ಪೊಸ ಸರ್ಕಾರ ಬತ್ತಿ ಕೂಡ್ಲೆ ತುಳು ಅಧಿಕೃತಗ್ ಒಂಜಿ ತಿಂಗೊಲ್ ಗಡುವು: ಡಾ.ಎಂ ಮೋಹನ್ ಆಳ್ವ

ಬೆದ್ರ: ಅಖಿಲ ಭಾರತ ತುಳು ಒಕ್ಕೂಟ(ರಿ.) ಬೊಕ್ಕ ತುಳುಕೂಟ ಬೆದ್ರ(ರಿ.) ನೆತ್ತ ಒಟ್ಟುಸೇರಿಗೆಡ್ ತುಳು ಮಹಾಕೂಟ ಎ.8 ಕ್ಕ್ ಸನಿಯಾರ ಬೊಲ್ಪುಗು 10 ಗಂಟೆಗ್ ಬೆದ್ರದ ಸ್ಕೌಟ್ಸ್ ಬೊಕ್ಕ ಗೈಡ್ಸ್ ಕನ್ನಡ ಭವನಡ್ ನಡತ್ಂಡ್.

ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಆಳ್ವಾಸ್ ಎಜುಕೇಶನ್ ಟ್ರಸ್ಟ್ ದ ಚೇರ್ಮನ್ ಡಾ.ಎಂ ಮೋಹನ್ ಆಳ್ವ ತುಡರ್ ಅರ್ಲಾದ್ ಉದಿಪನ ಮಲ್ತ್ ದ್ ಪಾತೆರ್ದ್, ತುಳು ಸಾಂಸ್ಕೃತಿ ಬೊಕ್ಕ ಸಾಹಿತ್ಯನ್ ನಮ ಬುಲೆಪಾವೊಡು ಬೊಕ್ಕ ಒರಿಪಾವೊಡು. ತುಳು ಭಾಷೆಡ್ ಸರಿಸುಮಾರ್ 115 ರ್ದ್ ಎಚ್ಚ ಚಲನಚಿತ್ರ ಉಂಡು. ತುಳು ಪತ್ರಿಕೆಲು ಉಂಡು. ದೃಶ್ಯ ಮಾಧ್ಯಮ ಬೊಕ್ಕ ರೇಡಿಯೋಲೆಡ್ ಸುಮಾರ್ ತುಳು ಲೇಸ್ ಪ್ರಸಾರ ಆವೊಂದುಂಡು. ಉಂದೆನ್ ಮೆಚ್ಚೊಡಾಯಿನವು. ತುಳು ಭಾಷೆನ್ ರಾಜ್ಯದ ಅಧಿಕೃತ ಭಾಷೆಯಾದ್ ಮಲ್ಪರೆ ನಮ ಬದ್ದೆರಾವೊಡು. ಇತ್ತೆನೇ ರಾಜ್ಯ ಸರ್ಕಾರದ ಬೇಡಿಕೆದಂಚೆನೆ 15 ದಿನತ್ತ ಉಲಯಿ ತುಳುಕ್ಕ್ ಸಂಬಂಧ ಪಟ್ಟಿನ ಸಂಪೂರ್ಣ ವರದಿನ್ ಮಾತ ತುಳುವೆರೆನ ಸಹಕಾರದೊಟ್ಟಿಗೆ ರಾಜ್ಯ ಸರ್ಕಾರಗ್ ಕೊರ್ತುಂಡು. ಕಾನೂನು ಘಟಕ ಬೊಕ್ಕ ರಾಜ್ಯ ಸರ್ಕಾರ ಈ ಬಗೆಟ್ ಇತ್ತೆನೇ ಕ್ರಮ ದೆತೊನೊಡಿತ್ತ್ಂಡ್. ಆಂಡ ಅವು ಒವ್ವೇ ಕ್ರಮ ದೆತೊನಂದಿನ ಕಾರಣ ವೋಟು ಕರಿನ ಬೊಕ್ಕ ಒವ್ವೇ ಸರಕಾರ ಬತ್ತ್ಂಡಲ ಎಂಕುಲು ಒಂಜಿ ತಿಂಗೊಲ್ದ ಗಡು ದೀಪ. ನಮ ಬಿನ್ನಾಪು ಬೊಕ್ಕ ಪೊರ್ಂಬಾಟ ರಡ್ಡೆಕ್ಲಾ ತಯಾರ್ ಆವೊಡು ಪಂದ್ ಪಂಡೆರ್.

ಬೊಕ್ಕ ಒಕ್ಕೂಟದ ಅಧ್ಯಕ್ಷೆರ್ ಎ.ಸಿ ಭಂಡಾರಿ ಪಾತೆರ್ದ್, ಇನಿ ಕೇವಲ 36 ದಾತ್ ಇಪ್ಪುನ ತುಳು ಕೂಟದ ಸಂಖ್ಯೆ ನೂದೆಕ್ಕ್ ಏರೊಡು. ಆತಾನಗ ತುಳುಕ್ಕ್ ಅಧಿಕೃತ ಮಾನ್ಯತೆ ತಿಕ್ಕುಂಡು. ಅತ್ತಂದೆ ನಮ್ಮ ಪೊರ್ಂಬಾಟಗ್ ನ್ಯಾಯ ಒದಗ್ ದ್ ಬರ್ಪುಂಡು ಪಂದ್ ಪಂಡೆರ್.

ಈ ಪೊರ್ತುಡು ದುಂಬುದ ನಿಕಟಪೂರ್ವ ಅಧ್ಯಕ್ಷೆರ್ ಧರ್ಮಪಾಲ್ ಯು ದೇವಾಡಿಗ ಬೊಂಬೈ, ಶ್ರೀನಿವಾಸ್ ಮಂಕುಡೆ ಮಿಜಾರ್, ಬಿ ಎಂ ಹರೀಶ್ ಬೋಳೂರು, ಅಖಿಲ ಭಾರತ ಒಕ್ಕೂಟ ಕಾರ್ಯಕಾರಿ ಸಮಿತಿದ ಗೌರವಾಧ್ಯಕ್ಷೆರ್ ಶಶಿಧರ್ ಬಿ ಶೆಟ್ಟಿ ಬರೋಡಾ, ಅಧ್ಯಕ್ಷೆರ್ ಎಸಿ ಭಂಡಾರಿ, ಪ್ರಧಾನ ಕಾರ್ಯದರ್ಶಿ ಮುಲ್ಕಿ ಕರುಣಾಕರ್ ಶೆಟ್ಟಿ, ಬೆದ್ರದ ಕೋಶಾಧಿಕಾರಿ ಎಂ ಚಂದ್ರಹಾಸ್ ದೇವಾಡಿಗ, ಬಿ ಜಯಕರ ಶೆಟ್ಟಿ ಇಂದ್ರಾಳಿ, ದಾಮೋದರ್ ನಿಸರ್ಗ, ಜಯಲಕ್ಷ್ಮಿ ಬಿ ಶೆಟ್ಟಿ, ಉಪಾಧ್ಯಕ್ಷೆರ್ ತಾರಾನಾಥ್ ಶೆಟ್ಟಿ ಬೋಳಾರ್, ಪಿ ಎ ಪೂಜಾರಿ, ಜತೆ ಕಾರ್ಯದರ್ಶಿ ಹರೀಶ್ ನೀರ್ ಮಾರ್ಗ, ಕದ್ರಿ ನವನೀತ್ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿ ಡಿ. ರಾಜೇಶ್ ಆಳ್ವ, ಶ್ರೀಪತಿ ಭಟ್ ಬೊಕ್ಕ ಯೋಗೇಶ್ ಕೈರೋಡಿ ಎಚ್ ಧನಕೀರ್ತಿ ಬಲಿಪ ಬೊಕ್ಕ ಅಖಿಲ ಭಾರತ ತುಳುಕೂಟ ನೆತ್ತ 36 ಘಟಕದ ಅಧ್ಯಕ್ಷೆರ್, ಒಕ್ಕೂಟದ ಪ್ರತಿನಿಧಿಲು, ತುಳು ಸಂಘಟನೆದ ಅಧ್ಯಕ್ಷೆರ್ ಬೊಕ್ಕ ಸದಸ್ಯೆರ್ ಇತ್ತೆರ್.