ಯಕ್ಷಗಾನದ ಪರಂಪರೆ ಒರಿಪರೆ ಪ್ರಯತ್ನ ಮಲ್ತೊಂದುಲ್ಲ : ಡಿ.ಹರ್ಷೇಂದ್ರ ಹೆಗ್ಗಡೆರ್ ಸುರತ್ಕಲ್ ಡ್ ಯಕ್ಷಬ್ರಹ್ಮ ಅಗರಿ ಶ್ರೀನಿವಾಸ ಭಾಗವತೆರ್ನ ನೆಂಪುದ ಪ್ರಶಸ್ತಿ ಪ್ರದಾನ

ಸುರತ್ಕಲ್ : ಶ್ರೀ ಕ್ಷೇತ್ರ ಧರ್ಮಸ್ಥಳದ ಪ್ರತಿನಿಧಿಯಾದ್ ಯಾನ್ ಕರ್ತವ್ಯ ಮಲ್ತೊಂದುಲ್ಲೆ. ಧರ್ಮಸ್ಥಳ ಯಕ್ಷಗಾನ ಮೇಳದ ಜಬದಾರಿ ಒಯಿಸೊಂದು ಸಾಧ್ಯ ಆಯಿನಾತ್ ಮಟ್ಟ್ ಗ್ ಯಕ್ಷಗಾನದ ಪರಂಪರೆ ಒರಿತೊಂದು ಬರಿಯರೆ ಪ್ರಯತ್ನ ಬರೊಂದುಲ್ಲ ಪಂದ್ ಧರ್ಮಸ್ಥಳದ ಮೇಳದ ಡಿ.ಹರ್ಷೇಂದ್ರ ಕುಮಾರ್ ತೆರಿಪಾಯೆರ್.

ಆರ್ ಸುರತ್ಕಲ್ ಗೋವಿಂದದಾಸ ಕಾಲೇಜಿಡ್ ಶನಿವಾರ ನಡತಿನ ಯಕ್ಷಬ್ರಹ್ಮ ಅಗರಿ ಶ್ರೀನಿವಾಸ ಭಾಗವತೆರ್ ಅಂಚೆನೆ ರಘುರಾಮ ಭಾಗವತೆರ್ನ ನೆಂಪು ಲೇಸ್ ಡ್ ಅಗರಿ ಪ್ರಶಸ್ತಿ ಸ್ವೀಕಾರ ಮಲ್ತ್ ದ್ ಪಾತೆರಿಯೆರ್.

ಪುಲ್ಯ ಮುಟ್ಟ ಆಟ ತೂವರೆ ಜನಕುಲು ಇಜ್ಜಾಂದಿನ ಪೊರ್ತುಡು ಮಾತೆರ್ಡಲ ಚರ್ಚೆ ಮಲ್ತ್ ದ್ ನಾಲ್ ವರ್ಷೊರ್ದು ಬೊಕ್ಕ ಯಕ್ಷಗಾನನ್ ಕಾಲಮಿತಿಗ್ ಕನವೊಡಾಂಡ್. ಇತ್ತೆ ಕಟೀಲ್ ಮೇಳ ಸೇರ್ದ್ ಮಾತ ಮೇಳಲ ಅವೆನ್ ಅನುಸರಿಸೊಂದುಂಡು.

ಮೇಳದ ಯಜಮಾನೆರೆಗ್ ಮರಿಯಲಡ್ ಯಕ್ಷಗಾನದ ಡ್ರೆಸ್ ರೆಡಿ ಮಲ್ಪುನವು ಮಲ್ಲ ಸವಾಲ್ ಆದುಂಡು. ವೆಲ್ವೆಟ್ ದ ಕುಂಟು ಸೇರ್ದ್ ಸರಿಯಾಯಿನ ಸೊತ್ತುಲು ತಿಕ್ಕುಜಿ. ಚರ್ಮದ ಮದ್ದಳೆ ಮಲ್ಪುನ ಜನ ಇಜ್ಜಿ.ಕ್ಷೇತ್ರ ಮಹಾತ್ಮೆದ ಅಣಿ ದುಂಬು 6-7 ಕೆಜಿ ದುನ್ನ ಇತ್ತ್ಂಡ್. ಇತ್ತೆ ಹಳೆಯಂಗಡಿದ ಕಲಾವಿದೆರ್ ಅವೆನ್ ಫೈಬರ್ ಡ್ ಮಲ್ತ್ ಕೊರ್ತೆರ್. ಮೇಳೊಡು ಆಯಿನಾತ್ ಪರಂಪರೆ ಒರಿಪರೆ ಪ್ರಯತ್ನ ಮಲ್ಪುವ. ಅನಿವಾರ್ಯ ಆಂಡ ಮಾತ್ರ ಬದಲಾವಣೆ ಮಲ್ಪುವ ಪಂದ್ ಆರ್ ಪಂಡೆರ್.

ಅಗರಿ ಶ್ರೀನಿವಾಸ ಭಾಗವತೆರ್ ಬೊಕ್ಕ ರಘುರಾಮ ಭಾಗವತೆರ್ನ ನೆಂಪು ಲೇಸ್ ನಿರಂತರವಾದ್ ನಡಪೊಂದು ಉಪ್ಪೊಡು. ಅಗರಿ ಪ್ರಶಸ್ತಿಗ್ ಅಯಿತ್ತನೇ ಆಯಿನ ಗೌರವ ಉಂಡು. ಅಗರಿ ಶೈಲಿದ ಭಾಗವತ ಪರಂಪರೆ ದುಂಬರಿಯೊಡು ಪಂಡೆರ್.

ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಅನುವಂಶಿಕ ಮೊಕ್ತೇಸರೆರ್ ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಲೇಸ್ ದ ಉದಿಪನ ಮಲ್ತ್ ದ್ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್.

ಪ್ರಸಂಗಕರ್ತೆರ್ ಅಂಚೆನೆ ಪುಗರ್ತೆದ ಭಾಗವತೆರ್ ಆದಿತ್ತಿನ ಅಗರಿ ಶ್ರೀನಿವಾಸ ಭಾಗವತೆರ್ನ ನೆಂಪು ಶಾಶ್ವತವಾದ್ ದೀಪಿನ ನಿಲೆಟ್ಟ್ ಪ್ರತಿ ವರ್ಷಲ ಕೊರೊಂದು ಬೈದಿನ ಅಗರಿ ಪ್ರಶಸ್ತಿನ್ ಈ ಸರ್ತಿ ಯಕ್ಷಗಾನದ ಮಹಾಪೋಷಕೆರ್ ಧರ್ಮಸ್ಥಳದ ಡಿ. ಹರ್ಷೇಂದ್ರ ಕುಮಾರ್ ಮೆರೆಗ್ ಪ್ರದಾನ ಮಲ್ತ್ ದ್ ಮಾನಾದಿಗೆ ಮಲ್ತೆರ್.

ಯಕ್ಷಗಾನ ವಿದ್ವಾಂಸೆರ್ ಡಾ.ಎಂ.ಪ್ರಭಾಕರ ಜೋಷಿ ಮೇರ್ ಅಭಿನಂದನಾ ಭಾಷಣ ಮಲ್ತ್ ದ್, ಹರ್ಷೇಂದ್ರ ಹೆಗ್ಗಡೆರ್ನ ಮುತಾಲಿಕೆಡ್ 40 ವರ್ಷೊರ್ದಿಂಚಿ ಯಕ್ಷಗಾನ ಮೇಳ ಯಶಸ್ವಿಯಾದ್ ನಡತ್ ಬರೊಂದುಂಡು ಪಂಡೆರ್. ಅಂಚೆನೆ ಅಗರಿ ಶ್ರೀ ನಿವಾಸರಾಯೆರ್ ಭಾಗವತೆರ್ ಮಾತ್ರ ಅತ್ತ್, ನಾಟಕ ಬೊಕ್ಕ ಭಜನೆದ ಸಂಗೀತಗಾರೆರಾದಿತ್ತೆರ್. ಕಲಂಕ್ ದಾಂತಿನ ಹೃದಯ ಅರೆನವು. ಸ್ಪಷ್ಟ ಬೊಕ್ಕ ದಿಟ್ಟ ನಿಲುವು ಇತ್ತಿನ ಭಾಗವತೆರ್ ಅಗರಿ ಶ್ರೀನಿವಾಸ ಭಾಗವತೆರ್ ಪಂದ್ ನೆಂಪು ಮಲ್ತೆರ್.

ಈ ಸರ್ತಿದ “ಅಗರಿ ಶೈಲಿ” ಪ್ರಶಸ್ತಿನ್ ಶ್ರೀ ಗೆಜ್ಜೆಗಿರಿ ಮೇಳದ ಪ್ರಧಾನ ಭಾಗವತೆರ್ ಗಿರೀಶ್ ರೈ ಕಕ್ಕೆಪದವು ಮೆರೆಗ್ ಕೊರ್ದು ಮಾನಾದಿಗೆ ಮಲ್ತೆರ್. ಅವ್ವತ್ತಾಂದೆ ಅಗರಿ ಭಾಗವತೆರ್ ಬರೆತಿನ ದೇವಿ ಮಹಾತ್ಮೆ ಪ್ರಸಂಗದ ಮಿತ್ತ್ ಪ್ರಬಂಧ ಬರೆದ್ ಪ್ರಶಸ್ತಿ ಪಡೆದಿನ ಕಟೀಲ್ ಮೇಳದ ಕಲಾವಿದೆರ್, ಬೆದ್ರದ ಎಕ್ಸಲೆಂಟ್ ಕಾಲೇಜಿದ ಉಪನ್ಯಾಸಕೆರ್ ಡಾ.ವಾದಿರಾಜ ಕಲ್ಲೂರಾಯ ಮೆರೆಗ್ “ಅಗರಿ ವಿಶೇಷ ಸಮ್ಮಾನ” ಮಲ್ತೆರ್.

ಮಿತ್ತರ್ಮೆಡ್ ಮಲ್ಲ ಬಿನ್ನೆರಾದ್ ಯಕ್ಷ ಕಲಾ ರಂಗ ಒಡಿಪು ಕಾರ್ಯದರ್ಶಿ ಮುರಲೀ ಕಡೆಕಾರ್, ಬೆದ್ರ ಧನಲಕ್ಷ್ಮಿ ಕ್ಯಾಶ್ಯೂ ಇಂಡಸ್ಟ್ರಿ ದ ಶ್ರೀಪತಿ ಭಟ್ ಬೊಕ್ಕ ಗೋವಿಂದದಾಸ್ ಕಾಲೇಜಿದ ಪ್ರಿನ್ಸಿಪಾಲ್ ಪ್ರೊ. ಕೃಷ್ಣಮೂರ್ತಿ ಲೇಸ್ ಡ್ ಪಾಲ್ ಪಡೆದೆರ್.

ಅಗರಿ ಶ್ರೀನಿವಾಸ ಭಾಗವತರ ಸಂಸ್ಮರಣ ವೇದಿಕೆದ ಅಧ್ಯಕ್ಷೆರ್ ಅಗರಿ ರಾಘವೇಂದ್ರ ರಾವ್ ಪ್ರಸ್ತಾವಿಕವಾದ್ ಪಾತೆರ್ದ್ ಬಿನ್ನೆರೆನ್ ಎದ್ಕೊಂಡೆರ್. ಅಗರಿ ಅಜ್ಜೆರ್ ಬರೆತಿನ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಪ್ರಸಂಗ 1.5 ಲಕ್ಷ ರ್ದ್ ಎಚ್ಚ ಪ್ರದರ್ಶನ ಆದ್ ಗಿನ್ನಿಸ್ ರೆಕಾರ್ಡ್ ಗ್ ಅರ್ಹತೆ ಪಡೆದ್ಂಡ್. ಅವೆನ್ ದಾಖಲ್ ಮಲ್ಪುನ ಬೇಲೆ ಆವೊಡು ಪಂದ್ ಪಂಡೆರ್.

ಕೃಷ್ಣ ಪ್ರಕಾಶ್ ಉಳಿತ್ತಾಯ ಸಭೆ ಸುಧಾರಿಕೆ ಮಲ್ತೆರ್. ಪ್ರಕಾಶ್ ಸುವರ್ಣ ಸೊಲ್ಮೆ ಸಂದಾಯೆರ್.

ಬೊಕ್ಕ ಪೂರ್ಣಿಮಾ ಯತೀಶ್ ರೈ ಮೆರೆನ ಕೂಟದಕ್ಲೆರ್ದ್ ಯಕ್ಷ ಬ್ರಹ್ಮ ಅಗರಿ ಭಾಗವತೆರ್ ಬರೆತಿನ “ಶ್ರೀ ದೇವಿ ಮಹಿಷಮರ್ದಿನಿ” ಯಕ್ಷಗಾನ ಪ್ರದರ್ಶನ ನಡತ್‌ಂಡ್.