April 26, 2023

ಈ ಸರ್ತಿ 50,000 ವೋಟು ಲೀಡ್ ಡ್ ಗೆಂದುನ ವಿಶ್ವಾಸ : ಉಮಾನಾಥ ಕೋಟ್ಯಾನ್

ಮುಲ್ಕಿ : ಐನ್ ವರ್ಷದ ಪಿರವುಡು ಮುಲ್ಕಿ-ಬೆದ್ರ ಕ್ಷೇತ್ರಡ್ ಯಾನ್ ಶಾಸಕೆ ಆದಿತ್ತಿಜಿಡಲ ಜನಕ್ಲೆಡ ವೋಟು ಕೇಂದಿನೆಕ್ಕ್ ಎನ್ನ ಮಿತ್ತ್ ವಿಶ್ವಾಸ ದೀದ್ 30,000 ಸಾರ ವೋಟುದ ಲೀಡ್ ಡ್ ಗೆಂದಾದೆರ್. ಈ ಸರ್ತಿ ಯಾನ್ 5 ವರ್ಷ ಅಭಿವೃದ್ಧಿದ ಬೇಲೆ ಮಲ್ತ್ ತೋಜಾದ್ ವೋಟು ಕೇನೊಂದುಲ್ಲೆ. ಅಂಚಾದ್ ಜನಕುಲು ಎನನ್ 50,000 ವೋಟುದ ಲೀಡ್ ಡ್ ಎನನ್ ಗೆಂದಾವೆರ್ ಪನ್ಪುನ ವಿಶ್ವಾಸ ಉಂಡು ಪಂದ್ ಮುಲ್ಕಿ ಬೆದ್ರ ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ, ಮಾಜಿ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಪಂಡೆರ್.

ಮುಲ್ಕಿದ ಪುನರೂರು ಕಟ್ವಾಣದ ಸ್ವಾಗತ್ ಹೋಟೆಲ್ ದ ಚಾವಡಿಡ್ ಬುಧಾರ ನಡತಿನ ಸುದ್ದಿಗೋಷ್ಠಿಡ್ ಆರ್ ಪಾತೆರಿಯೆರ್.

ಕ್ಷೇತ್ರಡ್ ಅಭಿವೃದ್ಧಿ ಯೇ ಮೂಲ ಮಂತ್ರ. ಆ ಬೇಲೆನ್ ತೊಜಪಾದ್ ಇಲ್ಲ್ ಇಲ್ಲ್ ಗ್ ವೋಟು ಕೇನರೆ ಪೋನಗ ಎಡ್ಡೆ ಅಭಿಪ್ರಾಯ ಬರ್ಪಿನವು ಕೇನ್ನಗ ಕುಷಿ ಆಪುಂಡು. ಮೇ 3 ತಾರೀಕ್ ಗ್ ಕಾಂಡೆ 10 ಗಂಟೆಗ್ ಮುಲ್ಕಿ- ಕೊಲ್ನಾಡ್ ಗ್ ಪ್ರಧಾನಿ ನರೇಂದ್ರ ಮೋದಿ ಉಂದುವೇ ಸುರೂತ್ತ ಸರ್ತಿ ತಾಲೂಕು ಕೇಂದ್ರೊಗು ವೋಟುದ ಪ್ರಚಾರೊಗು ಬರೊಂದುಲ್ಲೆರ್ ಪಂದ್ ಆರ್ ಪಂಡೆರ್.

ಮುಲ್ಕಿ- ಬೆದ್ರ ಕ್ಷೇತ್ರೊಗು ಪ್ರಚಾರದ ಅಂಗವಾದ್ ಬತ್ತಿತ್ತಿನ ಮಹಾರಾಷ್ಟ್ರದ ಬಿಜೆಪಿ ಸಂಸದೆರ್ ಗೋಪಾಲ ಶೆಟ್ರ್ ಪಾತೆರ್ದ್, ಕರ್ನಾಟಕೊಡು 140 ಸೀಟ್ ಗೆಂದುನ ವಿಶ್ವಾಸ ಉಂಡು. ದೇಶದ ಅಭಿವೃದ್ಧಿ ಆವೊಡ್ಡ ಕೇಂದ್ರಡ್ ಲ ರಾಜ್ಯಡ್ ಲ ಬಿಜೆಪಿ ಸರ್ಕಾರ ಬರೊಡು.ಒರ್ಂಬ ವರ್ಷೊಡು ಪ್ರಧಾನಿ ನರೇಂದ್ರ ಮೋದಿ ಮಾತಾ ಕ್ಷೇತ್ರೊಡು ಅಭಿವೃದ್ಧಿ ಮಲ್ದೆರ್. ನಿತಿನ್ ಗಡ್ಕರಿ ಮೆರೆನ ಮುಕೇನ ಮೂಲಸೌಕರ್ಯ ಅಭಿವೃದ್ಧಿ ಮಲ್ದೆರ್ ಪಂಡೆರ್.

ನರೇಂದ್ರ ಮೋದಿ ಆಡಳಿತ ಅವಧಿಡ್ ಆರ್ಥಿಕವಾದ್ ಭಾರಿ ಪ್ರಗತಿ ಆತ್ಂಡ್.1 ಲಕ್ಷ ಕೋಟಿ ಜಿಎಸ್ ಟಿ ಸಂಗ್ರಹ ಆತ್ಂಡ್. ದುಂಬುದ ಅವಧಿಡ್ 1.6 ಲಕ್ಷ ಕೋಟಿ ದ ಟಾರ್ಗೆಟ್ ಉಂಡು ಪಂದ್ ಪಂಡೆರ್.

ಸುದ್ದಿಗೋಷ್ಠಿಡ್ ಮಾಜಿ ಶಾಸಕೆರ್ ಪದ್ಮನಾಭ ಕೊಟ್ಟಾರಿ, ಮಹಾರಾಷ್ಟ್ರ ಬಿಜೆಪಿ ಉಪಾಧ್ಯಕ್ಷೆರ್ ಹರೀಶ್ ಶೆಟ್ಟಿ ಎರ್ಮಾಳ್, ಜಿಲ್ಲಾ ಬಿಜೆಪಿ ಪ್ರಕೋಷ್ಠದ ದಿವಾಕರ ಸಾಮಾನಿ ಚೇಳಾಯಿರುಗುತ್ತು, ಭುವನಾಭಿರಾಮ ಉಡುಪ, ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಅಂಚನ್, ಮುಲ್ಕಿ ಬೆದ್ರ ಮಂಡಲ ಅಧ್ಯಕ್ಷೆರ್ ಸುನಿಲ್ ಆಳ್ವ, ಕೇಶವ ಕರ್ಕೇರ, ವಿನೋದ್ ಬೊಳ್ಳೂರು, ವಿನೋದ್ ಬೆಳ್ಳಾಯಿರು ಮೊಕುಲು ಮಾತ ಇತ್ತೆರ್.

ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಪೊಸ ಅಧ್ಯಕ್ಷೆರಾದ್ ಶ್ರೀಕಾಂತ ಎಮ್ ಭಂಡಿವಾಡ ನೇಮಕ

ಕುಡ್ಲ: ರಾಷ್ಟ್ರದ ಪ್ರಮುಖ ಗ್ರಾಮೀಣ ಬ್ಯಾಂಕ್ ಲೆನ ಸಾಲ್ ಡ್ ಇಪ್ಪುನ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಪೊಸ ಅಧ್ಯಕ್ಷೆರಾದ್ ಶ್ರೀಕಾಂತ ಎಮ್ ಭಂಡಿವಾಡ (54) ನೇಮಕ ಆತೆರ್.

ಮೂಲತಃ ಧಾರವಾಡದಾರಾಯಿನ ಮೇರ್ ಕೃಷಿಟ್ಟ್ ಸ್ನಾತಕೋತ್ತರ ಪದವಿ ಪಡೆತೆರ್. 1994 ಟ್ಟ್ ಕೃಷಿ ವಿಸ್ತರಣಾ ಅಧಿಕಾರಿಯಾದ್ ಕೆನರಾ ಬ್ಯಾಂಕ್ ಸೇರಿನ ಮೆರೆಗ್, ಬ್ಯಾಂಕಿಂಗ್ ರಂಗಡ್ 29 ವರ್ಷದ ಅನುಭವ ಉಂಡು. ಅಂಚೆನೆ ಹರ್ಯಾಣ, ರಾಜಸ್ಥಾನ್, ಬಿಹಾರ್ ಸೇರಿನಂಚೆನೆ ರಾಜ್ಯದ ದಾವಣಗೆರೆ, ಬೆಂಗ್ಲೂರ್ ಬೇತೆ ಬೇತೆ ಕಡೆಟ್ ಶಾಖೆದ ಮುಖ್ಯಸ್ಥೆರಾದ್, ಪ್ರಾದೇಶಿಕ ಮುಖ್ಯಸ್ಥೆರಾದ್, ಸರ್ಕಲ್ ಮುಖ್ಯಸ್ಥೆರಾದ್, ಕೆನರಾ ಬ್ಯಾಂಕ್ ದ ಕೆನ್ ಫಿನ್ ಹೋಮ್ಸ್ ದ ಉಪ ಕಾರ್ಯನಿರ್ವಾಹಕ ನಿರ್ದೇಶಕೆರಾದ್ 3 ವರ್ಷ ಸೇವೆ ಸಂದಾದೆರ್.

ಅತ್ತಂದೆ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಅಧ್ಯಕ್ಷೆರಾದ್ ಅಧಿಕಾರ ಸ್ವೀಕಾರ ಮಲ್ಪುನ ದುಂಬು, ಮೇರ್ 40 ಸಾರ ಕೋಟಿ ರೂ.ರ್ದ್ ಎಚ್ಚ ವ್ಯವಹಾರ ಇಪ್ಪುನ ಬಿಹಾರ್ ರಾಜ್ಯಡ್ ಇಪ್ಪುನ ಕೆನರಾ ಬ್ಯಾಂಕ್ ದ ಪಾಟ್ನಾ ಸರ್ಕಲ್‌ದ ಮುಖ್ಯಸ್ಥೆರಾದಿತ್ತೆರ್.

ಕೃಷಿಟ್ಟ್ ಸ್ನಾತಕೋತ್ತರ ಪದವೀಧರೆರಾದಿಪ್ಪುನ ಮೇರ್ ಕೆನರಾ ಬ್ಯಾಂಕ್ ದ ಗ್ರಾಮೀಣ ಶಾಖೆಡ್ ಕೃಷಿ ವಿಸ್ತರಣಾ ಅಧಿಕಾರಿಯಾದ್, ಕೆನರಾ ಬ್ಯಾಂಕ್, ಪ್ರಧಾನ ಕಚೇರಿದ ಕೃಷಿ ಸಲಹಾ ಸೇವಾ ವಿಭಾಗಡ್ ಸಲಹೆಗಾರೆರಾದ್, ಕೆನರಾ ಬ್ಯಾಂಕ್ ದ ಪ್ರಧಾನ ಕಚೇರಿಡ್ ಸಿಎಂಡಿ ಸೆಕ್ರೆಟರಿಯೇಟ್‌ಡ್ ಬೇಲೆ ಮಲ್ತಿನ ಅನುಭವ ಮೆರೆಗ್ ಉಂಡು.

ಕೃಷಿ, ಎಂಎಸ್‌ಎಂಇ ಬೊಕ್ಕ ಗ್ರಾಮೀಣ ಹಣಕಾಸು ಕ್ಷೇತ್ರದ ಮೆರೆನ ಅನುಭದ ಪ್ರಯೋಜನ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಮತ್ತದರ ಗ್ರಾಹಕೆರೆಗ್ ತಿಕಿಯೆರೆ ಉಂಡು. ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಇತ್ತೆದ 9 ಜಿಲ್ಲೆದ ವ್ಯಾಪ್ತಿಡ್ 629 ಶಾಖೆ ಉಂಡು. 33150 ಕೋಟಿ ರೂ. ರ್ದ್ ಎಚ್ಚಾದ ವೈವಾಟ್ ನಡಪಾವೊಂದು ಉಂಡು.

ಬ್ಯಾಂಕ್ ದ ದುಂಬುದ ಅಧ್ಯಕ್ಷೆರ್ ಪಿ ಗೋಪಿಕೃಷ್ಣ ತನ್ನ ಮಾತೃ ಸಂಸ್ಥೆ ಕೆನರಾ ಬ್ಯಾಂಕ್ ದ ಬೆಂಗ್ಲೂರ್ ಸರ್ಕಲ್ ಆಫೀಸ್ ದ ಮುಖ್ಯಸ್ಥೆರಾದ್ ಪೊವೊಂದು ಉಲ್ಲೆರ್. ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಗೋಪಿ ಕೃಷ್ಣ ಮೆರೆನ ಮುತಾಲಿಕೆಡ್ ಸುಮಾರ್ ರಚಾನಾತ್ಮಕ ಯೋಜನೆಲೆನ್ ಅನುಷ್ಠಾನ ಮಲ್ತ್ ನೆನ್ ಮುಲ್ಪ ನೆನೆಪೊಲಿ. ಸೋಮಾರ ಧಾರವಡದ ಬ್ಯಾಂಕ್ ದ ಪ್ರಧಾನ ಕಚೇರಿಡ್ ನಡತಿನ ಲೇಸ್ ಡ್ ಪಿ ಗೋಪಿಕೃಷ್ಣ ಮೆರೆನ್ ಬುರ್ದು ಕೊರಿಯೆರ್.

ದುಬೈಡ್ “ವಿಶ್ವ ಪಟ್ಲ ಸಂಭ್ರಮ-2023” ಲೇಸ್ ಗ್ ಯು.ಎ.ಇ ದ ತುಳು ಕನ್ನಡಿಗೆರ್ ಸಂಪೂರ್ಣ ಸಹಕಾರ ಕೊರೊಡು: ಸರ್ವೋತ್ತಮ ಶೆಟ್ಟಿ

ದುಬೈಡ್ ನಡಪರೆ ಇಪ್ಪುನ “ವಿಶ್ವ ಪಟ್ಲ ಸಂಭ್ರಮ-2023” ವಿಶ್ವ ಮಟ್ಟಡ್ ಪುಗರ್ತೆ ಪಡೆಯೆರೆ ಉಂಡು. ಅತ್ತಂದೆ ವಿಶ್ವ ಮಟ್ಟಡ್ ನಡಪುನ ಈ ಲೇಸ್ ಗ್ ಯು.ಎ.ಇ ದ ತುಳು ಕನ್ನಡಿಗೆರ್ ಸಂಪೂರ್ಣ ಸಹಕಾರ ಕೊರೊಡು ಪಂದ್ ಪಟ್ಲ ಫೌಂಡೇಶನ್ ದುಬೈ ಘಟಕದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ ಪಂಡೆರ್.

ಜೂ.11 ಕ್ಕ್ ದುಬೈ ಕರಮಾದ ಶೇಖ್ ರಶೀದ್ ಅಡಿಟೋರಿಯಂಡ್ (ಇಂಡಿಯನ್ ಸ್ಕೂಲ್ ಕರಮ- ವೂದ್ ಮೆಹತಾ) ನಡಪರೆ ಇಪ್ಪುನ ವಿಶ್ವ ಪಟ್ಲ ಸಂಭ್ರಮ ಬೊಕ್ಕ ದುಬೈ ಯಕ್ಷ ಉಚ್ಚಯದ ಅಂಗವಾದ್ ನಡಪರೆ ಇಪ್ಪುನ ಗೌಜಿದ ಆಟ ದಶಾವತಾರ ನೆತ್ತ ಲೆಪ್ಪೋಲೆ ಬೊಕ್ಕ ಟಿಕೆಟ್ ಬುಡುಗಡೆ ಲೇಸ್ ಇಂಚಿಪ್ಪ ಹೋಟೇಲ್ ಫಾರ್ಚೂನ್ ಪ್ಲಾಝದ ಬ್ಯಾಂಕ್ವೆಟ್ ಹಾಲ್ ಡ್ ನಡತ್ಂಡ್.

ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಮೇರ್ ಸಭೆನ್ ಉದ್ದೇಶಿಸಾದ್ ಪಾತೆರ್ದ್, ಈ ಲೇಸ್ ಡ್ ಪಟ್ಲ ಟ್ರಸ್ಟ್ ದ ಗೌರವಾಧ್ಯಕ್ಷೆರ್ ಸದಾಶಿವ ಶೆಟ್ಟಿ ಕುಳೂರು ಕನ್ಯಾನ, ಪ್ರಧಾನ ಸಂಚಾಲಕೆರ್ ಹರೀಶ ಶೆಟ್ಟಿ ಐಕಳ, ಬೊಕ್ಕ ಮತ ಪಟ್ಲ ಫೌಂಡೇಶನ್ ದ 40 ಘಟಕದ ಪದಾಧಿಕಾರಿಲು ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪಂಡೆರ್.

ಕುಮಾರಿ ವೈಷ್ಣವಿ ಮನೋಹರ್ ಶೆಟ್ಟಿಗಾರ್ ಬೊಕ್ಕ ಕುಮಾರಿ ಪ್ರಾಪ್ತಿ ಜಯಾನಂದ ಪಕ್ಕಳ ಮೊಕ್ಲೆನ ಪ್ರಾರ್ಥನೆದೊಟ್ಟಿಗೆ ಲೇಸ್ ಸುರು ಆಂಡ್.

ಬೊಕ್ಕ ಲೇಸ್ ಗ್ ಬತ್ತಿನ ಬಿನ್ನೆರೆನ್ ಯಕ್ಷಗಾನ ಅಭ್ಯಾಸ ಕೇಂದ್ರದ ಸಂಚಾಲಕೆರ್ ದಿನೇಶ ಶೆಟ್ಟಿ ಎದ್ಕೊಂದು ಪ್ರಾಸ್ತಾವಿಕ ಪಾತೆರ್ದ್, ವಿಶ್ವ ಪಟ್ಲ ಸಂಭ್ರಮ ಬೊಕ್ಕ ದಶಾವತಾರ ಆಟದ ಪ್ರಸಂಗದ ರೂಪುರೇ‍ಷೆನ್ ಸಭೆಕ್ಕ್ ತೆರಿಪಾಯೆರ್. ಬೊಕ್ಕ ಯಕ್ಷಧ್ರುವ ಪಟ್ಲ ಘಟಕದ ಸ್ಥಾಪಕೆರ್ ಸತೀಶ ಶೆಟ್ಟಿ ಮೆರೆನ ಗಾನ ಸಾರಥ್ಯಡ್ ನಡಪರೆ ಇಪ್ಪುನ ದಶಾವತಾರ ಯಕ್ಷಗಾನ ಲೇಸ್ ಡ್ ಪಾಲ್ ಪಡೆಯೆರೆ ಇಪ್ಪುನ ಬಿನ್ನೆರಾದ್ ಕಲಾವಿದೆರ್, ಗಾನ ವಿಶಾರದ ರವಿಚಂದ್ರ ಕನ್ನಡಿಕಟ್ಟೆ, ಪುಗರ್ತೆದ ಚೆಂಡೆ-ಮದ್ದಳೆ ವಾದಕೆರ್ ಪದ್ಮನಾಭ ಉಪಾಧ್ಯಾಯ, ಚೈತನ್ಯಕೃಷ್ಣ ಪದ್ಯಾಣ, ವರ್ಣ ವಸ್ತ್ರಾಲಂಕಾರ ತಜ್ಞೆರ್ ಗಂಗಾಧರ ಶೆಟ್ಟಿಗಾರ್ ಕಿನ್ನಿಗೋಳಿ, ನಿತಿನ್ ಕುಂಪಲ ಬೊಕ್ಕ ಮನೋಜ್ ಶೆಟ್ಟಿಗಾರ್ ಹಳೆಯಂಗಡಿ ಮೊಕ್ಲೆನ ಪೊಲಬುನ್ ಸಭೆಕ್ಕ್ ಕೊರಿಯೆರ್.

ಯುಎಇ ಯಕ್ಷಗಾನ ಅಭ್ಯಾಸ ಕೇಂದ್ರದ ಗುರುಕುಲು ಪ್ರಸಂಗ ನಿರ್ದೇಶಕೆರ್ ಶೇಖರ್ ಡಿ. ಶೆಟ್ಟಿಗಾರ್ ಕಿನ್ನಿಗೋಳಿ ಮೇರ್, ದಶಾವತಾರದ ಕಥಾಹಂದರ- ಪ್ರದರ್ಶನದ ಇಸೇಸತೆದೊಟ್ಟಿಗೆ ದಶಾವತಾರ ಪ್ರಸಂಗಲೆರ್ದ್ ಆಯ್ಕೆ ಮಲ್ತಿನ ಮೂಲ ಪ್ರಸಂಗ ಕಬಿಲೆನ ಪೊಲಬುನ್ ಸಭೆಕ್ಕ್ ತೆರಿಪಾಯೆರ್.

ಅಂಚೆನೆ ಚಾವಡಿಡ್ ಪಾಲ್ ಪಡೆದಿತ್ತಿನ ಹರೀಶ್ ಶೇರಿಗಾರ್ (ಉದ್ಯಮಿ, ಕನ್ನಡ ಬೊಕ್ಕ ತುಳು ಚಿತ್ರ ನಿರ್ಮಾಪಕೆರ್), ಹರೀಶ್ ಬಂಗೇರ (ಉದ್ಯಮಿ, ಪೋಷಕೆರ್-ಕರ್ನಾಟಕ ಸಂಘ ದುಬೈ, ಕನ್ನಡ ಚಿತ್ರ ನಿರ್ಮಾಪಕೆರ್), ಪುತ್ತಿಗೆ ವಾಸುದೇವ ಭಟ್ (ಗೌರವಾಧ್ಯಕ್ಷೆರ್, ಯಕ್ಷ ಧ್ರುವ ಪಟ್ಲ ಫೌಂಡೇಶನ್ UAE), ನಾಗರಾಜ ರಾವ್ (ಆಡಳಿತ ನಿರ್ದೇಶಕೆರ್- ಭೀಮ ಜುವೆಲ್ಲರಿ ದುಬೈ), ಬಿ.ಕೆ ಗಣೇಶ್ ರೈ (ಕಲಾತ್ಮಕ ನಿರ್ದೇಶಕೆರ್), ಸುಧಾಕರ ರಾವ್ ಪೇಜಾವರ (ಉದ್ಯಮಿ, ಬ್ರಾಹ್ಮಣ ಸಮಾಜ ಯುಎಇ), ವರದರಾಜ್ ಶೆಟ್ಟಿಗಾರ್ (ಪದ್ಮಶಾಲಿ ಸಮುದಾಯ, ದುಬೈ), ಬಾಲಕೃಷ್ಣ ಸಾಲಿಯಾನ್ (ಸಂಘಟಕೆರ್, ಮೊಗವೀರ ಸಮುದಾಯ ದುಬೈ), ಮನೋಹರ್ ತೋನ್ಸೆ (ಲೇಖಕೆರ್, ಬಿಲ್ಲವಾಸ್ ಅಬುಧಾಬಿ), ಸುಂದರ್ ಶೆಟ್ಟಿ (ಉದ್ಯಮಿ, ನಿಹಾಲ್ ರೆಸ್ಟೋರೆಂಟ್ ಅಬುಧಾಬಿ), ರಮಾನಂದ ಶೆಟ್ಟಿ (ಉದ್ಯಮಿ‌ ಕಲಾ ಪೋಷಕೆರ್), ಶಶಿಧರ್ ನಾಗರಾಜಪ್ಪ (ಕನ್ನಡ ಪಾಠ ಶಾಲೆ ದುಬೈ), ಆತ್ಮನಂದ ರೈ (ತುಳು ಚಿತ್ರ ನಿರ್ಮಾಪಕೆರ್), ಪ್ರಭಾಕರ ಸುವರ್ಣ ಕರ್ನಿರೆ (ಅಧ್ಯಕ್ಷೆರ್, ಬಿಲ್ಲವ ಫ್ಯಾಮಿಲಿ ದುಬೈ) ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.

ಬೊಕ್ಕ ಮತ ಗಣ್ಯೆರ್ ಒಂಜಾದ್, ಲೇಸ್ ದ ಲೆಪ್ಪೋಲೆ ಬೊಕ್ಕ ಟಿಕೆಟ್‌ ಬುಡುಗಡೆ ಮಲ್ತ್ ದ್, ಸಮಸ್ತ ಯುಎಇಡ್ ಆಟದ ಕಂಪುನ್ ಇಲ್ಲ ಇಲ್ಲಗ್ ಪಸರಿಸಾದ್, ಎಲ್ಯೆರ್ದ್ ಮಲ್ಲ ಮುಟ್ಟ ಆಟದ ಕಲೆನ್ ಬುಲೆಪಾವೊಂದು ತನ್ನ ಅರ್ವಾಚೀನ ಪ್ರಬುದ್ಧ ಆಟದ ಕಲೆನ್ ಪಸರಿಸುನ ಯಕ್ಷಗಾನ ಅಭ್ಯಾಸ ಕೇಂದ್ರದ ಈ ಲೇಸ್ ನ್ ಕಾರ್ಯಕ್ರಮವನ್ನು ಬೆಂಬಲಿಸಾಯೆರೆ ಬೊಡಾಯಿನ ಅಗತ್ಯನ್ ತೆರಿಪಾಯೆರ್. ನಮ್ಮೊಟ್ಟಿಗೆ ಮತ ಯುಎಇದ ಸರ್ವ ಕಲಾಭಿಮಾನಿಲು, ಕೌಟುಂಬಿಕ-ಸಾಂಸ್ಕೃತಿಕ ಸಂಘಟನೆಲು ಪೂರ್ಣ ಪ್ರಮಾಣರ್ದ್ ಬೆಂಬಲಿಸಾವೊಡು ಪಂದ್ ಪಂಡೆರ್.

ಯಕ್ಷಗಾನ ಅಭ್ಯಾಸ ಕೇಂದ್ರದ ಸದಸ್ಯೆರ್ ರಾಜೇಶ್ ಕುತ್ತಾರು ಲೇಸ್ ದ ಸುಧಾರಿಕೆ ಮಲ್ತೆರ್. ಗಿರೀಶ್ ನಾರಾಯಣ ಸೊಲ್ಮೆ ಸಂದಾಯೆರ್.

May 1 st: Hosanadu Shri Annapoorneshwari Kshetra-Devi Mahatmay Yakshagana to be played ಮೇ1: ಹೊಸನಾಡು ಶ್ರೀ ದೇವಿ ಅನ್ನಪೂರ್ಣೇಶ್ವರಿ ಕ್ಷೇತ್ರಡ್ ಶ್ರೀ ದೇವಿ ಮಹಾತ್ಮೆ ಆಟ

ಕೊಡ್ಯಡ್ಕ: ಹೊಸನಾಡು ಶ್ರೀ ದೇವಿ ಅನ್ನಪೂರ್ಣೇಶ್ವರಿ ಕ್ಷೇತ್ರಡ್ ಮೇ1 ಕ್ಕ್ ಸೋಮಾರ ಬಯ್ಯಗ್ 5.30 ಕ್ಕ್ ಕಟೀಲ್ ಮೇಳದಕ್ಲೆರ್ದ್ ಸಂಪೂರ್ಣ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.

ಈ ಆಟ ಕ್ಷೇತ್ರದ ಸ್ಥಾಪಕ ಮೊಕ್ತೇಸರೆರ್ ದಿ.ಡಾ. ಕೊಡ್ಯಡ್ಕ ಜಯರಾಮ ಹೆಗ್ಡೆ ಬೊಕ್ಕ ಕುಟುಂಬದಕ್ಲೆನ ಸೇವೆದ ಆಟ ಆದ್ ಗೊಬ್ಬುವೆರ್.

ಈ ಲೇಸ್ ಗ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

May 1 st: Hosanadu Shri Annapoorneshwari Kshetra-Devi Mahatmay Yakshagana to be played

Kodyadka : The Yakshagana Devi Mahatmay will be played at the temple premises on May 1st from 5.30p.m onwards which has been organised by the family of the founder managing trustee of the temple late Jayaram Hegde.

Vasanth Bernard nominated as candidate’s election agent of the Congress party for Mulki Moodbidri Vidhana Sabha constituency ಮುಲ್ಕಿ ಬೆದ್ರ ವಿಧಾನ ಸಭೆ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ವೋಟುದ ಏಜೆಂಟ್ ಆದ್ ವಸಂತ್ ಬೆರ್ನಾಡ್ ನೇಮಕ

ಮುಲ್ಕಿ ಬೆದ್ರ ವಿಧಾನ ಸಭೆ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಮಿಥುನ್ ರೈ ಮೆರೆನ ವೋಟುದ ಏಜೆಂಟಾದ್ ಕೆಪಿಸಿಸಿ ಕೋಆರ್ಡಿನೇಟರ್ ಎಚ್ ವಸಂತ್ ಬೆರ್ನಾಡ್ ಮೇರೆನ್ ನೇಮಕ ಮಲ್ದೆರ್ ಪಂದ್ ಅಭ್ಯರ್ಥಿ ಮಿಥುನ್ ರೈ ಮೆರೆನ ಕಚೇರಿದ ಪ್ರಕಟಣೆಡ್ ತೆರಿಪಾದ್ಂಡ್.

Hotel enterpreneur with roots in Tulunadu kidnapped in Mumbai ಬೊಂಬೈಡ್ ತುಳುನಾಡ್ ಮೂಲದ ಹೊಟೇಲ್ ಉದ್ಯಮಿ ಕಿಡ್ನ್ಯಾಪ್

ಬೊಂಬೈದ ವೀರಾ ರೆಸಿಡೆನ್ಸಿದ ಧಣಿ, ತುಳುನಾಡ್ ಮೂಲದ ಹೊಟೇಲ್ ಉದ್ಯಮಿನ್ ಪುಂಡೆರ್ ಕಿಡ್ನ್ಯಾಪ್ ಮಲ್ದೆರ್.

ಮೆರೆನ್ ಪೊಲೀಸೆರ್ ಕೂಡ್ಲೆ ಕಾರ್ಯಾಚರಣೆರ್ದ್ ರಕ್ಷಣೆ ಮಲ್ದೆರ್. ಕಿಡ್ನ್ಯಾಪ್ ಆಯಿನ ಉದ್ಯಮಿ ಅನುಪ್ ಶೆಟ್ಟಿ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಏಳ್ ಜನ ಆರೋಪಿಲೆನ್ ಅರೆಸ್ಟ್ ಮಲ್ತ್ ದ್ ಕೇಸ್ ದಾಖಲ್ ಮಲ್ದೆರ್ ಪಂದ್ ಪೊಲೀಸ್ ಅಧಿಕಾರಿಲು ತೆರಿಪಾದೆರ್.

Hotel enterpreneur with roots in Tulunadu kidnapped in Mumbai

The owner of Veera Residency in Mumbai hailing from Tulunadu was kidnapped by miscreants.

The police were able to rescue him in a rescue operation.The kidnapped person was identified as Anup Shetty