್ ಪರಕೆ ಸಂದಾದೆರ್.

ದೇವೇಗೌಡನಹುಂಡಿದ ಮಹಾದೇವ್ ಮೆರೆನ ಮಗೆ ರವಿ ಇತ್ತೆ ಸೌದಿ ಅರೇಬಿಯಾಡ್ ವಾಸ ಉಲ್ಲೆರ್. ಸಾಗರೋತ್ತರ ಕನ್ನಡಿಗೆರೆನ ಸಂಸ್ಥೆದ ಸಂಸ್ಥಾಪಕೆರ್ ಬೊಕ್ಕ ಜಂಟಿ ಕಾರ್ಯದರ್ಶಿ ಆತೆರ್. ರವಿ ಮಹಾದೇವ ಮೇರ್, ಈ ವರ್ಷ ಸಿದ್ದರಾಮಯ್ಯ ಮೇರ್ ಸಿಎಂ ಆವೊಡು ಪಂದ್ ಪರಕೆ ಪಂದಿತ್ತೆರ್. ಅಂಚೆನೆ ಇತ್ತೆ ದೇವೆರೆಗ್ ಇಸೇಸ ಪೂಜೆ ಸಂದಾದ್ ಪರಕೆ ಸಂದಾಯೆರ್.‌

ಮಟ್ಕಾ ಚೀಟಿದ ಗೊಬ್ಬು: 3 ಜನ ಆರೋಪಿಲು ಅರೆಸ್ಟ್

ಕುಡ್ಲ ಪೇಂಟೆದ ಉರ್ವ ಪೊಲೀಸ್ ಠಾಣೆ ವ್ಯಾಪ್ತಿದ ಉರ್ವ ಜಂಕ್ಷನ್ ದಲ್ಪ ಮೈದಾನಡ್ ಮಟ್ಕಾ ಚೀಟಿದ ಗೊಬ್ಬು ನಡಪಾವೊಂದು ಇತ್ತಿನ ಆರೋಪದ ಮಿತ್ತ್ 3 ಜನ ಆರೋಪಿಲೆನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್. ‌

ದೀಪಕ್ ಶೆಟ್ಟಿ ಕೋಡಿಕಲ್, ಅನಿಲ್ ಶೆಟ್ಟಿ ಕೋಡಿಕಲ್ ಬೊಕ್ಕ ಗಿರೀಶ್ ರೈ ವಾಮಂಜೂರ್ ಅರೆಸ್ಟ್ ಆಯಿನ ಆರೋಪಿಲು. ಮೊಕ್ಲೆನ ಮಿತ್ತ್ ಕರ್ನಾಟಕ ಪೊಲೀಸ್ ಕಾಯ್ದೆದ ಪ್ರಕಾರ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ನಡಪಾವೊಂದುಲ್ಲ ಪಂದ್ ಉರ್ವ ಠಾಣೆದ ಪೊಲೀಸೆರ್ ತೆರಿಪಾದೆರ್.

ಜ್ಞಾನದ ಬೊಲ್ಪುಗು ಅಜ್ಞಾನದ ಕತ್ತಲೆನ್ ದೂರ ಮಲ್ಪುನ ಶಕ್ತಿ ಉಂಡು: ಹರಿಕೃಷ್ಣ ಪುನರೂರು

ಶಿಮಂತೂರು : ಜ್ಞಾನದ ಬೊಲ್ಪು ಅಜ್ಞಾನದ ಕತ್ತಲೆನ್ ದೂರ ಮಲ್ತ್ ದ್ ವಿದ್ಯೆದ ಮುಖೇನ ಸುಜ್ಞಾನ ಪುಟ್ಟಾವುಂಡು. ಅಂಚಾದ್ “ತಮಸೋಮಾ ಜ್ಯೋತಿರ್ಗಮಯ” ಪನ್ಪಿನ ನಮ್ಮ ಶಾಲೆದ ಧ್ಯೇಯವಾಕ್ಯದಂಚೆನೆ ಕಲ್ಪಾರ್ಥಿಲೆನ ಬದ್ ಕ್ ಗ್ ಬೊಲ್ಪಾವಡ್ ಪಂದ್ ಶ್ರೀ ಶಾರದಾ ಸೊಸೈಟಿದ ಅಧ್ಯಕ್ಷೆರ್, ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು ಪಂಡೆರ್.

ಆರ್ ಶಿಮಂತೂರುದ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ಡ್ ಇತ್ತೆದ ಶೈಕ್ಷಣಿಕ ವರ್ಷೊಡು ಆಡಳಿತ ಮಂಡಳಿ ಶಾಲೆಡ್ ಸುಮಾರ್ ಅಭಿವೃದ್ದಿ ಕಾರ್ಯನ್ ನಡಪಾಯಿನ ನಿಲೆಟ್ಟ್ ನಡತಿನ ಲೇಸ್ ಡ್ ಶಾಲೆದ ಲಾಂಛನನ್ ಬುಡುಗಡೆ ಮಲ್ತ್ ದ್ ಪಾತೆರಿಯೆರ್.

ಈ ಪೊರ್ತುಡು ಶ್ರೀ ಶಾರದಾ ಸೊಸೈಟಿದ ಕಾರ್ಯದರ್ಶಿ ಪುರಂದರ ಶೆಟ್ಟಿಗಾರ್, ಕೋಶಾಧಿಕಾರಿ ಭುವನಾಭಿರಾಮ ಉಡುಪ, ನಿರ್ದೇಶಕೆರ್ ಪಟೇಲ್ ವಾಸುದೇವ ರಾವ್, ಪಿ.ಎಸ್. ಸುರೇಶ್ ರಾವ್, ಪಟೇಲ್ ವಿಶ್ವನಾಥ್ ರಾವ್ ಇತ್ತೆರ್.

ಶಾಲೆದ ಸಂಚಾಲಕೆರ್ ದೇವಪ್ರಸಾದ್ ಪುನರೂರು ಎದ್ಕೊನಿಯೆರ್. ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್ ಸೊಲ್ಮೆ ಸಂದಾಯೆರ್. ಸಹ ಶಿಕ್ಷಕಿ ದೀಪಿಕಾ ಈ ಲೇಸ್ ನ್ ಸುಧಾರಿಕೆ ಮಲ್ತೆರ್. ‌

ಮೈಸೂರ್ ಡ್ ಕಾರ್ ಆಕ್ಸಿಡೆಂಟ್ ಡ್ 3 ಜನ ತೀರ್ ಪೋಯೆರ್

ಉಂತುದು ಇತ್ತಿನ ಟ್ರ್ಯಾಕ್ಟರ್ ಗ್ ಕಾರುಲು ಗುದ್ದುದು 3 ಜನ ಜಾಗೆಡೇ ತೀರ್ ಪೋಯಿನ ಘಟನೆ ಮೈಸೂರ್- ಕುಡ್ಲ ರಾಜ್ಯ ಮಾರ್ಗದ ಪಿರಿಯಾಪಟ್ಟಣ ತಾಲೂಕ್ ದ ಕಂಪ್ಲಾಪುರದ ಕೈತಲ್ ಇನಿ ಬೊಲ್ಪುಗು ನಡತ್ಂಡ್.

ರಡ್ಡ್ ಕಾರ್ ಡ್ ಇತ್ತಿನಕ್ಲೆನೆಟ್ಟ್ ಮೂಜಿ ಜನ ಜೂವ ಕಳೆವೊಂದೆರ್. ನನ ಮೂಜಿ ಜನತ್ತ ಸ್ಥಿತಿ ಗಂಭೀರ ಆತ್ಂಡ್ ಪಂದ್ ವರದಿ ಆತ್ಂಡ್.

ಕಾಂಡೆದ ತೆನಸ್ ತಿಂದಿಜಿಂಡ ಆರೋಗ್ಯಗ್ ತೊಂದರೆ

ಕಾಂಡೆದ ಪೊರ್ತುಡು ತೆನಸ್ ತಿಂದಿಜಿಂಡ ಆರೋಗ್ಯಗ್ ತೊಂದರೆ ಆಪುಂಡು ಪಂದ್ ತಜ್ಜೆರ್ ಪಂತೆರ್.

ಕಾಂಡೆದ ಪೊರ್ತುಡು ತಿಂಡಿ ತಿಂದಿಜಿಂಡ ಜೂವದುಲಯಿದ ಮೆಟಬಾಲಿಸಂಡ್ ನರಮಾನಿಗ್ ನಿಧಾನವಾದ್ ಉದಾಸಿನ ಎಚ್ಚಾಪುಂಡು. ಅತ್ತಂದೆ ತಿಗಲೆ ಬೇನೆ ಎಚ್ಚಾದ್ ಬರ್ಪುಂಡು ಪಂದ್ ತಜ್ಜೆರ್ ಎಚ್ಚರಿಕೆ ಕೊರ್ತೆರ್. ಅವ್ವತ್ತಂದೆ ಸಂಧಿವಾತದ ಸಮಸ್ಯೆ, ಗ್ಯಾಸ್ಟ್ರಿಕ್ ದಂಚಿನ ರೋಗಲ ಸುರು ಆಪುಂಡು ಪಂದ್ ಅಕುಲು ತೆರಿಪಾದೆರ್.

ದೇವಸ್ಥಾನಡ್ ನನ ಕ್ಯಾಮೆರಾ, ಮೊಬೈಲ್ ಬಂದ್

ರಾಜ್ಯದ ದೇವಸ್ಥಾನಡ್ ನನ ಕ್ಯಾಮೆರಾ, ಮೊಬೈಲ್ ಬಂದ್ ಮಲ್ಪುನ ಬಗೆಟ್ಟ್ ಸರ್ಕಾರ ಅಧಿಕೃತ ಆದೇಶ ಕೊರ್ತುಂಡು.

ಧಾರ್ಮಿಕ ಬೊಕ್ಕ ಧರ್ಮಾದಾಯ ದತ್ತಿ ಇಲಾಖೆ ಈ ನಿರ್ಬಂಧ ಮಲ್ಪುನ ಮುಕೇನ ಆದೇಶ ಜಾರಿಗ್ ಬೈದ್ಂಡ್.

ಮೊಬೈಲ್ ಫೋನ್ ಡ್ ಪಾತೆರ್ನಕುಲು, ವಿಡಿಯೋ ಮಲ್ಪುನು, ಪೋಟೋ ದೆಪ್ಪುನು ಬೊಕ್ಕ ರೀಲ್ಸ್ ಮಲ್ಪುನೆರ್ದ್ ದೇವಸ್ಥಾನದ ಪಾವಿತ್ರ್ಯತೆಗ್ ಬೊಕ್ಕ ಧಾರ್ಮಿಕ ಭಾವನೆಗ್ ದಕ್ಕೆ ಆಪುಂಡು. ಅಂಚಾದ್ ಹಿಂದೂ ಧಾರ್ಮಿಕ ಜಾಗೆಡ್ ಮೊಬೈಲ್ ಫೋನ್ ಗಲಸುನೆನ್ ಕಟ್ಟ್ ನಿಟ್ಟಾದ್ ಮಲ್ತೊಂದು ಬರೊಡುಂದು ಇಲಾಖೆ ಪನ್ತ್ಂಡ್.

ತಮಿಳುನಾಡ್‌ ಬೊಕ್ಕ ಕರ್ನಾಟಕದ ದೇವಸ್ಥಾನದ ಉಲಾಯಿ ಮೊಬೈಲ್ ಫೋನ್ ಗಲಸುನೆಕ್ಕ್ ನಿಷೇಧ ಇತ್ತ್ಂಡಲ ಫೋನ್ ಬಳಕೆ ಮಲ್ಪುನೆನ್ ಜನ ಕಡಿಮೆ ಮಲ್ತಿಜೆರ್. ಇಂಚಾದ್ ಸರಕಾರ ಕುಡೊರ ಅಧಿಕೃತವಾದ್ ಮೊಬೈಲ್ ಫೋನ್ ಬಳಕೆಗ್ ಧಾರ್ಮಿಕ ಬೊಕ್ಕ ದತ್ತಿ ಇಲಾಖೆ ನಿಷೇಧ ಮಲ್ತ್ ದ್ಂಡ್.

ಕೇರಳದ ಮಾಜಿ ಸಿಎಂ ಉಮ್ಮನ್ ಚಾಂಡಿ ತೀರ್ ಪೋಯೆರ್

ಕೇರಳದ ಮಾಜಿ ಮುಖ್ಯಮಂತ್ರಿ, ಕಾಂಗ್ರೆಸ್ ದ ಹಿರಿಯ ನಾಯಕೆ ಉಮ್ಮನ್ ಚಾಂಡಿ (79) ಮೇರ್ ಇನಿ ತೀರ್ ಪೋಯೆರ್.

ಇಂಬೆರ್ ಕ್ಯಾನ್ಸರ್ ಸೀಕ್ ಗ್ ಬೆಂಗಳೂರುದ ಖಾಸಗಿ ಆಸ್ಪತ್ರೆಡ್ ಚಿಕಿತ್ಸೆ ದೆತೊಂದಿತ್ತೆರ್. ಚಿಕಿತ್ಸೆ ಫಲಕಾರಿಯಾವಂದೆ ಜು.18 ಗು ತೀರ್ ಪೋಯೆರ್. 2004-06 ಬೊಕ್ಕ 2011-16 ನೇ ಅವಧಿಡ್ ಕೇರಳದ ಮುಖ್ಯಮಂತ್ರಿಯಾದ್ ಆಡಳಿತ ಮಲ್ತಿತ್ತೆರ್.

ಅರೆನ 27ನೇ ವರ್ಷದ ಪ್ರಾಯಡೇ ಶಾಸಕೆರಾದ್ ಆಯ್ಕೆ ಆಪಿನ ಮುಕೇನ 1970 ನೇ ಇಸವಿಡ್ ರಾಜಕೀಯ ಪ್ರವೇಶ ಮಲ್ತೆರ್. 1943 ಅಕ್ಟೋಬರ್ 31 ನೇ ಇಸವಿಡ್ ಕೊಟ್ಟಾಯಂ ಜಿಲ್ಲೆದ ಕುಮಾರಕೋಮ್‌ಡ್ ಪುಟ್ಟುದು ಪುತ್ತುಪಲ್ಲಿ ಸೈಂಟ್ ಜಾರ್ಜ್ ಶಾಲೆಡ್ ಪ್ರೌಢ ಶಿಕ್ಷಣ ಮಲ್ತ್ ದ್ ಬೊಕ್ಕ ಕೊಟ್ಟಾಯಂದ ಸಿ.ಎಮ್.ಎಸ್ ಕಾಲೇಜ್ ಬೊಕ್ಕ ಚಂಗನಾಸ್ಸೆರಿಯ ಸೈಂಟ್ ಬರ್ಚ್ಮನ್ಸ್ ಕಾಲೇಜ್‌ಡ್ ಪದವಿ ಓದುದಿತ್ತೆರ್.

ಅಂಚನೆ ಎರ್ನಾಕುಲಂದ ಸರಕಾರಿ ಕಾನೂನು ಕಾಲೇಜ್‌ಡ್ ಎಲ್.ಎಲ್.ಬಿ ಮುಗಿತ್ ದ್ ಕೇರಳದ ವಿದ್ಯಾರ್ಥಿ ಸಂಘದ ಮುಕೇನ ರಾಜಕೀಯ ಪ್ರವೇಶ ಮಲ್ತ್ ದ್ 1967 ನೇ ಇಸವಿಡ್ ಕೇರಳ ವಿದ್ಯಾರ್ಥಿ ಒಕ್ಕೂಟದ ರಾಜ್ಯಾಧ್ಯಕ್ಷರಾದಿತ್ತೆರ್.

ಕಾಂಗ್ರೆಸ್ ಪಕ್ಷದ ಮುಕೇನ ತನ್ನ ರಾಜಕೀಯ ಜೀವನ ಆರಂಭ ಮಲ್ಪುನ ಮೂಲಕ ಉಮ್ಮನ್ ಚಾಂಡಿ 1969 ಡ್ ಯುವ ಕಾಂಗ್ರೆಸ್ ದ ರಾಜ್ಯಾಧ್ಯಕ್ಷರಾದಿತ್ತೆರ್.