ಅಮೆರಿಕಡ್ ಒರಿ ಮುದಲೆದ ಮಿತ್ತ್ ಸವಾರಿ ಮಲ್ತಿನ ಭಯಾನಕ ವೀಡಿಯೋವೊಂಜಿ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.
ಈ ಜನ ಮುದಲೆದ ಮಿತ್ತ್ ಆನೆ ಮಿತ್ತ್ ಸವಾರಿ ಮಲ್ತಿಲೆಕ್ಕ ಮಲ್ದೆರ್. ಮುದಲೆಲ ಎಡ್ಡೆ ಮೂಡ್ ಡ್ ಇತ್ತಿಲೆಕ್ಕ ಈ ಜನಕ್ಕ್ ದಾಲ ಮಲ್ಪಂದೆ ಮನಿಪಂದೆ ನೀರ್ ಗ್ ಪೋತ್ಂಡ್. ಈ ಮುದಲೆದ ಮಿತ್ತ್ ಸುರುಕ್ಕು ಕುಲ್ಲುದು ಬೊಕ್ಕ ಜೆತ್ತ್ ದ್ ಸವಾರಿ ಮಲ್ತಿನೆನ್ ವೀಡಿಯೋಡ್ ತೂವೊಲಿ. ಈ ಜನತ್ತ ಧೈರ್ಯನ್ ತೂಯಿನ ಜನ ಈ ಜನಕ್ಕ್ ದಾದತ್ಂಡ್ ಪಂದ್ ಕಾಮೆಂಟ್ಡ್ ಪಂತೆರ್.
ಒಡಿಪು: ತುಳುನಾಡು ರಕ್ಷಣಾ ವೇದಿಕೆ ಒಡಿಪು ತಾಲೂಕ್ ಘಟಕದ ಪೊಸ ಸದಸ್ಯೆರೆನ ಸೇರ್ಪಡೆ ಬೊಕ್ಕ ಪದಾಧಿಕಾರಿಲೆನ ಆಯ್ಕೆ ಲೇಸ್ ಕಿದಿಯೂರು ಹೋಟೆಲ್ ಡ್ ಜುಲೈ 30 ಕ್ಕ್ ಬಯ್ಯಗ್ 4 ಗಂಟೆಗ್ ನಡತ್ಂಡ್.
ಈ ಪೊರ್ತುಡು ಪಾತೆರಿನ ತುಳುನಾಡು ರಕ್ಷಣಾ ವೇದಿಕೆ ಸ್ತಾಪಕಾಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜಪ್ಪು ಮೇರ್, ಕರ್ನಾಟಕ ರಾಜ್ಯದ ಅಧಿಕೃತ ಭಾಷೆ ಆಯೆರೆ ಒವ್ವೇ ತ್ಯಾಗಗ್ಲಾ ಕಾರ್ಯಕರ್ತೆರ್ ತಯಾರ್ ಇಪ್ಪೊಡು ಪಂದ್ ಪಂಡೆರ್. ಅಂಚೆನೆ ತುಳುನಾಡ ಅಭಿವೃದ್ಧಿ ತುಳುವೆರೆನ ಹಿತ ರಕ್ಷಣೆಗ್ ಎಪಲ ತಯಾರ್ ಇಪ್ಪುವೆ ಪಂದ್ ತೆರಿಪಾಯೆರ್.
ಒಡಿಪು ಜಿಲ್ಲಾ ವೀಕ್ಷಕೆರಾದ್ ಸಮಾಜ ಸೇವಕೆರಾಯಿನ ಫ್ರ್ಯಾಂಕಿ ಡಿಸೋಜಾ ಕೊಳಲಗಿರಿ ಮೆರೆನ್ ನೇಮಕ ಮಲ್ತೆರ್. ಈ ಪೊರ್ತುಡು ಚಿತ್ರ ನಿರ್ದೇಶಕೆರ್ ಇಸ್ಮಾಯಿಲ್ ಮುಡುಶೆಡ್ಡೆ, ತಾಲೂಕ್ ಗೌರವಾಧ್ಯಕ್ಷೆರ್ ರವಿ ಆಚಾರ್ಯ, ಸಲಹೆಗಾರೆರ್ ಸುಧಾಕರ್, ತಾಲೂಕ್ ಅಧ್ಯಕ್ಷೆರ್ ಕೃಷ್ಣ ಕುಮಾರ್, ಪ್ರಧಾನ ಕಾರ್ಯದರ್ಶಿ ಸುನಿಲ್ ಫೆರ್ನಾಂಡಿಸ್, ಉಪಾಧ್ಯಕ್ಷೆರ್ ಜಯರಾಮ್ ಪೂಜಾರಿ, ಗಣೇಶ್ ಮಲ್ಯ, ಮಾಧ್ಯಮ ಕಾರ್ಯದರ್ಶಿ ರೋಷನ್ ಡಿಸೋಜ, ಯುವ ಘಟಕ ಅಧ್ಯಕ್ಷೆರ್ ರಾಹುಲ್, ಮಹಿಳಾ ಅಧ್ಯಕ್ಷೆ ಶೋಭಾ ಪಾಂಗಳ, ಮಹಿಳಾ ಘಟಕ ಪ್ರಧಾನ ಕಾರ್ಯದರ್ಶಿ ನಾಗಲಕ್ಷ್ಮಿ, ಸಾಂಸ್ಕೃತಿಕ ಕಾರ್ಯದರ್ಶಿ ವಿಜಯಲಕ್ಷ್ಮಿ ಇತ್ತೆರ್. ಪೊಸ ಸದಸ್ಯೆರೆಗ್ ಅಧಿಕೃತವಾದ್ ಸಾಲ್ ಪಾಡುನ ಮುಖೇನ ಸಂಘಟನೆಗ್ ಸೇರ್ಸಾಯೆರ್.
ಗೃಹಜ್ಯೋತಿ ಯೋಜನೆ ಎಲ್ಲೆ ರ್ದ್ (ಆಗಸ್ಟ್1) ಚಾಲನೆಗ್ ಬರ್ರೆ ಇತ್ತ್ ದ್ ದರ್ಮೊಗು ಕರೆಂಟ್ ಗಲಸೊಲಿ.
ರಾಜ್ಯಡ್ 1.20 ಕೋಟಿ ಜನ ಯೋಜನೆದ ನೋಂದಣಿ ಮಲ್ತ್ ದೆರ್.
ಕುಟೀರ ಜ್ಯೋತಿ, ಭಾಗ್ಯ ಜ್ಯೋತಿ, ಅಮೃತ ಯೋಜನೆದ 40ಲಕ್ಷ ಫಲಾನುಭವಿಲು ಈ ಯೋಜನೆದ ಪಾಲ್ ಪಡೆಯೊಂದೆರ್.ಈತ್ನೆಟ ಶೇ. 55% ದಾತ್ ಫಲಾನುಭವಿ ನೋಂದಣಿ ಮಲ್ತ್ ದ್ ಎಡ್ಡೆ ಸ್ಪಂದನೆ ಕೊರ್ತೆರ್.
ಬಂಟ್ವಾಳ: ಬೈಕ್ ಗ್ ಖಾಸಗಿ ಬಸ್ ಗುದ್ದುದು ಬೈಕ್ ಸವಾರೆ ತೀರ್ ಪೋಯಿನ ಘಟನೆ ಕಲ್ಲಡ್ಕಡ್ ಕೋಡೆ ಬಯ್ಯಗ್ ನಡತ್ಂಡ್.
ಕಲ್ಲಡ್ಕ ಗೋಳ್ತಮಜಲು ಮುರಬೈಲು ನಿವಾಸಿ ಲತೀಶ್ ತೀರ್ ಪೋಯಿನಾರ್.
ಕುಡ್ಲಡ್ ಮ್ಯೆಕಾನಿಕ್ ಆದ್ ಬೇಲೆ ಮಲ್ತೊಂದು ಇತ್ತಿನ ಮೇರ್, ಐತಾರ ರಜೆತ್ತ ದಿನವಾಯಿನೆರ್ದಾವೆರ ಬೊಲ್ಪುಗು ಪಣೋಲಿಬೈಲ್ ಗ್ ಪೋದು ಇಲ್ಲಗ್ ವಾಪಸ್ ಆನಗ ಕಲ್ಲಡ್ಕಡ್ ಈ ಘಟನೆ ನಡತ್ ದ್ಂಡ್.
ಕಲ್ಲಡ್ಕರ್ದ್ ವಿಟ್ಲ ಮಾರ್ಗಡ್ ಪೋಪುನ ಪೊರ್ತುಡು ವಿಟ್ಲರ್ದ್ ಭಾರೀ ಬಿರ್ಸ್ ಡ್ ಬರೊಂದು ಇತ್ತಿನ ಸೆಲಿನಾ ಖಾಸಗಿ ಬಸ್ ಬೈಕ್ ಗ್ ಗುದ್ದುಂಡು. ಉಂದು ಗುದ್ದಿನ ಬಿರ್ಸ್ ಗ್ ಲತೀಶ್ ಮೆರೆಗ್ ಮಸ್ತ್ ಪೆಟ್ಟಾತ್ಂಡ್. ಮೆರೆನ್ ಕೂಡ್ಲೆ ಕುಡ್ಲ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಚಿಂತಾಜನಕ ಸ್ಥಿತಿಡ್ ಇತ್ತಿನ ಮೆರೆಗ್ ಐಸಿಯು ಘಟಕಡ್ ಚಿಕಿತ್ಸೆ ಕೊರ್ತೆರ್. ಆಂಡ ಲತೀಶ್ ಬಯ್ಯಗ್ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋತೆರ್. ಟ್ರಾಫಿಕ್ ಎಸ್. ಐ.ಸುತೇಶ್ ಜಾಗೆಗ್ ಭೇಟಿ ಕೊರ್ದು, ಕೇಸ್ ದಾಖಲ್ ಮಲ್ದೆರ್.
ಸುಬ್ರಹ್ಮಣ್ಯ: ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಐತಾರ ಬಿಸಿಸಿಐ ಕಾರ್ಯದರ್ಶಿ ಆಯಿನ ಕೇಂದ್ರ ಗೃಹ ಮಂತ್ರಿ ಆಮಿತ್ ಶಾ ಮೆರೆನ ಮಗೆ ಜಯ್ ಶಾ ಕುಟುಂಬ ಸಮೇತ ದೇವಸ್ಥಾನಗ್ ಭೇಟಿ ಭೇಟಿ ಕೊರ್ತೆರ್. ಬೊಕ್ಕ ಆಶ್ಲೇಷ ಬಲಿ ಸೇವೆ ಮಲ್ತೆರ್. ಅರೆನ ಒಟ್ಟಿಗೆ ಅರ್ನ ಬುಡೆದಿ ರಿಷಿತಾ ಶಾ ಬೊಕ್ಕ ಕುಟುಂಬಸ್ಥೆರ್ ಇತ್ತೆರ್.
ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಮಾಜಿ ಅಧ್ಯಕ್ಷೆರ್ ಬೊಕ್ಕ ಕ್ಯಾಂಪ್ಕೋ ನಿರ್ದೇಶಕೆರ್ ಕೃಷ್ಣಪ್ರಸಾದ ಮಡ್ತಿಲ ಇತ್ತೆರ್.
ದೇವಲ್ತದ ಉಲಯಿ ಸಂಕಲ್ಪ ನೆರವೇರಿಸಾದ್ ಆಶ್ಲೇಷ ಬಲಿ ಸೇವೆ ಸಮರ್ಪಿಸಾಯೆರ್. ಬೊಕ್ಕ ಆಶ್ಲೇಷ ಬಲಿ ಪ್ರಸಾದ ಸ್ವೀಕಾರ ಮಲ್ತೆರ್. ದೇವಸ್ಥಾನದ ಅರ್ಚಕೆರ್ ಸತ್ಯನಾರಾಯಣ ನೂರಿತ್ತಾಯ ಜಯ್ ಶಾ ಮೆರೆಗ್ ಶಾಲ್ ಪಾರ್ದ್ ಮಹಾಪ್ರಸಾದ ಕೊರಿಯೆರ್. ಬೊಕ್ಕ ಕೇಂದ್ರ ಗೃಹಮಂತ್ರಿ ಅಮಿತ್ ಶಾ ಅರೆನ ಪುದರ್ಡ್ ದೇವಸ್ಥಾನಡ್ ನಡಪುನ ಅನ್ನ ದಾಸೋಹಗ್ ದೇಣಿಗೆ ಕೊರಿಯೆರ್.
ದೇವಸ್ಥಾನದ ಆಡಳಿತ ಕಚೇರಿಗ್ ಪೋಯಿನ ಜಯ್ ಶಾ ಅರೆಗ್ ದೇವಸ್ಥಾನದ ವ್ಯವಸ್ಥಾಪನದ ಸಮಿತಿ ಅಧ್ಯಕ್ಷೆರ್ ಮೋಹನರಾಂ ಸುಳ್ಳಿ ಶಾಲ್ ಪಾರ್ದ್ ಪ್ರಸಾದ ಕೊರಿಯೆರ್. ಈ ಪೊರ್ತುಡು ವ್ಯವಸ್ಥಾಪನಾ ಸಮಿತಿ ಮಾಜಿ ಅಧ್ಯಕ್ಷೆರ್ ಬೊಕ್ಕ ಕ್ಯಾಂಪ್ಕೋ ನಿರ್ದೇಶೆಕೆರ್ ಕೃಷ್ಣಪ್ರಸಾದ ಮಡ್ತಿಲ, ದೇವಳದ ಸಹಾಯಕ ಕಾರ್ಯನಿರ್ವಾಹಣಾಧಿಕಾರಿ ಪುಷ್ಪಲತಾ ರಾವ್, ವ್ಯವಸ್ಥಾಪನ ಸಮಿತಿ ಸದಸ್ಯೆರ್ ಪ್ರಸನ್ನ ದರ್ಬೆ, ಶೋಭಾ ಗಿರಿಧರ್, ಶಿಷ್ಠಾಚಾರ ವಿಭಾಗದ ಪ್ರಮೋದ್ ಕುಮಾರ್ ಎಸ್ ಬೊಕ್ಕ ಮನೋಜ್ ಸುಬ್ರಹ್ಮಣ್ಯ ಇತ್ತೆರ್. ಸುಬ್ರಹ್ಮಣ್ಯ ಠಾಣಾಧಿಕಾರಿ ಮಂಜುನಾಥ ಟಿ ಬಂದೋಬಸ್ತ್ ಮಲ್ತ್ ಇತ್ತೆರ್
ದೇವರೆನ ದರ್ಶನರ್ದ್ ಭಾರಿ ಕುಸಿ;
ಜಯ್ ಶಾ ದೇಶ ವಿದೇಶಡ್ ಪ್ರಖ್ಯಾತಿ ಪಡೆನ ನಾಗಾರಾಧನೆಡ್ ಪುಣ್ಯ ಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯಗ್ ಬತ್ದ್ ದೇವೆರ್ನ ದರ್ಶನ ಪಡೆಯಿನ ಕುಸಿ ಆತ್ಂಡ್. ಅಂಚೆನೆ ಎಡ್ಡೆ ವ್ಯವಸ್ಥೆ ಮಲ್ತ್ ಕೊರ್ನ ದೇವಸ್ಥಾನದ ಆಡಳಿತ ಸಮಿತಿ ಅಧ್ಯಕ್ಷೆರೆಗ್, ಸದಸ್ಯರೆಗ್ ಬೊಕ್ಕ ಆಡಳಿತ ಮಂಡಳಿಗ್ ಧನ್ಯವಾದ ತೆರಿಪಾಯೆರ್. ದುಂಬಗ್ ನನಲ ಮಸ್ತ್ ಸಲ ಬತ್ದ್ ದೇವೆರೆಗ್ ಸೇವೆ ಸಂದಾವೊಡು ಪನ್ಪುನ ಕನ ಉಂಡು ಉಂದೆನ್ ದೇವೆರ್ ಪೂರೈಕೆ ಮಲ್ಪ್ ವೆರ್ ಪನ್ಪಿನ ನಂಬಿಕೆ ಉಂಡು ಪಂತೆರ್.
ಕುಡ್ಲ: ಶ್ರೀ ರಾಮಾಂಜನೇಯ ಯುವಕ ಮಂಡಲ ಚಿಲಿಂಬಿಗುಡ್ಡೆ ಮೊಕ್ಲೆನ ನಿರೆಲ್ ಡ್ “ಆಟಿಡೊಂಜಿ ಐತಾರ” ಲೇಸ್ ಜು.30 ಗ್ ನಡತ್ಂಡ್.
ಬಾಲಕರ ಶ್ರೀ ಶಾರದ ಮಹೋತ್ಸವ ಟ್ರಸ್ಟ್ ದ ಅಧ್ಯಕ್ಷೆರ್ ಎಸ್.ಸುಬ್ರಾಯ ನಾಯಕ್ ಲೇಸ್ದ ಉದಿಪನ ಮಲ್ತೆರ್. ಚಲನಚಿತ್ರ ನಟ ಜನಪದ ಕಲಾವಿದೆರ್ ಆಯಿನ ಮೈಮ್ ರಾಮದಾಸ್ ಆಟಿ ತಿಂಗೊಳ್ದ ವಿಶೇಷತೆದ ಬಗ್ಗೆ ಪಂಡೆರ್. ಪಿರಾಕ್ದ ಆಚರಣೆ ಬೊಕ್ಕ ಇತ್ತೆದ ಆಚರಣೆದ ಬಗ್ಗೆ ಮಾಹಿತಿ ಕೊರಿಯೆರ್. ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮಡ್ ಆಟಿ ತಿಂಗೊಳ್ದ ವಿಶೇಷ ತೆನಸ್ನ್ ಕಾರ್ಯಕ್ರಮಡ್ ಪಾಲ್ಪಡೆಯಿನಕ್ಲೆಗ್ ಪಟ್ಯೆರ್.
ಈ ಪೊರ್ತುಡು ಚರಿತ್ ಪೂಜಾರಿ, ಬಿಜೆಪಿ ಮುಖಂಡೆರ್, ಯೋಗ ಶಿಕ್ಷಕೆರ್ ಸುರೇಖ ಹೆಗ್ಡೆ, ಯುವಕ ಮಂಡಲದ ಉಪಾಧ್ಯಕ್ಷೆರ್ ಪವನ್ರಾಜ್, ಗೌರವಾಧ್ಯಕ್ಷೆರ್ ಗುರುದತ್ತ್ ಕೋಟ್ಯಾನ್, ಮಹಿಳಾ ಉಪಾಧ್ಯಕ್ಷೆರ್ ಆಶಾ ಸುರೇಶ್ ಇತ್ತೆರ್.
ಶಿಕ್ಷಕೆರಾಯಿನ ರವೀಶ್ ಕೆ ಸ್ವಾಗತ ಮಲ್ತ್, ಸೀಮಾ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.
ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ವತಿರ್ದ್ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ಬೆದ್ರ ಬಿರಾವು ನಿವಾಸಿ ಆಯಿನ ಪ್ರಥ್ವಿ ಪ್ರಸಾದ್ ಮೇರ್ ಲ್ಯೂಕೆಮಿಯಾ (ನೆತ್ತೆರ್ ದ ಕ್ಯಾನ್ಸರ್) ಸೀಕ್ ಡ್ ಕುಡ್ಲದ (ಕೃಷ್ಣ ನರ್ಸಿಂಗ್ ಹೋಮ್) ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಇತ್ತೆರ್. ಮುಲ್ಪ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್. ಮೆರೆನ ಚಿಕಿತ್ಸೆಗಾದ್ ಇಲ್ಲದಕುಲು ಸಾಲ ಮಲ್ತಿನೆರ್ದಾವೆರ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಈ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 15 ಸಾರ ರೂ.ನ್ ದಕ್ಷಿಣ ಕನ್ನಡ ಬಿಜೆಪಿದ ಜಿಲ್ಲಾಧ್ಯಕ್ಷೆರ್ ಸುದರ್ಶನ್ ಎಂ ಬೆದ್ರ ಮೆರೆನ ಮುಖೇನ ಅಯ್ಯಪ್ಪ ಮಂದಿರ ಮಾರಿಗುಡಿ ಬೆದ್ರಡ್ ಸಹಾಯಧನದ ಚೆಕ್ ನ್ ಕೊರಿಯೆರ್.
ಈ ಪೊರ್ತುಡು ಕೂಟದ ಪದಾಧಿಕಾರಿಲು ಬೊಕ್ಕ ಪನವುದ ಸಕಾಯ ಮಲ್ತಿನಕುಲು ಇತ್ತೆರ್.
ಕನ್ಯಾನ ಗ್ರಾಮದ ದ.ಕ.ಜಿ.ಪಂ.ಹಿ.ಪ್ರಾ. ಶಾಲೆ ಕಣಿಯೂರು ಮುಲ್ತ ಕಲ್ಪಾರ್ಥಿಲೆಗ್ ನೇಜಿ ನಡ್ಪಿನ ಬೇಲೆದ ಅನುಭವದ ಕಲಿಕೆಗಾದ್ ಸಾಲೆದ ದುಂಬುದ ಕಲ್ಪಾರ್ಥಿ ಗಣೇಶ್ ಸಪಲ್ಯ ಬಟ್ನಡ್ಕ ಮೊಕ್ಲೆನ ಇಲ್ಲದ ಕಂಡಡ್ ಇನಿ ನೇಜಿ ನಡ್ಪುನ ಲೇಸ್ ನಡತ್ಂಡ್.
ಈ ಲೇಸ್ಡ್ ಸಾಲೆದ ಮುಖ್ಯ ಶಿಕ್ಷಕಿ ಶ್ ಅನಿತಾ ಮಿನೇಜಸ್ ಕೃಷಿ ಬದ್ಕ್ದ ಪಂತನ್ ಕಲ್ಪಾರ್ಥಿಲೆಗ್ ವಿವರಣೆ ಕೊರಿಯೆರ್. ಕಲ್ಪಾರ್ಥಿಲು ಕಂಡದ ವೀಕ್ಷಣೆ ಮಲ್ತ್ , ನೇಜಿ ನಡಿಯೆರ್.
ಶಿಕ್ಷಕೆರಾಯಿನ ರೇಷ್ಮಾ, ಲವೀನಾ, ಕು. ವನಿತಾ ಕೆ.ಎಲ್, ರೇಣುಕಾ, ಇಲ್ಲದಕುಲು ಇತ್ತೆರ್.
ಕಾರ್ಲ: ಮೈತ್ರಿ ಮಹಿಳಾ ಮಂಡಲ ಈದು ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಲುನಾಡ್ (ರಿ.) ದ ಒಟ್ಟುಸೇರಿಗೆಡ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ಉದಿಪನ ಲೇಸ್ ಐತಾರ ಶ್ರೀ ಮುಜಿಲ್ನಾಯ ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆಡ್ ನಡತ್ಂಡ್.
ಈ ಲೇಸ್ ದ ಉದಿಪನನ್ ಶಾಲೆದ ಸಂಚಾಲಕೆರ್ ಪ್ರೇಮ್ ಕುಮಾರ್ ಜೈನ್ ಮೇರ್ ಮಲ್ತ್ ದ್ ತುಳು ನಮ್ಮ ಅಪ್ಪೆ ಭಾಷೆ ಆಯಿಕ್ಕ್ ಸಾರರ್ದ್ ಎಚ್ಚ ಕಾಲದ ಇತಿಹಾಸ ಉಂಡು. ಅವೆನ್ ಕಲ್ತ್ ದ್ ಬುಲೆಪಾವುನವು ನಮ್ಮ ಮಾತೆರ್ನಲ ಜಬದಾರಿ ಪಂದ್ ಪಂಡೆರ್. ಅಂಚೆನೆ ಜೈ ತುಲುನಾಡ್ (ರಿ.) ಸಂಘಟನೆದ ಕೆಲಸನ್ ಮೆಚ್ಚಿಯೆರ್.
ಈ ಲೇಸ್ ದ ಗುರ್ಕಾರ್ಮೆನ್ ಮೈತ್ರಿ ಮಹಿಳಾ ಮಂಡಲದ ಅಧ್ಯಕ್ಷೆರ್ ವಿಮಲ ಆರ್ ಬಲ್ಲಾಳ್ ಒಯಿಸೊಂದಿತ್ತೆರ್. ಮಲ್ಲ ಬಿನ್ನೆರಾದ್ ಜೈ ತುಲುನಾಡ್ (ರಿ.) ಸಂಘದ ಅಧ್ಯಕ್ಷೆರ್ ವಿಶು ಶ್ರೀಕೇರ, ಶಾಲೆದ ಮುಖ್ಯೋಪಾಧ್ಯಾಯೆರ್ ಜ್ಞಾನೇಂದ್ರ ಜೈನ್ ಬೊಕ್ಕ ಯಶೋಧ ಶೆಟ್ಟಿ, ಪ್ರಭಾವತಿ ಪಾಲ್ ಪಡೆದಿತ್ತೆರ್.
ಪದ್ಮಜಾ ಶೆಟ್ಟಿ ಮಾನಸ ಲೇಸ್ ದ ಸುಧಾರಿಕೆ ಮಲ್ತೆರ್. ಸ್ವಾತಿ ಹೆಗ್ಡೆ ಎದ್ಕೊಂದು ಸೊಲ್ಮೆ ಸಂದಾಯೆರ್. ಕಲಿಕಾ ತರಗತಿದ ಅ.6 ರ್ದ್ ಪ್ರತಿ ಐತಾರ ನಡಪರೆ ಉಂಡು.
ಕುಡ್ಲ: ವಿಶ್ವವಿದ್ಯಾಲಯದ ಮಾಜಿ ಉಪಕುಲಪತಿ ಪ್ರೊ.ಕೆ.ಬೈರಪ್ಪ (69ವ) ಇನಿ ಬೊಲ್ಪುಗು ತಿಗಲೆ ಬೇನೆಡ್ ತೀರ್ಪೋಯೆರ್.
ಕುಡ್ಲದ ವಿಶ್ವವಿದ್ಯಾಯಡ್ 2014 ಜೂನ್ರ್ದ್ 2019 ಜೂನ್ ಮುಟ್ಟ ಕುಲಪತಿಯಾದ್ ಸೇವೆ ಸಂದಾದ್ ಬೊಕ್ಕ ನಿವೃತ್ತಿ ದೆತೊಂದು ಬೊಕ್ಕ ಆದಿ ಚುಂಚನಗಿರಿಟ್ ಕುಲಧಿಪತಿಯಾದ್ ಸೇವೆ ಸಂದಾವೊಂದು ಇತ್ತೆರ್.
ಬೆಳಗಾವಿಡ್ ನಡಪುನ ಕಾರ್ಯಕ್ರಮಗ್ ಪೋನಗ ಬೆಂಗ್ಲೂರು ವಿಮಾನ ನಿಲ್ದಾಣಗ್ ಬನ್ನಗ ತಿಗಲೆ ಬೇನೆ ಬತ್ತಿತ್ತ್ಂಡ್.
